#العشق_المتمرد "اختبار"
الجزء 107 القسم الأول..
#جمان_فريد
🌟..
طلعت تجري ببنتها متوجهه لحوش ضرتها..
وصلت في الباب وقعدت تقربع عليه بإيديها ورجليها وهي ترعش مع بعضها..
فتحت ضرتها الباب وهي مخلوعه قالت بتفنيصه لما شافتها:خير دعوتك!!!
حميده وهي ترعش:العزوز..العزوز ..العزوز..
حليمه :خير دعوتها المصيبه هدي ؟!
حميده وهي تتنفس بسرعه:شكلها..ماتت..
فنصت حليمه...
بعدين بعدت حميده من قدامها ومشت..
وحميده مشت وراها..وحنين تشوف فهدا كله وهي بتموت من الخوف وامها مش مركزة عليها..
وصلوا فالحوش..
خشت حليمه وهي تقول:وينها هي؟!
حميده بلعت ريقها وقالت:في..دار الدروج..
مشت حليمه طول لدار الدروج وحميده وراها..
لما قربوا يوصلولها..
حليمه بقرف:افففييي هدى شنو!!؟
وحميده وبنتها غامين خشومهم..
وصلت حليمه..
وجهها تعكرش من الإشمئزاز وهي تقول:هدي شكلها فاطسه ليها وقت..
شبحت حميده لحليمه برفعة حواجب..
وحنين دافنه وجهها في رقبة امها من الخوف..
حميده استاقضت لبنتها..
مشت طول طلعت بيها..
وطلعت وراها حليمه وهي اطلع فتليفونها من جيبها وتقول:عزوز الشياطين هدي موتتها جتها ع القياس..
حميده تفنص بصدمه وخلاص..
ضربت حليمه ع رقم وحطت التليفون ع وذنها وهي تقول:ردي ردي بنبشرك بفكتك منها..
انفتح الخط..
حليمه:هاه عفاف صباح الخير...الحمد لله..اسمعي بنقولك امك ماتت..
حميده تشوفلها وخلاص..
حليمه بإزدراء:تبن تعرفن تعالن ..وصكرت عليها وهي تقول..يلوحنها ولايسألن عنها ولايدورنها وين تموت يتفكرنها ويعيطن يمي يمي..
ضربت ع رقم تاني..
طول انفتح الخط:هاه صديق...صباح النور......لالا غير اسمع جاي امك ماتت راهو..
حميده ضيقت عيونها وهي تشوف لحليمه بإستنكار..
حليمه:باهي رد بالك من الطريق..وصكرت عليه..
بعدين شبحت القدام وهي رافعه حاجبها وتفكر...شورها ليها وقت ميته..شكلها زلقت من الدروج وجت متكرفخه ع قلوعتها..
شبحت لحميده وقالت:امتى اخر مرة جيتي عندها؟!
حميده بخوف:من قبل الصديق يعدي لزليطن بنهار..
حليمه:امم...واني ريتها اليوم نفسه فوق السطوح تبيت عليا..دعيت عليها وقتها قلت جعنها ماتلحق تنزل..
حميده انتابها شعور شديد بالخوف من حليمه..اساسا ملامح وجه حليمه مش مريحه نهائي..
شبحتلها حليمه وقالت:ردي بالك...وضحكت..
ومشت طلعت من حداها..
وحميده معاها بعيونها بعدين طول لحقتها مابتش تقعد بروحها...
🍁🍁🍁🍁
فحدود ساعه وصلوا ولادها وبناتها والصديق منهم..
وانقام العزي..
وجت الإسعاف رفعت جثة سالمه للمستشفى..
وبعض فحص مطول حددوا وقت الوفاه والسبب...
اللي اصبحوا معروفين...
وبهكي انتهي اختبار سالمه..وانسحبت ورقتها وبرغم كل الفرص الممنوحه...للأسف رسبت بقوة...وطلعت من الدنيا وهي حامله اوزار ثقيله..
وحده الله هو اللي يحدد مصيرها..حتى وان كان بديهيا واضح...
🍃كله واضح كله..سبحانه مش مخلي شي الا وراهولنا وفي كل وقت يعطينا فرص لاحصر لها في منا يختار يشوفها وفي اللي لا...حني لينا حرية الإختيار...وكل حد يتحمل مسؤولية إختياره🍃
🍁🍁🍁
طرابلس
في الطريق
"عمر"
عمر وهو يسوق:امم
لمياء:عمورة مانبي حد يعرف بحكاية الحمل باهي
ضيق عيونه وقال:ليش؟
لمياء:خايفه يصيرله زي الأول
عمر برفعة حاجب:كيف يعني..قصدك هلي عينوك ؟!
