مافياا ❤️‍🔥🌼

p 10

الحلقة 10

قاعدين يحكيو يسمعو في حس و ضرب و رصاص صوت إنذارات وقف سراج مفجوع يجري للشباك حلو يشوف في رجال من القوات الخاصة ملاو الفيلا كل عرفهم من ثيابهم تلفت ل أدم
سراج: هذو وش جابهم
ادم: شكون
سراج: القوات الخاصة نوض هيا
وقف وخرجو يجريو وحتى حسام سمع حسهم كلموه الرجال
حسام: وش كاين تحت ديرو بالكم حد يطلع هنا ....وقفو و نزلو سلاحكم كل درك ننزل....
ريان: حسام وش كاين
مفجوعة ترعش وقف حكمها ضمها ليه
حسام: جيبي لينا راني وراك جاي
ريان: اوكي ..
حسام: الو ....انتبهو منيش حاب حرب هنا تصير حاجة على عايلتي نقتلكم انا بيدي ...قلهم ينزلو كل سلاحهم
مشا لحق ريان لي كانت مع لينا حط يدو ورا راسها وقرب يحكي معاها
حسام: شوفي معايا وافهمي لي نقولو اذا كشما صار عليا اليوم تذكري لي نهار ديتيني عندو كي قوصو عليا
حركت راسها ايه
حسام: نحبك تتاصلي بيه و تروحي لعندو انتي و ريان واحد ما يعرفو و هو يقدر يخبيكم فهمتيني
ريان: ايه
باسها على راسها و شاف في لينا و مشا يجري يشوف لي صاير تحت
سراج و ادم نزلو تحت كانو زوج من الرجال قفلو الباب تع الفيلا بش ميخليوهمش يدخلو
سراج: وش صار
-مسيو حسام طلب ينزلو السلاح و يستسلموا و منخليوش واحد يدخل حتى ينزل
حسام: بعدو حلو الباب
سراج: منك صح ...متحلش الباب ريان و بنتك فوق كشما يصير عليهم
حسام: رح تخاف على عايلتي اكتر مني ...سراج ابدا تخمم في الأمور لي تخصك احسنلك
ملاك: واو القوات الخاصة داهمتكم وانتم تتقابدو بفففف
تلفتو كل شافو معاها
ملاك: انا استدعيتهم
-حلو الباب الفيلا محاصرة اذا متحلش الباب رح نستعملو القوة
ملاك: حلو الباب احسن ما يفجروه متنساوش كاين بيبي هنا
عض شفتو حسام و سراج قريب رح ينقز عليها يخنقها
ادم : هههههه يطلع منك يا زين
خزرو فيه بلع الكلام لي كان يقول فيه
ادم : خبيثة بفففف
حسام: حلو الباب
تحل الباب و دخلو الرجال احتلو كل بقعة من الصالة تع الدخلة
-سلمو سلاحكم
كل واحد نزل سلاحو على الارض
ملاك: كاين شوية تاع رجال في الاعلى
حسام: احسنلك ما تطلعش فوق
ملاك: متخافش مش رح يقربو لا على ريان ولا على الطبيبة تع بنتك
حسام: وش تحتاجي
سراج: يعني لعبتي علينا ؟
ملاك: لاااا ملعبت على حتى حد قلت نكون معاكم مليحة و نكون صديقة ليكم جيت بوجه طيب واحد ما عبرني كل هذا يتصرف برايو أما درك كلش رح يمشي كيما انا نقول
سراج: معندك شي ضدي بش تجبريني
ملاك: تهريب سجين وقتل حراس نقل وشرطة
ضمت يديها لصدرها وتخزر فيه
ادم : اوووه نحب المرا لي تفرض رايها
ملاك: انت تسكت احسنلك
حسام: وجه البخص عجبتك هكذا
يحكي و يشوف مع ادم لي قعد غير يتبسم
ملاك: و درك بش تنفذو لي نحكي عليه و نبداو تحقيقنا هذا ولا بش نبعتكم كل للسجن في اخر الدنيا
حسام: خلي رجال تاعي كل يروحو وراني معاك
ملاك: نوووووووو اخر مرة نزيد نفذ طلب تطلبو
حسام: مالا بش ندخل للسجن معاهم
سراج: حتى انا نفضل ندخل للسجن
ادم: راني معاك نفذ ...
خزرو فيه كمل يحكي
ادم: نفذ لي يقولوه الرجال انا ....
