#العشق_المتمرد "اختبار"
#جمان_فريد
الجزء116 القسم التاني..
🌟..
كوالالمبور..
الساعه 9:00ليلا..
فتح القجر بش بيطلع منه لصقه المزود..
قعد يدور عليها مالقهاش نادى بصوت عالي:وييين اللصقه ياهوووو..
شويه وجت تجري وهي تقول:ماصدقت رقدت عمار اني!!
هو ضحك وقال:وينها اللصقه قلتي في القجر ماهناك شي؟!!..
شبحتله وحركت راسها ايمين ويسار بعدين قالت:قتلك اللي من يالا الحيط من اللي من يالا الدولاب..
مشت للقجر المقصود وهو وراها يقول:وين نندري عليك ..غير هيا سقديني وطليعها..
قعمزت مرام ع روس صباعها وهي تضحك..فتحت القجر وهو معاها يشوف..
طلعت اللصقه ومدتهاله..
هو ضيق عيونه وقرن حواجبه مع ابتسامه استغراب خدي اللصقه وقعمز جنبها ع روس صباعه ومد يده للقجر..
وهي تشوفله مستغربه بعدين شبحت ليده وين مدها..
خدي غلاف شكلاطه تويكس يبان مدسوس..
هي وجهها ولا احمر..
قعد يشوفله لقي فيه من داخل كتيبه..
قراها..
كان مكتوب تاريخ معين فسنه 2011..
وتحته مكتوب اسمه بخط حلو هلبه..
شبحلها..
هي نزلت عيونها..
هانيبال؛خاطري تحكيلي بلسانك نبي نسمع منك...
هي رفعت عيونها فيه بعيون معبيات دموع قالت؛مش مهم خلاص..
هانيبال؛شن هو اللي مش مهم مشاعرك هدي جيهتي مش مهمه!!
مرام:لامش قصدي..قصدي انت قريت وعرفت..
قرب منها ويوزع فنظره ع ملامحها قال بصوت هادي؛لما تحكيلي نعرف اكثر..
شبحتله شويه بعدين ابتسمت وقالت:في حاجات ماتنحكاش صعب واجد تنحكى..
قعد يشبح لعيونها...بعدين قرب باسها بوسه لطيفه وبعد وقال:تمام....وقف ع حيله وهو يقول...ايييياااه عطلتيني ع الراجل..
ولف ومشي بسرعه..
شويه ولا بسرعه..
رد الغلاف لمكانه..بعدين ناض ولف ومشي طلع من الدار..
ومرام تضحك وبس..
ناضت وقفت بتطلع من الدار..
سمعت صوت تليفونها يرن بنغمة الماسنجر..
مشت بسرعه..
خداته من ع الطاوله وهي تشوف لعمار كان ناض لقاته مازال راقد..
شافت بعدين لتليفونها لقت الأتصال من دلال..
مكالمة فيديو..
ابتسمت وفتحت ووجهت الكاميرا لعمار..
"حلاني ياناس راقدين السمحين"..
مرام بضحكه:ليه نص ساعه لتو..
"نوم العوافي"..
مرام؛تسلمي..
دلال:شن حالك مرت خالك..
وجهت مرام التليفون ليها وقالت:الحمد لله شنو حالك انتي..
دلال؛الحمد لله..
مرام:شن جو اللمه امس.
دلال:الله يبارك جت حلوة حلوة..
مرام بإبتسامه:باهي باهي..تتربى فعزهم السمحه ويفرحوا بيها إن شاء الله..
دلال؛آمين ويفرحك بالصقر اللي عندك..
مرام بضحكه:آمين ويفرحك بصغويرتك..
دلال:آمين..تسلمي..وين القصير..
مرام :مالاش خمسة دقايق طالع من الحوش..
دلال :اها..
مرام:شنو حال اللي عندك كلهم..
دلال:الحمد لله كلهم كويسين..
مرام:حداك حد..
دلال :لالا بروحي..كلهم بعد تغدوا مشوا للحوش التاني يضموا فيه..
مرام؛مازال اسبوع..
دلال؛خافوا المطر تزيد تصب ومعاش يقدروا يمشوا غادي قالوا نضموه توا ونصكروه لسبوع العرس.
مرام بإبتسامه:كويس ربي يعاونكم..
دلال؛تسلمي..
🍁🍁🍁🍁
قالت بتولي فاسبوع العرس..
فاطمه:وزعم يجن عقاب بناتها..
زينب:ماظنيش يام..هي نجيه جت بش تقصقص..
ضحكوا خواتها..
حميده شبحتلهم بعدين قالت:احمم..امس سكينه بنت كريم قالت..ضرتي السابقه جابت بنت..
اتفاجئوا..
كفايه:لااالااا!!..
نعيمه؛سبحانك ياربي..
زينب:ان شاء الله مايجيب كان البنات ويجوه كلهم زي امهم..
غاليه:اسكتي يازينب..
فاطمه؛مالنا بيهم تو!؟معاد عندنا ليش نجيبوا سيرتهم..
اضايقت حميده من كلمه امها..
سكتت وقعدت تكمل في باقي شغلها..
خواتها شبحولها بعدين شبحوا لأمهم لقوها تشبح لسبحتها وتسبح..
شبحوا لبعض بضيق..
بعدين اللي هادي كملت شغلها..
ماعدا زينب اللي كانت مقعمزة ع كرسي وتتفرج عليهم ..
فوحده من الديار..
رانيا:حطي هادي غادي نور..
خدت نور الجرة من رانيا ورفعتها وحطتها فالروشن..
رفقه التفتت وشبحت لنور شويه بعدين قالت:لبسك الدبله مالك..
نور شبحت ليدها وقالت:ايه..عادي ع الخفيف شبه مادرنا شي اصلا..جت خالتي زياره تهدرز عادي قبل تروح طلعتها ولبستهالي..
رانيا:مابيتوا ديروا شي ع خاطر دلال؟..
نور:لالا..عاديه دلال..بس بابا هكي يبي..
رفقه :باهي وشن شعورك بعد لبستيها..
ضحكت نور وقالت؛مافيش احلا منه...
