#العشق_المتمرد
#جمان_فريد
#الجزء_العاشر
جتهم الكنة التانيه وفطرت معاهم...
ولأن راجلها مشي مع بوه للوادي ....
قعدت معاهم ....
في الكوجينه..
كفايه: اني تزوجت في شهر 5 وميلاد شهر 7...من نفس السنه..
لطيفه : وزينب السنه اللي قبلكم؟
كفايه : ايه اخر السنه اللي قبلنا..
ابتسمت لطيفه...
زينب: انتي كم عندك اخت بالزبط..
لطيفه :من غيري 4...
زينب:شفت منهم زوز فالكسوة متزوجات ولا؟
لطيفه : ايه ...تهدرز ومركزة ع زينب وكفايه كيف يغسلوا في كل حاجه لما يستعملوا فيها بالذات زينب تبان نظايفيه بزايد...
ابتسمت وكملت هدرزة: بنسألكم سعيده وميلاد خدوا بعض ع علاقه..
ضحكت زينب وحركت راسها ايمين ويسار نافيه واشرت ع نفسها : اني اللي زوجتهم لبعض..
تفاجئت لطيفه...
كفايه: ميلاد ماكانش يبي زواج الأقارب..لكن قعدت وراه زينب لين خداها وقالتله بنت عمك اولى بيك...
لطيفه مازالت ملامح المفاجأه ع وجهها ومش مستوعبه..
زبنب ابتسمت بتهكم...
كفايه :جرت فجرته في الجردينه هادي وهي تترجى فيه ياخدها..
فلاش باك...
طلع منفعل للجردينه...
وطلعت وراه زينب تجري كانت عروسه وقتها..
زينب : ميلاد صل ع النبي..
ميلاد غمض عيونه بشدة وفتحهم: عليه الصلاة والسلام..
زينب : هدي بنت عمك وانت اولى بيها وبعدين سعيده اني نعرفها ماشاء الله عليها وهاديه وكويسه واجد صدقني مش حتندم كان خديتها..
ميلاد يشبحلها وساكت..
زينب: مسكينه ماحد طق بابها لتو بسبب خوها اعود بالله منه ..وهني يبان ولد العم اللي يهمنه بنات عمه ويخاف عليهن...ونعاود نقولك مافيش كيف سعيده ياميلاد بنت عمك في النهايه ..
نزل عيونه بعدين شبحلها وقال : تو نفكر في الموضوع..
الوقت الحاضر..
كفايه :فوت يومين وجي قال لأمي اخطبوهالي..
لطيفه مصدومه وخلاص..هزت راسها بإيجاب وشبه فهمت كويس سعيده شن تكون...
وهكي من هالجيه قدرت تعرف الكل وتحط كل حد فمكانه
وطبعا ليها حساباتها....
******
الساعه11:00
في الإستراحه...
كل واحد فيهم مقعمزة ع بلوكه..
سالم: كويس ..
سليمان :انت خدمتك ماشيه في محل عمك..
سالم: ايه الحمد لله ..
شبحوا لهانيبال لقوه يشبح جهة السور..
شبحوا لبعض وابتسموا...
......
غزاله : نبي نقصه كاريه..
سالمه :حرام شعرك حلو..
غزاله : تعبني ياسالمه طويل واجد وتوا لما نغطي فيه بالمحرمه تحسيه مش كيف قبل..
سالمه: ديريله زيت زيتون واهتمي بيه ..حرام شعرك حتى عروبه ديما تشكر فيه...شبحت لعروبه..عرو..به...
لقتها تشبح للسور وسرحانه..
شبحت لغزاله ورفعت حواجبها فوق ونزلتهم..
غزاله حطت يدها ع فمها وضحكت بكتمان..
.....
اختها مقعمزة مع بنات فصلها اللي أمال منهم..
ليلى : عودة..
عودة : همم..
ليلى: هانيبال يبي اختك؟
امال مركزة معاهم.
عودة ابتسمت بتهكم وهي تشبح لأمال : مش يبي صاحبتك..
وجه امال ولا فلون تاني..
جميله :صح امال قايلتها..
امال : كنت نبصر بس..
