👠 الحلقة 84 👠
هربنا انا وحسام من تم خرجنا و ستنينا منين الباب الدنيا كانت ماكلة بعضها متفهم شكون يقتل في شكون رجال ميرال ضد رجال حسام و الشرطة معرفتش تقدم ولا تخليهم يخلصو بعض جبدني لحضنو نفس تاعو متسارع هزيت عينيا نشوف معاه عض شفتو ويشوف مع الطريق وتنهد ورجع شاف معايا بغش بلعت ريقي نعرف راهو هبل في مخو بعد لي درتو
حسام: ادعي ربي نخرجو من هنا حيين لانو في بالي نقتلك ببطىء شديد يا ريان على لي عملتيه نطلعو منك تاني و متلت
دبلت عينيا نستعطفو لكن والو
حسام: ابقاي ورايا
جبدني ورا ظهرو و خرجنا يمشي من غير حس سلاح في يدو
-هذاك هو ....
تلفتو لينا زوز وبداو يقوصو جهتنا
حسام: تحركي ليه ليه
حسام يرد عليهم وانا وراه حتى قربنا لطوموبيل حل الباب الخلفي تعها و مزال يقوص جات رصاصة في فخضو وطبس تخبا وراها
-حسااام
حكمتو نشوف مع رجلو الدم ينزل منها تقول عين تاع ما
حسام: ادخلي ليه ليه وخلي راسك تحت
يحكي و يتوجع طلعت و نزلت تحت وهو تاني طلع من قدام منزل راسو شغلها و هز راسو صوت المتور انطلق و ناس كل دورت تشوف جيهتنا الشرطة حاصرتهم وحسام هز تليفون
حسام: الو ..انسحبوا كل لي جينا على جالو سايي
قلبي مزال يضرب مت من الرعب مع انو كانت تقدر تكون نتيجة كارثية كنت قادرة نموت انا ولا حسام و سراج مزال في الداخل
-حسام !!!..سراج مزال في الداخل
يضرب بيدو في الڨولو يتوجع
حسام: نبعدو من هنا و نتفاهمو يا ريان اصبري طولي بالك عليا
رجعت ورا عضيت شفتي وقعدت ساكتة اليوم يقتلني يخي نهرب من واحد نطيح في اخر ...بعدنا شوية تحركت الطوموبيل على الطريق خرج شوية ورجع حطيت يدي على كتافو
-حسام!!!
رجع راسو ورا على الكرسي و وشا وقف على جنب دم لي خسرو سببلو دوخة و معادش مركز و شايف الطريق نزلت طلعت جيهتو حطيت يدي على رجلو جهة الجرح ونرجف بكلي قلبي رح يوقف
-حسام خسرت دم بزاف لازم تروح لطبيب
يحكي بسيف
حسام: كلمي هذا
حطلي تيليفون في يدي
حسام: قوليلو حسام ورانا في الطريق تاع ****
-اوكي
نرجف حطيت التليفون على وذني و نستنا يرد
-الوو....ايه رقم تع حسام...رانا في طريق **** و حسام تصاوب و خسر دم بزاف ..ايه ...ايه درك نشوف ...حاظر...نستناوك
حطيت التليفون ورجعت نشوف حاجة نربط بيها رجلو قطعت طرف من قماش الكرسي و ربطتو فوق الجرح وحكمت يدو بستها ونشوف معاه حل عينيه
حسام: علاه هربتي
-انت حطيتني في حبس
حسام: وخرجتي و فهمتي درك لي حكيتلك عليه ؟ قلتلك اذا قررتي تخلي هذا الطفل رح تكون هكذا حياتك
نزلت عينيا نحس بقهرة من كلامو
-نفهم من كلامك انك حبيت نزلو
جبد يدي لعندو قربت ليه اكتر هزها حطها ورا كتافي وقربني ليه و حط شفافو على راسي
حسام: نووو نحبك تعرفي انتي مش مسؤولة على حياة وحدة في كرشك انتي مسؤولة على زوز لانو يوم عرفت كان عندي عدة أسباب نموت على جالها وانتي عطيتيني سبب نعيش على جالو
كبشت فيه وغمضت عينيا وانا نسمع في كلامو لحضات ووصل لي كلمناه و رحنا معاه
وصلنا لدار شوية بعيدة معزولة صغيرة و واضح على صاحبها الفقر نزل و عاون حسام بش ينزل و مشيت حتى انا حطيت يدو على كتافي و عاوناه بش يمشي حتى للدار دخلناه و حطو على سرير يرقد ومشا يجري جاب عدة سكين تاع العمليات و مقص و قطن شعل البريكي و حط السكين عليها يحرق فيه وانا حالة فمي شاف معايا
-قطعي رجل السروال
-اه ...انا ...اوووه
مشيت يديا يرعشو مش عارفة نتحكم فيهم هزيت المقص قصيت السروال
-بعدي هكذا
قطعو بيديه و حسام كان يتوجع قلبي رح يوقف عليه مسكين بعدها حط السكين على الجرح و دخلو انا روحي طلعت حطيت يدي على فمي وخرج نجري من عندهم رديت (حشاكم) مسحت فمي بكم تريكو ونزلت على الحيط برا نسمع في صوت حسام يتوجع حطيت يديا نغطي في وذنيا مش عارفة يمكن 3 دقايق وهوما هكاك سكت حسو وقفت رجعت دخلت لقيتو مغمض عينيه عاض شفتو و هذاك خيط الجرح و قاعد يغطي فيه و رصاصة لي كانت في رجلو محطوطة على الطاولة جنبو كمل كمل غطا الجرح ووقف يمسح في يديه
-نخرج نجيب دوا و مطهر للجرح وانتي طيبي حاجة ياكلها منطولش
خرج وانا مشيت قعدت جنبو حكمت يدو عوجت شفافي
-حسام ....
حل عينيه وجبد يدو من يدي حطها على راسي
حسام: كي نوض على رجليا نتفاهمو
تبسم وانا وقفت
-معليش دير لي تحب المهم منشوفكش هكذا مرة أخرى
مشيت نجري نشوف واش كاين بش نطيبو و صراحة عمري طيبت حاجة