رانيا بضحكه:عقبالي..
نور بضحكه:ياارب..
رفقه ابتسمت بضيق وولت كملت شغلها..
فحوش ميلاد..
هي يابنات..
رزان وحدهم طلعوا من الدار وجوها..
حطت سعيده طرف رداها فوق راسها وطلعت..
وهما وراها.
حدهم:صقع اليوم..
سعيده؛ايه..
رزان ادور بعيونها فسيارة عماد مش موجوده بكل...
قالت فنفسها"شكله روح"..
🍃الولاد كلهم روحوا تاني يوم يشوفوا اشغالهم وعماد منهم اللي روح بالسيف بسبب خدمه ضروريه طلعتله فجأة...🍃
وصلوا سعيده والبنات للحوش القديم..
خشوا من فم البوابه..
طلقوا السلام ..
وسألوا عن احوال بعض..
وبعدين..سعيده بدت تعاون فبنات عمها..
ورزان وحدهم خشوا يعاونوا في البنات..
🍁🍁🍁🍁
اعزموها غدوة تتغدا هنى..
كامله رفعت حاجبها وقالت:شن هالغلا اللي طاح فمرت عمك وعويلتها..
مختار بضحكه:مش هكي ياجداي..بس الحق مش طايب عليا يكبروا عويل عمنا وهما مش واخدين علينا و ولايعرفونا..
امه قعدت تشبحله وهي ساكته..
سليمه:عنده حق يمي..لما نجوا هنى مفروض تجي دلال بالعويله تبات عندنا..
اصاله:اني جيت بنقولها لكن خفت دلال تزعل..
كامله سكتت شويه وهي تفكر..
مختار:جداي انتي بس تقدري تقنعيها..
شبحتله وقالت:باهي تو نقوللها..
ابتسم مختار..
شبحت كامله لبناتها وهنداوقالت:عدن اطلعن للناس..
اصاله:باهي..
ناضوا التلاته ومشوا طلعوا..
وهندا وهي طالعه شبحت لمختار بشك بعدين طلعت..
اما هو..
كب ع راس حناه ومشي طلع من باب الكوجينه..
تنهدت كامله...
وقعدت تفكر اكثر فكلام حفيدها وبناتها..
🍁🍁🍁🍁
الساعه 6:00مساءا..
بعد ماانهت المكالمه..
طلعت من الدار ومنها من الحوش مرة وحده..
توجهت بطريقها حدا الفرن..
وصلت غادي..
لقتهم كلهم مقعمزات غادي..
خالاتها ومرت خالها ميلاد..والبنات...
والصغيرونات حداهم يلعبوا..
والولاد يلعبوا بعيد شوي..
رانيا:ش حالك توا دلوله..
دلال ابتسمت وقالت:باهيه..
نعيمه:شني رقبتك؟..
دلال:كويسه..ترا ماما تعالي شويه..
كلهم قعدوا يشوفولها..
ناضت نعيمه وهي مستغربه..
ومشت لبنتها طول..
وصلت فيها وقفت وهي تقول:خيرك..
دلال:ماما توا كلمتني عمتي كامله..قالتلي تعالي انتي والصغار باتي عندنا..
نعيمه:اممم..توقعتها من تلميحات سليمه امس..
دلال ضيقت عيونها وقالت:تلميحات شنو؟..
نعيمه:يبوا صغار خوهم يكونوا حداهم لما يجوا هني وراهو عندهم حق..
تنهدت دلال بعدين قالت؛باهي كيف الراي توا..
التفتت نعيمه وقالت:من في قاعد من الولاد..
حميده:محمد في المربوعه..
التفتت نعيمه لبنتها وقالت:تعالي معاي..
مشت نعيمه ودلال لحقتها..
زينب:زعما خيرهم..
كفايه:دلال وجهها اشبح كيف..
غاليه بقلق:ان شاء الله خير..
نور خافت طول ناضت ومشت لحقتهم بش تفهم شن في..
🍁ولوا لهدرزتهم مرة تانيه..
شويه وجت نعيمه..
نعيمه :اسيا..معمر..جواد..تعالوا ..
غاليه؛نعيمه شن في..
نعيمه حطت يدها فنصها وهي تشوف للصغار وقالت:كامله كلمت دلال وقاتلها تجي اليوم بالصغار يباتوا غادي..
زينب:امممم..
كفايه:بيرفعهم محمد؟..
نعيمه هزت راسها بإيجاب بعدين قالت؛هيا حبيباتي..
مشوا الصغار مع حناهم..
والكل معاهم بعيونهم..
زينب:نعيمه مضايقه..
غاليه:خافت نحس فيها..
زينب:حتى اني فكرت هكي..
سعيده:قصدكم خايفه كامله تاخد دلال والصغار عندها!!
زينب:ايه فالنهايه صغارهم..
كفايه بضيق:إن شاء الله لا ياربي..
كلهم قالوا بأصوات متقطعه:إن شاء الله..
تنهدت حميده بضيق والتفتت للفرن بش تشوف الخبزة..
عيونها جو فعيون خليفه اللي كان واقف حدا مربوعتهم ويشوفلها..
شبحتله من فوق للوطا..
بعدين طبست ع الفرن...
قعدت تشوف في الخبزة وهي تقول فنفسها"ناقصاتك انت التاني"..
سمعت صوت سيارته وهي تمشي وهو يحرق فالعجل..
حميده بهمس:إن شاء الله تكلب..
🍁🍁🍁🍁
الساعه 6:30مساءا..
فحوش مختار...
مقعمزة بين متاعينها والاقارب..
فداخلها شعور بالغ القلق....
خايفه يجي نهار وتلقى روحها مجبرة تفارق اهلها وبلادها ع خاطر صغويرتها..
"شنو حال اللي جيتي من عندهم"..
شبحت لعزوزتها وهي مبتسمه بضيق:الحمد لله كويسين..
كامله شبحتلها شويه بعدين قالت:تعالي معاي..
ناضت كامله ودلال ناضت معاها وهي خايفه لدرجة ان بطنها انمغصت..
برا..
اسيا فحجر جدها..
