#العشق_المتمرد
#جمان_فريد
#الجزء27_القسم2
درس عبدالسلام سيارته..
وعيون حمزة بلهفه يستنوا امتى تنزل...
نزلوا من السيارة...
شافها ..تقول عطشان وشاف الميه..
كانت لابسه قفطان ياجوري طويل وعليه وشاح من نفس اللون...كانت طالعه تجنن...هي كل ماتكبر تزيد في الجمال...
دلال زايد مواصفاتها اللي تعرفوها عنها قبل طويله وجسمها حلو هلبه...
طلع خيري من المربوعه سلم عبدالسلام...
والحاجه فاطمه بعد سلمت عليه بدت تسلم ع بنتها...
والبنات واقفات حداها...
شبحت دلال لخالها محمد ابتسمت..وهو ابتسم وشبح لحمزة..
اللي كان خارج التغطيه...💓
قدملهم محمد وسلم ع اخته بعدين البنات..
محمد: دلوووله العسسسوله..
دلال بضحكه: كيف حالك حمادي..وسلمت عليه بالخد.
محمد :الحمد لله ياحنه انتي شنو حالك ..
دلال بإبتسامه :الحمدلله..
نعيمه :واني ..
ضحك محمد : تسلمي ع امك مازلتي عشر مرات تسلمن..
وقدم سلم عليها..
رمزي :شنو حالكن..
صافحاته دلال :تمام انت شن مداير..
سلم ع نور: الحمد لله ماشيه..
نور: طلعت نتيجتكم..
رمزي :بعد شوي بنعدي نشوف...
دلال :بإذن الله ناجح..
قدم حمزة بعد سلم ع خالته جي لدلال و مد يده:كيف حالك دلال💓
دلال بإبتسامه صافحاته: الحمد لله ..كيف حالك انت
حمزة : الحمد لله..💓
سحبت يدها وهو كان يلقى مايسيبها..
شبحت لقت خالتها غاليه وحداها رانيه يشوفولهم من بعيد ويأشروا🖐🖐..
طول مشولهم..
ووراهم نعيمه و امها..
وصلوا فيهم..
دلال:غلوشتي ياعمري استاحشتك ..حضنتها بقوة
وغاليه تمسح ع ظهرها وهي مبتسمه:حتى اني دلولتي..
اما نور مشت طول لحميده بعد سلمت ع رانيا..
نور وهي حاضنه حميده: ميدا ياقلبي..
حميده :سلمها السمحه..
رانيا تبعد في دلال وغاليه عن بعض:حتى حني نبوا نسلموا..
بعدوا وهما يضحكوا..
وسلمت دلال ع رانيا بالخد...
بعدين خشوا داخل ...
وكملوا سلامهم داخل..
....
في الحوش اللي حداهم...
ساوتلها شعرها وقالت:عدي توا ..
رزان : باهي...
وطلعت طول تجري ومشت لحوش جدها وخشت من البوابه..
خشت للكوجينه...
رزان : السلام عليكم...
شقلبوا عيونهم زينب وبناتها...وهي دارت نفس الشي..
نعيمه : اهلا رزونه...
قدمت رزان وسلمت ع عمتها بالخد...
نعيمه :كيف حالك حبيبتي..
رزان:الحمد لله كيف حالك انتي...
نعيمه بإبتسامه:الحمد لله..ماشاء الله كبرتي واحلويتي..
رزان ابتسمت..
بعدين مشت لعمتها زينب سلمت عليها باليد...وفاتتها...وسلم ع البنات برووس صوابعها...
هما يشبحولها برفعة حاجب..وغاليه تفنص..وحميده تشبحلها بربع عين..
وقفت بحداهم...
ع خشة دلال : اييه شن جوكم..
ردوا كلهم بأصوات متقطعه:الحمد لله..
غاليه بإبتسامه:سمنتي دلوله..
دلال بفرحه :بالحق!
حميده :ايه مش كيف جيتك في العيد..
نعيمه: القرايه سلبتها..
زينب :مالا اني شن نقول ع رانيا ماتموا امتحانات الشهادة لين ربي خدي فيها وعطي...
غاليه توزع فنظرها ع دلال ورانيا : بالنجاح ياربي..
ردوا الزوز بإبتسامه:آااامين..
حميده نخصت رباب :وانتي ياشاطره..
ضحكت:خلاص كلها هالسنه ونتم المعهد ونفتك..ويجينا صاحب النصيب ونرحلوا ياااارب..
ضحكوا كلهم..
زينب بضحكه:يلي ماتحشمي..
سمعوا صوت الكلاكسات...
نعيمه:واخيرا كيفو..ليا قريب شهرين ماريتها ع التليفون وخلاص..
دلال بضحكه:جي البارد.
رانيا ضحكت...
