#العشق_المتمرد "اختبار"
#جمان_فريد
الجزء 117 القسم التاني
🌟..
فتحت عيونها ع وسعهم ودموعها ع وشك الإنهمار..
دقات قلبها اللي زادت قوت ولت مسموعه..
قالت بصوت فيه رجفه :هما قالوا اكيد مات..لكن اني لتوا نقول لا...
شبحت مني لسبحتها وقالت:امم..هو هدى..
دلال:شن هو !؟..
تنهدت مني وقالت:الشهيد يابنتي حي يرزق..هو هدى تفسيره بإذن الله..ان شاء الله يكون هو عند ربي توا فمكانه عاليه حي عند ربه يرزق..
بلعت ريقها وهي ترمش فعيونها بسرعه وحطت يدها ع يد مني وقالت:ليش سألتي لو كنا متأكدين من موته ولا لا؟!
نعيمه وفاطمه بدوا ينتبهولهم..
مني ابتسمت وقالت:ع خاطر التفسير يابنتي...
دلال قعدت تشوفلها بنظرة كلها ألم..
انوجعت عليها مني حطت يدها ع يد دلال وقالت:سامحيني بنيتي كان خليتك تفهمي غلط...اني بس كنت نبي نعرف حاجه ومنين سألتك كنت نبي نعرف كان انتي مصدقه موته ولالا..ماهو يابنيتي مرات في احلام تكون حديث نفس..ولاخترفه كيف مانقولوا..
دموع دلال نزلوا وهي تقول:يارب يكون تفسيرك صح..
اسيا؛ماما لاش تبكي؟..
دلال مسحت دموعها وقالت:شي ماما..
اسيا:مش انتي مرة قوتي ان بابا عند ربي عايش ولا..معناتا مش ميت..
ضحكت مني وقالت:ماشاء الله الله يبارك..مسحت ع شعر اسيا وقالت..ربيتي صح يابنتي ..
ابتسمت دلال وحطت يدها ع خد اسيا..واسيا ابتسمت..
مني:ردي بالك من عويلتك معاد تخليهم يشوفوك هكي بنيتي..
هزت دلال راسها بإيجاب..
ومزال عيون فاطمه ونعيمه عليهم..
🍁🍁🍁🍁
حوالي خمسة دقايق..وعرب الكسوة تسقدوا...
وسقدوهم اهل بلقيس بشوط دربوكه..
وروحوا..
🍁🍁🍁🍁
فهالليله سهريه كذلك..
واغلب الناس حيمشوا لعيت عبدالمقصود لأن عندهم هما الليله هادي اهم..
بش يجوا اليوم اللي بعده لليله الأهم عند عيت رمضان فعرسهم ليلة قنديل العريس..
🍁🍁🍁🍁
مرت ليلة عاديه وسهريه بسيطه بحضور اقارب والأصحاب القريبين..
وفي هالليلة ماجوش سناء وامها..ريحوا العيله منهم ..
بس وجود لمياء يسد..
الساعه 1:30ليلا..
في الصاله..
كانت غاليه مقعمزة تحسب فحاسبة تليفونها المصاريف اللي صرفوها ع العرس لتو.
كانت تبي تزيد موالح ع خاطر سهرية غدوة..
غاليه:امم..هدين يجيبن 150طرف بوريك..كويس..
قعدت تعد ع صوابعها..هكي بوريك وبيتزا وكباب وطاجين جردينه..
كويس
ع طلعة لمياء من الدار..
جت لغاليه قعمزت وقالت:كلهم حطوا الراس ع المخده ورقدوا.
غاليه شبحتلها وقالت:وخيرك انتي مارقدتي!؟..
لمياء:شربت شاهي هلبه ماجانيش نوم..
غاليه:امممم..
تنهدت لمياء وقالت:غدوة بنطلع ناخد حاجات ناقصيني بالك تبي حاجه..
غاليه:من بيرفعك..سيارة عمر دارتها فيه بكري..
لمياء:عارفه..بيرفعنا عماد ..
غاليه رفعت حواجبها بعدين غيرت عيونها عنها وشبحت لتليفون وهي تتنهد بتهكم..
لمياء ضيقت عيونها وقالت:غاليه..خيرك شن في!؟
غاليه :شي..
لمياء بإصرار:لا في..
