#العشق_المتمرد
#جمان_فريد
الجزء67
🍃🍃🍃🍃🍃🍃🍃
2011\2\1
ﺍﻟﺜﻼﺛﺎﺀ ..
ﺍﻟﺴﺎﻋﻪ 5:00 ﻋﺼﺮﺍ ..
ﺧﺎﺷﺔ ﻟﻠﻌﻴﺎﺩﻩ ﺍﻟﻠﻲ ﻟﻴﻬﺎ ﻓﻮﻕ ﺍﻟﺴﻨﻪ ﻣﻌﺎﺵ ﺧﺸﺘﻬﺎ ..
ﻣﻦ ﻟﻤﺎ ﺳﻴﺒﻬﺎ ﻋﻤﺮ .. ﻭﺧﺸﺖ ﻓﻲ ﺣﺎﻟﺔ ﺍﻟﻜﺂﺑﻪ ..
🍁 ﺟﺎﻳﻪ ﺗﺰﻭﺭ ﺑﻨﺖ ﺧﺎﻟﻬﺎ ﺍﻟﻠﻲ ﻟﻴﻬﺎ ﻣﺪﻩ ﻃﻮﻳﻠﻪ ﻣﺸﻔﺮﺗﻬﺎ ..
ﻛﺎﻧﺖ ﻣﺴﺘﺎﺣﺸﺘﻬﺎ ﻭﻣﺴﺘﺎﺣﺸﻪ ﺭﻓﻘﺘﻬﺎ ﻫﻠﺒﻪ ..
ﺑﺎﻟﺬﺍﺕ ﺑﻌﺪ ﻃﻠﻌﺖ ﻣﻦ ﺣﺎﻟﺔ ﺍﻟﺤﺰﻥ ﺍﻟﻠﻲ ﺳﺒﺒﻬﺎ ﻓﺮﺍﻕ ﻋﻤﺮ ..
ﻭﻓﻲ ﻧﻔﺴﻬﺎ ﺑﺮﺭﺕ ﺍﺑﺘﻌﺎﺩ ﻟﻤﻴﺎﺀ ﻋﻨﻬﺎ ﺑﺴﺒﺐ ﺣﺎﻟﺘﻬﺎ ﺍﻟﻠﻲ ﻛﺎﻧﺖ ﻓﻴﻬﺎ ... ﺍﺻﻼ ﺍﻏﻠﺐ ﺻﺎﺣﺒﺎﺗﻬﺎ ﺍﺑﺘﻌﺪﻭﺍ ﻋﻨﻬﺎ ﻷﻧﻬﺎ ﻭﻗﺘﻬﺎ ﺭﺍﻓﻀﺔ ﺗﻄﻠﻊ ﻣﻦ ﺣﺎﻟﺔ ﺣﺰﻧﻬﺎ ..
🍁 ﻭﻫﻲ ﻣﺎﺷﻴﻪ ﻓﻲ ﺍﻟﻤﻤﺮ ﻭﻗﻔﺖ ﻓﻲ ﻣﻜﺎﻧﻬﺎ ...
ﺣﺴﺖ ﺍﻟﺪﻧﻴﺎ ﻟﻔﺖ ﺑﻴﻬﺎ ..
ﻗﻌﺪﺕ ﺗﺸﻮﻑ ﺑﻌﻴﻮﻥ ﺟﺎﺣﻀﺎﺕ ﻣﻦ ﺍﻟﺼﺪﻣﻪ ..
ﺗﺸﻮﻑ ﻓﻲ ﺑﻨﺖ ﺧﺎﻟﻬﺎ ﺍﻭ ﺑﻨﺖ ﺧﺎﻝ ﺑﻮﻫﺎ ... ﺻﺎﺣﺒﺘﻬﺎ ﺍﻗﺮﺏ ﻭﺣﺪﻩ ﻟﻴﻬﺎ ...
ﻭﺍﻗﻔﻪ ﻉ ﺍﻭﻝ ﺍﻧﺴﺎﻥ ﺣﺒﺎﺗﻪ ﺑﺼﺪﻕ ﺍﻭﻝ ﺍﻧﺴﺎﻥ ﻗﺪﺭ ﻳﺤﺮﻙ ﻗﻠﺒﻬﺎ ..
ﺷﺎﺩ ﻳﺪﻫﺎ ...
ﻭﻳﻬﺪﺭﺯﻭﺍ ... ﻭﻳﻀﺤﻜﻮﺍ ...
ﻫﻲ ﻗﻌﺪﺕ ﺗﺸﻮﻑ ﺑﻤﻼﻣﺢ ﻣﺴﺘﻐﺮﺑﻪ ﻉ ﻣﺼﺪﻭﻣﻪ ...
ﻣﺶ ﻓﺎﻫﻤﻪ ﺷﻲ ..
ﻗﺪﻣﺖ ﺍﻛﺜﺮ ﻭﻣﺎﺯﺍﻟﻮﺍ ﻋﻴﻮﻧﻬﺎ ﻣﺘﻮﺳﻌﺎﺕ ﺑﺼﺪﻣﻪ ﻭﻫﻲ ﺗﺸﻮﻓﻠﻬﻢ ..
ﻋﻤﺮ : ﻫﻬﻬﻬﻬﻬﻬﻬﻪ .. ﻭﺍﻟﻠﻪ ﻣﺎﻓﻲ ﻣﻨﻚ ﻳﺎﺩﻋﻮﻩ ﺍﻧﺘﻲ ..
ﻟﻤﻴﺎﺀ ﺑﻐﺮﻭﺭ : ﺍﻛﻴﺪ ﻣﺎﻧﻲ ﺣﺒﻴﺒﺘﻚ ..
ﻋﻤﺮ ﺍﺑﺘﺴﻢ ﺑﺤﺐ ..
" ﺣﺒﻴﺒﺘﻪ "!!
ﺍﻟﺰﻭﺯ ﺗﻼﺷﺖ ﺿﺤﻜﺘﻬﻢ ﻭﺷﺒﺤﻮﻟﻬﺎ ..
ﺍﻧﺼﺪﻣﻮﺍ ...
ﻟﻴﻠﻰ ﺑﺈﺑﺘﺴﺎﻣﻪ ﺍﺳﺘﻐﺮﺍﺏ : ﻛﻴﻒ ... ﺣﺒﻴﺒﺘﻪ؟ !!
ﺷﺒﺤﺘﻠﻪ .. ﻛﻴﻒ؟
ﻟﻤﻴﺎﺀ ﺍﺭﺗﺒﻜﺖ ﺟﺖ ﺑﺘﻄﻠﻖ ﻳﺪ ﻋﻤﺮ ﻫﻮ ﺷﺪﻫﺎ ﺑﻘﻮﺓ ..
ﻋﻤﺮ : ﺍﻳﻪ ﺣﺒﻴﺒﺘﻲ ﻭﻗﺮﻳﺐ ﺍﻥ ﺷﺎﺀ ﺍﻟﻠﻪ ﺣﺘﻜﻮﻥ ﺧﻄﻴﺒﺘﻲ ..
ﺭﻓﻌﺖ ﺣﻮﺍﺟﺒﻬﺎ ﻭﻫﻲ ﻣﺒﺘﺴﻤﻪ ﺑﺼﺪﻣﻪ ..
ﻋﻤﺮ : ﻣﺎﺩﻳﺮﻳﺶ ﺟﻮ ﺍﻧﻚ ﺍﻧﺼﺪﻣﺘﻲ .. ﻭﻻ ﺗﻘﻌﺪﻱ ﺗﻘﻮﻟﻲ ﺧﻨﺘﻮﺗﻲ ﻭﻣﻦ ﻫﺎﻟﺪﻭﺓ ﻫﺪﻱ ...
ﺍﻧﻲ ﻭﻳﺎﻙ ﻛﻞ ﻭﺍﺣﺪ ﻓﻴﻨﺎ ﻋﺪﺍ ﻓﺤﺎﻟﻪ .. ﻭﻋﺮﻓﺖ ﻟﻤﻴﺎ ﺑﻌﺪ ﺳﻴﺒﺘﻚ ..
ﻫﻲ ﻣﻦ ﻗﻮﺓ ﺍﻟﺼﺪﻣﻪ ﻣﺶ ﻗﺎﺩﺭﺓ ﺗﺮﺩ ﻭﻻ ﺗﻘﻮﻝ ﻛﻠﻤﻪ ..
ﻟﻤﻴﺎﺀ ﻃﻮﻝ ﺍﻟﻮﻗﺖ ﻋﻴﻮﻧﻬﺎ ﻟﻮﻃﺎ ..
ﺷﺒﺤﺘﻠﻬﺎ ﺷﻮﻳﻪ ﺑﻌﺪﻳﻦ ﻗﺎﻟﺖ : ﺭﺑﻲ .. ﻳﻬﻨﻴﻜﻢ ..
ﻋﻤﺮ : ﻭﻳﺒﻌﺘﻠﻚ ﺍﻟﻠﻲ ﻳﺴﺘﺎﻫﻠﻚ ..
ﺷﺒﺤﺘﻠﻪ ﺷﻮﻳﻪ ﺑﻌﺪﻳﻦ ﺷﺒﺤﺘﻠﻬﻢ ﻫﻤﺎ ﺍﻟﺰﻭﺯ ...
ﺷﺒﺤﺖ ﻹﻳﺪﻳﻬﻢ ...
ﻗﻠﺒﻬﺎ ﺯﺍﺩ ﺍﻧﺤﺮﻕ .. ﺗﻮﺟﻌﺖ ﻉ ﺍﻵﺧﺮ ..
ﻗﺎﻟﺖ ﺑﺼﻮﺕ ﻣﻬﺰﻭﺯ : ﻧﻴﺘﻲ .. ﺗﺎﺧﺪﻛﻢ .. ﺇﻥ ﺷﺎﺀ ﺍﻟﻠﻪ ..
ﻟﻤﻴﺎﺀ ﺷﺒﺤﺘﻠﻬﺎ ...
ﻋﻤﺮ : ﺍﻳﺎﺍﺍﺍﺍﻩ ﻋﺎﺍﺍﺍﺩ ..
ﺷﺒﺤﺘﻠﻪ ﻣﻦ ﻓﻮﻕ ﻟﻠﻮﻃﺎ ... ﻭﺷﺒﺤﺖ ﻟﻠﻤﻴﺎﺀ ﺑﻨﻔﺲ ﺍﻟﺸﺒﺤﻪ ..
ﺑﻌﺪﻳﻦ ﻣﺸﺖ ﻃﻮﻝ ..
ﻭﻓﻲ ﺩﺍﺧﻠﻬﺎ ﻧﺎﺭ ﻭﺍﻟﻌﻪ ..
🍁 ﻟﻤﻴﺎﺀ : ﻋﻠﻴﻚ ﻋﻤﻠﻪ !!
ﻋﻤﺮ ﺑﺘﻀﻴﻴﻘﺔ ﻋﻴﻮﻥ : ﻋﻤﻠﻪ !! ؟
ﻟﻤﻴﺎﺀ : ﺍﻳﻪ .. ﺍﻧﺖ ﻣﺎﺗﻌﺮﻓﺶ ﻟﻴﻠﻰ ﻓﻲ ﺣﺎﻻﺕ ﺯﻱ ﻫﺎﺩﻱ ﺷﻦ ﺩﻳﺮ ﺗﻮﻟﻲ ﺯﻱ ﺍﻟﻤﻔﺮﺥ .. ﻭﺗﻘﻌﺪ ﺗﺄﻟﻒ ﻓﻲ ﺍﻟﻘﺼﺺ ﻭﺍﻃﻠﻊ ﻓﻲ ﺍﻟﺪﺍﻭﻭﻱ .
ﻋﻤﺮ : ﻃﺰ ﻓﻴﻬﺎ .. ﻭﻻﺗﻌﺒﺮﻳﻬﺎ .. ﺍﻧﻲ ﻧﺒﻴﻚ ﺑﺎﻟﺤﻼﻝ .. ﻭﺍﻧﻲ ﻭﻳﺎﻙ ﻋﺮﻓﻨﺎ ﺑﻌﺾ ﺑﻌﺪ ﺳﻴﺒﺘﻬﺎ ﺑﻮﻗﺖ .. ﻻﺧﻨﺎﻫﺎ ﻭﻻﻟﻌﺒﻨﺎ ﻣﻦ ﻭﺭﺍﻫﺎ ..
ﻭﻭﺍﻟﻘﻠﺐ ﻭﻣﺎﻳﺮﻳﺪ .. ﺍﺑﺘﺴﻢ ﻭﻗﺎﻝ .. ﻭﻻﻻ ..
ﻫﻲ ﺷﺒﺤﺘﻠﻪ ﺍﺑﺘﺴﻤﺖ ﺑﺈﺭﺗﺒﺎﻙ .. ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
🍃 ﻣﻤﻜﻦ ﺻﺢ ﻣﺎﺗﻜﻮﻧﺶ ﻟﻌﺒﺖ ﻣﻦ ﻭﺭﺍﻫﺎ ﻳﺎﻋﻤﺮ ﻟﻜﻦ ﻟﻤﻴﺎﺀ ﻟﻌﺒﺖ ﻭﻣﺶ ﺍﻱ ﻟﻌﺐ 🍃
🍁🍁🍁🍁🍁
ﻣﻘﻌﻤﺰﻳﻦ ﻗﺮﺍﺏ ﻉ ﺍﻟﺴﺮﺍﻳﺎ ﺍﻟﺤﻤﺮﺍ ﻭﻳﻬﺪﺭﺯﻭﺍ ..
ﻋﺮﻭﺑﻪ : ﻭﺟﻌﻮﻧﻲ ﻭﺍﺟﺪ ﻳﺎﻫﺎﻧﻲ ..
ﻫﺎﻧﻴﺒﺎﻝ ﺗﻨﻬﺪ ﻭﻗﺎﻝ : ﻧﺒﻲ ﻧﺴﺎﻋﺪﻫﻢ ﻟﻜﻦ ﻣﺶ ﻋﺎﺭﻑ ﻛﻴﻒ .. ﻣﻮﺿﻮﻉ ﺯﻱ ﻫﺪﻯ ﺣﺴﺎﺱ ﻭﺍﺟﺪ .. ﻣﺎﻧﻌﺮﻓﺶ ﻛﻴﻒ ﻧﺨﺶ ﻓﻴﻪ ..
ﻋﺮﻭﺑﻪ : ﺑﺎﻫﻲ ﻫﻤﺎ ﻗﺪﺍﺵ ﻟﻴﻬﻢ ﻣﺎﺷﺎﻓﻮﺵ ﺑﻌﺾ ..
ﻫﺎﻧﻴﺒﺎﻝ : ﻣﺎﻧﻘﺪﺭﺵ ﻧﺤﺪﺩﻟﻚ ﻣﺪﻩ ﺑﺎﻟﻚ ﻫﻜﻲ ﺧﻤﺲ ﺷﻬﻮﺭ ﻟﻌﻨﺪ ﺗﻮ ..
ﻋﺮﻭﺑﻪ ﺷﺒﺤﺖ ﻟﻠﺒﺤﺮ ﺑﻀﻴﻖ ﻭﻗﻌﺪﺕ ﺗﻔﻜﺮ ..
ﻭﻫﺎﻧﻴﺒﺎﻝ ﻛﺬﻟﻚ ..
ﺷﺒﺤﺘﻠﻪ ﺗﺎﻧﻲ ﺑﻌﺪﻳﻦ ﻗﺎﻟﺖ : ﺷﻨﻮ ﺭﺍﻳﻚ ﻧﺪﺑﺮﻭﻟﻬﻢ ﻃﺮﻳﻘﻪ ﻳﺸﻮﻓﻮﺍ ﺑﻌﻀﻬﻢ ﻓﻴﻬﺎ ..
ﻫﺎﻧﻴﺒﺎﻝ ﺍﺑﺘﺴﻢ ﺑﺮﻓﻌﺔ ﺣﺎﺟﺐ ﺭﺑﻊ ﺍﻳﺪﻳﻪ ﻭﻗﺎﻝ : ﻳﺎﺳﻼﻡ ﺍﺧﺮﺗﻬﺎ ﻧﻘﻌﺪ ﻧﺴﻖ ﻟﻤﻮﺍﻋﻴﺪ ﻏﺮﺍﻡ ﺑﻴﻦ ﻭﻟﺪ ﺧﻮﻱ ﻭﺑﻨﺖ ﺍﺧﺘﻲ ..
ﻋﺮﻭﺑﻪ ﺑﻀﺤﻜﻪ : ﻭﻳﻦ ﺍﻟﻤﺸﻜﻠﻪ ﻣﺎﻧﺪﻳﺮﻭﺵ ﻓﻲ ﺣﺎﺟﻪ ﻏﻠﻂ .. ﻭﺑﻌﺪﻳﻦ ﺷﻦ ﻓﻴﻬﺎ ﻛﺎﻥ ﻗﻌﺪﺕ ﻣﻨﻔﺘﺢ ﻣﺮﺓ ﻭﺣﺪﻩ ﻓﺤﻴﺎﺗﻚ !!
ﻫﺎﻧﻴﺒﺎﻝ ﺷﺒﺤﻠﻬﺎ ﺑﺈﺑﺘﺴﺎﻣﻪ ﻭﻗﺎﻝ : ﻣﺎﻧﻴﺶ ﻣﺴﻜﺮ ﺑﺶ ﻧﺘﻔﺘﺢ .. ﺍﻧﻲ ﻣﻊ ﺍﻟﺘﻄﻮﺭ ﺑﺲ ﺑﺤﺪﻭﺩ ﺍﻟﺪﻳﻦ ﻭﺍﻟﻌﺎﺩﺍﺕ ﻭﺍﻟﺘﻘﺎﻟﻴﺪ ..
ﻭﻟﻮ ﺍﻧﺘﻲ ﺗﺸﻮﻓﻲ ﻫﺎﻟﺸﻲ ﺗﺨﻠﻒ ﻓﺄﻧﻲ ﺑﻜﻞ ﻓﺨﺮ ﻣﺘﺨﻠﻒ ..
ﻋﺮﻭﺑﻪ ﺿﺤﻜﺖ ﺑﺘﻀﻴﻴﻘﺔ ﻋﻴﻮﻥ : ﺣﻴﻠﻚ ﺣﻴﻠﻚ .. ﻣﺎﻗﻠﻨﺎ ﺷﻲ ﺭﺍﻧﺎ .. ﻋﻠﻴﻚ ﺭﺍﺟﻞ ﺣﺴﺎﺱ ﻃﺤﺖ ﻓﻴﻪ ..
ﺭﻓﻊ ﺣﺎﺟﺒﻪ ﺍﻹﻳﺴﺎﺭ ﻭﻗﺎﻝ : ﺍﺣﻤﻤﻤﺪﻱ ﺭﺑﻜﻜﻚ ﺍﻟﻠﻲ ﻃﺤﺘﻲ ﻓﻲ ﻫﺎﻧﻴﺒﺎﻝ .. ﺍﺣﻤﻤﻤﺪﻱ ﺭﺑﻜﻜﻜﻚ ..
ﻋﺮﻭﺑﻪ : ﻫﻬﻬﻬﻬﻬﻬﻬﻪ ..
ﺷﺒﺤﻠﻬﺎ ﺑﺮﺑﻊ ﻋﻴﻦ ﻭﻫﻮ ﺷﺎﺩ ﺿﺤﻜﺘﻪ ﻭﻗﺎﻝ ﻭﻫﻮ ﻳﻘﻠﺪ ﻓﻴﻬﺎ : ﻋﻠﻴﻚ ﺭﺍﺟﻞ ﺣﺴﺎﺱ .. ﻗﻘﻘﻘﻖ ..
ﻋﺮﻭﺑﻪ : ﺍﻧﻘﻘﻘﻖ ..
