#العشق_المتمرد "اختبار"
الجزء110 القسم الثاني...
#جمان_فريد
🌟..
وقتها الدراه هادي هدا وين تفكرت امها..
نعيمه:اخدمي واسكتي..
مطت دلال شواربها بملل وكملت تجهيز الصفر مع امها..
الاسبوع هدا عندهم حناهم الدور ع عيت عبدالسلام هالمرة..
وخوله طاح غلاها فأمها وتبي تشوفها وماخطر عليها كان اليوم..وخبرت خوها من ساعه انها بتجي..
وجت..
خوله شارط عليها راجلها تلبس ملايه وخمار..
مش هني المشكله..
المشكله لما تحولهم شن تكون لابسه تحتهم...
خشت نور للكوجينه وهي تقول:نهارها اسود هادي شن لابسه!؟
دلال:شن لابسه اللي ماتستحي..
نور:بلوزة رقبتها واسعه صدرها يبان العار..وسروال ضيق قريب ينشرك عليها من لون الجلد..
نعيمه:خيرها هادي بعد تزوجت هبلت مرة وحده..لاعاد تحشمت من خوتها ولا من أمها!!.
دلال:لبسها مايلتبسش الا قدام راجلها..
نور:بابا يدوب سلم وطلع..
نعيمه وهي وتحط في القعد فوسط الصفره:عمك ناجي اخر مرة جاته فصل عليها..
نور ودلال:حقققه!؟
نعيمه:حكتلي فوزية مرته قتلي ماخلا ماحطلها..
دلال:خلها تستاهل..
نعيمه تنهدت بعدين قالت:باهي..هيا سقدوني..ارفعي دلال..
وانتي نور رن جرس المربوعه..
🌴🌴🌴🌴
واقفه وبنتها فحضنها وفجنبها صاكوها..
تبكي بعبرتها وبنتها تبكي معاها..ويراجو..
لحظات وبانت عليها السياره..
من بين دموعها ابتسمت بفرح..
ابتسامه ناجي من الغرق..
ناجي من الموت بأعجوبه..
وقفت حداها السياره..
انفتح الباب ..
ونزل مولاها جاها طول وهو يقول بصدمه:شن دارلكم هالكلب!!
حميده ببكي:مش وقته وراس وخيي..ارفعني من هنى ارفعني تربح..
هو هز راسه بإيجاب وقلبه متقطع عليها..
فتحلها الباب وقال:اركبي...
ركبت..
صكر الباب..
خدي بعدها الساكو وحطه في الكرسي الخلفي..
بعدين توجه لبابه هو...
ركب طول..
هي سألاته:في حد غيرك يعلم..
هو رد وقال:غاليه ..
هزت راسها بإيجاب ومازال دموعها ينزلوا..
هو بعد شبحلها شويه وشبح للبنيه بألم..
تحرك...
🍁🍁🍁🍁
ع الغدي يسمعوا فحديثها المقرف اللي شبه سد نفسهم ع الماكله..
خوله بضحكه:بكل ياكبدي مايصبرش عليا ..
نعيمه تبتسم مجامله وخلاص..
ودلال توكل فبنتها وهي قريب تنفجر..
ونور توكل فحناها وهي متخزرطه..
خوله : تاريته عندك حق دلو تقعدي رابط ع راجلك لتوا..
شبحوا نعيمه ونور لدلال..
اللي شبحت للصونيه بحده..
بعدين حدفت الكاشيك وناضت ببنتها وطلعت من حداهم..
خوله :خيرها هادي!؟..
نعيمه:تعرفيها انتي ياخوله حساسه فأي شي يخص راجلها الله يرحمه علاش تجيبلها فسيرته؟!
خوله:ولعند امتى بتقعد حازنه عليه يعني ليه قريب 5سنين ميت.. قاعده صغيره راهو..بتترهبن ع خاطره!؟
نعيمه:عندها تلاته صغار..
خوله:تقول لماليهم يجوا يرفعوهم..
نعيمه فنصت بصدمه..
نور وصلت عندها حدها قالت بعصبيه:والنبي كان تسكتي خير من لما جيتي وانتي تفترشي.
وناضت ولحقت اختها حتى هي..
خوله بتفنيصه:موليات قليلات ادب بزايد..
نعيمه:بالله ياخوله تغدي واكسري شر..
خوله :بنتغدا مال شنو ناكل من رزق وخيي طز فغيره..
وكملت ماكله..
