#العشق_المتمرد "إختبار"
الجزء 104"القسم الأول"
#جمان_فريد
🌟..
"صديق!"..
التفت طول ..
حليمه :شن عندك طالع برا في الوقت هدى؟
الصديق:عفاف كانت تكلم فيا قالتلي تعال ارفع امك..
حليمه:هاه ريت امك مش متحملها حد حتى بناتها..رفعت حاجبها وقالت..ارفعها لواحد من خوتك حتى هي امهم وهما مسؤولين عنها مش غير انت..
هز راسه بإيجاب وقال:هدى اللي بيصير..هي خشي داخل تو..
شبحتله شويه بعدين لفت وخشت..
وهو خش وراها وعيونه ع تليفونه..
🍃🍃🍃
مروا يومين...
وجي يوم الجمعه..
الساعه 11:00صباحا..
راك تنسى يامحمد..
محمد بضحكه:مظني اول ما بنشوفه حتى السلام مش مسلم بنقوله طول عمتك غاليه تسلم عليك واجد..
غاليه بضحكه من بين دموعها:غير راك تنسى..
محمد:إيييييه..
ضحكوا..
سمعوا كلاكس سيارة حسن..
محمد:هي خلاص بنعدي..
وطلع بسرعه..
ووراه امه وخواته ومرت خوه..
غاليه بدموع:يابختهم..💔
🍁محمد وصل لسيارة حسن...
ركب من الخلف جنب توفيق..والقدام كان ميلاد جنب حسن..
كانت سعيده واقفه فم حوشها من القدام واقفه تشوف فالسيارة ودموعها سيل وقلبها ينبض بعنف💓..
ورزان واقفه في الباب وحالها مش احسن من حال امها..
تحركت السيارة..
قعدوا معاها بعيونهم لين اختفت من قدامهم..
مسحت سعيده دموع عيونها بيدها وحده نزلتها ع صدرها..تنهدت بقوة..
بعدين التفتت شبحت لبنتها وقالت بنبرة باكيه:شن فيها كان عديت معاهم!!معقوله ممنوع النسوان يعدوا للزيارة؟!
ضمت رزان شواربها لداخل وقدمت لأمها وضمتها وهي تقول:تعالي خشي ماما..خشي..
وخشوا الزوز وقلوبهم مفطورة من حزنهم وشوقهم 💔
🍁🍁🍁🍁
توا قالت غاليه كيف طلعوا من حداهم..
خيري:يوصلهم ربي سالمين..ويعجل بفك اسره..
زينب :آمين..
في الكوجينه..
رانيا تمسح فدموعها وتقول:سعدودهم سعدودهم..
رباب بألم:سيوره يطلع بإذن الله وتشبعي من شوفته..
رانيا :نشبع من شوفته!!الحاجه الوحيده اللي مستحيل نشبع منها شوفته بعد يطلع ..
ابتسمت رباب وعيونها معبيات دموع:ربي يجمعكم عن قريب..
رانيا بتوسل:ياااارب💓
🍁🍁🍁🍁
بعد طريق..
برغم انها مش طويله..
بس هما من شوقهم الشديد ولهفتهم حسوها اطول من الطريق من بلادهم للصين..
لما خشوا لمصراته..
القلوب كادت تبلغ الحناجر...
ميلاد من قوة اللي يحس بيه حس بنخصه في قلبه..خلسة دون ماحد يلاحظ..حط يده ع قلبه..وملامحه وجهه كانت تتجعد من الألم..
قربوا من مكان المعتقل..
حسن:هو هدى..
محمد قام تليفونه واتصل بعماد..
نادى مرة وطول انفتح الخط..
محمد:وصلنا ياعماد..
عماد:تو كنت نكلم فيه الراجل..خشوا طول اساسا هو اليوم يوم زيارة..
محمد:باهي الراجل شن سماه هو ؟..
عماد:رافع..رافع معتوق..
محمد:تم..هي سلام..صكر وقال لحسن..خش ياحسن خش..
ميلاد تنهد من قلبه..
وتوفيق كان متوتر ع الأخر..
🍃رمزي ابدا مكانش عنده علم بأنه في حد بيزوره ..
قلبه كلاه من غياب عماد عنه لفتره طويله لاجاه لاكلمه..خاف ليكون صاير شي لحد من العيله...🍃
خشوا للسجن..
تلاقوا هما ورافع والآمر..
بعد السلام..
رافع:طبعا هو مش هدا وقت الزيارة لكن حطينا بعين الإعتبار انكم بتروحوا في نفس اليوم.. ضحك وقال..تجنبا لمخاطر الطريق ع قولت عماد..
ابتسموا مجامله..
هما مش فباب هدرزة نهائي يبوا يشوفوا ولدهم وبس توا..
معاش في صبر خلاص..
الآمر: تفضلوا معاي لغرفة الزيارة..
ميلاد انفاسه اتسارعت هز راسه بإيجاب..
ومشوا كلهم مع بعض لغرفة الزيارة..
💕💕💕💕
خود منها يارمزي هادي جايه من مكه ره..
رمزي خدي شيشة العطر الصغيره وقال:بارك الله فيك ياصالح..
فتحها ودار منها ع رقبته من يمين ويسار..ومدهاله وقال..تسلم..
صالح:عريس ماشاء الله..
ضحك رمزي..
فرج بإبتسامه:قداش مازال ع الصلاة..
شاف واحد منهم الساعه وقال:نص ساعه..
رمزي بضحكه:مستعجل اني..
ضحكوا...
انفتح باب السجن
كلهم شبحوله
الحارس :رمزي ****
شبحوا لرمزي.
قلب رمزي قعد يدق بعنف شديد:واخيرا ياعماد..
مشي طول للحارس وطلع هو وياه..
فرج:ليه وقت ماجاه حد..