ﺿﺮﺑﻬﺎ ﻉ ﻳﺪﻫﺎ ﺑﺨﻔﻪ ..
ﺿﺤﻜﺖ ﺗﺎﻧﻲ ..
ﻭﻫﻮ ﻗﺎﻝ ﺑﻀﺤﻜﻪ : ﻋﻨﺰ 💓...
ﺷﺒﺤﺘﻠﻪ ﺑﺮﻓﻌﺔ ﺣﺎﺟﺐ ﻭﻫﻲ ﺗﻀﺤﻚ ..
ﺑﻌﺪﻳﻦ ﻏﻴﺮﺕ ﻋﻴﻮﻧﻬﺎ ﻟﻠﺒﺤﺮ ﻭﻫﻮ ﻧﻔﺲ ﺍﻟﺸﻲ ..
ﺳﻜﺘﻮﺍ ﺷﻮﻳﻪ ﺑﻌﺪﻳﻦ ﻗﺎﻟﺖ ﻋﺮﻭﺑﻪ ..
ﻋﺮﻭﺑﻪ : ﺍﻧﻲ ﻣﺎﻧﺤﺒﺶ ﻧﺘﻜﻠﻢ ﻓﻲ ﺍﻟﺴﻴﺎﺳﻪ .. ﺑﺲ ﺷﻦ ﺗﺘﻮﻗﻊ ﻳﺼﻴﺮ ﻳﻮﻡ ..2\17
ﻫﺎﻧﻴﺒﺎﻝ ﺑﺘﻬﻜﻢ : ﺻﺪﻗﻴﻨﻲ ﻣﺎﺻﺎﻳﺮﺓ ﺣﺎﺟﻪ ﻣﺎﻓﻴﺶ ﺣﺪ ﻋﺎﻳﺶ ﻓﻲ ﺍﻟﺒﻼﺩ ﻫﺪﻱ ﻳﻘﺪﺭ ﻳﻘﻮﻝ ﺑﻐﻐﻎ ﻓﻮﻕ ..
ﻋﺮﻭﺑﻪ ﺷﺪﺕ ﻳﺪﻩ ﻭﻗﺎﻟﺖ : ﺑﺎﻫﻲ ﺧﻼﺹ ﺍﺳﻜﺖ ..
ﻫﻮ ﺿﺤﻚ ..
🌴🌴🌴🌴🌴🌴🌴🌴🌴
" ﺍﻣﻴﻴﻲ .. ﺭﻭﺍﻥ ﺗﻌﻴﻂ .."
ﻃﻠﻌﺖ ﻣﻦ ﺍﻟﻜﻮﺟﻴﻨﻪ : ﺑﺮﻱ ﺍﻭﻗﻔﻲ ﻉ ﺍﻟﺪﻭﻧﺎﺕ .. ﺭﺩﻱ ﺑﺎﻟﻚ ﻳﻨﺤﺮﻗﻮﺍ ..
ﺭﺍﻧﻴﺎ ؛ﺣﺎﺿﺮ ... ﻭﻣﺸﺖ ﻃﻮﻝ ﺑﻄﺮﻳﻘﻬﺎ ﻟﻠﻜﻮﺟﻴﻨﻪ ﻭﻗﻔﺖ ﻉ ﺍﻟﻄﺎﺟﻴﻦ ﺍﻟﻠﻲ ﺗﻨﻘﻠﻰ ﻓﻴﻪ ﺍﻟﺪﻭﻧﺎﺕ ..
ﺷﻮﻳﻪ ﻭﻃﺎﺑﻮﺍ .. ﻗﻌﺪﺕ ﺍﻃﻠﻊ ﻓﻴﻬﻢ ..
ﻟﻤﺎ ﻃﻠﻌﺖ ﺍﺧﺮ ﻭﺣﺪﻩ ..
ﻃﻖ ﺑﺎﺏ ﺍﻟﺤﻮﺵ ...
ﺣﻄﺖ ﺳﺎﻗﻢ ﺍﻟﺸﺒﺎﻙ ﻓﻲ ﺍﻟﺼﻮﻧﻴﻪ ..
ﻭﻣﺸﺖ ﻃﻮﻝ ﻟﻠﺒﺎﺏ ...
ﻓﺘﺤﺎﺗﻪ ...
ﺭﺍﻧﻴﺎ ﺑﺈﺑﺘﺴﺎﻣﻪ ﻣﻔﺎﺟﺄﺓ : ﺧﺎﻟﻲ ..
ﻫﺎﻧﻴﺒﺎﻝ ﺑﺈﺑﺘﺴﺎﻣﻪ : ﺷﻦ ﺟﻮ .
ﻭﺧﺮﺕ ﻉ ﺍﻟﺒﺎﺏ : ﺗﻤﺎﻡ .. ﺧﺶ ﺧﺎﻟﻮ ..
ﺧﺶ ﻫﺎﻧﻴﺒﺎﻝ ﻭﺳﻜﺮ ﺍﻟﺒﺎﺏ ﻭﻫﻮ ﻳﺸﻮﻓﻠﻬﺎ : ﺷﻦ ﺍﻷﻣﻮﺭ ..
ﺭﺍﻧﻴﺎ : ﻣﺎﺷﻴﻪ ..
ﺷﺒﺤﻠﻬﺎ ﺷﻮﻳﻪ ﻭﻫﻮ ﻳﺤﻮﻝ ﻓﻲ ﻛﻨﺪﺭﺗﻪ .. ﺑﻌﺪﻳﻦ ﻗﺮﺻﻠﻬﺎ ﺧﺪﻫﺎ ﻭﺧﺶ ﻭﻫﻮ ﻳﻘﻮﻝ : ﺍﻣﻚ ﻭﻳﻦ ..
ﺭﺍﻧﻴﺎ ﻭﺭﺍﻩ : ﻓﻲ ﺍﻟﺪﺍﺭ ﻣﻊ ﺭﻭﺍﻥ ..
ﺍﻟﺘﻔﺘﺖ ﻟﺮﺍﻧﻴﺎ : ﻫﺪﻳﻚ ﺍﻟﺰﻏﺘﻪ ﻭﻻ ﻭﺻﺎﺭ ﻣﻨﻬﺎ ﻭﻭﻟﺖ ﺳﻤﺤﻪ ..
ﺭﺍﻧﻴﺎ ﺑﻀﺤﻜﻪ : ﺣﺮﺍﻡ ﻋﻠﻴﻚ ﻋﺴﻞ ..
ﻫﺎﻧﻴﺒﺎﻝ : ﻻﺍﻻ ﻣﺶ ﻛﻴﻔﻜﻦ ﺑﻜﻞ ...
ﺧﺸﻮﺍ ﻟﻠﺼﺎﻟﻪ ..
ﻉ ﻃﻠﻌﺔ ﺯﻳﻨﺐ : ﺍﻧﻲ ﻣﺎﻧﺠﻴﺐ ﻛﺎﻥ ﺍﻟﺰﻳﻦ ﺭﺍﻫﻮ ..
ﻫﺎﻧﻴﺒﺎﻝ : ﺍﻧﺘﻲ ﻋﻴﻨﻚ ..
ﺿﺤﻜﺖ ﻭﺿﺮﺑﺎﺗﻪ ﻉ ﺫﺭﺍﻋﻪ ﺑﻌﺪﻳﻦ ﺳﻠﻤﺖ ﻋﻠﻴﻪ ﺑﺎﻟﺨﺪ : ﻛﻴﻒ ﺍﻟﺤﺎﻝ ..
ﻫﺎﻧﻴﺒﺎﻝ ﺑﻀﺤﻜﻪ : ﺍﻟﺤﻤﺪ ﻟﻠﻪ .. ﺷﻨﻮ ﺣﺎﻟﻚ ﺍﻧﺘﻲ ..
ﺯﻳﻨﺐ : ﻛﻮﻳﺴﻪ ﺍﻟﺤﻤﺪ ﻟﻠﻪ .. ﻗﻌﻤﺰ ..
ﻗﻌﻤﺰﺕ ﻫﻲ ﻭﻳﺎﻩ ﻭﺭﺍﻧﻴﺎ ﻣﺸﺖ ﻃﻮﻝ ﻟﻠﻜﻮﺟﻴﻨﻪ ..
ﺯﻳﻨﺐ : ﺷﻦ ﺣﺎﻝ ﺍﻣﻲ ﻭﺳﻴﺪﻱ ﻭﻏﺎﻟﻴﻪ ﻭﺍﻷﻭﻻﺩ ..
ﻫﺎﻧﻴﺒﺎﻝ : ﻛﻮﻳﺴﻴﻦ ﺍﻭﻛﻞ ﻣﺎﺑﻴﻬﻤﺶ .. ﺷﻦ ﺣﺎﻝ ﺧﻴﺮﻱ ﻭﺣﻤﺰﺓ ﻭﺳﻨﺪ ..
ﺯﻳﻨﺐ : ﺍﻟﺤﻤﺪ ﻟﻠﻪ ﻛﻮﻳﺴﻴﻦ ..
ﻫﺎﻧﻴﺒﺎﻝ : ﻭﺭﺑﺎﺏ ..
ﺗﻨﻬﺪﺕ ﺯﻳﻨﺐ ﺑﺄﻟﻢ : ﻉ ﺣﺎﻟﻬﺎ ﻣﻦ ﻫﺪﺍﻛﺎ ﺍﻟﻨﻬﺎﺭ ﺍﻏﻠﺐ ﻭﻗﺘﻬﺎ ﻓﻲ ﺩﺍﺭﻫﺎ ﺭﺍﻗﺪﺓ ﻭﺍﻟﻤﺎﻛﻠﻪ ﻣﺎﺗﺎﻛﻞ ﻛﺎﻥ ﺑﺎﻟﺤﻠﻒ ..
ﻫﺎﻧﻴﺒﺎﻝ : ﻣﺶ ﻋﺎﺭﻑ ﺷﻦ ﺑﻨﻘﻮﻝ .. ﻟﻜﻦ ﺍﻧﻲ ﻟﻴﺎ ﻳﺪ ﻓﻲ ﺍﻟﻠﻲ ﺻﺎﺭ ﺍﻧﻲ ﺧﺸﻴﺖ ﻓﻲ ﺍﻟﻤﻮﺿﻮﻉ ﻭﺳﻌﻴﺖ ﻓﻴﻪ ﺑﻴﺶ ﻳﺼﻴﺮ ﻣﻨﻪ .. ﺍﻗﺴﻢ ﺑﺎﻟﻠﻪ ﻧﺎﺩﻡ ﺍﻥ ﻋﺮﻓﺘﻪ ﺍﺻﻼ ..
ﺯﻳﻨﺐ : ﻭﺍﻟﻠﻪ ﻭﺣﺘﻰ ﺍﻧﻲ ﻧﺎﺩﻣﻪ ﺍﻟﻠﻲ ﻭﺍﻓﻘﺖ ..
ﻫﺎﻧﻴﺒﺎﻝ : ﺧﻴﺮﻱ ﻛﻴﻒ ﺍﻟﻠﻲ ﻭﺍﺧﺪ ﻣﻨﻲ ﻣﻮﻗﻒ ﻣﻦ ﺍﺧﺮ ﻣﺮﺓ ﺭﻳﺘﻪ ﻓﻲ ﺍﻟﻤﺴﺘﺸﻔﻰ ..
ﺯﻳﻨﺐ : ﻻﻻ ﻣﺶ ﻫﻜﻲ .. ﻭﺟﻌﺎﺗﻪ ﺑﻨﺘﻪ ﺑﺲ ..
ﻫﺎﻧﻴﺒﺎﻝ : ﻭﺍﻟﻠﻪ ﺣﺘﻰ ﻛﺎﻥ ﺧﺪﻱ ﻣﻨﻲ ﻣﻮﻗﻒ ﻣﺎﻧﻠﻮﻣﻪ ﺍﻗﺴﻢ ﺑﺎﻟﻠﻪ ..
ﻉ ﺟﻴﺔ ﺭﺍﻧﻴﺎ ﺑﺼﻔﺮﺓ ﻓﻴﻬﺎ ﻃﻮﺍﺳﻲ ﻋﺼﻴﺮ : ﺗﻔﻀﻞ ﺧﺎﻟﻲ ..
ﺧﺪﻱ ﻣﻨﻬﺎ ﺍﻟﻄﺎﺳﻪ : ﺻﺤﻴﺘﻲ ..
ﻣﺪﺕ ﻷﻣﻬﺎ ... ﺑﻌﺪﻳﻦ ﻗﻌﻤﺰﺕ ..
ﺭﺍﻧﻴﺎ : ﻫﻮ ﺭﺍﻫﻮ ﻧﻔﺴﻴﺘﻪ ﺗﺎﻋﺒﻪ .. ﻫﺪﺍ ﻋﻼﺵ ﺩﺍﺭ ﻫﻜﻲ ..
ﻫﺎﻧﻴﺒﺎﻝ : ﻧﻔﺴﻴﺘﻪ ﺗﺎﻋﺒﻪ ﻳﻔﺴﺦ ؟ !!
ﺭﺍﻧﻴﺎ : ﺍﺳﺄﻝ ﺍﻣﻲ ﻟﻤﺎ ﻣﺸﻴﻨﺎ ﻟﻌﺰﻱ ﺑﻮﻩ ﺧﻮﺍﺗﻪ ﻟﻤﺎ ﻳﻌﻴﻄﻮﺍ ﺷﻦ ﻳﻘﻮﻟﻮﺍ .. ﻳﻘﻮﻟﻮﺍ ﻣﻦ ﻗﻌﺪﻟﻨﺎ ﺑﻌﺪﻩ .. ﻣﻦ ﻟﻴﻨﺎ ﺑﻌﺪﻩ ..
ﺯﻳﻨﺐ : ﺍﻧﻲ ﻣﺶ ﻋﺎﺭﻓﻪ ﻛﻴﻒ ﻣﻦ ﻭﻗﺘﻬﺎ ﺣﺴﻴﺖ ﺍﻥ ﻓﻲ ﺷﻲ ﺣﻴﺼﻴﺮ ...
ﺭﺍﻧﻴﺎ : ﺣﺘﻰ ﺍﻧﻲ ..
ﻫﺎﻧﻴﺒﺎﻝ : ﻛﻴﻒ ﺑﺎﻫﻲ ﻳﻘﻌﺪ ﻃﻮﻝ ﻋﻤﺮﻩ ﻫﻜﻲ ؟ !
ﺭﺍﻧﻴﺎ : ﻟﻴﻦ ﻳﻄﻤﻦ ﻉ ﺧﻮﺍﺗﻪ .. ﻭﻳﻌﻄﻴﻬﻢ ..
ﻫﺎﻧﻴﺒﺎﻝ : ﺍﻧﺎﻧﻴﻪ ﻫﺪﻱ .. ﺷﺮﺏ ﺍﻟﻌﺼﻴﺮ ..
ﺯﻳﻨﺐ : ﻫﻮ ﺍﻧﻲ ﻻﺣﻈﺘﻬﻢ ﻣﺘﻌﻠﻘﻴﻦ ﺑﻴﻪ .. ﻭﻫﻮ ﻧﻔﺲ ﺍﻟﺸﻲ .. ﺣﺘﻰ ﻟﻤﺎ ﻟﻐﻲ ﻓﻜﺮﺓ ﺍﻟﺴﻜﻨﻪ ﻓﻮﻗﻬﻢ .. ﺑﻨﻲ ﺣﻮﺵ ﺟﻨﺒﻬﻢ ..
ﻫﺎﻧﻴﺒﺎﻝ ﺣﻂ ﺍﻟﻄﺎﺳﻪ ﻭﻗﺎﻝ : ﻣﻦ ﺍﻻﺧﻴﺮ ﻃﺎﺭﻕ ﺧﺸﺖ ﺑﻌﻀﻬﺎ ﻋﻨﺪﻩ ﻭﻣﺎﻋﺮﻓﺶ ﻳﺘﺼﺮﻑ .. ﻳﻠﻼ ﺧﻴﺮﺗﻬﺎ ﻓﻴﻬﺎ ﺇﻥ ﺷﺎﺀ ﺍﻟﻠﻪ ..
ﺯﻳﻨﺐ ﻭﺭﺍﻧﻴﺎ : ﻳﺎﺭﺏ ..
ﺷﺒﺢ ﻟﺮﺍﻧﻴﺎ : ﺗﺮﺍ ﺷﻮﻓﻴﻬﻠﻲ ﻧﺒﻲ ﻧﺨﺶ ﻧﻬﺪﺭﺯ ﻋﻠﻴﻬﺎ ﺷﻮﻳﻪ ..
ﻧﺎﺿﺖ ﺭﺍﻧﻴﺎ : ﺑﺎﻫﻲ ..
ﻣﺸﺖ ﻟﻠﺪﺍﺭ ..
ﺯﻳﻨﺐ : ﻧﺒﻴﻬﺎ ﺗﻄﻠﻊ ﻣﻦ ﺣﺎﻟﺘﻬﺎ ﺍﻟﻠﻲ ﻫﻲ ﻓﻴﻬﺎ ..
ﻫﺎﻧﻴﺒﺎﻝ : ﺑﺎﻟﺸﻮﻱ ﺑﺎﻟﺸﻮﻱ ﻳﺎﺯﻳﻨﺐ ﻣﺶ ﺳﺎﻫﻞ ﺍﻟﻠﻲ ﻣﺮﺕ ﺑﻴﻪ ..
ﺟﺘﻬﻢ ﺭﺍﻧﻴﺎ : ﺗﻌﺎﻟﻰ ﺧﺎﻟﻮ ..
ﻧﺎﺽ ﻫﺎﻧﻴﺒﺎﻝ ﻭﻫﻮ ﻳﻘﻮﻝ : ﻳﺎﺍﺭﺏ ..
ﻭﻣﺸﻲ ﻣﻊ ﺭﺍﻧﻴﺎ ﻟﻠﺪﺍﺭ ..
ﻟﻘﻲ ﺭﺑﺎﺏ ﺭﺍﻗﺪﺓ ﻭﻣﺘﻐﻄﻴﻪ ﺑﺎﻟﺒﻄﺎﻧﻴﻪ ..
ﻗﺪﻡ ﻭﺧﺶ ﻭﻫﻮ ﻳﻘﻮﻝ : ﺭﺑﺎﺏ ...
ﻻﺭﺩ ..
ﻭﺻﻞ ﻓﻴﻬﺎ ﻭﻗﻌﻤﺰ : ﺭﺑﺎﺏ ﻳﺎﺑﻨﺖ ﺍﻧﻲ ﻧﺠﻲ ﻭﻣﺎﺗﻄﻠﻌﻴﺶ ﺗﺴﻠﻤﻲ ﻋﻠﻴﺎ !
ﺭﺑﺎﺏ ﻭﻫﻲ ﻣﻐﻤﻀﻪ ﻋﻴﻮﻧﻬﺎ : ﺧﺎﻟﻲ ..
ﻗﻌﺪ ﻳﺒﻌﺪ ﻓﻲ ﻗﺼﺘﻬﺎ ﻋﻦ ﻋﻴﻮﻧﻬﺎ : ﺷﻨﻮ ﺣﺎﻟﻚ ..
ﺭﺑﺎﺏ : ﺑﺎﻫﻴﻪ ..
ﻣﺴﺢ ﺑﻴﺪﻩ ﻉ ﺭﺍﺳﻬﺎ ﻗﺎﻝ؛ﻫﻴﺎ ﺻﺒﻲ ﻭﺗﻲ ﺭﻭﺣﻚ ﺑﻨﻄﻠﻌﻮﺍ ..
ﺭﺑﺎﺏ : ﻣﺎﺧﺎﻃﺮﻳﺶ .
ﻫﺎﻧﻴﺒﺎﻝ : ﺍﻧﻲ ﻗﻠﺖ ﺻﺒﻲ ..