ونعيمه تمالكت اعصابها بقوة وقعدت تاكل بالسيف..وتوكل فعزوزتها..
🌴🌴🌴🌴
سمعت صوت سيارة خوها..
طلعت من الكوجينه تجري..
وصلت فنص ممر فم البوابه وفقت وهي تتنفس بسرعه وعيونها متوسعات من الخوف والترقب..
سمعت بيبان السيارة يتسكروا..
لحظات..
وبانت عليها اختها جايه وفحضنها بنتها..
حميده ببكي:غاليه...
غاليه مشتلهم تجري...
حضنتهم الزوز بقوة وهي تبكي..
وحميده تبكي..
ولمياء وسميه من ورا روشن الكوجينه يشوفولهم..
سميه متأثرة..
لكن لمياء طايرتلها..
🍁بعدت غاليه عنهم..
عيونها جو ع يد حنين انصدمت وقالت:خيرها يدها؟!!
حميده تبكي وخلاص..
خدت غاليه حنين اللي لفت ايديها ع رقبة خالتها بقوة ..
غاليه وهي ترشف:خشي حميده..
حميده قعدت تشوفلها بألم وخوف..
غاليه:خشي..
حميده ببكي:تقولي امي خشي نخش..
ع طلعة الحاجه فاطمه..
شبحت لبنتها بحده وقالت :خشي..
حميده ابتسمت بلهفه ومشت لأمها بتحضنها..
فاطمه:بري عليا غادي..
حميده تلاشت ابتسامتها..
وخرت..
حطت غاليه يدها ع كتفها وقالت:خشي ياحميده..
حميده غيرت عيونها عن امها ...
رشفت بعدين خشت..ووراها اختها..
ع جية عمر اللي جابها وفيده الساكو..
فاطمه:كيف لقيتها منين جيتها..
عمر بألم؛مصبيه قدام الباب ببنتها وساكو دبشها..
غمضت الحاجه فاطمه عيونها بأسف..
بعدين فتحتهم ومشت خشت داخل..
عمر حط الساكو داخل..
بعدين مشي حتى هو...
في الكوجينه..
سميه:حي بعد يروحوا التريس من الزيارة شن يديروا..
لمياء:بالذات الهادي قلبه دم عليها..
تنهدت سميه وقالت:هي نطلعولها..
لمياء:هيا..
ومشوا طلعوا الزوز من الكوجينه..
🍁🍁🍁🍁
مصراته...
وقت الزيارة...
اللي كانوا ماشيين الهادي وميلاد ومحمد وتوفيق..
رمزي بضحكه:باهي الحمد لله..
الهادي بإبتسامة اندهش:زدت سماحه يادعوه..
كلهم:هههههههه..
محمد بضحكه:اللحيه رد بالك تحلقها بعد تطلع..
رمزي برفعة حاجب:اول حاجه بنديرها الحلاقه لما نطلع.
ميلاد بإبتسامه:وتعدي للجامع وتقرا الفاتحه..
ضحكوا..
ورمزي ابتسم بإحراج..
اما توفيق قعد يشوفله بضيق..
محمد:ايه..شوف عمتك غاليه شن بعتتلك..
خدي الكيسه وقال بتخمين:سفنز بالدحي..
محمد بضحكه:صح..
رمزي:ياسلاااام..
ضحكوا...
رمزي بضحكه:شنو حالها شن دايره..
الهادي:حالها باهي بدت ادير فطلبيات حلويات تبيع فيهن فمحل مرت عمك..
رمزي ضيق عيونه وقال:اين منهن..
شبحوا لبعض..
بعدين شبحله الهادي وقال بضحكه:مرت عمك حميد التانيه..
فنص رمزي :شنوووو!!؟
هما:ههههههههههههههه..
رمزي وهو رافع حواجبه ويضحك:تبصر ولامنك جد..
محمد بضحكه؛جد جد وليه 12عام..
رمزي بصدمه:لااااالااااا..
اللي حواليهم شبحوله..
هو انحرج..
وبوه وعمامه وخوه شدوا ضحكتهم...
رمزي ضحك بإحراج وقال:مايطلع منه..
ميلاد:ريت بالله..
رمزي:تي غير راك تتحمس يازعيم..سعيده تتحول للأرمله السوداء بعدين..
ميلاد:ترا تحشم وجهك وادوي زين..
هما ضحكوا ورمزي معاهم..
وبعد هدرزة لطيفه غيرت جو رمزي وادخلت ع قلبه السعاده..