صالح:إن شاء الله خير..
الصيد:زعم زيارة ولاشي تاني؟!
شبح فرج للصيد وانتابه شعور الخوف..
برا..
رمزي لما كان يمشي مع الحارس استغرب في الطريق اللي تغيرت قبل كان يشوف فعماد فمكان تاني من المعتقل..
هني شك وحس في شي مش مزبوط بس ماسألش قعد يشبح للحارس اللي معاه بطرف العين وخلاص..
وصلوا لباب غرفة الزياره..
فتحه الحارس..
داخل
ميلاد قعد يشوف للباب
بترقب..ولهفه..وشوق...
ومحمد نفس الحاله عايشها..
توفيق بلع ريقه وقال بصوت هامس:يارب..
خش رمزي وماعنداش ادنى العلم ان ورا هالباب اغلى الناس ع قلبه اللي ليه حوالي خمسه سنين مااجتمع بيهم
بان عليهم
انحبست انفاسهم
هو لما بانوا عليه انفزع
صارتله زي النفضه فجسمه
رفع حواجبه وهو يمرر فنظره عليهم بعدم تصديق
ميلاد:رمزي!
رمزي قعد يشوفله وخلاص
مش مصدق..
ميلاد ماتحملش قدمله طول
ورمزي استاقض..
هدا بوه ايه بوه وجايه مندفع بشوقه..
طول قدمله..
وصلوا فبعض..
وحضنوا بعض بقوة..
رمزي يشم فريحه بوه وهو مغمض عيونه بشده ومازال مش مصدق..
قعد يضم فيه اكثر واكثر بش يصدق..
ميلاد:ولدي...ولدي ياربي..ولدي ياربي..قعد يبكي بشده ويقول..ولدي...ولدي..
بعده شويه..قعد يشوف لملامحه ورمزي يشوف لملامح بوه ومش مصدق..
ميلاد:رمزي..
رمزي بصوت يدوب طالع:سيدي..
بوه بدون وعي منه..
قعد يبوس فيه..من خدوده..على عيونه..
وراسه..
ورقبته وكتافه..
ورمزي يبوس فبوه حتى هو..
مشهد كان صعب ع رافع يتحمله..
طول مشي طلع من حداهم...
اما الباقي..
فماحد قدر يشد دموعه..لدرجة ان حسن قعد يبكي بالصوت..
بعد السلام الحار بين الأب وأبنه..
توا جي دور..
السلام بين الأخ وخوه..
رمزي بضحكه من بين دموعه:هدى منو هدى؟!!
ضحك توفيق ودموعه ينزلوا..
جبده رمزي من سوريته وضمه بقوة..
رمزي:هههههه..مال قصي كيف راح؟!
ضحكوا..
توفيق:مخلي مكانك ياكبيرنا..
رمزي غمض عيونه بشده وزاد ضم خوه بقوة..
شويه وبعدوا عن بعض..
وجي رمزي لخاله حسن وسلم عليه سلام حار...
بعد طلقه..
جي لمحمد..
محمد مسح وجهه بيد وحده وقال:لهاللحظه نادم ع الساعه اللي خليتك تعدي فيها ومامنعتك...بصوت مخنوق قال..سامحني..
حضنه رمزي بقوة وقال:مكتوب ياعم..ماتقدر تمنع اللي ربي يبيه يصير..
محمد بإبتسامه:المهم انك حي..وموجود..الحمد لله..
باسه رمزي ع راسه وزاد ضمه بالقوة..
🍁🍁🍁🍁
مقعمزة ع السرير..
لابسه ملاية الصلاة..
كملت قراية سورة الكهف..
والدموع دارو ع الخدود مجرى..
طلعت من تطبيق القرآن..
وخشت ع الفيس..
كان خاطرها تنزل منشور تبي تعبر عن اللي تحس بيه..
كتباته وهي ترشف..وتمسح فدموعها بش تشوف كويس..
بعد كملت دارتله نشر..
تم نشره..
وقعدت تقرا فيه..
(ياعوين العيون اللي راتك ياوخيي..
ياعوين اليدين اللي ضموك ياوخيي..
ياعوين الودان اللي سمعوا صوتك وانت تحكي ياوخي
ياعوين اللي حصل لحظات قعمز فيهم معاك وهدرزلك ياوخيي
اااه ياوخيي..من غيرك اني مكسورة..
لا اني يتيمه ولامقطوعه..
لكن غيابك ياوخيي دار فيا احرف من اللي يديروه اليتم والقطيعه...
ياسندي ياكبيري...اختك من غيرك تعباااانه..تعباااانه ياوخيي)
تقرا رانيا في المنشور ...
وانهارت بالبكي..
انخلعت رباب وخشتلها الدار:خيرك رانيا!!
رانيا مش قادرة تتكلم تبكي وبس..
شافت رباب التليفون فيدها اللي ترجف..
خداته وشافت رانيا شن كانت تشوف وقراته وبكت معاها حتى هي..
🍁🍁🍁
دلال ببكي:حرقلي قلبي اللي كتباته قطعتني..
نور وهي ترشف:ربي يفرج عليه يارب عاجلا غير آاجل..
نعيمه ببكي:يااارب..
🍁🍁🍁
ياسندي..ياكبيري..اختك...من غيرك تعبانه تعبانه ياوخيي..
هدا كان صوت رفقه الباكي وهي تقرا فمنشور رزان لأمها..
لطيفه بدموع:محر كلامها...ربي يفك اسره يارب..
🍁🍁🍁🍁
ووااك ياحميد وااعر الكلام واعر....
حميد وفيده طاسة ميه :هاك اشربي..
خدت غزلان طاسة المية وقعدت تشرب بعدين قالت:ياريت كان عندي خوت وخوات..