غاليه :بسرعه بسرعه خلي نوتي القهوة...بالله رزونه عدي بسرعه جيبي الولاعه..غيرولاعتنا تو تمت..
رزان :باهي..
طلعت رزان من الكوجينه..وبعدها من فم البوابه وهي ماشيه تجري وقفت لما وقف قدامها..
رزان :حول..
عماد:لا..
رزان : حووول..
عماد:معاش تعيطي يادريه..
رزان: انت بارد واجد..
عماد بضحكه :والله...شدها من شعرها اللي مدايراته ذيل حصان..قعد تعيط..
لين جت امه من وراه ..
كفايه:يابارد خلي البنيه ..قرصاته..
طلقها وهو يضحك ويتحسس فيده..
كفايه خدت رزان :كيف حالك ياأمورة..
رزان: الحمد لله..
عماد: هههههههه صوتها خيال ..
رزان شبحتله وشقلبت عيونها شبحت لعمتها اللي كانت تضحك:بنمشي لماما ..
كفايه :باهي بري...
مشت تجري ....
مشوا عماد هو امه يضحكوا...
خشوا...
عماد: ياقوووم..
حميده :جيييت ياضايل..
عماد:ههههههههه...
خشت امه الأولى وبعدها هو..
طول مشي لحميده وسلم عليها بالخد..
حميده:اللي وصيتك عليه شن صار فيه..
عماد بعد وقعد يشفشفلها فشعرها:غير نوصل..غير نوصل يامتاع المصالح..
كلهم يضحكوا..
وحميده تضحك وتعيط...
كفايه دف فيه وهي تضحك:خلي خالتك يامعفن..
ضحك وحول :ايه جبته جبته..
رباب :شن هو؟!
التفتلها :اوووقصقاصه..مديده...وسلمت عليه..
رباب: غير قولي شن هو..
عماد :بري طيري..ومديده لرانيا...شن جو..
رانيا بإبتسامه :تمام..شن جوك انت...
عماد ؛مليح..مد يده لدلال..فلة..
ضحكت :اسمع مش ماده يدي ايوه..
عماد بضحكه:التزمتي ؟!
دلال بضحكه:ايه باهي..
عماد:مدي يدك يا فرخه ماتقعدش يدي ممدودة..
مدتها دلال وهي تضحك..وهو سلم عليها بالقوة اللي قريب كسر صوابعها..
دلال تتوجع:أاااي..ياخاااالتي ..
ع خشه مروان ومالك ومعاهم حمزة...لما شاف اللي شافه رقيتله.
حمزة: امتى تبطل برادتك هادي ياراجل !!..
عماد ابتسم وحول يده..
ودلال شاده يدها :مبردك توجع..
ضحك وكمل سلامه ع باقي خالاته ...
وبعدها سلموا خوته...
غاليه:قعد غير سند ياناري..
زينب تنهدت: الله غالب امتحان الدور التاني نهار السبت..
حميده:لولا المرضى اللي مرضها راهو الترتيب الأول..
زينب تنهدت: الله غالب..لكن بيجي مع عمتي..
كفايه :ربي ينجحه..وين نور..
مروان :مع حناي..
عماد:ماعندهاش الروح معاها..
دلال: نور وينك ياعزايز ديما بحداهم..
مروان ابتسم..
مالك: وين عمر...
غاليه:في القهوة...
رباب :احسن..
نعيمه بضحكه:شن درتيله تاني
رباب حطت يدها ع فمها وحولتها :خليني ساكته...
حمزة: غير يروح تشوفي شن يدير فيك..
دلال بضحكه:اصلا الطريحه تاكل فيها منه ديما من غير شي
ابتسملها حمزة💓..
وحميده وغاليه معاه ع الخط...
عماد يشبح لحمزة:رمزي وين
رانيا💓
حمزة بضحكه:احتمال بنحصلوا زردة سمحه..
زينب:علاش..
غاليه بإبتسامه:ماشي يشوف النتيجه..
نعيمه:ربي يفرحه..
كفايه :لا اللي زي رمزي وحمزة ومروان ومالك يفرحوا مش زي بعض الناس..
عماد رفع يده :هي آنستوا بعضكم..
وطلع وهما يضحكوا عليه ع جية رزان...
ريشها من شعرها ومشي وهو يضحك..
رزان:اااي..يابارد يارزين..
وخشت داخل..
🍁🍁🍁🍁🍁
جن ياحنه اصوات ضحكهن قالبات الدنيا..
امال :كيف بديري انتي وياهن فعرس الهادي مش عارفه.
سعيده: هن فحالهن واني فحالي..عرس سلفي وولد عمي ماني غايبه عنه..وحتى انتي وعزيزة تعالن..
امال: خليقة اللي سماها رباب هدي مش متحملة شوفتها..
سعيده:عدي واقهريها هاللفعه هدي..سبحان الله كيف عمتها نجيه ...
