لعنة هوسي ( جزء الثاني من عشقي لمغربية )مكتملة

الحلقة 25

في الغد
جالسة المى كتوجد مع الطريطور كلشي اللي خاص على قبل الخطوبة
المى بتركيز كتشوف في واحد البوم تاع الصور : ضروري عفاك من هذا الديكور عجبني اللي بين الدوري و الابيض و بليييز ضروري من الورد في الابيض و تكون فيه الريحة اما لي بلا ( الطبسيل)بغيت لاكويزين مغربية و جزائرية في نفس الوقت
الطريطور بتركيز معاها: وخا الالة
مشا باش ينفذ باش امراتو المى ..اما المى تسنات حتى جا عندها الجارديني قالت ليه باش بقاد الجردة و النافورات و الضواو يكونو هما هادوك
المهم المى ممقصراش وغادي تستقبلهم احسن استقبال و ترفع براس بنتها
في بيت انيرا ..جات عندهم فاشنيستا كتوريها في الحوايج اللي كانو تقليديين
انيرا:ماكرهتش شي حاجة مخلطة بين الجزائري و المغربي
الفاشنيستا :كنقتارح عليك هذا القفطان اانسة غيناسبك بزاااف
انيرا شافتو عجبها خاصة كان في الازرق الملكي..دخلات قيساتو في نفس الوقت جات اماليا شافت البنات عند انيرا
أماليا :اختي كاينة الداخل
البنات:اه
دخلات اماليا كتسنا حتى خرجات انيرا بداك القفطان اللي جا معاها لدرجة اماليا حلات فمها
أماليا : واااو جاك فن الساطة
انيرا بحماس فرحانة بزااف : بالصح غادي نعجب مهران 
اماليا : منيتك علاش مغاديش تعجبيه
الفاشنيستا:  انسة وصيت يجيبو ليك البنات حتى نتي لباس خاص بيك
أماليا : وخا عطيني نشوف
جبدات ليها قفطان في الحمر و الكحل الا انه معجبوهاش حتى لمحات قفطان في الاخضر الملكي عجبها بزاف خاصة مزين بالابيض بنقوش تقليدية
أماليا باعجاب : عجبني هذا
دخلات اماليا قيساتو شافتو عجبها وهي تحيدو بلا ماتوري شي واحد كيفاش جاها ..
انيرا شافتها بالبيجامة: كو غير خليتيني نشوفو كيفاش جاك
أماليا : عادي المهم جاني على طايتي
انيرا :أماليا حرت في الميكاب اشنو نختار
أماليا :خلي حتال غدا ونشوفو اش غادي نديرو
خرجات أماليا و هي دخل لبيتها ماحسات حتى جرها شي واحد و هي تغمض عينيها بخوف و حلاتهم مني عرفاتو من ريحتو
أماليا : غتبقا بحال هاكا كتسلت ؟؟؟
مقداد : حاجتي مايحيدها لية حد صحابك كنخاف من شي حد
اماليا بتأفف : اشنو بغيتي
مقداد ضربها بايديه بشوية : ماتبقايش تنهدي علية هنا ( مسح بايديه على  وجهها و مني وصل لفمها داز عليه بشوية مشهيه ) ماتديريش شي حاجة في وجهك غدا في الخطوبة
أماليا  بعناد :غادي ندير  بغيت نفرح بخطوبة ختي و نفرح براسي
قرب بشوية لوذنيها ونطق بصوت رجولي : قريب غادي تفرحي براسك نسيتي شهر باش واعدتك ؟؟؟
اماليا ضربها قلبها و بدات كتحاول تبعد منو : طلق مني طلق
مقداد باسها في حنكها حتى تبورشات و هو يطلقها  :على ايين غدا نشوف شي حاجة ماعجباتنيش غتكون ردة فعل اخرى
خرج مقداد وهي تمسح أماليا حنكها بكره : كيف داير يبوسني ويقيسني كيف بغاا
تلاحت تكات في ناموسيتها احساسها انها كتبغيه مايمكنش تخبيه هادشي عرفاتو من القرب اللي بيناتهم ولكن كيفاش غادي يتزوجو وهما قدام كلشي اخوة ...سرطات ريقها و كتفكر انها تقبل هذا الحب و جميع المشاعر البوزيتيف اللي كتحس بيها اتجاه مقداد
في الليل كانت انيرا كتصايب في ضفارها في البالكون حتى دخل عليها باباها
انيرا غير شافت باباها وهي طيح بلا ماتحس قرعة الجيل و هزاتها و رداتها لبلاصتها و بدات كتمسح في داكشي اللي طاح متوترة
اوس عاونها حتى تمسح كلشي وهي ناضت متوترة و حشمانة
انيرا : شكرا ابابا
اوس عنقها عندو بجنب وبدا كيدوي معاها : مكاينش شكر بين الاب وبنتو
ابتاسمات انيرا و هي تبادلو العناق وبقاو كيشوفو في السماء
