بارت³⁶
لِـ «كيـان فريـدة».
بقلم منارجمال"شجن".
الورداني بصوت قوي وأمر: قرر دلوقتي واختار ما بينا حالًا.
صمت ساد في المكان كله ومحدش بينطق، زين واقف وحاسس بالعجز وقلة الحيلة، مش عارف ولا مستوعب يختار مين بالظبط، معندوش أي فكره إزاي يختار أو عشان إيه، حاسس انه متكتف ومش قادر يعمل حاجه، لو اختار روح هيكون أبوه حالته إزاي والأهم من كل ده هو نفسه هيقدر ينطق ويختار حاجة زي دي دا مستحيل، ولو اختار والده فـ روحه وقلبه هتغيب عنه وهتفارقه إزاي يسمح لحاجة تبعد مراته عنه بعد كل ده، عمره ما تخيل انه هيجي اليوم اللي يخليه عاجز بالشكل ده ومُشتت، أبوه وروح مينفعش حد فيهم يبعد ويغيب عنه الاتنين ليهم مكانه كبيرة جدًا في قلبه، بيجاهد عشان يفضل واقف ثابت وهو جواه تعب نفسي كبير وكمان جسدي دا بقاله يومين منامش وفي شغله، وزاد عليه كل ده اختفاء روح وكان بيدور عليها زي المجنون، دا غير الحادثة اللي لسه خارج منها هو إزاي قادر يستحمل كل دا لحد دلوقتي ومتصابش بانهيار.
بين يوم وليلة إزاي حاله اتشقلب كده فجأة؟؟؟.
غمض عيونه بألم وفتحهم تاني وبص لابوه واتكلم بصوت كله وجع: أنا آسف بس مقدرش أختار واحد فيكم وابيع التاني.
الورداني عيونه وسعت من الذهول ومن رد إبنه، روح دموعها نازلة بقلة حيلة وعجز وراسها في الأرض مش عارفة تنطق حرف، باقي العيلة عيونهم عليهم بحزن وساكتين.
الورداني بصوت قوي: دا آخر كلام عندك؟ معني كدا إنك بتبيعني.
زين بنفي: مستحيل ابيعك إنت ابويا مش بعد السنين دي كلها لما ترجعلي أفرط فيك يا بابا انا بقالي زمن كنت بتمني تبقي موجود معايا إنت وماما انا عيِشت اسوء أيام حياتي من بعد فراقكم.
الورداني بصوت عالي: ولما إنت بتقول كده رايح تتجوز بنت الراجل اللي حاول يقتلنا ليه، دا بدل ما تنتقم منه رايح تهز طولك وتناسبه هي دي التربية ورجولتك.
زين بصوت جهوري لانه صبره نفذ: اللي إنت بتهين فيها دي محدش قدر يشيلني وقت تعبي غيرها، محدش كان قادر ياخد ويحتل قلبي برضوا غيرها، إنت متعرفش اي حاجة عن حياتنا عشان تحكم عليا وعليها بالفراق بالشكل ده بقالي أكتر من ٢٣ سنة اعرفها ومفيش يوم واحد في السنين دي كلها عملت حاجه غلط أو حاجة تضايقني، انا أقدر استحمل أي إهانات منك ليا لكن ليها مش هسمح بكدا أبدًا، طول عمري كنت ليها مصدر أمان دلوقتي بقيت حد ضعيف ومش قادر يحمي حد، إنت لا قَّدرتني ولا عملت لابنك الكبير حساب عشان تيجي دلوقتي وتقولي يا إنت يا هي طب بأي حق اسيبها عشان حضرتك رافض تسمعنا وعايزنا ننفذ بدون نقاش ولا عشان ترضي عرقك الصعيدي اللي بيجري في دمك وقفلت دماغك علي كده وخلاص.
روح قربت من زين بخوف لانها عارفة كويس لما بيتعصب بيقول كلام يوجع وهي مستحيل تقبل انه يوجع أبوه بسببها، مسكت إيديه بقوة وبتترجاه وهي بتبكي: زين ارجوك فوق بالله عليك أسكت متتكلمش.
YOU ARE READING
كيان فريدة (الجزء الثالث من روح الزين)
Mystery / Thrillerهي فريدةٌ من نوعها لها سِحرٌ خاص، هو شخصٌ حاد الطباع يُريدُ الإنتقام لِما حدث لوالدته من قِبل أبيه، ويا للعجب عندما تكون الفريدةُ الحارس الشخصي لِأبيه.
