ابن الاجاويد

البارت الثامن

_8_

#ابن_الاجاويد (رد الدين)

#بقلمي_أسماء_ديمير

  
بيوم من الايام الكشره ، جنت نايمه بفراشي واحوص ، ياربي اريد اكوم اروح للحمام مثانتي راح اطك بس اخااف  ، ضليت بمكاني اتكلب ، اخاف اطلع بره الغرفه اخاف من الظلمه ومن صوت عمي بليل ، .

زين اكعد مينا هااا ، لا اكيد مراح تكعد وتعيط بيه ..

كلبت على اليمنه وكورت نفسي احاول اكتمها ، اكوم اروح بسرعه  ، لا اخاف مثل ذاك اليوم يطلعلي عمي من الظلمه سكران ويجلب بيه ..

زين اكعد مينا  ، خاف يعصب علينا ،  نفس مااعصب على بابا ويضربنا نفس ما ضربه وطلع الدم من راسه .. جريت نفس خايفه ، كتمت نفسي من سمعت يده باب تتحرك ..

غمضت عيني حيل وسكنت ماتحركت بعد ، باب انفتحت واكو خطوات مشي ، حسيت على صوت شهكه وبجي بسكوت ، فتحت عيوني بس مارفعت الغطى ..

ضليت على نومتي خانسه اكو حركه بالغرفه .. تشجعت ورفعت الغطى شوي ، لان اختي كاعده بصف الحايط مكنبصه ولازمه بطنها تبجي بهدوء  ..

وخرت الغطا بسرعه شهكت يااا شبيج ..

هيه التفتت عليه متفاجئه شكعدج هاا من شوكت كاعده ..

كمت لحيلي اروح عليها رفعت اديها لا لا تجين خليج بعيده ..

خلت اديها على وجها تكتم البجي  حتى صوتها ميطلع ..

شبيج دمعت عيوني شبيج يااكلبي ليش تبجين شكوو ..

تقربت عليها امشي على كيف ليش تبجين ..

اشرتلي لاتجين عفيه لاتلوثين نفسج مثلي ،  وجهه احمر دموعها تارسه وجها ،  ولازمه جسمها بديها ، مكوره روحها جن تحمي نفسها ..

تقربت حيل عليها وحظنتها ، كامت تشهك حيل وتبجي  ،

من قهري وخوفي بجيت وياها ليش تبجين ليش عمو ضربج موو ليش دائما يضربج هاا ..

سكتت بس تبجي ،

سالتها ضربج لان طلعتي بره الغرفه بليل موو .. هو كلي اذا تطلعين بليل من الغرفه  اضربج .

بس تهز براسها وتبجي ، كتلها ليش طلعتي انتي اني هسه محصوره وماطلعت ليش ماتحملتي للصبح ..