#العشق_المتمرد "اختبار"
الجزء112 القسم الأخير
#جمان_فريد
🌟..
وصلت سيارة محمد قدام حوش حميد..
انفتح باب الكونشيلو تلقائيا..
وخش محمد بسيارته..
كانوا حميد والأولاد في استقبالهم..
درس محمد..
ونزلت امه اللي جاها ولدها حميد طول يساعدها..
ومن الخلف غاليه وحميده ورزان..
بعدين نزل محمد..
سلموا ع حميد والاولاد بعدين خشوا داخل..
كانت رفقه تراجي فخشة رزان..
كانت تبي كل شي يكون عادي..
ابتسمت بفرح لما شافتها وسلموا ع بعض سلام حار..
ولطيفه سلمت ع عزوزتها وحمواتها..
بعدين..
جت رزان للطيفه وسلمت عليها..
ورفقه سلمت ع حناها وعماتها..
بعدين خشوا داخل..
لطيفه وهي تمسح ع راس حنين:ماشاء الله كبرت وراحت عسوله..
حميده بإبتسامه:تسلمي..
خشوا الصاله وقعمزوا يهدرزوا..
شويه وخدت رفقه رزان ومشوا لدارها..
رزان:هدين كلهن جابهلك هو؟
رفقه بضحكه:ايه..تعرفي مكتبة الوفاق يفوتوا يومين ويكلموني يقولولي في هديه ليك من عدنان الطير نمشي مع اويس ونجيبها..
رزان برفعة حواجب:اويس مايدققش؟
رفقه:لا ياحنه بدوا يحلوا في عويناتهم هو وخوه عليا لكن اني نعرف كيف نصرف روحي..
رزان:باهي توا ع شن ناويه مع عدنان هدى؟
رفقه:مش عارفه..
رزان:مش قلتي عاجبك..
رفقه:اممم..بس مش هلبه..يللا مش مهم توا..تعالي نوريك..
خدت يد رزان ومشت بيها للدولاب..
فتحت بابه السحاب ..
بعدين طلعت قفطانها اللي بتلبسه..
رفقه:شن رايك؟
القفطان كان لونه احمر غامق ..قصير ..كم طويل..
..من عند الصدر لأعلى الفخد مغطي الجسم بقماش احمر صادا..
وفوقه دانتيل من نهايى الرقبه لعند نهاية الفخد..
ظهره عريان..
رزان بضحكه وهي متفاجئة:حلو حلو تخيلتك فيه..
رفقه ابتسمت وقالت:وانتي؟..
رزان بإبتسامه:شويه بس..
مشت للساكو متاعها..فتحاته وطلعت منه القفطان..
وفرداته قدام بنت عمها..
رفقه وهي متفاجئة ضحكت وقالت؛يامحاسن الصدف..
رزان بضحكه:قولي القلوب عند بعض..
💎رزان قفطانها دانتيل حتي هي ولونه اورق غامق..
الفرق التاني اللي بينه وبين قفطان رفقه..
فيه من الوسط حزام ستان..
رفقه ابتسمت وقالت:صح..تنهدت بحماس بعدين قالت..بعد الغدي طول بنمشوا للمزين..
رزان هزت راسها بإيجاب وهي مبتسمه..
🍃شن هالبرود؟..
لامبالاة عجيبه..
يعني عادي عندها..وكأنها جايه تحضر فمناسبه لقريب ليها مايربطهاش بيه غير صلة القرابه!..
وين الدموع..!!؟
كيف..قلبها مايوجعش فيها.!!؟
مش حاسه بشعور مؤلم!!؟
اااه وخلاص..
كله تصنع..كله تمثيل...
هي توا في حاله غريبه..التظاهر بالقوة يخلي الإنسان يتوهم انه قوي فعلا..
يعني..
هي ملبسه مشاعرها توا ثوب مش ليها..تنكري...
بس يعني لأمتى..حتقعد محافظه ع وضعها هدا؟..
هل حتقعد صامده الليله كلها!!؟..
🍃ان الليل لناظره قريب🍃
🍁🍁🍁🍁
ايوه......هلا.........كله واتي......امتى امتى؟!.....تمام...تمام.....نتلاقوا....تشاو...
وصكر..
:شنو عمده تبي نقص منه زي قبل؟
عماد وهو يشوف لروحه فالمرايه اعاق صحة نظره كمية دموع عبت العيون..
《 شن رايك فقصته هكي احلا ولاقبل احلا..ولا لوحلقته بكل احلا
هي ابتسمت ع جنب وقالت:احمم..نزلت عيونها..سمح عليك كله》
الحلاق:عماد!؟
فتح عيونه بزياده وقال:قص منه شويه..وخففلي اللحيه..
الحلاق ابتسم وقال:تمام..ضحك بعدين قال..واخيرا ودعت العزوبيه ياصاحبي...وان شاء الله ماتندمش..
ابتسم عماد بألم وقال؛ربي مايجيب ندم💔..
🍁🍁🍁🍁
واقفين قدام الكوجينه..
دنيا:حلوة لقطة انك تخلي شعرك ع طوله..
سناء بإبتسامه:حق حلوة دنو..
دنيا:وتهبل شعرك بروحه ماشاء الله..
ضحكت دنيا لما انطبعت فجأة بوسه ع خدها.. بعدين شبحت جنبها
لمياء بضحكه:وانتي دنونه شن بتلبسي؟
دنيا بإبتسامه:اني وايلاف زي بعض..رقصت حواجبها وقالت..بنخليها مفاجأه..