شبحت غاليه القدام..بعدين لفت وجهها للمياء وهي تشبحلها بجديه..قالت:في ان حركاتك يالمياء انتي واختك عيب فحقكن..تلقحيكن ع رزان راني نسمع فيه ومركزة ع تصرفاتكن زين..شن تبن منها البنت !؟
لمياء بحده:هي شن تبي من اختي وخطيبها!!؟راهو ياغاليه نشوف فحركات ونتغاضى عليها بش ماتصيرش مشاكل..واختي من حقها تحافظ ع خطيبها..اولى بيك تركزي ع تصرفات بتت خوك .
غاليه:مركزة عليهن كويس تصرفاتها..انتي ركزي ع تصرفاتك يالمياء..
لمياء تهكما:طبيعي بتتحيزي لبنت خوك ..
غاليه بحده:لا نهائي..اني لو ريت عليها شي نعطيها ع راسها ونديرلها حد..لكن اني ماريت عليها شي..البنت تتجنب تجي للحوش وين يكون عماد فيه..رفعت حاجبها وقالت..وكانكن انتن ريتن شي ع عماد فهدي مشكلته مش مشكلة رزان..عدي قولي لأختك تعرف كيف تكسب قلب خطيبها اللي وافقت تنخطبله..اشرت بسابتها ع لمياء وقالت..وهي عارفه ان قلبه مش خالي
لمياء قعدت تشوف لغاليه بنظرات حاده...
اما غاليه فناضت من حداها بكل هدوء ومشت للدار..
خشت وصكرت الباب ..
لمياء ضمت شواربها القدام بغضب وغمضت عيونها بعصبيه..بعدين فتحتهم وقالت فنفسها"بااهي ياغاليه تو يبانلك"..
🍁🍁🍁🍁
تاني يوم..
الإربعاء ..
الساعه 11:00صباحا..
مقعمزات يحطوا في المكسرات في" البوبنيرة" في الخيمه..
غاليه..دلال..رانيا..نور..رزان..رفقه..حدهم..
غاليه بإبتسامه:هي ابدي رانيا..
ابتسمت رانيا :احمم..وبدت تغني..
زي الورده اللي تستنى..
تمر النسمه ع اغصانها..
مستنيك تجيبلي الجنه..
ونعيش انت فاحضانها..
كلهم يشوفولها وهما مبتسمات تغني من قلبها والدموع معبيات عيونها..
زي الوردة اللي تستنى..
نون..حرف النون نوارة..
نور بتفكير:اممممم...ضحكت بعدين بدت تغني..
ناري ناري ناري من جمالو..
ناري ناري قلبي ايه قرالو..
غنوا مع بعض..
من نظرة تهنا فلحظه ذبنا احنا سوا..
حبيبي ده..
اجمل كلام فعيونوا قالوا عن الهوا.
حبيبي ده..
ناري نااااااريييييي..
كلهم:ههههههههههههه...
نور بضحكه:ياء حدهم..
حدهم بتفكير :امممم...ايه اهيا...
ياما سوا زي الياسميني..
يطل الهوا وانت تلاقيني..
وتقلي مش رح انساكي..
مع بعض..
يايايا ناسيني..
غاليه بضحكه:تهبل الاغنيه هدي..هي تو رفقه دورك..
رفقه بتفكير:ياء..اممم..ياربي..ضحكت بعدين غنت..
يادلع يادلع ادلع ..
بالحلوين اطلع..
يادلع يادلع ادلع..
مررت صبعها عليهم وهي تغني..
بالحلوين اطلع..
روحي حبت روحك..وقلبي فيك تولع قلبي فيك تولع..
رانيا بضحكه:محلاها..
ضحكت رفقه وقالت:سمعتها مرة فبرنامج حبيتها..هي دلوله حرف العين..
شبحولها وابتسموا..
هي نزلت عيونها للي فيدها وابتسمت بألم وبدت تغني..
علقت عيني..فالجايين وقلت اكيد الحبيب اولهم..
وصلوا مالقيت الحبيب معاهم كذبت عيني..
وعلقت عيني..فالماشيين لقيت الحبيب الحبيب اولهم..
تميت نرفع فالتراب وراهم..
وكذبت عيني..
وغاب نور عيني..
تأثروا هلبه وهما يسمعوا فيها كيف تغني بنبرة حزينه..
لدرجة وقفوا اللي يديروا فيه وهي بس اللي قعدت تخدم وتغني..
في الجاييين مغيب..آه مغيب
وفي الماشيين اولهم..آه اولهم..
اه مني هارب..تميت نتبع فيه مني هارب..
