#العشق_المتمرد
#جمان_فريد
#الجزء_40
ﺍﻟﺴﺎﻋﻪ 11:00 ﺻﺒﺎﺣﺎ ..
ﻋﺎﻟﻲ ﻭﺗﻌﻠﻰ ﻭﺍﺭﺗﻔﻊ ﻟﻔﻮﻕ ﻭﺍﺭﺗﻔﻊ ﻟﻔﻮﻕ ...
ﻳﺎﺑﻠﺪ ﺷﺎﻣﺦ ﻣﺎﺭﻛﻊ ...
ﻛﻤﻠﺖ ﻣﺸﻂ ﺷﻌﺮﻫﺎ ﻭﻫﻲ ﺗﺴﻤﻊ ﻓﻲ ﺃﻏﻨﻴﺔ ﻣﺤﻤﺪ ﺣﺴﻦ ﻭﺗﺴﻤﻊ ﻓﻴﻪ ﻫﻮ ﻳﻐﻨﻲ ﻣﻌﺎﻫﺎ ﻭﺗﻀﺤﻚ ..
ﺑﺨﺖ ﻋﻄﺮﻫﺎ .. ﻭﻃﻠﻌﺖ ﻣﻦ ﺍﻟﺪﺍﺭ .. ﻭﻳﻦ ﺟﺖ ﻣﻘﺎﺑﻠﻪ ﺍﻟﻜﻮﺟﻴﻨﻪ ...
ﻟﻘﺎﺗﻪ ﻭﺍﻗﻒ ﻓﻲ ﺍﻟﻜﻮﺟﻴﻨﻪ ﻳﺒﺎﻥ ﻳﻮﺗﻲ ﻓﺎﻟﻔﻄﻮﺭ ..
ﻻﺑﺲ ﺗﻮﺗﻪ ﺳﺮﻭﺍﻟﻬﺎ ﺭﺻﺎﺻﻲ ﻭﻓﺎﻧﻠﻴﺘﻬﺎ ﺗﻮﺏ ﺭﺻﺎﺻﻲ ﻫﺎﻓﺖ ...
ﻛﺎﻥ ﻳﻐﻨﻲ ﻭﻳﺤﺮﻙ ﻓﺮﺍﺳﻪ ﻣﻦ ﻛﺜﺮ ﻣﺎﻣﻨﺴﺠﻢ ﻣﻊ ﺍﻷﻏﻨﻴﻪ ﻭﺟﻮﻩ ﻣﻠﻴﺢ ...💕
ﺟﺎﻱ ﺑﻴﺤﻂ ﺍﻟﺼﻮﻧﻴﻪ ﻉ ﺍﻟﻄﺎﻭﻟﻪ ﺷﺎﻓﻬﺎ ﻭﺍﻗﻔﻪ ﺗﺘﻔﺮﺝ ﻋﻠﻴﻪ ﺿﺤﻚ ..
ﺣﻂ ﺍﻟﺼﻮﻧﻴﻪ ...
ﻭﺟﺎﻫﺎ ﻭﻫﻮ ﻳﻐﻨﻲ ﻭﻳﺤﺮﻙ ﻓﻲ ﺇﻳﺪﻳﻪ :
ﻋﺎﻟﻲ ﻭﺗﻌﻠﻰ ﻭﺍﺭﺗﻔﻊ ﻟﻔﻮﻕ ... ﻭﺍﺭﺗﻔﻊ ﻟﻔﻮﻕ ...
ﻳﺎﺑﻠﺪ ﺷﺎﻣﺦ ﻣﺎﺭﻛﻊ ...
ﻳﺎﺷﻤﺲ ﻭﺍﺗﺨﺪﺕ ﺟﻤﻴﻞ ﺷﺮﻭﻕ ...
ﻭﺻﻞ ﻓﻴﻬﺎ ﻭﺣﻀﻨﻬﺎ ﻭﻫﻮ ﻳﻐﻨﻲ ﻓﻮﺫﻧﻬﺎ ...