حضنها حميد وقال:اني وصغارنا خوتك وخواتك.
حضناته غزلان وقعدت تبكي..
🍁🍁🍁🍁
ولأن الفيسبوك مالاش حدود يوقف عندها..
المنشور قراته مرام وقعدت تبكي حتى هي..
وهانيبال راها تبكي خاف ولما عرف السبب قلبه وجعه ع الآخر..
وقرر يتصل بواحد من خوته..
عمر:اليوم عدو قيس 11الصبح..
هانيبال:باهي كويس..المهم يشوفهم ويشوفوه ويطمنوا ع بعضهم.
عمر:ايه..الحمد لله..خلاص كلها عام إن شاء الله ويروحلنا..
هانيبال:إن شاء الله..
🍁🍁🍁🍁
آاااه منك ياحرفه آاااه..
كانك حداي تو راني ضميتك بقوة جهدي ولا خليتك تحسي باللي قاعده تحسي بيه...لكن انتي..ااااه ياانتي..اااه..
عض ع شاربه بقوة من الوجع اللي يحس بيه..
🍃نفس الشعور نفسه عاشه بعد هي عاشاته تناقض المشاعر..
كره وحب فنفس الوقت..المهم ان القلب قاعد يتبهدل وخلاص🍃
"عماااد"
مسح دموعه وتنحنح بعدين قال بصوت عالي شوي:بروا انتم تو نلحق..
مالك من برا:تمام..
ومشي..
اما هو..
حط تليفونه ع الزيانه ..
خدي نفس عميق...وزفر بقوة..
بلع ريقه..ومشي للحمام..
🍁🍁🍁🍁🍁
يكلم فيكم؟!
محمد بإبتسامه:اكيد..وديما ينشد عنك مافي مرة كلمني الا ونشدني عنك ويبعتلك فالسلام..
ابتسم رمزي وقال:ربي يرده هو وهله سالمين غانمين..
كلهم قالوا:آمين..
رمزي:وعمي حميد وعماتي وعويلتهن كلهم شن اخبارهم..
ميلاد بإبتسامه:عرس بنت عمتك زينب مازال عليه 10ايام..
رمزي فنص:من فيهم؟!!
محمد شدضحكته وقال:الكبيرة..
ارتخوا ملامح رمزي وقال:ربي يتمملها ع خير..
بوه ركز عليه قعد مضيق عيونه وهو يشوفله بإبتسامه..
شبح لخوه مع عمه وقال:وانتم امتى ناويين؟
محمد:شهر 11من العام الجاي إن شاء الله.
توفيق بإبتسامه:بعد تطلع..
ابتسم رمزي وحط يده ع كتف خوه..
بعدين شبح لخاله وقال :امورك تمام ياخال خوالي وخالاتي وحناي وجدي كلهم طيبين؟!
حسن:اوكل منهم طيبين ويسلموا عليك والزيارة الأخرى إن شاء الله جايك خالك سليمان مع عمك عمر..
رمزي بإبتسامه:إن شاء الله..
محمد:عمتك امنتني نوصلك سلام خاص قريب الف مرة..
رمزي بلع ريقه وقال بإبتسامه وعيونه معبيات دموع:ربي يسلمها..قوللهارمزي مستاحش السفنز بالدحي..
ضحكوا بإستغراب..
محمد بضحكه :حاضر..
رمزي:امالا عماد وين من هدى كله ليش ماجي معاكم؟
ميلاد وجهه انقلب..
وتوفيق كذلك..
محمد بضيق:مشغول..
رمزي ضيق عيونه وحس ان في شي...
بعد ماتم الوقت المحدد للزياره..
ودعهم رمزي وقلبه معاهم..
وهما تمنوا لو يقدروا يروحوا بيه..
وين جو طالعين..
شد رمزي عمه شبح للحارس وقال:شوي بس..
الحارس هز راسه بإيجاب..
برا..
توفيق:شده بينشده..
ميلاد:عارفه..
حسن يسمع فيهم وساكت..
داخل..
رمزي:ماتخلي بالي مشغول ياعم..
تنهد محمد وقال:اختك فسخت..هي اللي سيبت..
رمزي بصدمه:هالبنت هدي شكلها ماعقلت بكل قاعده ع ضلالها!!
محمد:كله نصيب في النهايه..
رمزي من هروب عيون عمه عنه حس ان في شي كبير قرن حواجبه وقال بحده:باك هو قاعد ع ضلاله!
محمد شبحله وقال:قتلك نصيب يارمزي..مافي شي من اللي فبالك ماتفاهموش وانت عارفهم من قبل مايلتموش ع بعضهم..
طلق رمزي ذراع عمه وهز راسه بإيجاب ومازالت ملامح الحده ع وجهه..
حضنه محمد وقال:نشوفوك ع خير..
رمزي قال فوذن عمه:قاعد فبالهم..
محمد ضحك وقال فوذن ولد خوه:عيونهم ديما يريحوا كن كيف الطماطم لما يجونا..
رمزي ابتسم ووجهه ولا احمر..
بعد ع عمه وهو مغير عيونه..
ابتسم محمد وطبطب ع كتف رمزي وطلع..
💓🍁💓🍁💓
قالوا القمر عالي وبعيد..
وحبيبي غايب عننا..
واشهد ياليل واشهد ياليل ..
حبيبي نجمه بالسما..
قالوا الرضى صعب المنال..
مانرضى الا بحبنا..
واشهد ياليل واشهد
واشهد ياليل
حبيبي ساكن قلبنا...
🍃في مثل يقول
البعيد ع العين بعيد ع القلب..
هالمثل غالبا صحيح..
الا ف حالة الأصفر والسمرا...
بعد المسافه بيناتهم..
وطول سنين الغياب..
مانقصت في عشقهم مثقال ذرة..