ياويلي واه تميت نتبع..
اه مني هارب..فجرته درت الطريق مسارب..
ياولي وآااه..تميت نتبع فيه..
طاحوا دموعها..
طول مسحتهم وهي تضحك قالت:الله يرحمك ياذكرى..
هي رزونه حرف الهاء..
مسحت رزان دموعها واختارت تغير الجو رغم كسر قلبها وألم الفراق اللي عايشاته حتى هي..
قعدت تغني..
هيا ياهو هيا هيا
ضحكوا..
وحميدا ماريتش زيه ..
هيا ياهو هيا هيا..
رجعوا يخدموا وهما يغنوا ويضحكوا..
هيا ياهو هيا هيا..
فم البوابه..
كانوا مالك وعماد طالعين مع امهم بش بتمشي لبوهم..
قعدوا يسمعوا فنور وهي تغني..
وملوكي ماريتش زيه..
كلهم:اوووووه...
رزان:هيا ياهو هيا هيا..
ابتسم مالك وهو محرج ووجهه احمر..
كفايه بضحكه:هيا ياملوكي..
تحشم من امه هلبه...
وهي تضحك..
مشوا وعماد قعد واقف يسمع..
حدهم:ومونه ماريتش زيه..
ضحكوا..وغنوا معاها..
هياياهو هيا هيا..
رانيا :والاصفر ماريتش زيه..
وهما يردوا...
هيا ياهو هيا هيا..
رفقه :وبابا ماريتش زيه..
هيا ياهو هيا هيا..
رزان :وسيدي ماريتش زيه ..
هيا ياهو هيا هيا..
كلهم::ههههههههه..
عماد ضحك وقلبه يدق بقوة...وفرح لأنها غنت ع بوها..
غاليه:والمطبخ ماريتش زيه..
هيا ياهو هيا هيا..
ضحكوا ع غاليه..
بعدين غنوا بصوت عالي..
هيا ياهو هيا هيا..
كلهم:ههههههههههههه...
ابتسم عماد بعدين مشي وقلبه المجنون مابطل هبال بنبضاته💓
🍁🍁🍁🍁
مش ع اساس مانكش متصله بكل فأسبوع العرس!!
بلقيس:اني قلت هكي!؟امتى!؟
ابتسم بعدين قال:شن تبي!؟..
بلقيس:معقوله يعني معقوله..ماجاكش خاطر تشوفني بالبودري!؟
محمد؛لا..وبعدين من امتى عندنا فيه الجو هدى حني!؟
بلقيس:ماقلت تجي اقل شي تطلب صورة..
محمد:قطاف زايد..
بلقيس ضحكت وقالت:راهو خوك هانيبال دارها..
محمد:اني محمد مش هانيبال.
بلقيس بضحكه:نجيلي زول محمد ياربي اللي ماكيفه حد..
شد ضحكته بس ماقدرش يشد قلبه اللي ينبض بقوة💓
محمد:خلاص عدي عندي ماندير..
بلقيس:ع خاطري باهي ماتكسرش بخاطر عروستك..
سمعت صوت نغمة التليفون لما يتصكر الخط...
صكر فوجهها..
هي رفعت حاجبها وقالت:جاي جاي نعرفك اني..
ضحكت بعدين مشت طلعت من الدار..
🍁🍁🍁🍁
في الطريق..
كانت لمياء راكبه فسيارة عماد من الخلف وتسرقله فالنظر وهو يهدرز مع خاله ..
《 وكانكن انتن ريتن شي ع عماد فهدي مشكلته مش مشكلة رزان..عدي قولي لأختك تعرف كيف تكسب قلب خطيبها اللي وافقت تنخطبله وهي عارفه ان قلبه مش خالي》
شبحت للروشن بعدين خدت نفس وشبحتله وقالت:
لمياء:عمر قولي..
عمر:امممم..
لمياء:شن صار فموضوع ولد امينه مع بنت خوك..
شد عماد الدومان بقوة...
عمر شبحله وقال:مانعلم..
لمياء:امممم...لكن تعرف بنت خوك هادي غبيه لو رداته...
هي قالت كلمتها من هني السيارة انخضت بيهم من هني..
عمر وهو يفنص:خيرك ياراجل..
عماد وهو رافع حاجبه:انا لما نسوق مانبيش من يهدرز..سامحنا ياخال..شبح للمرايه وابتسم مجامله..معليشي مرت خالي..