ﻳﺎﻧﻮﺭ ﻓﻲ ﺻﺤﺮﺍ ﺳﻄﻊ ....
ﺑﺎﺳﻬﺎ ﻣﻦ ﺧﺪﻫﺎ ... ﻭﻛﻤﻞ ﻏﻨﻲ ﻭﻫﻮ ﺣﺎﺿﻨﻬﺎ ..
ﻭﻫﻲ ﺗﻀﺤﻚ ....
ﺩﻻﻝ : ﺣﺘﻰ ﻋﻴﺪ ﺳﻠﻄﺔ ﺍﻟﺸﻌﺐ ﻣﺎﺯﺍﻝ ...
ﻋﻤﺎﺭ : ﻫﺪﺍ ﻋﻴﺪﻱ ﺍﻧﻲ .... ﺍﺣﺘﻔﺎﻻﺕ ﺑﺎﻧﺘﺼﺎﺭﻋﻤﺎﺭ ...
ﺩﻻﻝ ﺑﻀﺤﻜﻪ : ﺇﻳﺎﺍﺍﻩ ..
ﻋﻤﺎﺭ ﺑﻀﺤﻜﻪ : ﻭﺇﻟﻰ ﺍﻷﻣﺎﻡ ﻭﺍﻟﻜﻔﺎﺡ ﺍﻟﺜﻮﺭﻱ ﻣﺴﺘﻤﺮ ..
ﻭﻗﻌﺪ ﻳﺒﻮﺱ ﻓﻴﻬﺎ ﻭﻫﻲ ﻣﻴﺘﻪ ﺑﺎﻟﻀﺤﻚ ..
ﻟﻌﻨﺪ ﻣﺎﺳﻤﻌﺖ ﺍﻟﺸﺎﻫﻲ ﻓﺎﺝ ...
ﺩﻻﻝ : ﺍﻟﺸﺎﻫﻲ ...
ﻋﻤﺎﺭ ﺣﻀﻨﻬﺎ ﺑﻘﻮﺓ ﻭﺿﺤﻚ ... ﺑﻌﺪﻳﻦ ﺑﻌﺪ ﻭﺷﺪﻫﺎ ﻣﻦ ﻳﺪﻫﺎ : ﺍﺳﻤﻌﻲ ﺗﻌﻠﻘﻲ ﻉ ﺍﻟﻔﻄﻮﺭ ﻧﻬﺎﺭﻙ ﺍﻟﻠﻲ ﺩﻭﺭﻱ ﻓﻴﻪ ..
ﺩﻻﻝ ﺑﻀﺤﻜﻪ ﻭﻫﻲ ﺗﻬﺰ ﻓﺮﺍﺳﻬﺎ ﺑﺈﻳﺠﺎﺏ : ﺍﻣﺒﺎﻩ ..
ﻭﺻﻠﻬﺎ ﻟﻠﻜﺮﺳﻲ ... ﻭﺧﺮﻫﻮﻟﻬﺎ ... ﻗﻌﻤﺰﺕ .. ﻭﻣﺸﻲ ﻫﻮ ﻳﺤﻞ ﻓﻲ ﺍﺯﻣﺔ ﺍﻟﺸﺎﻫﻲ .. ﻭﻫﻲ ﺗﺸﻮﻑ ﻟﻠﻔﻄﻮﺭ ﻭﺣﺎﻃﻪ ﻳﺪﻫﺎ ﺗﺤﺖ ﺫﻗﻨﻬﺎ ﻭﺷﺎﺩﻩ ﺿﺤﻜﺘﻬﺎ ...
ﺷﺒﺤﻠﻬﺎ ﻭﻫﻮ ﺭﺍﻓﻊ ﺣﺎﺟﺒﻪ ﺍﻹﻳﺴﺎﺭ : ﻋﺠﺒﻚ ﻭﻻ؟
ﺩﻻﻝ ﺭﻓﻌﺖ ﺣﻮﺍﺟﺒﻬﺎ : ﻭﺍﺍﺍﺟﺪ ..