لمياء ابتسمت بربكه وقالت:اكيد مش هدا قصدي..بس يعني حتى الرسول قال استعينوا ع قضاء حوائجكم بالكتمان
عمر :تحسيها بايخه يالميا كان عرفوا بعدين
لمياء:بعدين يعرفوا ويعذرونا صدقني..
تنهد عمر بعدين قال؛باهي كيف ماتبي..
ابتسمت وقالت؛نجيلي عمورتي ياربي..
ضحك عمر وشد يدها..
وهي حطت يدها ع يده وهي مبتسمه..
شويه وخش عمر لزنقه ترفع لحوش اخته نعيمه..
اللي دايرة غدي ع سلامة بنتها..
حوشها معبي..
اهلها واهل راجلها..
من البلاد جت امها وغاليه وسميه جابهم الهادي..
وجي توفيق جاب امه واخته
وخواتها وحميد وغزلان.
واهل راجلها..
عزوزتها وحمواتها وسلفاتها..
🍁🍁🍁🍁
بقرة!!
سعيده:ايه بقرة عيت خريف " تنطق بتشديد الياء وكسرها"
زينب:والله منكم نسمع تو..باهي شن حالها توا؟
غاليه:باهي جتها فرجلها بس كسر خفيف..
فاطمه:قولي باهي اللي ماجو التريس لبعضهم راهي صارت مززرة..."مجزرة"..
كفايه:باهي هما مدام عارفين بقرتهم فيها حاجه ليش مايذبحوها ولايحرقوها ولايديرولها حل..
سعيده:لاياحنه برقة ماتبي من يقربها..
فاطمه:دارتلهم نهار اسود منين قالولها نعدوا بيها للبيطري..
سعيده بضحكه:حق عمتي قريب جن لبعضهن هي وام عبدالمقصود؟!
نعيمه وهي تشوف في البصله:حيي!؟..
فاطمه بضحكه:ايه كان مش حزوهن عن بعضهن راهي برقه بركت ع مني
كفايه بضحكه:حتى الشيخه طلعوها عن طورها..
ع خشة آمنه:نعيمه خوك عمر جي..
غاليه شافت تليفونها وقالت :غريب مااتصل..
شويه وخشت لمياء للكوجينه وهي مبتسمه:السلام عليكم..
ردوا كلهم :وعليكم السلام..
🍁🍁🍁🍁
قريته تو المنشور..
مرام وهي تقرا فيه قالت:زعمه خيرها!؟
هانيبال وهو يشوف للاب :ماشدش معاك..
مرام:ايه من بكري واني نحاول..
هانيبال:اني عارف كان تكلمت ع الهاتف مش قايلين شي حيكذبوا ويدرقوا..
مرام تشوفله بضيق حاسه ان هانيبال بعقله طول الوقت مع اهله وديما مشغول عليهم ويفكر فيهم وديما فحالة قلق دائم..
وهي ركبها ذنب..حاسه انها فرقاته عنهم..
🍁واخيرا
شد اتصال السكايب..
وبانت عليهم ع الشاشه نور..
نور بإبتسامه:مرحبا..
هانيبال:وينكم مافي حد منكم فاتح..قبل 24ساعه وانتم اون لاين!!؟..قعد يعد ع صوابعه..اتصلنا برزان مسكره..رانيا مسكره..مالك مسكر..مروان نفس الشي..شن صاير شن في!!؟اختك خيرها!؟
نور بضحكه:بالشوي خالو هدي والله مافي حاجه..دلوله كانت مريضه المده اللي فاتت..
شويه وسمع صوت دوشه وهدرزة..
هانيبال:هدى صوت زينب خالتك!؟
"ههههههههه"
هانيبال:هدي ضحكة كفايه!!؟
مرام ضحكت..
نور بضحكه:ايه العيله عندنا..
شبحلها شويه بعدين قال:اختك وين؟
نور:هي لحظه بس..شبحت للباب..دلااال...يادلااال..
شويه وشبحت فوق وهي تقول:خالي هانيبال..
"الله!"..
بانت عليهم دلال وهي تقول:خالي!!
هانيبال ضيق عيونه وقال:خيرك يادلال شن قصة المرض هدي!؟
دلال ابتسمت وقال:كيف حالكم قبل..
مرام:الحمد لله ..انتي طمنينا عليك..
دلال ضحكت وقالت:مافي شي نزله معوية رقدت ع خاطرها في المستشفى نهارين بعدين طلعت هو هدا..
هانيبال بشك:متأكده؟!