بالعكس..خلوه يزيد ويزيد ويزيد..
سوا عندها ولاعنده...
هو اللي مافي يوم حول الحديده من يده..
ولاهي حولت الخاتم من يدها..
الزوز ع العهد..
الزوز يرجوا في بعض..
والزوز يدعوا في كل وقت ان ربي يجمعهم فالقريب العاجل..
🍁الساعه 3:30بعد الظهر...
كانت تشوف للخاتم فيدها وتتأمل فيه..
وتذكر فنهار هداهولها..
ونهار اخر لقاء بيناتهم..
وقعدت مسافرة بذكرياتها..💕
لعند ما..
خشت عليها رباب وقالت وهي مبتسمه:امي توا تكلم فخالتي غاليه نسمع فيها قالت كيف روحوا...
ناضت رانيا مشت تجري بتطلع من الدار شدتها رباب وهي تضحك قالت:بوك وخوتك حداها..
رانيا بغضب من بين دموعها:وااااك..
رباب:ههههههههه..
🍁🍁🍁🍁
شدونا ع الغدي لكن حني مابيناش حسيتها ثقيله..
سعيده رشفت وهي مبتسمه بعدين حضنت ميلاد..
رزان وتوفيق فنصوا..
وبوهم تلخبط مرة وحده..
ميلاد بربكه:سعيده!
سعيده:خليني بالله عليك..
الولد والبنت انسحبوا طول ووجوههم متقشرة..
ميلاد: بنتك وولدك..خيرك هبلتي!!
بعدت سعيده وهي تضحك:اني ع خاطر حضنت رمزي... شميت عليك ريحه مش ريحتك عرفتها ليه هو..مسحت دموعها وقالت..عطر! معناها كان عارف بجيتكم؟.
ميلاد بضحكه؛لا مش عارف بس الباين كان يوتي فروحه للصلاة..حسيت المعامله متاعهم كويسه..والله روحت واني متريح ع الآخر..
سعيده:الحمد لله ياربي..
قصي اللي كان يتفرج عليهم ويسمع قال:نبي نعدي مرة تانيه..
شبحوله الزوز وضحكوا..
🍁🍁🍁🍁
باهي باهي الحمد لله..كان غير يعاملوا فيهم كويس ساد..
محمد:هكي الباين وهو زاد اكد هالكلام..
الهادي:معدي معدي المرة الجايه والله مانعرفكم..
فاطمه بضحكه:ياودي غير من قالك ماتعديش..
ضحكوا..
في الكوجينه..
لمياء وهي تغسل في الماعين:ان شاء الله كيف هالنهار نفرحوا بطلعته..
حميده وهي ادير فالشاهي :آمين..
شبحت للباب بعدين قدمت للمياء وقالت بهمس:كلمني البارح..
التفتت لمياء لحميده وعيونها في الباب:ايه..
حميده بإبتسامه:حسيته كيف المستاحش..
شبحتلها لمياء بخبث وهي مبتسمه..
وحميده ضحكت بخجل..
سمعوا صوت تخطخيط شباشب..
بعدوا عن بعض واللي هادي لهت باللي فيدها..
ع خشة غاليه وهي مبتسمه :تسلم عليكم زينب..
حميده مابتش ترد..
ولمياء قالت:سلمها وسلم من جاب سلامها..
🍁🍁🍁🍁
الساعه 7:30مساءا..
مكالمه هاتفيه..
سعيده:الحمد لله ياربي...........ايه...........بتعدي غدوة؟!.......خلاص إن شاء الله حتى اني بنعدي غدوة........باهي.......ابتسمت وقالت..تسلمي يااموله.....هي مالا بالسلامه...بالسلامه..وصكرت..
مشت طول لدار بنتها..
طقت...
رزان من داخل:خش..
فتحت سعيده الباب وخشت وهي مبتسمه بفرح:يوم سمح من اوله..
ابتسمت وقالت :شنو في؟!
سعيده:خالتك عزيزه جابت..
رزان بفرح:واخيرا!
ضحكت سعيده:بنعدي غدوة لطرابلس تعدي معاي..
رزان بحماس:ايه خاطري نشوفهم..
سعيده بضحكه:خلاص مالا من توا وتي روحك..
رزان بضحكة حماس:تمام..
ضحكت سعيده ومشت طلعت..
ورزان ناضت توتي فحوايجها..
🍃لحظات فرح..اشبه بنسمات باردة فعز الحر🍃
🍁🍁🍁🍁
تاني يوم...
مع الساعه 11:00صباحا..
طلع توفيق بأمه واخته وخوه من القطعه متوجهين لطرابلس..
رزان في الطريق فتحت الفيس
ودارت نشاط مسافرة لطرابلس..
وكان في البوست تحديد الموقع..
كانت اول التعليقات من بلقيس..
(توصلوا بالسلامه)
ابتسمت رزان وردت
(الله يسلمك يامرت عمي)
ردت بلقيس
(😍😂)
ضحكت رزان..
طلعت من تعليقها..
وشافت بعدها تغريد معلقه..
(طريق السلامه روزا)
ابتسمت رزان وردت..
(تسلمي رغودة)
علقت بعدها رفقه
(نراجو فيكم لازم تجوا روزي)
ردت
(إن شاء الله)..
💓هو كان مقعمز في محل الأدوات الكهربائيه..اليوم دوره..
فاتح الفيس ويشوف في المنشور ويقرا في التعليقات..
كان مصهود بنار الغيره..
ايه غار من كل وحده علقتلها..
لانها تقدر تكلمها وتهدرز عليها...
يغار من كل حد يقدر يخالطها يقدر يكون معاها..
لان هو مايقدر حتى يشوفلها لو تلاقى معاها..
ولا يقدر يكلمها ولايقدر يسمعها..
ولايقدر يكون قريب عليها حتى في موقع تواصل اجتماعي..