امال:والله حق سماويه كيفها..
سعيده:وواعرة كيف امها ماتنقرب..لاوسليمان قال نبيها هدى اللي مازال..
امال :ناقصين ماهو..
سعيده بضحكه:عطاها طريحه سمحه...
امال :لكن موليه كيف الحلوفه من كثر الضرب معاد تحس ره..
سعيده: تو ندوروا ع شي يخليها تحس
امال ضحكت برفعة حاجب..
سعيده بعد ضحكت قالت:خليني منهن وقوليلي شن رايك نلبس هدى ولا هدى..
امال: الاتنين يدرهوا الكبد..
سعيده: حرام عليا ماعندك ذوق ولاتفهمي..
🍁🍁🍁🍁🍁
سرت💓
مقعمز هو وياها في الجنان يشرب في القهوة..
هندا :وامتى بتعدوا..
عمار وهو يوزع فنظره ع الجنان: السبت ان شاء الله..
هندا :وبتعدي عمتي حتى هي ؟
عمار هز راسه بإيجاب..
هندا :امم..باهي...بتقعدوا اسبوع..
عمار:ايه..
هندا : باهي..
عمار رشف اخر رشفه من القهوة وناض..
هندا ناضت :اقعد تغدا معانا دايرة عصبان..
عمار :عندي ماندير...
ومشي طول..
هندا تنهدت بضيق والدموع عبواعيونها..
🌴🌴🌴🌴🌴🌴🌴🌴🌴🌴🌴🌴🌴
الساعه 2:30ظهرا..
الخوات واقفات في الكوجينه يوتوا في الغدي ويهدرزوا.
والصبايا مقعمزات في الصاله ويهدرزوا..
وحداهم حناهم متكيه..
في الكوجينه..
حميده:يومك وتاليك طرايح وعياطاتها قالبات الدنيا..
زينب:زيدهم منه..
غاليه ضحكت..
كفايه: حصلت هالمصننه من يربيها ...
غاليه ضحكت وقالت: يومتها..عديت لحوشها بناخد منها خميرة...
ريتها مقعمزة في الصاله ووجهها خباش..منين سألتها خيرك قالتلي ردت عليا وقالت ناشتني شجرة الرمان..درت روحي صدقتها.
زينب بفرحه:قصدك عاطيتها طريحه!!
حميده:ههههههه..احكيلها ع عراك الشباشب..
كفايه: ههههههه شباشب.
نعيمه بضحكه:عيلة دردنو رسمي...ايه احكي..
غاليه: يومتها كملت حمي الخبزة وجيت موليه للحوش سمعت حس دوشه التفتت.
ونلقى سعيده طالعه ويجيها شبشب ..وهي تاخد شبشبها اللي لابساته وتحدفه..وتقول في كلام الله لايروعك وراويه ترد عليها بالأحرف ..
زينب بضحكه:راويه هادي شكلها نار حمرا..
حميده:هنا يبن يحكمن حكومتهن..وراويه ماتحبش من يحكم فيها وفي معيشتها..
نعيمه: عودو بالله منهم..من سلم منهم هدوما..
🍁🍁🍁🍁
باهي انتي شن رايك ..
رباب :حلو كله دلوله وبعدين القالب غالب..
ابتسمت دلال بخجل: تسلميلي..
نور:مش ناقصه من ينفخها راه معاش موليه تشوف في حد..
رباب بضحكه:نفشوها بعدين..
ضحكوا...
ماعدا رانيا اللي كانت تستنى امتى يروح رمزي وتعرف ش صار فنتيجته..
فاطمه وهي راقده:دلال انتي كيف رانيا في القرايه..
شبحولها وابتسموا..
دلال:ايه ياحناي اني وياها شهاده تانويه..
فاطمه :باهي باهي ربي ينجحكن....
دلال ورانيا :آمين..
"اووووووووووووووووو"..
ضحكو البنات وين شبحوا للباب..
رباب ناضت ووقفت حدا الدار..
عمر قدم: تي شنو حالكن شنو حالكن..
سلم ع رانيا : شنو حالك ياطرشوله
ضحكت رانيا : الحمد لله ..انت شن جوك..
عمر : الحمد لله ..
بعد وجي لدلال: اوووو فله..سلم عليها ..شنو حالك ياصفرا..
دلال بضحكه:الحمد لله..
بعد وسلم ع نور: كبرتي يافرخه..
ضحكت نور:كيف حالك خالو..
عمر: نجيها المؤدبه..الحمد لله..
بعد وجي لرباب : انتي ياحيوانه حصلتي..
رباب بضحكه:نعيط ونجيب سيدي "جدهم يقولوله سيدي حتى هما"
عمر:تجيبي حتى معمر القذافي والله ماك مفوتيه..شدها من يدها وجبدها ..ولف يدها ورا ظهرها وحطها ع الحيط..بحيث وجهها يكون لاصق في الحيط..