وجواد ومعمر ع ايمينه ويساره..
اسيا تلعب بلحية جدها وهي اقول:خيرها بيضا؟..
ضحكوا الشيابين اللي حداه والشباب..
مختار الجدبضحكه:ماني شيباني كبير..
اسيا:خيره جدو عبسي ماعنداش؟..
ضحك مختار وقال:جدك عبالسلام مازال صغير مش كيفي اني..
اسيا بتفكير:اااه..
واحد من خوته :ربي يحفظها..
مختار:تسلم..
خاف عليها جدها من العين..
شبح لولاد عمها وقال:تعال ياعبدالرزاق دخلها داخل..
سبق مختار الحفيد وناض..
وعبدالرزاق يشبحله..
جي لآسيا ومد يده وقال:تعالي
اسيا شبحتله مدت يدها ومشوا طلعوا مع بعض..
وخوه عبدالرزاق وراه..
مختار نزل عيونه لآسيا وقال:عجبك حوشنا..
اسيا:حلو..
مختار:اممم..
حس بحد يمشي وراه تلفت شاف خوه..
قرن حواجبه بآستغراب بعدين شبح القدام وقال:اهو وصلنا ياسمحه..ترا نادي بصوت عالي..جداي..
آسيا ماصدقت..
نادت بأعلى صوتها لين فالأخير طلعت معاها تزريكه..
ضحكوا ولاد عمها..
شويه جو يجروا عماتها...
سليمه:خيرها..
مختار بضحكه:قتلها نادي جداك بصوت عالي تحمست..
ضحكوا عماتها وهي تحشمت..
جتها اصاله طبتها وقامتها وهي تقول:سلملي حبيبة عمتها..تبارك الرحمن ثقيله ..
سليمه:ماشاء الله..وخشوا الزوز..
تبدلت ملامح الإبتسامه ع وجه مختار للحده..التفت لخوه وقال:ليش لحقتنا..
عبدالرزاق:هكي..ولف بيمشي..
شده خوه من ذراعه وقال:معقوله ياعبدالرزاق هكي تفكرفخوك
شبحله عبدالرزاق بضيق
مختار: صدمتني اقسم بالله..والله قهرتني..عليك تفكير مسخ عندك..كان قلت بنعطي فيها كلمه معناها.....!غمض عيونه بشده وقال..رد بالك تكلمني من بعد اللحظه هدي
دفه من قدامه ومشي طلع برا..
عبدالرزاق اضايق من نفسه هلبه..
وسواس الشيطان ماجبلاش خير...حط فباله ان خوه ممكن يكون من الحيوانات البشريه اللي انتشرت فوقتنا الحالي..
لكن هدا خوه ومتربي معاه توأمه كيف فكر فيه هكي مش عارف..
ممكن حتى طلب مختار اللامنطقي..خلا عبدالرزاق يفهم غلط..
ومش اي غلط...
🍁🍁🍁🍁
برا.
فتح مختارسيارته..
فتح كيسه موجوده في الكرسي اللي جنبه..
كان فيها صندوق كبير..
فيه العاب لآسيا..
من ضمنهم...
استشوار صغير..
ومشط ومواد تجميليه للأطفال و توكات...واكسسورات..
لما كان في مصر..
خدالها هدا كله..
كلتله قلبه اسيا..
وخدتله عقله..
طفله صح..بس خطفت فؤاده بجمالها وحلاوة لسانها وتصرفاتها اللي كلها براءة..
وفنفس الوقت خاف عليها..
من اللي خاف عليها منه توأمه..
هو مايعرفش اهل امها كويس..وهي بنت وكل شي وارد في الوقت هدا..
لهدا اراد وبشده ان هي وامها وخوتها يعيشوا معاهم و يقعدوا تحت عيونهم ...
🍁🍁🍁🍁
الساعه 9:15 ليلا..
ملتمين كلهم فدار غاليه وحميده..
فنص الدار صفرة معبية نقرشات
مكسرات..شيبس وشكاليط..
وبكرج قهوة وحلويات..
كلهم يراجو فبرنامج مروان..
حتى من الحاجه فاطمه..
غاليه:نبدوا بالمقروض والكعك من نهار السبت ان شاء الله..
كفايه:ان شاء الله..
حميده:ونطلعوا ناخدوا الناقص..
غاليه:كويس..
زينب:الكسوة كلفت هلبه حسيتها..
فاطمه:صكر راسه قال لابد نديرلها كسوة ماتنقصها حاجه..قال هي بنتهم الوحيده تبوهم يقولوا خداها محمد ولد رمضان بلاقدر..
كفايه:ياووخييتي سلمه..
ضحكوا..
رباب:بنقوللكم حاجه لاحظتها..الكناين بدوا يسحبوا في ايديهم..
غاليه:لا حرام سعيده من بكري معانا ويخي نشدتنا شن نبوا..
رباب:مش عليها هي..ع التانيات..سميه..ولمياااء..
حميده؛هدي بالذات انظر شن وراها.
فاطمه:تشوف فسلفاتها كيف اللي هدي عندها ماشاغلها اللي حامل واللي كيف جايبه اكيد مابيديرن شي..وهي بتماريهن..
زينب:صدقت امي..
نعيمه:بالناقص منهم..نعرفوا نعولوا ع عراسنا برواحنا من قبل لنعرفوهم..
رانيا:اهو بدي بدي برنامج مروان..
كفايه:علي الصوت علي..
علت رانيا صوت تليفون خالتها كفايه وتكاته ع مزهريه فوق التلفزيون.
🌟🌟🌟🌟
مروان..
مسائكم عسل فعسل احلى ناس احلى مستمعين كبيداتي جميعا..
كبدت فيكم كلكم وتوحشتكم كلكم برشة برشااااات..
علي صوت اغنية..
واحشني كلاموا ياهوا سهران مابنام...
كفايه بضحكه فرح؛الله وحد على وليدي..
ضحكوا اللي فالدار كلهم..
🍁🍁🍁🍁
فحوش ميلاد..
دار رزان تحديدا...
رزان بضحكه:فضيع فضيع..