ﺗﻨﻬﺪﺕ ﺭﺑﺎﺏ ﺑﻀﻴﻖ ..
ﻫﺎﻧﻴﺒﺎﻝ : ﻫﻴﺎ ﺻﺒﻲ ﻗﻠﺖ ...
ﻗﻌﺪﺕ ﺳﺎﻛﺘﻪ ..
ﻭﺭﺍﻧﻴﺎ ﺗﺸﻮﻓﻠﻬﺎ ﺑﺄﻟﻢ ..
ﻫﺎﻧﻴﺒﺎﻝ : ﺭﺑﻮﺑﻪ .. ﻛﺎﻥ ﺗﻌﺰﻱ ﺧﺎﻟﻚ ﻫﺎﻧﻴﺒﺎﻝ ﺻﺒﻲ ..
ﺗﻨﻬﺪﺕ ..
ﺑﻌﺪﻳﻦ ﻓﺘﺤﺖ ﻋﻴﻮﻧﻬﺎ ﻭﻧﺎﺿﺖ ﻗﻌﻤﺰﺕ ..
ﻭﻫﻲ ﺗﺸﻮﻑ ﺍﻟﻘﺪﺍﻡ ﺑﺘﻌﺐ ..
ﻫﺎﻧﻴﺒﺎﻝ ﺍﺑﺘﺴﻢ ﻭﻧﺎﺽ : ﻫﻴﺎ ﻧﺮﺍﺟﻲ ﻓﻴﻚ ..
ﺷﺒﺢ ﻟﺮﺍﻧﻴﺎ .. ﺣﺘﻰ ﺍﻧﺘﻲ ﻭﺗﻲ ﺭﻭﺣﻚ ﻣﻌﺎﻫﺎ ..
ﻭﻃﻠﻊ ﻣﻦ ﺣﺪﺍﻫﻢ ..
ﺍﺑﺘﺴﻤﺖ ﺭﺍﻧﻴﺎ ﻭﻫﻲ ﺗﺒﻊ ﻓﻴﻪ ﺑﻌﻴﻮﻧﻬﺎ ﻟﻴﻦ ﻃﻠﻊ ..
ﺑﻌﺪﻳﻦ ﺷﺒﺤﺖ ﻷﺧﺘﻬﺎ ﻟﻘﺘﻬﺎ ﻧﺎﺿﺖ ﻃﻠﻊ ﻓﻲ ﺣﻮﺍﻳﺠﻬﺎ ..
ﺗﻨﻬﺪﺕ ﻭﺑﻌﺪﻳﻦ ﺻﻜﺮﺕ ﺍﻟﺒﺎﺏ ..
🍁🍁🍁🍁
ﻃﻠﻌﻬﻢ ..
ﻭﻗﻌﺪ ﻳﺪﻫﻮﺭ ﺑﻴﻬﻢ ﻓﻲ ﺍﻟﺴﻴﺎﺭﺓ ..
ﻭﻳﻬﺪﺭﺯ ﻣﻦ ﻫﻨﻲ ﻭﻣﻦ ﻫﻨﻲ .. ﻫﺪﺭﺯﺓ ﻳﻐﻴﺮ ﺑﻴﻬﺎ ﺟﻮﻫﻢ ..
ﻛﻞ ﻭﺣﺪﻩ ﻓﻴﻬﻢ ﻛﺎﻧﺖ ﻋﺎﻳﺸﻪ ﺣﺰﻥ .. ﻭﺣﺎﻟﻪ ﻭﺣﺪﻩ ..
ﻓﺮﺍﻕ .. ﻭﻛﻞ ﻭﺣﺪﻩ ﻓﻴﻬﻢ ﺍﻧﺠﺒﺮﺕ ﻉ ﺍﻟﻔﺮﺍﻕ ..
ﺯﻱ ﻣﺎﻫﻮ ﺍﻧﺠﺒﺮ ﻋﻠﻴﻪ ﻳﻮﻡ ﻣﻦ ﺍﻷﻳﺎﻡ ..
ﻭﺻﻞ ﺑﻴﻬﻢ ﻟﻠﺴﺎﺣﻪ ﺍﻟﺨﻀﺮﺍ ...
ﻗﻌﺪﻭﺍ ﻓﻲ ﺍﻟﺴﻴﺎﺭﺓ
ﻫﺎﻧﻴﺒﺎﻝ : ﺗﻨﺰﻟﻦ ﻭﻻﺗﻘﻌﺪﻥ ﻓﻲ ﺍﻟﺴﻴﺎﺭﺓ ! ؟
ﺭﺍﻧﻴﺎ : ﺧﺎﻃﺮﻱ ﻧﻨﺰﻝ ..
ﻫﺎﻧﻴﺒﺎﻝ : ﺭﺑﺎﺏ ..
ﺭﺑﺎﺏ ﺗﻨﻬﺪﺕ ﺑﻌﺪﻳﻦ ﻗﺎﻟﺖ : ﺑﺎﻫﻲ ..
🍁 ﻧﺰﻟﻮﺍ ﺍﻟﺘﻼﺗﻪ ﻣﻦ ﺍﻟﺴﻴﺎﺭﺓ ..
ﺧﺪﺍﻫﻢ ﻫﺎﻧﻴﺒﺎﻝ ﻟﺘﺮﻛﻴﻨﻪ ﻭﻗﻌﻤﺰﻭﺍ ...
ﺭﻥ ﺗﻠﻴﻔﻮﻥ ﻫﺎﻧﻴﺒﺎﻝ ﻃﻠﻌﻪ ﻣﻦ ﺟﻴﺐ ﺍﻟﻜﺒﻮﻁ ..
ﺷﺎﻑ ﺍﻟﺮﻗﻢ ﺍﺑﺘﺴﻢ .. ﻭﺭﺩ ﻃﻮﻝ ..
ﻫﺎﻧﻴﺒﺎﻝ : ﻳﺎﺁﻟﻮ ..
ﻋﺮﻭﺑﻪ ﺑﻀﺤﻜﻪ : ﻳﺎﺁﻟﻮﺍﺕ .. ﺷﻦ ﺟﻮ ..
ﻫﺎﻧﻴﺒﺎﻝ ﺑﺈﺑﺘﺴﺎﻣﻪ : ﺗﻤﺎﻡ ..
ﺑﻨﺎﺕ ﺍﺧﺘﻪ ﻳﺸﻮﻓﻮﻟﻪ ﺑﺈﺑﺘﺴﺎﻣﻪ ..
ﻛﻴﻒ ﻋﻴﻮﻧﻪ ﻻﻣﻌﺎﺕ ﺑﻀﺤﻜﻪ .. ﻭﺍﺑﺘﺴﺎﻣﺘﻪ ﺍﻟﺤﻠﻮﻩ ﻣﺮﺳﻮﻣﻪ ﻉ ﻭﺟﻬﻪ ..
ﻭﺟﻬﻪ ﻳﺘﻮﻫﺞ ﻋﺸﻖ ..💓
ﻋﺮﻭﺑﻪ : ﺍﻟﺒﻨﺎﺕ ﺣﺪﺍﻙ ..
ﻫﺎﻧﻴﺒﺎﻝ : ﺍﻣﻤﻢ ...
ﻋﺮﻭﺑﻪ : ﺑﺎﻫﻲ ﻧﺒﻲ ﻧﻜﻠﻢ ﺭﺍﻧﻴﺎ ﺗﻮ ..
ﻫﺎﻧﻴﺒﺎﻝ : ﺩﻗﻴﻘﻪ .. ﺷﺒﺢ ﻟﺮﺍﻧﻴﺎ .. ﻣﺮﺍﺕ ﺧﺎﻟﻚ ﺗﺒﻲ ﺗﻜﻠﻤﻚ ..
ﻋﺮﻭﺑﻪ ﺍﺑﺘﺴﻤﺖ ﺑﺨﺠﻞ ﻭﻗﻠﺒﻬﺎ ﺩﻕ ﺑﻘﻮﺓ ..💓
ﺭﺍﻧﻴﺎ ﺍﺑﺘﺴﻤﺖ ﻭﻗﺎﻟﺖ : ﻋﻄﻴﻬﺎﻟﻲ ..
ﻫﺎﻧﻴﺒﺎﻝ : ﺍﻫﻲ ﻣﻌﺎﻙ .. ﻣﺪ ﺍﻟﺘﻠﻴﻔﻮﻥ ﻟﺮﺍﻧﻴﺎ ﺧﺪﺍﺗﻪ .. ﻗﺎﻝ ﻭﻫﻮ ﻳﺸﻮﻓﻠﻬﺎ .. ﻋﺪﻱ ﻛﻠﻤﻴﻬﺎ ﺑﻌﻴﺪ .. ﺷﺒﺢ ﻟﺮﺑﺎﺏ .. ﻧﺒﻲ ﻧﻬﺪﺭﺯ ﺍﻧﻲ ﻭﻫﺎﻟﺴﻤﺤﻪ ..
ﺍﺑﺘﺴﻤﺖ ﺭﺑﺎﺏ ﻣﺠﺎﻣﻠﻪ ..
ﺍﻣﺎ ﺭﺍﻧﻴﺎ ﺿﺤﻜﺖ .. ﺑﻌﺪﻳﻦ ﺑﻌﺪﺕ ﻋﻨﻬﻢ ﺑﻌﺪ ﺣﻄﺖ ﺍﻟﺘﻠﻴﻔﻮﻥ ﻉ ﻭﺫﻧﻬﺎ ..
ﺭﺍﻧﻴﺎ : ﺍﻟﺴﻼﻡ ﻋﻠﻴﻜﻢ ..
ﻋﺮﻭﺑﻪ : ﻭﻋﻠﻴﻜﻢ ﺍﻟﺴﻼﻡ ﺭﻧﻮﺷﻪ .. ﻛﻴﻒ ﺍﻟﺤﺎﻝ ..
ﺭﺍﻧﻴﺎ : ﺍﻟﺤﻤﺪ ﻟﻠﻪ .. ﻛﻴﻒ ﺣﺎﻟﻚ ﺍﻧﺘﻲ ﻭﺍﻫﻠﻚ ..
ﻋﺮﻭﺑﻪ : ﺍﻟﺤﻤﺪ ﻟﻠﻪ ﻛﻮﻳﺴﻴﻦ .. ﻛﻴﻒ ﺣﺎﻝ ﻣﺎﻣﺎ ﻭﺧﻮﺗﻚ ﻭﺧﻮﺍﺗﻚ ﻭﺳﻤﺤﻪ ﺍﻟﺼﻐﻴﺮﻭﻧﻪ ..
ﺭﺍﻧﻴﺎ ﺑﺈﺑﺘﺴﺎﻣﻪ : ﻛﻠﻨﺎ ﺍﻟﺤﻤﺪ ﻟﻠﻪ ﻛﻮﻳﺴﻴﻦ ﻭﺍﻟﺴﻤﺤﻪ ﺍﻟﺼﻐﻴﺮﻭﻧﻪ ﺩﺍﺭﺗﻠﻨﺎ ﺟﻮ ﻓﻲ ﺍﻟﺤﻮﺵ .. ﺗﻨﻬﺪﺕ ﻭﻗﺎﻟﺖ .. ﺧﻔﻔﺖ ﻋﻠﻴﻨﺎ ﺷﻮﻳﻪ ..
ﺍﺑﺘﺴﻤﺖ ﻋﺮﻭﺑﻪ ﻭﻗﺎﻟﺖ : ﺭﻧﻮ .. ﺍﺳﺘﺎﺣﺸﺘﻲ ﺭﻣﺰﻱ ﺍﻛﻴﺪ ..
ﻣﺠﺮﺩ ﺳﻤﻌﺖ ﺍﺳﻤﻪ ﺩﻣﻮﻋﻬﺎ ﻧﺰﻟﻮﺍ ...
ﻟﻴﻬﺎ ﺳﺘﻪ ﺷﻬﻮﺭ ..
ﻻﺭﺍﺗﻪ ﻻﺳﻤﻌﺖ ﺻﻮﺗﻪ ﻭﻻﺗﻨﺪﺭﻱ ﻋﻠﻴﻪ ..
ﻣﻦ ﻛﺜﺮ ﻣﺎﻣﺸﺪﺩﻳﻦ ﻋﻠﻴﻬﺎ ﺍﻟﺨﻨﺎﻕ ﻣﺶ ﻗﺎﺩﺭﻩ ﺗﻮﺻﻞ ﻓﻴﻪ ..
ﻭﺻﻠﺖ ﺑﺨﻮﻫﺎ ﺍﻧﻪ ﻳﺤﻔﻆ ﻣﻮﺍﻋﻴﺪ ﻣﺤﺎﺿﺮﺍﺗﻬﺎ ﺣﻔﻆ ﻭﻳﻌﺴﻜﺮﻟﻬﺎ ﻛﻞ ﻳﻮﻡ ﻓﻲ ﺍﻟﻜﻠﻴﻪ ... ﺍﻟﻤﻬﻢ ﻣﺎﺩﻳﺮﺵ ﺗﻠﻴﻔﻮﻥ ﻭﻻﺑﺄﻱ ﺷﻜﻞ ...
ﺑﻮﻫﺎ ﻣﺎﺷﻜﺶ ﻓﻮﻻ ﺣﺎﺟﻪ .. ﻛﻞ ﺷﻲ ﻗﺪﺍﻣﻪ ﻳﻤﺸﻲ ﻃﺒﻴﻌﻲ ..
ﻭﻫﻲ ﻣﺴﻜﻴﻨﻪ ﻣﺎﺗﻘﺪﺭﺵ ﺗﺒﻴﻦ ﺷﻲ .. ﺧﻮﻓﻬﺎ ﻣﺶ ﻉ ﻧﻔﺴﻬﺎ ﺑﺲ .. ﺣﺘﻰ ﻉ ﺍﻣﻬﺎ ﺍﻟﻠﻲ ﻣﻤﻜﻦ ﺗﺘﺄﺫﻯ ﺑﺴﺒﺐ ﺍﻟﻠﻲ ﺻﺎﺭ ﻟﻮ ﺑﻮﻫﺎ ﻋﺮﻑ ..
ﻋﺮﻭﺑﻪ : ﺭﻧﻮ .. ﺍﻟﻮ ..
ﺭﺍﻧﻴﺎ ﻭﻫﻲ ﺗﻤﺴﺢ ﻓﺪﻣﻮﻋﻬﺎ ﻭﺗﺮﺷﻒ : ﻣﻌﺎﻙ ..
ﻋﺮﻭﺑﻪ ﺑﺄﻟﻢ : ﻏﺪﻭﺓ ﺑﺈﺫﻥ ﺍﻟﻠﻪ ﺣﺘﺸﻮﻓﻴﻪ ..
ﺭﺍﻧﻴﺎ ﺑﺼﺪﻣﻪ : ﻛﻴﻴﻒ !! ؟
......
ﺍﻧﻲ ﺍﻟﻠﻲ ﺣﺎﺭﻗﻨﻲ ﺍﻥ ﺑﺴﻬﻮﻟﻪ ﻓﺴﺦ ﻭﺑﺒﺮﻭﺩ ﺣﺴﻴﺖ ... ﻣﺶ ﻋﺎﺭﻓﻪ ﻛﻴﻒ ﺑﻨﺸﺮﺣﻠﻚ ..
ﻫﺎﻧﻴﺒﺎﻝ : ﻣﻦ ﻏﻴﺮ ﻣﺎﺗﺸﺮﺣﻲ ﻭﻻﺗﺤﻜﻲ ﻓﺎﻫﻢ ... ﺭﺑﺎﺏ ﺍﺷﺒﺤﻴﻠﻲ ﻫﻨﻰ ...
ﺷﺒﺤﺘﻠﻪ ﻭﻫﻲ ﺗﻤﺴﺢ ﻓﺪﻣﻮﻋﻬﺎ ..
ﻫﺎﻧﻴﺒﺎﻝ : ﻣﺎﻧﺒﻲ ﻧﺘﻔﻠﺴﻒ ﻋﻠﻴﻚ ﻭﺍﺟﺪ .. ﺑﺲ ﻫﻲ ﺣﺎﺟﻪ ﻭﺣﺪﻩ ﺑﻨﻘﻮﻟﻬﻠﻚ ... ﺍﻟﺨﻴﺮﺓ ﻓﻴﻤﺎ ﺍﺧﺘﺎﺭﻩ ﺍﻟﻠﻪ ... ﺑﻌﺪ ﻭﻗﺖ ﻣﻦ ﻫﺎﻟﻠﺤﻈﻪ ﺣﻴﺠﻴﻚ ﻧﻬﺎﺭ ﻭﺗﻘﻮﻟﻲ ﺑﺎﻫﻲ ﺍﻟﻠﻲ ﺻﺎﺭ ﻫﻜﻲ ..
ﻧﺰﻟﺖ ﺭﺑﺎﺏ ﻋﻴﻮﻧﻬﺎ ﻭﻗﺎﻟﺖ : ﻭﻧﻌﻢ ﺑﺎﻟﻠﻪ ..
ﻫﺎﻧﻴﺒﺎﻝ : ﻣﺎﺯﻟﺘﻲ ﺻﻐﻴﺮﺓ ﻭﻣﺎﺯﺍﻝ ﺍﻟﻌﻤﺮ ﻗﺪﺍﻣﻚ ﻭﺍﻛﻴﺪ ﻓﻲ ﺣﺎﺟﺎﺕ ﺣﻠﻮﺓ ﻭﺍﺟﺪ ﺗﺮﺍﺟﻲ ﻓﻲ ﺩﻭﺭﻫﺎ ﺑﻴﺶ ﺗﺠﻴﻚ ..
ﺷﺒﺤﺘﻠﻪ ﻭﻗﺎﻟﺖ ﺑﺈﺑﺘﺴﺎﻣﻪ : ﺭﺑﻲ ﻳﻔﺮﺣﻨﻲ ﺑﻴﻚ ﻳﺎﺭﺏ ..
ﺿﺤﻚ ﻫﺎﻧﻴﺒﺎﻝ ... ﻭﻫﻲ ﺿﺤﻜﺖ ..
ﺷﻮﻳﻪ ﻭﻭﻗﻔﺖ ﻋﻠﻴﻬﻢ ﺭﺍﻧﻴﺎ ﻭﻫﻲ ﺗﻀﺤﻚ ﻣﺪﺕ ﺍﻟﺘﻠﻴﻔﻮﻥ ﻟﺨﺎﻟﻬﺎ ﻭﻗﺎﻟﺖ : ﻫﺎﻙ ..
ﺧﺪﺍﻩ ﻭﻫﻮ ﺭﺍﻓﻊ ﺣﺎﺟﺒﻪ ﺍﻹﻳﺴﺎﺭ ..
ﻫﻲ ﻧﺰﻟﺖ ﻋﻴﻮﻧﻬﺎ ﻟﻮﻃﺎ ﺧﺠﻼ ..
ﺭﺑﺎﺏ ﺷﺒﺤﺘﻠﻬﺎ ﺑﺸﻚ ...
ﺑﻌﺪ ﺣﻂ ﻫﺎﻧﻴﺒﺎﻝ ﺗﻠﻴﻔﻮﻧﻪ ﻓﻲ ﺟﻴﺐ ﺍﻟﺠﻴﺒﻮﻃﻲ ﻗﺎﻝ : ﻫﻲ ﺻﺒﻲ ﺭﺑﺎﺏ ﺧﻞ ﻧﺘﻤﺸﻮﺍ ﺷﻮﻱ ..
ﻧﺎﺿﺖ ﺭﺑﺎﺏ ﻭﻫﻲ ﻣﺒﺘﺴﻤﻪ ..
ﻭﻣﺸﻮﺍ ﻣﻊ ﺑﻌﺾ ﻭﻫﻤﺎ ﻳﻬﺪﺭﺯﻭﺍ ..
