(Unicode)
" တီနှောင်း...ပေးပေး သမီးကို။ အဲ့ဒါ သမီးလုပ်ပါ့မယ်''
အိမ်လယ်ခန်း၏ နံရံမှာ ကပ်ထားပါသော ထမင်းစားပွဲဝိုင်းအပုလေးကို လှိမ့်ယူကာ ချရန်ပြင်ဆင်နေသော တီနှောင်းအား ပန်းမေက ကူကာ စားပွဲဝိုင်းကိုယူလိုက်လေသည်။ထို့နောက် အိမ်လယ်ခန်းမှာချလိုက်ကာ အိမ်နောက်ဖေးမီးဖိုချောင်ထဲမှ ကြွေပန်းကန်တွေနှင့် ဟင်းပန်းကန်တွေကို အပြေးသွားယူလိုက်လေသည်။
" ပန်းမေရယ်...ငါလုပ်ပါမယ်ဟ။ နင်ကလည်း... ''
"သြော်...ငါလည်းစားမှာပဲကို၊ ကူလုပ်ရမှာပေါ့...။ မဟုတ်ဘူးလား?''
"အင်းပါ...အင်းပါ''
ရသလည်းပန်းမေလက်ထဲမှ ပန်းကန်တွေကိုကူသယ်ပေးကာ ထမင်းပေါင်းအိုးထဲမှ ထမင်းကိုခူးခပ်လိုက်လေသည်။ သူတို့ကျောင်းပြန်လာခါနီးမှ အမြဲတမ်းတည်တတ်ပါသော အမေ့ထမင်းပေါင်းအိုးက နွှေးထားသည်ထက်ပို၍ ပူနွေးနေခဲ့သည်။
အမြဲတမ်း အခုလိုမျိုး သူတို့အိမ်မှာ ပန်းမေထမင်းလာစားသည့်နေ့တွေဆိုလျှင် စုံစုံလင်လင်ရှိလှသည်။ စုံစုံလင်လင်ရှိမှလည်း ပန်းမေကလာစားတတ်တာမဟုတ်၊ဟင်းတစ်မျိုးထဲချက်ရင်တောင် လာစားတတ်တာပင်။ သားအမိနှစ်ယောက်ထဲ ဖြင့်သာခြောက်ကပ်နေသော အိမ်က ပန်းမေလာလျှင် စိုစိုပြေပြေ ဖြစ်သွားရသည်။
" ပန်းမေ...စားကောင်းလား?''
" ကောင်းတာပေါ့ တီနှောင်းရ။ သမီးတို့အခုတလော စည်သွပ်ဘူးနဲ့ နှစ်ပါးသွားနေရတာကြာပြီ။ မာမားကလည်း ချက်ပေမယ့် များများစားစားမဟုတ်ပါဘူး''
" ဒီရက်ပိုင်း တီနှောင်းတို့အိမ် လာစားပေါ့သမီးရဲ့''
" ဟုတ်ဟုတ်။ တီနှောင်းမပြောလည်း လာစားမှာ... ဟီး''
ရသက ထမင်းစားနေရင်းနှင့်မှ ကြက်သားတစ်တုံးကို မေမေ့ပန်းကန်ထဲသို့ ထည့်ပေးလိုက်သည်။
" တော်ပါပြီ...သားရယ်။ မေမေက ငါးပိချက်နဲ့တင်ဝနေပြီ''
" များများစားမှ အားရှိမှာပေါ့ မေမေရဲ့''
" အေးပါကွယ်...''
မေမေ့ပုံစံက အခုထိ ဖျော့တော့လျက်...။ ဒီနှစ်တွေအတွင်းမှာ မေမေက သူ့အကြောင်းကိုရသအား ပေးမသိစေခဲ့သလို သူ့ကျန်းမာရေးအကြောင်းကိုလည်း အသိမပေးခဲ့။ သားတစ်ယောက်အနေနဲ့ သူ့တာဝန်မကျေသလို ခံစားနေရသည်။ သူကတော့ ငယ်ငယ်လေးထဲက ဖေဖေထားသွားပြီဆိုသောအသိနှင့် မေမေ့အား သူသာလျှင်စောင့်ရှောက်ရမည်ဟု တွေးထားခဲ့သည်။သို့သော် အခုတော့...သူမေမေ့အတွက် ဘာဆိုဘာမှ မလုပ်ပေးနိုင်သေးဘူးပဲ။
ŞİMDİ OKUDUĞUN
From My Tears...
Romantizmသံသရာတစ်ကွေ့ ဒီဘဝဝယ် ချစ်ခဲ့ဖူးသည် သူ့အပါးတွင် ခိုဖူးချင်သည် နောက်နောင်ဘဝ လွမ်းချင်းရပ်မည် ချစ်ခြင်းအတ္တ ဤဘဝ...။ 𝐒𝐭𝐚𝐫𝐭 𝐃𝐚𝐭𝐞-20.4.2021 𝐄𝐧𝐝 𝐃𝐚𝐭𝐞-15.10.2021 သံသရာတစ္ေကြ႕ ဒီဘဝဝယ္ ခ်စ္ခဲ့ဖူးသည္ သူ႕အပါးတြင္ ခိုဖူးခ်င္သည္ ေနာက္...