ليلى بضحكه: وانتن صدقتن ديما امال تحب تبصر بصارة تتصدق..
شبحت عودة لأختها اللي لقتها تشبح جهة السور: كيف يبيها وهما الزوز مش طايقين بعضهم..
امال وليلي شبحوا لبعض...
ليلى :ايه صح...
"طبعا كانوا يجبدوا في الدوة من عودة "...
امال شبه ارتاحت..بس مازال في قلبها شك...
*****
مروحات من الحوش اللي كانت فيه الدورة..
سعيده : ريتوها نجاة سجلت حتى هي في الدورة..
حميده: مرضيه بنت خالتها اكيد بدخلها معاها..
سعيده:تي غير وين تفهم هي في الحاجات هدي..
غاليه"ماهو انتي تفهمي فيهن واجد😒"
حميدة:كلنا مازلنا مانفهموا فيهن...مع الوقت نتعلموا..
سعيده 😏...
وصلوا للحوش..
وخشوا من فم البوابه"الباب الخلفي للحوش ويكون باب حديد"...
سعيده: بالسلامه..
الزوز ردوا :بالسلامه..
مشت سعيده وهما كملوا ..
لقوا امهم تخدم ع المسدة...
غاليه وحميده : السلام عليكم ..
فاطمه :وعليكم السلام..ها شن درتن..
غاليه :كأول يوم باهي..
فاطمه : كويس..كويس...
"ههههههههههههه"..
شبحوا لبعض وابتسموا ..
بانت عليهم من الروشن لطيفه واقفه في الكوجينه..
شبحوا لبعض وهما متفاجئات...
وخشوا للكوجينه..
كفايه : روحتوا...
زينب: هاه شن جو أول يوم...
غاليه بإبتسامه وهي توزع فنظرها عليهم: بعد الكيفساد "بعد هكي فساد"...
🍁🍁🍁🍁🍁🍁
الساعه 1:00ظهرا...
المرواح..
عروبه : ماصدقوا نزلوا علينا بالواجبات..
عودة : حتى حني..
سالمه :يومين تانيات ويبدوا تطبيقات...
غزاله : عروبه هانيبال من بكري مصبي يشبحلك..
قلبها قريب طلع من صدرها من قوة الدق💓💓💓💓💓
شبحوله وهي معاهم...
لما شبحتله شبحلها شويه ..
وكيف جاي بيمشي ..عيونه جو ع نفس الولد متاع هداكا اليوم..
نازل من السيارة وجاي ناحيتها..
عودة : عليك بلي احرف..هايل ..
عروبه شبحت وين ماتشبح اختها انصدمت..
شبحت لهانيبال ...
اللي كان بادي ع وجهه ملامح الغضب...
وطول لف ومشي..
هي اضااايقت ع الآخر...
سالم شاف الموقف ولحقه..
القدام بكل كانوا سليمان وعمر ماشيين مع بعض..
سالم:ولد عمها ياهانيبال..
هانيبال وهو يشبح القدام رد بغضب: واني شن دخلني جاي تقولي فيها تنحرق هيا وياه...
.....
في السيارة.
هايل: عروبه ليش رديتيني؟
عروبه تنهدت وقالت: هايل انت بالنسبه ليا كيف سامي وعمري ماحنتعبرك غير هكي..
هايل شبحلها شويه بعدين شبح القدام : في حد تاني.
عودة بلعت ريقها..
عروبه شبحتله بصدمة: هايل مافيش داعي للكلام هدى كان مانبيكش معناها في غيرك؟!!عليك منطق..
هايل هز راسه بإيجاب وهو يوزع فنظره ع طريق وقال: باهي اني بنأجل الموضوع توا لعند ماتخشي للجامعه..
عروبه غمضت عيونها بنفاد صبر: انساه ياهايل..
خبط الدومان بيده وقال: بنأجله ...نأجججله يابنت عمي...ونقولك..وحق المعظم يطلع في حد تاني ...دار حركه بيده ع رقبته ...دابني قاتله....عاود الحركه..قاتله...
وفتح المسجل وعلا الصوت...
وعروبه وعودة يبلعوا فريقهم من الخوف...