فاطمه ناضت قعمزت:خلي البنت يامضلول..
عمر :والله ماني طالقها لين تتربى..
فاطمه :شنو دارت..
البنات يضحكوا لأنهم عارفين شن في..
ورباب تضحك وتعيط..
طلعوا خالاتها من الكوجينه..
زينب بضحكه :تستاهل..
نعيمه:ههههههههه باهي غير اطلقها وسلم علينا
ضغط ع يدها اكثر بعدين طلقها..
وهي شادة يدها وتتوجع: يامسموم..
قدم وسلم ع خواته..
وهما فعز انسجامهم..سمعوا صوت كلاكس..
رانيا قلبها فز 💓
كفايه :شنو زعمه..
ع طلعت حميده وغاليه وقالوا مع بعض:رمزي نجح..
طلع عمر طول ..
وخالاته وبنات خالاته خشوا لوحده من الديار ووقفوا في الروشن يشوفوا..
لقوه نازل من السيارة وولاد عماته يهنوا فيه..
وجوه خواله حتى هما...
وامه نزلت من دروج الحوش ومشتله هي وبنتها..
زينب :وي وي وي وي..بتيه ولت..
غاليه :تاكل ياحنه ومقعمزة..والحوش بدور بين رمزي وميلاد..
كفايه:سلمه خوي الحر..
ضحكوا كلهم..
دلال تهمس: فرحانه!
رانيا بهمس: بنطير💓
ضحكت دلال..
شويه ولقوهم مطلعين حاجات من سيارة محمد "هو اللي رافعه"..
في من حاجات رفعهم لحوش خواله..
والباقي رفعوهم صغار عماته لحوش عمامه..
.....
امال حضناته:مبروك عليك ياسمح
رمزي :الله يبارك اموله..
عزيزة: جدع وجبتها...
بعد من ع امال وحضن عزيزة وهو يضحك..
جاته حناه تزغرط فتزغريط عزايز..بعد من عزيزة وقدم لحناه حضنها وباس راسها:تسلمي ياأمي ربي يطول فعمرك..
وسعيده تشوفله ودموعها ينزلوا..
فرحة بولدها البكر غير💕💕💕💕💕
.....
حناه فاطمه اولى يجيها هي قبل..
زينب بتهكم:رباية العقرب امه ولائه كله للطرف التاني
غاليه:زينب ورباب رمزي ماهوش هكي بكل..
رانيا شبحت لخالتها وابتسمت..
رباب؛كلوا زي بعضوا..مادام ولدها مايحب الا اللي تحبه امه..
"السلام عليكم".
التفتوا عماته...ورانيا شبحتله طول وابتسمت..
هو ابتسملها وغيرعيونه لحناه ومشالها طول...
حضنها وباس ع راسها وهي تدعيله...
وبعدها باركوله عماته...ورباب يدوب مدتله روس صباعها..
هو طنشها ...
ولما جي بيسلم ع رانيا شد ع يدها وهي ابتسمت وقلبها صوت دقاته مسموع 💓..
دلال بضحكه :مبرووووك..
ضحك وطلق يد رانيا بالسيف وسلم ع دلال:تو نوريك يامشدقه..
ضحكت دلال...
وهدا كله يشوف فيه حمزة ومش راضيه ويقعد ياكل فروحه وخلاص..
يحبها بكتمان ولاقادر يقوللها ولا يلمح حتى ...
مشكلة دلال انها شايفه روحها وصعب لفت انتباهها مهما الواحد يدير معاها...وممكن هدا يرجع لسبب واحد هو دلع بوها ليها واللي حواليها ديما يشكروا فيها وفجمالها..لين ولت تشوف فروحها حاجه كبيرة هلبه ومايطولها حد...
وهو طبعها هدا مخليه متردد هلبه يخاف لو قاللها ترده وتجبد روحها منه وتتباعد عليه ومايحصلش معاها فرصة تانيه ...
لهذا قرر يستنى ويحاول يوصل فيها بطرق تانيه...
🍁🍁🍁🍁🍁
تغدوا غداهم ...
والبنات غسلوا الماعين..قعدوا قريب ساعه ونص بسبب الهدرزة😁...
والنساوين متكيات في الدار ع هدرزة وقرمه من هني وهني..كذلك يهدرزوا ع تجهيزات العرس...
والرجاله في المربوعه الخارجيه اللي بنوها بعيد شويه عن الحوش بش وين يجوا ضيوف مايشوفوش اهل الحوش...
والولاد فوق السطح في الدار كلهم راقدين...
مع الساعه 4:30...
روح الهادي...
وخش عليهم...
طق الباب: السلام عليكم..
ناضت كفايه وهي تصفق :يامبروك عليه شقيقي هدا وين زمطه ريقي...
ناضوا معاها خواتها والبنات يصفقوا ويغنوا...