بعد مدة قال اوس : لا كان شي مشكيل صعيب بيناتكم و لا ضربك ولا تعدى عليك باب داري ديما مفتوح ليك اما المشاكيل الصغار ضروري مايكونو الاهم داك الفشوش الخاوي نسايه خاصة قريب ديري عائلة وخاصك تكوني مسؤولة على راسك وعلى ولادك ديري في بالك قدما كتبغيو بعضياتكم قدما غيكونو المشاكيل بيناتكم من غيرة و جرح و بزاااف تاع بزاااف المشاكيل  والاهم خاصكم تجاوزو داكشي بجوج بيكم ماشي غير واحد منكم يهز الحمل خاصو يكون بجوج عليكم هاكا غتكون العلاقة مكتاملة وأكبر مثال واليديك وخا كنبغي ماماك و هي كتبغيني الا انه كون مادرناش عقلنا  وبجوجنا هزينا الحمل كانت هذا العلاقة غتسالي بالطلاق وهذا شرط عند جميع العلاقات ضروري من الصبر و تقبل الاخر كيفما هو حتى علاقة ماكاملة
انيرا بدات كتبكي بصمت حتى شافتو سالة وهو يهز ليها راسها و شافها كتبكي وهو يردف اوس ضاحك  : يااودي ياودي  تزوجنا بكري
ضحكات انيرا في عز دموعها وهي تعنقو : غنتوحشك بزاف اباااباااا كنبغيك والله نتا احسن اب والله
اوس :ساهلة غنرفض العريس المستقبلي وتبقاي حداية
انيرا بعدات : لااا اباااباا منيتك
اوس ضحك : هذا الجيل مابقاش كيحشم
مسحات انيرا دموعها وهما يتأملو مرة خرى القمر منتاضرين صباح غد  اللي مخبي ليهم بزاف تاع الأحداث 
في الصباح..
الرواج ضاير في الدار...كلشي الخدامة خدامين كيوجدو في الديكور تاع الخطوبة اللي كان بين الذهبي و الابيض ...الضواو شاعلين كيدل على ان القصر داخلة ليه فرحة كبيرة ..من الكوزينة عاطية ريحة الدجاج و اللحم و الحلويات ...وخا داكشي بيناتهم الا ان المى بغات تحمر وجه بنتها ..
انيرا ناعسة حتى دخل عليها غسان
غسان : يااودي ياااودي الناس اليوم  خطوبتهم وهما باقين ناعسين ( كيفيق فيها ) نوووضي نووووضي نوووضي من النعاس براكة نووووضي
ناضت انيرا كتشوف فيه مضهشرة امالك اناري
غسان : والو غير اليوم خطوبة شي ناس
رجعات نعسات انيرا كتلغم :وانا مالي يتخطب شكون مابغا  ( بعد ثواني عاد طلعات معاها ) هااا اناري اليوم خطوبتي ( ناضت وهي شعرها مشعكك شافت في الساعة لقات راسها معطلة بساعة ومافيقها حتى شي واحد ) هاا اناري (ناضت نوضة وحدة نيشان للطواليت ..غسلات وجهها و فمها ..وخرجات باش تشوف فين وصلات التحضيرات )
انيرا خرجات ولقات شامة وسولاتها
انيرا بخوف: شامة واش كلشي هو هذاك
شامة بتعجب : اويلي مالك مقلوبة ايه كلشي هو هذاك
دخلو شي بنات هازين شي فاليز في الابيض
وحدة منهم: حنا هنا باش نوجدو انسة انيرا
انيرا رخفات فيها النفس : هوووف صحابني واش تعطلت يالله نطلعو لبيتي
النصف مشا معاها و النصف مشا عند اماليا اللي كانت ناعسة مجايبة خباار ...حتى دقات عليها شامة وهي تنوض كتفركل
أماليا عينيها مغمضين : نعام
حلات الباب بان ليها عرمة تاع البنات والخدامة حانية راسها
الخدامة :انسة البنات جاو يعاونوك تجهزي راسك لخطبة
أماليا  :اكيد تفضلو (للخدامة ) صيفطي لية الفطور معاك
دخلات أماليا دوشات ...خرجات لقات الفطور بدات كتاكل ووحدة من البنات كتصايب ليها البيديكور مني سالات ماكلتها عاودو ليها لاسيرن وخا ماعندهاش الزغب بسبب الليزر بداو كيصايبو ليها شعرها بوكلي و المينيكير و الميكاب المهم غتخرج قوقة ...كذاك بالنسبة لانيرا الا انهم زادو معاها نغزة في المقادة ..حتى سالاو البنات ..لبسوهم قفاطنهم انيرا في الازرق الملكي و اماليا في الاخضر ...بقات انيرا كتنسا في بيتها متوترة حتى دخلات عليها اماليا اللي شافت ختها وعجباتها
أماليا : هاااي هاااي على الزين
انيرا كتشوف راسها في المراية : بالصح غنعجب مهران أماليا : على مالو اللي ميعجبو هذا الزين
البنات : حنى الالة سالينا خدمتنا
مشاو مخلين البنات كيشوفو راسهم حتى دخلات عليهم المى اللي لابسة قفطان حمر
المى كتشوف فيهم وعينيها تغرغرو : مشأ الله عليكم