خوفها الأكبر على هانيبال❤
🍁🍁🍁🍁🍁
هانيبال اللي كانت النار فيه والعه...
اكتر من حرارة الجو...
اول ماروح دوش في الحمام الخارجي...ماباش يخش لحوش العيله..حتى حوايجه بعت عمر يجيبهم..
توضا وصلى..
ورقد...بصعوبه....وملامح وجهه كلها غضب ..
🍁الساعه 4:00
روح الهادي من العمل...
بعد بدل ودوش..خش للدار اللي فوق...
شافه راقد وشاف لوجهه...
الهادي : تس...حتتعب واجد ياهانيبال كان تقعد هكي...
تمدد الهادي حتى هو وبعدين سرح فحبيبته وابتسم..
وشويه شويه عيونه تغمضوا ورقد...
🍁الساعه 5:00 بعد العصر...
بالشوي عليكم ماتجروش..
حميد : حاضر يمي..هي بالسلامه...وحياهم بحركة اليد...
وهما ردوهاله..
كان اخر من ركب سيارة من السيارات التلاته..
تسقد خيري الأول..
ووراه سعد وبعده حميد..
ووراهم عمر وامه...
والحاج رمضان واقف بعيد شوي...
لين طلعوا من القطعه...
وكل حد مشي لحاله..
غاليه : بنعدي نرقد شويه نوضيني السته.
حميدة : باهي...
ومشوا خشوا لدارهم.
غاليه رقدت...وحميده ع التلفزيون....
****
سرت 💓...
مزرعه الحاج مختار...
سليمه:ماشاء الله ماشاء الله..
كامله بإبتسامه: السباق بعد اسبوعين..
اصاله: في الشرق..قداش خاطري نعدي غادي..
كامله: تعدي عينك..
امينه:يمي بخري ولدك الله وحد..
كان قدامهم يجري بحصانه الأسود اللي مسميه من لما انولد"الجموح"...
اول مرة يخش سباق ع مستوى البلاد..
والسباق كان شعبي...فيه هلبه فرسان..
هواصغرهم سنا...
خشت للمزرعه هي وامها يشوفوا فيه..
هندا حطت يدها فوق عيونها: يمي هدى عمار؟!
نوريه: ايه هو..
هندا : امتى كبر هكي ؟!!
ضحكت نوريه وقالت:ليك سنين ماريتيه...
من بعيد شوي..
امينه:يمي عمتي نوريه وهندا جن..
التفتت كامله وابتسمت ومشتلهم...
يسلموا ع بعض وكامله ترحب وتأهل وتسهل..
وهندا عيونها ع عمار كيف يجري بالحصان...
بعدين وقفوا كلهم يتفرجوا عليه..
نوريه : ربي يحفظه كيف باته فكل شي..
كامله: ايه والله كيف مختار فحاجات واجده..
هو من بعيد ركز ع زوز نساوين مع امه وخواته..
هدا شويه...
ومشالهم...
وصل فيهم...ونزل من ع الحصان..
شد زمام حصانه..وقدملهم..
عمار بإبتسامه :عمتي نوريه..نورتي..
ضحكت نوريه :عدي عدي لاني عمتك ولاخالتك...
عمار بضحكه: ياقعادي نرضي ونبرر..
امه ضحكت وقالت: حتى خالاته زعلانات منه..
نوريه: بكل يا كامله لاينشد لايدور حتى لما نجوكم مانلقوا فيه..فيش زعلناك ياكبدي.
ضحك وحط يده التانيه ورا راسها وقربه ليه وباسه بعدين بعد: حقك عليا..وسامحيني وسامحوني كلكم..هاه وعد مني كان فزت في السباق الجاي...نديرلكم اوكل زردة كبيرة ..
نوريه بضحكه:ربي يوفقك
هندا:شنو حالك ياعمار
شبحلها : الحمد لله..وغير عيونه لعمته..وين الضراري..
نوريه :بيجوا بعدين..
عمار :احمد بالذات ليه وحشه..
هندا:يوصلك السلام...
رد وهو يشوف لعمته: عليك وعليه السلام..
كامله: تعالوا نعدوا للحوش..ونكملوا كلام...
هندا :خاطري ندهور في المزرعه..