جي وقت مرواح..
سلموا عليه بالواحد لين وصل الدور فتوفيق..
توفيق:عدوا لاحقكم..
هما هزوا روسهم بإيجاب..
ميلاد :سقد روحك..
توفيق:حاضر..
مشوا طلعوا...
والتفت توفيق لخوه وقال:انت راك خوي وماتهون عليا ومانرضى فيك شي كيفك كيف رزان اللي ولد عمتك قطعنا بعد فسخوا..
رمزي بصدمه:قطعكم؟!!معناها حتى اني قطعني معاكم؟
توفيق:عماد هدى طلع عيل يارمزي صدمني فيه واجد..ومش غير هو بس..حتى بنت عمتك..
قلب رمزي انقبض..ووجهه شحب لونه..
توفيق:طلع رانيا من راسك حكايه تراجي فيك ماتراجي فيك كذب فكذب واني ريت بعيوني ماسمعت من حد..
رمزي من داخل انهد هد من اللي يسمع فيه..
شد خوه ع يده بقوة وقال:تستاهل خير منها بألف مرة وهي والله ماتستاهل ظفرك..
بعدين حضن خوه..
ورمزي اللي عيونه كانوا معبيات دموع حضن خوه بقوة..
بعدين بعده وقال:خلاص..عدي عدي..احمم عدي..
توفيق وهو يشوف لخوه بحزن هز راسه بأيجاب ولف ومشي طلع..
اما رمزي..
اللي كان فحالة صدمه..
مسح بيده ع وجهه وهو يحاول يستوعب اللي سمعه...
جاه واحد من الحرس وطلعه ورمزي يحاول يمسك دمعته بالزور..
🍁🍁🍁🍁
من بكري نتصل يارباب ماتردش..
رباب:اني شويه تانيه ماشيتلهم تو نكلمك بعدين..
رانيا :بالله عليك ماتنسيش رباب راني ع نار من امس..من امس واني نراجي امتى يجي وقت الزياره وامتى يروحوا منها..والله مارقدت غمضه..
رباب بضحكه:ياودي باهي باهي..
ضحكت رانيا بعدين تنهدت وقلبها يدق بقوة💓
🌴🌴🌴🌴
بس قوة دقات قلبها هي تختلف عن قوة دقات قلب حميده وهي تحكي لأمها واختها ونساوين خوتها ع اللي عاشاته طول هالأربعه شهور..
تحكي وتحكي وهي تبكي..
وهما مصدومين بقوة..
وفي كلام مش قادرين يصدقوه من هوله..
لمياء:حبيبتي هدا مسحور راهو..
سميه؛صح كل اللي قلتيه توا يبين انه مسحور..
حميده مسحت دموعها وقالت:لامسحور لاعينه..كل اللي يدير فيه من عقله..طلع ع حقيقته...بس..
غاليه وهي حاضنه حنين وتشوف ليدها:عطها مايحرقها المجرمه هدي..مش بنادمه هدي..شيطانه عطها ماياخدها..
حميده حطت يدها ع رجل بنتها وقعدت تمسح عليها وهي تذرف فالدموع..
بعدين رفعت عيونها فأمها..
لقتها تسبح وهي تشوف لحنين بنظرات كلها حزن..
ع خشة رزان..
رزان:السلام عليكم..عمتي حميده !!؟
حميده شبحتلها بنظرات كلها الم وحزن..
رزان قدمت وقعمزت حداها وهي تقول:خيره وجهك هكي!!..
حطت حميده يدها ع اثار ضرب حليمه اللي ليها وقت ولتوا ماختفت..
غيرت رزان عيونها لعمتها غاليه وبعدين حناها لقتهم يذرفوا فالدموع..
بعدين جت عينها ع حنين انصدمت اكثر لما شافت اثر الحرق ع يدها والبنت تشوفله وتبكي..
نزلوا دموع رزان تلقائيا...
"جيتكم ياعيله"..
كان صوت رباب..
كلمتها اللي تقول فيها اول ماتخش حوش جدها..
مجرد وصلت للدار..
وقفت فمكانها وهي مصدومه قالت:خالتي حميده؟!
🍁🍁🍁🍁
الوقحه هادي معاش نبي نعرفها..
نعيمه:بكل المرة هادي زودتها هلبه..
نور:حناي رقدت..
نعيمه:ايه..
نور :خل نمشي نقعمز حداها..