هي هزت راسها بإيجاب وسكتت وهي مفنصه..
وعمر قال:مافيش مشكله..وقعد يشبح القدام وهو معصب..
اما لمياء ولت شبحت للروشن وهي تغلي غلي من الغضب..
عماد:نوقفوا هني..
عمر:شن لميا..
لمياء هزت راسها بإيجاب وقالت:باهي.
عمر:درس مال.
درس عماد سيارته قدام صفة محلات ملابس ومواد زينه..
نزلت لمياء ومعاها راجلها..
وعماد قعد فالسيارة وهو شاد ذقنه بيده وملامح الغضب باديه ع وجهه..
🍁🍁🍁🍁
الساعه 1:30ظهرا..
طلعت من الحوش وقعدت تمشي بخجل..
لين وصلت للمكان اللي هو فيه فالجنان..
كان لابس عربي وع كتافه كشابيه شتويه لونها ازرق كحلي..
لحيته كبيرة شوي ولابس نظارات سود..
وفيده تليفونه..
قعد يوزع فنظره ع الجنان..
لين جو عيونه عليها..
هي ابتسمت رفعت طرف حوليها البودري ع راسها وكملت طريقها متوجهه ليه..
هو حط ايديه ورا ظهره تحت الكشابيه وقعد يشوفلها يراجي امتى توصل فيه..
ومع كل خطوة منها تقرب فيها ليه..
كان قلبه يزيد فمعدل النبض وقوته💓
🍃مسكين قلبه مضطر يتحمل كمية هالمشاعر هادي كلها بروحه..🍃
وصلت فيه وقالت بإبتسامه اندهاش مصطنع:حييي جيييت..
محمد:بلا صماته زايده..هانا جينا وريناك شن زاد فيك ترا!؟..
بلقيس بضحكه:زاد فيا واااجد..
قعد يشبحلها بنظرات كلها حب من ورا النظارات..
وهي كانت تشوف فيهم بس مش بوضوح..
دارت حركة جريئة..مدت يدها للنظارة وحولتها..
وشافت نظرات عيونه اللي كانوا يبوا يريحوا قلبه شويه ويحكوا ع اللي فيه..
قعدوا واقفين يتأملوا فعيون بعض..
الزوز حدفوا بالعادات عرض الحائط..
لااهتموا بزمان ولا مكان..
بس تقعد لحظات..
لازم يفيقوا منها..
جبد النظارة من يدها وقال بإرتباك ووجهه مولي احمر:تماديتي راك..ولبس النظارة..
بلقيس:هههههه..راجلي ياهمي راك راجلي..
محمد بشي من العصبيه:اقعدي فأمها..
ولف ومشي بيطلع..مجرد وصل للباب التفت شبحلها لقاها تضحك قال بعصبيه:عدي خشي..تحركي..
ضحكت تاني..
بعدين شدت طرف رداها اللي علي راسها ولفت وقعدت تمشي..
هو ابتسم ابتسامه جانبيه وهو يتبع فيها بعيونه لين ادرقت..
بعدين التفت للباب فتحه وطلع لخوتها الموجودين في الخيمه..
🍁🍁🍁🍁
مع الساعه 3:00بعد الظهر..
الطقس خان التوقعات..
بدت تصب مطر قويه لخبطتهم وفشلت مخطاطاتهم لهالليله..
🍁واقفات في الصاله يتناقشوا
غاليه بتوتر :كيف نديروا ياربي!!؟..
نعيمه:لا ع بال ولاع خاطر..
زينب:باهي كلموا ميلاد.
غاليه:مايسد حوشه للناس اللي بيجوا اليوم يازينب واجد راهم..
العزايز مقعمزات ويسمعولهم..
وفاطمه بالذات وترها بزيادة اللي صار..
بس مبروكه كانت تسمع وتفكر لعند ماوصلت لحاجه بعد سمعت رد غاليه وقالت:مربوعة حوش عبدالله اللي برا واسعه ومش دايرين فيها شي وفيها زي المظله من برا..اديروا تحتها قنديلكم..
شبحوا البنات لبعض وهما يفكرا فكلام عمتهم..
رزان:نعدي نقول لماما؟
شبحولها ...
بعدين غاليه شبحت لأمها وقالت:شنو يمي..
فاطمه حركت سبحتها وقالت:ماهناك حل غيره..
غيرت غاليه عيونها لرزان وقالت:حطي برنوس الماليه ع راسك وعدي بسرعه..
