العشق المتمرد

المقدمة

#العشق_المتمرد
#جمان_فريد

#المقدمه

سنه 1994...
الساعه 6:30صباحا
يا احلى بلاد عطاك الله
فرسان شداد عطاك الله..
فارس مايهون عطاك الله..
قايد ويصون كتاب الله..
كتاب الله وتاريخ أجداد..
عطاك الله ياأحلى بلاد...
"غاااااليه انتي يابنت"...
طلعت تجري من الكوجينه..
غاليه: هاتي يمي..
فاطمه وهي تمدلها فخبزة الفرن : شدي شدي..
خدت غاليه من امها صونيه معبيه فرادي خبزة فرن: حلبتي العنز..
غاليه وهي تستف في الخبزة : ايه يمي الشيشه في الدار القبليه..
فاطمه : باهي..
مشت فاطمه متوجهه للدار القبليه يش تاخد الشيشه المتوسطه الحجم الأشبه بالبيدون ..
خدتها ومشت قعمزت بيها فوسط الحوش وبدت تخض فيها بش ادير الشنينه ..
ع طلعة بنتها التانيه حميده..
حميده: صباح الخير يمي..
فاطمه وهي تخض في الشيشه : خير خير فيسع ديري فطور سيدك..
مطت شواربها حميده بملل ومشت الكوجينه..
خشت لقت اختها تقطع في الكبدة..
حميده بضحكه: الحمد لله الدور مش عليا راني حصلت فقلاية هانيبال وعمر...
غاليه : ديري فطور سيدك خير مايجي يهد علينا..
حميده مشت للدولاب وهي تضحك وطلعت منه الزميته..
🍁نطلعوا من الحوش العربي البسيط...
ونمشوا للحوش اللي جنبه بالزبط..
حوش ميلاد....
قدامه بالزبط خطم الحاج رمضان وهو يحط فطرف جرده ورا ظهره والعكوز فيده..
الحاج رمضان راجل واعر وعقليته متعصبه هلبه ..
عنده 5بنات..
بالترتيب تسميتهم..
زينب ..كفايه...نعيمه..غاليه..حميده..
الخمسه بطلهم من سادس ابتدائي..
كان يقول البنت سادها تتعلم مايخليها تقرا وتكتب....
في المقابل عنده...
6ولاد..
كذلك بترتيب تسميتهم...
ميلاد..حميد..الهادي..هانيبال...عمر..محمد..
وكلهم ليهم الحريه يكملوا قرايه ولا يخدموا ع حالهم..
كان مفرق بين بناته وولاده فحكايه القرايه بس..
اما بالنسبه للمعامله..
وحده..
قاسي وجاف معاهم كلهم....
🍁توجه لمربوعة حوشه وقعمز فيها يستنى ففطوره بعد ماروح من الجامع..
هو قعمز من هني طلعت حميده من هني بصفرة الفطور..
لابسه قفطان طويل كم ومحرمه ع راسها..
حطت قدامه الصفره وبدون ماتقيم عيونها: صباح الخير سيدي..
رمضان قرب الصفرة: خير خير..
وطول حميده بعد سمعت رده لفت وولت للحوش...
سما بالله وبدي يفطر..
شبح ع جنبه لحوش ولد ميلاد تحديدا فوق السطح..
بعدين شبح لساعته القديمه اللي بسلسله فتحها..
هز راسها بإيجاب وصكرها وكمل فطوره...
📹خلونا نمشوا نشوفوا شن في فوق السطح...
ههههههههههههه...
في التركينه..
4شباب مطروحين وراقدين وكل واحد فيهم مداير حركه شكل😁
طلعت الشمس ع اكبرهم...
سخن وفتح عيونه بعدين غطاهم بيده..
واليد التانيه قعد ينوض بيها فخوه اللي جنبه..
الهادي بصوت ناعس: هانيبال...هانيبال...
حط ع راسه المخده..
الهادي: هانيبال ياكلب..
هانيبال بنرفزة ومازال مغمض عيونه:شن تبيي ..شن..
الهادي: نوضوا ياقبط سيدك شوي ويرقالنا..
عمر وهو لاف يده ع وجهه: باهي باهي..
ناض هانيبال اللي كان راقد ع بطنه..
ناض بنصه الفوقي بس: صحبنا ربحنا من خيرك مانقمحنا..
ضحك الهادي وقال :جاياتك مدرسه والسني شهاده تانويه تبي نوضه من الفجر...
هانيبال:😒...
ناض..
وطول مشي للدروج بش ينزل وفيده التيشرت متاعه..
والهادي كمل مهمته وقعد ينوض في الباقي وتحديدا محمد اللي نومه كان رزين😁
هانيبال وهو نازل تلاقى مع صغار خوه ميلاد وهما يجروا ورا بعض
قعد يريش فيهم ويضرب فيهم كالشوات وهو قارن حواجبه.
ره هادي بصارة ع فكرة بصارة هانيبال مانحكيلكمش قداش خفيفه ولطيفه😂..