ﻭﺭﺍﻧﻴﺎ ﻓﻲ ﻋﺎﻟﻢ ﺗﺎﻧﻲ ﻣﻠﻬﻮﻓﻪ ﻫﻠﺒﻪ ﻟﻴﻮﻡ ﻏﺪﻭﺓ ...
ﻭﻗﻠﺒﻬﺎ ﻳﺮﻗﺺ ﻣﻦ ﻓﺮﺣﺘﻪ 💓
🍁🍁🍁🍁🍁
ﻣﻘﻌﻤﺰﺓ ﺣﺪﺍ ﺍﻟﻔﻴﺮﻧﺪﺍ ﺍﻟﻤﺴﻜﺮﺓ ..
ﺗﺸﺮﺏ ﻓﻲ ﻳﺎﻧﺴﻮﻥ ﺩﺍﻓﻲ ..
ﻭﺳﺮﺣﺎﻧﻪ ﺑﻔﻜﺮﻫﺎ ... ﻓﻲ ﺣﺒﻴﺒﻬﺎ ﺍﻟﻠﻲ ﻏﺎﻳﺐ ﻋﻨﻬﺎ ﻟﻴﻪ ﺍﺳﺒﻮﻉ ..
ﺍﺑﺘﺴﻤﺖ ... ﺑﻌﺪﻳﻦ ﺧﺪﺕ ﺗﻠﻴﻔﻮﻧﻬﺎ ﺍﻟﻤﺤﻄﻮﻁ ﻉ ﻳﺪ ﺍﻟﻜﺮﺳﻲ ..
ﻭﺧﺸﺖ ﻉ ﺍﻟﺮﺳﺎﺋﻞ ﻭﺑﺪﺕ ﺗﻜﺘﺐ ..
🇩🇿 ﺍﻟﺠﺰﺍﺋﺮ ..
ﻛﺎﻥ ﻣﻘﻌﻤﺰ ﻓﻲ ﻭﺣﺪﻩ ﻣﻦ ﻣﻘﺎﻫﻴﻬﺎ ﻳﺴﺘﻨﻰ ﻓﻲ ﺣﺪ ..
ﺭﻥ ﺗﻠﻴﻔﻮﻧﻪ ﺑﻨﻐﻤﻪ ﺭﺳﺎﻟﻪ ..
ﻗﺎﻣﻪ ﻣﻦ ﻉ ﺍﻟﻄﺎﻭﻟﻪ ... ﻭﺷﺎﻑ ﺍﻟﺮﺳﺎﻟﻪ ..
ﻭﻓﺘﺤﻬﺎ ..
❣ ﻳﺰﻳﺪ ﺷﻮﻗﻲ ﻓﻲ ﺍﻏﻴﺎﺑﻚ ﻋﻠﻲ
ﻭﻳﺰﻳﺪﺍﻟﻐﻼ ﻭﻳﻦ ﻃﻴﻔﻚ ﻳﺠﻲ
ﺍﻳﺰﻳﺪ ﺣﻨﻴﻨﻲ ﻭﺗﺴﻴﻞ ﺩﻣﻌﺘﻲ ﻳﺎﻏﺎﻟﻲ ﻣﻦ ﻋﻴﻨﻲ
ﻭﻳﻦ ﻣﺎﺧﻴﺎﻟﻚ ﻓﻲ ﺍﻟﻤﻨﺎﻡ ﻳﺠﻴﻨﻲ ﺷﻮﺭﻙ ﺑﻼﺭﺍﺩﻩ ﻧﻤﺪ ﺍﻳﺪﻱ ..
💓 ﻫﻮ ﺍﺑﺘﺴﻢ ﻣﻦ ﻭﺳﻂ ﻗﻠﺒﻪ ..
ﻗﻌﺪ ﺷﻮﻳﻪ ﻳﺪﻭﺭ ﺑﻌﻴﻮﻧﻪ ﻓﻲ ﺍﻟﻤﻜﺎﻥ ..
ﺑﻌﺪﻳﻦ .. ﺷﺒﺢ ﻟﺘﻠﻴﻔﻮﻧﻪ ..
ﻭﺑﺪﻱ ﻳﺮﺩ ﻋﻠﻴﻬﺎ ..
💕💕💕
ﻫﻲ ﻗﺎﻋﺪﻩ ﺳﺮﺣﺎﻧﻪ ..
ﺑﺲ ﻫﺎﻟﻤﺮﻩ ﻓﻲ ﺻﻮﺭﻩ ﺍﻟﻠﻲ ﻓﺘﻠﻴﻔﻮﻧﻬﺎ ...
ﺻﻮﺭﻩ ﻫﻮ ﻭﺟﻮﺍﺩ ﻭﻣﻌﻤﺮ ..
ﺍﻏﻠﺒﻬﺎ ﺻﻮﺭ ﻣﻀﺤﻜﻪ .. ﺧﺪﺗﻬﺎ ﺧﻠﺴﻪ ﻭﻫﻮ ﻳﻼﻋﺐ ﻓﺎﻟﺼﻐﺎﺭ ..
ﺑﻌﺪﻳﻦ ﺍﺫﻛﺮﺕ ﻓﻴﺪﻳﻮ ﻃﺮﻳﻒ ﺻﻮﺭﺗﻬﻮﻟﻬﻢ ﻭﻫﻤﺎ ﻳﻠﻌﺒﻮﺍ ﻉ ﺑﻮﻫﻢ ﻭﻳﺸﻴﻄﻨﻮﺍ ﻋﻠﻴﻪ ﻭﻫﻮ ﺭﺍﻗﺪ ..
ﻭﻛﻴﻒ ﻧﺎﺽ ﺑﻌﺪﻳﻦ ..
ﻗﻌﺪ ﻳﻜﺸﺦ ﻋﻠﻴﻬﻢ ﺑﻤﺰﺡ ..
ﻭﻫﻲ ﺗﻘﻮﻟﻪ " ﻻﻣﺎﺗﺨﻠﻌﺶ ﻋﻤﻮﺭﺓ .."
ﻭﻫﻮ ﻳﺮﺩ " ﻳﺎﺣﻨﻪ ﻋﻠﻴﺎ .."
ﻭﻳﺮﺟﻊ ﻳﻀﺮﺏ ﻓﻴﻬﻢ ﻭﻳﻜﺸﺦ ﺑﻤﺰﺡ .. ﻭﺍﻟﺼﻐﺎﺭ ﻳﻀﺤﻜﻮﺍ ..
ﺟﻮﺍﺩ ﻭﻟﺪ ﺍﻟﺴﻨﻪ ﻭﻣﻌﺎﻫﺎ ..
ﻭﻣﻌﻤﺮ ﻭﻟﺪ 8 ﺷﻬﻮﺭ ...
ﺗﻌﻠﻘﻬﻢ ﺑﺒﻮﻫﻢ ﻛﺒﻴﻴﻴﻴﺮ ...
ﻳﻔﺮﻓﺸﻮﺍ ﻋﻠﻴﻪ ﻓﺮﻓﺸﻪ ﻭﻳﻦ ﻳﺸﻮﻓﻮﻩ 💕
ﻭﻫﻲ ﺍﻛﺜﺮ ﻣﻨﻬﻢ 💓
ﻭﻗﻒ ﺍﻟﻔﻴﺪﻳﻮ ﻟﻤﺎ ﺟﺘﻬﺎ ﺭﺳﺎﻟﻪ ..
ﻃﻠﻌﺖ ﻣﻨﻪ ﻃﻮﻝ ﻭﻣﺸﺖ ﻓﺘﺤﺘﻬﺎ ..
❣ ﺍﺣﺪﻭﺩ ﻏﺎﻳﺘﻲ ﻳﺎﻓﺎﺭﻗﻪ ﻋﻦ ﺟﻴﻠﻚ
ﺍﻧﻤﻴﻌﺪ ﻣﻌﺎﻙ ﻭﻉ ﺍﻟﻐﻼ ﻧﺤﻜﻴﻠﻚ
❣ ﺍﺣﺪﻭﺩﺍﻟﻐﺎﻳﻪ ..
ﻣﻴﻌﺎﺩ ﻳﺠﻤﻌﻨﺎ ﻣﻊ ﺳﻬﺮﺍﻳﻪ .. ﻭﻧﻌﻄﻲ ﻭﻧﺎﺧﺪ ﻳﺎﺣﺪﻭﺩ ﻣﻨﺎﻳﺎ
ﺍﻣﻌﺎﻙ ﻓﻲ ﺍﻟﻐﻼ ﺗﺪﻭﻱ ﻭﺍﻧﻲ ﻧﺪﻭﻳﻠﻚ ..
ﻭﻧﺒﻮﺡ ﻋﻦ ﺣﺒﻲ ﻭﺳﺮ ﻏﻼﻳﺎ
ﻭﻣﺎﻟﺸﻮﻕ ﺗﺸﻜﻴﻠﻲ ﻭﺍﻧﻲ ﻧﺸﻜﻴﻠﻚ
ﻭﺍﺟﻤﻞ ﻗﺼﺎﻳﺪ ﺑﺎﻟﻐﺮﺍﻡ ﻣﻌﺎﻳﺎ
ﻧﻄﺮﻱ ﻋﻠﻴﻚ ﺍﺷﻌﺎﺭ ﻭﻧﻐﻨﻴﻠﻚ .. ﻭﻧﻮﺻﻒ ﺟﻤﺎﻟﻚ ﻭﺍﻟﺨﺪﻭﺩ ﻣﺮﺍﻳﺎ
ﺑﻴﻦ ﺍﻟﺒﻨﺎﺕ ﺍﻧﺘﻲ ﺍﻗﻼﻝ ﻣﺜﻴﻠﻚ .. ﺟﺒﻴﻨﻚ ﻭﺩﻭﺭﻙ ﻭﺍﻟﻌﻴﻮﻥ ﺣﻜﺎﻳﻪ
ﻭﻣﻀﺤﻚ ﻳﺸﻊ ﺑﻨﻮﺭ ﺿﻮﺍ ﻟﻴﻠﻚ
ﻟﻮ ﻛﺎﻥ ﻏﻴﺮ ﻣﻄﺮﺍﺣﻚ ﻳﺠﻲ ﻳﺎﻻﻳﺎ
ﻣﻦ ﻫﺐ ﺍﻟﺼﺒﺎﺡ ﻟﻐﻴﺒﺘﻪ ﻧﻄﺮﻳﻠﻚ
ﻭﻳﺎﻓﺎﺭﻗﻪ ﻋﻦ ﺟﻴﻠﻚ
ﻧﻤﻴﻌﺪ ﻣﻌﺎﻙ ﻭﻉ ﺍﻟﻐﻼ ﻧﺤﻜﻴﻠﻚ
ﺍﺣﺪﻭﺩ ﻏﺎﻳﺘﻲ ﻭﻭﺩﻱ ....
💓 ﺣﻀﻨﺖ ﺍﻟﺘﻠﻴﻔﻮﻥ ... ﻭﻫﻲ ﻣﻐﻤﻀﻪ ﻋﻴﻮﻧﻬﺎ ..
ﻭﺭﺍﻳﺤﻪ ﻓﻲ ﻋﺎﻟﻢ ﻓﺎﺭﺳﻬﺎ ﻭﻫﺎﻳﻤﻪ ﻓﻴﻪ ❤
ﺷﻮﻳﻪ ﻭﺑﻌﺪﺕ ﺍﻟﺘﻠﻴﻔﻮﻥ ..
ﻭﺑﻌﺘﺘﻠﻪ ﻭﻫﻲ ﺗﻀﺤﻚ ﺑﻔﺮﺡ ﺭﺳﺎﻟﻪ ..
ﻫﻮ ﻛﺎﻥ ﻳﺸﻮﻑ ﻟﻠﻤﻨﻈﺮ ﺍﻟﻄﺒﻴﻌﻲ ﺍﻟﻠﻲ ﻗﺪﺍﻣﻪ ﻭﺍﻟﺨﻀﺮﺓ ﺍﻟﻠﻲ ﻛﺎﻧﺖ ﻣﻘﺎﺑﻠﻪ ﺍﻟﻤﻘﻬﻰ ..
ﺟﺎﺗﻪ ﺭﺳﺎﻟﻪ ..
ﻃﻮﻝ ﺷﺎﻓﻬﺎ ....
" ﺗﻮﺣﺸﺘﻚ ﻣﻮﺕ .. ﻣﻌﺎﺵ ﻋﻨﺪﻱ ﺻﺒﺮ ﻟﻐﺪﻭﺓ "
ﺿﺤﻚ ﻭﺑﻌﺖ ..
" ﻭﺍﻧﻲ ﺍﻛﺜﺮ ﻳﺎﺭﻳﻤﻲ ﺍﻟﻔﺎﻟﻲ .. ﺑﺲ ﻫﺎﻧﺖ "
ﺍﺑﺘﺴﻤﺖ ﺑﺘﻨﻬﻴﺪﻩ ﻣﻦ ﺍﻷﻋﻤﺎﻕ 💓..
" ﻣﻌﻤﺮ ﺟﻌﺎﻥ .."
ﺷﺒﺤﺖ ﺟﻨﺒﻬﺎ ﻭﻫﻲ ﻣﺒﺘﺴﻤﻪ ﺑﻌﻴﻮﻥ ﺩﺑﻼﻧﻪ : ﺧﻴﺮﻩ؟
ﺍﻣﻴﻨﻪ ﺑﻀﺤﻜﻪ : ﺟﻌﺎﺍﺍﺍﻥ ﻳﺎﻫﻤﻲ .. ﻭﻟﻔﺖ ﻭﻣﺸﺖ ..
ﻫﻲ ﺿﺤﻜﺖ ﻭﻧﺎﺿﺖ .. ﻣﺘﻮﺟﻬﻪ ﻃﻮﻝ ﻟﻠﻤﻄﺒﺦ ﺑﺶ ﺍﺩﻳﺮ ﻟﻤﻌﻤﺮ ﻣﺎﻳﺎﻛﻞ ..
" ﻏﺎﻟﺒﺎ ﻟﻤﺎ ﻳﺴﺎﻓﺮ ﻋﻤﺎﺭ ﻳﻴﺠﻮﺍ ﻋﻨﺪﻫﺎ ﺍﻫﻠﻪ ﻳﺎﻫﻲ ﺗﻤﺸﻴﻠﻬﻢ "
🍁🍁🍁🍁🍁
ﻟﻬﺎﻟﻴﻮﻡ ﺍﻟﻨﺎﺱ ﻣﺎﻛﺎﻧﺘﺶ ﻣﻬﺘﻤﻪ ﻫﻠﺒﻪ ..
ﻟﺤﻜﺎﻳﻪ ﻣﻈﺎﻫﺮﺍﺕ ﻳﻮﻡ ...2\17
ﻏﺎﻟﺒﻴﺘﻬﻢ ﻣﺘﺄﻛﺪﻳﻦ ﺍﻥ ﻣﺴﺘﺤﻴﻞ ﻓﻲ ﻟﻴﺒﻲ ﺣﻴﻄﻠﻊ ﻉ ﺍﻟﻘﺬﺍﻓﻲ ..
ﻣﺶ ﺣﺒﺎ ﻓﻴﻪ ..
ﺑﻞ ﺧﻮﻓﺎ ..
ﻭﺑﻌﺪﻳﻦ ﺑﺼﺮﺍﺣﻪ ﺣﻨﻲ ﺷﻌﺐ ..
ﻧﻤﺸﻮﺍ ﺟﻨﺐ ﺍﻟﺤﻴﻂ
ﻻﻟﻴﻨﺎ ﻓﻲ ﺳﻴﺎﺳﻪ ﻭﻻﺣﺮﻳﺔ ﺭﺃﻱ ﻭﻻﻋﻨﺪﻧﺎ ﺍﻟﻮﻋﻲ ﺍﻟﻜﺎﻓﻲ ﺍﻟﻠﻲ ﻳﺨﻠﻴﻨﺎ ﻧﻔﻜﺮﻭﺍ ﻓﻴﻤﺎ ﻫﻮ ﺍﺑﻌﺪ ﻣﻦ ﺭﺟﻠﻴﻨﺎ ..
ﺍﻟﻤﻮﺍﻃﻦ ﺍﻟﻠﻴﺒﻲ ﺑﺴﻴﻂ ..
ﻋﻄﻴﻪ ﻣﺼﺪﺭ ﺩﺧﻞ ﻳﺨﻠﻴﻪ ﻳﺎﻛﻞ ﻭﻳﺸﺮﺏ ..
ﻭﻭﻳﻦ ﻳﺪﻙ ﺭﺍﺳﻪ ﻭﺧﻼﺹ .
ﻋﺎﻳﺸﻴﻦ ﻭﺍﻟﺴﻼﻡ ..
ﺑﺴﻄﺎﺀ ...
🍃 ﻭﻷﻧﻨﺎ ﺑﺴﻄﺎﺀ ... ﻟﻴﺒﻴﺎ ﻛﺎﻧﺖ ﺍﻛﺒﺮ ﻣﻦ ﺍﻥ ﺍﻣﺜﺎﻟﻨﺎ ﻳﻜﻮﻧﻮﺍ ﺷﻌﺐ ﻟﻴﻬﺎ 🍃
🍁 ﺑﺲ ﻃﺒﻌﺎ ..
ﻋﻨﺪ ﺍﻟﺰﻣﺮﺓ ﺍﻟﺤﺎﻛﻤﻪ ﺍﻟﻮﺿﻊ ﻣﺎﻛﺎﻧﺶ ﻫﻜﻲ ..
ﻛﺎﻥ ﻓﻲ ﺗﺸﺪﻳﺪﺍﺕ ﺍﻣﻨﻴﻪ ..
ﻭﻛﺎﻥ ﺍﻟﻜﻞ ﻣﺴﺘﻌﺪ ﻟﻴﻮﻡ ﺯﻱ ﻫﺪﺍ ..
ﺍﻟﻘﺬﺍﻓﻲ ...
ﺣﻨﺘﺨﻴﻞ ﺣﺎﻟﺘﻪ ﻭﻗﺘﻬﺎ ..
ﺗﻮﺗﺮ .. ﻗﻠﻖ .. ﺧﻮﻑ .. ﺭﻫﺒﻪ ..
ﻣﺘﺄﻛﺪﻩ ﺍﻧﻪ ﻛﺎﻥ ﺣﺎﺱ ﺑﺄﻧﻬﺎ ﺍﻟﻨﻬﺎﻳﻪ ...
ﻛﻞ ﺷﻲ ﻓﻲ ﻣﻼﻣﺤﻪ ﻟﻤﺎ ﻃﻠﻊ ﻗﺎﻝ ﺧﻄﺎﺏ ﺑﻌﺪ ﺳﻘﻮﻁ ﺯﻳﻦ ﺍﻟﻌﺎﺑﺪﻳﻦ .. ﻳﺒﻴﻦ ﺧﻮﻓﻪ ﻭﺍﺳﺘﺸﻌﺎﺭﻩ ﺍﻧﻬﺎ ﺍﻟﻨﻬﺎﻳﻪ ..
ﺑﻐﺾ ﺍﻟﻨﻈﺮ ﻋﻦ ﻛﻮﻧﻬﺎ ﻣﺆﺍﻣﺮﺓ ﻛﻮﻧﻴﻪ ..
ﺍﻭ ﻏﻴﺮﻫﺎ ..
ﺍﻟﻨﻬﺎﻳﻪ ﻓﻴﻬﺎ ﺧﻼﺹ ...
🍁🍁🍁🍁🍁
ﺗﺎﻧﻲ ﻳﻮﻡ ...
ﺍﻟﺴﺎﻋﻪ 11:00 ﺻﺒﺎﺣﺎ ..
ﻃﻠﻌﺖ ﺗﺠﺮﻱ ﻟﻠﻮﺍﺟﻬﻪ ...
