ابن الاجاويد

البارت الرابع والعشرون

_24_

#أبن_الاجاويد(رد الدين)

#بقلمي_أسماء_ديمير

باوعت اله استغربت وجوده ، عيني تراقبه بريبه ، درت وجهي وراه خاف احد وياه ، لو جايب الشرطه هم يعتقلني ..

نزرع بيه الخوف بسبب الي  صار الي بالمركز ، خليت بالي ، شما يصير اكول ماعرف وانكر ،

هو واكف ساكت ، حاجب باب المحل على عرضها ، والله اذا اكول عرض جتافاته اكثر من ٣ اشبار مو غلطانه ،

عنده طول وعرض يخوفن يخلن الواحد جدامه يخور من خوف ..

حجيت كوه ، كتله بيش اخدمك ..

خادمه ربج ،  لااا بس هيج جيت اخذ عبا هديه لناس ..

اي كول اطلعها الك ، حجيت بسرعه اريد يطلع داخلص منه ،

. ابتسم انطي مجال اريد اشوف شعدكم هناا دار وجهه يشوف ..

تقدم عليه يشوف ويفتر براسه ، عرفته نيته مو شرايه لان باين مايعرف اي شي بخصوص العبي ، لاشاف النوعيه القماش ولا لزمهن اصلا ولاتفرج ، 

رجعت ليوره انطي مجال لان وكف بصفي حيل ،  كعدت على الكرسي مركزه وياه حيل ،

باوعلي يبتسم ويرجع يفر راسه ..حك راسه محتار ..

عفته يفتر وكل شوي يندار عليه يباوعلي  ، جريت نفس ، لاحظت عنده شيب بشعره بجوانب ،

برغم زيانه خفيف ، وشعره مابي ثخن بس مبين الشيب ، عكس شواربه ثخان وسود نازله على شفته ..

ارمش بهدوء وافصل بي ، بعد خياطه عبي شغله تفصيل والقياسات شغلتي ...

تالي عرفت ماراح يشتري شي ، وماراح اخلص منه اذا ضل هيج ،  تقدمت عليه ، همست شنو طلبك باين ماتعرف شي بالعبي ..

دار عليه صراحه اي بس اريد وحده لميمتي ..

شنو النوعيه ..

ماعرف بس اريدها كون كشخه تفرح بيها كبال صاحباتها ..

مشيت ادور على وحده اريده بس يروح وجوده يوترني ، شكد ميزانيتك ..

هااا ..

اكو انواع ، اكو الكشخه بس الادامه مالتها شهر او ست اشهر واكو سنين ماعليها شي ..

باوع بوجهي اغلى شي عدج ..

بلعت ريك ونطيته ظهري ، طلعته صدك احسن شي عدنا ، مشتغلتها ام احمد بيدها كلها من تطريز للغرز العبا ..