رزان :باهي..
لبست برنوسها ع راسها..
ومشت بسرعه لبست شبشبها ومشت طلعت من فم البوابه..
ولأنها مستعجله..
وهي تجري..ضربت برجلها طوبو المية متاع الحديد..
رزان بألم :اااه..
"ياساتر..ياساتر"..
من كتر ماوجعها صبعها حست بدوخه وصوت الشخص اللي يكلم فيها تسمع فيه بصدى..
ماحستش الا ويدها حاضنتها يد تانيه ضخمة الحجم ودافيه هلبه وصوت حنون يقول:لابسه شبشب فجو زي هدا!!؟ربي يهديك..
شبحتله..
وعيونها تعبوا دموع ..
بالذات لما قعمز ع روس صوابعه وقعد يشد فصبع رجلها الكبير قام راسه وشبحلها لقي دموعها نازلات قال:يوجع فيك هلبه!؟..
قعدت تشوف لعيونه اللي كلهم خوف عليها وضايعه فيهم..
هو ارتسمت ع وجهه ابتسامه خفيفه وزاد حضن بيده يدها..
وياااه ع القلوب ياما صاير فيهم 💓..
هي شويه شويه تبدلت ملامح وجهها للغضب قالت بحده:شن دخلك..
وجبدت يدها بقوة..
هو وقف ع حيله وماباش يغير عيونه عن عيونها..
اما هي مشت من حداه بسرعه..
وهو مشي وراها خطوتين وقعد يشوفلها لين وصلت لحوشهم وخشت..
بعدين مشي وكمل طريقه لقدام تحت المطر..
وع قد ماكانت المطر قويه..
ماقدرتش تهدي ولو شويه من نار عشقه الوقاده💓
🍁🍁🍁🍁
فتحوا عبدالله وحدهم مربوعتهم لعيت رمضان..
مشوا بسرعه البنات مع غاليه ومعاهم سعيده.
بعدين لحقت حتى مريم اللي حصلت فشقة رباب بسبب المطر بعد ماكانت عندها تصبغلها فشعرها..
🍁كنسوا المربوعه بالمكنسة الكهربائيه..
وفرشوها كلها بمنادير تانيات..
وعطروها..
وبعد كملوا صكروا عليها
وبلغوا فضيله تبلغ الناس عن مكان السهريه جديد
🍁بالنسبه للرجاله فالليله هادي كانت ليلة النوبه..
ولحسن حظهم كان في قدام المربوعه مظلة كبيرة اقل شي تسد اعضاء الفرقه..
🍁🍁🍁🍁
وعدا النهار..
وبدي الليل يحل..
والكل يتجهزوا...
بعد وتوا كلهم بصغارهم..
برغم انهم فقطعه وحده الا انهم مشوا لمربوعه حوش عمهم بالسيارات..
وكذلك الناس اللي قبل يجوا ع رجليهم عادي جو فسيارات..
مع 9 بالزبط كانت المربوعه معبيه..
هههههههه عطيهالك يابارقه..
بارقه بتفنيصه:مال شنو ياماما بتمد يدها ننتشها..
حميده بضحكه:صحه لإيدك ماكنتيش خايبه زي حالاتي..
بارقه بضحكه:وراسك الا خايبه حتى اني..حتى الراجل جاته رصاصه رفعاته للبرزخ..
حميده:هههههههه ريتها رفعت حتى اللي فبالي..
بارقه:يالله تجي فروسهم رصاصه 14ونص ترفعهم وتمسح كبدك فيهم ..
حميده:ههههههههه..
🍁🍁🍁🍁
واقفات حدا الباب يهدرزوا..
غاليه:نسخنوه قبل عادي امال المولد يتحمل..
امال:مولد كبير يشغل عمارتين..
فضيله:خلاص مال..هي توا خلونا فالشطيح ع قولة التوانسه..
ضحكوا ومشوا قعمزوا...
فضيله:هيا يابنات ايديكن والدربوكه..
وبدوا البنات يدربكوا..
وصفقت فضيله وهي تغني..
بدينا وقلنا بسم الله..نقيموا العرس اللي جيناه..
💓💓💓💓💓
اللي محرمته خط بخط...شبوبه ع الولاف سقط..
البيت هدا غناته اريج وهي ادربك
وبنت خالتها اللي كانت مقعمزة تتفرج عليها وتضحك بفرح..شادة روحها بالسيف ع الرقيص والدنيا حداها شايشه..