ﻭﺻﻠﺖ ﻓﻴﻬﺎ .. ﻗﻌﺪﺕ ﺍﺩﻭﺭ ﺑﻌﻴﻮﻧﻬﺎ .. ﻟﻴﻦ ﺷﺎﻓﺘﻬﺎ ﻣﺸﺘﻠﻬﺎ ﻃﻮﻝ ..
ﻭﻗﻔﺖ ﻋﻠﻴﻬﺎ ..
ﺭﺍﻧﻴﺎ ﺑﻀﺤﻜﺔ ﻓﺮﺡ ﻭﻫﻲ ﺩﺍﻫﺸﻪ : ﻋﺮﻭ .. ﺑﻪ ..
ﺿﺤﻜﺖ ﻋﺮﻭﺑﻪ ﻉ ﺣﺎﻟﺘﻬﺎ ..
ﺑﻌﺪﻳﻦ ﺳﻠﻤﺖ ﻋﻠﻴﻬﺎ ﺑﺎﻟﺨﺪ ﻭﺳﺄﻟﻮﺍ ﻋﻦ ﺍﺣﻮﺍﻝ ﺑﻌﺾ ..
ﺑﻌﺪﻫﺎ ﺭﺍﻧﻴﺎ ﻗﺎﻟﺖ
" ﻭﻳﻨﻪ "!!
ﻋﺮﻭﺑﻪ ﺑﻀﺤﻜﻪ : ﻣﺶ ﻫﻨﻰ .. ﺗﻌﺎﻟﻲ ﻣﻌﺎﻱ ..
ﺧﺪﺗﻬﺎ ﻣﻦ ﻳﺪﻫﺎ ﻭﻣﺸﻮﺍ ﻣﻊ ﺑﻌﺾ ..
ﻭﺧﻔﻘﺎﺕ ﻗﻠﺐ ﺭﺍﻧﻴﺎ ﺍﺷﺒﻪ ﺑﻀﺮﺑﺎﺕ ﺍﻟﻤﺪﺍﻓﻊ ﻣﻦ ﻗﻮﺗﻬﺎ ..💓
ﻗﻌﺪﻭﺍ ﻳﻤﺸﻮﺍ ﻣﺴﺎﻓﻪ .. ﻟﻌﻨﺪ ﻭﺻﻠﻮﺍ ﻟﻤﻜﺎﻥ ..
ﻛﺎﻥ ﻓﻴﻪ ﻛﺮﺍﺳﻲ ﻃﻮﺍﻝ ..
ﻓﻴﻬﻢ ﻭﺍﺣﺪ ﻣﻘﻌﻤﺰ ﻋﺎﻃﻲ ﺑﺎﻟﻈﻬﺮ ..
ﻻﺑﺲ ﻛﺒﻮﻁ ﻃﻮﻳﻞ ﺷﻮﻱ ﻟﻌﻨﺪ ﻓﻮﻕ ﺍﻟﺮﻛﺒﻪ ..
ﻭﻓﻴﻪ ﺑﺮﻧﻮﺹ ..
ﻋﺮﻭﺑﻪ : ﻫﻮﻳﻨﺎ .. ﺍﺷﺮﺗﻠﻬﺎ ﻋﻠﻴﻪ ..
ﺭﺍﻧﻴﺎ ﻗﻌﺪﺕ ﺗﺸﻮﻓﻠﻪ ﻭﻗﻠﺒﻬﺎ ﺑﻴﻄﻠﻊ ﻣﻦ ﺻﺪﺭﻫﺎ ﻭﻳﻤﺸﻴﻠﻪ ..
ﻭﺍﻟﺪﻣﻮﻉ ﻋﺒﻮﺍ ﺍﻟﻌﻴﻦ ..
ﺍﻧﺴﺤﺒﺖ ﻋﺮﻭﺑﻪ ﻭﺑﻌﺪﺕ ﺷﻮﻳﻪ ﺑﺲ ﻗﻌﺪﺕ ﻣﻌﺎﻫﻢ ﻓﻲ ﻧﻔﺲ ﺍﻟﻤﻜﺎﻥ ..
ﺗﺸﻮﻑ ﻟﺮﺍﻧﻴﺎ ﻭﻫﻲ ﺗﻘﺪﻡ ..
ﻗﻠﺐ ﻋﺮﻭﺑﻪ ﻛﺎﻥ ﻳﺪﻕ ﺑﻘﻮﺓ .. ﺣﺴﺖ ﺍﻟﻤﻮﻗﻒ ﺗﻘﻮﻝ ﻫﻲ ﺭﺍﻧﻴﺎ ..
ﻭﺻﻠﺖ ﺭﺍﻧﻴﺎ ﻓﻴﻪ ..
ﻣﻴﻠﺖ ﺭﺍﺳﻬﺎ ﺗﺒﻲ ﺗﺸﻮﻑ ﻭﺟﻬﻪ ...
ﻛﺎﻥ ﻣﺮﺑﻲ ﻟﺤﻴﻪ .. ﺑﺲ ﻃﺎﻟﻊ ﻓﻴﻬﺎ ﻳﻘﺘﻞ ..
ﻫﻲ ﻣﺎﻛﺎﻧﺘﺶ ﺗﺤﺒﻪ ﻳﺮﺑﻴﻬﺎ .. ﻷﻥ ﻳﺰﻳﺪ ﺑﻴﻬﺎ ﻭﺳﺎﻣﻪ .. ﻭﻫﻲ ﺗﻤﻮﺕ ﻣﻦ ﺍﻟﻐﻴﺮﻩ ﻋﻠﻴﻪ ..
ﻫﻲ ﻣﻦ ﻏﻴﺮ ﻟﺤﻴﻪ ﻣﺶ ﺧﺎﻟﺼﻪ 💕
ﻗﺎﻟﺖ ﺑﺼﻮﺕ ﻳﺪﻭﺏ ﻃﻠﻊ ..
" ﺭﻣﺰﻱ "
ﻫﻮ ﻏﻤﺾ ﻋﻴﻮﻧﻪ ...
ﻛﺎﻥ ﻳﺴﻤﻊ ﻓﻲ ﺗﺮﺩﺩ ﺍﺳﻤﻪ ﺑﺼﻮﺗﻬﺎ ﻓﻲ ﻭﺫﻧﻪ ..
ﻭﻛﺎﻥ ﻳﺤﺲ ﺑﺸﻌﻮﺭ ﺭﻫﻴﺐ ﻣﺨﺘﻠﻂ 💓..
ﻋﺸﻖ .. ﺷﻮﻕ .. ﻟﻬﻔﻪ ... ﺃﻟﻢ ..
ﺍﻳﻪ ﺍﻟﻢ ... ﻷﻥ ﻫﺎﻟﻠﻘﺎﺀ ﻣﺤﺪﻭﺩ ﺑﻮﻗﺖ ..
ﺳﻴﻮﺭﻩ ﻳﺘﻢ ﻭﻳﺮﺟﻌﻮﺍ ﻳﺘﻔﺎﺭﻗﻮﺍ ..
ﻭﺍﻟﻠﻪ ﺃﻋﻠﻢ ﺍﻣﺘﻰ ﻳﺼﻴﺮ ﻭﺻﻞ ﺟﺪﻳﺪ ..
ﺭﺍﻧﻴﺎ ﺑﺼﻮﺕ ﻳﺮﺟﻒ : ﻋﻼﺵ .. ﺩﺭﺕ ﻟﺤﻴﻪ ! ؟
ﻓﺘﺢ ﻋﻴﻮﻧﻪ ﻭﺷﺒﺢ ﺍﻳﻤﻴﻨﻪ ﻭﻗﺎﻝ : ﺗﻮ ﻫﺪﻯ ﻛﻼﻡ ﻳﻨﻘﺎﻝ ﻓﻤﻮﻗﻒ ﻛﻴﻒ ﻫﺪﻯ؟ !
ﺭﺍﻧﻴﺎ ﺑﺪﻣﻮﻉ ؛ﺍﻳﻪ ﻣﺎﻫﻮ ﻣﺎﺻﺪﻗﺖ ﺷﻜﻠﻚ ﺍﻓﺘﻜﻴﺖ ﻣﻨﻲ ﺑﺶ ﻣﺸﻴﺖ ﺩﺭﺕ ﻉ ﺣﻞ ﺷﻌﺮﻙ ..
ﺭﻣﺰﻱ : ﻫﻬﻬﻬﻬﻬﻬﻬﻬﻬﻬﻬﻪ ..
ﺭﺍﻧﻴﺎ ﻭﺩﻣﻮﻋﻬﺎ ﻳﻨﺰﻟﻮﺍ ﻭﻫﻲ ﺗﻘﺪﻣﻠﻪ : ﻋﺼﺐ ﻋﻠﻴﺎ ﻋﺎﺭﻛﻨﻲ ..
ﺍﺳﺘﺎﺣﺸﺖ ﻧﺸﺎﻓﻚ ﻭﺗﻜﺸﻴﺨﻚ ﻋﻠﻴﺎ .. ﻳﺎﺭﻳﺖ ﻧﻘﻌﺪ ﻃﻮﻝ ﻋﻤﺮﻱ ﻋﺎﻳﺸﻪ ﻣﻌﺎﻙ ﻓﻲ ﺍﻟﻨﺸﺎﻓﺎﺕ .. ﻭﺍﻟﻌﺮﺍﻳﻚ .. ﻋﺎﺩﻱ ﺭﺍﺿﻴﻪ .. ﺍﻟﻤﻬﻢ ﻧﻘﻌﺪ ﻣﻌﺎﻙ .. ﻣﺎﻧﺒﻲ ﺷﻲ ﻏﻴﺮ ﻫﻜﻲ ﻭﺍﻟﻠﻪ ﻣﺎﻧﺒﻲ ..
ﺣﻄﺖ ﺍﻳﺪﻳﻬﺎ ﻋﻠﻰ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ..
ﻫﻮ ﻗﻠﺒﻪ ﻳﺘﻤﺰﻕ ﺗﻤﺰﻳﻖ 💔..
ﺣﻂ ﺍﻳﺪﻳﻪ ﻉ ﻭﺟﻬﻪ ﺑﻌﺪ ﺯﻓﺮ ﺑﻘﻮﺓ ﻭﻗﺎﻝ ﺑﺼﻮﺕ ﻣﻜﺘﻮﻡ ﺑﺤﺮﻗﻪ ..
" ﺁﺍﺍﺍﻩ ﻳﺎﺭﺑﻲ "💔
🍁 ﻋﺮﻭﺑﻪ ﺗﺸﻮﻓﻠﻬﻢ ﻭﺩﻣﻮﻋﻬﺎ ﻳﻨﺰﻟﻮﺍ ..
ﺣﺎﻃﻪ ﻳﺪﻫﺎ ﻉ ﺻﺪﺭﻫﺎ .. ﻭﺣﺎﺳﻪ ﺑﻀﻴﻖ ﺷﺪﻳﺪ ...
🍃 ﺣﺎﻝ ﺭﻣﺰﻱ ﻭﺭﺍﻧﻴﺎ ﺫﻛﺮﻧﻲ ﺑﺄﻏﻨﻴﺔ ﻟﺤﺴﻴﻦ ﺍﻟﺠﺴﻤﻲ ..
ﺍﻟﻠﻪ ﻳﺎﺧﺬﻙ ﻣﻨﻬﻢ ... ﻭﻻ ﻳﺎﺧﺪﻧﻲ ﻣﻦ ﻳﺪﻙ ..
ﻭﻻ ﻳﺎﺧﺪ ﻏﻼﻙ ﻭﻋﻤﺮﻙ ﺍﻟﺒﺎﻗﻲ ﻭﺗﺒﻘﺎﻟﻲ ..
ﻭﺵ ﺍﻳﺎﻣﻲ ﺑﺪﻭﻧﻚ ﻭﺵ .. ﺑﻌﺪ ﻋﻤﺮﻱ ﺑﻼ ﻭﺩﻙ ..
ﺗﺮﺍﻙ ﺍﻏﻠﻰ ﺑﺸﺮ ﻋﻨﺪﻱ .. ﻭﻻ ﻏﻴﺮﻙ ﺍﺑﺪ ﻏﺎﻟﻲ 🍃💕...
🍁 ﻗﻌﺪ ﻳﺸﺒﺤﻠﻬﺎ ..
ﻣﺪ ﻳﺪﻩ ﻭﻗﺎﻝ : ﺭﻧﺮﻭﻧﻪ .. ﻗﻠﺒﻲ ..
ﺣﻮﻟﺖ ﺍﻳﺪﻳﻬﺎ ﻣﻦ ﻉ ﻭﺟﻬﻬﺎ ﻭﺷﺒﺤﺘﻠﻬﺎ ..
ﺭﻣﺰﻱ : ﻗﻌﻤﺰﻱ ﺣﺪﺍﻱ ..
ﺷﺎﻓﺖ ﺍﻳﺪﻩ .. ﺣﻄﺖ ﻳﺪﻫﺎ ﻓﻴﺪﻩ ..
ﻫﻮ ﺷﺪﻫﺎ ﺑﻘﻮﺓ ..
ﻗﻌﻤﺰﻫﺎ ..
ﻭﺑﻴﻨﺎﺗﻬﻢ ﻣﺴﺎﻓﻪ .. ﻟﻜﻦ ﻗﺎﻋﺪﻩ ﻳﺪﻫﺎ ﻓﻴﺪﻩ ..
ﺭﻣﺰﻱ : ﻳﺎﺍﺍﻩ ﻳﺎﻋﻨﺰ ﻗﺪﻳﺶ ﺍﺳﺘﺎﺣﺸﺘﻚ 💓
ﻫﻲ ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ؛ﻳﺎﺛﻮﺭ ..
ﺿﺤﻚ ﻭﻗﺎﻝ : ﻫﺒﻠﻪ ..
ﺭﺍﻧﻴﺎ : ﻣﻄﺮﺷﻖ ..
ﺿﺤﻚ .. ﺑﻌﺪﻳﻦ ﺍﺑﺘﺴﻢ ﻭﻗﺎﻝ : ﺷﻨﻮ ﺣﺎﻟﻚ ..
ﺭﺍﻧﻴﺎ ﺑﺄﻟﻢ : ﺭﻣﺰﻱ ﻣﺎﺗﺴﺄﻟﻨﻴﺶ ﻋﻦ ﺣﺎﻟﻲ ﻣﻦ ﻏﻴﺮﻙ .
ﻫﻮ ﻋﻴﻮﻧﻪ ﺗﻌﺒﻮﺍ ﺩﻣﻮﻉ ...
ﻏﻴﺮﻫﻢ ﻋﻨﻬﺎ ..
ﺭﺍﻧﻴﺎ : ﻭﺍﻟﻠﻪ ﻭﻻ ﺛﺎﻧﻴﻪ ﻭﺍﻟﻠﻪ ﺍﻟﻌﻈﻴﻢ ﻭﻻﺛﺎﻧﻴﻪ ﻓﺎﺭﻗﺖ ﻋﻘﻠﻲ ﻭﻗﻠﺒﻲ .. ﻭﺍﻟﻠﻪ ﻳﺎﺭﻣﺰﻱ ﺍﻧﻲ ﻣﻦ ﻏﻴﺮﻙ ﻧﺎﻗﺼﻪ .. ﺍﻧﻲ ﻣﻦ ﻏﻴﺮﻙ ﺷﻲ ﻭﻻﺷﻲ ..
ﻟﻒ ﻭﺟﻬﻪ ﻟﻠﺠﻬﻪ ﺍﻟﺘﺎﻧﻴﻪ ﻭﻗﻌﺪ ﻳﻤﺴﺢ ﻓﺪﻣﻮﻋﻪ ﺍﻟﻠﻲ ﻳﻨﺰﻟﻮﺍ ..
ﺭﺍﻧﻴﺎ ﻭﺩﻣﻮﻋﻬﺎ ﻳﻨﺰﻟﻮﺍ : ﻧﺪﻋﻲ ﻟﺮﺑﻲ ﻓﻲ ﻛﻞ ﻭﻗﺖ ﻧﻜﻮﻧﻮﺍ ﻟﺒﻌﺾ ﻓﻲ ﻛﻞ ﻭﻗﺖ .. ﻭﺣﺘﻰ ﺍﻧﺖ .. ﺩﻳﺮ ﻫﻜﻲ ..
ﺍﻧﻲ ﻣﻠﻚ ﻟﺮﺑﻲ ... ﺍﻃﻠﺒﻨﻲ ﻣﻨﻪ ... ﺩﻳﻤﺎ ﻗﻮﻟﻪ ﻳﺎﺭﺑﻲ ﺍﺭﺯﻗﻨﻲ ﺭﺍﻧﻴﺎ ..
ﺭﻣﺰﻱ : ﺧﻼﺹ ﻳﺎﺑﻨﺖ .. ﻗﻄﻌﺘﻴﻨﻲ ..
ﺭﺍﻧﻴﺎ ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ ﻭﻗﺎﻟﺖ : ﺑﺎﻫﻲ .. ﺗﻮ ﻧﻀﺤﻜﻚ ..
ﻣﺮﺓ ﻓﻲ ﻭﺍﺣﺪ ﻟﻴﺒﻲ ﺗﻌﺮﻑ ﻉ ﻭﺣﺪﻩ ﻣﺼﺮﻳﻪ ﺑﺎﻫﻲ ..
ﻫﻮ ﺿﺤﻚ ..
ﺿﺤﻜﺖ ﻭﻗﺎﻟﺖ .. ﺍﻟﻤﻬﻢ .. ﻗﺎﻟﻠﻬﺎ ﺷﻦ ﺗﻘﺮﻱ .. ﻗﺎﻟﺘﻠﻪ ﺍﻧﺎ ﺑﻘﺮﺍ ﻓﻲ ﻛﻠﻴﻪ ﺍﻟﺰﺭﺍﻋﻪ .. ﻭﺍﻧﺖ ... ﺿﺤﻜﺖ ﻭﻗﺎﻟﺖ .. ﻗﺎﻟﻠﻬﺎ ﺍﻧﺎ ﺛﻮﺭ ﻓﻲ ﻛﻠﻴﺔ ﺍﻟﺰﺭﺍﻋﻪ ..
ﻣﺴﺢ ﺩﻣﻮﻋﻪ ﻭﺷﺒﺤﻠﻬﺎ ﻭﻫﻮ ﻳﻀﺤﻚ .. ﻭﻫﻲ ﺗﻀﺤﻚ ﻣﻌﺎﻩ ..
ﺑﻌﺪﻳﻦ ﻗﺎﻟﺖ : ﻧﻜﺘﻪ ﺧﺎﻟﺘﻲ ﻏﺎﻟﻴﻪ ﺍﻟﻤﻔﻀﻠﻪ ..
ﺭﻣﺰﻱ ﺑﻀﺤﻜﻪ : ﻣﻦ ﻭﺣﻨﻲ ﺻﻐﺎﺭ ﻭﻳﻦ ﻧﻘﻮﻟﻮﻟﻬﺎ ﻗﻮﻟﻲ ﻧﻜﺘﻪ ﺗﻘﻮﻟﻬﺎ ﻫﻲ ﻃﻮﻝ ..
ﺿﺤﻜﻮﺍ ﺍﻟﺰﻭﺯ ...
ﻭﻫﻮ ﻳﺸﺪ ﻉ ﻳﺪﻫﺎ ﺑﻘﻮﺓ .. ﻭﻫﻲ ﻧﻔﺲ ﺍﻟﺸﻲ ❤..
ﺭﻥ ﺗﻠﻴﻔﻮﻥ ﺭﻣﺰﻱ ..
ﻏﻤﺾ ﻋﻴﻮﻧﻪ ﻭﻓﺘﺤﻬﻢ ﻃﻠﻌﻪ ﻣﻦ ﺟﻴﺐ ﺍﻟﻜﺒﻮﻁ ...
ﻣﻼﻣﺢ ﻭﺟﻬﻪ ﺗﺒﺪﻟﺖ ﻟﻠﺤﺰﻥ ﻟﻤﺎ ﻟﻘﻲ ﺍﻟﻤﺘﺼﻞ ﻋﻤﻪ ..
ﺗﻨﻬﺪ ﺑﺄﻟﻢ ..
ﻫﻲ ﺷﺒﺤﺘﻠﻪ ﺑﻀﻴﻖ ﺷﺪﻳﺪ : ﺧﺎﻟﻲ؟ !
ﻫﺰ ﺭﺍﺳﻪ ﺑﺈﺑﺠﺎﺏ ..
" ﺭﺍﻧﻴﺎ .."
ﺗﻠﻔﺘﺖ ﻟﻌﺮﻭﺑﻪ ﺍﻟﻠﻲ ﺍﺷﺮﺗﻠﻬﺎ ﺑﻴﺪﻫﺎ ﺑﻤﻌﻨﻰ ﻫﻴﺎ ..
ﺻﺪﺭﻫﺎ ﺍﻧﻐﻢ ...
ﻫﻮ ﺷﺒﺤﻠﻬﺎ ﺷﺪ ﻉ ﻳﺪﻫﺎ ..
ﻫﻲ ﺷﺒﺤﺘﻠﻪ ﻭﺣﻄﺖ ﻳﺪﻫﺎ ﺍﻟﺘﺎﻧﻴﻪ ﻉ ﻳﺪﻩ ..
ﺭﻣﺰﻱ : ﻭﻋﺪ ﻳﺎﺭﺍﻧﻴﺎ ﻭﻋﺪ ﻣﻬﻤﺎ ﻳﺪﻳﺮﻭﺍ ﻓﻴﻪ ﻣﺎﺗﺮﺧﻲ ﺑﺤﺒﻲ ﻟﻴﻚ ..
ﺭﺍﻧﻴﺎ : ﻟﻮ ﻛﺎﻥ ﻧﻤﻮﺕ ﻳﺎﺭﻣﺰﻱ ﻣﺎﻧﺪﻳﺮﻳﻬﺎ ..
ﺭﻣﺰﻱ : ﺑﻌﻴﺪ ﺍﻟﺴﻮ ﻉ ﻗﻠﺒﻲ ﺍﻧﻲ 💓
ﺿﺤﻜﺖ ﺑﺄﻟﻢ ...
ﺭﻥ ﺗﻠﻴﻔﻮﻥ ﺭﻣﺰﻱ ﻣﻦ ﺟﺪﻳﺪ ..
ﻏﺼﺐ ﻋﻨﻪ .. ﺟﺒﺪ ﻳﺪﻩ ﻣﻦ ﻳﺪﻫﺎ ... ﻭﻫﻮ ﺗﻘﻮﻝ ﻳﻘﻄﻌﻮﺍ ﻓﻴﻪ ﺑﺴﻜﺎﻛﻴﻦ ...
ﻭﻫﻲ ﺗﻘﻮﻝ ﺭﻭﺣﻪ ﺗﻨﺠﺒﺪ ﻣﻨﻬﺎ ..
ﻧﺎﺽ ﺑﺴﺮﻋﻪ ..
ﻭﻫﻲ ﻧﺎﺿﺖ ﻭﻫﻲ ﺗﺸﻮﻓﻠﻪ ..
ﻟﺒﺲ ﻧﻈﺎﺭﺍﺗﻪ ﻭﻗﺎﻝ : ﺭﺩﻱ ﺑﺎﻟﻚ ﻣﻦ ﺭﻭﺣﻚ ..
" ﺧﻠﻴﻨﻲ ﺩﻳﻤﺎ ﻓﻲ ﺑﺎﻟﻚ "
ﻫﻲ ﻗﻠﺒﻬﺎ ﺍﻧﻘﺒﺾ ﺑﻘﻮﺓ ..
ﻃﻮﻝ ﻣﺸﻲ ﻣﻦ ﺣﺪﺍﻫﺎ ﻭﻫﻮ ﻫﺎﺭﺏ ﻣﻦ ﻟﺤﻈﻪ ﻓﺮﺍﻕ ﺍﺟﺒﺎﺭﻱ ...
ﻭﻳﺎﻣﺼﻌﺒﻪ ﻣﻦ ﻓﺮﺍﻕ ..
ﻫﻲ ﻣﻌﺎﻩ ﺑﻌﻴﻮﻧﻬﺎ ﻭﺩﻣﻮﻋﻬﺎ ﺗﻨﺰﻝ ﺑﻐﺰﺍﺭﺓ ...
ﺟﺘﻬﺎ ﻋﺮﻭﺑﻪ ﻃﻮﻝ .. ﻭﺣﻀﻨﺘﻬﺎ ...
ﻭﺭﺍﻧﻴﻪ ﺍﻧﻬﺎﺭﺕ ﺑﺎﻟﺒﻜﻲ ...
ﻋﺮﻭﺑﻪ ﺑﺪﻣﻮﻉ : ﻣﻌﻠﻴﺸﻲ ﺣﺒﻴﺒﺘﻲ 💔...
🍃 ﻣﺎﺣﺪ ﻳﺤﺲ ﺑﻴﻚ ﻏﻴﺮ ﺍﻟﻠﻲ ﻋﺎﺵ ﻧﻔﺲ ﺍﻟﻠﻲ ﻋﺸﺘﻪ 🍃..
ﺍﻩ ﺑﺲ ﻳﺎﺭﺍﻧﻴﺎ ﻟﻮ ﺗﻌﺮﻓﻲ ﺍﻧﻚ ﻣﻌﺎﺵ ﺑﺘﺸﻮﻓﻲ ﺭﻣﺰﻱ ﺑﻌﺪ ﻫﺎﻟﻘﺎﺀ ﻷﺟﻞ ﻏﻴﺮ ﻣﺴﻤﻰ 🍃💔
🍃🍃🍃🍃
ﺍﻟﺴﺎﻋﻪ 3:30 ﺑﻌﺪ ﺍﻟﻈﻬﺮ ...
ﺩﺭﺳﺖ ﺳﻴﺎﺭﺓ ﻋﻤﺮ ﺍﻟﻠﻲ ﺧﺸﺖ ﻣﻦ ﺍﻟﺒﻮﺍﺑﻪ ﺍﻟﺨﻠﻔﻴﻪ ﻟﻠﻘﻄﻌﻪ ..
ﻭﻧﺰﻟﺖ ﻣﻨﻬﺎ ﻏﺎﻟﻴﻪ ﺍﻟﻠﻲ ﻛﺎﻥ ﻣﺮﻭﺡ ﺑﻴﻬﺎ ﻣﻦ ﻋﻤﻠﻬﺎ ﻓﻲ ﺍﻟﻌﻴﺎﺩﻩ ..
" ﺗﺨﺪﻡ ﺗﻼﺗﻪ ﺍﻳﺎﻡ ﻓﻲ ﺍﻷﺳﺒﻮﻉ .."
ﻫﻲ ﻣﺸﺖ ﻭﻋﻤﺮ ﺗﺤﺮﻙ ..
ﻉ ﻃﻠﻌﺖ ﺣﺴﻦ ﻭﻟﺪ ﻋﻤﻬﻢ ﻣﻦ ﺍﻟﺤﻮﺵ .. ﺭﻱ ﻏﺎﻟﻴﻪ ﻭﻫﻲ ﺗﻤﺸﻲ ..
ﻗﻌﺪ ﻣﺮﻛﺰ ﻣﻌﺎﻫﺎ ﻟﻴﻦ ﺧﺸﺖ ﻟﻤﻤﺮ ﻓﻢ ﺍﻟﺒﻮﺍﺑﻪ ..
ﻗﻌﺪ ﻳﻔﻜﺮ ﺷﻮﻳﻪ ..
ﺑﻌﺪﻳﻦ ﺍﺑﺘﺴﻢ ﻭﻣﺸﻲ ﻟﺴﻴﺎﺭﺗﻪ ..
🍁🍁🍁🍁
ﻓﻲ ﺣﻮﺵ ﺷﻴﺎﺑﻴﻨﻬﺎ ..
ﺟﺎﻳﻪ ﻫﻲ ﻭﺑﻨﺘﻬﺎ ﻟﺠﺪﺍﻫﺎ ﺍﻟﻠﻲ ﻗﺎﻟﺖ ﺍﻧﻬﺎ ﺍﺳﺘﺎﺣﺸﺘﻬﺎ ..
ﺳﺎﻟﻤﻪ : ﻣﺎﻫﻴﺶ ﺳﻤﺤﻪ ﻛﻴﻒ ﺑﻮﻫﺎ ..
ﺣﻤﻴﺪﻩ ﺑﻀﺤﻜﻪ : ﺍﻟﻠﻪ ﻏﺎﻟﺐ ﻃﻠﻌﺘﻠﻲ ..
ﺷﺒﺤﻠﻬﺎ ﺑﺤﺪﻩ؛ﺗﺘﺴﻬﻮﻛﻲ ! ؟ .
ﺣﻤﻴﺪﻩ ﺑﻀﺤﻜﻪ : ﻻﻻ ﺍﺑﺪﺍ .. ﻏﻴﺮ ﺍﻛﺪﺕ ﻛﻼﻣﻚ ﺑﺲ ..
ﺷﺒﺤﺘﻠﻬﺎ ﻣﻦ ﻓﻮﻕ ﻟﻠﻮﻃﺎ ﺑﻌﺪﻳﻦ ﻗﻌﺪﺕ ﺗﺸﺒﺢ ﻟﺤﻔﻴﺪﺗﻬﺎ ﻭﻫﻲ ﺗﺴﺤﻦ ﻣﻦ ﺑﺮﻭﺩ ﺣﻤﻴﺪﻩ ..
ﻭﺣﻤﻴﺪﻩ ﺷﺎﺩﻩ ﺿﺤﻜﺘﻬﺎ ﻭﻫﻲ ﺗﺸﻘﻠﺐ ﻓﻌﻴﻮﻧﻬﺎ ..
ﺳﺎﻟﻤﻪ : ﺑﺪﺍﻝ ﺍﻟﺘﺴﻬﻮﻳﻚ ﺍﻟﻔﺎﺭﻍ .. ﺷﺪﻱ ﻟﺮﻭﺣﻚ ﻭﺟﻴﺒﻲ ﺑﻌﺪﻫﺎ ﻭﻟﺪ ﻣﺎﻧﻘﻌﺪﻭﺍ ﻧﺮﺍﺟﻮ ﺍﻟﺴﻨﻴﻦ .. ﺍﻧﺘﻲ ﺍﺻﻼ ﺧﻼﺹ ﺣﺘﻰ ﻭﻗﺖ ﻣﻌﺎﺩ ﻋﻨﺪﻙ .. ﺭﺩﻱ ﺑﺎﻟﻚ ..
ﺗﻘﻮﻝ ﻓﻲ ﻛﻼﻣﻬﺎ ﻫﺪﺍ ﻭﻫﻲ ﺗﺸﻮﻑ ﻟﺤﻔﻴﺪﺗﻬﺎ ﻭﺗﻼﻋﺐ ﻓﻴﻬﺎ ﺑﺤﺮﻛﺎﺕ ﺍﻟﻮﺟﻪ ...
ﻭﻧﺠﺤﺖ ... ﻓﻲ ﺍﻧﻬﺎ ﺗﻨﻜﺪ ﻉ ﺣﻤﻴﺪﻩ ..
🍁🍁🍁🍁🍁
ﺍﻟﺴﺎﻋﻪ 5:30 ﻋﺼﺮﺍ ..
ﺩﺭﺳﺖ ﺳﻴﺎﺭﺗﻪ ﻗﺪﺍﻡ ﺣﻮﺵ ﺻﺎﺣﺒﻪ ..
ﻟﻤﺎ ﻧﺰﻝ ...
ﺟﺖ ﻋﻴﻨﻪ ﻉ ﺑﺎﺏ ﺣﻮﺵ ﺍﻟﺠﻴﺮﺍﻥ ﺍﻟﻠﻲ ﻃﻠﻌﺖ ﻣﻨﻪ ﻭﺣﺪﻩ ..
ﺧﻠﺖ ﻗﻠﺒﻪ ﻳﺨﻔﻖ ﺑﺸﺪﺓ ..
ﻳﺸﻮﻓﻠﻬﺎ ﺑﺤﻮﺍﺣﺐ ﻣﺮﻓﻮﻋﻪ ﺗﺤﺘﻬﻢ ﻋﻴﻮﻥ ﺟﺎﺣﻈﻪ ..
ﻗﻌﺪ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﺭﻛﺒﺖ ﺳﻴﺎﺭﺗﻬﺎ ..
ﻫﻮ ﻃﻮﻝ ﻭﻻ ﻭﺭﻛﺐ ﺳﻴﺎﺭﺗﻪ ..
ﺗﺤﺮﻛﺖ ﺳﻴﺎﺭﺗﻬﺎ ...
ﺗﺤﺮﻙ ﻃﻮﻝ ﻭﺭﺍﻫﺎ ﻣﻦ ﻗﺪﺍﻡ ﺣﻮﺵ ﺻﺎﺣﺒﻪ ﺍﻟﻠﻲ ﻃﻠﻊ ﻣﻨﻪ ﻓﻲ ﻧﻔﺲ ﺍﻟﻠﺤﻈﻪ
ﻫﺎﻧﻴﺒﺎﻝ ..
ﺍﻟﻠﻲ ﺗﻮﺟﻪ ﻟﺴﻴﺎﺭﺗﻪ ﺣﺘﻰ ﻫﻮ ..
ﻓﺘﺤﻬﺎ .. ﺭﻛﺐ .. ﺷﻐﻠﻬﺎ ﻭﻃﻮﻝ ﺗﺤﺮﻙ ﺑﺈﺗﺠﺎﻩ ﺍﻟﻤﺼﻮﺭ ..
🍁🍁🍁🍁
ﺗﺘﻜﻠﻢ ﻓﻲ ﺍﻟﺘﻠﻴﻔﻮﻥ ﺑﻌﺼﺒﻴﻪ : ﻋﻴﻠﻪ ﻭﺗﺎﻓﻬﻪ ﻳﺎﻟﻴﻠﻰ ..
ﻟﻴﻠﻰ : ﻣﺼﺼﺢ ﻭﺟﻬﻚ ﻳﺎﺣﻘﻴﺮﺓ ﻭﻟﻴﻚ ﻋﻴﻦ ﺗﺘﻜﻠﻤﻲ ﺍﻧﺘﻲ ﻟﻴﻚ ﻋﻴﻦ ﺣﺘﻰ ﺗﺘﺼﻠﻲ ﺑﻴﺎ ﻳﺎﻓﺎﺳﺪﻩ ..
ﻟﻤﻴﺎﺀ : ﻭﺍﻟﻠﻪ ﻣﺎﻓﻲ ﻓﺎﺳﺪﻩ ﻏﻴﺮﻙ ﺍﻟﻠﻲ ﻣﺎﺷﻴﻪ ﺗﺄﻟﻔﻲ ﻋﻠﻴﺎ ﻗﺼﺺ ﻓﻲ ﺍﻟﻌﻴﻠﻪ ﻭﺗﻘﻮﻟﻲ ﻓﻜﻼﻡ ﻣﺎﺻﺎﺭ ﻣﻨﻪ ﺷﻲ ..
ﻟﻴﻠﻰ : ﺑﺎﻟﻠﻪ ﻋﻠﻴﻚ ..!! ﺍﻗﺴﻢ ﺑﺎﻟﻠﻪ ﻓﺤﻴﺎﺗﻲ ﻣﻤﺮ ﻋﻠﻴﺎ ﺣﺪ ﺑﻮﻗﺎﺣﺘﻚ ﻭﻭﻗﺎﺣﺘﻪ .. ﻗﺎﻟﻲ ﻋﺮﻓﺘﻬﺎ ﺑﻌﺪﻙ ﻭﺣﺒﻴﺘﻬﺎ .. ﻣﻨﻲ .. ﺑﻨﺖ ﺧﺎﻟﻲ ﺍﻟﻠﻲ ﻛﻨﺖ ﺣﺎﺳﺒﺘﻬﺎ ﺍﺧﺘﻲ .. ﺍﻟﻠﻲ ﻋﻄﻴﺘﻬﺎ ﺍﻟﺜﻘﻪ ﻭﻫﻲ ﻃﻠﻌﺖ ﻭﺣﺪﻩ ﻣﺴﺨﻪ ﻣﺎﺗﺴﺘﻬﻠﻬﺎﺵ ..
ﻟﻤﻴﺎ ﺑﻌﺼﺒﻴﻪ ﺷﺪﻳﺪﻩ : ﺍﻧﺘﻲ ﺍﻟﻤﺴﺨﻪ ﻳﺎﻣﺴﺨﻪ .. ﻭﺑﻮﻗﺎﺣﻪ ﻭﺍﺳﺘﻔﺰﺍﺯ ﻛﻤﻠﺖ ﺗﻘﻮﻝ ... ﺍﻳﻪ ﻳﺤﺒﻨﻲ ﻭﻳﻤﻮﺕ ﻓﻴﺎ ﻭﻋﻤﺮﻩ ﻣﺎﺣﺐ ﻏﻴﺮﻱ .. ﻭﻗﺮﻳﺐ ﺍﻥ ﺷﺎﺀ ﺍﻟﻠﻪ ﺣﻴﺨﻄﺒﻨﻲ ﻭﻧﺘﺰﻭﺟﻮﺍ ﻭﺍﻧﺘﻲ ﺗﺠﻲ ﺯﻱ ﺍﻟﻜﻠﺒﻪ ﺗﺮﻗﺼﻲ ﻓﻌﺮﺳﻲ .. ﻳﺎﻛﻠﺒﻪ .. ﻭﺻﻜﺮﺕ ﻓﻮﺟﻬﻬﺎ ﺍﻟﺘﻠﻴﻔﻮﻥ ..
ﻟﻴﻠﻰ ﻃﻮﻝ ﺩﻣﻮﻋﻬﺎ ﻧﺰﻟﻮﺍ ﻭﻗﺎﻟﺖ ﺑﺼﻮﺕ ﻳﺮﺟﻒ : ﺍﺻﻼ ﺍﻧﺘﻲ ﻭﻳﺎﻩ ﺯﻱ ﻳﺎﺑﻌﺾ ... ﺍﻟﺨﺒﻴﺜﻮﻥ ﻟﻠﺨﺒﻴﺜﺎﺕ ..
ﺣﻄﺖ ﺗﻠﻴﻔﻮﻧﻬﺎ ﻉ ﺍﻟﺴﺮﻳﺮ .. ﻭﺿﻤﺖ ﺭﻛﺎﺑﻬﺎ ﻟﺼﺪﺭﻫﺎ ﻭﻗﻌﺪﺕ ﺗﺒﻜﻲ ﺑﺸﺪﻩ
🍃 ﻣﻦ ﺣﺮﻗﻪ ﻗﻠﺒﻬﺎ ﺍﺗﺼﻠﺖ ﺑﺒﻨﺎﺕ ﺍﻟﻌﻴﻠﻪ ﺍﻟﻤﺸﻬﻮﺭﺍﺕ ﺑﺎﻟﻘﺮﻣﻪ ﻭﺍﻟﻨﻤﻴﻤﻪ ﻭﻗﺎﻟﺘﻠﻬﻢ ﻉ ﺍﻟﻠﻲ ﺻﺎﺭ .. ﻭﻫﻤﺎ ﺑﺪﻭﺭﻫﻢ ﻣﺎﺧﻠﻮﺍ ﻟﻤﻦ ﻗﺎﻟﻮﺍ ﻭﺷﻬﺪﺭﻭﺍ ﺑﻴﻬﺎ ﻋﻨﺪ ﺑﺎﻗﻲ ﺑﻨﺎﺕ ﺍﻟﻌﻴﻠﻪ ..