ﺟﺎﻫﺎ ﻭﻗﺮﺏ ﻣﻨﻬﺎ ﻭﺑﺎﺳﻬﺎ ﻭﻗﺎﻝ : ﻭﺍﺟﺪ ﻭﺍﺟﺪ ...
ﺩﻻﻝ ﻭﻫﻲ ﺗﺸﻮﻑ ﻟﻌﻴﻮﻧﻪ ﺑﻬﻴﺎﻡ : ﻫﻠﺒﻪ ﻫﻠﺒﺎﺕ ...
ﺑﺎﺳﻬﺎ ﻣﺮﺓ ﺗﺎﻧﻴﻪ : ﺗﺎﻛﻠﻴﻪ ﻛﻠﻪ ..
ﺩﻻﻝ ﺿﺤﻜﺖ : ﻻﻣﺶ ﻟﻬﺎﻟﺪﺭﺟﻪ ...
ﻋﻤﺎﺭ ﺑﻠﻬﻔﻪ : ﻟﻜﻦ ﺍﻧﻲ ﺑﻨﺎﻛﻠﻚ ﻛﻠﻚ ...💓
ﻭﻳﺮﺟﻊ ﻳﺒﻮﺳﻬﺎ .. ﻭﻳﻨﻮﺿﻬﺎ ﻭﻳﺮﻓﻌﻬﺎ ﻟﻌﺸﻬﻢ ﺍﻟﺤﻠﻮ 💕💕💕
ﻭﻳﻘﻌﺪ ﺍﻟﻔﻄﻮﺭ ﺑﺮﻭﺣﻪ ...😂🍃🍃
🍁🍁🍁🍁🍁🍁
ﻃﺮﺍﺑﻠﺲ ...
ﻛﻠﻴﺔ ﺍﻟﻬﻨﺪﺳﻪ ...
ﻭﺍﻗﻔﻪ ﻓﻲ ﺍﻟﺘﺮﻛﻴﻨﻪ .. ﻭﻓﻴﺪﻫﺎ ﺍﻟﺘﻠﻴﻔﻮﻥ ﻭﺑﺪﺕ ﺗﻀﺮﺏ ﻉ ﺭﻗﻢ ﻣﺤﺪﺩ ...
ﺭﺍﻧﻴﺎ : ﻳﺎﺍﺍﺭﺏ ...
ﻧﺎﺩﻯ ﻣﺮﺓ ﺍﺗﻨﻴﻦ ﺗﻼﺗﻪ ... ﺍﻧﻔﺘﺢ ﺍﻟﺨﻂ ..
ﻃﺎﺭﻕ : ﺍﻳﻮﻩ ..
ﺭﺍﻧﻴﺎ ﺑﻠﻌﺖ ﺭﻳﻘﻬﺎ ﻭﻗﺎﻟﺖ : ﻃﺎﺭﻕ؟
ﻃﺎﺭﻕ ﺑﺈﺳﺘﻐﺮﺍﺏ : ﻣﻦ ﻣﻌﺎﻱ ...
ﺭﺍﻧﻴﺎ : ﺍﻧﻲ ﺭﺍﻧﻴﺎ ﺍﺧﺖ ﺭﺑﺎﺏ ...
ﻣﻦ ﺑﻌﻴﺪ ﺷﻮﻳﻪ ...
ﻋﻤﺮ : ﺍﻧﻲ ﺑﻨﻌﺪﻱ ﻟﻠﻜﻠﻴﻪ ﻣﺘﺎﻋﻪ .. ﺍﻧﺖ ﻋﺎﺩ ﻣﺎﻃﻮﻟﺶ ..
ﺭﻣﺰﻱ ﺑﺈﺑﺘﺴﺎﻣﻪ : ﺗﻢ ..