امينه :خلينا نحنا يمي هنى شويه وانتن عدن كان بتعدن..
كامله:شنو يانوريه..
نوريه:نعدوا للحوش وهنا خليهن شويه ..
كامله :باهي...
مشوا نوريه وكامله..
هندا التفتت لعمار لقاته ماشي للأسطبل ابتسمت ع جنب ومشت هي وبنات خالها...
****
الساعه 6:15 مساءا..
واقفه حدا الصور وتشبحله..
وهو متكي ع السيارة ويشوفلها..
ويبعتوا لبعض في الإبتسامات...
ع خطمةامال اللي كانت ماشيه لحوش اختها...
شافتهم ..رفعت حاجبها..
امال"ياسلام ياسلام"...
وكملت لحوش اختها..
خشت من فم البوابه : سعيده..
سعيدة: خشي في الدار...
خشت امال داخل ومشت للدار لقتها تتفرج ع التلفزيون..
جت وقعمزت: شنو صاير من ورانا...
سعيده شبحتلها بتضييقة عيون: شنو؟؟!!
امال:حميدا وغاليه..
رفعت سعيده حاجبها: وخليفه وحميده..
امال : لاحظت ع خليفه ..لكن حميدا ..اللي قال لأمي يومها كان جيت بتزوج ناخد من طرابلس..
سعيده برفعة حواجب: هو هكي قال؟!
امال : ايه بوداني سمعته..
ابتسمت:ريحتيني كان هكي..وحتى حكايه خليفه ساهله..
امال قعدت تفكر..في مصلحه ليها لو صار زواج تاني بين العيلتين ممكن ينفتحلها طريق مع هانيبال..
امال : احمم..هاك انتي خديتي ميلاد خلي وحده فيهن تاخد واحد من خوتك..
شبحتلها برفعة حاجب وقالت بحده:اسمعي...موضوع هانيبال تحوليه من راسك تنسيه مرة وحده من حوش عمك لاعاد نعطوا..ولانبوا ناخدوا...وتمت...
امال تأففت وناضت طول طلعت من حداها..
سعيده: عدي جدري حويل وبدري...
طلعت وهي متنرفزة....
وهي ماشيه لحوشهم..
قابلها هانيبال جاي من غادي...
امال" امتى جانا!!؟"..
فات من حداها..
امال : خير هانيبال..
هانيبال بدون مايشوفلها وبدون نفس: خير..
وكمل طريقه...
تنهدت وقالت فنفسها"آه منك يامجنني 😍"..
كملت طريقها ...لقت غاليه مهناش..
وسيارة خوها حتى هي مهناش..وكملت للحوش...
🍁🍁🍁🍁
في الليل...
الساعه 10:36ليلا...
راقدات في اسرتهم..
عودة : عروبه خايفه من هايل..
عروبه:انتي ديما خوافه..
عودة شبحتلها:مش خايفه يدير شي فهانيبال..
عروبه قلبها انقبض بقوة: ليش يعني شن عنده معاه!
عودة: وراس عروبه فكيني من الإستغباء متاعك..فاهمه قصدي..
عروبه: مانستغباش ..مافي شي بيني وبينه ومش حيكون في وتمت..وادمدري...
وعطتها بظهرها ورقدت..
عودة : اففففف..وغمضت عيونها تحاول ترقد..
اما عروبه قلبها كان مقبوض هلبه وفعلا زاد خوفها علي هانيبال بعد كلام اختها...
عروبه" اساسا مافي شي بيني وبينه ومش حيكون خلاص"..
غمضت عيونها بشدة بش ترقد وماتفكرش اكثر..
*****
مكالمه هاتفيه☎️
هندا: والله فرصه ياغبيه..هو قال لما نفوز بندير زرده وع الغالب حيفوز..المهم..تعالي ومادخلكش بخواته..
سمر: انتي هكي تقولي..
هندا : نبيك سلفتي يابنت انتي...وكيف عمار والله مانك لاقيه...ارمي شباكك عليه من توا..
سمر تنهدت : باهي هو سمح واجد..
هندا: سمح بس مش واجد لكن شخصيته ماشاء الله..
سمر بضحكه: شوقتيني نشوفه كيف راح...