قرصتها لمياء من خدها وقالت؛ايوه يامفاجآت انت..
ضحكت دنيا..
سناء؛وانتي يامشفشفه؟
لمياء:بنلبس زوز قفاطين..
سناء:هييي تبي تغطي عليا؟!
ضربتها ع كتفها :عينك..نبي نغطي ع الكل ماعداك..
سناء:ردي بالك ايوه..
لمياء:حماره..
ودنيا تضحك عليهم..
ع جية امهم:هي بسرعه افطري انتي شويه تانيه وعامر بيجيك يرفعك..
سناء:باهي ومشت خشت الكوجينه..
نادره:انتم الزوز بتمشوا معاي الصاله نديروا تشك اخير..
لمياء:تمام...تو نقول لعمر يرفعنا..شبحت لاختها..عادي دنيا ولا؟
دنيا:كان امي معانا عادي أسعد مايقولش لا..
لمياء:تمام..ومشت ع تركينه بش تكلم عمر..
🍁🍁🍁🍁
في حوش زينب
كان موجود الهادي بعيلته
وفحوش كفايه مافي حد من العيله
كيف مافي حد من العيله فحوش اصحاب المناسبه!!؟
حتى حناه ماتجيش؟
كفايه اضايقت هلبه من الحركه هادي..مافهمتش علاش داروها..
طول اتصلت بنعيمه وهي تبكي..
كفايه ببكي؛معقوله يانعيمه حركه زي هادي يديروها؟؟شن معناها يانعيمه ترا قولي؟
نعيمه انوجعت ع اختها هلبه لهدا قررت تقولها ع الموقف اللي داره ولدها اخر مرة..
كفايه بتضييقة عيون ودموعها تنزل :وعلاش ماحد قالي؟!!
نعيمه:مايبوكش اديري مشكله انتي وياه ياكفايه..
كفايه:باهي هو حركته حقيره زي وجهه لكن هدا مايبررش ياوخيتي حركتهم حتى قدام سعد غلط يانعيمه والله غلط..
تنهدت نعيمه وقالت:صكري كفايه توا اني تو نتصرف..
كفايه رشفت وقالت:باهي..
صكرت كفايه..
وبعدها نعيمه طول اتصلت بغاليه لكن لقت رقمها مشغول..
🍁🍁🍁
غاليه:ماهو بعدين حني كلنا بنعدوا غادي؟!
زينب:غاليه انتي مقتنعه باللي تقولي فيه!!تعرفي ياغاليه لو ديرولي اني حركه زي هادي قسما بالله من بعدها معاد نعرفكم..
سكتت غاليه..
زينب:توا توا تقولوا لمحمد يرفعكم غادي..
غاليه بحده:تمام يعدن امي وحميده كلا والله ماقاصتها خطوة ..وهي بالسلامه..وصكرت ع زينب..
غاليه:بعد الحركه اللي دارها اخر مرة مش طايقه نشوف زومته..باهي اللي جيت نحضرله اصلا..
رن تليفونها لقاته نعيمه..
غاليه:اففففف..
فتحت الخط وردت..
غاليه؛هاه نعيمه مرحبتين..
نعيمه:اهلين غاليه حمد لله ع سلامتكم ..
غاليه؛الله يسلمك..
نعيمه:غاليه توا كلمتني كفايه وهي تبكي..واجعها خاطرها هلبه..
غاليه بنفاذ صبر:تمام تمام..توا بيعدنلها امي وحميده..
🍁🍁🍁
وبعد طول محاولة اقناع للحاجه فاطمه رضت تمشي هي وحميده واللي رفعهم حميد..
محمد حطهم وروح مش حيحضر طبعا بعد الموقف اللي صار..
والهادي دار نفس الشي حتى هو...
🌴ميلاد...
سعيده بضيق:مش عارفه كيف سايرتها وخليتها تعدي؟
ميلاد ببرود:بيان ولد عمتها وين المشكله..
سعيده :ميلاد ماتحرقلي دمي!
ميلاد:ماعندي ليش نحرقلك دمك..الموضوع عادي ماديريش منه قضيه وتخلي البنت تكبره فعقلها..خليها تشوفه شي عادي..افهمي..
وخدي تزدان فلوسه ومشي طلع من حداها..
سعيده بضيق ممزوج بالخوف:ياربي قويها يارب..
🍁🍁🍁🍁
كفايه وهي تمسح فدموعها:باهي ليش يمي مافكرتيش فمنظري قدام راجلي ومتاعيني..
سكتت فاطمه وهي تشوف لسبحتها وتسبح..
حميده:خلاص ياكفايه توا اللي صار صار..عربك قريب يجوا عدي اغسلي وجهك..
مسحت كفايه ع وجهها ..
بعدين خدت نفس وناضت وهي مضايقه ومشت طلعت من حداهم..
حميده شبحت لأمها شويه بعدين غيرت عيونها لبنتها وبنت اختها اللي كانوا يتفرجوا ع التلفزيون..لقت نورهان تشوفلهم بكره..
شبحتلها شويه بعدين غيرت عيونها عنها...
🍁🍁🍁🍁
بنعزمهم غدوة يجوني..
حميد:تمام..هي واتيه ؟..
غزلان بضحكه:ايه بس قبلها في حاجه نبي نقولهالك..
حميد ابتسم بإستغراب:شنو؟..
غزلان:هههههه..اني حامل..
فتح عيونه ع وسعهم من المفاجآه بعدين ضحك وقال:جديات؟
غزلان بضحكه:مالا بصارة!
حميد بضحكه:باهي باهي الحمد لله..