ﻋﻤﺮﺑﻀﺤﻜﻪ : ﻋﻠﻴﻚ ﻭﻗﺖ ﻭﺧﻼﺹ ﺣﺮﻙ ﺭﺍﺳﻪ ﺍﻳﻤﻴﻦ ﻭﺍﻳﺴﺎﺭ ﻭﻣﺸﻲ ...
ﻭﺭﻣﺰﻱ ﻣﺸﻲ ﻟﻠﻤﻜﺎﻥ ﺍﻟﻠﻲ ﻋﺎﺭﻑ ﺭﺍﻧﻴﺎ ﺩﻳﻤﺎ ﺗﻜﻮﻥ ﻣﻮﺟﻮﺩﻩ ﻓﻴﻪ ..
ﻭﻃﺒﻌﺎ ﻫﻮ ﻣﺪﺍﻳﺮ ﻣﻔﺎﺟﺄﻩ ...🍃
....
ﺭﺍﻧﻴﺎ : ﻣﺶ ﻋﺎﺭﻓﻪ ﺷﻦ ﻧﻘﻮﻟﻚ ... ﺑﺲ ﻳﻌﻨﻲ ﻭﺑﺼﺮﺍﺣﻪ ﻫﻲ ﺣﺎﺳﻪ ﺍﻧﻚ ﻣﺶ ﺟﺪﻱ ﻣﻌﺎﻫﺎ ...
ﻃﺎﺭﻕ ﺑﻌﺼﺒﻴﻪ : ﻣﻦ ﺍﻷﻭﻝ ﻭﺍﻧﻲ ﻣﺒﻴﻨﻠﻬﺎ ﺍﻥ ﺟﺎﺩ ﻣﻌﺎﻫﺎ .. ﻭﺍﺿﺢ ﺍﻧﻬﺎ ﻣﺶ ﻋﺎﺭﻓﻪ ﺍﻧﻬﺎ ﺗﻜﻠﻢ ﻓﺮﺍﺟﻞ ...
ﺭﺍﻧﻴﺎ : ﻻﻣﺶ ﻫﻜﻲ ﺍﻓﻬﻤﻨﻲ ... ﺍﺣﻤﻢ .. ﻫﻲ ﺧﺎﻳﻔﻪ ﺑﺲ .. ﻭﻣﺎﺗﻨﺴﺎﺵ ﺍﻧﺖ ﺻﺎﺣﺐ ﺧﻮﺍﻟﻬﺎ ...
ﻃﺎﺭﻕ : ﻭﺍﻧﻲ ﻋﺎﺭﻑ ﻭﻣﺶ ﻧﺎﺳﻲ ﻟﻬﺎﻟﺴﺒﺐ ﻣﻔﺮﻭﺽ ﺗﻜﻮﻥ ﻭﺍﺛﻘﻪ ﻣﻨﻲ ﺍﻛﺜﺮ ...
ﺭﺍﻧﻴﺎ : ﺍﺣﻤﻢ ... ﺑﺎﻫﻲ ﺗﻮﺍ ﻛﻴﻒ ﻳﺼﻴﺮ ...
ﻃﺎﺭﻕ ﺗﻨﻬﺪ ﻭﻗﺎﻝ : ﺗﻮ ﻧﺘﺼﺮﻑ ...
ﺭﺍﻧﻴﺎ : ﺍﺳﻤﻊ ﻃﺎﺭﻕ ﺭﺍﻫﻮ ﺧﻨﺒﺖ ﺭﻗﻤﻚ ﺧﻨﺒﻪ ..
ﻃﺎﺭﻕ ﺑﻀﺤﻜﻪ : ﻭﺍﺿﺢ ﺗﺤﻜﻲ ﻭﺍﻧﺘﻲ ﺗﺮﻋﺸﻲ ..
ﺭﺍﻧﻴﺎ : ﻫﻬﻬﻬﻬﻬﻪ ...
🍃 ﻃﺒﻌﺎ ﻣﻦ ﺍﻟﺤﻆ ﺍﻟﺤﻠﻮ ...
