لعنة هوسي ( جزء الثاني من عشقي لمغربية )مكتملة

الحلقة الاولى

كانت كتسمح في الطابلة و كتجمعها من بقاية الطعام حتى مسحاتها مزيان و هي تدي الصينية اللي عامرة باللماعن و عطاتهم للي خدام معاها كيغسل في الماعن
اماليا مسحات العرق من جبهتها : اوووف عيييت
خالد : غير صبري قريب يسالي دوامك
اماليا بتعب :داكشي اللي كاين ..
خرجات باش تكمل خدمتها خدامة كنادلة في مطعم معروف وخا محاملاش الخدمة و لكن ماعندها مادير خاصها تصرف على راسها ... بقات كتوصل طلبات الزبائن و تمسح الطبلة حتى سالات وقيت خدمتها و جات اللي من وراها .. دخلات لفيستير بدلات حوايجها لبسات كسوة في الشيبي كتبان غالية و طلقات شعرها مبوكلي و عودات مكياجها و خرجات هازة محفضتها فيها كتوباتها تاع القراية كتقرا في الجامعة الطب و خاصة دخلات لجامعة تاع البريفي بمنحة  فيها غير ولاد ماما و بابا و الشيكي و الفلوس كضور المقو*** عليه تماك عندو حديدة واعرة .. و بالنسبة اللي كيتقبلو في منحة بحالها فكيتعرضو للتنمر باش يجريو عليهم لهذا السبب كتحاول ما امكن اماليا ماتحسسهمش انها فقيرة و كتقاتل باش تبان غنية بحالهم  ... وصلات بعدما وقف الطوبيس في بلاصة بعيدة على جامعتها و لكن في نفس الوقت قريب يعني دقائق و تكون تماك.. خدات طاكسي اللي وصلها و عطاتو 10 دراهم و نزلات حيتاش لاشافوها نزلات من الطوبيس مشات فيها .. بقات غادة حتى تلاقات مع واحد السفريطة
نادين بتبعكيك لابسة كسوة مقزبة في الحمر و مكياج ثقيل و سابغة شعرها بالصفر : اووووه اماليا ممتيقاش هادشي عمرني شفتك بشي كسوة لابساها جوج مرات
اماليا بضحكة صفرة : اوووه ماشيغي كنت زربانة مع كنت سهرانة في واحد الكلوب فصبحت ناعسة حتى فيقاتني الخدامة و مالقيتها غير هي  قدامي باش ماتفوتنيش الحصة
نادين : اووووه حبيبة مزيان مزيان نخليك عندي شغل ضروري
مشات نادين مخلية اماليا كتفقص القليلة في مشاعرها هي مكتحملهاش كتعتابرها عندها كلشي فكتحسدها... تبعاتها اماليا باش تشوف اينا شغل عندها  ..
وصلات نادين و هي تلقا دايرين ليها من ورى الجردة احتفال بعيد ميلادها جميع عائلتها مجموعين و حتى صحابها .. تبعاتها اماليا و هي تشوف داك المنضر دمعو عينيها و هي كتشوف كيفاش ماماها كتعنقها مفتاخرة بيها و حتى باباها اللي صاحب شركات معرووف بزاااف كلشي داير ليه حساب  اكيد عمرها قالت ليهم راه جاني البرد و لا راه فية الجوع و اكيد اللي بغاتها كتلقاها و اللي حلات عليها فمها يشريوها ليها .. عندها صحاب كيبغيوها هي اللي عمرها كانو عندها الصحاب .. عندها عائلة تبغيها و مستقبل مضمون كلشي عندها.. بعدات اماليا كتحاول تكبح دموعها حتى خرجات من الجامعة .. و  هي تمشى في الطريق كتبكي على زهرها و كيفاش حلات عينيها ماعندها لا ام لا اب من غير واحد المراة عتانات بيها سميتها شامة و هي اللي كبراتها خدامة فام دميناج في احد البوتيكات كتعتابرها بحال ماماها ساكنين في بيت في السطح .. وصلات اماليا لدرهم اللي كان باين فيه غير الشماكرية و دخلات طلعات لبراكتهم في السطح متكونة من صالون و كوزينة و الطواليت.. مشات نعسات في السداري و طلقات العنان لدموعها على زهرها و فين تلات بيها الايام ..
اماليا كتبكي : اهئ اهئ علاش منكونش بحالها يا ربي بغيت عائلة و بغيت الحب بغيت صداقة بغيت الفلوس بغيت النفوذ بغيت نولي بحالها اخخخخ الدنيا شي عطاتو و شي زواتو ..
و هي تنعس كارهة حياتها و زهرها
_____
في قصر بعيد على مكان تواجد اماليا ..
كانت المى بلباس انيق بحالة باقي راها في العشرينات لابسة كسوة رسمية و غادة ماجية بتوتر باقي محافضة على جمالها اللي سطى اوس و قوتها اللي تعرفات بيها و لما لا هي من ابرز السيدات في مجال الاعمال اسسات شركتها للمواد التجميل حتى تشهرات ماركتها وولات عالمية  حتى دخل عليها غسان ..