وهو يضحك بإحراج..والحاجه فاطمه تضحك..
سلم عليهم وحده وحده وهما مازال يغنوله ويصفقوا..
💕فرحانين ليهم وقت ع العراس...
مع الأسف الشديد ربي ماكتب للبنات نصيب لهاللحظه..لأن العمر فات واغلب الناس واخده فكرة عنهم انهم لولاد عمهم لين فاتوهم وخدوا غيرهم..والناس عقلياتهم مع الأسف في التفكير ماتجيب خير ...
شبه وقف نصيبهم مسكينات...لكن مع استسلموش ..خشوا دورة تمريض..وخدموا فترة في المستشفى وتوا وقفوا لأن المستشفى يصينوا فيها...
برغم انهم حلوات ومهتمات برواحهم بس ماحد طق الباب🍃
🍁🍁🍁🍁🍁🍁
الساعه 6:00مساءا...
رباب: محااااااامد هياااااا...
رانيا :عمممممر عممممرعمممممر..
دلال تضحك وخلاص..
نور: عمر يلعب في الكورة مع فريقه خير فريق من محمد..
رباب :عينك..
🍁مقعمزين في المستراح اللي قدام الحوش القديم...
وفي مساحه فاضيه..الولاد يلعبوا فيها في الكورة..
وهما مشجعات..
ع جية رزان كانت تمشي ومربعها ايديها وقعمزت بعيده عليهم وتتفرج..
دلال:الفرخه زي امها ..
رباب: واحرفين..
رانيا شبحتلها بعدين شبحت لرمزي وهو يلعب ..ابتسمت...
وهو شبحلها لما شبحتله..وابتسملها...وتجيه الكورة ع وجهه..
رانيا انخلعت..
رزان: انت يا اعمى ..
شبحولها البنات..
عماد:اسكتي يادريه...
شقلبت عيونها..
محمد :شن وجهك..
رمزي :عادي ماصار شي..
عماد:معليشي ابو الزوز بنباصيلك قبل...
رمزي بضحكه :خلاص ياراجل ماصار شي..
عمر:تي هيا انت وياه...
ولوا من جديد للعب....والبنات يشجعوا..
🍁ورا الحوش القديم...
النساوين مقعمزات ع جدع الشجرة نفسه اللي رافقهم عمر طويل...
حمي الخبزة يومها ع حميده...
والهدرزة ليه ليه...
زينب :من توا لازم نسقوا حكايه المشي في الكسوة..
غاليه:بتعدن كلكن..
كفايه:وانتم..
غاليه :نلهوا بالسريب اللي هنى والناس اللي بيجوا في الليل..
نعيمه:وهديكا سعيده...
غاليه : مانعلم عليها..ماعلقتش منين دوينا حداها..
زينب :احسن ..
كفايه:معناها تمشي لطيفه بس..
غاليه؛هو هدا...
حميده بعد رمت الخبزة...رفعت راسها...شبحت بتلقائية جيهة حوش عمها ..لقت خليفه واقف يشبحلها..
شبحتله شبحه زي السم..ومشت من حدا السور...
هو تنهد بألم والدمعه عبت عينه ومشي طول ركب لسيارته وتحرك...
ع طلعة مرت خوه راويه وفيدها بنتها متوجهه لحوش رمضان...عارفه البنات توا يحموا في الخبزة...
خشت لسورهم:السلام عليكم..
ابتسموا وين شافوها..
قدمت وسلمت عليهم...
جابتلها غاليه بلوكه بش تقعمز عليها..
سلمت وقعمزت:كيف حالكم..
زينب بإبتسامه:الحمد لله..
حميده بضحكه:ماتخافيش بكل ياراويه..
راويه :طز فيهم وفمن جابهم..
ضحكوا البنات...
راويه بضحكه:خلونا من هالسيرة اللي تغم وهدرزولي شن برنامجكم للعرس..
🍁زي ماقلت قبل شخصية روايه واعره مهما يديروا مايقدروش عليها..تعرفت ع العيلتين ولاحظت الفرق بيناتهم وتقربت هلبه من عيله رمضان وولت صحبه مع البنات...
برغم المشاكل اللي جتها من ورا مواصلتهم لكن مادورتش بكل..واللي مساعدها ان حسن راضي ع مشيها لحوش عمه ولما يكلموه خواته مايدورش فيهم هلبه من هالناحيه..
........
ووووووووووووووه...
رانيا ونور ورزان: هييييييييييييه..رمزي رمزي رمزي..
ورمزي يشبحلهم ويضحك..
رباب :باهي فهمنا خلاص انطمروا..
ماعدلوش عليها...
وفاز فريق عمر اللي كان فيه رمزي ..
محمد:حظظظ والله حظظظ..
حمزة:معاش تحلف ياراجل..
محمد اشر ع مروان؛خسرني هدى ..