غزلان:فرحان يعني؟
حميد:غزيله...هدا سؤال تسأليه؟؟اكيد فرحان ونص..
ضحكت..
حميد بإبتسامه:هي توا وقت عليك..في الليل نزيدوا نهدرزوا..
غزلان بضحكه:باهي..
خدي يدها وطلعوا مع بعض من الدار..
🍁🍁🍁🍁
بالله!
لطيفه بضحكه:ليا لتوا 5اسابيع..
غاليه وهي مبتسمه بمفاجآه:ماشاء الله تحلي عويناتك ع خير..
لطيفه بإبتسامه:آمين.
غاليه:فرحانه؟
لطيفه ضحكت وقالت:هلبه..طبعا حميد مايندريش اليوم إن شاء الله بنقوله..
غاليه ابتسمت وهزت راسها بإيجاب..
🍁🍁🍁🍁
مع الواحد الظهر..
كانت واصله رباب لحوش اهلها..حطها مؤنس وروح طول لانه مشغول..
ساعه تانيه..
وتغدوا كلهم وبدوا يوتوا فأرواحهم بش بيمشوا لمزين فالجهة اللي تسكن فيها زينب..
رفعهم حمزة..
والولاد خداهم سند وطلعهم يدهوروا..
🍁🍁🍁
في المزين..
المزينه:ماشاء الله رباب سمنتي..
ضحكت رباب وقالت:واخيرا سمنت..
ضحكوا..
المزينه:مرتاحه فالسكنه غادي..
رباب:ايه احسن واريح من هني..غادي نادر تسمعي صوت الرصاص..عكس هني اللي جميع انواع الأسلحه تسمعي صوتها ليل نهار
المزينه :صدقتي..ربي يفرج
كلهم :آمين..
المزينه توجه في اوامر للعاملات اللي عندها:ساميه انتي شدي رانيا..وصفاء انتي شدي مدام زينب..اني خلوا عليا رباب ومرت خالها...
مرت الخال..
كانت قريب تطربق..
وين رت شن بيلبسوا حماتها وبناتها..
قارنت اكثر نفسها برباب..
هي قفطانها جديد وقنين..لكن مش بفخامه قفطان رباب ولاهو مميز زي قفاطين زينب ورانيا..
للأسف امكانيات الهادي هي هي ماتعدتلش..معتمد بس ع معاشه من الدوله..ومعاشها هي والزوز مايديروا شي جنب هالغلاء..
عيب الهادي ان ماعنداش هديكا الرغبة بش يحسن من مستواهم..ممكن لأنه مايبيش يخش شي مايفهمش فيه..
برغم ان سابقا حاولوا معاه هانيبال وعمر ان يشاركهم وهو رفض..رفض تام..
🍁🍁🍁🍁
في مركز سهى الحسناء..
وحده من العاملات:بصراحه القفطان اللي بتلبسيه تحفه تحفه..تفصيل صح؟
سناء بإبتسامه:ايه..
لمياء:مفصل فتركيا غادي..
سناء:مشيت غادي ع خاطره..
العامله:رهيب بجد..ماشاء الله..
شبحت سناء للمرايه وهي مبتسمه بغرور..
لمياء:مكياجها خلي الوانه مناسبه للقفطان..
العامله:القفطان اللي بيجيها في البيان شن وضعه؟
سناء:نفس اللون وكبير..
العامله:تمام..هي نبدوا..
سناء:نبدوا...
🍁🍁🍁🍁
نبيه مرفوع مش مفرود..
المزينه:تمام..
رفقه:اني نبيه مفرود..
المزينه:تمام..شبحت لغاليه..
غاليه:حتى اني مفرود..
المزينه :تمام..ومدام لطيفه...تسريحه..
لطيفه بإبتسامه:ايه..
المزينه: ok
وبدت حتى هي تعطي فتعليماتها للعاملات..
🍁نعيمه ونور كذلك مشوا للمزين
نعيمه قصت شعرها ولاول مرة اديرها ونور كانت تبيه مرفوع جزء منه والباقي مفرود..
🌴🌴🌴🌴🌴
مكالمه هاتفيه..
حدهم:والله قلبي واكلني عليها من بكري نخمم..
بلقيس:والله لو مكانها مانعدي وطز في اللي بيقول عليا حاجه..
حدهم:هادي رزان تميل لكن ماطيحش..ولاترضى حد يكسرها..
بلقيس:انكسرت وفات..
حدهم:حتى لو..لازم تبينلهم كلهم العكس..
بلقيس بضيق:ربي يعدي هالليله ع خير..
حدهم بحزن:يارب..
🍃🍃🍃🍃🍃🍃
وتتحرك عقارب الساعه..
وسناء بين ايدين المزينه تجمل وتزين وتوتي فيها لليله مميزة جدا بالنسبه ليها مخليه سناء قمة فالفرح والحماس..
ورزان اللي كانت المزينه فهاللحظه وهي ترسملها فعيونها..
تقوي فروحها بعبارات تردد فيهم بينها وبين نفسها..
"خليك قويه واقهريه كيف ماقهرك..
خليه يشوف انه معاش يفرق معاك..
خليك قويه الليله بس..وبعدين ابكي لين تشبعي يارزان الليله بس..الليله بس يارزان"
المزينه بعد كملت:تبارك الرحمن..
شبحت رزان للمرايه بإبتسامه وهي تقول:تسلمي..
بعد كملوا مكياجهم..
لبسوا قفاطنيهم..
ماعدا غاليه كانت لبستها لبسة سروال حلوة هلبه..
وبدولهم في الشعر...
