كيان فريدة (الجزء الثالث من روح الزين)

حلقة خاصة ².

بارت صغير بس قريب هعوضكم بالاطول لو لاقيت تفاعل 😂❤.

بتجري بسرعة كبيرة وهي ماسكة كورة السلة وشعرها طاير في الهوا ووشها عرقان جدًا، قبل ما تجيب هدف كان وقف قصادها واخد الكورة بسرعة غير عادية وجري ودخلها هو، جريت وراه وبرجلها وقعته في الارض بغيظ.

_ قرصة ودن علشان متتجرأش وتقربلي تاني.

بيتألم وماسك ف رجليه وبيضحك ف نفس الوقت، بصت ليه بغيظ وبتكز علي سنانها.

_ غيث انا مش بهزر.

وقف وابتسم ليها وماسك الكورة: حبيت اثبتلك اني مش شاطر ف كرة القدم بس زي ما بتقولي.

_ يا سيدي شكرًا مش عاوزه أعرف حاجه عنك.

مشيت وخرجت من الصالة الخاصة بلعبة كرة السلة وبتلم شعرها ووقف وهو عيونه عليها بخيبة أمل، ماسك الكورة ف ايديه وعيونه بتتأملها ولف رماها ف السلة بإيد واحده ولسه هيخرج هو كمان وقفه مغيث وعيونه عليه بغضب، اتوتر غيث من نظراته واتكلم بقلق.

_ فيه ايه يا مغيث.

مغيث بحدة: انا فاكر اننا سبق واتكلمنا في نفس الموضوع ده وانت لسه مصمم تكمل فيه مع انك عارف انه حرام وغلط.

غيث بنفاذ صبر: وانا رديت عليك وقولت مفيش حاجه بينا احنا بس صحاب.

مغيث بجدية وحزم: مفيش صداقة بين ولد وبنت يا غيث.

غيث بعصبية: خلاص يا سيدي متزعلش نفسك زمايل وطبيعي اتعامل معاها.

مغيث بصوت هادي وثقة: الل بتعملة مش بيدل علي انكم زمايل بس انت بتحاول تقربلها وتخليها تعجب بيك.

غيث بتجاهل كلامه: انا عندي حصة هشوفك بعدين.

مشي ومغيث اتكلم وهو وراه: ارجع لقيمك ومبادئك وبلاش الاختلاط يغير فيك يا غيث.

سمعه غيث بضيق ومردش عليه وخرج.
________________________
بتجري فريدة بسرعة كبيرة علي سلم كهربائيّة في مول ورا بنت وفي ايديها شنطة صغيرة باللون الأسود، بتتجنب كل الل قدامها وتتخطاهم واحد ورا التاني بحذر وبتحاول توصلها، البنت دخلت في مكان خاص بالملابس الرجالي وجريت علي اقرب بروڤة واستخبت فيها، حاضنة الشنطة ومسكت فونها من جيبها وبتتنفس بسرعة وقلبها بينبض بخوف وبتتصل بحد مجهول.

_ انا اتقفشت، متزعقش انا نفسي معرفش ازاي وصلولي..
اتصرف وخرجني من هنا، الظابط الل برا مش هتسيبني نهائي ومش هعرف اهرب منها.. حاول تلهيها... لابسة بنطلون واسع وجاكت اسود وحجاب اسود، بشرتها فاتحه وعيونها عسلي شويه... ملامحها حادة.

سكتت فجأة البنت وسمعت صوت راجل برا بيزعق في بروڤة جمبها

_ ايه دا انتِ ازاي تفتحي عليا كده مفيش احترام وخصوصية للزبون خالص.