ضحكت دلال وقالت:يعني شن بيكون صايرلي خالي كنت فغيبوبه مثلا!!
نور اللي كانت واقفه ع الدولاب ضحكت بكتمان..
هانيبال هز راسه بإيجاب وقال:ياودي باهي لاباس عليك..
دلال:لايوريك باس..
هانيبال:باهي شن قصة الزحمه اللي فحوشكم..
دلال غيرت عيونها عنه وقالت:هكي عادي امي عزمتهم هكي وخلاص..
هز راسه بإيجاب وقال:ترا ناديلي امك..
دلال :حاضر..
ناضت دلال ومشت طلعت من الدار..
وصلت فالكوجينه..لقتهم لاهيين بالهدرزة..
دلال:امي..ترا تعالي..وطلعت
استتغربت نعيمه ومشت طلعت ورا بنتها..
نعيمه:شن في؟!
دلال:خالي هانيبال توا يكلم فيا سكايب ويسأل شن في..كله من منشور الفرخه نور..المهم قوليله زي مااني قلت كان عندي نزله معويه..والعيله ملتمه لانك انتي عزمتيهم تمام..
هزت نعيمه راسها بإيجاب ومشت ودلال وراها..
خشت للدار ماكان فيها حد..
صكرت دلال الدار بش ماحد يسمع..
وبدت نعيمه تكلم فهانيبال..وهو يسأل وكأنه يحقق معاها وهي مازادتش كلام تاني ع اللي قالاته بنتها..
ومع هدا هانيبال متأكد انهم يكذبوا وفي حاجه مدرقه..ماباش يصر عليهم اكثر..مشي وخلا مرام معاهم..
الله!!
مرام بضحكه:ايه..ليا 7اسابيع..
نعيمه بفرح:مبارك عليكم..تحلي عويناتك ع خير يارب..
دلال بإبتسامه:احلى خبر نسمعه من وقت طويل..
ضحكت مرام ...
🍁بعد كملوا مكالمه..
نقلوا خبر حمل مرام للكل..
الخبر فرحهم كلهم..
بس عكر مزاج لمياء ولإنها نغرت من مرام..
لمياء بضحكه:حتى اني ياعيله حامل..
كلهم:ماشااااااء الله..
كفايه بإبتسامه:اللهم بارك العيله كبرت..
غاليه بإبتسامه بفرح:الله يبارك ويحفظ..
🍁🍁🍁🍁
صدمتيني رفقه!
رفقه:وعلاش بنصدمك..خلاص كل حد مشي فحاله وقصتنا تمت خلاص..
رزان:متأكده انك كنتي تحبي مروان؟
رفقه:مش عارفه!؟ممكن ايه وممكن لا..وممكن مجرد اعجاب وتعود..
رزان سكتت وهي مستغربه تعرف رفقه كويس تحب مروان وفراقهم متعبها كيف توا تعرفت ع غيره عادي وطوت صفحته بسرعه هكي!!؟
من جهة تانيه فنفس الصاله..
ايه وهادي فشرم الشيخ..
رانيا:حيي ع العار الدنيا كلها ربي كما خلقتني..
ضحكوا البنات..
رباب بضحكه:ماطولناش غادي طول مؤنس رفعني لمكان تاني..
دلال بسرحان قالت:نذكر عمار زمان كانوا زملائه يلموا بعض ويسافروا في الإجازات لشرم الشيخ ع قد مادارو فعمار يمشي معاهم شي يصكر فراسه..كان ديما يقول..الأماكن هدي مش لينا..
ابتسموا البنات لما سمعوها تتكلم بلكنة بدويه وين قالت كلامه..
شبحتلهم بعدين قالت بإبتسامة ألم:
"الله يرحمه"..
هما قالوا باصوات متقطعه:الله يرحمه..
سكتوا شويه بعدين قالت رانيا:ايه حقه حكولك ع استاذ ضو خو مرام شن دار معاك..
رباب بفضول:احكولي اني!؟
دلال بإحراج:اني مصيبة ومنزلها ربي ع الراجل هدا ..
البنات:ههههههههههه..
دلال غطت وجهها بإيديها وهي تضحك بإحراج..
🍁🍁🍁🍁
خشت عليه الدار لقاته متمدد ع السرير..
حط ذراعه ع عيونه..
قدمتله..
وقعمزت حداه..
حطت يدها ع يده اللي حاطها ع صدره..
هو شدها وقال:خيرك؟
مرام تنهدت وقالت:هانيبال..نفكر..نبطل قرايه ونولوا..