أماليا وانيرا:اووووه هانا على الزين
مشاو عندها كيعنقو فيها وهي فرحانة بيهم ..باست كل وحدة فيهم و هي تشوف في انيرا
المى:كانت ماما هاكا شداتني في ليلة عرسي و وصاتني باش نحافظ على راجلي الا انه بغيت نسبقها ليك دابا ونقول ليك تهلاي في راجلك راكي دابا كبرتي ووليت مسؤولة
انيرا : وصافي الواليدة حسستوني  بحالة غادي نمشي نحرر فلسطين
اماليا : فيها الدودة عندك هذا البنت
انيرا ضربتها : بعدي مني
اماليا طلعاتها وهبطاتها : برهوشة تزوجنا بكري
سمعو الدقان وهو يحل ليهم مقداد اللي سكانا اماليا بعينيه ومعجبوش لباسها
مقداد : اماليا واحد الدقيقة
أماليا حسات بالرعدة حيتاش وصاها البارح باش متقادش وجهها سرطات ريقهاوبتوتر قالت : فاش بغيتيني
مقداد بشوفات شيطانية :ناخد رأيك فشي حاجة
هزات اماليا تكشيطتها وكل خطوة كتقرب منو قلبها كيضرب حتى وصلات لعندو
اماليا :فاش بغيتيني
مقداد:تختاري معاية الكوستيم اللي نحضر بيه
اماليا : وخا
بقاو كيتمشاو واماليا سابقاه و مقداد وراها كيطلع فيها و يهبط
حتى جرها من ضهرها لواحد القنت
مقداد كيزفر : اش هادشي دايرة لكمارتك
اماليا كتفتف : ميكاب
مقداد:عرفتو مكياج انا اشنو قلت ليك البارح
اماليا  :اشنو قلتي
مقداد ضرب ايديه مع الحيط : لا لقيتك دايرة شي زمرة لوجهك اشنو ندير معاك
اماليا حدرات راسها : بغيت نفرح بعرس اختي
مقداد هز راسها وشد كلينيكس كيمسح فمها اللي كان العكر في القهوي مغلوق مايل للحمر ..
مقداد بتحذير :خليت ليك داكشي لاخور ولكن ديري في بالك لقا شي واحد قرب ليك نقتلو وهاانا علمتك
في بيت انيرا المى كتوصي فيها
المى: مني نصيفط ليك الخدامة عاد نزلي صافي
خرجات المى وهي تسمع التوشويش مني طلات بان ليها مقداد مقنت اماليا
المى بتعجب : اش كديرو نتوما هنا
قفزات اماليا و بعدات من مقداد
أماليا : والو غير كنا كنديويو
المى المهم يالله نزلو الضياف قريب يجيو
نزلو للتحت وهي تم داخلة نجمة و اركان و فارس والتويميات اوار و ذكرى الل لابسين قفطان في الغوز اما نجمة لابسة قفطان في القهوي مفتوح
نجمة كتسلم على المى: هاااي هاااي على الزين
المى: اححح علية وخلاص العقبة لبناتك
نجمة : أمين ..و جلسو كيدويو ..تم نازل اوس و مقداد ...سلمو على نجمة و جلسو في واحد القنت كيدويو الرجال بيناتهم ..نزلات اماليا...سلمات على نجمة ..وكتشوف في دوك  التويميات  اللي اكيد بغاو يبداو يشيطنو ...جات شامة اللي لابسة قفطان في الصفر و زيف في الابيض ...جلسات كدوي معاهم و يضحكو و يهضرو و مرة مرة كتشوف أماليا في مقداد كتشوفو كيشوف فيها ..
غسان جالس في القنت شاد طابليت تاعو جاه الجو ممل ( غير تسنا هاهو غيشعل )
حتى سمعو صوت الطموبيل كدل على مجيء الضيوف..وقفو كلهم في انتضار الضيوف ..
مهران تم نازل هو و سجى اللي حتى هي لابسة قفطان في الغوز ..و ياسمين اللي لابسة قفطان في الاحمر و علي اللي لابس كوستيم في الكحل كباقي الرجال ..هاز مهران بوكي تاع الورد و اللي خدام تماك هاز بعض الهداية
دخلو تماك الصالون ...حتى جات علي عينيه على المى ماتيقش اش شاف وهو يشوف في اوس بصدمة ورجع بيه الزمان للور في اي لحضة دوزها مع خوه ..بقا مصدوم ماتحركش ..وياسمين شافت بصدمة في صاحبتها اللي كتعتابرها كثر من ختها  ...المى كذلك بالمثل تصدمات ..وحتى اوس تصدم سنين مشاف خوه من اخر حادثة وقعات ...مقداد فهم سبب الصدمة خاصة عاقل على علي و ياسمين في صغرو حذر راسو بقلق هذا ختو ماعندها زهر..اما نجمة و اركان تصدمو حتى هما و ولاو طالبين هذا النهار يدوز بخير ...
الكبار فاهمين كلشي اما الصغار مافهموش سبب هذا السكوت المريب خاصة مهران اللي تصدم من ردة فعلهم بحالة تلاح ليهم شي خبر تاع الموت كلشي وجهو صفر