من فوق..
الهادي: هانيبال يازفت البس الشرتوله متاعك..
شبح جيهة بوه ولبس تيشرته بسرعه...
غبارته كان يشوفه بكناتيره😵...
قعد يشوفله وهو ماشي لين فات من حداه: صباح الخير سيدي..
رمضان: خير...ارفع الصفرة..
طبس هانبيال رفعها...
رمضان وهو يوقف: ناضوا خوتكووو؟؟
هانبيال : ايه ناضوا..
ومشي رفع الصفرة للحوش..
خش: غاااليه....انتي يابنت..
طلعت غاليه تجري خدت منه الصفرة: فطوركم واتي
هز راسه بإيجاب وخشي للحمام...
________________
في نفس المدينه..
في منطقه اخرى...
عووووده.....ياعوووووده...
عودة بتذمر : نايضه نايضه
"عرووووبه نوضي عودة وتعالوا افطروا عمكم قريب يوصل"
عروبه بصوت عالي شويه: حاضر يمي...
عودة بإستياء: ووووك بنمشوا لحوش عمك 😣
عروبه بضيق: والله حتى مانبيها المشيه ولانبي نشوف زومة اللي سمه هايل ...جدري..
عودة قعمزت: ولا اني طايقه فيهم مخلوق عيت عمك هادوما غير الله غالب بوي مات بكري وخلانا..
بلعت عروبه عبرتها: هيا صبي تحركي..
وطلعت من حدا اختها..
عيلة عروبه جدهم جي هو ومرته وهما صغار لليبيا واستوطنوا فيها..
تحديدا في احد مدنها الغربيه اللي عايشين فيها توا تعلموا اللهجه الليبيه وتحديدا لكنة المدينه اللي هما فيها وشبه نسوا لهجتهم..
اي  حد يسمعهم يدووا مايصدقش انهم فلسطنيين ..
بس يبان عليهم انهم مش ليبين من انفتاحهم المحدود ..
بو عروبه ميت ليه 6سنين..
وماعندهاش غير اخ متزوج وعايش فطرابلس من فترة طويله قليل النادر يجيهم..
واخت اسمها عودة اصغر من عروبه بسنه.
عايشين في قطعه كبيرة فجنبهم عايشين عمامهم.
ماعدا عمهم الكبير عايش بعيد عليهم بشارعين وهو اللي كان متكفل بيهم بعد موت بوه..
ولده الكبير اسمه هايل يعشق عروبه بجنون بس هي ماطيقاش بسبب سوء اخلاقه وتخلفه..
قعمزت عروبه ع الفطور مع امها..
أمانه: عمك اليوم بيرفعك دبشي للمدرسه انتي واختك..
هزت عروبه راسها بإيجاب وهي تاكل..
امانه بضيق: سايري وتحملي بنتي معليشي..
شبحتلها عروبه وابتسمت بألم والدمعه عبت عينها : حاضر💔
🍁🍁🍁🍁🍁
مقعمزين يفطروا..
عمر: قالوا العام هي دا ..المدرسه بيخلطوها بنات وولاد.
هانيبال وقف مضغ وقعد يشبحله بتفنيص بعدين قال: برا برا!!؟
عمر بضحكه؛ وحق الله!!
هانيبال بلع لقمته وقال بعصبيه: كيف الزفت الأحرف؟؟
عمر بضحكه: حاجه تفرح هدي ياثور...
هانيبال بقرنة حواجب: تفرح التافهين اللي كيفك...وبعدين كيف بنات وولاد مع بعضهم كيف ؟؟شن المسخره هدي!!
الهادي اللي كان يمشط فشعره ع المرايه اللي كانت لاصقه ع الحيط في الدار القبليه: مش مع بعضكم المبنى اللي جنبكم بيحطوا فيه البنات...بيناتكم سور... كيف المدرستين غير ادارة المدرسه وحده...
هانيبال بإرتياح : قول هكي من الاول..
عمر بضحكه: نقزوا من الصور مافيش مشكله..
طلع الهادي من الدار القبليه وهو يضحك: مالا تافه..
وطلع من الحوش مرة وحده..
عمر: يعرف يحب ويدير علاقات غير هو؟!
هانيبال برفعة حواجب:علاقه؟!!!
عمر قرب من هانيبال وقال بهمس: مداير علاقه مع وحده تخدم معاه...
هانيبال بصدمه: الهادي!!!!
عمر بضحكه يهز فراسه بإيجاب وهو يمضع ..
هانيبال ضحك وشبح للصونيه هو يحرك فراسه ايمين ويسار: طلعتوا كلكم تافهين..
عمر: ههههههه...
💕هانيبال مواليد 77...
الهادي مواليد72
عمر مواليد80
محمد 84...
اما الكبار..
ميلاد 63..
حميد64..
البنات...
زينب 68...
كفايه70...
نعيمه71
غاليه73
حميده 75...
*******
فوسط ليبيا....
سرت.....
الساعه 10صباحا....