حول دراعه من ع عيونه وشبحلها بقرنة حواجب وقال:ليش!!؟
مرام :احمم..نشوف ان هكي احسن..
طلق يدها وناض قعمز وهو يقول:كيف هكي احسن مافهمتش!؟
مرام :ماتريحتش هنى..
شبحلها شويه وقال:ماتريحتي؟!كيف ماتريحتي وانتي ماشيه فقرايتك كويس ودايرة صاحبات ويجوك وتعديلهم..وكل شوي تقولي ياريت ليبيا كيف ماليزيا..
مرام:هدى كله مايعنيش اني متريحه هنى..عادي يعني..وبعدين الواحد مايتريح حق كان فبلاده..
حط يده ع ذقنه وهو يشوفلها بتضييقة عيون.
مرام بضحكه:خيرك؟!
هانيبال:تحبيني؟!
مرام:ههههههه..هانيبال والله ماوقته..
نزل يده وهو مبتسم وقال:كان تحبيني حق معاد تحملي نفسك مسؤولية شي ولاتفكري فشي..طبيعي اني نخمم فهلي كيف ماانتي تخممي فهلك وتتصلي كل وقت وتسألي..حني فغربه وانشغالنا طبيعي..واني انشغالي طبيعي ماتفسريه تفسيرات اخرى..
نزلت عيونها وهي تشوف ليدها اللي تفرك بصوابعها فغطا السرير..
هانيبال:اخر مرة تقولي الكلام هدى تمام..!!
قامت عيونها وشبحت لعيونه وقالت:اني مانبي نفسيتك تتعب نبيك تكون متريح وبس..مانبي نكون سبب فعدم راحتك..نضايق ع الآخر لما نحس هكي..
ضحك..
بعدين شد يدها التانيه وقربها ليه وحضنها وقال:معاش تحسي بكل تمام..
ضحكت مرام..
باسها من خدها..
ابتسمت..
عاود باسها اكثر من مرة ..
هي قعدت تضحك..
هانيبال:مش ليك كلهن اقسمي انتي واللي هنى...حط يده ع بطنها..
مرام:ههههههههههه...
بعدين باسته ع كتفه وحطت راسها عليه..💕
🍁🍁🍁🍁
الساعه 5:00عصرا..
هيا غاليه..
من الدار..
غاليه وهي تشوف للمرايه:هي شوي بس..
دارت نظرة اخيره ع نفسها ..
اول مرة تلبس هكي..
لبسة سروال..
سروال جينز "طوبو"..لونه ازرق كحلي..
ومن فوق بلوزه بيضا مصكرة لفوق وفيها ياقه مطويه..
محشية البلوزة فالسروال..
ولابسه فوقها طرف يلتبس من فوق طويل واصل لتحت الركبه لونه رصاصي..
ووشاح ارزق كحلي..
ومدايرة لمسات بسيطه جدا ع وجهها
اول مرة تلاحظ روحها انها تبان اصغر من عمرها..
اعجبت بشكلها هلبه..
ابتسمت بتنهيده..
بعدين خدت شنطة يد صغيره حزامها زي السلسله..
لبستها..
ومشت للباب فتحاته وطلعت..
وفي مرة تعالت الاصوات..
اللي يقول..
اشيه اشيه..
واللي يقول..
واااو..
واللي يقول..
تهبلي..
واللي يقول..
ايه الحلاوة دي ..ايه الطعامه دي..
ايه اللي بيحصل ده..ايه اللي انا شايفو ده..
ايه اللي بيحصل ده ايه اللي انا شايفو داااه.
كانت رباب تغني فيها وترقص وهي تقدم لخالتها ولما وصلت فيها باستها من خدها وقالت:عسسسل يابنيه..
رانيا:ممكن رقمك يابنيه..
نور:باهي نظرة يابنيه..
دلال:روفي بقلبي يانا عليا..
كلهم:هههههههههههههه..
غاليه بضحكه:عطيكن الخير..💓
غزلان بإبتسامه:هي غاليه عمر وحميد يراجو..
غاليه:رزونه طلعت؟
غزلان:ايه ..
غاليه :تمام..
مشت غزلان..
ووراها غاليه..
والبنات يناشبوا فيها وهي تضحك..
وصلت برا لبست فرجليها كندرة حاطيه..
وغزلان لبست بوتها..
ومشوا مع بعض..
نزلوا من الدروج..
غزلان توجهت لسيارة راجلها..
وغاليه لسيارة عمر..
ركبت من الخلف..
لمياء:عسل طالعه..
ابتسمت غاليه وقالت:تسلمي..
شبحلها عمر من المرايه بعدين ابتسم..
وتحرك..
