Switch

Chapter - 22

Unicode

အပိုင်း ၂၂။ အရေးကြီးကိစ္စ

ရှောင်းကျန့်က ကျောင်းပြန်တက်သည့်ရက်တွင် ကျောက်ဖေးလင်ကကျောင်းထွက်သွားခဲ့ပြီး သူ၏အဖေဟာလည်း ကျောင်း၏ရှယ်ယာဝင်အဖြစ်မှ ထုတ်ပယ်ခံခဲ့ရသည်ဟု ရှောင်းကျန့်ကြားခဲ့သည်။ တရားခံကတော့ ကိုယ်တိုင်ဝန်မခံသော်ငြား သူကတော့ သိနေပါသည်။

" ကျောင်းသားရှောင်းကျန့်က သည်အခန်းကလားဗျ "

ယူနီဖောင်းနှင့်ကျောင်းစောင့်က အခန်းတံခါးဝသို့ရောက်ရှိလာပြီးနောက် အတန်းရှိဆရာကို လေးလေးစားစားမေးသည်။ စာသင်ချိန်ဖြစ်သောကြောင့် တိတ်ဆိတ်နေသောအခန်းမှာ ယခုအချိန်တွင် ပိုလို့တောင် တိတ်ဆိတ်နေလေ၏။ ဆရာက ရှောင်းကျန့်ကို တစ်ချက်ကြည့်လိုက်ပြီး ခေါင်းညိတ်၍ တုံ့ပြန်သည်။

" သူ့အိမ်က အရေးကြီးကိစ္စရှိလို့ လာခေါ်လို့ပါ "

ထိုစကားအဆုံးတွင် တစ်တန်းလုံး၏ အကြည့်များက ရှောင်းကျန့်ဆီသို့ ရောက်ရှိလာပြီး သူတို့၏ တီးတိုးပြောချင်စိတ်ကို မနည်းပင်အောင့်အီးထားရသည်။ ဤအတန်းချိန်၏ဆရာက အတော်လေးကို အပေါက်ဆိုးပြီး အမှားလုပ်မိသည်နှင့်မတန်အောင် အပြစ်ပေးခံရသောကြောင့် မည်သည့်ကျောင်းသားမျှ မလှုပ်ရဲကြပေ။ သို့သော် သူတို့၏ မျက်ဝန်းများမှ စပ်စုမှုတို့ကို မဖုံးကွယ်နိုင်ပါချေ။

ရှောင်းကျန့်ခန္ဓာကိုယ်နှင့် ဝမ်ရိပေါ်က ဘေးရှိရှောင်းကျန့်အစစ်ဖြစ်သူကို ကြည့်လိုက်သည့်အခါ စိုးရိမ်စိတ်ပြည့်နေသည်ကို တွေ့လိုက်ရသည်။ စာသင်ချိန်အတွင်း အိမ်မှအခေါ်ခံရသည်က မည်မျှကြောက်ဖို့ကောင်းသည့်ခံစားချက်လဲဆိုသည်ကို ကျောင်းသားတိုင်းသိပါလိမ့်မည်။ အရေးကြီးကိစ္စဆိုသည်က တွေးထင်လို့မရနိုင်သည့်ကိစ္စကြီးတစ်ခုလည်းဖြစ်နိုင်ပါသည်။ ဝမ်ရိပေါ်က ရှောင်းကျန့်ကို မျက်ဝန်းများနှင့် နှစ်သိမ့်ပေးလိုက်ပြီးနောက် စာရေးကိရိယာများကိုသိမ်း၍ ဆရာကိုနှုတ်ဆက်ပြီးနောက် အတန်းထဲမှ ထွက်သွားပါတော့သည်။

ထို့နောက် အတန်းအတွင်းရှိ လေထုတွင် စာရှင်းပြသံများ ပြန်လည်ဝင်ရောက်လာပါတော့သည်။ ကျန်ခဲ့သည့် ရှောင်းကျန့်မှာတော့ ထိုကိစ္စကြောင့် စိတ်နှင့်လူနှင့်ပင် မကပ်ပါချေ။ သူ့အခြေအနေက တော်တော်ဆိုးဆိုးရွားရွားဖြစ်သွားဟန်တူပါသည်၊ ဆရာပါသတိထားမိသွားပြီး ဆယ့်ငါးမိနစ်ခန့်အဆူခံရပြီးနောက် အတန်းရှေ့တွင် မတ်တပ်ရပ်ရန် အပြစ်ပေးခံရပါတော့သည်။ သို့သော် သူ့ရင်ထဲက ပူလောင်မှုကို မည်သူသိလိမ့်ပါမည်နည်း။ ရှောင်းအိမ်တော်တွင် မကောင်းသည့်ကိစ္စတစ်ခုခုဖြစ်မည်ကို သူစိုးရိမ်ပါသည်။ ဤကဲ့သို့ အရေးတကြီး ကျောင်းမှလာခေါ်ရခြင်းကိစ္စက သေချာပေါက်ကို သေးငယ်မည်တော့ မဟုတ်ပါချေ။ အထူးသဖြင့် သူ့မိဘများကဲ့သို့ သားအပေါ် မျှော်လင့်ချက်အလွန်ထားသည့်လူများက တော်ရုံကိစ္စနှင့် သားကို ကျောင်းပျက်ခံမည်မဟုတ်ကြောင်း သူသိပါသည်။