ملاك: بفففف اوكي هذي اخر حاجة رح نخلي رجال كل يروحو
تلفتت للقائد تع المجموعة
ملاك: تقدر تنصرف خلي رجال تعهم يروحو و خلي حراسة علينا هنا و عينكم ديما عليهم بش ميكون حتى شي مفاجئ على غدرة
-حاضر
بداو يخرجو من الفيلا بالواحد و خرجو معاهم رجال حسام داوهم بقا البعض منهم (القوات الخاصة) بعد ما هدات الحالة حسام طلع يجري عند ريان
ملاك: ايه خودو راحتكم بالتصرف درك حتى نبدا في التخطيط و نستدعيكم بش نحكيو فيه
دوت و مشات بقا سراج و ادم يتفرجو معاها
ادم: بصح منكذبوش زينونة
شاف معاه سراج من فوق لتحت
سراج: زينونة ومش معبرتك
ادم: عادي يجي نهار تحس بشي
مشا وخلاه يحكي
ادم: بفف الاحداث هذي تخلي الواحد يجوع نروح نشوف وش يتاكلدخل لعند ريان لي كانت مرعوبة اول ما شافتو وقفت مشا لعندها حضنها بزوز يدين
ريان: وش صرا
يتنفس بالقوي شاد يديه عليها مزال السيناريو لي تصوروا يدور في بالو خاف تصير حاجة عليهم كره و تعب من الخوف الدايم هذا كل ما يسمع رصاص و عرك يحس طرافو تشلو من الخوف
ريان: حسام خوفتني احكيلي وش كاين
حسام: شي يا روحي المهم انتي و لينا ملاح
بعد شوية وشاف معاها في عينيها
حسام: ريان بش نحكيو في موضوع مهم
ريان: وش هو
تحكي و تشوف معاه تكره نظرة الضعف كي تشوفها في عينيه هو بالذات لانو كي تتعود على واحد قوي الضعف تاعو يخليك تخاف
حسام: ريان رح نسفرك للخارج مع اهلك ومنحبش معارضة
وساعو عينيها باهتة
حسام: منقدرش نخليك هنا كون كشما يصرالك انتي ولا لينا نهبل
عقدت حواجبها وتلاحت حكمتو من كول الشوميز تاعو كل مرة يدزها بعيد عليه كل مرة يحط حواجز مكفاش الحواجز لي بيناتهم انو مخبي عليها بزاف أمور تخصو هي متعرف عليه شي من غير انو ياسمين و بنتو تقتلو و البقية وين يحب يزيد يحط مسافات بيناتهم كبستكي بغش
ريان: منسافر لحتى بلاصة و منتحركش من هنا بش نبقا معاك و انت قدامي قدام عيني محال نزيد نبعد عليك ولا نخليك تبعد عليا نهار حطيت يدي في يدك نعرف كلشي و متوقعة كلشي ومش رح نسلم فيك ومعاك للأخير حتى نخرجو من هذا كل يدينا في يدين بعض فاهمني وش نحكي مش رح نخليك تحط حواجز أخرى بيني وبينك
كبس على وسطها بيديه و لزها ليه بدنو لصق بدنها
حسام: خايف عليك
ريان: مع بعض شي ما يكسرنا وحتى انا خايفة عليك بصح متقوية بيك
شاف الشعلة في عينيها تحدي قوة تزيدو هو قوة سند ريان على قد ضعفها تخليك تتصور انها سهلة الانكسار هي في وقت الصح أشد من اقوى الرجال و هو شاف معدنها في اكتر من مناسبة عندها مزيج الغباء والذكاء في نفس الوقت البراءة و داهية في وقت واحد أنوثة و قوة مزيج خلا عقلو يجن بيها
حسام: توعديني ما ترميش روحك في أي خطر و تسمعي الكلام
ريان: نسمع الكلام منوعدكش
حسام: نعرف كيفاه نخليك تسمعيه
تبسمت بخبث
ريان: كيفاه
حط يدو ورا رقبتها وقرب وجهو من وجها يحكي بصوت مغري
حسام: انتي ترتاحي الاول وبعدها الغلطة بحسابها
عضو شفتها تحس في نارو لي شاعلة
ريان: يعني هكذا رح تخليني نرجع نغلط بزاف
ضحك سنيه كلهم بانو ضحكتو تسحر خاصة كي يتقفلو عينيه معاها