"سمر بنت عم عمار وبنت خال هندا وهي وهندا صاحبات هلبه ومتافهمات وشخصياتهم قريبه ع بعض..
سمر مواليد 79"...
(اي شخصيه تمر عليكم جديده حطوها في مخزن الذاكرة حيكون ليهم دور في الأحداث مع الأبطال...)
******
مقعمزة تنقي فحواجبها واختها متكيه حداها وتهدرز..
حميده: باهي يعني لعند امتى العمر يجري واللي فعمرنا بصغارهن..
غاليه وهي تنقي: الله غالب نراجوا وخلاص..لين المصيبة حسن يلقى وحده ترضا بيه ولايموت ويريحنا..
حميدة : إن شاء الله يموت ويريحنا..هييي ماتنزليش ع الحاجب واجد خوتك مركزين ..هانيبال مايفوته شي...
غاليه :تنظيفه بسيطه هي...
"لعن الله النامصه والمتنمصه..بس نعيد ونكرر اني قاعدة نسرد في احداث واقعيه "...
🍁🍁🍁🍁🍁
🌄في اليوم التالي..
في المدرسه..
الأبله تكتب ع الصبورة..وهما يتوشوشوا..
عروبه: غزاله ..احمم..شفتي هانيبال الصبح..
غزاله ابتسمت بغمزة؛ ليش..
عروبه: ردي بلاصماته😳💓
غزاله بضحكه: لالا..
سالمه التفتت: حتى اني ماريتاش..
التفتت الأبله: ياطالبات..
انخلعوا..
وكل وحده ركزت فكراستها..
شويه طق باب الفصل..
الأبله : تفضل..
انفتح الباب وخش استاذ الرياضه..
الأستاد؛ بناخد من وقتك شويه ياأبله..
الأبله؛ تفضل..
الاستاد: ياطالبات؛ حصة الرياضة بعدين في الساحه التانيه..
انصدموا...
الأستاد؛ بعد تكمل الحصة هدي تطلعوا للساحه التانيه وحيكون معاكم المدير..باااهي..
كلهم: باااهي..
الأستاذ : كويس ..شكرا ياأبله..
الأبله:العفو ..
طلع الاستاد..والبنات بدوا يتهامسوا.
الأبله : امنعوا الصووووت..
شبحولها بعدين ركزوا في كراساتهم وكملوا كتيبه..
🍁🍁🍁🍁🍁🍁
طرابلس..
باب الشقه يطق..
طلعت من الكوجينه ومشت فتحت الباب..
جارتها تبكي: والنبي يانعيمه تنزلي تقعدي مع الصغار..غير راجلي مريض وبنمشي معاه للمستشفى..
نعيمه بخوف: لاباس خيره..
جارتها : مش عارفه ياوخيتي طاح ومعاش تحرك..غير فيسع وراس وخيتي..
نعيمه: باهي باهي..
خشت تجري ..خدت محرمه لبستها وخدت بناتها وطلعت من الشقه وسكرت الباب..وتوجهت طول لحوش جارتها اللي قدامها...
🌴🌴🌴🌴🌴🌴🌴🌴🌴🌴🌴🌴🌴
ماشيات في طابور ومعاهم ابله..
وصلوا لباب اللي فالصور الفاصل..
فتحه المدير..
وبدوا يخشوا واستاد الرياضه يستنى فيهم..
سالمه: مكبر ساحتهم..
عروبه:عندهم ملعب طايرة..عليك فرق...
غزاله ضحكت...
وزعت نظرها ع الساحه:حي..
شبحولها :خيرك ..
غزاله:شوفوا من مصبي حدا الرايه..
من بعيد شوي..
هانيبال بعصبيه:مهزله وحق الله..
سالم وهو يشوف للبنات خاشات :متأكد ..
سليمان بضحكه :زعم يولي فكلامه..
هانيبال استغرب وشبح وين مايشوفوا انصدم..
سالمه بضحكه: جوووو..
غزاله : ووواك من هداك اللصقه سالم..لكن عمك هانيبال عيونه هنى..
عروبه قلبها يقربع بقووو قوه...وحاسه روحها بدوخ..