وناضت ومشت طلعت من حداهم..
نعيمه شبحت لدلال وهي تقول:شن صار فولدك لقيتله مدرسه!؟
دلال:وحده معاي فالكليه قالتلي تعرف مدرسه كويسه هلبه مش بعيده علينا الاحد إن شاء الله نسجله فيها..
نعيمه:نقول لبوك يحول خوك فيها..
دلال:ليش تبهدلي فيه ياماما..
نعيمه:خوك يبي ولدك معاه امس في الليل يبكي ويقولي جواد بيقعد بروحه من يدافع عنه كان حد ضربه؟
ضحكت دلال وقالت:نجيلي وخيي السمح...شبحت للباب وبدت تنادي..ماااجججد مجووووده
شويه وخش عليهم قال:نعم دلوله..
دلال فتحت حضنها وقالت:تعال حبيبي تعالى..
مجد قدملها ..
حضناته وقعدت تبوس فيه وهو يقول:حولي خلاص..حولي.
ودلال تقول:انلااااا...وتعاود تبوسه من جديد..
وامها تضحك عليهم..
🌴🌴🌴🌴🌴
رباب:الله لايربحه ولايربحها..
غاليه:بجاه النبي..
وحميده تبكي وتمسح فدموعها..
ورزان تشوفلهم وهي تفرك فإيديها من القهرة عليهم..
بعدين غيرت عيونها جو فعيون لمياء..
لمياء طول غيرت عيونها عنها وقعدت تشبح لحميده..
شبحتلها رزان شويه بعدين غيرت عيونها.
فجأة
كلهم قلوبهم دقت بقوة من الخوف لماسمعوا صوت سيارة توفيق.
مافي حد خاف اكثر من حميده غير الحاجه فاطمه..
برا..
ناض عمر اللي كان مقعمز ع بلوكه قدام المربوعه الخارجيه..
قعد يشوفلهم بضيق وهما نازلين من السيارة..
مش عارف شن ممكن يصير لما يعرفوا ان حميده روحت وان هو اللي روح بيها..
عيونه عليهم..
كانوا يهدرزوا ويضحكوا..
شويه..
ومشي ميلاد لحوشه..
ومحمد والهادي وتوفيق مشوله..
وصلوا فيه ووقفوا..
الهادي:يسلم عليك رمزي واجد..
عمر:سلمه..
محمد ركز ع ملامح وجه خوه ملامح توتر..
توفيق:عمر خيره وجهك أصفر!!؟
شبحله الهادي ومحمد زاد ركز..
عمر خدي نفس وقال:اسمعوا..
التلاته شبحوله بخوف..
عمر:راهو...حميده روحت..
انصدموا التلاته..
بس كانت صدمة الهادي ممزوجه بالغضب قال:كيف روحت!؟
عمر بشي من الربكه:روحت روحت..يعني خلاص..
الهادي معاش بي يسمع توضيح تاني..
طول مشي بسرعه للحوش..
ومحمد لحقه..
توفيق:جابها هداك النذل!؟
عمر :لا..اني جبتها..
.....
حميده بخوف:حيي عليا كيف ندير..كيف بيصير تو..كيف..
"ليش روووحتي ياكلبه ليش...ليش روحتي يامسخه"..
كلهم خايفين هلبه..
شويه وبان عليهم الهادي وهو يقول بصوت عالي:اطلعي يامسخه..صبي انتلفي لوين ماجيتي ياحيوانه..
غاليه جت قدامه:بالله عليك ياهادي صل ع النبي.واهدا..
الهادي:حولي من قدامي حولي..
دف غاليه..
وقدم لحميده..
جبدها من ذراعها وهو يقول:عدي للكلب اللي بعتينا ع خاطره وفضلتيه علينا عدييي..
حميده كانت تبكي بعبرتها لاحول لها لاقوة ماعندها عين تشبح بيها فيهم ولاتقدر ادافع عن نفسها....
والبنيه تشوف لخالها وبس...
سميه شدت يد راجلها:تربح ياهادي خليها بالله عليك..
نفض يد سميه بقوة وهو يقول:تطلع يعني تطلع..
وجبدها بقوة وهو يكر فيها..
حاولت غاليه توقفه دفها بقوة جت ع الدولاب.
وطلع من الدار وهو يكر فأخته ..
وهي تبكي بعجز وألم..
وبنتها وراها وهي تبكي وتقول:ماما..