حدهم بضحكه:تعرفي البنات قريب يهبلوا عليه اغلب التعليقات فصفحة البرنامج غزل فمروان..
نور بضحكه مغرورة:حتى هواااا صلفيييي..
رزان وحدهم:هههههههههه..
اما رفقه اللي كانت معاهم ساكته وتسمع وقلبها معصور عصر..
🌟🌟🌟🌟
مروان..
موضوع حلقتنا الليله..
" العيله.."
ضحك وقال..توا وصلني مسج من خالتي اللي نموت فيها..قالت كلنا نسمعوا فبرنامجك الليله...ههههه..حبي انتي......شني يااكرم.....ايييه والله حق...خالاتي....كلكم نموت فيكم وكلكم حبهاتي...شن رايك فيها هادي ياكرومه....ههههههههه
كل اللي فالدار يسمعوا ويضحكوا
زينب:الحب كله لغاليه ناري علينا
كفايه:ولادي وبنتي يحبوها اكثر مني
نعيمه:من سمعك
ناضوا رباب ورانيا..
مشوا لغاليه وقعمزوا حواليها وحضنوها الزوز وهما يضحكوا..
وقلدوهم نورهان وحنين.
وغاليه ترقص فحواجبها
ضحكوا خواتها
حميده وفاطمه كانوا يشوفوا لغاليه
حميده حست بقلبها واجعها ع اختها ع الأقل هي طلعت من هالدنيا ببنت لكن غاليه مسكينه شنو..
اما فاطمه فكانت تتمنى وتدعي من وسط عروقها ان ربي يخلي محبتها تكبر فقلوب صغار خوتها وخواتها..مادام مالهاش نصيب تجيب ضنوه من دمها
هما يكونوا ضنوتها..
ويابخت غاليه عندها جيش...❤
🍁🍁🍁🍁
الساعه 10:00ليلا..
فالصاله بعد خشوا باقي اقاربهم للديار بش يرقدوا..
قعمزوا عيله مع بعض..
عيون دلال كانوا مركزين ع شي واحد بس..
ع بنتها اللي مقعمزة فحجر ولد عمها وهو يحكيلها..
اسيا بضحكه فرح:طلعتهم كلهم؟
مختار:ايه كلهم..وخدت رشاد واجد حطاته فبطنه وخيطتها بعدين خدت صغارها الارانب وروحت بيهم للحوش
اسيا:تمت..
مختار:ايه تمت..ترا قوليلي شن تعلمتي منها..
اسيا:بنقول لماما تعلمني كيف نئتبخ فالساعه..
مختار:ههههههههههههه..
وجداه وعماته وامه يضحكوا..
من بعيد شوي..
ايمن بهمس:تو هدى هو نفسه مختار خوك اللي ديما خلوقه فخشمه ومايحب الصغار ومايحب كان راحة باله!!!؟
عبدالرزاق:هو توامي 24ساعه مع بعضنا توامعاش عرفته..
من جهة تانيه..
كامله شبحت لدلال وقالت :مازلتي خايفه..
دلال شبحتلها وابتسمت وهي تقول:تس..انتي طمنتيني هلبه..
شدت يدها كامله وهي مبتسمه ودلال كذلك..
وهندا مرة مرة تشوفلهم..وترجع تشوف لولدها..
هندا"بيعاود ولدي سيناريو عمه..عليك حاله دلال بتاخد مني حتى ولادي!!"..
فتحت عيونها ع وسعهم لما سمعت اسيا تقول..
اسيا:ماما ..شبحت لمختار وهي مضيقه عيونها قالت..شن اسمك؟..
مختار بإبتسامه:موخا..
التفتت اسيا لامها وقالت:موخا جابلي هديات ماما ناخدهم..
سليمه بضحكه:سلم لسانها ياربي..
امينه:الله اكبر ماشاء الله..
ابتسمت دلال وقالت:خوديهم..
مختار :ترا انزلي شوي ياسمحه..
نزل اسيا من حجره..
وهو ناض ومشي
اسيا قعدت تشبحله لين طلع..
بعدين مشت لأمها وقالت:حلو موخا مش شرير.
ضحكوا..
هندا:من قالك موخا شرير؟..
دلال رفعت حاجبها..
اسيا:هو كشخ ع ماما مرة..
فنصت دلال..
كامله:شن دار!!؟؟؟؟...
ايمن وعبدالرزاق شبحوا لبعض..
امينه:كيف كشخ عليك يادلال؟
دلال بربكه:لالا ماكشخش اسو فاهمه غلط..هو كان يتكلم عادي واسلوبه شوي زي اللي ينت نتان هي تحسابه يكشخ..
هندا شبحت لولادها..
الزوز شبحولها بضيق..
رجعت نظرها لعزوزتها لقت ملامح الغضب مسيطرة ع وجهها..
شويه خش مختار بالصندوق..
ناضت امه وهي معصبه فاتت من حداه وقالت:حطه وتعال..
استغرب..
قدم حط الصندوق قدام مرت عمه وهو يشوف لآسيا وقال؛افتحيه ياسمحه شويه وجاي..
وقف ع حيله ولف ومشي لاحق امه..
اسيا شبحت لأمها:ماما..نفتحه..
قدمت سليمه وهي تزحف ع ركابها قالت:مال شنو يا عسوله لمن جايبه هو..هي نفتحوه..
فتحت سليمه الصندوق..
وجوهم باقي عماتها شافوا شن في وقعدوا يطلعوا بالحاجه وهما يتصنعوا فالذهول والإندهاش توافقا مع ردات فعل اسيا..
ودلال وكامله يشوفولهم والإبتسامه مرسومه ع وجوههم..
في الممر..
شن دخلك بيهم انت شن دخلك؟..
مختار :كيف يمي شن دخلي راهم عويل عمي..
هندا:شن تشوف فيهم قاعدين فالشارع!!؟..
مختار:لامش قاعدين فالشارع لكن بعاد علينا يمي..نحنا..هلهم..
هندا تأففت بتذمر بعدين قالت:مختار اسمعني..جدك وجداك مايرضوا فعويل عمك الله يرحمه ولامرته حاجه..مادير شي يخليهم ياخدوا موقف منك..