طلع حميد الأول اللي كان رافع مرته وبنته وبنت خوه..
وبعده عمر...
هما طالعين..
وعماد كيف جي..
وقف بسيارته بين سيارات خواله وهما وقفوا لما كلكسلهم..
رزان قلبها بيطلع من مكانه💓
ومع هدا مابتش تشبح جيهته نهائي..
هو نزل المرش وقال:سلام عليكم..
ردوا عمر وحميد :وعليكم السلام..
عماد:كيف حالكم..
الزوز ردوا:الحمد لله..تمام..
عماد:وين؟!
حميد:مشوار للسوق ..
عماد من ورا النظارات شبح لرزان بعدين قال:باهي مانعطلكمش...
عمر:قاعدين كلهم داخل..
هز عماد راسه بإيجاب ورفع يده فوق حياهم وكمل طريقه..
وهما كملوا طريقهم..
رزان تنهدت من اعماقها وهي تشوف للروشن..
ورفقه تشبحلها وخلاص..
🍁بعد مشوار طريق استمر لربع ساعه..
وصلوا لمحل الحلويات اللي فاتحاته غزلان..
حطوهم الرجاله ومشوا..
وهما خشوا داخل..
انبهروا غاليه ولمياء والبنات بمنظر المحل من داخل ونظامه..
وغاليه تتفحص فكل شي بنظرها..
لمياء:كله شغلك غزلان..
غزلان بإبتسامه:اللي في العرض كله شغلي..
ابتسمت غاليه وقالت:ريتهن الصور فالقروب بس مش كيف ع الطبيعه..
غزلان:عجبوك..
غاليه:واجد..
غزلان اشرت بسبابتها ع راسها وقالت؛زيدي فكري..
ابتسمت غاليه..
ولمياء تمرر فنظرها عليهم..
من جهة تانيه..
رزان:فنانه..
رفقه تشوف حواليها بدون ماتعلق ..
رزان:غير امتى تجي العطله ناويه نتعلم حاجات جديده ..
رفقه بضحكه:حاجتين تعشقيهم في الحياة الحاسوب والمطبخ..
رزان خفت ابتسامتها وقالت فنفسها"في الحياة مانعشق غيره هو💓"..
شويه..
وانفتح باب المحل..
اللي خشوا قالوا..
"السلام عليكم"..
غزلان التفتت وهي مبتسمه:وعليكم السلام تفضلوا..شبحت لوحده من العاملات اللي يخدموا عندها..
العامله:اهلا وسهلا...كيف تحبوا نخدمكم..
غاليه وهي تشوف لوحده من الطورطات:روعه روعه..
"انتي اختاري مانقعدش فمشاكل اني وراجلك بعدين"..
لفت انتباهها اللي كان يتكلم..
لانه كان واقف جنبها بمسافه..
شبحتله...
هو كان عاطي بالظهر ويكلم في اللي حداه ويضحك..
ابتسمت بعدين رجعت تشوف للمعروض..
:نقولك خودي الصفرا..
:ارجوك اسكت مانبيش منك استشارات..
:ههههه..انتي الخاسرة..
العامله طول الوقت شاده ضحكتها..
قعدت المراة تشوف..
وهو قعد يمرر فنظره ع المحل وقال لنفسه:كله يسهفك تاخده..
رجعت شبحتله غاليه..
فاللحظه اللي جت فيها عينه عليها..
ملامح وجه غاليه تبدلت للصدمه..
قعدت مفنصه وخلاص..
هو ضيق عيونه استغرابا فشبحتها ليه..
طول غاليه لفت وجهها عنه وهربت لجهة تانيه..
وجت حدا بنات خوها..
هو قعد معاها بعيونه مستغرب فيها..
هي قعدت عاطيه بالظهر ودقات قلبها في 1000💓
غاليه"منين طلع ياربي!"
شويه وبدت تتلفت بحذر..
لقاته يكلم فالمراة اللي معاه..
ومعاهم غزلان..
:شوفي اني هديكا المده شفت عندك صورة لطورطا فضيعه عجبتني عجبتني بس للأسف مش شايفتها هني..
ابتسمت غزلان وقالت:مناسبتك امتى؟
:بعد اسبوع..
غزلان التفتت ادور بعيونها ع غاليه لين شافتها..نادت...غاليه..
هو اللي كان يشوف لوحده من الطورطات..لما سمع الإسم..
رفع عيونه فغزلان..
بعدين شبح وين ماتشبح..
غاليه وجهها لونه راح بنفسجي قعدت مفنصه وهي تشوف لغزلان..
اشرتلها غزلان تجي..