حتى المنشورات خاش يشوف فيهم تسللا..
اللي يسمع يقول ان الحواجز بيناتهم اسوار ..وحدود بأسلاك شايكه..
بس احيانا حتى الحواجز الماديه هادي ماتقدرش تمنع اي تنين يحبوا بعض عن بعض..
لكن الحواجز المعنويه تقدر..
تقدر تمنع اي اتنين يحبوا بعض عن بعض حتى لو مكانش بيناتهم الا بضع السنتيميترات..
ومافيش اقوى من حاجز الكبرياء..
"عماد"..
قام راسه وحواجبه مرفوعات..
منير"العامل":شوف الاستاذ شن يبي..
شبح عماد وين يشبح منير..
رسم ع وجهه ابتسامه الخدمه...
وناض وهو يقول:تفضل استاذي..
🍁🍁🍁🍁
وصل توفيق بالعيله مع الواحده ظهرا..
نزلوا كلهم..
هو يدوب قعمز شويه..بعدين طلع روح بيجري ورا اشغاله..
في الحوش..
عساسيل ياناس..ماشاء الله..
عزيزة بضحكه:من توا بعد تتزوجي وتجيبي بنيه بنخطبها لواحد فيهم..
امال :لا ياحنه بنت رزونه لإياد ولدي..
ضحكت رزان ..
سعيده بضحكه:خلونا في المهم توا..شن نظامكم شن برنامجكم؟
عزيزة:عادي العادات المعروفه..لكن نهار اسبوع فالصاله..
التلاته وهما متفاجئات قالوا مع بعض:الصاله!!
ضحكت وقالت؛مال شنو ياحناتي..توأم ولاد راهم..
ضحكوا وهما يقولوا:ماشاء الله..
بعدين قالت امال:دبشي اللي جبته معاي كله عادي..
رزان:حتى حني..
عزيزة:مش مشكله عندكم خمس ايام والمحلات ماهم شوي فطرابلس تطلعوا وتشروا...
ابتسموا وقالت سعيده:كويس...
رن الجرس..
سعيده:امي وحدهم ونساوين خوتك..صبي رزونه افتحي..
رزان :حاضر..
ناضت ومشت للباب وهي تدهور بعيونها فحوش عمتها اللي عجبها هلبه..
وصلت في الباب سمعت هدرزة ودوشه..
فتحت الباب..
لقت حناها وبنت خالها ونساوين خوالها ومعاهم عزوزة عزيزة ووحده من حمواتها..
عزوزة عزيزة وحماتها شبحولها بإعجاب..
هي قدمت وسلمت عليهم..
وخششتهم هما واهلها..
وحماة عزيزة تتفحص فيها بنظرها..
🌴🌴🌴🌴🌴
بتمشولهم؟!
غاليه وهي تلبس فوشاحها:ايه..
لمياء:باهي كويس خل يرجع ينلم شملهم ع خاطر الصغويرة اقل شي..
غاليه بعد كملت لبس وشاحها خدت شنطتها وقالت :إن شاء الله..شبحتلها وكملت تقول..الغدي امبكبكه لمياء باهي..
لمياء ابتسمت:باهي..
غاليه:سامحيني متعباتك واجد.
لمياء:ماتقوليش هكي حوشي هدا زي ماهو حوشكم..
ابتسمت غاليه مجامله وقالت:تسلمي..
ومشت بسرعه..
ووراها لمياء..
لبست غاليه كندرتها وطلعت تجري من فم البوابه..
ولمياء وراها..
وقفت فالفم شافتها لين ركبت سيارة محمد ومشوا..
انفتح باب الحمام..
شبحتله..
لقت حميده طالعه ببنتها اللي كانت ادوشلها..
شبحتلها وقالت:عدت غاليه؟
لمياء:توا توا...ضيقت عيونها وقالت..ايه العشيه بيمشوا عمتي وغاليه لحوش اهل سميه بش يردوها..
ضحكت حميده تهكما وقالت:غير كان دارلها الهادي الو روحي بس تراهي جاته فتاكسي..
لمياء:ههههههههه..
حميده وهي تضحك خدت بنتها ومشت خشت بيها..
لمياء هدت وقالت فنفسها"ع اساس انتي خير منها!!"
ضحكت تهكما وخشت الكوجينه..
🍁🍁🍁🍁
طلع بولده من غرفة الدكتور..
فؤاد:بنعدوا لماما..
الهادي ابتسم مجامله وهز راسه بإيجاب..
ابتسم فؤاد بفرح..
بعدين مشوا الزوز..
كان الهادي مجبر هالمرة واللي جبره..مش صغاره لا..
ولا موقف اهله..
اللي جبره..
اللي توا قاعد يتبع فيها بعيونه وهي تمشي بإتجاه معاكس...
فضيله..
اللي طول فترة مراجعات ولده وهو ملاحظها..
لاحظها ولأول مرة..
روحها الحلوة..
شخصيتها القويه..
كيف محبوبه وليها احترامها..
مافي حد تجرأ وغلط فيها حتى بنظرة..
كانت تلاقي فيه بالسلام والسؤال عن الأحوال عادي..
وتلاطف ففؤاد وترفع من معنوياته..
هدا كله خلا الهادي يحس بشعور ليه وقت طويل ماحساش
بل هالمرة حسه بشكل مختلف تماما...
وشوي شوي هالشعور ولى مندفع لعند ماجي يوم..
فضيله:النظارات متخليه يحولهن مهما شكي منهن مادوراش...فهمه ديما انهن مهمات ليه..
الهادي بإبتسامه؛عندك علم انك تقدري تأثري فيه اكثر من امه..
فضيله ابتسامتها بدت تتلاشى..