ابتسم وقدملها وباس راسها بعدين قال:تريحي يمي..ماتصيرش مشاكل ان شاء الله..
هندا قعدت تشوفله بإمتعاض..
وهو ضحك بعدين مشي للصاله..
وهي مشت للدار اللي تبات فيها...
🍁🍁🍁🍁
🌟وع 9099 نستقبلوا رسايلكم ياسهارى معاياا اني مروااان الحداد..
امم..
هادي رساله من عود القماري...تقول فيها..
العيله احلى نعمه من ربي البني آدم من غير عيلته مايسوى شي..
والله فعلا مايسوى حاجه..
تنهد بعدين قال..
رساله تانيه..من صريع هواها..ياسااتر..هههه..
اممممممم...اووو..حلو...صريع هواها قال..
مرات العيله تختصر في بنادم واحد بس تشوف الدنيا كلها فعيونه من دونه انت ولاحاجه..
عقب مروان يقول..اممم..ممكن صح..المهم ياكرومه صريع هواها طالب اغنية رامي عياش..
خليني معاك..
علي صوت الأغنيه..
خليني معاك اوعى تسيبني حبيبي اني نفسي ارتاح..
في دار رزان البنات يسمعوا في الأغنيه عادي..
ماعدا رزان..
كانت تسمع فيها وقلبها يدق بقوة شديده..💓
مش عارفه علاش حاسه انها منه..
او ممكن الوهم خلاها تحس هكي..
💓لكن ماكانش وهم..
فعلا هو..صريع هواها..
يسوق فالسيارة ويسمع في الأغنيه وهو مبتسم بعشق..
ويذكر في اللي صار ليلة امس..
وقلبه يرفرف بشعور العشق اللي غامره..
🍃ااه وخلاص..قلب العاشق يفرح حتى بنظرة حنينه عابرة💓🍃...
بعد نص ساعه..
🌟🌟🌟🌟🌟
مروان..
نستقبلوا اخر رساله معانا الليله..
هههههه...من واحد ماذكرش اسمه.....مصدق روحك انك مذيع..هههههه....لاوالله لاتوا مش مصدق الحق..هههههمش..ههههه والله يااكرم لتوا....هههههههههههه
كفايه:من هو قليل الفهم هدا..ولدي مذيع واحسن من مصطفى الآغا يخي..
كلهم:هههههههههههههههههه..
كفايه كلت لوزة وقعدت تمضع وهي قارنه حواجبها وملامح الضحكه ع وجهها..
🌟سموا اسم الفايز فحلقة الليله..
واتصلوا بيه وهنوه...
ووصل للختام..
مروان..
زي ماتعودت ننسجم معاكم ونعيش معاكم احلى خميسيه..
واكثر شي مخليني متحمس اليوم هو ان عيلتي ملتمين يسمعوا فيا الليله..
وع راسهم نوارتنا حناي الغاليه..
كلهم وهما يسمعوا فيه:اوووووووووووه..
زينب بضحكه:اضربي يمي هي..
وفاطمه تضحك وهي متحشمه..
مروان..
طبعا حناي هادي لو قلت اسمها ع الملأ هكي ممكن تشنقني ولا معاش دخلني الحوش..هدا علاش بنقوللها حناي FM هادي الغنايه اهداء من ولد بنتك ليك..
رباب بضحكه:FM..
كلهم كانوا يضحكوا..
وفاطمه تضحك بإستغراب وهي مش فاهمه قالت:شن معناه اللي قاله..
كفايه بضحكه:اختصار لإسمك يمي بالإنجليزي..
فاطمه:كرررب..
كلهم:ههههههههه..
علي صوت اغنية..
اميمة ياودادة...
بعد مقطع منها..
مروان قال...
حسيت روحي هداكا الراجل......ال...هداكا..حبيب العزايز..
هههههههههه..ايه ايه..بما ان غدوة جمعه كلمه للكناين كل وحده غدوة تنزل لحوش عزوزتها وادير الغدي بازين ايواااه.
كلهم:هههههههههههههههه..
🍁🍁🍁🍁🍁
صكرت رزان راديو تليفونها وقالت:تهبل حلقة اليوم..
حدهم بضحكه:ايه..
شبحت رزان لرفقه لقتها عاطيه بالظهر وراقده..
ابتسمت
ماكانتش راقده كانت تبكي بصمت..
كانت ع وشك التعود ع عدم وجوده فحياتها..لكن هو توا زاد تغلغل فيها اكثر واكثر..
وزاد حبه فقلبها اكثر واكثر...
🍁🍁🍁🍁
تاني يوم الجمعه...
حط شوال اللوز ع الزليز..
وهي واقفه وحاطه ايدها ورا ظهرها وتقول متسائله:هدى شنو..
عماد بضحكه:لوز ياحناي لوز..
قدمت فاطمه للشوال فتحاته ولقاته معبي لوز..
ضحكت وقالت:سلمك جياب..
ابتسم وقال؛سلمك طومتي...شبح للحوش وقال..
الباين مافي حد نايض..
فاطمه:خامرات قاعدات..
ضحك..بعدين قال:ماعليكش فيهن..
قام سوريته العربيه بيد وحده..
ركب ع الركابه..
حول بلغته..
بربش تليفونه وهو يضحك..
بعدين خش داخل..
فتح اغنيه قديمه ومشهوره..
وعماد معروف بحبه للقديم..
والاغنيه هادي بالذات ليها ذكريات معانا كلنا..
علا الصوت وقعد يغني معاها بصوت عالي والبحه غالبه قريب ع صوت المغني صاحب الأغنيه..
طل الصباح ولك علوش...
سبقونا هالحصادي..
في الدار..
ناضت زينب مخلوعه:هدا شنو..
غاليه جت مقعمزة وهي تفنص..
"نووووضواااا...ياخامرااات..ع قولت..FM..اااي حناي خيرك"..
كفايه بنعس :ووواك ولادي طالعين مناجيه لمني مش عارفه..
خواتها الأربعه قالوا بصوت واحد:مش عارفه صار!!