غاليه"خيرك هكي قريب تنشلي!!يعني من وين بيعرف اني نفسها غاليه اللي يعرفها..مافي فالسوق كان مرزوق!"
تنحنحت وقدمتلهم بخطوات مرتبكه..
وصلت فيهم بالسيف..
وتحاول ع قد ماتقدر انها ماطيحش بعيونها عليه..
غزلان بإبتسامه:الطورطه اللي تحكي عليها من تحت ايدياتها..
ابتسمت المراة وقالت:الله!..تخدم معاك هي؟!
غزلان:الي الآن لا...بس نتمنى..
:يعني لو طلبت منها ادير هالطلبيه ماتردنيش..
شبحت غزلان لغاليه..
وغاليه شبحت للمراة وهي تفكر..
اسمها غاليه..
تحب ادير الحلو وتتفنن فيه..
باهي..
لو توا تكلمت..
نبرة الصوت..
اللكنه اللي حتدوي بيها!!
لايمكن هدا كله يكون محض صدفه..
غزلان:غاليه!
تنهدت غاليه وشبحت لغزلان بعدين قالت بشي من الربكه:احمم..ممكن..
:لا مش ممكن نبي الاكيده..
غاليه:احمم خلاص اكيده..
:نبي زيها بالزبط..
غاليه:اما هي !؟
غزلان:الطورطات اللي بعتيلي صورهم اخر مره..
غاليه بتضييقة عيون:اين منهن؟!
بعد قالت كلمتها هادي..
تلقائيا شبحتله..
لقاته لاهي بتليفونه..
تنفست بإرتياح..
غزلان :اهيا..
شبحت غاليه لتليفون غزلان وقالت:تمام..خلاص..
:معناها نعتمد خلاص...
غاليه هزت راسها بإيجاب..
غزلان:خلال اسبوع تكون واتيه بإذن الله..
غاليه:بإذن الله..
ابتسمت المراة وقالت:خلاص..مشكورين..
غزلان:العفو..
التفتت وقالت:
"هيا نجمي"..
رفع عيونه وشبح لغاليه..
هي طول لفت وجهها عنه..
نجم الدين:هيا..
مشي هو الأول..
فات من حدا غاليه.اللي كانت شبه جامده ..
ووراه اخته..
فتح الباب خلا اخته.تطلع قبله..
وغاليه تشوفلهم..
لما جي بيطلع التفت..
غاليه فنصت وغيرت عيونها للحيط ..
هو ابتسم وطلع وصكر الباب...
غاليه زفرت بقوة..
شبحتلها غزلان وقالت:احرجتك!
شبحتلها غاليه وابتسمت بإرتباك وهي تقول:لالا...
🌴🌴🌴🌴
ماتبو شي مراد؟
مراد:سلامتك بس يابونسيب بارك الله فيك..
محمد:مش بيناتنا يامراد رانا عيله وحده تو..
مراد بإبتسامه:اكيد..تسلم يامحمد..
محمد صافحه وقال:اي حاجه تصير معاكم خبرني طول.
مراد ابتسم وهز راسه بإيجاب..
محمد سحب يده وقال:هي تصبح ع خير..
مراد:قدامك كل خير..
مشي محمد..
ومراد قعد واقف يشوفله لين بعد بعدين خش وصكر الباب..
محمد وهو ماشي رن تليفونه..
ابتسم وطلعه من جيب سرواله ..
شاف المتصل طول فتح الخط ورد:هاه..شن تبي!؟
بلقيس بضحكه:الستر ياربي خيرك تكشخ؟!
محمد:ماهو كنت عندك قبل شوي ليش متصله..
بلقيس بإبتسامه:نبي نطمن انك وصلت..
محمد:ليش معدي لبنغازي اني!!..
بلقيس:الخطر قائم في كل وقت المسافه اللي انت هازي عليها هدي ممكن تصيرلك فيها 20حاجه..
محمد وقف وقال:قولي لاقدر الله ياعنشكلك!؟
بلقيس بضحكه:خيرك خفت!؟
محمد بتفنيصه :خفت!؟غير ملامح وجهه للإزدراء وقال..بالله صكري صكري..
بلقيس:ههههههه..باهي لما تخش الحوش رن عليا طمني..بالسلامه..وصكرت..
حول التليفون من ع وذنه وقال:شن المتلفه هدي!!..
كمل طريقه...
وكيف وصل في بوابه القطعه..
يعتر فرشاده قريب جي ع وجهه..
محمد بصدمه:اعوذ بالله من فالها الأسود...اعوذ بالله من الشيطان الرجيم..
مسح بيده ع وجهه وقعد يمشي وهو يشوف لوطا...
