عشق محرم

الحلقة 143

سمع لطخة التليفون .. عرفها تصدمت .. قداش حس على بنتو ، بلع ريقو لي ما لقاشو اصلا خاطرو شاح .. سيناريو حياتو الكل تعدا ما بين عينيه اول ما سمع صوتها ، قداش حس روحو فاقد للمسؤولية ،قداش حس روحو ماهوش راجل ، قداه غاضتو كيفاه ولا متخبي ، ولا معاش ينجم يقول لبنتو راني بوك، خاطر يعرف شنيا بش تكون ردت فعلها ،و ما يحبش يتخيلها ، اما قداه حس في لحظة لي سمع منها كلمة الو ، انو مزال عندو قلب ، انو مزال يحس ، انو توجع و بلع غصتو ، قداه تمنى يسمع منها كلمة بابا و قداه توحشها ، توا سنين ما سمعهاش ، قام من على الكانابي خزر للناس لي دايرين بيه ، الزي ، السلاح ، و القصر لي يعيش فيه ، فاق على روحو ، فاق على وضعو ،كيفاه وصلت للحالة هذي ، شنوا الهم لي نعيش فيه ، شنوا الوسخ لي مدورو بيا شنيه هالعيشة ، و شتسوا هالدنيا قدام كلمة بابا ، قدام عايلة حنينة تحسسك بالمسؤولية ،قدام أشخاص يستناوك وقتاه تروح مالخدمة بش يفرحو بيك و يعنقوك موش اشخاص يستناو وقتاه يجي الشهر بش يخلصو على تعبهم ، عالخمج لي انتي عاملو، حس الدنيا دارت بيه ، رجع بيه الوقت لتالي ، لحياتو هو و مليكة ، لحبهم ، و لولادو ، قداه متوحش لمة معاهم على طاولة متع فطور ولا خرجة متع عشا ، دمعتو هبطت من غير ما يشعر ، حس انو غالط و يعيش فالغلط لعينيه ، حس بالحق انو دنيتو فارغة و لي دايرين بيه الكل مالهم الا خدامة ، عايشين معاه بش يخلصو و يروحو لعايلاتهم ، اي هوما يخدمو على عايلة ، وانا لشكون نخدم ، انا فين نعيش و مع شكون ، انا كان نهار نطيح نموت ما يفيق بيا حد ، حس بلي موش حاسبو حد ، حتى بنتو لي تأثرت على راجل خالتها موش حاسة بيه يحكي بينو و بين روحو، زعما كان كنت انا في بلاصتو شتحس هكا ، كيفاه ، كيفاه شتحس و انا بعيد عليها و انا موش عاطيها اهمية و انا مشيت و خليتها و حرمتها انها تقول كلمة بابا سنين و سنين، حس روحو لا شي ، و قداه حس ببنتو و بوجيعتها ، حس بلي هي ما لقاتش بو تحس عليه كان عمها طارق ، حس انو ظلمو و ظلمو برشا
عيط عيطة حب يخرج فيها علي حسو على بنتو الكل
يااااااااااااااااا حررررررراااااااس : جيبولي لي قتل طاارق العايشي فيييييييييييييسععععععععععع ، اجرييييييييييييييو و ماذابيا يكون حي موش ميت ، بش نعذبو انا بطرف بطرف
صحيح هو متعارك معاه عالأملاك خاطر هو كان عضو في شركات العايشي اما قمر بالحصص متاعو الكل و خسرهم و خرج بيدو على راسو مالشركة و بلي قال لطارق بش يشري أسهم صغيرة فالشركة متعهم و يعاود يكبرهم بشوية بشوية خاطرو نادم انو قمر عليهم و طارق قلو لا ، من وقتها و هو يكره طارق ، كانو عايشين صحاب و عيلة وحدة مع بعضهم من وقتها تقلب كل شي ، و سي طورينتو قرر يخرج لبريطانيا و يتبع الخمج متاعو و يبيع الكوكا بش يرجع غني و يدخل الفلوس بعد لا شركة طارق حجزتلو على املاكو الكل ،و من وقتها كبر البزنس و الفلوس خلاتو ينسى حتى عايليتو
صحيح عداوتو مع طارق اما ماكانش يحبو يموت بالطريقة هذي و اصل ما كانش يحب يقتلو ، طارق صاحبو القديم و هو وياه كانو كيف الخوات اي سيرتو الي هو يحب بسمة برشا و يقدرها حاصيلو كانو عايلة محلاهم ، و توى بعد ما حس بوجيعة بنتو على طارق تفكر قداش كانو صحاب، وقداشو حتى هو لازمو يحس عليه خاطرو عشيرو و ماكلين الماء و الملح في لحظة لي هو يعيط ، تعدات كل لحظة باهية عداها معاه ، مع طارق ، صاحبو و عشير عمرو لي كي خوه ، لي كانو كيف يتقابلو و يعملو قعدة حلوة كلمة "ما تفرقنا كان الموت" ما تفارقش فمهم ، ما فيبالوش لي الفلوس هي الموت لي بش تفرقهم ، في لحظة عاف روحو ، قداشو ظهر انسان خايب قداشو كره روحو، في لحظة فاق على روحو، كيفاه نجم نكون هذا انا ، كيفاه نجم نكون ما نحسس لهالدرجة ، واقف يدور على بلاصتو و يتنفس بالقوي قلبو وجعو طاح فالقاعة ، يتنفس بالقوي و الدمعة ما فارقتش عينيه ، شد قلبو لي وجعو عالخر بعديكا عيط ، عيطة كانت ذابلة ، كانت عيطة متع واحد مهزوم، متع واحد مغلوب على امرو غرتو الدنيا و وسخها ، بقى يجري وراها لين نسا اصلو و فصلو
طاح يتنفس بالقوي لين معاش ينجم ينفس شد النفس جاه دالي يجري
: بااا ، پااااا لاباس قومو و عيط للحراس