ابن الاجاويد

البارت الثامن عشر

_18_

#أبن_الاجاويد (رد الدين )

#بقلمي_أسماء_ديمير

صفنت على عمي ، وعلى دكه مالته ، هيه بلعت ريكها ليش بأسمكم ليش مو باسمي واسم احمد ..

ضاج وضل ينتر ، مو وكت هذا الحجي ، امشي ويه الرجال فلشه وعيب منه ، طلعتيني جذاب جدامه ..

بجت ، مااروح عمي اذا متكلي ليش ممسجله باسمي ،  ابني هذا حرام والله حرام الي تسوي لوعت كلبي بي ليش هيج ، شسويتلك متكلي وهيج اذيتني  ..

سكت يفر براسه عصبي ، بعدين باوعليها مبتسم يهدي بيها ، لخاطرج يابنتي داسوي هيج ، سالفه اطول اشهر ويله الطفل يتسجل باسمج ..

منا انتي مزوج عقد من احمد ونوب مطلكه ورجعتي تزوجتي ، يراد اشهر ويله اكمل معامله ، بس اذا باسمي واسم امج بسبوع وتخلص سالفه ، وعاد بكيفج لو يسجل باسمنه لو يضل طفل هيج بلا هويه ، هذا الي اكدر عليه انا  ..

سكتت تباوع بعيونه بحيره ،.

نتر بيها  امشي عاد ولي البسي واطلع ويه رجلج ، سبوع بالزايد هو طفل يمج هو والجنسيه كبل لاغير رأي  وعلي يله مو وجهه نعمه انتي ، نوب وراج نسرين تعلم بيج انجلبتن فرد جلبه  ...

مشت من يمه بصفنه وجهه دعه كركم دايخه ، صعدت درج كوه ، مشيت وراه وصلت للغرفه وكعت على ركبها تبجي ، حظنتها حيل ..

كافي لاتسوين هيج لخاطر صحتج ..

ابني ياناس لوعني عليه بجاني دم شسويت اله وهيج حاقد عليه ويأذيني ..

بجيت وياها ، والله راح تموت من القهر بسببه ، اني من يمي شتعل كلبي شعل ، شحال هيه ..

جريتها للغرفه ، احجي واهدي بيها ، بس هيه كلبها نار ، روحها راحت ، كامت تلم بملابسها ودردم وتحلفه هالبيت بعد ماتدخل اله الا على جثتها ، لو اعرف واحد بيكم يموت مادخل ، خلص لو انشمر بشارع مارجع يمك ياجعفر ...

صافنه عليها وهيه معصبه وتتحلف وتتوعد ، خفت عليها من سكر لا توكع ، نوب حتى دواها مملتزمه بي ، كملت لحيلي اخذت من الغراض اني المهم ،

حجيت وياها ، صحتج يمعوده شبيج ..

ماحجت ضايجه وتنافخ ، جرت مني الجنطه وسدتها بقوه ، لبست العبا  ..

نزلت شايله جنطه ولافه شال شلون ماجان ..

تلكاها عمي مبتسم ، اي اي هيج من الاول ليش تضلين ثوله وماتفكرين ...