لعند ماوصل في الباب..
بيفتحه ويخش..
خطرت عليه لما قالت تخش الحوش رن عليا..
محمد بنرفزة:تعدي..
خش وكيف جاي بيصكر الباب..
غمض عيونه وتأفف..
فتحهم وشبح لتليفونه ..
بسرعه..رن عليها وصكر..
بعدين صكر الباب..
🍁🍁🍁
تصب اللبن فالطواسي..
وهي تسمع فحمواتها يقولوا..
عفاف:ريتي الحقيرات زوز زوز حداها خلنها تموت هكي وفوقها ماحد يندري عليها..
اختها:كلا امي الله يرحمها فالكناين ماعندها حظ..
عفاف بتوعد:والله غير يعدن اول تلاته ايام تو يشوفن شن ندير فيهن هالكلبات..
حطت باكو اللبن بعد صبت فالطواسي كلهم.
رفعت الصفرة وطلعت من حداهم بدون ماتشوفلهم..
وهما يشبحولها بحقد..
🍁طلعت فرقت ع المعزين...وهي ادور فبنتها بعيونها..
قلبها نخصها..
بعد كملت طول طلعت برا الحوش وهي ادور وفيدها الصفره..
شبحت جنبها..
لقت واحد من ولاد حمواتها عمره ف 14سنه..
واخد حنين وماشي بيها ..
هي عيونها توسعوا بخوف..
طول مشت تجري...
لحقت عليهم..
وهو كيف جاي بيخش بالبنت فالتركينه..
جبدت بنتها..
وهي تفنص فيه قالت بنبرة تخوف:مازال نلقاك تشبح يلاها نقتلك..
طبت بنتها ومشت بيها بسرعه...وهي كلها خوف عليها..
🍃شن درتي فروحك بس!🍃
🍁🍁🍁🍁
الساعه 1:00ليلا..
كان الكل غارق فالنوم فحوش نعيمه..
نعيمه وامها وسعيده ولمياء وسميه..
والصغار..
ومن قعد من الرجاله..
بس في دار..
اغلب اللي فيها جفاهم النوم..
رزان..
دلال..
غاليه..
عكس نور اللي كانت رايحه فعالم الأحلام..
💔رزان كانت حاطه راسها ع مخده مبلوله بدموعها وهي تذكر في اللي صار المغرب..
اول ماروحوا لحوش عمتها..
لما جت نازله من السياره..
لقت عماد واقف يتكلم بالتليفون حدا كرمة العنب..
وهو عاطي بالظهر..
كان يضحك..
وبعد الضحكه قال..
"انتي غير اطلبي وتمني ياسناء حاااضر من عيوني"..
ماتت البنت فلحظتها وناضت حيه..
مش عارفه منين جتها القوة اللي خلتها تمشي بسرعه وتخش للحوش وتحاول تتماسك وتخفي وجع قلبها الشديد قدام الكل..
زياده ع هكي معامله عمتها كفايه اللي تغيرت معاها 180درجه..
كل هدا خلاها تحس بألم فضيع..ماقدرت تبينه لحد ولا شاركت حد بيه..
تحملاته بروحها..
وهي تحاول تخفف ع نفسها ببضع كلمات..
"بلعاني اللي يدير فيه يبي يحرقني وخلاص..هو يحبني اني بس مستحيل يحب غيري"
وتعاود وتكرر فهالكلمات فعقلها وهي تذرف فالدموع...
💔حتى دلال..
كانت تحاول تخفي دموعها ..
مش بس دموعها..
تخفي انها قاعده تشوف حاليا في فيديوات لعمار فتليفونها..
وتتخيل لو فعلا يطلع حي..
وتطلب من الله معجزة بس يتحقق هالخيال..
🍁اما غاليه..
فكانت تتسائل ..
علاش قاعد يصير هكي!؟
كل ماتبعد نجم عن حياتها يرجع يطلع فيها من جديد وكل مرة بدرجه اقوى من اللي قبلها..
بس تقعد تقنع فنفسها وتقول ..
مايغير في الأمر شي..
لأنه مستحيل يصير اي شي..
قطع عليها تفكيرها..
هزت تليفونها..
طلعاته من تحت المخده ..
لقت رساله..
غاليه"نقطع ذراعي من منبتها كان ماطلع هو"
فتحتها..
وقرتها..
(اقنعيني..
ان اللي قاعد يصير من صدف مافيش من وراه حاجه..
لالا ولا نقولك..
اقنعيني..
ان عمرك 41سنه!!
ارجوك اقنعيني...)
ضحكت ضحكه خفيفه..
