الحلقة 47
مرو دقايق وانا قاعدة في الغرفة هذيك يديا على فمي نتفرج معاه هكذاك دمو في الارض عندو عايلة ؟ عندو ام ؟ شكون رح يسقسي عليه شكون رح يستفقدو الأرواح هنا عندهم ماتسوا شي تحل الباب محبيتش حتى نشوف شكون دخل قعدت هكذاك حسيت بيد على كتافي وصوت بنبرة هادية صوت سراج
سراج: ريان !!!
مرديتش عليه غمضت عينيا جبدت نفس طويل
سراج: ريان هيا نروحو من هنا
ضربت يدو بعيد ووقفت نشوف معاه بعدها دزيتو وزدت دزيتو اكتر و ضربتو على صدرو نضرب ونصيح و نبكي
-بعد عليا بعد عليا
حتى ظهرو لمس الحيط حكم يديا بزوز يدين جبدني حطهم على صدرو ولف يديه عليا وحضني بكل قوتو رجعت نبكي في حضنو وهو يمسح على شعري ويهدي فيا
سراج: اسسسس كلش يفوت
بعد ما حسيت إني غلبت من البكا هديت وسكت حكم وجهي بين يديه
سراج: علاه هكذا ديريلي مش قلتلك بعدي وش رجعتي ديري
-كلو منك انت كان لازم تبقا معايا مش ترميني هكذا
سراج: لمصلحتك صدقيني
رجع حضني وكنت نخمم في هذاك لي معاه نحكيلو ولا لالا
سراج: منين تعرفيه هذا ؟
-منعرفوش سراج لي تخدم معاه خطفني وهددني اذا منفذتش لي يطلبوه يقتلوني
حط يدو على فمي وعينيه وساعو بعدها مشا للباب شاف شكون واقف برا ورجع قفل الباب
سراج: وش تحكي انتي ؟ شكون هذا ؟
-لي نهار لقيتو عندك في الدار
سراج: نوووو مش في صفي هذاك راهو من الاعداء تع حسام هوما حكمو عليا دليل هددوني انهم يفضحوني اذا متعاونتش معاهم يومها هوما لي بعتو الفيديو ل حسام كون مش انتي جبتيه ريان منحبش تتعاملي معاهم راني نحكي معاك
-كيفاه منتعاملش معاهم قالو رح يقتلوك
سراج: متخمميش فيا شفتي هذا هنا ميهمهمش فيك اذا متي انتي يلقاو غيرك
حكمني من ذراعي ويدو التانية حطها على خدي
سراج: هنا مديري ثقة في حتى حد من غيرك اعرفي حاجة وحدة هنا خممي غير في روحك
-وانت؟
سراج: انا نقدر نسلك روحي بصح نحتاجك انتي تعاونيني بش نحميك ريان افهمي
يحكي بصوت ناقص و يأكد
سراج: راكي فاهمة لي نحكي فيه ؟
حركت راسي ايه
-فاهمة
رجع حضني وكبس بكل قوتو
بنات كنت صايمة وهذا وين فطرت مزلت نكتب
*****************
بعد ما بدلت لبست ثياب اخرى خرجت من الصالدوبان قعدت على السرير
سراج: ارتاحي غدوة الصباح نرجع ونحكيو
وقف ماشي
-سراج
شاف معايا عوجت شفافي كي البنات الصغار
-اقعد معايا متروحش
رجع حضني وهمس في وذني
سراج: لازم ترتاحي هيا
يدينا تشابكو مشيت حتى حافة السرير قعدت هز الغطا طلعت رجليا و رقدت وهو رجع غطاني حكمتو من يدو ونحكي بصوت فيه بحة من البكا لي بكيتو
-ارقد قدامي
بعدت شوية هزيت الغطا درتلو بلاصة نحا الفاست تاعو وقف خطها على ظهر الكرسي قعد نحا صباط تاعو و جا لعندي قعد على السرير تكا بمرفقو هز رجليه حطهم تحت الغطا وجبدني عندو في حضنو ريحتو لي بالڨارو مخلطة نفسو السخون و ضربات قلبو المنتظمة كلشي يبعث فيا احساس راحة حط شفافو على راسي طبع بوسة
سراج: غمضي عينيك وارقدي
وجهي في صدرو
-سراج
سراج: اممم
-درت حاجة مش مليحة
بعد بش يشوف وجهي وسألني بصوت فيه قلق
سراج: وش درتي
-انا كذبت عليك
سراج: فاه كذبتي عليا ؟
-انا صورت الاوراق و كي هددوني انهم يقتلوك خفت عليك عطيتهم الصور
عض شفتو بعد ما كان رح ينطق بكلمة مش مليحة
سراج: و شكون شافك كي صورتي ولا يعرف من غيري
-حتى حد
سراج: متحكي لحتى حد
-سراج منحبش يقتلو حسام منظنش انو يستاهل
سراج: تحكي صح ؟
-ايه حسام مسكين فقد بنتو و مرتو قتلوهم وقالي هو رح ينتقم منهم
سراج: ريان انتي عندك مشاعر تجاه حسام؟
هزيت عينيا فيه و دزيتو بعيد عليا كيفاه يحكي هكذا كيفاه تجيه فكرة كيف هذي في بالو
-معنديش مشاعر تجاهو كل لي قلتو انو هو فقط عايلتو مش حابة يقتلوه
سراج: حسام واحد مريض ريان ديري بالك كيما تعرفي المتل واش يقول خاف من لي معندوش وش يخسر
وقفت نضت من بلاصتي حضنت روحي وهو قرب مني مزال فوق السرير وحكمني رجعني لعندو حضني
سراج: سامحيني مش قصدي نحكي هكذا ريان لازم ديري بالك واحد مالازم يعرف بحكاية الصور
باسني من جبهتي ورجع كمل يحكي
سراج: رح نعلمك تستعملي السلاح من اليوم لازم تهزي ديما سلاح معاك منحبش يزيدو يخطفوك و اهم شي مديريش ثقة
بلعت ريقي
-موافقة
سراج: هيا ارجعي ترقدي
رجعت رقدت صوابعو تغلغلو في شعري يلعب بيه حاولت نغمض عينيا حاولت نرقد بصح تفكير في كلش مخلانيش نرقد سراج عندو اكتر من ساعة راقد رجعت رقدت على ظهري يديا على كرسي نتفرج مع سقف الحكاية مش صعيبة انا من لي كنت صغيرة تعودت كلشي نديه سرقة هي لعبة خفة كيف الساحر يلزمني نخليهم يركزو معايا وش ندير بش ميشوفوش من ورا ظهرهم واش صاير ضيقت عينيا و تبسمت جبدت الغطا كلو دخلت تحتو و غمضت عينيا اخيرا نقدر نرقد ههههه
واش تقولو دير للا ريان ههههه:
