#العشق_المتمرد "اختبار"
الجزء 113 القسم الأخير
#جمان_فريد
🌟..
كلهم بعدين خشوا الكوجينه مع بعض وتعاونوا ع الفطور..
والكناين اللي هادي فحوشها دارت حويجه.. اتنين..
ماعدا لمياء اللي جتهم بكري ع اساس بتعاونهم...
الساعه 5:30عصرا..
في حوش ميلاد..
رفقه:مبدعه يابنت انتي..
رزان ضحكت وهي تلف في البيتزا..
رفقه:بجديات عار والله حتى المبكبكه مانعرف نديرها..
"هااااااي"..
التفتوا الزوز للباب وقالوا:هايااات..
حدهم وهي شاده فيدها حافظه قالت بضحكه:عزمت روحي اليوم فحوش جدي رمضان..
رزان وهي ماشيه تحط الطاجين في الكوشه:بروحك قلتيها حوش جدك..
ابتسمت حدهم وهي تسلم ع رفقه بالخد..بعدين بعدت وهي تقول:جو عماتي؟.."عمات رزان لأنهم بنات عم بوها تقوللهم عماتي"
رفقه:كلهم..
حدهم هزت راسها بإيجاب..
رزان جتها وهي تشوف للحافظه:شن درتي؟..
حدهم بإبتسامه:مشكله...كيكه حارة..كفتة دجاج..بوريك..
رفقه:لالا الحق اني بديت نحس روحي بلافايده..
حدهم ورزان:هههههههه..
في حوش الحاج رمضان...
كفايه مقعمزة فالصاله وقدامها بنتها تلملها فشعرها فوق بش مايقلقهاش من النو..
مرام؛كان تقصيهلها..
نورهان بتفنيصه:لاااا..
ضحكت مرام..
كفايه بضحكه؛جاتك الإجابه..
ع جية زينب قعمزت حدا مرام وقالت:زي روان تموت ولاتقصه جت لرانيا حتى هي تحب الشعر الطويل..
مرام:اني زمان لما كنت صغيرة ياما قصيته لعند وصلت للأعدادي امي حرماته عليا..وبعدين ماعاد هان عليا لأنه طول واجد..
ع جية نعيمه شبحتها زينب وقالت:تو يهون عليك كيف ماهان ع نعيمه..
قعمزت نعيمه وهي تقول؛شن هو؟..
كفايه:شعرك..
نعيمه:اها...شبحت لمرام وقالت..بدي يفسد ويتقصف هدا علاش قصيته..
خش هانيبال وهو يقول:فمن تقرمن فنهار الصيام من؟خافن ربي اتقن الله فأنفسكن..
جي قعمز حدا زينب وهو يقول..راكن اكتر اهل النار راكن... خافن ربي ديرن ماينفعكن..
خواته يضحكوا ومرام تضحك بصدمه..
شبحلها وقال :وانتي..حيه عليك حيه تقرمي معاهن حتى انتي؟اهااا...وبدي يلخبط فشعر زينب وهو يقول..تقرمي معاهن..تبي ربي يحاسبني عليك...اهاااا...
ويريش في زينب وهي تضرب فيه ع ايديه..
لين جاته خبطه بالسبحه ع صوابعه وصوت يقول:بطل كلب بطل..
حول ايديه وهو يتحسس فصوابعه ويضحك..
ع جية دلال ومعاها رانيا من الكوجينه..
قعمزوا حدا بعض جنب خالتهم كفايه..
هانيبال بضحكه:هكي يمي هكي تضربيني قدام
"أم عمار"..
دلال تلاشت ضحكتها وعيونها انفتحوا ع وسعهم وتعبوا بالدموع..
وكذلك كل الموجودين اتفاجئوا..
حناها شبحتلها وقالت:بتسميه عمار؟
هانيبال وهو يشوف لدلال بإبتسامه:إن شاء الله..
شبحوا لدلال..
دلال ضحكت ودموعها ينزلوا قالت:هدا حصتي اها بنقسمه اني وياكم..
ضحكوا..
مرام :وخي صغارك..
ضحكت دلال وهي تمسح فدموعها:بتجييبي هني ولا؟..
هزت مرام راسها بإيجاب وهي مبتسمه..
دلال قعدت تضحك بفرح وهي تهز فراسها بإيجاب..
فاطمه:إن شاء الله يجي كيف سمييه راجل قول وفعل..
كلهم قال :آمين..
ودلال تشوف لبطن مرت خالها بإبتسامه فرح...
في الكوجينه..
غاليه غطت الطنجره وقالت:ملاحظه هانيبال كيف متغير ماشاء الله..
رباب بإبتسامه:ايه سمن وزاد سماحه وجوه مولي مرح اكثر من قبل..
غاليه:الحمد لله واضح متريح مع بنت عبوده..
رباب:وحتى هي متريحه معاه..ربي يخليهم لبعض دوم..
ولمياء اللي تعسل في البسبوسه وتسمع فيهم شن يقولوا بتموت من السحن..
برا..
في المربوعه الخارجيه..
عبدالسلام:والله المعيشه زادت صعبت ع الناس مع رقية الدولار وقلة السيوله..
ميلاد:ربي يلطف بالحال..
حميد:منحة ارباب الأسر نزلت..
عبدالسلام :ايه..عندي قريبي ف*****بعتله البطاقه وهو تو يبعت الفلوس..
حميد:حتى اني بعتتهم لخو زوجتي غادي..شبح لميلاد..كان تعطيني بطاقتك ياميلاد نبعتهاله
ميلاد:واثق فيه ميه فالميه؟..
حميد بضحكه:قتلك عاطيه بطاقتي..
ميلاد هز راسه بإيجاب وقال:باهي...
فتركينه تانيه من المربوعه..
محمد وهو يشوف لتليفونه:غير تعالوا شوفوا..
شبحوله سند وحمزة ومروان بعدين قربوله..
بعد التليفون شوي بش يشوفوا معاه...
كان فيديو مصمم لعمار...
فيه صورة وهو فالكليه وفي حياته العاديه..
فالكليه من لما كان طالب..
وفي كل مرة كان يترقى ويلبسوه النجوم والرتب..
وصور ليه فإحتفالات الفاتح...
وصور ليه فالمحافل اللي تقام فسرت وكان يحضر فيها..
ومن حياته العاديه..
اغلب صواره مع خيله الجموح💔🍃...
وصور ليه في السباقات..
وصورتين أخيرات اثناء حرب 2011 نادرات جدا وبعد وين بش حصلهم صاحب الفيديو..
كل هدا كانوا يشوفوا فيه وهما يسمعوا فأغنيه فيروز...
"خبطة قدمكن ع الأرض هدارة"
سند:مدايره اصيل..
محمد:ايه...
مروان:مش عادي...
حمزة يدوب شاف منه لقطتين بعدين وخر...
عماد كان متكي حداهم ومغمض عيونه سمع اسم اصيل فتح عيونه وقلبه قعد يغلي غلي...
🍁🍁🍁🍁
الساعه 7:30قبل المغرب...
واااك قداش تحب العناد ياراجل..
محمد:عناد عينك..غير نفطر قبل وبعدين نفهمك كويس ياراس اللحم...
ضحك عماد..
حمزة:اني غير نفطر طول بنطير للجامع..
محمد بإستفزاز:اهرب اهرب..
حمزة بإمتعاض:ايه بنهرب...
"هههههههه"..
شبحوا لبداية الممر ع اليمين..
بانوا عليهم رفقه وحدهم ووراهم رزان والتلاته كانوا حاملين ومحملين..
محمد:غير امتى يذن..
ضحك حمزة..
اما عماد فكان يشبح القدام..
البنات لما شافوه تجاهلوا..
اما هي فعيونها كانوا لوطا..
حمزة:رزان أمري اللي مدايرتيه..
محمد بضحكه:حتى جيت بنقولها..
حمزة:خطيرة البنت في الحاجات هيا..
عماد يشبح لحمزة بنظرة تخوف..وحمزة ولا ع باله..
حد رزان انها تبتسم بس..
اما البنات فكانوا يضحكوا..
خشوا داخل...
بعدين جت سعيده..
لما شافت عماد ملامح وجهها تبدلت للحده..
حمزة:مرت خالي كيف حالك..
سعيده:الحمد لله كيف حالك انت ..
حمزة:الحمد لله..كل سنه وانتي طيبه..
سعيده:كل عام وانت بخير..ربي يحفظك..
وخشت داخل...
ع جية غاليه سلموا ع بعض بالكلام هي وسعيده اللي خشت داخل..وغاليه جت للأولاد وقالت:هي راجو شوي..
خشت داخل لقت البنات واقفات في الكوجينه..قعدت تهدرز عليهم...
برا..
شويه ...
وطلعت غاليه بصفرة مدتها لمحمد خداها ومشي..
بعدين طلعت رزان وهي متلخبطه ع الآخر..
يعني لو هو ماخداش منها حياخد حمزة...
لااا وألف لاااا 🔥..
قدملها طول بياخدهم منها..
والصفرة كانت كلها طواسي ...
هي رعشت الصفرة قريب طاحت منها..
حط ايديه ع ايديها اللي شادات الصفره ..
البنت تجمدت..
هو بعدين حول ايديه وشد الصفره من تحت وخداها ومشي..
عيونها المرقرقات بالدموع جو فعيون حمزة..
حمزة كانوا يشوفلها بتضييقة عيون..
بلعت ريقها والتفتت بتخش جت قدامها لمياء..
شبحتلها لمياء..
من فوق للوطا بعدين مشت خشت للكوجينه..
جت شبحتها فعيون حدهم اللي طالعه تمد لحمزة فالصفره..
رقيتلها ..
شبحت القدام وطلعت مدت لحمزة الصفرة ..
اما رزان خشت داخل بسرعه وهي تبلع فريقها وحاسه روحها بدوخ..
يدوب وصلت فنص الصاله ..
وطاحت من طولها..
سعيده بعيطه:حييي عليااا..
وناضتلها تجري..
وكل من شاف اللي صار ناضولها حتى هما..
وصار فيهم حال...
امها تخبط فيها ع خدودها وتقول "رزان..ماما..بنتي"..
وعماتها يحاولوا فيها حتى هما بش تنوض..
والبنت مافاقتش..
لين جتها غاليه بعطر قوي هلبه :حولوا حولوا..
وسعولها ..بخت منها ع رسغها وشمماته لرزان..
وفعلا بدت تفيق..
حميده كانت شاده طاسة ميه صبت منها فيدها وغسلت بيها وجه رزان..
سعيده ودموعها ينزلوا:هاه امي شني توا..
رزان بصوت يدوب يطلع:كويسه..
حطت الحاجه فاطمه يدها ع صدرها وهي تذكر في الله..
فهاللحظه..
آذن الحاج عبودة آذان المغرب...
فاطمه:الله اكبر الله اكبر...
لمياء بهمس:غير من لايم عليه..
سميه ضحكت بكتمان..
ومرام صدفة عينها جت عليهم..زبطتهم لكن تجاهلت...
🍁🍁🍁🍁
بعد صلاة المغرب..
الثلاته مقعمزات فوحده من الديار وهما لابسين ملاياتهم..
رزان ببكي:هو ليش يدير هكي..يبي نحرم ع روحي حوش جدي لما يجي!؟..
رفقه بغضب:مايبي الا كف ع وجهه..
حدهم:الحقيرة مرت عمك ركزت ع شبحتها..روزي تجنبي تكوني موجودة فمكان فيه عماد...
رزان هزت راسها بإيجاب وهي تمسح فدموعها..
في الكوجينه..
سعيده:امس بعد روحت من هنى مابت تاكل قالتلي بطني مليانه وتقهقرت من الدهان والنسكافيه ومش عارفه شنو..خليتها ع راحتها قلت حق لانها امس كلت واجد حار ع حلو..
غاليه:معناها ماسحرتش؟..
سعيده:تس..من لما راته وحالها منقلب..اني ماصدقت ولت كويسه ليش جي هدى..قالت الكلام هدا بعصبيه وعيونها مدمعات..
غاليه:خلاص سعيده تو بعد العشي روحي بيها..ونقول للبنات يعدنلها فالحوش وخلاص..
سعيده رشفت وقالت:هكي أحسن..
🍁وهدا اللي صار..
بعد تعشوا استأذنت سعيده وخدت بنتها وروحوا...
يعني شني ماما بنقطع حوش جدي عشانه!؟
سعيده بحزم:ايه..
وطلعت وصكرت عليها باب الدار..
تأففت رزان بعصبيه وقعمزت ع السرير...
🍁🍁🍁🍁
بعد صلاة التراويح..
كانت المربوعه الخارجيه عامره بأصوات الهدرزة والضحك..
زي الحوش كذلك تنسمع مع منه اصوات النساوين وهدرزتهم وضحكهم...
متداخل مع هالأصوات أصوات المولدات المفتوحه...
بعيد عن هدا كله بشوي
كانوا الولد وخاله حدا الجرف..
فاتحين مع بعض حديث مصارحه..
الخال ماكانش يسمع فصوت غير صوت ولد اخته وهو يسرد في اللي صار واللي داره سرد صادم بالنسبه ليه..
عماد:زي مااني غلطت هي غلطت..
قال كلامه وهو يوزع فنظره ع الوادي بعدين شبح لخاله...
لقاه يشوفله بنظرة خوفاته وهو مضيق عيونه..
هانيبال؛هدى واني اللي عابي عليك ونشوف فيك راجل وموصيك ع خوالك؟!!..
عماد رمش عيونه بشي من الخوف وهو يشوفله..
هانيبال:هي غلطت لإنها صغيرة ومازال ماتعرفش تحكم عقلها...لكن انت ياراجل ياعاقل ياكبير..شن نقول عليك؟!شن هو المبرر اللي يبررلك تصرفاتك نقدر نقنع بيه نفسي ونعذرك!؟
غير عيونه وشبح للوادي ومن داخل يخفق قلبه بشده
ابتسم خاله تهكما وقال:وعسى ان تكرهوا شيئا وهو خير لكم...باهي اللي صار هكي
حرك عيونه لخاله
كمل هانيبال يقول:باهي اللي ماصارش منكم..لأن واحد بعقليتك ويتصرف تصرفات كيف تصرفاتك هدي مايتأمن ع مراة غدوة ولابعد غدوة كان تعارك هو وياها يلبز مع هلها ويدير افعال يحشم بيهن روحه وهله ..الحمد لله اللي ماتمش بينكم نصيب لأنك واحد كيفك مايناسب بنت خوي اني..بنت خوي اني تبيلها راجل وين تغلط معاه يأدبها بينه وبينها وكان خلاها مايخلي وراه كان الطيب من الذكر والافعال الباهيه ويقول ماصارش نصيب..
عماد كان دمه يغلي غلي فعروقه من كلام خاله...
كان وكأنه يتلاقى فصفعات ع وجهه كل صفعه اقوى من اللي قبلها..
بس دائما الصفعات الكلاميه موجعه أكثر واكثر...
هانيبال بغضب شديدقال:هدى اخر كلام يصير بيني وبينك..
ملامح وجه عماد الغاضبه تحولت لملامح صدمه..
وهو يتبع بعيونه فخاله اللي كان ماشي بعصبيه للمربوعه..
وصل فيها فتح الباب وخش..
اما هو...
ضيق عيونه بعدم استيعاب..
التفت للوادي ..
تبدلت نظرة عيونه من جديد للصدمه...
ومازال كلام خاله يرن فوذنه كلام حار واعر واعر هلبه..
سمعه من غالي....
ومن قدوة...
من شخص يعنيله الكثير..
مش يقولوا الخال والد..
واهو عماد خسر خاله اللي كان يعتبر فيه والد...
وهالخسارة..
خلاته يتأكد ان خسارته لرزان
نهائيه...
🍁🍁🍁🍁
وخسارة حميده لخوتها ميلاد ومحمد والهادي كوم..
وخسارتها المرتقبه لهانيبال كوم تاني بالنسبه ليها..
من امس لليوم وهي قليلة الكلام والتفاعل مع الكل..
من خوفها..من قلقها...
متأكده ان ردة فعل هانيبال من اللي داراته حتكون اشد بهلبه من باقي خوتها اشد حتى من الهادي...
هانيبال..
بعد الحديث اللي صار بينه وبين عماد..
خدي حميد ع تركينه برا المربوعه..
تحديدا تحت السروله وسأله عن قصة حميده..
ولأن حميد حس ان هانيبال زي اللي معصب...
حكي القصه وقص منها اهم شي...
قال فنفسه الراجل واصل امس بس خلي يمشي هالكم يوم بهدوء...لذلك قرر مش حيحكيله باقي التفاصيل الا فاليوم قبل يوم الجلسه متاع المحكمه اللي حتكون بتاريخ 29\6...
هانيبال؛باهي هو شن يبي الخليقه هدى؟..
حميد:يماطل مماطله....
هانيبال:ايه..ليش..
حميد:شكله يبيها تتنازل عن حقوقها..
هانيبال؛يعدي فستين داهيه هو وفلوسه الكلب هدى اختنا مش بعازته هالفاسد..
حميد:اكيد..ع العموم ان شاء الله نهار 29 كل شي يتم..
هانيبال هز راسه بإيجاب وهو يوزع فنظره ع المكان..
وحميد مركز بنظره ع عيونه اللي يشع منهم الغضب..
حميد"ربي يعديها ع خير"...
🍁🍁🍁🍁
تاني يوم..
من بعد ماصلى عماد الفجر فالجامع طول تسقد لطرابلس..
بدون مايسلم ع حد..
ومع الساعه 9 الصبح..
روحوا البنات كلهم وكذلك حميد...
🍃🍃🍃🍃
ويعدوا العشر الأوائل بهدوء...
عاديات...
بروتين رمضان المعروف...
🍁🍁🍁
مرام كانت مقضيتهم بين حوش شيابينها واهلها..
وهانيبال شبه كل يوم معزوم لحوش صديق وكان ضو معاه فكل عزومه بإعتبار اصدقائهم مشتركين..
فيوم 28|6..
كان معزوم عند سالم...
وصار بيناتهم حديث ع انفراد بعد روحوا من التروايح..
سالم:الهادي قريب قتله ياهانيبال..
هانيبال يسمع وهو مش مستوعب من صدمه..
عبدالهادي مسالم مالاش فالعراكات والمشاكل شن خلاه يدير هكي!!؟
سالم:الهادي مالاش في المشاكل لكن هالكلب اللي ينقاله الصديق انظر شن قاله بش استفزه هكي..
🍁قعد هانيبال يفكر فكلام سالم طول الوقت حتى بعد روحوا كان يساير فضو مسايره طول طريق المرواح...
عقله ماكانش معاه...
لما وصل القطعه...
لقي سيارة حميد..
جي بش يحضر الجلسه..
مشي طول للمربوعه الخارجيه..
لما خش..
تفاجأ بعمه وخليفه مقعمزين مع ميلاد وحميد في المربوعه..
قلبه قبضه بقوة...
في الحوش..
تحديدا في الدار..
ماكانش عند حميده علم بجية عمها وولد عمها لمربوعتهم..
اصلا ماتندريش ان خوها حميد وصل
قاعده قدام التلفزيون تقلب فقنواته فيه بقلق
قلبها ناخصها
وخايفه بتموت من الخوف...
وقفت تقليب لما لقت فوحده من القنوات برنامج ديني..
كانت تبي تسمع كلام مريح اي كلام ليه علاقه بربي حيكون مريح...
الداعيه كان يتكلم ع موضوع معين...
وهو الإبتلاء..
كان يقول..
"هذه الدنيا دار اختبار..اختبار يليه اختبار...
اختبار بالعطاء والأخد..
اختبار في السعاده والحزن..
اختبارات لاتنتهي مادمت تتنفس..ومادام قلبك يخفق..ومادامت الروح ساكنة هدا الجسد الفاني فأنت دائما فإختبار..
الممتحن "بكسر الحاء"...هو الله...
والممتحن"بفتح الحاء"..هو انت...
ابتسم وقال...وفي هذا الإختبار او الأمتحان فقط..
يجوز للممتحن "بفتح الحاء" ان يستعين بالممتحن...
فقط في هدا الإختبار...
والله....لايرد من استعان به..."
ابتسم ابتسامه لطيفه وقال....
"اياك نعبد...واياك نستعين"
فعز انسجامها...
انفجعت لما سمعت اصوات عراك عاليه...
ناضت طول للروشن فتحاته وقعدت تسمع في الاصوات اللي كانت جايه من المربوعه الخارجيه وهي ترجف من الخوف...
فم البوابه..
ياغبيني ياغبيني...
الحاجه فاطمه:انظر شن صاير..انظر شن قال ولد رحيم..
غاليه بخوف:قلل قوله..
فحوش ميلاد..
ورا الروشن..
سعيده بخوف:يارب سترك يارب استرها..
رزان بخوف:شن في ماما..
سعيده بقلق؛إن شاء الله خير يا ماما ان شاء الله خير..
في المربوعه..
هانيبال بعصبيه:فى شي تعرفه ياحميد ومدرقه قول ياحميد تكلم..
حميد شبح لخليفه وخليفه يشبحله
عبدالله؛هالكلب هدى ماجي ل***** وقال مانطلقهاش الا فحضور اعضاء المجلس هكي وخلاص..لابد في شي..
ع خشة الهادي...
لاسلام ولاكلام طول قال :شنو في..
هانيبال:تعال هنى...ليش اضاربت انت وهداك الفاسد..
الهادي وزع نظره عليهم وقال:ليش انت ماتعلمش؟ماقتولاش؟؟
هانيبال ضيق عيونه وهو يوزع فنظره عليهم...
حميد:توا جيت بنحكيله..
التفت لحميد بصدمه وهو يشبحله..شويه وقال بصوت عالي
"تكلمووا الزفت..تكلموووا.."
🍁🍁🍁🍁🍁
🍁كانت واقفه ع الروشن وهي عاطياته بالظهر..
وشاده فمها بيدها وتبكي وتومي من الخوف...
فم البوابه..
🍁غاليه كانت مقعمزة وجهها مرفوع فوق وعيونها مغمضات بشده وهي تمتم بالدعاء..
وامها مقعمزة حداها تومي وهي تسبح بالسبحه..
ورا روشن حوشها..
🍁سعيده...واقفه وهي شاده الستار بيد..
واليد التانيه حاطتها ع فمها وهي تبلع فريقها من الخوف..
ورزان مقعمزة فالصاله تشوف لأمها بقلق و تترقب...
---------------------------------
مقعمزين يسمعوله وهو يحكي في اللي صار هداكا اليوم..
كان واقف يحكي بإنفعال شديد وبين عيونه قاعد يشوف اللي يحكي فيه...
الهادي بإنفعال:قدام العالم قالي اختك هي قاتلي تعال ارفعني..
كان مش الناس خشت بيني وبينه كنت قاتله..قاتله..
هانيبال كان يشبح في الفراغ وهو مصدوم..
عبدالله:والله مايجي راجل..كلب كيف هالكلب..
قام عيونه هانيبال فعمه وقال:خلاص مال..مش يبي يطلقها قدام المجلس خل ياخد اللي يبيه وتو نعرف كيف نخليه ياخده..
"لااا!"
كلهم ماعدا حميد وجهوا انظارهم اتجاه خليفه بإستغراب..
خليفه:لو درت هكي ياهانيبال حتخليه ياخده كيف مايبي هو مش كيف ماتبيه انت
الهادي وهو مضيق عيونه بإستغراب شديد:كيف يعني..
خليفه مسح بيده ع لحيته وهو يشوف لوطا
بعدين
رفع عيونه فحميد..
حميد غمض عيونه وفتحهم..
هز خليفه راسه بإيجاب وشبح لهانيبال وبدي يتكلم...
🍁🍁🍁🍁🍁
زعمه شن صار ياغاليه شن صار؟!!
غاليه:يستر الله..ان شاء الله خير..ان شاء الله..
حميده تهز فراسها بإيجاب وهي مربعه ايديها وضاغطه ع وسطها بقوة من الخوف...
في الصاله..
كانت امها مقعمزة في الصاله..
تحرك فحبات السبحه وهي تقول بهمس..
"سبحان الله..سبحان الله..سبحان الله..
سبحا..."
وقفت لما سمعت صوت ولدها الهادي المخيف وهو يقرب ..
شبحت للباب ..
شويه ..
وبان الهادي وهو جاي هاد ويقول:
الله يلعنك ياكلبه..الله يلعنك ياحقيرة..
حميده خبطت بإيديها ع وجهها وهي تشوف لغاليه بعيون جاحظات من الصدمه والخوف..
غاليه وقتها من خوفها..
ناضت وقفت قدام اختها...
تسمع فصوت الهادي اللي كان واقف فنص الصاله ويعيط بأعلى صوته:الله يلعن عمر الكلب اللي روح بييييك..مفروض خلاك في الشارع يامسخه...مكانك الشارع ياحقيرة..
حميد:هااادي..اطلع...
الهادي مايسمع فشي غير صوت غضبه:ريتني ذابحك نهارتها..ريتني ذابحك ولاخليتك روحتي معاه ياحيوااانه..
هي ترعش مع بعضها..
ودموعها سيل ع خدودها..
وكانت شاده بطنها بقوة...
وغاليه تسمع ودموعها ينزلوا...
اما امهم فكانت تشوف فيهم ومش قادره تتكلم..
بس تسبح..
مازال تسبح..مازال...
حميد قدمله وشده بش يطلعه وهو يقول:اطلع قلت اطلع..
الهادي :حوول..حووول...
دف حميد وقدم للدار .
هني امه ناضت وقفت..
هو وقف فالباب وقال بسخريه لما شافها تبكي وترعش:توا تبكي ياحيوانه تبكي...توا ياكلبه بعد ماخلتينا مضحكه لواحد مايسوى هزي علينا وعليك ياحقيره ولوحك كيف الكلبه فالشارع...لكن تعرفي نحمد ربي ع شي واحد بس...
"ان سيدي ما عاشش وري هالنهار "
شبحلها بإزدراء...
دفل عليها..
بعدين لف ومشي...
وامه وحميد معاه بعيونهم لين طلع من الحوش...
بعدين شبح حميد للدار..
شاف حميده وهي تبكي بالعبره وغاليه حاضنتها وتبكي معاها...
فطر قلبه منظرهم...
ماتحملاش...
طول انسحب من حداهم ومشي طلع..
اما امهم..
شبحتلهم حتى هي ..
بس كانت نظرتها لحميده نظرة غضب..
وجعتها اكيد..بس زعلها منها زاااد....
مشت طول لدارها وهي مازال تسبح..
فتحت الباب وخشت وسكرتها وراها...
🍃نقولوا لحسن الحظ..
ليلتها ماكانش موجود محمد...
🍃ونقولوا كويس ..
ان مرام وسميه عند اهاليهم ليلتها...
🍃ونقولوا الحمد لله..
اللي لمياء اختارت تفطر عند خالتها يومها وكيف مانقولوا مادحنستش عليهم كعادتها...
بس سعيده...
كانت واقفه فروشن دار رمزي..
وهي تبكي...
كانت منقهره هلبه...
هلبه...
وخايفه...
هلبه...
وهي تذكر...
"اللي درتيه فينا تلقيه فرزان"..
غمضت عيونها بشده وتنهدت بقوة وهي تقول:ياربي فيا مش فبنتي ياربي..راس هالبنيه ياربي راس هالبنيه اللي عطيتهالي..بنيتي ربي بنيتي..
وقعدت تبكي بشده....
وبنتها كانت في دارها..
تصلي فركعات القيام اللي تعودت تصليهم فكل رمضان وفي كل سجده منهم كانت تدعي للي تحبهم كلهم 💖
🍁🍁🍁🍁
حدا الجرف...
ميلاد اللي موجه نظره للوادي:شن الحل توا؟..
رفع هانيبال راسه فوق وهو يمسح ع لحيته..
خدي نفس وزفر بعدين قال:تو نتصرف..تو نتصرف..
ميلاد شبحله..
حط هانيبال يده ع كتف خوه وقال:قتلك تو نتصرف..عدي لحوشك تريح...
هز ميلاد راسه بإيجاب بعدين لف ومشي لحوشه وهو يقول..
"إنا لله وإن إليه راجعون"..
قعد هانيبال معاه بعيونه وهو يذكر في معلومه عرفها من سليمان لما روح بيهم من المطار..
⚡فلاش باك..
سليمان:ميلاد معادش كيف قبل ياهانيبال...نبيك تقنعه يسيب الخدمه فالورشه..
هانيبال ومرام شبحوله بإستغراب ممزوج بالخوف..
هانيبال:كيف معادش كيف قبل؟..
سليمان تنهد بعدين قال:جاه القلب...
⚡الوقت الحاضر..
غمض عيونه ..
بعدين تلفت القدام وفتحهم..
رن تليفونه...
طلعه من جيبه شاف المتصل..
فتح الخط..
ورد..
هانيبال:ايوه..
مرام:هاه حبيبي مازال مش جاي..
هانيبال:باتي عند هلك الليله..
مرام بإستغراب:ليش؟
هانيبال:انشغلت فشي ضروري ..باتي الليله وغدوة مع العصر نروح بيك..
مرام حست من صوته ان في شي..لكنها مابتش تصر عليه قالت:باهي حبيبي..رد بالك ع روحك..
هانيبال:حتى انتي..
مرام؛تليفوني بنخليه ع العام..
ابتسم ابتسامه خفيفه..
مرام:تصبح ع خير..
هانيبال:قدامك كل خير...
وصكر...
بعدين خدي نفس عميق وزفر بقوة...
ومشي قعمز ع السياج الإسمنتي ..
وقعد يفكر...
🍁كمل ليله كله تفكير...
حتى السحور ماباش يتسحر..
غمضه ماقدر يرقد...
لين آذن الفجر..
مشي مع خوته للجامع...
صلوا وروحوا..
وهو قعد..
ماقدرش يرقد نهائي...
🍁🍁🍁🍁
الساعه 11:30صباحا..
فتح باب الحوش وطلع..
صكره وراه وتوجه لسيارته..
كيف جاي بيفتح بابها ويركب..
وقف لما سمع صوت طقان قوي ع باب الكونشيلو..
ضيق عيونه بإستغراب..
مشي للباب طول...
وفتحه..
رفع حواجبه..
دفه هانيبال وخش وصكر وراه الباب...
الصديق؛تتهجم عليا فنهار رمضان!!
هانيبال؛لما يخشوا عليك حوشك من غير يدقوه..ويتشوا فيه النهار ويكسروا سيارتك ويتشوا فيها النار...وقتها قول تهجموا عليا..هدى كان لقيت من يسمعك...
الصديق:تهدد!؟..
هانيبال؛لا..نحذر فيك بس..وانت عارف شن نقصد..
ابتسم.تهكما..
قدمله هانيبال هبط بإيديه الزوز ع كتافه وشد عليهم بالقوة وهو يقول:لو كنت راجل كنت بطحتك بطحه بااااهيه..لكن انت مانكش راجل...وياللي مش راجل..توا بتعدي معاي للمحكمه..وتخش للقاضي وتقوله بنطلق..واني نقوله اختي متنازله عن حقوقها لأنها ماتبيش ولا حاجه من واحد
مش راجل كيفه...باك تحساب يامسخ بنصدقوا قطافك ع اختنا..راهي اختنا..اختنااا..يعني لاتغلط..ولاتعرف الغلط..
غير نصيبها الأسود جابها لواحد نجس كيفك..
الصديق:تندم ع كلامك..صدقني تو تندم..
هانيبال:قسما بالله مانادم واحد غيرك لو سمعت ان قطاف كيف اللي سمعته طالع برا..وحق الله وحق الله ياصديق وانت تعرفني كويس..نكرهك فعيشتك...ونوصلك لمواصيل عقلك مايتصورهنش..وانت تعرف هانيبال..مايقولش شي ومايديره..
من ورا روشن المربوعه..
حليمه بهمس:حسه خوفني المصيبه هدى...
هانيبال:دير اللي قتلك عليه تسلم ...
والصديق يشوفله بحده...
ومن داخله حاس بشعور خوف شديد...
🍁🍁🍁🍁
الساعه 4:00عصرا..
كانت راقده ع جنبها وعيونها مفتوحات والدموع تنزل منهم..
شبحت لباب الدار..
زادت فتحتهم ع وسعهم وناضت قعمزت..
هانيبال وهو يشوفلها بنظرات كلها كره..
قام يده اللي كان فيها ورقتين مدبسات فبعض...
حدفهم ع طول يده..
جوا قدامها مباشرة..
شبحتلهم ودموعها ينزلوا...
هانيبال:كانك حافظتي ع صورة خوتك قدام نفسك والناس راك خديتيها من يدهم ليدك وهما يكبوا ع راسك ويقولوا مايكسرك شي وحني معاك...لكن انتي اخترتي توصلك كيف مااخترتي لروحك تكوني فهداك النهار اللي كسرتينا فيه...
ولف بيمشي..
جت عينه ع حنين اللي كانت تشوفله بنظرات بريئة..
هو شاف فيها صورة بوها..
لذلك كانت نظرة عيونه جدا قاسيه..
مشي كمل طريقه وطلع من الحوش...
والبنيه معاه بعيونها...
شويه وطلعت غاليه من الحمام..
فاتت من باب المروحه..
شافت حنين قالت:تعالي حنونه..
حنين مشت معاها وهي تقول:خالي هاني كان هنى..
تفاجئت غاليه..
ومشت بسرعه خشت للدار..
لقت اختها شاده ورقه فيدها وتبكي بالعبره...
غاليه:طلقك!!؟..
هزت حميده راسها بإيجاب..
غاليه:قصدك تبكي عليه؟!!
حميده شهقت بعبرتها وقالت:نبكي..ع خوتي...نبكي ع خوتي...ع خوتي ياغاليه..خوتي....
انهارت بالبكي...
وغاليه اللي كانت تذرف فالدموع خدت حنين وطلعت بيها من الدار..
حنين:خيرها ماما..
غاليه رشفت وقالت؛مريضه بطنها توجع فيها..
حنين؛حتى انتي مريضه..
طلعت بيها فم البوابه وحضنتها بقوة وهي تقول بنبرة باكيه:ايه مريضه..مريضه ياماما..مريضه...
...يتبع....
