كيان فريدة (الجزء الثالث من روح الزين)

بارت¹¹ لِـ «كيـان فريـدة».

روح بتألم: خدي خدي اااه خلاص بهزر والله بهزااار.

بعدت عواطف إيدها وشاورت ليها: قومي فزي هاتيلي كوباية ماية ساقعة من الزير ومتلعبيش فيه وتغرقي الدنيا عشان عارفاكي.

روح بخفوت: للدرجادي سمعتي وحشة.

عواطف: اللي كان بيحامي ليكِ مش موجود دلوقتي معانا وهطلع القديم والجديد عليكِ.

روح بحزن مصطنع: ربنا ما يحرمني منه يارب والله ما حد بيقدر يقفلك غيره وإيه رائيك بقا هقوله علي كل الل بتعمليه فيا.

عواطف بكبرياء مصطنع: ولا يقدر يعملي حاجة دا خايب زيك.

روح بخبث: وهقوله ع البسبوسة يا عواطف.

عواطف بتوتر: لأ إنتِ جدعة البسبوسة لأ.

روح وقفت: مش هتصعبي عليا خلاص أنا قلبي مات.

مشيت روح ودخلت أوضة تانية وورد بصت لعواطف باستغراب: إيه البسبوسة دي مش فاهمه؟.

عواطف بتأثر: القاسي جوزها حارمني منها.

ورد بحزن: ليه؟

عواطف بصت ليها: عشان غلط عليا ولو عرف هيجي يعاقبني.

ورد ضحكت: ما هو خايف عليكِ.

عواطف: بس دي بسبوسة وبحبها وقال إيه بيجيبلي نوع منها ياختي غريب كدا مفيهوش لا سمن ولا سكر اسمها إيه دايت قال.

ورد بابتسامة: دي بسبوسة صحية عشان متتعبيش.

عواطف: يبنتي وإيه فايدتها وهي مفيهاش الزبدة البلدي ولا السكر بتاعنا دي كدا متبقاش بسبوسة.

ابتسمت ورد وعواطف سألتها باستغراب: مقولتليش إسمك إيه؟

ورد بحب: اسمي ورد يا طنط.

عواطف: ياختي اسمك جميل وضحكتك أجمل وبلاش طنط دي بتعصبني وهضربك أسمي عواطف بس.

ورد بضحك: حاضر يا عواطف.

عواطف بابتسامة: إلا الل في عيونك دي بتاعة بيقولوا عليها لانسز حاطاها ليه أنا مبحبش البنات دي.

ورد: لا دي عيوني مش لينسيز.

عواطف شهقت: يا ندامة دانتي جميلة أوي.

ابتسمت ورد: تسلميلي يارب دا من زوقك.

عواطف ركزت في عيونها: شكلك حزين يابتي عيونك بتقول كتير.

ورد ابتسامتها اختفت وبلعت ريقها بصعوبة وبتحبس دموعها: لأ مفيش حاجة أنا تمام.

عواطف ضيقت عيونها بتركيز: امممم إلا مقصوفة الرقبة دي اتاخرت كدا ليه كل دا بتجيب كوباية ماية (بتنادي عليها) يا بختي المايل إنتِ غرقتي في الزير ولا إيه دا لو الواحد بيموت وامنية حياته يشرب هيكون ذهب للي خلقه في ساعتها وهتجيله جلطة بسببك.