ﺭﻣﺰﻱ ﺟﻲ ﻋﻨﺪ ﺍﺧﺮ ﺍﻟﺤﻮﺍﺭ ﺑﻴﻨﺎﺗﻬﻢ ...
ﻗﻌﺪ ﻭﺍﻗﻒ ﻣﺼﺪﻭﻡ ... ﻭﺍﻟﺪﻡ ﺭﺍﻗﻲ ﻟﺮﺍﺳﻪ ..
ﺭﺍﻧﻴﺎ ﺑﻀﺤﻜﻪ : ﺧﻼﺹ ﻧﺮﺍﺟﻲ ﺷﻦ ﺩﻳﺮ ..
ﻃﺎﺭﻕ ﺑﻀﺤﻜﻪ : ﺍﺭﺟﻲ ﺍﻧﺘﻲ ﻭﻫﻲ ..
ﺿﺤﻜﺖ ﺭﺍﻧﻴﺎ ﻭﻗﺎﻟﺖ : ﺧﻼﺹ ﻣﺎﻧﻌﻄﻠﺶ ﻋﻠﻴﻚ ﻭﺍﺳﻔﻪ ﻉ ﺍﻷﺯﻋﺎﺝ ..
ﻃﺎﺭﻕ : ﺑﺎﻟﻌﻜﺲ ﺍﻧﺘﻲ ﺭﻳﺤﺘﻲ ﺑﺎﻟﻲ .. ﺭﺑﻲ ﻳﺤﻔﻈﻚ ﻭﻳﻬﺪﻱ ﺍﺧﺘﻚ ﺍﻟﻬﺒﻠﻪ ..
ﺿﺤﻚ ﺭﺍﻧﻴﺎ : ﺇﻥ ﺷﺎﺀ ﺍﻟﻠﻪ .. ﻫﻲ ﺳﻼﻡ ..
ﻃﺎﺭﻕ ﺑﺈﺑﺘﺴﺎﻣﻪ : ﻭﻋﻠﻴﻜﻢ ﺍﻟﺴﻼﻡ ...
ﺻﻜﺮﺕ ﺭﺍﻧﻴﺎ ... ﺑﻌﺪﻳﻦ ﺗﻨﻬﺪﺕ ... ﻭﻛﻴﻒ ﻟﻔﺖ ﺑﺘﻤﺸﻲ ...
ﻭﻗﻔﺖ ﻓﻤﻜﺎﻧﻬﺎ ﻣﺨﻠﻮﻋﻪ ﺑﻌﺪ ﺷﻬﻘﺖ ..
ﺭﻣﺰﻱ ﻭﻣﻼﻣﺢ ﺍﻟﻐﻀﺐ ﺑﺎﻳﻨﺎﺕ ﻉ ﻭﺟﻬﻪ ﻭﻋﻴﻮﻧﻪ ﻣﻠﻴﺎﻧﺎﺕ ﺩﻣﻮﻉ : ﻣﺘﻮﻗﻌﻬﺎ ﻭﺍﻟﻠﻪ ﻣﺘﻮﻗﻌﻬﺎ ... ﻳﺠﻲ ﻧﻬﺎﺭ ﻭﺗﻔﻀﻠﻲ ﻋﻠﻴﺎ ﻭﻻﺩ ﻃﺮﺍﺑﻠﺲ .. ﺑﺲ ﻣﺎﺗﻮﻗﻌﺘﺶ ﺑﺎﻟﺴﺮﻋﻪ ﻫﺪﻱ ...
ﺭﺍﻧﻴﺎ ﻭﺍﻗﻔﻪ ﻣﺼﺪﻭﻣﻪ ... ﻭﻗﺎﻋﺪﻩ ﺭﺍﻋﺸﻪ ﻣﻦ ﺍﻟﺨﻠﻌﻪ ...