🍁🍁🍁🍁
الساعه 8:00مساءا..
كانت الصاله معبيه ..
الاهل والأصحاب والمعارف..
طبعا ..
نظام الحفله حيكون كالتالي..
حيكونوا موجودين عيلة عماد من البدايه فيها يعني مش حيجوا فمده محدده..
وكأنها حفله خطوبه مشتركه زي اللي يديروا فيها في البلدان الاجنبيه..
اقرب امثله
"مصر..والشام "..
نادره كانت ادور في الصاله ع المعازيم..
لابسه بدله سروال ورافعه شعرها...ومكياجها كان ثقيل..
نافشة ريشها وحاسبه روحها وين...
شويه وجوا بناتها لمياء ودنيا..
لمياء لابسه قفطان للركبه ..
ابيض ضيق من فوق ومن الوسط يبدا واسع وفيه زي الثنيات بطول...
سيره رقيق..
صدرها مكشوف شويه..
في الوسط فيه حزام اسود يتصكر في النص بفراشه كلها فصوص لمعات..
رافعه شعرها ذيل حصان بطريقه حلوة..
ومقدمته كلها جايه ع جنب ومثبت ب"سبراي"..
ومكياجها مناسب للون بشرتها..
لابسه ذهب..
وفرجليها كندره فضيه كعبها عالي...
اما اختها..
فكانت لابسه قفطان سواري لونه قهوي طويل ومن غير سيور وكله لماع ودايره تسريحه قنينه..
لمياء:هاه امي كله تمام..
نادره:ايه..سناء داخل..
لمياء:ايه سكرت عليها الدار بالمفتاح..
نادره هزت راسها بإيجاب..
دنيا:امتى يجوا هما..
لمياء شافت الساعه فيدها وقالت:نص ساعة تانيه ويجوا..
🍃وفاتت هالنص الساعه..
وجو اهل العريس من عيلة امه وبوه...
طبعا البيان مش جاي في سوابيت عاديات لا..
اللقطه اللي دارها عماد ماندارتش بكل قبل..
جابوه فصناديق اشبه بصناديق الهدايا اللي يبعتوا فيها الملوك والسلاطين هدايا لبعض
دخلوهم العاملات متاع الصاله وكل صندوق يرفعوه زوز
ماعدا اللي فيه الدبله والتعليقه كفايه هي اللي خشت بيه..
كله انحط في نص الصاله..
والناس تتفرج بإنبهار..
ولمياء وامها يراقبوا فنظراتهم المنبهره وع وجوههم ابتسامه كبر..
خالاته انصدموا بقوة ماعدا غاليه مش مستبعده عليه اي شي يديره بش يبرد ع نفسه..
اما رزان...
كانت واقفه وتشوف وهي مش مصدقه..
للهدرجه سناء ولت قيمتها كبيرة عنده بش دارلها هدا كله؟!!
هي هني فعلا بدت تحس..
ان عماد خلاص...مش ليها..مش نصيبها...
كانوا يشتوا ويغنوا ويصفقوا وهي تصفق معاهم..
وعيونها ع الصندوق متاع الذهب اللي تتوسطه الدبله..
عيونها ع الدبله..
وهي تبلع فعبرتها مع ريقها ورجعت تردد بينها وبين نفسها
"خليك قويه..اقهري..وماتنقهري"..
شويه..
وبدوا يحولوا في عباياتهم والعاملات خدوهم منهم...
ونادرة وبناويتها يرحبوا ويأهلوا ويسهلوا..
بعد وروهم طاولاتهم وقعمزوا عليهم..
جو رفعوا الصناديق ولمياء ع راسهم...
مشرفه اشراف تام ع كل شي..
ومسيطره ع الوضع..
🍁🍁🍁🍁
توزيعهم ع الطاولات كان كالتالي..
كفايه وامها وحماتها وخواتها زينب ونعيمه ع طاوله..
وسلفاتها وبناتهم ع طاولتين..
حميده ونور وغزلان وسميه ورانيا ومعاهم البنات الصغيرات ع طاوله..
ورباب مع غاليه ولطيفه ورفقه ورزان ع طاوله..
عيون لطيفه ع ضرتها اكثر شي..
شاده دموعها بالسيف..
اما غزلان مش مدورة تهدرز مع اللي معاها وتضحك وجوها مليح..
رباب:في الفراشه مرة وحده مالا حفلة العرس وين بيديروها؟!
غاليه شبحت لرزان لقتها تهدرز ع رفقه..
تبان عاديه بس لمعة الدمعه فعيونها..
من بعيد شوي..
نادره:اللي لابسه قفطان ازرق كحلي..
صاحبتها:ماشاء الله زي الغزاله طالعين ع بعض هي وبرهومه..
نادره:من لما راها ياصفيه وهو قريب يهبل عليها ماسافر الا بالسيف..خسارة امها ماجتش قبل ناويه نكلمها عليها..
صفيه؛علاش ماجتش؟
نادره:عندها امها تعبينه شويه قعدت معاها قالوا..
صفيه؛اها..
🍁🍁🍁🍁
رانيا:لمياء طالعه حلوة..
نور:الحق ايه وقفطانها مميز وحلو ماشي معاها..
وسميه تسمع وهي بتموت من الغيظ..
غزلان:الصاله قنينه حاضرة فيها مناسبه قبل..
حميده وهي توزع فنظرها عليها:ايه سمحه..
🍁🍁🍁🍁
رفقه كانت لاهيه بتليفونها..
وعيون رزان كانوا ع الكوشه الفاضيه اللي بعد شويه بتتعبا بسناء..وحبيبها💔..