غسان  ولدها الصغير : متخافيش اماما انا متأكدة غادي تربحي لقب احسن سيدة أعمال في العالم
المى :ياربي امين من فمك لربي
حتى تسمعات في التلفزة :و الحاصلة على لقب احسن سيدة أعمال هي المى العمراني
نقزات المى كضحك و هي تعنق غسان ... حتى تم داخل اوس كيضحك :ديتيها
شافت فيه المى بحب هو اللي ولا شعرو فيه الشيب عاد حتى لحيتو متخللها بعد الشعيرات السوداء ...مشات عنقاتو بحب و هي تبعد بعدما تفكرات شي حاجة
المى :اجي ماشي نتا اللي دخلتي في المسابقة
اوس دوز بايديه على حناكها:لا خليت حبيبتي تتبت انها الاحسن و الاقوى
شافت فيه ببتسامة حب و هي تعنقو كضحك .. تزاد هوسهم و حبهم لبعضياتهم باقين كيف كانو في الاول بل تزاد اكثر .. وخا عاشو سنوات من الحزن بسبب فراق فرحتهم الاولى بنتهم اماليا الا انهم تجاوزو الموضوع و باقي لحد الساعة اوس كيقلب عليها مافقدش الامل وخا دازت 19عام ..
غسان : خاصنا نحتافلو
المى بحزن:ماكرهتش كون حتافلت مع بنتي و تكون معانا و نكونو مجموعين
انيرا شافت فيها بعيون عسلية و ضحكات : غتكون معانا نشأالله انا متاكدة عن قريب غادي نتجمعو بابا راه باقي كيقلب عليها تعانقو بربعة بيهم و هو يبعد اوس غسان و انيرا على المى :سيرو سيرو فحالكم متعنقوهاش
انيرا:غسان تغير منو و لكن واش حتى انا
اوس :ايه حتى نتية
انيرا :ايه اسيدي وخا
اوس :اه قررت ندوي معاكم في واحد الموضوع نتي ( شاف في غسان بشر  اللي بغا يسلت )و غسان حتى هو
غسان بضحكة صفرة :وخا الواليد
جلسو مجموعين و دوا اوس
اوس :غادي نقيدكم في مدرسة خاصة بالبعثات الأمريكية
انيرا فرحات بينما غسان ميل فمو :وااا انا بغيت نقرا مع ولاد الشعب
اوس بحزم  :سالات هضرتي كلها يمشي لبيتو .. انيرا مشات فرحانة كضحك شخصيتها طفولية و كتبغي الخير لبنادم على عكس غسان اللي مشاغب و عزاز عليه المغامرات ... بقات المى مع اوس في الصالون
شنو سبب قرارك من تحويلهم من مدرسية عسكرية لمدرسة أمريكية
اوس : اكيد دابا كسبو شخصية قوية فمن الاحسن يتعرفو على ناس عاديين يعيشو معاهم
المى حطات راسها على كتافو :كنثيق فيك احبيبي و في قراراتك .. بقاو كيهضرو على مختلف المواضيع منها السياسية و الاقتصادية ..تزوجو بعد معانات وخا تزوجات المى باوس اللي هو جزائري الا انها عمرها ندمات ...
_______
دخلات شامة للصالون بانت ليها اماليا ناعسة في وسط النهار مموالفاش ليها و هي تفيقها
شامة :اماليا فيقي فيقي شوفي اش جبت ليك
فاقت اماليا بانت ليها شامة و ضحكات : صباح الخير
شامة : مساء الخير قالاك المهم شوفي اش جبت ليك
حلات اماليا عينيها بان ليها صينية  تاع ماكدو
اماليا بعدم فهم : شنو هادشي ؟؟
شامة : باش تعياقي على صحاباتك زعما راك كلتي في ماكدو
اماليا ضحكات و باست ليها راسها:الله يخليك لية
مشات اماليا قلات الفريت و حطاتو في كارطونة خاوية كان داك ماكدو عبارة على كراطن معامرش غير الخاوي ديالو ضبرات عليهم شامة و مشات اماليا شرات كانيط تاع كوكا خواتها في الكاس و بدات كتصور و كتلوح في الستوريات ... و هي تشوف سطوريات صحابها بان ليها ها لي في باريس ها اللي ممسوقش للقراية و ضامن مستقبالو رغم ذلك .. ها اللي فشي نايت كلوب ها اللي فشي مطعم واعر المهم عياق علية نعياق عليك ... ناضت جبدات كتوباتها كتقرا و كتاكل في ذاك الفريت اللي قلات حتى دخلات عليها شامة ..
شامة : ضبرت ليك على كسوة غتمشي بيها غدا
اماليا بفرحة : بالصح كيف درتي ليها ياك في الخدمة عندك مزيرين من ناحية الحوايج
شامة :هاكي لبسي و ماشي سوقك
شافتها اماليا و حلات معاها فمها كانت لبسة واعرة بزاااف عبارة على كسوة موردة .. عنقات اماليا شامة كضحك ولما لا كتعتابرها مها و حتى شامة كذلك كتعتابر اماليا بحال بنتها
______________