ﺗﺸﺒﺢ ﻓﻴﻪ ﻭﻫﻮ ﻛﻴﻒ ﻟﻒ ﻭﻣﺸﻲ ... ﺗﺸﻮﻓﻠﻪ ﺑﻌﻴﻮﻥ ﻣﺪﻣﻌﻪ ..
ﻗﺎﻟﺖ ﻭﻫﻲ ﺗﺮﻋﺶ : ﻳﺎﺭﺑﻲ .. ﺷﻦ ﻧﺪﻳﺮ ﺗﻮﺍ ....
🌴🌴🌴🌴🌴🌴🌴🌴🌴🌴🌴🌴🌴🌴🌴
ﻫﻮ ﻗﺎﻝ ﻳﺒﻲ ﺣﺘﻰ ﻳﻘﺮﺍ ﺍﻟﻔﺎﺗﺤﻪ ...
ﻟﻌﻨﺪ ﻳﺘﻢ ﺍﻣﻮﺭﻩ ﻭﻳﺪﻳﺮ ﺍﻟﻌﺮﺱ ﻳﻜﻮﻥ ﻓﻲ ﺍﻟﺼﻴﻒ ..
ﺍﻟﺤﺎﺝ ﺭﻣﻀﺎﻥ ﺑﻌﺪ ﺗﻔﻜﻴﺮ : ﻣﺎﻓﻴﺶ ﻣﺸﻜﻠﻪ ...
ﻣﻴﻼﺩ : ﺧﻼﺹ ﻣﺎﻝ ﻧﺮﺩ ﻋﻠﻴﻪ .. ﻷﻧﻪ ﻗﺎﻝ ﻳﺒﻴﻬﺎ ﻧﻬﺎﺭ ...2\25
ﺍﻟﺤﺎﺝ ﺭﻣﻀﺎﻥ ﻫﺰ ﺭﺍﺳﻪ ﺑﺈﻳﺠﺎﺏ : ﺗﻮﻛﻠﻨﺎ ﻉ ﺍﻟﻠﻪ ...
ﺩﺍﺧﻞ ...
ﻓﺎﺗﺤﻪ !!
ﻓﺎﻃﻤﻪ : ﺍﻳﻪ ﻗﺎﻝ ﻳﺒﻲ ﻳﻘﺮﺍ ﻓﺎﺗﺤﻪ ﺗﻮ ﻭﺍﻟﻌﺮﺱ ﻓﻲ ﺍﻟﺼﻴﻒ ﺑﻴﻦ 8 ﻭ ...9 ﻭﺭﺍﻫﻮ ﻗﺎﻝ ﺑﻴﺠﻴﺐ ﺑﻴﺎﻥ ...
ﻏﺎﻟﻴﻪ ﺿﺤﻜﺖ ﺑﻔﺮﺡ : ﻣﺎﺷﺎﺀ ﺍﻟﻠﻪ ..
ﺣﻤﻴﺪﻩ ﻭﻉ ﻭﺟﻬﻬﺎ ﻋﻼﻣﺎﺕ ﺍﻟﻤﻔﺎﺟﺄﺓ ﻭﻫﻲ ﻣﺒﺘﺴﻤﻪ : ﺑﻴﺎﻥ !!
ﻓﺎﻃﻤﻪ ﺑﻀﺤﻜﻪ : ﺍﻳﻪ ﺑﻴﺎﻥ ... ﻭﻛﺎﻥ ﻗﺎﻝ ﺳﻴﺪﻙ ﺑﺎﻫﻲ ﻣﻌﻨﺎﻫﺎ ﺍﺧﺮ ﺷﻬﺮ 2 ﻛﻴﻒ ﻣﺎﻗﺎﻟﻲ ﻣﻴﻼﺩ ﻧﻬﺎﺭ ...25
ﺷﺒﺤﻮﺍ ﻟﺒﻌﻀﻬﻢ ﻭﻫﻤﺎ ﻣﺘﻔﺎﺟﺂﺕ ..
