عشق محرم

الحلقة 125

خذاو تكسي و مشاو لطريق دارهم، مريم قلبها يرجف، شنوا هالاحساس يا ربي ولا عمرها حستو، خوف مخلط مع حزن و ربثة، هي بس
ش ترا الحاجة لي ما راتهاش عندها سنين، موش عارفة كيفاه بش تهز عينيها و ترا الدار لي عدات فيها صغرها محروقة، الدار لي تبنات فيها أحلامها مع امها و بوها ، و في يوم واحد تهدت ، الدار لي فيها خسرت حياتها و حياتها من وقتها تقلبت ، خزرت لأميرة في عينيها و عينيها لكلها دموع و الغصة في قلبها، تخزرلها و تعمللها لا براسها، و في قلبها تقول لا أميرة ما نجمش، مانيش قوية للدرجة هذي شدتلها أميرة يدها تصبر فيها، أميرة خايفة لا تكون الدار ماهياش محروقة الحاجة الوحيدة لي حاطتها في مخها و فهمت لي ما تنجم تكون كان هي ورا البلاء هذا الكل ، فاطمة
ما فمة حتى واحد ينجم يدخل في حكاية هكا و يلعب مع ولد العايشي كان هي ، شكون بخلافها يتجرأ ولا ينجم يكون عندو مصلحة
أميرة مخها يخدم ألف حاجة و حاجة تدور في مخها موش لاقيتلها اجابة و لازمها تعرفها الحاجة الوحيدة لي متأكدة منها لي هي باش تاقف هالحكاية و ماهياش بش تسيب لي كان وراها الا ما تحاسبو لو مين ما كان يكون
وصلو لغابة ، لكلها شجر، مريم قلبها يرجف موش متخيلة لي بش تراه : آقف هوني يعيشك
أميرة: وصلنا؟
مريم هبطت منغير ما تجاوبها و اميرة هبطت وراها ، مشات شوية القدام ، اشارتلها بصاكها بمعني هذي هي دارنا، اميرة ترا في باب كبيييبر حديد و سور داير معاه 
مريم: أميرة قدم انتي يعيشك
أميرةقدمت و هي مصدومة ،همها الوحيد انها توصل لحاجة ، ترا في السور و الباب و موش منجمة تتخيل كبر الدار ، وصلت للباب لقاتو دايرة علية سلسلةكبيرة مصددة و معاها كدنه كبيرة زادا، تلفتت -لمريم لي مزالت واقفة بعيد ، تخزر كان بعينيها و ساكتة -بمعنى هاني بش نحل الباب ،مريم قتلها اي بعينيها و قلبها يرعش ، عينيها بدموع موش منجمة توقف لبكاء مسحت عينيها و تنهدت و حاولت تكون قوية ، خاتر بش تحا باب سكرتو من قبل و حاولت تنساه و تعوض اما موش منجمة
تلفتت لقات حجرة هزتها و ضربت الكادنا، ضربة وحدة و تحلت تالمون الكادنا قديمة ، عاودت تلفتت لمريم تقوي فيها خذات نفس و دزت الباب و كانت الصدمة