مروان بصدمه؛لا ياراااجل!!!
مالك بضحكه: ياودي عنده الحق..
مروان ضربه ع ذراعه:ضم فمك..
منحرج من كلامهم لأنه نور تسمع فيه وتشوفلهم💓..
عمر:بنعدي ندوش...
عماد:وراك يامعلم...
مشوا كلهم مع عمر...
والبنات ناضوا بيمشوا جهة الفرن..
رمزي قعد واقف شبح لرانيا اشرلها تقعد..
قعدت...
قدملها بعد تأكد ان حمزة مشي..
رمزي وهو مبتسم :في الليل في الكوجينه ..نبي نص دحي وجبنة شرايح..
ابتسمت رانيا بخجل:باهي..وحتى اني بنعطيك حاجه..
رمزي ضحك؛تمام..عدي توا...
رانيا :ماتقعدش في النسمه وانت عارق هكي..
رمزي بإبتسامه: حاضر يالحب💓
ضحكت وهربت طول..
هو ضحك..بعدين تنهد ومشي...
🍁🍁🍁🍁🍁
فات باقي النهار....
وجت الساعه 8:00...
البنات مقعمزات فم البوابه...
دلال: نحب اغاني تامر اكثر..
رانيا :بس عمرو دياب احلى..
نور: عمرو دياب اغانيه ارقى..
دلال شقلبت عيونها:تموره احلى...
رباب بضحكه:من الاحلى هالشمبازي مالا..
ضحكوا البنات.
دلال : فعيوني اني يهبببل...ورمشت عيونها بغرور...
فجأة
ضوا عليهم فلاش سيارة...
الأربعه بصوت واحد: هانيبال...
وقفوا يراجو فيهم امتي يدرس وينزل..
درس ونزل شبحلهم...
هما شبحوله واشروله🖐🖐🖐🖐
هو ضحك...وفتح باب السيارة الخلفي نزل منه شيء وشويات..
"لما يجوا خواته مايخلي مايكركر"..
جاه مروان قعد يرفع معاه...
وجو ناحيتهم...
خش مروان بالشكاير ..
هانيبال وراه:جرواااات...عنزاااات..
هما ضحكوا...
ضحك وقال: شوي بس... خش داخل للكوجينه كانت فاضيه..لأن خواته في الحوش القديم يضموا فيه لحوسة العرس..
المهم..
حط الشكاير وطلعلهم..
هانيبال جبد رانيا ودلال من روسهم :تعالن جاي...
وقعد يخبط فروسهم ببعض وهما ميتات بالضحك..
ورباب ونور ومروان يضحكوا عليهم..
هانيبال: شنو حالكن ياعنزات...وحضنهم الزوز ومش اي حضن قريب كسر رقابيهم وهو لاف درعانه عليهم..
بعدين بعدهم ...وهما شبه جاهم ارتجاج في المخ😁..
بعدين جي لرباب شدها من ايديها وقعد يعوج فصباعها: تو نوريك ياكلبه..ع الكرت اللي لهطتيه..هانيبال..حمزة عطل معاش روح ابعتلي رصيد بش نكلمه...زاد عوج صباعها ..كان نعرف شن اديري بيهن..
رباب ارتبكت وجهها تغير..
طلقها وقال؛تو نعرف..
شبحولها رانيا ودلال...
وهي شاده صوابعها وتتحسس فيهم..
جي لنور: انتي اسمح وحده فيهن كلهن تعالي..
حضنها بعدين بعدها وشدها من شدوقها ....
وهي تضحك ومغمضه عيونها اللي دمعوا من الوجع..
مروان يشوفلها:قعطتهم خلاص..
هانيبال بضحكه:لالا تتحمل ..
نور:لاالاا والنبي خلاص..
طلقها وهو يضحك : ايه وين باقي القوم ...
دلال: ماما وخالاتي في الحوش القديم..
مروان: والولاد ركبوا للسوق قعدت اني مع الهادي..
هانيبال: شن رفعهم للسوق..
مروان:بيشروا عشي واتي..زردة رمزي..
هانيبال بضحكه:نجح!!
مروان: ايه..
هانيبال:كويس اول سنه في الجامعه وصفى مواده كلهن..ماشاء الله..
ابتسمت رانيا..
هانيبال :خل نعدي لهديكنه نسلم عليهن..
مشي والبنات مشوا معاه...🍁
🍁فاتت ساعة..
💕روح رمزي والولاد..بالشاورمات والبيتزات...والمشروب..وكان قبلها جايب طورطه وحلويات..
وداروله شبه حفله صغيرة بنجاحه...
والمسكين فرق روحه ع اتنين بين حوش خواله وحوش اعمامه...
ومرت لحظات غايه في الجمال..
🍁الساعه 1:00ليلا...