حاسه بمغص فبطنها..
وقلبها نبضاته موجعه هلبه..
وكانت تبلع في العبرة مع الريق اللي ولى طعمه حنضل..
وتحاول تقوي روحها..
وعيون غاليه ماتحولوش من عليها...
فجأه..
وقفت الأغاني...
انطفي الضي متاع الصاله جزئيا...
وكان في سبوت لايت ع مدخل من مداخلها...
وبدت موسيقي لأغنيه من اغاني العملاق الراحل..
محمد حسن..💓
كان المقدمه الموسيقيه لأغنية "طق العود.."
كلهم عيونهم ع بقعة الضي..
ويراجو...
وبطن رزان تزيد تنمغص اكثر واكثر..
وعيون رفقه عليها..
طولت قبل تخش..
كانوا يراجو امتى اتم المقدمه الموسيقيه..
ومجرد ماتمت..
خشت سناء...
ووراها خواته..
وهي تدرج...
كانت مذهله حقيقة..
قفطانها كان حاجه ماصارتش..
كان عبارة عن حولي حرير لونه ياجوري في العنابي مفصل ع هيئة قفطان..
مخصر ع جسمها..
بدون اكمام..
فوسطه حزام فضة ..
ع كتافه كان فيه طرف مشدود بخلالات فضه ع هيئة ورده..
نازل من الخلف طويل هلبه ...
يزحف وراها وين تمشي..
وفي ايديها حدايد كبار فضه..
وخواتم كبار فضه في صوابعها..
صدرها مزين بخناق فضه مغطيه كله..
ومكياجها مكياج صدره..
شعرها مفرود ع طوله..
ومن القدام مدايريلها لقطه موخرين منه للخلف ونافخينه شويه..
ومزين بسلسال فضه ..
وفرجليها كندره ذهبيه كعبها عالي..
كانت اشبه بالسلطنات والملكات فمشيتها ونظراتها...
كلها كبر وابتسامتها مغروره..
طبعا كله تعليمات لمياء...
غزلان:روعه القفطان..
رانيا:يهبببل..
نور قعدت ادور بعيونها فرزان لين جو عليها انوجعت عليها لمالقتها تشوف لسناء بنظره عيون كلها ألم وغيره..
تنهدت بألم بعدين رجعت شافت لسناء..
لطيفه:فكرة مني زعمه؟
رباب:حلوة هلبه...
ورفقه تشوف لرزان وتشوف لسناء بعدين شبحت لغاليه..
غاليه اشرت لرفقه تجي فمكانها..
ناضت بدلت الأماكن هي وعمتها..
قعمزت غاليه وهي تشوف لبنت خوها..
رزان اخترقت انفها ريحة عطر عمتها المميز..
شبحتلها طول..
غاليه ابتسمت..
ورزان حتى هي ابتسمت بوجع...
شويه..
وصلت سناء للكوشه..
خواتها قاموا طرف القفطان وساعدوها بش تقعمز ..
وقعمزت ع نهاية الأغنيه بالزبط..
المنشطه متاع الحفله كانت موجوده بالصوت بس عن طريق مكبرات الصوت قالت:مبروك سنسن..
ضحكوا ..
سناء بضحكه:الله يبارك فيك..
المنشطه:غطيت افراح آل ****كلهم ماشاء الله..سجلوني معاكم في الكتيب وخلاص..
ضحكوا تاني..
المنشطه:شن رايك ابله نادره..
نادره بصوت عالي:خلاااص انتي من العيله..
المنشطه:زوجوني لإبراهيم بش نولي من العيله..
ضحكوا ..
ولمياء بدموعها..
المنشطه؛انبصر انبصر...اكبر منه راني ب7سنين.
غاليه تعكرت ضحكتها..
المنشطه:يللا عقباله حتى هو نقيموله فرحه واول مايخش بالعروسه نفتحله اغنيه اعذريني يوم زفافك مقدرتش افرح زيهم..
واالصاله كلها انقلبت ضحك..
المنشطه بضحكه:هي خلاص خلونا من البصارة توا وخل نبدوا في الهياجه..سنسن..
سناء؛هاااه..
المنشطه :اضحكي..
ضحكت..
وشغلت المنشطه اغنية تامر
"ضحكتها مابتهزرش"..
وشويه وبدوا البنات يركبوا ع المسرح ويرقصوا..
اما سناء جتها المصورة وبدت تاخدلها فلقطات..
ورزان تشوفلها..
مش قادره تحول عيونها من عليها..
تزيد تقهر فروحها..
تشوف للبنت اللي خدت منها حب عمرها..
حب طفولتها ومراهقتها وبداية شبابها..
خدت منها اكثر انسان تحبه فالدنيا..
حبيب قلبها..
عمدة قلبها..اول حب قلبها ينبضله من لما كان هالقلب صغيرون...
وبدي يكبر ويكبر قلبها بيه..
لين تحول لعشق سكنه وملكه..
ولت معاش تتخيل الحياة بدونه..
فلحظه..
راح..
انخطف..
ولقت روحها بين ليله وضحاها خاسره كل شي..
حبها...وقلبها...💔
عمتها..
كانت خايفه من الكمد اللي فيه رزان توا خايفه من اللحظه اللي بيخش فيها عماد..
خايفه هلبه خايفه...
🍁🍁🍁🍁
وتتحرك عقارب الساعه...
والحفله كل مالها تنشط.. كانت نار... ومقيومه...
ع المسرح صاحبات سناء وبنات خالاتها وخواتها مدايرين دوره ع سناء اللي كانت ترقص في النص ع اغنية ياأحلى منهم...