محمد كان يشوف لحميده مايبيش يحرك ساكن غضبه مش اقل من الهادي..
اما سميه فكانت تجري ورا راجلها وهي تقوله:تعوذ من الشيطان ياهادي تعوذ من الشيطان..
ولمياء تتفرج وبس..
ورباب ورزان يبكوا..
الهادي:ياحقيره يامسخه..توا عرفتيهم هلك توا ياواطيه..
وصل بيها للمستراح دفها بقوة لين طاحت..
من بعيد عمر وتوفيق شافوا اللي صار..
عمر مشي يجري..
كيف جاي الهادي بيقدم لحميده ويضربها..
جي قدامه عمر ودفه وهو يقول:اختك هدي اختك تقعد اختك..
الهادي :لامش اختي..
قدملها من جديد دفه عمر وهو يقول:اختك غصب عنك...
وقف الهادي وهو يشوفله بتضييقة عيون:انت روحت بيها!؟
عمر:ايه..
لمياء:بيجو لبعضهم..
سميه:حي عليا..
وغاليه تشوف بخوف..
وامهم حولت ايديها من ورا ظهرها وهي تشوفلهم بريبه..
الهادي بغضب شديد:ليش ياكلب ليش..
وقدمله ضربه بوني..
وعمر رده...
وبدوا يضاربوا هما الزوز ونساوينهم يعيطوا..
جوهم محمد وتوفيق بعدوهم عن بعض..
الهادي وهو داهش:والله ماتجي راجل..
عمر:ع اساس فعايلك انت فعايل راجل..
الهادي دف توفيق..ومشاله مندفع مرة تانيه..
محمد جي قدامه وقال:صل ع النبي ياهادي..
بكل قوته الهادي دف محمد..
ووصل فعمر وطاح فيه ضرب..
وعمر يضرب..
كلهم يعيطوا ويبكوا..
وفاطمه تقول ببكي وهي ترجف:بتقتلوني انتم بتقتلوني..
غاليه بصوت عالي:ياسركم انت وياه رعشتوا امكم..
ولا يسمعوا فيهم..
يحاولوا يحزوهم الولاد وحصلوا نصيبهم من الضرب..
فهاللحظات جت رزان تجري وبوها وامها معاها..
ميلاد:يافرخ انت وياه...
قدملهم..
جبد عمر من فانيلته..
وجي قدامه..
الهادي وقف..
ميلاد:درتولنا العار ضحكتوا الناس علينا..
الهادي بتهكم:قديش ليهم ضاحكين علينا..والبركه فاختك المحترمه
ميلاد:عدي لحوشك..
الهادي شبح لعمر وحميده بحقد بعدين توجه لحوشه..
ومرته لحقاته بولادها..
ميلاد:حتى انت..
عمر مسح فمه..ومشي طول للدروج ركب ولمياء وراه..
التفت ميلاد ع حميده وقال:كله من جرايرك يازفته..خززيي واطيه..
ومشي طول ...
وسعيده قعدت تشوف لحميده كيف طايحه ع الأرض وتبكي وبنتها حداها..
جتها رزان وهي تقول:صبي معاي عمتي..
شدت حميده فرزان وناضت..
بعدين مشت خشت ورزان قامت البنيه فغمرها وخشت هي وياها..
ماقعد حد برا اخطا غاليه ورباب والحاجه فاطمه اللي كانت مقعمزة ع الركابه وشاده راسها وهي مغمضه عيونها..
سعيده:ضغط ديدادي ياغاليه..
غاليه استاقضت من الصدمه ومشت خشت داخل تجري..
رباب وهي ترشف:يمي..تسمعي فيا..
فاطمه بألم:اممم..
شويه وجت غاليه بالكصبر وعطاته لامها:هاك يمي هاك..
خداته منها امها وكلاته بعدين قالت:عارفه روحي بنموت ناقصة عمر..
غاليه ورباب وسعيده:بعيد السو..
فاطمه:السو مني ماهو بعيد..ماهو بعيد السو..من يوم يومي واني فالسو..
التلاته قعدوا يشوفولها بآسى ومش عارفين شن يقولوا🍃
🍁انتشر الخبر في العيله..
وزينب ونعيمه وكفايه صدمهم اللي سمعوه هلبه..
ومافيش وحده منهم مابكتش وهي تسمع في اللي صار..
....
لاحول ولاقوة الا بالله..
محمد:وتوا مانيش عارف هي شن تبي..
