كيان فريدة (الجزء الثالث من روح الزين)

بارت⁵⁷ لِـ «كيـان فريـدة».

بارت⁵⁷
لِـ «كيـان فريـدة».
بقلم منارجمال"شجن".

قاعدة نوران في اوضتها قصاد اللابتوب الخاص بيها وبتذاكر وسرحت للحظات وبتبتسم ببلاهة بمجرد ما افتكرت اللي حصلها امبارح في حفلة كتب كتاب موسي وروڤانا.

flash back
ماشية نوران ورافعة فستانها بسبب طوله الزيادة وبتمشي في الكعب بصعوبة ولسه هتتكعبل سندت علي حد كان ماشي من جمبها وبصت ليه بقلق: أنا... آسفه مكنتش اقصد.

بص ليها واتكلم بجدية: ولا يهمك إنتِ كويسة؟.

هزت دماغها بسرعة وبعدت عنه وبتعدل في فستانها ورجعت بصت ليه: اه تمام.. لحظة انا شوفتك قبل كده؟.

ضيق عيونه بتركيز ونوران ركزت في ملامحه واتكلمت بلهفة: إنت صابر.؟.

هز دماغه وهي كملت بشغف: انا نوران اللي أنقذتها قبل كده و...

قاطعها بدهشة: بنت مدام جوري؟؟.

ابتسمت بفرحة وهزت دماغها وابتسم صابر بخفة: مأخدتش بالي منك شكلك اتغير شويه.

ضحكت برقة ووضحت ليه: طبيعي عشان انت لما شوفتني آخر مرة كنت مش محجبة وصغيرة وكمان كنت رفيعة دلوقتي بقيت شبه البقرة.

انكر جملتها وابتسملها: لا إنتِ كبرتي وشكلك طبيعي مبقتيش وحشة بالعكس.

نوران بضيق: مش عارفه ممكن بس دايمًا بيتقالي تخينة ومحتاجة تخسي.

صابر ببسمة خفيفة وصدق: إنتِ مش مرتاحة كده؟.

هزت دماغها بخفة وهو كمل: يبقي متاخديش علي كلام حد لو وزنك زيادة شويه وإيه يعني بدل العود الفرنساوي اللي بيفرحوا بيه إنتِ تبقي بطاية بلدي كده مغطية عليهم بحلاوتك..

ضحكت بقوة وصابر ضحك معاها: بس بلاش كعب طالاما مش قادره تمشي فيه أي حاجه تريحك اعمليها ومتهتميش بكلام الناس.

كشرت وبصت ليه: يعني لو عايزة ألبس كوتشي علي فستان زي ده عادي؟.

صابر بجدية: انا عندي جاكت بلبسه علي شورت في الشتا عادي هي حركة مجنونة بس شايف إني كده مرتاح فـ ليه لأ؟ وكذلك إنتِ عايزة تلبسي كوتش علي الفستان إلبسيه كلام اللي حواليكِ مش هيخلص كده كده هيتكلموا فاحنا نمشي علي حسب راحتنا وبس أي حاجه تاني تولع

عيونها عليه ومركزة مع كلامه وابتسم ليها وفونه رن إستأذن منها ومشي: بعد إذنك...

back

وقفت قصاد مرايتها ومبتسمة وبتلف حوالين نفسها وفجأة حد حط ايده علي كتفها واتفزعت وبصت ليه واتكلمت: فيه إيه يماما... حد يخض حد كده.

جوري بمكر: لا فيه ايه إنتِ بنادي عليكِ بقالي ساعة وسيادتك في المهلبية.

نوران بقلق: كنت بذاكر ومسمعتش...