بعدين حطت يدها ع وجهها وهي تقول فنفسها..
"ياربي شن معناه اللي قاعد يصير والله ماني فاهمه حاجه"..
تنهدت..
حولت يدها وصكرت بيها تليفونها..
رداته لمكانه ومازال قاعده تفكر وماقدرتش ترقد..
🍁🍁🍁🍁
تاني يوم..
الصبح بكري..
تسقدوا اهل البلاد لبلادهم..
مع طلعة نور ودلال والصغار..
اللي لمدارسهم واللي للجامعه..
🍁حطت دلال خوها وولدها في المدرسه..
بعدين ومعمر واسيا في الروضه ...
وتوجهت للكليه..
وصلت..
درست سيارتها ونزلت...
وهي تقص الطريق للكليه..
من بعيد شوي..
كان ضو متأمل انها تجي..
وفعلا جت وشافها..
ابتسم من قلبه..
قعد يراقب فيها بعيونه...
هي لما كانت تقص في الطريق..
تشوف ايمين ويسار..
عينها جت عليه لما شبحت ايمين..
حياها بحركة الراس..
هي ابتسمت ابتسامه خفيفه..
وشبحت القدام..
وكملت طريقها لكليتها..
هوضحك..
بعدين لف ومشي خش لكليته...
وهو يدندن..
"كان مالنا ومالك نحنا ياهوا"..
🌴🌴🌴🌴
شني !!!
سعيده :توا خبرتني امي..
غاليه:لاحول ولاقوة الا بالله..
سعيده:كيف بيصير توا؟
ع خشة فاطمه وهي تقول..
فاطمه:ماني ماشيه...كان بتعدوا انتم عدوا..
غاليه قعدت تشبح لأمها..
سعيده:لا كيف نعدوا دام انتي مانك ماشيه..خلاص..
فاطمه:اني مانربط حد بيا ياسعيده اللي بيعدي هوينا الطريق قدامه..ايوه..
ومشت طلعت من حداهم..
تنهدت سعيده..بعدين مشت طلعت حتى هي..
اما غاليه..
مسحت بيدها ع وجهها وهي تقول :زعم شن صاير فيك ياحميده تو...
🍁🍁🍁🍁
اني مانطلب فشي لروحي..بنتك تبي ماتلبس وتاكل وتشرب..
تبي دبش شتي..ونبوا دفايه..متنا من الصقع..
الصديق:خل نطلعوا من اللي حني فيه توا وبعدين ساهل..
ومشي وخلاها..
هي غمضت عيونها بنفاذ صبر..
وتنهدت..
بعدين مشت بتخش..
لقت حليمه فوجهها..
قدمتلها وشدتها من رقبة القفطان وقالت:اخر مرة نحذرك ياعزوز يامخمجه..تقربي جهة راجلي..
شدت رقبة حميده وشدت عليها..
حليمه بنظرات تخوف:نقتلك..
حميده وجهها ولا احمر ..بتنخنق خلاص..
طلقتها حليمه ودفتها..
ومشت لحوشها..
حطت حميده يدها ع رقبتها وهي فحالة من الذعر وخشت تجري...
🍁🍁🍁🍁
الساعه 6:00مساءا..
حدا الفرن..
غاليه:مستحيل يارزان والله مايديرها..
رزان ببكي:بلعاني ياعمتي يحرقني بيها..
غاليه وهي تخلص في الخبزة:تس تس..مايديرها يارزان..راك تنسي اخت مرت خاله راهي..لو يبي يدير معاها شي لازم يحسب لهالخطوة الف حساب..
رزان سكتت شويه بعدين قالت:قصدك يعني هو ممكن يبيها بجديات!
رفعت غاليه راسها وشبحت لرزان شويه بعدين قالت:حتى هدي مستحيل..
"كملتي غاليه"
شبحت غاليه لسعيده اللي كانت جايتهم:مازلت..
سعيده بعد وصلت فيهم قالت:احسبي ميلاد فزوز.
ابتسمت وقالت :حاضر..
شبحت سعيده لبنتها لقتها تمسح فدموعها كيف جايه بتسألها..
فجأة..
سمعوا صوت غريب..
التلاته فنصوا..
الصوت زاد قرب...
غاليه بلعثمه:مش..ه..هدي!!
فتحت سعيده عيونها ع وسعهم وقالت بعياط:البقرة ياغااااليه البقرة..
التفتت غاليه..
ورزان تشوف..
البقرة متاع جيرانهم خاشه القطعه وجايه ناحيتهم تجري بسرعه وهي فقمة الهيجان...
....يتبع....