حميد:بديهيا واضحه يامحمد حتطلب الطلاق هالمرة وتتمسك بيه اكتر من قبل..
محمد:اني برا موضوعها...
حميد:اني هالمرة حندخل..
محمد:مافي غيرك اصلا..
حميد:لعند الآن هانيبال ماعنداش علم؟..
محمد:لا..امي محلفتنا مانقولوله شي لين يروح ويعلم بروحه..
حميد:تعرفوا لو خليتوا هانيبال اخر من يعلم تحملوا مايجيكم منه..
محمد تنهد وقال:عارف..لكن امي هكي تبي ماعندنا مانديروا كان حلفتنا..
🍁🍁🍁🍁
طلعت من الحمام لاقاها..
هانيبال؛حاسك تتوحمي عليا..
مرام ضحكت بتعب:والله العظيم لا..بس شميت ريحة الحوت..
هانيبال حضنه وقال؛باهي ترا تعالي..
ضحكت مرام وخشت حضنه..
هو لف ايديه عليها وقال:كان حسيتي روحك بترجعي قولي..مش اديريها عليا..
ضرباته ضربه خفيفه ع ظهره..
هو ضحك بعدين قال:هي تعالي ارقدي..
قعد يديدش فيها..
لين دخلها السرير..
ساعدها ترقد..بعدين غطاها..
باسها من خدها وقال:انتي مفروض تصلي كل يوم ركعتين شكر لربي اللي عطاك هانيبال..
مرام بضحكه:عدي بنرقد..
ضحك بعدين باس راسها..
وخر عنها ومشي جهة بريزة الضي طفاه..
بعدين طلع..
مرام:مافي نعمه نحمد فربي عليها كيفك انت💓
ابتسمت بحب..بعدين غمضت عيونها وبدت ترقد..
اما هو..
مشي قعمز ع الصالون اللي برا
ورجع يكمل فحساباته ويشوف كان فلوسه يسدوه يأثث الحوش بالكامل ولا لا..
كل خوفه ينقصوا عليه الفلوس ويولي مجبر ع انه يخلي مرام تساعده..
🍁🍁🍁🍁
الساعه 8:00مساءا..
وهدوما الفلوس..
عمر شبحلهم وقال؛قداش ليك ادسي فيهم..
لمياء بضحكه:ليا 7سنين مرتبي اللي ناخده ندسه مانصرف منه فقرش بوي يصرف عليا..
ضحك عمر وقال:كويس..
لمياء:نبدوا نطلعوا من غدوة؟.
عمر هز راسه بإيجاب وقال:باهي عدي اقليلي دحيه..
لمياء:حاضر..
ناضت ومشت طلعت من حداه وخلاته يعد في الفلوس.
🍁🍁🍁
تو والنبي وقته موضوعك الزفت هدا..
عماد:موضوع زواجي ولا زفت توا؟!
كفايه تنهدت وقالت:مش هدا قصدي..لكن ياولدي بعينك تشوف وتعرف اللي صاير..
عماد:مش جديد يام..
كفايه:شن قصدك؟
هو غمض عيونه وفتحهم وقال:قصدي..مشاكل تصير فكل عيله وسيورها تنحل
كفايه وهي تشوف لعيونه قالت:خيرك مولي هكي ماتقولش انت بكل..
عماد:اياه خشتيلي ع تحليل النفسيه!! بنفاذ صبر كمل يقول..من الأخير اني قلت للبنت بنجيب امي نهار الأحد وتمت ..
كفايه بصدمه:عاميتلك عيونك..
عماد:تس...المهم هاني خبرتك تمام!..ناض ومشي طلع من حداها وهي تشوفله وتقول:الولد شن جاه !!خيره!! مش طببعي بكل...
🍁🍁🍁🍁
محادثه..
رفقه
(من جدك رزان!!؟)
رزان..
(تبيني نخليه لغيري!)
رفقه عصبت.
(يابنتي افهمي هو خلاص خلاص...نهي موضوعك بالمرة)
رزان
(يتهيأله والله مافي حاجه عنده ناحيتي انتهت)
رفقه
(باهي زي ماتبي قولي لأبله مرام تساعدك..ديري اللي يعجبك)
رزان معاش ردت عليها لكن قالت لروحها :حندير كل شي نقدر عليه بش نرجع نكسبه مادار شويه هو قبل لما كان يبي يكسبني...يستاهل نتنازل ع خاطره..ياااما تنازل هو...
...يتبع...