حسام: يعني تحبي تتعاقبي بزاف
حركت راسها ايه جبدها بقوة وهجم على شفافها هبل نفس تقطع فيها بعد شوية
حسام: والله بزااااااف يخي مش رح ترتاحي
ضربتو على كتافو
حسام: ههههه فهمت علاه يتزوجو 4 بش تمرض وحدة كاين أخرى
وجها تقلب و دزتو بعيد
ريان: يا هامل تخمم تتزوج غيري ؟ والله نقتلك
حسام: هههههه نضحك برك ارواحي
ريان: بعد عليا بعد
حسام: والله نضحك وانا نقدر نشوف في غير
ضيقت عينيها وحكمتو من كول الشوميز
ريان: تحط عينك على غيري بش نحرقك و نحرقها ونحط كرسي نتفرج فيكم حتى تطفا اخر شعلة
حسام: خوفتيني هههههه مجرمة صح
ريان: جرب و شوف الإجرام على اصولوبعد يومين:
.......دققدقدق
واقفة تدقدق على الكاس بمغرف
ملاك: شكرا كي جيتو للعشا كل و نحب نحكي زوج كلمات قبل ما نبداو نتمنا لي صار كل نرميوه ورا احنا هنا كل عندنا مصلحة مشتركة واحد يحب يحمي عايلتو و واحد يحب يثبت العدالة و واحد ..... معلاباليش
ادم؛ عادي عادي فوتيني انا وخلينا نبداو ناكلو ...
هزت حواجبها الفوق
ملاك: المهم نحب نعرف اذا انتم معايا و ملتزمين 100٪
حسام: منيش...
حكمت ريان يدو وكبست عليها نفخ
حسام: معاك
سراج: واش تراجعت ليه ليه حسام
حسام: اهتم بشؤونك
ضحك
سراج: ايه.
ادم: يعني نقولو باسم الله
ملاك: وكاين طلب صغير اخر
دور حسام وجهو
سراج: واش هو تاني
ملاك: نقدر ننتقل حتى انا للفيلا بش يكون كلش ساهل يعني مش نبقا هكذا رايحة جاية
سراج: والله نشوف فيك انتقلتي شغل حشمتي برك تجيبي حوايجك
حسام: ههههه صحيت
ريان: اففف اسكتو ايه ملاك تقدري تجي
ملاك: مرسي
رجعت قعدت
ملاك: ادم تقدر تبدا
تلفتو ليه كل لقاوه بدأ وقريب يكمل
بعد العشا ملاك جمعتهم لاجتماع قاعدين في 3 يتفرجو معاها رايحة جاية تحط في طابلو و تحط في اوراق لابسة جينز و تريكو فوقو كل ما تهز يديها تحط ورقة على التابلو يتهز شوية حسام ضام يديه لصدرو و يتفرج مع الباب خايف تدخل ريان عليهم و تندبلو سراج ڨارو يلعب بيه بين شفافو وكل ما يطلع تريكو تعها يطلع حاجبو و آدم ذاب خلاص باهت كملت علقت الاوراق والصور وتلفتت شافتهم خدودها طلعو حمر تهبط في تريكو
ملاك: عيب عليكم
حسام: وووه مشفتش فيك خلاص
سراج: واحد مراهو مهتم صدقيني
ادم: انا نتبع في واش راكي تهبطي
عوجت فمها وضيقت عينيها وقت ريان دخلت عندهم للصالة و لينا في يدها
ريان: شوفو شكون جاي لاجتماع
تبسم حسام ووقف راح ليها سراج جبد نفس طويل من الڨارو لي في يدو هو من يوم شافها في السبيطار مزادش قرب جيهتها لانو كل مرة يوجعو قلبو بنفس الكم واكتر مشات قعدت و ملاك جات عندها تشوف فيها
ملاك: يااااا تاخذ العقل طالعة كيف امها
حسام: لا كيف باباها
ادم: تتاكل ممممم
شافو فيه
ملاك: ريان ديري بالك ياكلها
ريان: هههههههههههه
كلهم كانوا يضحكو إلا سراج
سراج: ايه بش نبداو في الاجتماع هذا ولا نبقاو نضحكو هيا عندي شغال انا
نزلت ريان راسها حستها إهانة
ملاك: بعقلك يخي خلينا نحكيو مع البرنسيسة
حسام بقا يشوف معاه من بعد قعد جنب ريان
حسام: ملاك خلينا نبداو
ملاك: اوكي
رجعت جهة الطابلو وقفت