الهادي ضحك وقال:فضيله قالت لما نكبر نحول النظارات...فضيله قالت لما تبكر بتولي دكتور لان النظارات يلبسن فيهن الدكاترة..فضيله فضيله فضيله..يدوي عليك اكثر من امه..
هي شبحت جنبها بعدين شبحتله وقالت بجديه:هو قاعد معاك؟
الهادي بإبتسامه؛اسبوع بأسبوع..
فضيله ابتسمت وقالت:عندك علم ان نفسيته تاعبه اكثر من عيونه...!غاليه قالت الولد بدي يحكي ويشكي كيف الكبار من حالكم انت وامه..
تلاشت ابتسامة الهادي..
فضيله:صح هو شي مايخصني..لكن بنقوله..رد مرتك ياهادي..عليشان الصغار..فكروا فيهم مادام جبتوهم فكروا فيهم معاش تفكروا فرواحكم...بلعت ريقها وقالت..هدى اللي نعرفه الراجل والمراة لما يجيبوا الصغار مفروض مايفكروا كان فيهم..
قعد مركز ع عيونها وهي تتكلم..
منصت لكلامها انصات مش بس يسمع..
تلقائيا جوا قدامه مجموعة مشاهد لسميه..
المراة الأنانيه..السطحيه..التافهه..
وبين اللي قدامه...
اللي كانت عكسها تماما..
لامقارنه ولا بأي شكل..
"فضيله تعالي"
التفتت للدكتور وقالت:حاضر..شبحت للهادي وقالت..ربي يهدي سركم..هي بالسلامه..
ومشت طول..
فؤاد شافها:فضيله..
التفتت وهي تجري..
اشرلها بيده يودع فيها..
وهي ابتسمت وردتهاله..
والتفتت القدام وكملت طريقها...
اختفت..
والهادي متبع طريقها بعيونه وهو متأكد وع يقين ان في شي منه مشي معاها...
بس من يومها..
وفضيله قطعت معاه التواصل تماما حتى بالسلام ومعاش بدت تجي تشوف فؤاد بعد يقعد يستنى فدوره يوم المراجعه..
وهالشي خلا الهادي ياخد قرار مرغم فيه انه يرد سميه..
🍃🍃🍃🍃
وفاتوا تلاته ايام..
كانوا فيهم رزان وحدهم واخدين فتره نقاهه من القرايه فحوش
عمتهم وخالتهم...
كانت الأجواء حلوة ..
رغم انهم اغلب وقتهم يعولوا..
لكن كله مشي يجوه..
🍁🍁🍁
يوم الإربعاء..
في الجنان..
سعيده:خوديلي اي شي سمح ع ذوقك مقاسي وتعرفيه..
رزان وهي تلبس فشنطتها:باهي ماما..هي سلام..
مشت طلعت تجري..
وصلت في السياره فتحت الباب الخلفي وركبت وهي تقول بإبتسامه:كيف حالك خالتي لطيفه..
لطيفه بإبتسامه:الحمد لله كيف حالك انتي.
رزان:الحمد لله..
رفقه:بايته معاك البارح؟!
ضحكوا حدهم ولطيفه..
رزان:ايه البارح طول الليل معاي ع الفيس..
لطيفه وحدهم:هههههههه..
رفقه بضحكه:صامته..
رزان:زيديني ملح..
ضحكوا تاني..
رفقه بضحكه:موليه بارده راك..
حدهم بضحكه:هلبه...
رزان غصت بضحكتها..
لطيفه:وين تبوا تمشوا..
رفقه:جرابه اول شي..
لطيفه:تمام لكن هاه بنحطكم وبنمشي عندي موعد..
رفقه بضحكه :تمام..
حدهم كانت تسمع فدوتهم وهي مبتسمه..
بينما رزان كانت شاده دمعتها بالسيف..
🍃تهرب من الاماكن...من كل شي ممكن يذكرك بوجع قلبك
تلقى نفسك انت نفسك وليت جزء من هالذكريات..
ويحدث ان الشخص لما يعشق حد ياخد من طبعه ومن تصرفاته...ويامحرف عذاب الفراق فهالحاله اللي توصلك انك ترغب بقوة تهرب حتى من نفسك 🍃
🍁وصلوا للمكان اللي يبوه ..
نزلوا وطول خشوا للمحلات وبدوا يدهوروا..
بس طبعا المضايقات كانت حدث ولاحرج..
رزان:درهت كبدي هدى شنو؟!
حدهم:ع ايام رمضان الأخيره احرفين..
رفقه:المكان هدا ديما هكي..
رزان:بناخد اللي نلقاه قدامي ونروحوا..
ضحكوا البنات ..
رفقه:لا مش لهالدرجه..فوتي مادوريش ناخدوا ع اقل من مهلنا..
حدهم:واااو شوفوا القفطان هداكا..
رفقه بذهول:يهبل..
مشتله حدهم تجري وهي تقول:سبقتك..
ضحكوا رزان ورفقه وتبعوها..
بعد دوران دام لساعه..
خدوا رفقه وحدهم بس..رزان الوحيده اللي ماخدت شي لأن ماعجبها شي..
شويه وجت لطيفه..
بعد ركبوا السيارة..
لطيفه:مش مشكله في اماكن تانيه فيها حاجات حلوة..
رزان بإحراج:تعبتك..
لطيفه بإبتسامه:مافيش مشكله حبيبتي..
تحركت بالسيارة ومشوا لمكان تاني..
مجرد خشوا للشارع وجه رفقه تغير..
شبحت لأمها شويه بعدين شبحت القدام..
وصلوا في صفة محلات..
نزلوا..
ولطيفه قعدت تراجي في السيارة..
سبقوا حدهم ورزان خشوا ورفقه ولت لامها..
وقفت فالروشن وقالت:ماما علاش جبتينا هني؟
لطيفه وهي توزع فنظرها ع المكان:علاش خيره المكان؟!