توزع فنظرها ع الساحه..ووجهها احمر...
🍁فصل هانيبال كانت عندهم حصة رياضة وقتها حتى هما..
كل فصل خدي جيهه..واستاذه معاه
بس القلوب كانت قريبه ع بعض لين خلاص💓💓
بعد مافات من الحصة عشرة دقايق..
في رياضات تسخين..
الأستاذ: من فيكم تعرف تلعب طايرة..
مدوا ايديهم كم بنت من ضمنهم عروبه..
في الجهة التانيه..
الأستاد التاني : مافيكم حد يعرف!؟؟.
مدوا ايديهم...وهانيبال معاهم...وهو مايعرفش لكن الكلام اللي قاله الأستاذ قبلها خلاه يرفع يده..
الأستاذ : باهي كويس..حنديروا مباراة عاديه مع
زميلاتكم كبدايه..وحيكون في دوري بين الفصول من هنى لعند نهاية السنه...استعدوا..
اشر لهانيبال واللي معاه..تعالوا..
مشوا معاه..
من بعيد..
سالمه : شوفي غزاله..
غزاله: هههههههههه..
الأستاد: باقي الطالبات عدن قعمزن غادي..
كل فصل قعمز فجهة ..
المهم مقابلين بعض..
الصدفه التانيه..
ان الفرق كانت مخلطه...
كل فريق فيه بنات وولاد...
وهانيبال وعروبه جو فنفس الفريق...
سليمان : ههههههه..وحق الله كان متخططلها ماجت هكي.
سالم ابتسم: نصيب...
سالمه : حييي عليك جو..
غزاله:ههههههههه...
....
كل فريق مشي في جهه..
هو فتح بطم السوريه وحولها..
وهي تسرقله في النظر💓😳...
ماباش يشبحلها بكل..
لكن لقاته يقرب منها...
قعدت جامده فمكانها..
هانيبال وهويشبح القدام:مش ليكن الحاجات هدينا..
عروبه: والله !💓
هانيبال برفعه حواجب: والله..انتن ليكن الكوجينه بس..
عروبه : متخلف..
هانيبال شبحلها بتضييقة عيون: شنووو..
عروبه : شي..💓
وبعدت عنه ..
هو ابتسم ع جنب..وقعد يقرب منها..
سالمه : رسمي الحكايه..
غزاله: اه ياحظها..
سليمان : مش مصدق هدى ولد عمي هانيبال..
سالم : انشدني اني عن الحب ياصاحبي..وعيونه ع غزاله اللي مش معبراته...
وتبدا المباراة🏐
وعاد مانحكيلكمش ع هانيبال كيف يرفس فيها..
وعروبه تضحك عليه..
وكل مرة يجي الاستاذ ويوجهه
هانيبال: ليا مدة معاش لعبتها شكلي ناسي خليني نكمل بش ندكرها..
الأستاد تنهد : باهي كمل..
عروبه : بسببك انت بنخسروا..
هانيبال: اسكتي احسلك..
عروبه بهمس: متخلف..
هانيبال: نسمع ..
عروبه خافت وبعدت..وهو مبتسم وخلاص..
رجعوا يلعبوا...
لما يجي واحد من الأولاد يعطي كورة لعروبه هانيبال ياخدها..."غيرة 💓🔥"
عروبه : هدى خيره!!😳💓...
عروبه قربت منه:شن اللي دير فيه هدى..
هانيبال : مايخصكش..
اللي من هني وهني يتفرجوا ويضحكوا...
الأستاذ: غلطه تانيه بنطلعه...
الاستاد التاني : واضح مايعرفش..
شويه..
وواحد بعت كورة لعروبه..
عروبه :والله ماواخدها...قربت تجري..
ونقزت وهو نقز..
بيضرب الكورة عطاها ع وجهها بقفا ايده كف...
جاها كف ماهو كف...
هو قريب مات...
هي شدت خدها بايديها الزوز وعيونها دمعوا ولفت بيها الدنيا وطاحت مغمى عليها...
"ع فكرة الشخصية الحقيقية لما حكتلي ع الكف...قالت احلى كف كليته فحياتي ❤🍁"
....يتبع....