اريج..
اللي محرمته كيف رداه...نعاهد نفسي ماننساه
💓💓💓💓
نعيمه..
ياربي ماتوطيله شان..اللي اسمه فكل آذان
ردوها وراها...
بعدين كفايه غنت..
إن شاء الله بنت اجواد تجينا...من فم الحوش تلاقينا..
وغنوها معاها..
فهالوقت..
كانت لمياء تشبح لرزان كيف طالعه بقفطانها الزمردي اللي عاكس ع لون عيونها وزايدها حلاوة ع حلاوتها وتقول فنفسها"عطيك فقصه فهالعيون"..
شوي التفتت لسميه اللي كانت مقعمزة جنبها لما سألتها؛وين خالتي نادرة وسناء..
لمياء:عزموهم اقارب لينا في القبيله ع العشي واصروا عليهم وهما ماقدروش يردوهم..غدوة ان شاء الله يجوا..
سميه:حتى اني امي واختي غدوة بيجن..
لمياء:ايه حقه شن صار فبوك؟..
سميه بإبتسامه:اسبوع الجاي يطلع..
لمياء بصدمه:وخيرك هدا وين قلتيها!!
سميه:الحق وجعتني سعيده مابيتش نحكي فحاجه زي هدي قدامها..لكن خبرت عمتي وغاليه .
لمياء برفعة حواجب:اها...
وقالت فنفسها"ادني فالنار لخبزتك يامنافقه"
بارقه..
احني وادينا وادي غزله..عبي بارودك وانزله..
كلهم عيطوا..وفي اللي زغرطوا..
اما برقه لما غنت بنتها تحمست وناضت ترقص وتزاحم فالسنفورات الصغيرونات..
هما ياناري خافوا لما شافوها جايه..
تقول بطاح جاي هاد ع سيارات صغيره..
بعدوا وقعدوا واقفين يشوفولها وهي ترقص وتحرك فطرف رداها هني وهني وتغني..
عيت اجواد وعيت عصارة..هلنا فالتاريخ منارة..
وكلهم يغنوا معاها ويصفقوا..
ماعدا حدهم ام سعيده..
حدهم:ناس تكبر تعقل وناس تكبر تهبل.
مبروكه وفاطمه اللي كانوا مقعمزات حداها ضحكوا..
💓💓💓💓
الليله ليلة حنايات...وغدوة عند حميدا تبات..
بلقيس "ياربي مش مصدقه مش مصدقه" وضحكت بفرح..
شوي ناضوا امها وخالاتها وعماتها وقعدوا يرقصوا..
اريج..
قولوا ياالله عليهم...ياماشاء الله عليهم..
بلقيس"تس افف..ليش العروس ماترقصش بس ليش"..
💓💓💓💓
غفيتي هف عليك مناك...قفزتي تحسابيه حداك..
كلهم صيحوا..
وزادوا فحرارة التصفيقه..
فضيله..
نار غلاك الله لاتبلي..تصهد كيف صهيد القبلي..
والمربوعه انقلبت بالصياحات..
والعزايز يشبحولهم ومش عاجبهم..
بارقه..
هدب عيونه وين رمشن..رشاشات اغراض يرشن..
والمربوعه زادت انقلبت..
"حيحيي حيحي حييحيييه.."..
💕💕💕💕💕💕
بعد هالشوط الناري..
جي وقت الضيافه..
وبدوا يطلعوا من الكوجينه فصفر الشاهي وباكوات الحلوات..
وسابات كبير كيلينكس..
وكل وحده من البنات طلعت حاجه...
شربوا الناس شاهيهم وكلوا حلوياتهم وقرموا لين شبعوا..
بعدين طلعواالبنات بالصفر وبدو يرفعوا..
وشويه تانيه..
بدي شوط جديد...
وكان اقوى من اللي قلبه اصواتهم انسمعت برا من القطعه..
غناهم..وصفيقهم..وصياحاتهم وزغاريطهم..
تزاحم فيهم الأصوات اللي جايه من حوش عبدالمقصود..
اللي ماكانتش قوة الأجواء عندهم تقل فقوتها عن اجواء قطعة عيت امحمد...بو عبدالله والمرحوم رمضان🍃
🍁🍁🍁🍁
فعز الشوط..
طلعوا غاليه وفضيله وحميده وامال ومعاهم البارقه بش يوتوا العشي..
