សំណព្វចិត្តប៉ាតូច{រដូវកាលទី២}

ភាគ:៤១

បរិយាកាសព្រឹកនេះ ស្រស់ស្រាយជាងសព្វមួយដង លោកជំទាវចន ក្រោកពីព្រឹកព្រលឹម បញ្ជាឱ្យមេផ្ទះឱ្យធ្វើបបរគ្រឿងសាច់ក្តាម និងរម្ងាស់ស៊ុបយិនសិនពិសេស ទាំងនេះសុទ្ធសឹង តែជាប្រភេទអាហារប៉ូវកម្លាំង គាត់បានចូលផ្ទះបាយត្រួតពិនិត្យដោយផ្ទាល់ មុននិងមុខម្ហូបមួយមុខៗចេញឱ្យចៅស្រីសំណព្វចិត្ត និងកូនប្រុសតែម្នាក់ របស់គាត់ញ៉ាំ ជួនជាថ្ងៃនេះលោកជំទាវ មានទំនេរ មិនបានចេញទៅ ធ្វើធុរៈនៅឯសមាគមន៍ ក៏ចង់ឆ្លៀតពេល ចងនៅផ្ទះមួយថ្ងៃ មើលថែកូន មើលថែចៅ និងរៀបចំកែតម្រូវ វិន័យក្នុងផ្ទះ។

" ញាប់ដៃញាប់ជើងទៅ ចៅស្រីយើងចុះមកឥលូវហើយ
រៀបចំបាយប្រអប់ ទឹកផ្លែឈើស្រស់ ឱ្យរួចរាល់មុននិងចៅយើងចុះមក " លោកជំទាវចន ដោះអៀមធ្វើអាហារចេញពីខ្លួន ឫកពាឆ្មើងឆ្មៃ ទោះបីជាលោកជំទាវមានអាយុច្រើនក៏ដោយ តែលោកជំទាវកាចឆ្នាសមិនប្រែប្រួល សម្តីសម្តៅបញ្ជាអ្នកបម្រើពេញផ្ទះ។

" ចាសលោកជំទាវ ចុះម្ចាស់តូច ពួកយើង..." អ៊ំមេផ្ទះដែលមានវ័យចំណាស់ជាងគេ កំពុងរៀបប្រអប់បាយឱ្យអ្នកនាងតូចហ្វីយ៉ា គាត់ក៏ឆ្លៀតសួរពីម្ចាស់តូច ព្រោះរាល់ដងម្ចាស់តូចមិនដែលញ៉ាំអាហារពេលព្រឹកទេ។

" អ៊ំធ្វើការនៅវិមានចន រាប់ឆ្នាំហើយ មិនដឹងទម្លាប់ប្រុសតូច
ទៀត? " បម្រុងនិងដើរចាកចេញទៅសាឡុងហើយ លោកជំទាវ
ក៏បង្វិលខ្លួនងាកតាមប្រភពសំឡេង សួរនាំមុននេះ ថែមទាំងបានស្តីថាឱ្យអ៊ំស្រីមេផ្ទះ។

" សុំទោសលោកជំទាវ ព្រោះម្ចាស់តូចទើបតែមកនៅទីនេះវិញ ខ្ញុំភ្លេចភ្លាំងច្រើន " គាត់ឱនមុខចុះ បន្តរៀបចំអាហារដាក់ចានត្រៀមសម្រាប់នាងតូចហ្វីយ៉ានិងម្ចាស់តូច។

" ប្រុសតូច កូនខ្ញុំស្រួលទេ ញ៉ាំទឹកដោះគោក្តៅមួយកែវ
និងនំប័ងអ៊ីតាលីគៀប ប៉ុណ្ណឹងក៏មិនចាំដែរ តែព្រឹកនេះត្រូវបង្ខំឱ្យគេញាំស៊ុបយិនសិនផង អ៊ំយល់បានទេ? " លោកជំទាវដើរត្រឡប់មកវិញក៏លើកថាសអាហារត្រៀម សម្រាប់កូនប្រុសទៅមុន ទឹកមុខមិនសូវរីកពេលអ្នកបម្រើ មិនចេះរៀបចំទុកដាក់អាហារ ម្ចាស់ផ្ទះតាមចំណូលចិត្ត ពេលងាកទៅវិញជុងហ្គុកក៏ចុះមកដល់ល្មម ឱបចង្កេះលោកជំទាវ រួចថើបថ្ពាល់គាត់មួយខ្សឺតទៀត។