رفقه:ماما!!
شبحتلها وقالت:كانك ع عماد مايجيش هني بكل عماد ديما يافي محلات الادوات الكهربائيه ولا الأثاث بس..كذا مرة جيت وخديت من هني وخطمت حتى ع محلاته مايكونش موجود..
رفقه تنهدت بعدين هزت راسها بإيجاب..
لطيفه:سقدي حبيبتي خلاص المغرب قريب يذن..
رفقه:باهي..وقفت ع حيلها ولفت ومشت..
ولطيفه ولت لهت بالفيس وقروبها اللي تنزل فيه صور بضاعة محلها
داخل...
رزان:حلوات كلهن الصراحه...
حدهم:هدا يمشي معاك اكثر..
رفقه لحقت عليهم وقالت:هاه شن صار معاك رزونه..
رزان بإبتسامه حيره:معرفتش شن ناخد..
ضحكت رفقه..
ع كاصه..
كان واقف صاحب المحل ويشوفلها لفتتله انتباهه من اول ماخشت..
ناض ومشي جيهتهم...
قربلهم وهو يقول بإبتسامه:نقدر نساعدك فشي..
شبحوله..
انصمتوا رفقه وحدهم ...
الشاب كان وسيم هلبه..
رزان :لا شكرا..
الشاب:خل نساعدك في الإختيار ملاحظك محتاره...
شبحتله بحده وقالت :لا مش محتارة اخترت خلاص..
ابتسم وقال:اما واحد..
رزان شبحت للجمبسوت واشرت عليه..
ابتسم وقال:ترا شويه..
بعدوا البنات..
وهو جي للي اشرت عليه رزان وخدي العلاقه بش ينزله..
رفقه وحدهم شبحوا لبعض وهما شادين ضحكتهم..
رزان كانت تشوف للبسه وبس..
وهو يشوفلها ويبتسم..
بعد حول اللبسه من الشطار..
مشي بس بيحطها في الكيسه..
طلع من جيبه خلسة ورقه فيها رقمه واسمه وحطهم في الكيسه..
والتفت مدهولها..
رزان طلعت الفلوس من شنطتها..ومدتهوله..
هو ابتسم وخداهم..
هي طول خدت الكيسه وطلعت وكبدها دارهه.
والبنات وراها يضحكوا..
رفقه:طرف يافرخه طيحتيه ع وجهه..
حدهم:صاروخ..
رزان:اععع يدره الكبد مافيه حاجه سمحه..
شويه طلع وراهم وهو يقول:ياآنسه لحظه..
وقفوا البنات ورزان جت بطنش هو جي قدامها..
شبحتله من فوق للوطا..
هوابتسم وقال:في حاجه نستيها..
استغربوا البنات..
رزان:حاجة شنو؟
مدلها شنطه وقال:هادي معاها...
رفقه ضحكت بصمت كيف جت بتشبح لحدهم جو عيونها ع شي صدمها...
من بعيد شوي..
بجديات شكرا شكرا..
عماد بإبتسامه مجامله:العفو..
سناء بضحكه:بنعتمد محلكم من اليوم وبرا غادي..
عماد:شكرا...
سناء ابتسمت وقالت:ايه بنولي تاني ان شاء الله ناخد اللي حجزته...
عماد:إن شاء الله..
رن تليفون سناء شافت المتصل وقالت:خوي..
عماد ابتسم بالزور..
سناء:الو عامر..
هو غير عيونه عنها وقعد يوزع فنظره ع المكان لعند ماجو عيونه ع مشهد صدمه ع الآخر...
🍁رزان خدت الشنطه وحطتها في الكيس وفاتت من حدا الولد..
والبنات مشوا وراها ورفقه مرتبكه لين خلاص..
وصلوا في السيارة..
حدهم جت بتفتح الباب جت عينها ع عماد كيف واقف ع سناء ويهدرزوا..
رفقه كانت مركزة ع عماد يشبح جيهتهم...
اما رزان لما شافت البنات واقفات مكانهم ماركبوش ويشبحوا الزوز فتركينه وحده..
استغربت..شبحت معاهم لنفس التركينه..
عيونها توسعوا..وفيسع الدموع عبوهم..
قعدت ترعش..وفي نفس الوقت ركبت فيها نار...
ركزت بنظرها ع البنت عرفتها..
سناء..
سناء اخت لمياء
《 سعيده:بغبائك ضيعتيه من بين ايديك وخلتيه لغيرك..صحه ليهم قاعدين يخدموا عليه ليه ليه..》
غيرت عيونها عنها وشبحتله هو..
هو شن دار..
كان حزام شنطة سناء نازل عن كتفها شويه..
رقاه وهو مبتسم..
اللقطه خلت سناء بطير من الفرحه..
اما البنات ..
حدهم ورفقه ركبوا السيارة وهما معصبات ع الآخر..
ورزان قعدت واقفه تتفرج ودموعها ينزلوا..
عماد:خشي استنيه داخل..
سناء ابتسمت:تمام..
مشوا الزوز خشوا مع بعض للمحل..
رزان حست روحها بتطلع..
بتموت...
فجعها صوت كلاكس السيارة..
فتحت الباب وركبت..
لطيفه:خيرك رزان؟
رزان بصوت مخنوق:كنت نواسي..فسبيدروا..
لطيفه:تمام..
شغلت السيارة وتحركوا..
البنت وجهها كان اصفر..
حدهم تشوفلها بخوف..ورفقه خايفه اكثر منها..
طول الطريق ساكتين..
حتى لطيفه تهدرز..
يدوب بنتها تجاوبها..
قعدوا هكي لعند ماحطت لطيفه البنات قدام حوش عزيزة..
خشوا..