قعدت تحك فعيونها وهي تضحك..
🍁🍁🍁🍁
بعد ما سمعوا اغنية الصباح من العمده..
ناضوا كلهم..
بعد صحصحوا وفطروا بدوا بضمان الحوش..
وبدوا بالديار الأولات...
في وحده من الديار..
حميده ونعيمه يضموا فيها..
كانت نعيمه تحول في الخلالات من الستار وهي شبه سرحانه..
حميده:نعيمه..نعيمه..
شبحتلها نعيمه وقالت:هاه..
حميده:فشن سارحه..
نعيمه تنهدت وقالت:زعما دلال والصغار يروحوا اليوم..
حميده:مش هي قالتلك هكي..
نعيمه بقلق:خايفه تشدها كامله..
حميده:ناسيه ان ولدهم وصاهم مرته وصغاره يقعدوا عندكم..
شبحتلها نعيمه شويه بعدين قالت:تو ياحميده..البنت لامتى بتقعد هكي..
قرنت حميده حواجبها بإستغراب..
نعيمه:دلال مازال صغيره ياحميده والصراحه..بدوا يخطبوا فيها من بوها..
رفعت حميده بحواجبها..
نعيمه:راجل عنده مركز فالبلاد ياحميده راها مرة وحده ومن نهارتها والراجل فجرة بوها يكلم فيه عليها..قال صغارها صغاري..
حميده:عزابي؟..
نعيمه:لا كان متزوج اجنبيه ماتوفقش معاها طلقها ليه بالك 5سنين لتوا..
حميده:عنده منها صغار..
نعيمه:لا..ماطولوش فزواجهم..
سكتت حميده وهي تفكر..
نعيمه:يعني لو جي يوم ودلال التفتت لروحها ووافقت تتزوج..اكيد حياخدوا منها الصغار..
"مستحيل ماما"..
شبحوا حميده ونعيمه لنور وهي خاشة للدار تقول:ماما دلال بعد عمار مستحيل تتزوج..
نعيمه:شن بتترهبن!!؟
نور:ماما معقوله لهالدرجه مش مركزة ع بنتك..لتوا رابط عليه وماتشوف فراجل غيره..والاهم من هدا كله صغارها..لايمكن دلال تربيهم مع راجل غريب مستحيل..وبابا بروحه قال..خلوا المراة تربي صغارها..
نعيمه بتهكم :بندومولها اني وياه ماهو ...
حميده:نعيمه خلي بنتك ع راحتها ماتضغطيش عليها..
نعيمه تنهدت بضيق وشبحت للروشن وملامح الإستياء ع وجهها..
ونور حركت راسها ايمين ويسار ولفت طلعت وهي مضايقه من امها..
🍁🍁🍁🍁
الساعه 5:00عصرا..
كلهم مقعمزات فالصاله..
فاطمه ادير فالشاهي..
والبنات حداها يهدرزوا..
ومازال اختفاء لمياء وسميه من اجتماعات العيله مستمر..
حتى رجالتهم مش باينين..
الزوز قصدوا يختفوا..
الهادي مش قادر يساعد بشي فعرس محمد لهدا متجنب يجيهم من حشمته..
اما عمر..
فكانت لمياء فالفترة خاشه فحالة نفسيه من تفكيرها فالصغار..
كذا مرة يروح للحوش يلقاها تبكي فحاله..وماشاده غير كلمتين..
"انت بتخليني..تو تاخد عليا"..
وعمر موجوع عليها و ع روحه ومش عارف شن يدير معاها..
🍁المهم..
نقولوا خير هكي يحتاجوا مرات يقعدوا برواحهم بش ياخدوا راحتهم..
زينب:زعما نساوين حميد امتى يجو تاني..
حميده:كان ماجنش نهار الكسوة صحه..
كفايه:بالناقص ع قولت نعيمه..
فاطمه:خلاص انهن كلام فالسيره هدي..علت صوتها وهي تقول...وين لوز يامحااامد..
من برا..
"هي شوي بس نكمل اللي فيدي ونبدا فيه يمي"..
تنهدت فاطمه وبعدين قعدت تشبح للعاله..
وبناتها يشوفولها..
شويه..
وخشوا سعيده ومعاها رزان وحدهم ورفقه..
كلهم قالوا:السلام عليكم..
ردوا عليهم السلام..
ومشوا قعمزوا...
🍁🍁🍁
في الطريق..
ربي يطول فعمرك ياعمي..
مختار بإبتسامه:ماخممي فشي بنتي ولاتخافي من شي وصية ولدي معاد في بعدها كلام..
ابتسمت دلال براحه براحه..
وصلوا للقطعه...
درس مختار..
فتحوا البيبان ونزلوا...
الولاد مشوا طول يجروا لخالهم اللي كان يلعب ب"البلابل" مع قصي وفؤاد و رمضان..
في الوقت اللي كان فيه مؤنس طالع مع باب العمارة مع ميلاد وحسن وخليفه..
مشوا طول لمختار يرحبوا بيه..
اما دلال ..
فكانت قايمه بوكس اسيا وهي تمشي..
واسيا معاها..
بطريقهم لفم البوابه..
داخل..
محمد خشلهم وقال:خالي مختار جي..
فاطمه:تي كسر اللوز فيسع يافرخ..
محمد وهو يشبحلها بنص عين :باهي يمي باهي..شبح لرزان وقال..صبي جيبلي القادومه..
رزان:وينها..
غاليه:ع الرخامه..
ع خشة دلال من باب المروحه ووراها اسيا..
ابتسمت نعيمه بفرح لماشافتها..
اما اسيا مشت جري لجداها..
دلال وهي داهشه:شن..حالكم..
كلهم ردوا بأصوات متقطعه:الحمد لله...
غاليه بضحكه:شن اللي طابتيه هدى..
اسيا:هدياتي..
ضحكوا عليها..
ورزان وهي ماشيه للكوجينه كانت تضحك..
حناها شبحتلها وقالت :خفي روحك..
رزان:باهي هاني ماشيه..
فاتت من باب المروحه..
وكملت للسقيفه ووصلت في الباب..
وتخش للكوجينه ..