بارقه :قديش ليا ع العراس من لما خديت هالوخده السودة وعشت ف*****الهمج هادوم..
حميده؛حاشا الناس الباهيه منهم لكن الحق همج ومتخلفين..
وصلوا في الحوش..
خشوا امال وغاليه بيجيبوا باكوات الماكله من حدا المكيف..
وقعدوا برا فضيله والبارقه وحميده..
فجأة سمعوا صوت كلب..
وفضيله عندها اتجاه الكلاب فوبيا..
قعدت ترجف مع بعضها لما سمعت الصوت..
التفتوا حميده والبارقه..
لقوا كلب حسن اسود لونه وكبير ومنظره يخوف خاش من فم الحوش البراني..
كان مخيف بكل معنى الكلمه..
حميده:حي غبارة..
فضيله وهي ترعش: ما تزيدي تخوفيني ياحميده..
دار الكلب صوت مرة تانيه كان اعلى..
وقرب منهم..
حميده؛جاينا..
التفتت فضيله وشافاته..
عيطت ولفت جري بتخش داخل..
تنخبط في غاليه وستر ربي ماطاحش اللي فيدها..
لكن الكلب فيسع جي جيهتهم..
خشت غاليه تجري..
وانخطبت في امال اللي كانت جايبه بباكو بيتزا يجي طايح منها..
امال:كلب حسن!!؟..
وكلب حسن..
يحصل ع فضيله والبارقه وحميده اللي يموتوا من الخوف..
هما يوخروا وهو يقدم..
وفضيله متقيه ببنت خالتها وهي ترعش مع بعضها..
بارقه:كان نحصل بيش نخطبه..
حميده قعدت ادور حواليها وهي فقمة الخوف..
نبح الكلب..
فضيله عيطت وشدت فبنت خالتها بقوة..
بارقه؛اااي..مرستيني ياجيفه..
داخل..
غاليه:ماتعرفي اديريله شي!!
امال:مايتعامل معاه حد كان حسن..قليل نادر مايجيبه للحوش ديما مع السعي..وين مافي زريبتنا..
غاليه:حي حي!!..
شافوا البنات كيف يتحركوا مع بعض من جهة لجهه والكلب ماباش يخليهم..
لعند ماحاصرهم فزاويه..
وفضيله قريب يغمى عليها..
غاليه بخوف:كلمي حسن...
امال:ايه صح!..
ومشت تجري خشت لوحده من الديار وين مافي تليفونها..
فضيله بتعب:بنموت خلاص..
حميده:نهارنا الاحرش ...
بارقه بصوت عالي:اسسكتتن!!..
الكلب خوفه الصوت نبح وجاهم..
فضيله شبه داخت..
وحميده عيطت
فهاللحظه عين البارقه جت ع باله مسنده حداهم ع الحيط..
جبدتها بقوة..وشدتها بإيديها الزوز ورفعتها فوق...
ونزلت بيها ع راسه بكل قوتها..
والكلب راح فخبر كان..
ع خشة صاحبه اللي جاي يجري...
عيونه جو ع كلبه وهو طايح ودمه يبخ...
قريب مات من الصدمه..
شويه رفع عيونه ببطء ..
ويجو
ع البارقه..والباله فيدها وهي تشوفله بشي من الخوف..
فلحظه..
تبدلت ملامح وجهه للإنبهار ..
وحميده ركزت عليه..
امال:غبارة سودا..
غاليه تشوفلهم بخوف..
فضيله مازال ترعش وتبكي..
البارقه بتوتر:صكري فمك عاد..شبحت لحسن وقالت بربكه ممزوجه بالعصبيه..انت اللي طالقه ايوه.. يستاهل مايجيه..
__________
قطاطيها ريم الجفال..اغربه حامن فوق رمال..
حميده بضحكه وهي تتفرج ع فضيله كيف تغني ع رانيا اللي ترقص:ماتقولش هي نفسها اللي بكري قريب دارتها ع روحها من الخوف..
غاليه بضحكه:بنشهدر في المستشفى..
البارقه..
يالعين يالعين انتي هنا والغالي وين..
حميده بضحكه:برا يدفن فكلبه اللي رزتيه فعمره..
شبحتلها بتفنيصه وهي تصفق..
وغاليه ميته بالضحك..
شقلبت البارقه عيونها وشبحت القدام وكملت غني..
وحميده وغاليه يضحكوا عليها..
💕💕💕💕💕
برا...
