ابن الاجاويد

البارت السابع والعشرون

_27_

#ابن_الاجاويد(رد الدين)

#بقلمي_أسماء_ديمير

حاولت اميل بالزاويه حتى مانشاف ، متاكده هو والله ، شلون انسه شكله وصوته ، هو شكله وصوته محفورات براسي حفر ..

عقدت حواجبي وجسمي وجعني من تذكرت الضرب مالته بمركز التحقيق، والله كطع الحزام عليه ، لو مايدخل الرائد لهيب جان متت بيده ..

لو من مد ايده عليه يعت بيه وسرد ثوبي ، لميت العبا عليه زين ، يارب مايدخل هنا يارب ،

صوت ضحكه مالته عاليه ويحجي بصوت مسموع ، سم لهل صوت ، ابو ايد الثكيله ..

اجت بنت تريد تستلم فلوس محوليهن الها من الخارج ، اريد اوكف كبالها وافتهم منها وخايفه ..

وكفت كبالي ويله وكفت اخذ وانطي وياها ، احجي وياها بهدوء واسالعا على تفاصيل ..

كمت وكتب بالسجل ، نطتني اسم الحساب ورقم ..

كعدت اشتغل وعين عليه وعين على حاسبه خايفه ..هيه شوي متروسه ، يعني غطتني كلني ..

انتبهت عليها وعلى لبسها ، لابسه بنطرون كتان ضيك وقميص كصير ، امبين جسمها كلش خطيه ..

طرفت عيني عليه ، شفت يباوع للبنت من وره ويحك بلحيته ، فاسد سرسري ..

نوب غمز للولد الي بصفه يكله هنياله الملفيها ..

وذاك يضحك ويضرب بيك ماتفوتك فوته ابد ..

عجل صياد اناا ياهو جان ..

عفست وجهي قرفانه منه ، خرب بليسك شكد عينك نكسه ، البنت اخذت فلوسها حسبتهم ، ومشت هو عينه وراها على منطقه معينه بجسمها مركزز ولا شالها ..

ضليت خاتله بمكاني ماتحركت ، كل شوي اكول راح يجفت لهنا يسويها الحظ والله ، كاعده وادعي مايشوفني ، لحد ما اجه شلال ، ذاك بعدك كاعد نوب دزو على جاي خرب شلون راح اطلع يااربي .

دخل شلال يمي حجيت ببتسامه اروح هسه ..

اي يابه الله وياج اوصلج ..

لا رحمه والديك ارجع مشي ..

كمت اخذت جنطتي ولفيت العبا عليه زين ، سويت الشال شوي محنك بالكت مايبين وجهي يارب ..

طلعت كبل دايره وجهي عكسهم اريد اطلع ، صاح امجد ، هاا مينا رايحه نوصلج ..