ترقص وهي تضحك واللي حواليها يصفقولها...
ترقص براحه بعد حولوها طرف القفطان الطويل...
والمصورة تصور بالفيديو...
بعد تمت..
المنشطه قالت:طبعا حفلة اليوم قايمتها لمياء خانوم ع راسها تحيه للمياء ياهوووو..
كلهم يضحكوا ولمياء تضحك..
والمعازيم يصفقوا..
المنشطه:الاغنيه هادي هديه مني ليك..
شغلت المنشطه الاغنيه..
والبنات زبطوها من المقدمه عيطوا كلهم..
سناء خدت يد اختها وجابتها حداها..
وبدوا يرقصوا ع اغنية..
"انت معلم"..
سناء تغني مع الأغنيه:..
انت معلم واحني منك نتعلم..
نسكت وانت موجود مانرضى نتكلم..
غمزت لاختها ولمياء قعدت تضحك..
وخرت سناء وقفت مع اللي مدايرين دايره..
ولمياء ترقص بروحها..
وهما شدو فيدين بعض ورفعوهم وقعدوا يدوروا عليها..
وهما يغنوا مع الأغنيه..
ولمياء ترقص بكل حماس..
وصلوا في مقطع قعدوا يغنوا فيه كلهم..
تستاهل طيارة ..
لاطيارة شويه عليك..
تطير انت في العالي لامانوصلك ياغالي...
تطير انت في العالي لا مانوصلك ياغالي..
ولمياء تضحك وترقص...
زينب؛ان شاء الله معاش في اغاني بعد هالأغنيه والله معاد تقعمزها بعدين..
ضحكت نعيمه..
اما كفايه فكانت تشوف لبنت خوها بحسرة..
مافيش وحده تملى عيون كفايه غير رزان...
رزان وبس هي اللي تستاهل عماد فنظرها..
🍁🍁🍁🍁
بعد الأغنيه هادي..
طلعوا العشي..
وبدوا يتعشوا..
رزان ماقدرت تحط ففمها شي..
تشبح للصونيه وخلاص..
رباب تاكل وتشوفلها قلبها وجعها..
شبحت لغاليه..
لقت غاليه تمضغ وهي تشوف لرزان..
شويه..
وفاتوا من حداهم..لمياء وسناء ودنيا..
ماشين مع اختهم بيدخلوها ويساعدوها تغير..
هني صدرها انغم..
شدت شرشاف الطاوله بقوة..
ومازالت تبلع فالعبرة..
قامت راسها وخدت نفس..
شبحولها اللي ع الطاوله كلهم..
هي وزعت نظرها عليهم وتصنعت الأبتسامه..
بعدين شبحت لصونيتها وخدت الشوكه وقعدت تحرك فالرز ع اساس انها تاكل عادي...
ربع ساعه بالزبط..
وبدوا العاملات يلموا في الصواني ولوازم العشي..
ورزان تراقب في حركتهم كلهم وهما متوزعات فأرجاء الصاله..
وقلبها قريب يطلع من صدرها من قوة الدق...
لحظات..
وخشوا بالطورطه اللي كانت ع تلاته ادوار محطوطه ع كروسه زوز عاملات يدخلوا فيها...
رزان معاها بعيونها..
وقلبها مابطلش يدق بقوة رهيبه..
تقول قلبها يبي يوقف قبل لا تحضر اللحظات الجايه..
شافت العاملات كيف حطوا الطورطه مقابله طاوله وزوز كراسي..
ووراهم المكيف..
كل التفاصيل مدققه فيها كل التفاصيل..
🍃..
بالزبط عدوا 5 دقايق..
انطفت الموسيقى..
والمنشطه صدح صوتها فالصاله كلها..
"البسوا حجابكم وعباياتكم العريس بيخش بعروسته".
غمضت عيونها بشده..
غاليه حطت يدها ع فخدها..
فتحت عيونها وشبحت لعمتها وابتسمت وهزت راسها بإيجاب..
ورباب ولطيفه ورفقه يشوفولها...
قلبها انتفض..
لما انطفي ضي الصاله كله هالمره..
وسبوت لايت انفتح ع المدخل..
الأغنيه اللي بيخشوا عليها كانت من اختيار سناء..
قديمه صح..
بس هي تحبها..
اغنيه "مايحرمنيش منك" لتامر حسني..
اشتغلت الأغنيه..
المقدمه الموسقيه..بعد عدا نصها..
خشوا الزوز...
اووووف...
🍃قلبي وجعني🍃
قعدوا يمشوا ..
سناء يدها شاده ذراع عماد...
عماد..
اللي كان مميز كعادته..
البدله متاعه غير تقليديه زي ماهو تعود يكون غير تقليدي..
كان طالع فضيع..
بطوله وعرضه وكارزيمته وجاذبيته..
كان طاغي بحضوره..
وسناء جنبه مبتسمه بفرح..
لابسه قفطان كبير ربع كم لونه ياجوري وكله لماع..
يمشوا..
وقدامهم المصورة...
العيله مصدومين..
كيف هكي تطلع قدامه..قفطانها عريان شويه..
وشعرها عريان!!
توقعوها تخش بالكاب معاه..
وسناء كانت عكس التوقعات..
فاطمه"عليك عار ! خيي عليك ياعماد خييي"..
🍃خيي عليك ياعماد اللي توا..
خي عليك..
كيف وليت هكي..
غريب عن ناسك واحبابك..
كيف وليت هكي..
تجرح بدون تردد..