مزرعه مساحتها كبيرة..
صوت صهيل خيل..
حصان اسود يجري ...
بس كان فوقه واحد شاد بزمامه....
من بعيد شويه..
: فارس ولد فارس..
:معروف يابوي عمار فارس من اللي كان عمره 7سنين...
رجعوا الزوز شافوله...
وهو كان جاي ناحيتهم...
هدا بحصانه...وصل فيهم ونزل...
قدملهم بخيله وهو شاده من زمامه وقال بإبتسامه: شن يابوي..
مختار: ماعندي قول خلاص..
محمود خوه بضحكه: وهو يشبحلك قال فارس ولد فارس..
ضحك عمار وهو متحشم من بوه : العين ماتعلا ع الحاجب..
ضحك مختار وقال: اليومين الجايات بنعدوا ل****عرس ولد عمتكم بيبدا خلاص..
عمار بإبتسامه: ع خير إن شاء الله..
محمود: عاد انت ماشي لهانيبال..
عمار : نبيه يشجعني شوي فموضوع القرايه ..
مختار: بتقرا بتشجيع ولد عمتك ومن غيره😒
عمار بضحكه: تي غير شن قلنا!!بنقروا ياودي مش مبطلين..
مختار هز راسه بإيجاب وهو يشبحله بتوعد...ومشي..
قدمله محمود: انساها حكايه العسكريه ياعمار..
عمار هز راسه بإيجاب وخدي حصانه ومشي بيرفعه لمكانه..
ومحمود معاه بعيونه: مافي واحد عارف كساحة راسه غيري قال بيخش عسكريه معناها بيخشها..
عمار..يعشق الخيل..ومعمر....
عنده قدوة يحبه هلبه..
هو من احد اكبر العائلات المقربه للقذافي...
كل اللي شافه فيهم مرتين وكانوا عيونه يلمعوا لما يشوفه..
شخصية عمار غالب عليها العناد جلف وشديد بعض الشي
برغم صغر سنه لكن كلمته كانت تمشي حتى ع أمه لكن مع بوه ماعنداش كلمه...
الا في حكاية العسكريه اللي مصر عمار بعد الثانويه يخشلها..
طبعا عمار يكون ولد خال هانيبال...
ام هانيبال تكون اخت مختار بو عمار من أمه...
وفي عندهم قصة حتعرفوها بإذن الله في الأجزاء الجايه...
عمار وهانيبال نداد....
🍁🍁🍁🍁🍁🍁
بيب بيب بيب..
حميده بفرحه : نعيمه جت...
هانيبال وعمر طلعوا من تحت شجرة السرول وهما مبتسمين...
درس عبدالسلام راجل نعيمه...
نزلت نعيمه من السيارة بنت فيدها..
ونزلت من الخلف بنيه صغيرة عمرها 3 سنين...
كانت زي القمر شعرها ذهب وعيونها زي الزرق وبيضا حمرا..
قريبه لخالها هانيبال ...
نزلت تجري لما شافاته مشتله طول...
هانيبال بضحكه وهو فاتح ايديه: تعالي ياسمحه هي هي...اوباااا قامها فغمره..
عبدالسلام قعد يسلم ع ميلاد..
بعدين سلمت عليه نعيمه ..
شويه وقدمت لهانيبال وعمر اللي كانوا يلاعبوا فبنتها..
نعيمه: سلموا عليا ياسفاتله..
ضحكوا عمر وهانيبال وسلموا عليها بالخد..
هانيبال بضحكه: شنو حالك..
نعيمه بإبتسامه :الحمد لله..
عمر وهو يشوف لبنتها اللي فغمرها:حتى بنتك هدي سمحه كيف اختها..
هانيبال : مافيش كيف دلال حبيبة خالها..وباسها من خدها..
نعيمه بضحكه: عاد هانيبال دلال واقطع الخبر..
عمر:شن موقفك هنى انتي عدي سلمي ع امك ...
نعيمه : حييي امي😨..
ولفت تجري مشت للحوش..
وخوتها يضحكوا عليها..
عمر: من اني دلوله..
دلال: عمل..
عمر بضحكه: عمل صار..باسها من خدها..
هانيبال: واني..
دلال بضحكه طفوليه: هاني..
هانيبال ضحك وباسها..
عمر : صعب عليها اسمك..باهي ياسمحه قوليلي اما خير هنى ولا طرابلس
"نعيمه وكفاية وزينب عايشات فطرابلس"
دلال بضحكه طفوليه: نعرفش
هانيبال: تي عدي ياراجل انت واسئلتك التافهه..تعال نخشوا نسلموا ع بوها..
عمر بهمس:مش نازلي من زور بوها.
هانيبال تنهد: ولا اني بس الله غالب..
شبحولها لقوها تشبح للدجاج..
عمر بضحكه: مازال ماتفهمش..
هانيبال ضحك...وبعدين مشوا هما وياها لمربوعة حوش خوهم...
*******************
هادي بس المقدمه...
وبإذن الله الجزء الأول غدا