الولاد فوق السطح.....الرجاله راقدين في المربوعه..والنساوين والبنات في الدار يهدرزوا...
ماعدا رنوشه💕
كانت في الكوجينه دير في نص لرمزي بكل حب..
نص هريسه ودحي مقلي وطرفين جبنة شرايح..رمزي يموت فيه هكي..
شويه ...
"واتي"
قامت عيونها فيه وابتسمت :ايه...
قعدت يشبحلها وهي تشبحله 💓💓
رمزي :استاحشتك واجد وحق الله استاحشتك للمليون .
ضحكت :حتى اني هلبه هلبات..ومدتله النص..
خداه وهو يشوفلها :مايحرمني منك ومن اللي ديره ايديك..لو كان سم 💕
رانيا بإبتسامه:بعيد السو عليك 💓
تنهد من اعماقه..وكلي من النص..
رمزي: اممم..قلبي..بلع لقمته..نديرلك تليفون!!.
رانيا:لالارمزي ..
رمزي :باهي ياعمري لامتى هكي قوليلي نقعد نشوف فيك بالحسرة في المناسبات..قسما بالله قريب نهبل.
رانيا بضحكه:بعيد السو عليك..خلاص هانت تطلع النتيجه ويجيني التليفون..
رمزي :ايه ..ع سيرة قراية الجامعه عندي معاك موضوع طويل يارانيا فحكاية الجامعه هدي..
رانيا ابتسمت؛باهي غير كول قبل يبرد...
ابتسم: باهي باهي..
قعد ياكل ويشوفلها وهي متحشمه تنزل فعيونها مرة مرة...💕
ع خشة غاليه : احممم..احممم..
هما ضحكوا بإحراج...
غاليه بضحكه:بناخد ميه ونعدي..
ابتسموا..
ورمزي كمل ياكل..
ع خشة نور: رباااب ربااب..
رمزي :تس..وخر..ومشي وهو متكنطي..ورانيا اضايقت لين خلاص..
وغاليه تشرب في ميه وتشوفلها..
رباب خشت:ريحة دحي مقلي فرخة رانيا ياخاينه..
غاليه :هيا تو ندريلكن عجة...
رباب:احلى غلوووش في العالم..
رانيا:دلال رقدت..
رباب: نظام دجاج هديكا...
🍁دارتلهم غاليه العجة وكملوا سهرياتهم عليها ومع التلاته كانوا راقدين🍁🍁
🍃🍃🍃🍃
فات يوم الجمعه..بنفس الأجواء الحلوة...
غير ان رانيا ورمزي ماحصلوش فرصة تانيه ليهم مع بعض..وهالشي معصب رمزي ومضايق رانيا...
اما حمزة فقعد قلبه يدوب فدلال بصمت وهي ولاهي هنا ولاحاسه بحاجه ولاتندري بشي...
والهدوء بشكل عام مازال سائد ع الأجواء .
بس الحاجه فاطمه زيي حاسة انه هدوء يسبق العاصفه وتدعي ربي يفوت هالعرس ع خير من غير مشاكل..
🍁🍁🍁🍁🍁
يوم السبت..
الساعه11:00صباحا..
صوت المكنسه الكهربائيه...
دلال تكنس في الحوش..
رانيا تغسل في الماعين متاع الفطور...
ورباب ونور يضموا في الدواليب..متاع الماعين..
في هاليوم كان هانيبال قاعد بعد خدي اجازة طول سبوع العرس.."يخدم في مكتب بريد"
اما عمر ماقدرش ياخد اجازة بحكم انه يخدم في قهوة..
🌸🌸🌸🌸🌸🌸
وكالعاده صوت الكلاكسات ينبئ بحضور ضيف جديد محب..
جت تجري حميده: خالي..خالي..
دلال صكرت المكنسه الكهربائيه ومشت حطتها في مكانها..وتوجهت للكوجينه
والبنات لبسوا ردواتهم بش بيطلعوا يسلموا بعد طلعت امهم لخوها..
هانيبال كان معاه محمد والولاد يستقبلوا فيه..
عمار كان جاي فسيارة بروحه سيارته عاليه..
وسيارة بوه مرسيدس نوع جديد مش هديكا الأولى😁..
نزلوا من سيارتهم...
عمار كعادته بالزي الوطني والزماله البيضا..
تغيرت هيئة جسمه يبان اقوى من قبل ..مش داير لحيه بإعتباره عسكري ولابس نظارات سود..
من 1996معاش جي للبلاد...وهادي المرة الأولى بعد سنين طويله...ماقدرش يغيب عن عرس الهادي..
هانيبال:باهي اللي رضيت علينا وريناك..
عمار ضحك وقدم حضنه....
والحاج مختار ومرته يسلموا ع فاطمه وراجلها..
وبعدها طلعوا الكل يسلموا..وصارت حفلة سلام ...
"الجزء كله مشي في السلامات 😂"..