ﻭﺍﻟﺪﻭﺓ ﻭﺻﻠﺖ ﻟﻠﻤﻴﺎﺀ ﻣﻦ ﺭﺷﺎ ... ﻭﺻﺎﺭ ﺍﻟﻠﻲ ﺻﺎﺭ 🍃...
🍁🍁🍁🍁🍁
ﻭﺻﻠﺖ ﻗﺪﺍﻡ ﺍﻟﻤﺼﻮﺭ ..
ﻧﺰﻟﺖ ﻣﻦ ﺳﻴﺎﺭﺗﻬﺎ ...
ﺻﻜﺮﺕ ﺍﻟﺒﺎﺏ ..
" ﻋﺮﻭﺑﻪ .."
ﺷﺒﺤﺖ ﺍﻳﺴﺎﺭﻫﺎ .. ﺍﻧﺼﺪﻣﺖ ..
ﻟﻘﺎﺗﻪ ﻳﻘﺪﻡ ﻧﺎﺣﻴﺘﻬﺎ ﻭﻫﻲ ﻣﺼﺪﻭﻣﻪ ..
ﻭﺻﻞ ﻓﻴﻬﺎ : ﺍﻟﺴﻼﻡ ﻋﻠﻴﻜﻢ .
ﻋﺮﻭﺑﻪ ﺑﺮﺑﻜﻪ : ﺍﺣﻤﻢ .. ﻭﻋﻠﻴﻜﻢ ﺍﻟﺴﻼﻡ ..
ﺣﻤﺪﻱ : ﻋﺎﺵ ﻣﻦ ﺷﺎﻓﻚ
ﻋﺮﻭﺑﻪ : ﺍﺣﻤﻢ .. ﺗﺴﻠﻢ ..
ﺣﻤﺪﻱ : ﻛﻴﻒ ﺣﺎﻟﻚ ﻭﺷﻦ ﺩﺍﻳﺮﺓ ..
ﻋﺮﻭﺑﻪ ﻭﻫﻲ ﺗﻮﺯﻉ ﻓﻨﻈﺮﻫﺎ ﻉ ﺍﻟﻤﻜﺎﻥ : ﺍﻟﺤﻤﺪ ﻟﻠﻪ .. ﻣﺎﺷﻲ ﺍﻟﺤﺎﻝ ..
ﺣﻤﺪﻱ ﺑﻀﺤﻜﻪ ﺍﺳﺘﻐﺮﺍﺏ : ﻛﺄﻧﻚ ﺗﺪﻭﻱ ﻟﻴﺒﻲ ..
ﻋﺮﻭﺑﻪ ﺷﺒﺤﺘﻠﻪ ﻭﻗﺎﻟﺖ ﺑﺸﻲﺀ ﻣﻦ ﺍﻟﺤﺪﻩ : ﺍﻳﻪ ﻣﺎﻫﻮ ﺍﻧﺨﻄﺒﺖ ﻟﻠﻴﺒﻲ ..
ﻫﻮ ﺻﺪﻣﻪ ﻫﻠﺒﻪ ﺍﻟﻠﻲ ﺳﻤﻌﻪ ...
ﺭﻓﻀﻬﺎ ﻟﻴﻪ ﻛﺎﻥ ﺑﺴﺒﺐ ﺧﻮﻓﻬﺎ ﻋﻠﻴﻪ ﻣﻦ ﻭﻟﺪ ﻋﻤﻬﺎ ..
ﺑﺲ ﺷﻦ ﺗﻐﻴﺮ ﺗﻮﺍ .. ﻭﻟﺪ ﻋﻤﻬﺎ ﻣﺎﺕ ﻣﺜﻼ !!
🍃 ﻳﺎﺭﻳﺘﻪ ﻣﺎﺕ 🍃
ﺑﺎﻫﻲ ﺷﻦ ﻳﻌﻨﻲ ﻫﺪﺍ ... ﻏﻴﺮ ﺍﻧﻬﺎ ﺭﻓﻀﺎﺗﻪ ﻷﻧﻬﺎ ﻣﺶ ﻣﺘﻘﺒﻼﺗﻪ ..
ﺿﺎﻳﻘﻪ ﺷﻌﻮﺭﻩ ﻫﺪﺍ ﺑﻘﻮﺓ ...
ﻭﺑﺮﻏﻢ ﻫﻜﻲ ﺍﺑﺘﺴﻢ ﻭﻗﺎﻝ : ﺭﺑﻲ ﻳﺴﻌﺪﻙ ..
ﻫﻲ ﺍﺑﺘﺴﻤﺖ ..
ﻫﻮ ﻣﺪ ﻳﺪﻩ ﻭﻗﺎﻝ : ﻧﺴﻤﻊ ﻋﻨﻚ ﻛﻞ ﻃﻴﺐ ﺍﻥ ﺷﺎﺀ ﺍﻟﻠﻪ ..
ﻋﺮﻭﺑﻪ : ﺗﺴﻠﻢ .. ﻭﻣﺪﺕ ﻳﺪﻫﺎ ﻭﺻﺎﻓﺤﺎﺗﻪ ..
🍁 ﻭﻫﺎﻧﻴﺒﺎﻝ ﻳﺸﻮﻑ ..
ﻋﺎﺭﻓﻪ ﻛﻮﻳﺲ ﻣﻦ ﻳﻜﻮﻥ ... ﻭﻣﺬﻛﺮﻩ ﺯﻳﻦ ..
ﻫﻮ ﻏﺮﻳﻤﻪ ﻳﻌﺘﺒﺮ ... ﻣﺴﺘﺤﻴﻞ ﻳﻨﺴﺎﻩ ...
ﻃﻠﻖ ﻳﺪﻫﺎ ﻭﻗﺎﻝ : ﺍﻟﺴﻼﻡ ﻋﻠﻴﻜﻢ ..
ﻭﻟﻒ ﻭﻣﺸﻲ .. ﻭﻫﻲ ﺗﺸﺒﺤﻠﻪ ..
ﺭﻛﺐ ﺣﻤﺪﻱ ﺳﻴﺎﺭﺗﻪ ﺷﺎﻓﻠﻬﺎ ﻭﺍﺑﺘﺴﻢ ..
ﻫﻲ ﻃﻮﻝ ﻣﺸﺖ ﺧﺸﺖ ﻟﻠﻤﺼﻮﺭ ...
ﺗﺤﺮﻛﺖ ﺳﻴﺎﺭﺓ ﺣﻤﺪﻱ ﻭﻫﺎﻧﻴﺒﺎﻝ ﻳﺸﻮﻓﻠﻪ ..
ﻟﻌﻨﺪ ﻣﺎﺧﺘﻔﺖ ﻣﻦ ﻗﺪﺍﻣﻪ ..
ﻏﻴﺮ ﻋﻴﻮﻧﻪ ﺍﻟﻠﻲ ﻛﺎﻧﻮﺍ ﻳﻘﺪﺣﻮﺍ ﺷﺮﺍﺭ ﻟﻠﻤﺼﻮﺭ ...
ﻗﻌﺪ ﺷﻮﻳﻪ .. ﻳﻔﻜﺮ ..
ﺑﻌﺪﻳﻦ ﺷﻐﻞ ﺳﻴﺎﺭﺗﻪ ﻭﺗﺤﺮﻙ ﻃﻮﻝ ﻭﻫﻮ ﻳﺤﺮﻕ ﻓﻲ ﺍﻟﻌﺠﻞ ..
🍁🍁🍁🍁🍁
ﺳﻤﻴﺎﺍﺍﺍﺍﺍﺍ ..
ﻃﻠﻌﺖ ﻣﻦ ﺍﻟﺪﺍﺭ ﻭﺷﻌﺮﻫﺎ ﻣﺸﻔﺸﻒ ﻭﺣﺎﻟﺘﻬﺎ ﺣﺎﻟﻪ .
ﺳﻤﻴﻪ : ﺧﻴﺮﻙ ﺗﻌﻴﻂ ﺷﻦ ﻓﻲ ..
ﺍﻟﻬﺎﺩﻱ ﺑﻘﺮﻑ : ﻏﻴﺮﻱ ﻟﻮﻟﺪﻙ ﺷﻤﺎﻟﻪ ..
ﺳﻤﻴﻪ : ﻭﺧﻴﺮﻙ ﺍﻧﺖ ﻣﺎﺗﻐﻴﺮﻟﻪ ..
ﺍﻟﻬﺎﺩﻱ ﺑﺘﻔﻨﻴﺼﻪ : ﺷﻦ ﻫﻲ !!!
ﺳﻤﻴﻪ : ﺍﻳﻪ ﺍﻧﺖ ﺗﻐﻴﺮﻟﻪ .. ﺗﺸﺒﺢ ﻓﻲ ﺣﺎﻟﻲ ﻛﻴﻒ ﻋﻴﻠﻴﻦ ﻭﺍﻳﺎﻣﻲ ﺳﻮﺩ ﻭﻣﺶ ﻃﺎﻳﻘﻪ ﺣﺪ .. ﻻﻃﺎﻳﻘﺘﻚ ﻭﻻﻃﺎﻳﻘﻪ ﻭﻻﺩﻙ ﻭﻻﻃﺎﻳﻘﻪ ﺣﺘﻰ ﺭﻭﺣﻲ ..
ﻋﺒﺪ ﺍﻟﻬﺎﺩﻱ ﻭﺻﻠﺖ ﻋﻨﺪﻩ ﺣﺪﻫﺎ ﺧﻼﺹ ... ﻗﺎﻝ ﺑﻌﺼﺒﻴﻪ ﺷﺪﻳﺪﻩ : ﻏﻴﺮﻳﻴﻲ ﻟﻮﻟﺪﻙ ﺗﺤﺮﻛﻴﻴﻴﻲ ...
ﻓﺆﺍﺩ ﺍﻧﺨﻠﻊ ﻗﻌﺪ ﻳﻌﻴﻂ ...
ﺷﺒﺤﺘﻠﻪ ﺑﺘﻔﻨﻴﺼﻪ ..
ﺍﻟﻬﺎﺩﻱ : ﻣﻌﺎﺵ ﺗﻔﻨﺼﻲ ﻭﻋﻴﻮﻧﻚ ﻧﺰﻟﻴﻬﻦ ﻟﻮﻃﺎ ..
ﻗﻌﺪﺕ ﺗﺸﺒﺤﻠﻪ .
ﺍﻟﻬﺎﺩﻱ : ﻧﺰﻟﻴﻴﻴﻴﻬﻦ ..
ﻧﺰﻟﺘﻬﻢ ﻭﻫﻲ ﻓﻘﻤﺔ ﺍﻟﻐﻀﺐ ..
ﺍﻟﻬﺎﺩﻱ ؛ﻧﺪﺍﺩﻩ ﻣﺤﻮﻟﻴﻦ ﺍﻟﺸﻤﺎﻝ .. ﻣﺶ ﻫﻮ ﻟﻌﻨﺪ ﺗﻮﺍ ﻗﺎﻋﺪ ﺑﻴﻪ ..!!
ﻫﻲ ﺟﺒﺪﺕ ﻭﻟﺪﻫﺎ ﺑﻘﻮﺓ ﻭﻣﺸﺖ ﺑﻐﻀﺐ ﻟﻠﺪﺍﺭ ..
ﺍﻟﻬﺎﺩﻱ ﺷﺒﺢ ﻓﻮﻕ ﻭﻗﺎﻝ ﺑﻘﻬﺮ : ﺍﻩ ﻳﺎﺭﺑﻲ ﺷﻦ ﺩﺍﻳﺮ ﺗﺤﺘﻚ ﺑﻴﺶ ﺗﻌﺎﻗﺒﻨﻲ ﻫﻜﻲ !!
ﺑﺮﺍ ..
🍁 ﻛﺎﻧﺖ ﻏﺎﻟﻴﻪ ﺍﺩﺧﻞ ﻓﻲ ﺍﻟﺪﺑﺶ ﺍﻟﻤﻨﺸﻮﺭ ﻭﺗﺴﻤﻊ ﻓﺎﺻﻮﺍﺗﻬﻢ ﻭﻫﻲ ﻣﻀﺎﻳﻘﻪ ﻉ ﺣﺎﻟﻬﻢ ﺗﻨﻬﺪﺕ ﻭﺗﻮﺟﻬﺖ ﻟﻠﺒﺎﺏ ﻭﺧﺸﺖ ...
🍁🍁🍁🍁
ﺍﻟﺴﺎﻋﻪ 8:00 ﻣﺴﺎﺀﺍ ..
ﻣﻜﺎﻟﻤﻪ ﻫﺎﺗﻔﻴﻪ ..
ﺗﻌﺪﻱ ﻓﻲ ﺳﺘﻴﻦ ﺩﺍﻫﻴﻪ ..
ﻟﻤﻴﺎﺀ : ﻭﺍﻟﻠﻪ ﺣﺴﻴﺖ ﺭﻭﺣﻲ ﺣﻘﻴﺮﺓ ﺑﺴﺒﺒﻬﺎ ..
ﻋﻤﺮ : ﻗﺘﻠﻚ ﻣﺎﺗﻌﺪﻟﻴﺶ ﻋﻠﻴﻬﺎ .. ﻭﺍﻟﺤﻜﺎﻳﻪ ﻓﻲ ﺍﻷﺧﻴﺮ ﻧﺼﻴﺐ ﻭﻧﺼﻴﺐ ﺣﺪ ﻣﺎﻳﺎﺧﺪﻩ ﺣﺪ .. ﻭﺍﻧﻲ ﻧﺼﻴﺒﻚ ﺍﻧﺘﻲ ..
ﻟﻤﻴﺎﺀ ﺍﺑﺘﺴﻤﺖ ﺑﺨﺠﻞ ..
ﻋﻤﺮ ﺑﻀﺤﻜﻪ : ﻛﻴﻒ ﻣﺎﻗﺎﻝ ﺳﻠﻄﺎﻥ ﺍﻟﻄﺮﺏ .. ﺍﻧﺎ ﻗﺪﺭﻙ ﻭﻧﺼﻴﺒﻚ ﻭﻧﺼﻴﺒﻚ ﺣﻴﺼﻴﺒﻚ ..
ﺿﺤﻜﺖ ﻟﻤﻴﺎﺀ ..
🍃 ﺑﻐﺾ ﺍﻟﻨﻈﺮ ﻋﻦ ﻛﻞ ﺷﻲ ﻫﻮ ﻳﺤﺒﻬﺎ ﻫﻠﺒﻪ ﻭﻫﻲ ﺗﺤﺒﻪ ﻫﻠﺒﻪ
ﻫﻲ ﻋﺮﻓﺖ ﻛﻴﻒ ﺗﻜﺴﺐ ﻗﻠﺒﻪ ﺑﺬﻛﺎﺋﻬﺎ ﺍﻟﺨﺒﺜﻲ .. ﻭﻫﻮ ﻣﺎﻗﺪﺭﺵ ﻳﻘﺎﻭﻣﻬﺎ ﻃﺎﺡ ﻓﻲ ﺷﺮﺍﻛﻬﺎ ﺩﻭﻥ ﺍﺭﺍﺩﻩ ﻣﻨﻪ .. ﻣﻦ ﺍﻭﻝ ﻣﺮﺓ ﺟﺖ ﻋﻴﻨﻪ ﻋﻠﻴﻬﺎ ﻭﻫﻮ ﻣﻨﺠﺬﺑﻠﻬﺎ .. ﺑﺲ ﻛﺎﻥ ﻳﻘﺎﻭﻡ ﻓﻬﺎﻟﺸﻌﻮﺭ ...
ﺑﺲ ﺗﻮﺍ ﻣﺴﺘﺴﻠﻤﻠﻪ ...
ﻭﻣﻊ ﻫﺬﺍ ﻳﻘﻌﺪ ﺣﺒﻬﻢ ﻣﻠﻮﺙ 🍃
🍁 ﻋﻜﺲ ﺍﻟﺤﺐ ﺍﻟﺼﺎﻓﻲ ..
ﺍﻟﻠﻲ ﻧﺎﺩﺭ ﺟﺪﺍ ﻣﺎﻳﻜﻮﻥ ﻣﻮﺟﻮﺩ ﻓﺰﻣﺎﻧﻨﺎ ﻫﺪﺍ ... ﺍﻟﺤﻆ ﺩﻳﻤﺎ ﻣﻌﺎﻛﺲ ﻷﻃﺮﺍﻓﻪ ﻭﺑﻘﻮﺓ ...
ﻭﺍﻗﻒ ..
ﺍﻧﻈﺎﺭﻩ ﺑﺈﺗﺠﺎﻩ ﺍﻟﻮﺍﺩﻱ ...
ﻭﺗﻠﻴﻔﻮﻧﻪ ﻉ ﻭﺫﻧﻪ ...
ﻧﺎﺩﻯ ... ﻣﺮﺓ ﺍﺗﻨﻴﻦ ...
ﻟﻌﻨﺪ ﻣﺎ ﺍﻧﻔﺘﺢ ﺍﻟﺨﻂ ..
ﻋﺮﻭﺑﻪ : ﻭﺍﺧﻴﺮﺍ .. ﻭﻳﻨﻚ ﻻﺟﻴﺖ ﻭﻻﺭﺩﻳﺖ ﻉ ﺍﺗﺼﺎﻻﺗﻲ ..
ﻫﻮ ﻗﻌﺪ ﺳﺎﻛﺖ ..
ﻋﺮﻭﺑﻪ ﺑﺈﺳﺘﻐﺮﺍﺏ : ﻫﺎﻧﻴﺒﺎﻝ ... ﺍﻟﻮ ..
ﻫﺎﻧﻴﺒﺎﻝ : ﻋﺪﻳﺘﻲ ﻟﻠﺤﻔﻠﻪ ..
ﻋﺮﻭﺑﻪ : ﻻ ﻣﺎﺯﺍﻝ ﺳﺎﻋﻪ ﺍﺧﺮﻯ .. ﻫﻲ ﺗﻌﺎﻟﻰ ﻧﺮﺍﺟﻲ ﻓﻴﻚ ﺭﺍﻧﻲ ..
ﺳﻜﺖ ..
ﻋﺮﻭﺑﻪ : ﺍﻟﻮ .. ﻫﺎﻧﻴﺒﺎﻝ .. ﺗﺴﻤﻊ ﻓﻴﺎ ... ﺍﻟﺘﻐﻄﻴﻪ ﻋﻨﺪﻙ ﻣﺶ ﺗﻤﺎﻡ !!
ﻻﺭﺩ ..
ﻋﺮﻭﺑﻪ : ﻫﺎﻧﻴﺒﺎﻝ !
" ﻟﻮ ﻗﺘﻠﻚ ﻧﺒﻲ ﻫﺎﻟﻴﻮﻡ ﺍﺧﺮ ﻳﻮﻡ ﻟﻴﻚ ﻓﻲ ﺍﻟﺨﺪﻣﻪ؟ "
ﻫﻲ ﺍﻧﺼﺪﻣﺖ .. ﻣﺎﺍﺳﺘﻮﻋﺒﺘﺶ ﺍﻟﻠﻲ ﺳﻤﻌﺎﺗﻪ ..
ﻋﺮﻭﺑﻪ : ﺷﻨﻮ ﻗﻠﺖ !!
ﻫﺎﻧﻴﺒﺎﻝ : ﺍﻟﻠﻲ ﺳﻤﻌﺘﻴﻪ ..
ﺭﻓﻌﺖ ﺣﻮﺍﺟﺒﻬﺎ .. ﻭﻗﻌﺪﺕ ﺳﺎﻛﺘﻪ ..
ﻫﺎﻧﻴﺒﺎﻝ؛ﺧﺪﻣﺘﻚ ﻣﺎﺗﻨﺎﺳﺒﻨﻴﺶ ﻣﻦ ﺍﻷﺧﻴﺮ ..