وتوقف جامده فمكانها..
لما شافاته مقعمز في الكوجينه ويكسر فشوية لويزات خداهم لروحه..
هو حس بحد خش..
قام عيونه فيها وقعد يشبحلها بهيام 💓..
وكانت هادي المرة التانيه من سنه فاتت يتلاقوا فيها وجها لوجه برواحهم..
بس اللي صارلهم الزوز هالمرة كان عكس هديكا المرة...
القلوب هبلت..
والعيون قاعده تفضح...
هو كان فيده لوزة....بلع اللوزة من غير مايمضغها...قعد يشوفلها وهي تشوفله..
استاقضت لروحها..
تشجعت وخشت..
وهي منزله عيونها عنه قالت:القادومه..
عماد:.......💓💓💓💓💓
رزان بحده:القادومه..لو سمحت..
مدهالها وهو تقول منوم مغناطيسيا💞
وهي خدتها..وطول لفت وطلعت تجري...
هو ناض بسرعه..
التفت للطرمس..
خدي طاسه صب فيها ميه..
وشربها فمرة وحده بش تعدي اللوزة اللي بلعها وقريب خنقاته وخلاته فعلا...صريع هواها💓
🍁🍁🍁🍁
طلعت اسيا برا وهي ادور فحنين بش بتعطيها توكه من التوكات اللي جابهولها ولد عمها..
لقتها مقعمزة تشبح للولاد كيف يلعبوا..
مشتلها وقالت:حنين..
شبحتلها وقالت :هاه...
اسيا مدت التوكه وقالت:هاكي هديه مني..
ابتسمت حنين وخدتها واسيا ابتسمتلها..
بعدين شبحوا الزوز لولاد لقوهم يتعاركوا...
قصي وفؤاد..
فؤاد:انت غشاش..
قصي:عينك...انت اللي احول حتى يالنظارات ماتشوف كويس..
فؤاد الكلمه وجعاته هلبه..تعود يسمعها فالمدرسه..
لكن ماسمعهاش قبل من عيلته..
جواد:عيب ياقصي..
قصي:هو قالي غشاش..
رمضان:انت غشاش..
قصي:شن حتى انت كيف خوك احول..
حول فؤاد النظارة وبغل لوحها وقال:هاااه..هااه..نشوف احسن منك..
قصي:عدي يااحول..
فؤاد معاش تحمل ضرب قصي بوني وقصي رده..
اسيا:حيييي..
حنين تشبح للنظارة خافت يكسروها..
مشت تجري وخدتها من حداهم..
ع طلعت الهادي من الحوش شافهم وقال:هييي انت وياااه..
بعدوا الصغار عن بعض وقعدوا يشوفوله..
الهادي جاهم وهو يقول؛شنو في!!
رمضان:قصي قال لفؤاد يااحول..
الهادي بتفنيصه:قصييي..
قصي بخوف :انبصر معاه..
الهادي:تبصر عينك..تو يروح توفيق ونقوله..
قصي بدي يدمع من الخوف..
والولاد يشبحوله..
الهادي لفؤاد:وين نظاراتك..
حنين مدتها وقالت:اهيا خالو..
شبحلها الهادي بحده..
قدملها..وجبدهم من يدها وقال بغل:تمسيهم مرة تانيه نقص صوابعك..
هي خافت منه هلبه..
مشت تجري ركبت الدرجات وهربت للحوش وهي تبكي..
واسيا لحقتها..
وجواد وفؤاد يشوفلها بحزن..
الهادي مد النظارة لولده:عدوا خشوا لأمكم تحركوا..
خدي فؤاد النظاره..
لبسها ومشوا للحوش هو وخوه..
وبوهم مشي للمربوعه..
مجد:كله منك ياقصي..
قصي ببكي؛حي عليا من توفيق..
معمر:تستاهل..
جواد:معمر!..
سكت معمر وهو قارن حواجبه بغضب..
داخل..
حميده جو عيونها ع بنتها وهي خاشه تبكي بخلعه قالت:خيرك!!..
البنت خشت فحضن امها وهي تبكي بالعبرة..
الموجودين كلهم خافوا..
جتها غاليه وقالت:خيرك حنوا..
بعدت حنين عن امها وقالت..
"علاش خالو الهاتي مايحبنيش؟"..
فنفس اللحظه..
طاحت دمعه من عيون غاليه وحميده وهما يشوفوا لحنين..
والباقي تأثروا ع الآخر..
اسيا:كشخ عليها وهي مادارت شي..
حميده ناضت وهي قايمه بنتها فغمرها..
خشت بيها للدار وصكرت الباب عليهم..
زينب:كثرها وخثرها راهو..
نعيمه:عمري ماتوقعت يولي الهادي حقود لهالدرجه..
رانيا :قلبه اسود..
تنهدت سعيده بضيق..
ورزان ورفقه وحدهم كانوا يدمعوا من كتر ماتأثروا..
ودلال حضنت بنتها بقوة..
ونور قعدت تشوف لنورهان كيف تبكي من كثر ماتأثرت..
وروان تشوفلها بحزن..
هدا كله كانت تشوف فيه الحاجه فاطمه لما وزعت نظرها عليهم وهي مضايقه ع الآخر...
🍁🍁🍁🍁
تحط فبتاتها فالشنطه وهي تغني..
صغير امه وخديته اني..
ان شاء الله طول العمر زهي..
انفتح باب الدار بقوة..
التفتت وهي مفنصه من الخلعه..
لقت امها واقفه وحاطه يدها فنصها وهي تهز مع بعضها من العصبيه..
بلقيس:مداهمه هدي!!..
نجاه:حقة ماتبيش تصبغي وتميشي!!
بلقيس:من قالك..
نجاة:المزينه لما كلمتها تو..
بلقيس:ايه..
نجاه:حييي عليك ياحماره قصدك بتعدي هكي!!..
بلقيس:ايه مافيش احلى من الطبيعه..
نجاه:مافيش احلى من امك!!
بلقيس بضحكه:العبد الواثق!!
ضربتها ع ذراعها بقوة..