بعد السلام والكلام..
مشوا الرجاله للمربوعه الخارجيه.
وفاطمه وبناتها دخلوا كامله للحوش..
وخشوا حميده وغاليه يوتوا في الضيافه..
غاليه بضحكه؛ريتي عمار..
حميده: شخصيته ولت كيف شخصية معمر بالزبط..
رباب:عسكري هو ولا..
حميده:ايه...شبحت لدلال..تذكري زمان دلوله قداش كنتي تحبيه وكان يجيبلك في الشكلاطه والألعاب..
غاليه:وخاتم الذهب.
دلال:ايه مذكرة الخاتم ماما قالتلي عليه..لكن هو مانذكرلاش كويس..وبصراحه مانبيش نذكرله مادام من جماعه القيدا..
ضحكوا خالاتها..
حميده بضحكه:زمان كنتي تقولي عمال حلو وعمال يهبل.
ضحكت دلال:عمال !!حي ع العار..
ضحكوا...
غاليه :اطلعن سلمن ع امه هيا..
دلال: ضروري؟!
حميده :مالا شنو يامعفنه المراة بتقعد معانا اسبوع كامل ماتبيش تطلعي ..
خشت كفايه:هيي اطلعوا سلموا هياا..
ساووا ارواحهم وطلعوا...
خشوا الصاله...
وين بانت دلال ع كامله عجبتها لين خلاص...
سلموا عليها كلهم وهي قعدت معلقه عيونها فيها..وخالتها زينب لاحظت...
🍁🍁🍁🍁
الساعه 1:30بعد الظهر..
عمار:خل نعدي تشوفه شن عنده ونجي..
هانيبال:باهي عدي بس اسمع حاجه فوق المعقول قول لا ماتخلي حد يتمادى معاك مش تقول ضراري عمكم وتتحشم منا..
ضحك عمار:مانقولش هكي ماتخافش..مش معطل إن شاء الله...
لف ومشي وتوجه لحوش عبدالله بش يشوف خليفه اللي يبي منه خدمه...
🍁🍁🍁
في الكوجينه..
نعيمه ادير في الغدي وخواتها غاليه وحميده يعاونوا فيها..
خشت زينب.:عمتكم بتجي العشيه..وبتجي معاها نجيه وبنتها صابرين ومفرخهم..
غاليه:وخيرك انتي..
زينب:معقوله تجيب معاها القبيله هادي كلها..
غاليه:حني عزمناهم اوكل..
نعيمه:مادوريش زنوبه اصلا هما وين يجوا ياخدوا
فوجوههم لحوش عمك حتى لو فمناسبه..
حميده:صح كلام نعيمه مادوريش..
تنهدت وقالت:باهي...ماتبونيش نديري معاكم حاجه..
غاليه:ديري السلاطه..
ضحكت زينب:باهي.
🍁🍁🍁🍁
مقعمزات وقارنات الروس..
دلال:اني الليله ندبرلك لقاء..
ضحكت رانيا :معاش تتفرجي ع النشرة اترت عليك ره..
دلال ضحكت:الحق فيا اني ياجاهله..
رانيا بضحكه:باهي كيف قوليلي...
دلال :اسمعيني جاي...
🍁🍁🍁🍁🍁
الساعه 2:00بعد الظهر...
عمار : لا وحق الله مافيها كيف الغدي غادي دايرينه ع خاطرنا..
خليفه: باهي اليوم ع كيفك لكن غدوة الغدي عندي..
عمار ابتسم:إن شاء الله..هي السلام عليكم....وطلع من المربوعه..
.....
وينه باهي..
حميده:في الحوش القديم..
غاليه :اففف...شبحت جنبها...دلوله باهي اللي جيتي وراس دلوله جري جري عدي جيبي المغرف من الحوش القديم..
دلال :باهي..وطلعت من فم البوابه تجري...
وهي تجري..انفكت سلسلتها وطاحت...
قعدت ادور فيها...
.....
عمار كان جاي من الجهة التانيه. كان موزع نظره ع المكان ويتفحص ويشوف..
"أهياااا"..
شبح قدامه لمصدر الصوت...
وقف فمكانه...
كان يشوف في بنت آيه من الجمال..قد وطول..دايرة شعرها الذهبي ظفرة..ولابسه بدي ابيض وشورت اسود لتحت الركبه..
قامت السلسله ومشت جري..
ومش عارفه روحها شن دارت...
فلحظه كانت ادور فيها ع سلسلتها اللي طاحت منها...
ولما رفعتها ومشت.... رفعت قلب تعلق مع سلسلتها معاها...
قعد لحظات واقف ومش فاهم شن صار فيه..شن صار معاه...
زفر بقوة....تنهد...ورفع حواجبه ونزلهم.. وقال..
"إن شاء الله خير💓"...
....يتبع.....