تجرح فكل اللي تحبهم..
غربتهم عنك..تغربت عنهم..
معاش ولى فيك ولا حاجه من عماد اللي يعرفوه..
هي بالذات..
وهي تشوف فيك كيف مبتسم وتهدرز ع سناء وتضحك معاها ماعرفتكش..
من هو هدا..!؟
لايمكن يكون نفسه عماد اللي حباته اللي غيرها بكل مافيها للأحسن..
اللي خلاها انسانه حلوه من برا ومن داخل...
معقوله..
هي السبب فتغييره من الأحسن للسيء ثم الأسوأ؟!
ايه هي..
وبدت تلوم فروحها وتأنب فيها..
وقلبها المسكين اهتري من الجروح والآلام..
مازال صغير ع هالوجع صغير...
وصلوا للكوشه..
وقفوا مقابلين الناس..
وانفتح الضي كله...
هو ضيق عيونه بضحكه..بعدين غيرهم للطاوله المقابله اللي فيها امها...
تقعد ام..
ابتسمت لولدها وناضتله..
هو شبح لخالاته وعمته ابتسملهم ردوله الإبتسامه..
عيونه غيرهم بش يشبح
لخطيبته..
خانوه..
وجو ع ...
حبيبته...
تلاشت ابتسامته..
وحلت محلها ملامح الصدمه..
هي كانت تهدرز ع غاليه ..
وغاليه تهدرز عليها..
غاليه:اضحكي..
ضحكت رزان وهي تشوف لعمتها..
ومن داخل حجم الآهة عبا صدرها كله..💔
هو رمش عيونه بسرعه وبلع ريقه وشبح طول لخطيبته..
عماد بضحكه مصطنعه:جو مليح..
ضحكت سناء وهزت راسها بإيجاب..
لمياء بإبتسامه:هي توا وقت تلبيس..
عماد:واتي..
ضحكت لمياء..
وامه تشوفله وهي مبتسمه..
ع جية نادره:عماد ولدي..
عماد:شن حالك عمتي..
نادرة بإبتسامه: الحمدلله..
المصورة:كان بتبدوا تلبسوا توا ياريت اللي حوالين العرسان يوقفوا ع الطرفين..
امه جنبه..واخت العروسه وامها جنبها..
لمياء :تمام..تعالي كفايه..
كفايه مشت وقفت حدا ولدها..
ولمياء ونادره مشوا وقفوا حدا لمياء..
مدت كفايه الدبله لولدها..
خداها من يد امه..
هي عيونها ع ايديهم...وقلبها تقول مدبوح يفرفش فلحظاته الأخيره وهو تحت سكين قاتله..
اشتغلت اغنية "أسعد وحده" لإليسا..
وفعلا سناء كانت أسعد وحده هداكا الوقت..
❣الفرحه اللي انا فيها دي كلها ترجع ليك..
وانا جنبك راضيه ومرتاحه لكل مافيك..
لبس سناء الدبله..
وهي تشوف وروحها تقول قاعده ترقى..
شدت غاليه يدها بالقوة..وهي شدت يد غاليه بكل قوتها..
فتحت عيونها ع وسعهم ...
لما شافت سناء قربت منه وسلمت عليه بالخد..
غاليه فنصت..
ورزان غمضت عيونها بشده وزفرت بقوة..
وغاليه تشوفلها بعيون معبيات دموع..
هو بعد عن سناء..وقعد يدور بعيونه فيها..
لين جت عينه فعينها..
شبحلها بنظره حقد ممزوجه بالمكر..
هي ابتسمت ببرود وهي تشوفله ولاكأن الأمر يعنيها..
هو انحرق..
شد يد سناء..
برغم من حالة قلبها اللي قاعد ينزف..
لكن قعدت مبتسمه تحديا فيه..
وغاليه تراقب فيهم وقلبها موجوع ع حالهم..💔
❣من زينا ياحبيبي الليله قولي فيه مين
انا حاسه من كثر الشوق اننا رايحين..
والكون ده كله مش هيسعنا
وأعيش اسعد وحدة انا وانت سنين وسنين...
🍃واعيش اسعد وحده انا وانت سنين وسنين..
تعيش هي وياه!!!
سنين وسنين.!!!
قلبها يقول..
قصدك مازال بنعاني..
مازال في قهر اكتر من هكي..
مازال بتشوفيهم مع بعض مرات ومرات..
فعرسهم..
وبعد عرسهم..
فالزيارات العائلية في المناسبات..
بتشوفيها حامل!!
حامل!!!
بتشوفي صغارهم..!!
صغار سناء وعماد.!!
قصدك..اني بنتحمل هدا كله..اني غير انتي فكرتي فهدا كله..
تمنيت لو ربي يخليني نوقف من توا..
هلبه عليا هلبه..هلبه عليا وعليك..
ياريتنا ماحبينا...
ياريتنا...
"ياريتني ماحبيته ياريتني"..
رزان بصوت هامس مخنوق:ياريتني 💔
سمعتها غاليه وقالت:رزان!
بلعت ريقها..وقالت:مافي شي..
ورفقه ولطيفه ورباب يشوفولها بخوف...
وهي تشوف لعماد..
كيف يلبس فسناء التعليقه...
الحديده فيدها..
الخاتم فبنصر يدها اليسار..
الخراصات فوذانها..
قامت شعرها..
وهو خدي السلسله ولابسهالها وهو قريب عليها..
فاطمه بهمس:خزي خزي خزي خزي..
كفايه تشبح لخواتها ومتاعينها وهي محرجه..
وكلهم يشوفوا للمشهد بصدمه..