ﻧﺰﻟﺖ ﺣﻮﺍﺟﺒﻬﺎ ﻭﻗﺎﻟﺖ : ﺍﺣﻤﻢ .. ﻫﺎﻧﻴﺒﺎﻝ .. ﻗﺒﻞ ﻟﻴﺼﻴﺮ ﺍﻱ ﺷﻲ ﺭﺳﻤﻲ ﺑﻴﻨﺎﺗﻨﺎ ﺍﺗﻔﻘﻨﺎ ﺍﻥ ﻧﺨﻠﻮﺍ ﺍﻟﻜﻼﻡ ﻓﻲ ﺍﻟﻤﻮﺿﻮﻉ ﻫﺪﻯ ﻟﺒﻌﺪﻳﻦ ﻧﺤﻜﻮﺍ ﻓﻴﻪ ﻧﺘﻨﺎﻗﺸﻮﺍ ﻭﻓﻲ ﺍﻟﻨﻬﺎﻳﻪ ﻭﺍﺣﺪ ﻓﻴﻨﺎ ﻳﻘﻨﻊ ﺍﻟﺘﺎﻧﻲ ﺑﻮﺟﻬﺔ ﻧﻈﺮﻩ .. ﺍﺗﻔﻘﻨﺎ ﻫﻜﻲ ﻭﻻﻻ !! ؟
ﻫﺎﻧﻴﺒﺎﻝ؛ﺍﻳﻪ ﺑﺲ ﻓﻜﺮﺕ ﻛﻮﻳﺲ ﺑﻌﺪ ﺷﻔﺖ ﻭﺿﻊ ﺷﻐﻠﻚ .. ﻟﻘﻴﺖ ﺍﺣﺴﻦ ﺷﻲ ﺍﻧﻚ ﻣﺎﺗﺨﺪﻣﻴﺶ .. ﺍﺻﻼ ﻣﺎﻧﻜﺶ ﺑﺤﺎﺟﻪ ..
ﻋﺮﻭﺑﻪ ﺑﺤﺪﻩ : ﻭﻣﻦ ﻗﺎﻟﻚ ﺍﻧﻲ ﻧﺨﺪﻡ ﻟﺤﺎﺟﻪ ﺍﻧﻲ .. ﺍﻧﻲ ﻧﺨﺪﻡ ﻷﻧﻬﺎ ﺧﺪﻣﺘﻲ ﻻﻥ ﺍﻟﺘﺼﻮﻳﺮ ﻣﻬﻨﻪ ﻣﺎﺷﻴﻪ ﻓﺪﻣﻲ ﻣﺎﻧﻘﺪﺭﺵ ﻧﺨﻠﻴﻬﺎ ﺑﻜﻞ ﺗﺤﺖ ﺍﻱ ﻇﺮﻑ ﺷﻦ ﻛﺎﻥ ﻳﻜﻮﻥ ..
ﻫﺎﻧﻴﺒﺎﻝ ﺑﺮﻓﻌﺔ ﺣﻮﺍﺟﺐ : ﻣﻌﻨﺎﻫﺎ ﻛﻨﺖ ﺗﻤﺸﻲ ﻓﻴﺎ ﻣﻨﻴﻦ ﻗﺘﻲ ﻧﺘﻨﺎﻗﺸﻮﺍ ﻓﻴﻪ ﺍﻟﻤﻮﺿﻮﻉ .. ﺍﻧﺘﻲ ﺯﺍﻳﺪ ﻧﺎﻗﺺ ﻣﺎﻧﻜﺶ ﻣﺴﻴﺒﻪ !!
ﻋﺮﻭﺑﻪ : ﺣﺘﻰ ﺍﻧﺖ ﻛﻨﺖ ﺗﻤﺸﻲ ﻓﻴﺎ ﺯﺍﻳﺪ ﻧﺎﻗﺺ ﻛﻨﺖ ﺗﺒﻴﻨﻲ ﻧﺴﻴﺒﻬﺎ ..
ﻫﺎﻧﻴﺒﺎﻝ ﺑﺤﺪﻩ : ﺍﻳﻪ ﺍﻳﻪ ﺗﺴﺒﻴﻬﺎ ﺧﺪﻣﻪ ﻛﻴﻒ ﻫﺪﻱ ﺻﻌﺐ ﻋﻠﻴﺎ ﻧﻘﺒﻠﻬﺎ .. ﻣﺮﻭﺍﺡ ﻋﻘﺎﺑﺎﺕ ﺍﻟﻠﻴﻞ ﻭﺗﺨﺸﻲ ﻭﺗﻄﻠﻌﻲ ﻉ ﻧﺎﺱ ﺍﺷﻜﺎﻝ ﻭﺍﻟﻮﺍﻥ ﻭﺗﺘﻌﺎﻣﻠﻲ ﻣﻊ ﺍﻟﺮﺟﺎﻟﻪ ﻭﺗﺴﻠﻤﻲ ﻋﻠﻴﻬﻢ ﺑﺎﻹﻳﺪﻳﻦ ..
ﻋﺮﻭﺑﻪ ﺑﻐﻀﺐ : ﺧﺪﻣﺘﻰ ﺧﺪﻣﻪ ﻣﺤﺘﺮﻣﻪ .. ﻭﺍﻧﻲ ﻣﺶ ﺍﻭﻝ ﻭﻻﺍﺧﺮ ﻭﺣﺪﻩ ﺗﺨﺪﻡ ﻫﻜﻲ .. ﻻﻫﻲ ﻋﻴﺐ ﻭﻻﺣﺮﺍﻡ ..
ﻫﺎﻧﻴﺒﺎﻝ : ﻻﻋﻴﺐ ﻭﺣﺮﺍﻡ ﻣﻨﻴﻦ ﺗﺨﺘﻠﻄﻲ ﺑﺎﻟﺮﺟﺎﻟﻪ ﺍﻷﺟﺎﻧﺐ ﻋﻨﻚ ﻭﻳﻤﺴﻮﺍ ﺍﻳﺪﻳﻚ ﻫﺪﻯ ﺣﺮﺍﻡ ..
ﻋﺮﻭﺑﻪ ﺑﺮﻓﻌﺔ ﺣﺎﺟﺐ؛ﻫﺎﻙ ﺍﻧﺖ ﻗﺎﻋﺪ ﺍﺟﻨﺒﻲ ﻋﻨﻲ ﻭﺗﻤﺴﻚ ﻓﻴﺪﻱ ﻋﺎﺩﻱ ..
ﻫﺎﻧﻴﺒﺎﻝ ﺑﺮﻓﻌﺔ ﺣﺎﺟﺐ : ﻃﻠﻌﺖ ﺯﻱ ﺯﻳﻬﻢ؟ !!
ﻋﺮﻭﺑﻪ ﻏﻤﻀﺖ ﻋﻴﻮﻧﻬﺎ ﺑﻀﺠﺮ ﻭﻗﺎﻟﺖ : ﻣﺎﺗﺤﻮﺭﺵ ﺍﻟﻜﻼﻡ ﻭﺗﻘﻠﺒﻪ ﻋﻠﻴﺎ ﺭﺟﺎﺀﺍ ..
ﻫﺎﻧﻴﺒﺎﻝ : ﻧﻘﻠﺒﻪ ﻋﻠﻴﻚ !!! ﻛﻮﻳﺲ ﻛﻮﻳﺲ ... ﻋﺮﻭﺑﻪ ﺍﺳﻤﻌﻲ ﻣﻦ ﺍﻷﺧﻴﺮ .. ﻳﺎﻧﻲ ... ﻳﺎﺧﺪﻣﺘﻚ ..
ﺍﻧﺼﺪﻣﺖ ﻋﺮﻭﺑﻪ ﺑﻘﻮﺓ ﻓﻜﻠﻤﺘﻪ ﺍﻷﺧﻴﺮﻩ ﻣﺎﺗﻮﻗﻌﺘﺶ ﺗﻮﺻﻞ ﺑﻴﻪ ﻳﻘﻮﻝ ﻫﻜﻲ ﺑﻜﻞ ﺳﻬﻮﻟﻪ ..
ﻣﻼﺣﻈﻪ ﺍﻧﻪ ﻣﺶ ﻣﺘﻘﺒﻞ ﺧﺪﻣﺘﻬﺎ ﻫﻠﺒﻪ .. ﺑﺲ ﻣﺎﻛﺎﻧﺘﺶ ﺗﺤﺴﺎﺏ ﺍﻧﻪ ﺭﺍﻓﻀﻬﺎ ﻟﻬﺎﻟﺤﺪ ..
ﻫﻲ ﻫﻨﻲ ﺷﺎﻓﺖ ﺍﻥ ﺷﺨﺼﻴﺘﻬﺎﺣﻨﺘﻌﺪﻡ ﻗﺪﺍﻣﻪ ﻟﻮ ﺭﺿﺨﺖ ﻭﻗﺒﻠﺖ ﺑﻜﻼﻣﻪ .. ﻟﺬﻟﻚ ﺭﺩﺕ ﻭﻫﻲ ﺗﻘﻮﻝ ..
" ﻋﻨﺪﻱ ﺧﺪﻣﻪ ﺗﻮ ﻣﺎﻧﻴﺶ ﻓﺎﺿﻴﻪ .."
ﻭﺻﻜﺮﺕ ﻋﻠﻴﻪ .. ﺷﺒﺤﺖ ﻟﺴﻤﻴﺮﺓ ﺍﻟﻠﻲ ﻛﺎﻧﺖ ﺗﺸﻮﻓﻠﻬﺎ ﺑﻀﻴﻖ .. ﻭﻗﺎﻟﺖ : ﻫﻴﺎﺍﺍ ..
ﻭﻣﺸﺖ ﻃﻮﻝ ﻟﻠﺒﺎﺏ ﻭﻃﻠﻌﺖ .. ﻭﻭﺭﺍﻫﺎ ﺳﻤﻴﺮﻩ ..
🍁 ﺍﻣﺎ ﻫﻮ ﺣﺲ ﺑﺈﻫﺎﻧﻪ ﻛﺒﻴﺮﺓ ..
ﻭﻣﺎﺗﺤﻤﻠﺶ ﺑﻜﻞ ﺍﻫﺎﻧﺘﻬﺎ ..
ﻛﺘﺐ ﻭﻫﻮ ﻓﻲ ﻗﻤﺔ ﺍﻟﻐﻀﺐ ﺭﺳﺎﻟﻪ ﻓﺤﻮﺍﻫﺎ ..
( ﺍﻧﺘﻲ ﺍﻟﻠﻲ ﺍﺧﺘﺮﻧﻲ )
🍃🍃🍃🍃🍃🍃
ﺍﻳﻪ ﻋﺮﻭﺑﻪ ﻗﺮﺕ ﺍﻟﺮﺳﺎﻟﻪ ...
ﻟﻴﻠﺘﻬﺎ ﻣﺸﺖ ﻛﻠﻬﺎ ﻧﻜﺪ ﻓﻲ ﻧﻜﺪ ﻭﺑﻜﻲ ﻭﺧﻼﺹ ..
ﻭﻫﻮ ﻛﺎﻥ ﻣﺎﺯﺍﻝ ﻓﻲ ﻋﺰ ﺍﻟﻐﻀﺐ
ﻭﻣﺮﻭﺍ ﻣﻦ ﻫﺪﺍﻛﺎ ﺍﻟﻴﻮﻡ ﺑﺎﻟﺰﺑﻂ ..
ﻋﺸﺮﻩ ﺍﻳﺎﻡ 🍃...
ﻫﻮ ﻛﺎﻥ ﻣﻨﻄﻮﻱ ﻉ ﻧﻔﺴﻪ ﻏﺎﻟﺐ ﺍﻟﻮﻗﺖ ..
ﻟﻌﻨﺪ ﻣﺎﺟﻲ ﻳﻮﻡ ﻭﺭﻭﺡ ﺻﺎﺣﺒﻪ ﺿﻮ ﻣﻦ ﺍﻟﺴﻔﺮ ...
ﻋﺰﻡ ﻫﺎﻧﻴﺒﺎﻝ ﻳﺠﻲ ﻳﺘﻌﺸﻰ .. ﻭﻫﺎﻧﻴﺒﺎﻝ ﻣﺎﺗﺮﺩﺩﺵ ﻓﻲ ﺗﻠﺒﻴﺔ ﺍﻟﺪﻋﻮﺓ ...
🍁 ﻣﺮﺍﻡ
ﺩﺍﺭﺕ ﺍﺣﺴﻦ ﻋﺸﻲ ﺻﻔﺮﺓ ﺗﺤﻞ ﺍﻟﻌﻴﻦ ﺍﻟﻤﻐﻤﻀﻪ ..
ﺩﺍﺭﺗﻬﺎ ﻣﻦ ﻭﺳﻂ ﻗﻠﺒﻬﺎ ...
ﺩﺍﺭﺗﻬﺎ ﺑﺤﺐ 💓...
ﻫﺎﺩﻱ ﺍﺑﺴﻂ ﻃﺮﻳﻘﻪ ﺗﻘﺪﺭ ﺗﻌﻴﺶ ﺑﻴﻬﺎ ﺣﺒﻬﺎ ﻟﻴﻪ ..
ﻫﺎﻟﺤﺐ ﺍﻟﻠﻲ ﻣﻠﻜﻬﺎ .. ﻭﺧﻼﻫﺎ ﺗﺤﺖ ﺳﻴﻄﺮﺗﻪ 💓...
🍁 ﻫﺎﻧﻴﺒﺎﻝ ..
ﺍﻟﻠﻲ ﻟﻴﻪ ﻓﺘﺮﺓ ﻣﺠﺎﻓﻲ ﺍﻟﻤﺎﻛﻠﻪ ﻭﻳﺪﻭﺏ ﻳﺎﻛﻞ ﻣﺎﻳﺨﻠﻴﻪ ﻳﻮﻗﻒ ﻉ ﺭﺟﻠﻴﻪ ﻃﻮﻝ ﺍﻟﻴﻮﻡ ﻓﺨﺪﻣﺘﻪ ...
ﻛﻠﻲ ﻟﻴﻠﺘﻬﺎ ﺑﺸﺮﺍﻫﻪ ﺧﻠﺖ ﺿﻮ ﻳﺴﺘﻐﺮﺏ ..
ﺿﻮ ﺑﻀﺤﻜﻪ : ﻭﺍﻟﻠﻪ ﻣﺎﻓﻲ ﺣﺎﺟﻪ ﻫﺎﺭﺑﻪ ..
ﻫﺎﻧﻴﺒﺎﻝ ﺑﻠﻊ ﻟﻘﻤﺘﻪ ﻭﻗﺎﻝ : ﻧﻌﻤﺘﻜﻢ ﻳﺎﺭﺍﺟﻞ ﻣﺶ ﻋﺎﺭﻑ ﻛﻴﻒ ﺗﻘﻮﻝ ﻓﻴﻬﺎ ﺳﺤﺮ .. ﻭﻳﻦ ﻧﺠﻴﻜﻢ ﻏﺪﻱ ﻭﻻﻋﺸﻲ ﻧﺘﻤﻨﻰ ﻣﺎﺗﻘﻴﻢ ﺍﻟﺼﻔﺮﺓ .. ﺍﺑﺘﺴﻢ ﻭﻗﺎﻝ .. ﻧﻌﺘﺮﻑ ﻫﺪﻯ ﻟﻴﺶ ﻧﻘﻮﻟﻚ ﺍﻋﺰﻣﻨﻲ ﺑﺮﻭﺣﻲ ..
ﺿﻮ ﺑﻀﺤﻜﻪ؛ﻳﺎﺳﻴﺪﻱ ﺻﺤﺘﻴﻦ ..
ﺿﺤﻚ ﻫﺎﻧﻴﺒﺎﻝ ﻭﻛﻤﻞ ﻣﺎﻛﻠﻪ ﻭﻣﺮﺓ ﻣﺮﺓ ﻳﻬﺪﺭﺯ ﻫﻮ ﻭﺿﻮ ..
ﺿﻮ ﺍﻟﻠﻲ ﻛﺎﻥ ﻗﻠﻴﻞ ﻣﺎﻳﺎﻛﻞ ..
ﻷﻧﻪ ﻛﺎﻥ ﻳﺤﻤﻞ ﺷﺒﻪ ﺍﻣﺎﻧﻪ ﻭﺧﺒﺮ ﺛﻘﻴﻠﻴﻦ ﻋﻠﻴﻪ ﻟﻬﺎﻧﻴﺒﺎﻝ ﻭﻣﺶ ﻋﺎﺭﻑ ﻛﻴﻒ ﺑﻴﻮﺻﻠﻬﻮﻟﻪ ...
🍁 ﺑﻌﺪ ﺗﻤﻮﺍ ﻋﺸﻲ ..
ﻭﺷﺮﺑﻮﺍ ﺍﻟﺸﺎﻫﻲ ...
ﺣﺎﻥ ﺍﻟﻮﻗﺖ ﺑﺎﻟﻨﺴﺒﻪ ﻟﻀﻮ ﺍﻧﻪ ﻳﺘﻜﻠﻢ ..
ﺿﻮ : ﻫﺎﻧﻴﺒﺎﻝ ... ﺑﻨﻘﻮﻟﻚ ..
ﻫﺎﻧﻴﺒﺎﻝ : ﻗﻮﻝ ..
ﺿﻮ : ﻣﻦ ﻫﻜﻲ 5 ﺷﻬﻮﺭ ﺻﺎﺭﺕ ﻣﻌﺎﻱ ﺣﺎﺟﻪ ﻣﻨﻌﻨﻲ ﺍﻧﻲ ﻧﺨﺒﺮﻙ ﺑﻴﻬﺎ ﺣﺎﺟﺎﺕ ﻭﺍﺟﺪﻩ .. ﺑﺲ ﻷﻧﻲ ﻣﺤﻤﻠﻚ ﻣﻌﺎﻱ ﺍﻣﺎﻧﻪ ﺳﻼﻡ ﻣﺎﻗﺪﺭﺗﺶ ﻧﺪﺭﻗﻬﺎ ﺍﻛﺜﺮ ﻣﻦ ﻫﻜﻲ ..
ﺣﻂ ﻃﺎﺳﻪ ﺍﻟﺸﺎﻫﻲ ﻭﺷﺒﺤﻠﻪ ﺑﺈﺳﺘﻐﺮﺍﺏ : ﺧﺶ ﻓﻲ ﺍﻟﻤﻮﺿﻮﻉ ﺷﻨﻮ ﻓﻲ !!
ﺿﻮ ﺗﻨﻬﺪ ﻭﻗﺎﻝ : ﻣﺠﺪﻭﻟﻴﻦ ..
ﻧﺰﻝ ﻋﻴﻮﻧﻪ ﻭﺷﺒﺢ ﻟﻠﻄﺎﺳﻪ ﻭﻭﺟﻬﻪ ﺗﻐﻴﺮ ..
ﺿﻮ : ﺗﺴﻠﻢ ﻋﻠﻴﻚ ﻭﺍﺟﺪ ﻭﺍﺟﺪ ..
ﺷﺒﺤﻠﻪ ﺑﻌﺪﻳﻦ ﺍﺑﺘﺴﻢ ﺑﺘﻬﻜﻢ ﻭﻗﺎﻝ : ﻉ ﺳﺒﻴﻞ ﺍﻟﻤﺰﺍﺡ : ﻗﺎﻋﺪﻩ ﺣﻴﻪ ﻫﻲ ..
ﺿﻮ ﺷﺒﺤﻠﻪ ﺷﻮﻳﻪ ﻭﻗﺎﻝ : ﻻ .. ﺗﻮﻓﺖ ...
... ﻳﺘﺒﻊ
#معجبين_جمان_فريد💙