طلعوا جماعه النوبه ووقفوا تحت مضلة المربوعه..
وبدوا تسخين..
والولاد كلهم حماس..
🍁خليفه؛من قتله الكلب!!
حسن ابتسم بعدين قال:اللي قتله قتله..خلاص هدى حد عمره نجيبوا غيره..
انصدموا خوته وهما يشوفوله عارفين الكلب غالي عليه هلبه كيف موقفه بارد هكي من موته!!؟..
شكوا فيه خش فحالة صدمه...
💓💓💓💓💓
شويه وبدت النوبه..
النساوين وقفوا دربوكه وقعدوا يسمعولهم...
شويه..
والجو نشط ع الآخر...
محمد كانت فرحته ناقصه..
تمنى من قلبه الأصفر يكون معاهم..ماتوقعش يجي يوم زي هدا ورمزي ولد خوه وصاحبه مش حاضره..
محمد الشديد الجدي..دمعته غلباته..
طول مسحها..
عمر حط يده ع كتفه وقال:سيوره يطلع ونديروله فرح كلنا نغنوا ونرقصوا فيه..
ابتسم محمد وهي يمسح فعيونه..
ضحك عمر وبعد عنه وعلا صوته وهو يغني..
رمزي يارمزي..طولت الغيبه.
سيوره الحبيب ياعيني يرجع لحبيبه..
الولاد كلهم غنوها معاه بأعلى صوتهم..
عند النساوين..
رانيا كانت تسمع ضيقت عيونها وقالت:يقولوا رمزي ولا!؟..
غاليه مسحت دموعها وهي مبتسمه وقالت:ايه..
ابتسمت رانيا وعيونها معبيات بالدموع..
مش بس هي وغاليه اللي ذرفوا الدموع لما سمعوا الغني ع رمزي..
امه..واخته..وحناته..عماته وخالاته..
هو الحفيد البكر لعيت رمضان..
والحفيد الأول لعيت عبدالله..
رمزي يقعد ديما صاحب مكانه خاصه عند الكل..
رمزي💖
اللي كان عارف ان فهالأسبوع عرس عمه الصغير..
غصب عنه بكي..
زي ما محمد ماتوقعش يجي هالنهار ورمزي مايحضراش..
رمزي نفسه ماتوقعش يجي عرس عمه وصاحبه ومايكونش حاضر..يناشبه..يفرحله..يغنيله..يكون معاه فالصف لما يزفوه..
قدر الله وماشاء فعل..
هادي الكلمه اللي قالها العم فرج لرمزي وهو شاد ذراعه:افرح انك قريب تطلع..وادير فرحك وان شاء الله كلهم يكونوا حاضرين مايغيب منهم حد..راهو بيديرولك عرسين انت عرس طلعتك..وعرسك لما تتزوج..من زيك..
ضحك رمزي من بين دموعه وهو يمسح فيهم..
الصيد بو سميه:خلاص هانت ياولدي..بعد شهرين تلحقني ونحضر عرسك حتى اني..
ضحكوا..هما واللي معاهم فمكان المعتقل..🍃
🍁🍁🍁🍁
مروان..
جيبها ياسيد الجياب جيبها..
تعالت الاصوات...
"اوووووووووه"..
وبدت تطق النوبه من جديد بلحن الأغنيه والشباب يغنوا ..
جيبها ياسيد الجياب جيبها..
ياالله..
جيبها حتى من الأبعاد..
يالله..
ويالله جيبها ياريت يقسم نصيبها..
هما يغنوا..
وعماد عيونه ع اصيل اللي يغني معاهم هو وولاد خاله مختار وعبدالرزاق بأعلى صوتهم..
يبي يشده يشنقه من رقبته..يبي يفتك منه...وحتى من سناء معاه..
عماد غمض عيونه وتنهد بعدين فتح عيونه وقال فنفسه"ديرلي حل ياربي "...
جيبها ياسيد الجياب جيبها..
جيبها حتى من الأبعاد ياالله..
يشبحوا لخوهم كيف سرحان ومبتسم زي العبيط وهما خايفين عليه..
سليمان:الكلب هدى عنده اغلى من حدهم وعبد الله ورمضان عويلته..
خليفه:خايف نخشوا فقصه جديده مع عيت برقه..
حميدا:يستر الله..هي الأولى ماحزت لين خليني ونخليك..
سكتوا عن الكلام..ومازالت عيونهم تراقب فخوهم بريبه...
....يتبع...