شويه..
ومشوا جهة الطورطه..
وهو شاد يدها ويساعد فيها ع المشي..
وصلوا للطاوله..
مشي وخرلها الكرسي وهيئلها الوضع بش توقف براحه بعدين خداها من يدها وجابها للكرسي وقفها ووقف جنبها...
سناء طاير قلبها بيه💓..
ولمياء مبتسمه بفرح...
وهي تتنفس بسرعه..
تشوف فتصرفاته مع سناء...
الإهتمام..الرعايه...
كانوا ليها هي...
وتوا ولو لغيرها..🍃
ومازالت تراقب فيهم بالتفصيل..
كيف شدوا الموس مع بعض..
وبدوا يقصوا في الطورطه ع أغنية "معاك"لسامو زين..
بعد قصوها..
المنشطه نقصت صوت الأغنيه وقالت:شويه بس شويه..سناء..ماهدا ياهدا..
سناء ضحكت..
المنشطه:نبدلوا..
ضحكت تاني لين اتكت بجبهتها ع ذراع عماد وهو كان مبتسم..
االمنشطه:باهي بلاش نبدلوا.. الشرع حلل اربعه شن رايك..
زادو ضحكوا..
اما عماد استغل الفرصه وقال بصوت عالي:
" اني زي رقم واحد مانقبلش القسمه ع اتنين "..
حطت سناء يدها ع فمها وهي تضحك..
المنشطه بضحكه:صحه ليك صحه ليك..مبروك عليك ياسنسن.. مبروك عليكم...واسمعوا هي...
وشغلت اغنيه رامي عياش.."القلب مال"
ياحبيبي القلب مال وانت اللي شغلت البال..
ده مافيش غيرك فحياتي ياحياتي مهما انقال..
رامي عياش🍃
"يامسهر عيني..
حبك على عيني..
يامحير قلبي روحي فداك..
جنبك خليني..
قربك يواسيني ..
ياحياتي وروحي انا بهواك"..
الزوز فهاللحظه عيونهم تلاقت..
فدواخلهم يرددوا فكلمات اغنيه تانيه غير اللي يسمعوا فيها..
اغنية تعنيلها هي هلبه..
لدرجة انها حبت كل اغاني هالفنان ع خاطرها..
بسببه هو..
حتى ذكرياتها الحلوة والغاليه...
سناء خدتها..
هي غيرت عيونها وشبحت لعمتها..اللي كانت تشوفله هو ..
هو غير عيونه لخالته..
نظرة عيون غاليه وجعت قلبه..
كانت واعره هلبه..
طول غير عيونه عنها..
بعدين شبحتلها غاليه..
هي غيرت عيونها عنها وشبحت القدام..
لقت قريباتها كلهم يشبحولها..
نور..
سميه ..غزلان..حميده..
حتى رانيا...
غيرت عيونها عنهم والتفتت..
لقت رفقه ورباب ولطيفه يشوفولها...
ضحكت..بعدين تنهدت وقالت:حلوة حفلتهم..
هما قاعدين يشوفولها وهما ساكتين..
هي كملت تقول:حلوة واجد..والتفتت شبحتلهم من جديد..
لقاته يسلم ع ام سناء..
بعدين باس راسها..
بعدها سلم ع لمياء...
وشد يد خطيبته وهو يكلم فيها ويضحك..
بعدها التفت لأمه..
باس راسها حتى هي..
وقال:ليلتكم سعيده..
ومشي..
خطواته كانت سريعه..
يشبح القدام بس..
لايمين لايسار...
طول...
طلع من القاعه كلها...
ومنها من الصاله كلها..
اول ماوقف برا..
غمض عيونه بشده وخدي شهيق..
بعدين فتح عيونه وزفر...
ومشي لخوته وولاد خالته وصحابه...
داخل..
رن تليفون غاليه فتحت الخط وردت..
غاليه:ايوه..
حميد:هيا..
غاليه:هيا هي..صكرت بعد صكر خوها وقالت..قالوا هيا..
ناضت رزان طول وهي تقول بإستعجال:هيا..
شبحتلهم كيف يشبحولها..بعدين نزلت عيونها لوطا..وهي شاده دمعتها بالزووور 💔...
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
خيرها غاليه ماردت ع هاتفها..
لطيفه بشي من الربكه:خشت..ادوش ماهو..
سعيده:باهي رزان وين؟
لطيفه:ادوش حتى هي ..
سعيده سكتت شويه بعدين قالت:ادوش حق يالطيفه؟!
لطيفه:ايه والله ادوش "سامحني ياربي"...
التفتت وهي تشوف من بعيد شوي لباب دار بنتها..
ورا باب هالدار...
"آاااااه ياعمتي آاااه..قلبي..ياعمتي..بنموت..ياعمتي"..
غاليه ببكي وهي حاضنتها بقوة:بعيد السو ع بنتي بعيد السو..
رفقه ببكي وهي تمسح ع ظهرها:والله مايستاهلك..والله...والله مايستاهلك..
رزان بالعبرة:ريتوه..ريتوه..كيف..كيف يضحك..معاها..كيف شاد يدها..كيف خلاها..خلاها..تبوسه ياعمتي..
شدت ذراع عمتها بقوة لما اذكرت اللقطه هادي..
غاليه كان تتوجع من شدتها..
بس وجع قلبها عليها كان اكبر...
ورفقه فجنبها تبكي بشده..وتشوفلها ومن داخلها تقول
"كله مني اني..اني سبب كل اللي تعيشي فيه توا يارزان"...
...يتبع...