بلقيس وهي تتحسس فيدها :احح..شن تبي اديريلي اعاقه واني عروس!! حي عليك يمي كان مازلتي عاودتيها مانضمنلكش محمد شن يدير راهو..
نجاة :اسمعيني يافرخه جاي بتعدي تصبغي وتميشي غصب عنك..
بلقيس:لالالا..هداكا يمي قبل نسمع كلامك لكن توا لاكلمه تعلو ع كلمه بعلي..
نجاه بغيظ:انتي تبيني نشحك من شعرك ونجيبه فإيدي وتقعدي صلعا مرة وحده ووريني وجهك كان بعلك هدى مازال خلاك ع ذمته..
ولفت ومشت طلعت وهي معصبه..
ضحكت بلقيس..
بعدين قعدت تغني وترقص..
يامحمد ياحمااادي..
نحنا لبعضنا من غادي..
فجاة رن تليفونها كانت دايرتله نغمه خاصه..
اغنيه يارا"توصى في"..
مشت تجري خداته وفتحت الخط وردت وهي تغني؛حيي حي حييي حي نجيلي حمودي اني..
محمد:اسكتي ياعن شكلك..
بلقيس بضحكه:خيرك اتصلت..
محمد؛نبي نشوف باك ناقصاتك حاجه..
بلقيس:هدي سابع مرة تكلمني فيها و وتسألني هالسؤال..قول الحق قول..تتسبل ولا..
محمد شد ضحكته وقال:وحده متلفه ظالم اللي يكلمك..
بلقيس بغرور مصطنع:قلتها قبل ساعتين ووليت كلمتني..
محمد:الحق مش فيك في الثور اللي يعبر عنز كيفك..
بلقيس بضحكه:عبرها وحبها وخطبها وقري فاتحتها وتوا بيدير عرسه هو وياها..وهههههااااه..ضحكة نصر هدي ع فكرة..
محمد غلباته الضحكه وهويقول:اقسم بالله متلفه..
وصكر عليها وهو يضحك..
رن تليفونه كان عماد يتصل..
فتح الخط ورد وهو يقول :هاني نازل..
🍁🍁🍁🍁
الساعه 8:00مساءا..
بعد سقدت خوها مع ولادها..
تفرقوا..
الكبير مشي لحوشه..
والتاني مشي هو وياها بطريقه لحوشه..
لما وصلوا فم حوشه..
فاطمه:هادي..
شبحلها وهو مضيق عيونه..
شبحتله بنظرة حاده وقالت بحزم ولهجه فيها وعيد:مازال تكشخ ع بنت حميده ولاتوجعها بكلمه ماتلوم الا روحك..
هو رفع حواجبه متفاجئ..
اول مرة يشوف امه هكي..
قالت كلامها بقوة ولفت ومشت بغضب..
قعد معاها بعيونه لين اختفت من قدامه.
ملامح المفاجأة شيئا فشيئا تبدلت للكره..
زاد حقده ع حميده وبنتها اكثر واكثر...
لف ومشي بعصبيه لحوشه..
فتح الباب وخش وصكره بقوة...
🍁🍁🍁🍁
تاني يوم..
الساعه 12:00قبل الظهر..
فالصاله..
اول من قعمز ع طاولة المقروض وبدي يدير فيه كان هي..
فاتت من حداها عمتها وقالت: قوليلهم مانيش معطله ساعه زمان ونروح...
رزان:باهي..
مشت غاليه بإستعجال..
لبست كندرتها وطلعت تجري من فم البوابه..
انخلعت من فلاش الكاميرا..
ضحك عماد بعد صورها..
غاليه ضحكت ومشت تجري لسيارة محمد..
اما هو كمل طريقه القدام وهو يضحك...
لما فات من حدا البوابه شبح داخل..
وقف فمكانه...
شافها مقعمزة ادير في المقروض..
خاف تشوفه..
مشي ادرق حدا الحيط..
بين نص وجهه وهو يشوفلها..
كانت لامه شعرها ورافعاته ذيل حصان..
وخصلات منه نازلات ع وجهها..
كانت تنقش في مقروضه وهي منسجمه..
منظرها وهي لاهيه بحاجه ادير فيها كان يهبل يهبل💓💓
قبله ذاب وهو يتأمل فيها..
كان منظرها مغري هلبه انه يصوره..
هي كانت تشوف للنقشه وتقول:زعم تعرف تنقشها النقشه هدي عمتي نعيمه..
فتحت عيونها ع وسعهم..
لما لمحت ضي اشبه بالبرق..
قامت عيونها وشبحت لفم الحوش..السمي صافيه مافيش سحاب..
ضيقت عيونها بإستغراب..
بعدين..
التفتت جهة فم البوابه..
قعدت تشوفله شويه..
وقلبها يدق بقوة💓..
لحظات وغيرت عيونها عنه..بلعت ريقها..
وخرت خصلت شعرها برسغ يدها..
وكملت شغلها..
ع خشة نعيمه من فم الحوش االقدامي قالت:ها بديتي..
رزان:توا توا..
نعيمه:خل نغسل ايديا ونجيك..قداش يبي معاناه الحوش القديم..
رزان:ليه مده ماقلبوه..
نعيمه:من عرس عمر..
رزان؛ايه..
مشت نعيمه للكوجينه..
ورزان كملت تنقيش..
🍁🍁🍁🍁
في المستشفى..
"غاليه"..
التفتت غاليه وقالت:هلا فضيله..
فضيله :اهلين..غاليه كان ماجيتي راهو كلمتك تجي..
غاليه بإستغراب:ليش..
فضيله تنهدت وقالت:في واحد جي من ساعه سأل عنك وقال ضروري نشوفها..
غاليه:مني!؟؟..
فضيله التفتت وقالت:هوينا غادي..
شبحت غاليه وين ماتشبح فضيله..
وملامح الصدمه ارتسمت ع وجهها..
🍃طبعا نجمي..
بس علاش جاي...شن يبي...ماصدقت تنسى..ماصدقت جاها فرح تلهى بيه..ليش مصر تكون انت المنغص دائما..ليش..
اخ منك يانجمي..اخ🍃
...يتبع..