وهما مشوا وقلب رفقه عند بنت عمها💔
داخل..
حدهم:رزونه؟
رزان بصوت يدوب طالع:نسيت..ماخدتيش لأمي..
حدهم:رزان انتي كويسه؟؟
رزان:تس تس..مش كويسه بكل..
ومشت خشت داخل..
وحدهم وراها..
تلقوهم سعيده وامال..
سعيده بإبتسامه:روحتن؟
امال:ورني بسرعه شن خديتن..
مدت رزان كيستها لأمها وشبحتلها..نزلوا دموعها وقالت:سامحيني ماما...نسيتك...
ركزت امها ع وجهها كيف مولي اصفر وشواربها كيف ابياضوا..
سعيده وهي مضيقه عيونها:رزان!
ورزان معاش وعت بشي بعد سمعت اسمها بصوت امها..
💔🍁
ليلتها تعبت هلبه..
بكت هلبه لين صدعت..
وانصابت بالغثيان وقعدت ترجع اغلب الوقت..
كل اللي حواليها قالوا عين..
حدهم بحزن "ياريتها عين"
🍁🍁🍁🍁
اما هو ...
مارقدش غمضه..
وهو يغلي غلي..
مقعمز ع سريره ويقول بغضب:الكلب وحيد...متاع بنات الفاسد هدا...شن كان يبي فيها واقف عليها!!
غمض عيونه بشده..
اذكر كيف كان واقف عليها ويكلم فيها وترد عليه..
فتح عيونه ومن غضبه شديد وناره الوالعه..
خبط بيده قجر الكامدينو متاعه كسره..
شبك بعدها ايديه فبعض ورجله اليمين تهز بقوة..
شويه وانفتح الباب وخشوا خوته..
شبحوا للقجر..
عماد:برا..
شبحوله بإستياء ..
عماد شبحلهم بغضب وقال:ندوي هندي !؟
هما الزوز وخروا ومشوا طلعوا..
وصكر مالك الباب..
مالك:اقسم بالله يامروان مانك راقدها قبل تقولي شن صاير لخوك..
مروان:افففف...غمض عيونه بعدين فتحهم وقال..باهي تعالى للدار..
🍁🍁🍁🍁
راقدات جنب بعض..
تشبح لبنت عمتها كيف وهي راقده ملامح وجهها حزينه ودموعها ينزلوا ووجهها شاحب..
حطت يدها ع شعرها وقعدت تمسد عليه بلطف وهي تقول بهمس:لهالدرجه تحبيه يارزان؟!!عمري ماريت حد يحب حد هكي..بالذات انتي اخر حد كنت نتوقعه يحب لهالدرجه..
تبدلت ملامح وجهها للحده وقالت..لكن هو مااحقره شكله ماصدق..
"عما..د"
شبحتلها..
لقت ملامح وجهها اقرب للبكاء..
وفعلا قعدت تبكي وهي راقده..
حدهم:رزان..رزان..رزان نوضي..
فتحت عيونها بفزع وشبحت لحدهم..وقالت:عدينا للسوق؟
حدهم انصدمت ردت وهي تقول:حبيبتي رزونه..
قعدت رزان تشوفلها بتوسل وكانها تقوللها قولي ..لا..مامشيناش..
ناضت حدهم قعمزت..
خدت طاسة ميه مسكره كانت حداها فتحتها ومدتها لبنت عمتها وقالت:اشربي رزونه..
رزان ناضت بالسيف..
خدت الطاسه وهي ترجف شربت منها شويه ومدت الطاسه لبنت خالها..
خدتها ..
ورجعت رزان رقدت وهي عاطيتها بالظهر..
تنهدت حدهم بألم وحطت راسها ع المخده وقعدت تشوف لرزان بحزن..
🌴🌴🌴🌴
راقده ففراشها وتهدرز بالتليفون..
غاليه:ايه ياحنه نهار السبت يردها........هي هكي تبي.........دايرة روحها تتغلا......اني والله ماهامتني كل همي الوليدات بس........ايه.........باهي مالا...نراجو فيكم......ضحكت.....ايه فحوش ميلاد يامعفنه....باهي باهي..سلمي ع البنات.....تصبحي ع خير...بالسلامه..بالسلامه...صكرت..
وشبحت جنبها..لقت حنين راقده بالنوم..
خدت الريموت وسكرت بيه التلفزيون...
بعدين حطاته ع مسند المندار وقالت:كان يطلع اللي فبالي صح ياحميده معناها انتي بتكسري خوتك قدام الناس قبل ماتكسريهم قدامه...
في الدار التانيه..
لالا مادور لاقضيه ولاغيرها..
الصديق:لليوم خوك محمد يتحلف فيا..
حميده بصدمه:امتى؟!
الصديق:بكري العشيه حدا محل امحمد حسين..تلاقيت اني وياه لقح نسيب كلام وعدا..
حميده:مادوره محمد ديما هكي يتصرف بلاعقل..
الصديق ابتسم تهكما بعدين قال:باهي امتى تبي نروح بيك؟
حميده:بعد يتم عرس بنت اختي..بعد عشرة ايام يعني..
الصديق:وخوتك؟
حميده:قتلك مادور حد هالشي يخصني مايخصهم...
ابتسم الصديق وقال:غير امتى يعدي عرس بنت اختك..مستاحشك الزفت الأحرف..مستاحش ال..
حميده بضحكه:خلاص ياسرك الليله..بنعدي نرقد..
الصديق:اااخخخ وخلاص..
ضحكت وقالت:باي..وصكرت وهي تضحك..
حميده بفرح:مازال الصديق متاع زمان..الباين حتى بعد غبت عنه عرف قيمتي..ابتسمت بمكر..غير نوصل بس هديك الشبيه لما نطلعها ملزوزة بالشباشب...
...يتبع..