ﻭﻭﺟﻪ ﺣﻤﻴﺪﻩ ﻭﻟﻰ ﺍﺣﻤﺮ ﻭﻣﺶ ﻣﺴﺘﻮﻋﺒﻪ ....
ﻣﻦ ﻫﻮ ﻫﺪﺍ ﺍﻟﻠﻲ ﺩﺍﺭﺕ ﻓﻴﻪ ﻫﻜﻲ ....
ﻭﻗﺘﻬﺎ ﻣﺎﺍﻫﺘﻤﺘﺶ ﻫﻠﺒﻪ ﺍﻧﻬﺎ ﺗﺸﻮﻓﻪ .. ﺑﺮﻏﻢ ﺍﻥ ﻗﺎﻟﻮﻟﻬﺎ ﻳﺠﻲ ﻳﺪﻳﺮ ﻧﻈﺮﺓ ﺷﺮﻋﻴﻪ .. ﺭﻓﻀﺖ ﻷﻥ ﺑﺎﻟﻨﺴﺒﻪ ﻟﻴﻬﺎ ﺍﻟﻤﻬﻢ ﺭﺍﺟﻞ ﻛﻮﻳﺲ ..
ﻷﻧﻬﺎ ﻗﺒﻞ ﺣﺒﺖ ﺍﻟﺰﻳﻦ ﻭﻣﺎﺧﺪﺕ ﻣﻨﻪ ﺷﻲ ﻛﺎﻥ ﺍﻟﻐﺪﺭ ﻭﻭﺟﻊ ﺍﻟﻘﻠﺐ ...
ﻭﺑﻌﺪ ﻭﺻﻠﺖ ﻟﻬﺎﻟﻤﺮﺣﻠﻪ ﻣﻦ ﺍﻟﻨﻀﺞ ﺍﻟﻔﻜﺮﻱ ... ﺑﺪﺕ ﺗﻌﺮﻑ ﺗﻘﻴﻢ ﺍﻟﺮﺟﺎﻟﻪ ﺍﻛﺜﺮ ﻣﻦ ﻗﺒﻞ ...
......
ﺟﻴﺒﻴﻪ ﺑﺴﺮﻋﻪ ...
ﻣﺸﺖ ﻟﻠﺪﺍﺭ ﺗﺠﺮﻱ ... ﺧﺪﺕ ﺗﺰﺩﺍﻧﻪ ﻣﻦ ﻉ ﺍﻟﺰﻳﺎﻧﻪ ... ﻭﻃﻠﻌﺖ ﺗﺠﺮﻱ ﻣﺪﺗﻬﻮﻟﻪ ...
ﺻﺒﺮﻳﻪ : ﺷﻦ ﺗﺒﻲ ﺍﻟﻐﺪﻱ ..
ﺧﻠﻴﻔﻪ : ﺍﻱ ﺷﻲ ...
ﻭﻃﻠﻊ ﻭﺳﻜﺮ ﺍﻟﺒﺎﺏ ...
ﻧﺰﻝ ﻣﻦ ﻓﻮﻕ ... ﻭﻛﻴﻒ ﺟﺎﻱ ﺑﻴﻄﻠﻊ ﺧﺸﺖ ﻓﻲ ﻭﺫﻧﻪ ﻛﻠﻤﻪ ﻭﻗﻔﺎﺗﻪ ..
ﺍﻣﺎﻝ : ﻛﺎﻥ ﻧﻌﺮﻑ ﻭﻳﻦ ﺭﺍﻳﻬﺎ ﻫﺎﻟﺤﻤﻴﺪﻩ ﻫﺪﻱ ...
ﺳﻌﻴﺪﻩ : ﺑﻠﻲ ﺍﺣﺮﻑ ﻓﺤﻈﻬﻦ ... ﻻﻭﻓﻮﻗﻬﺎ ﻋﺰﺭﻱ ﻭﺍﻛﺒﺮ ﻣﻨﻬﺎ ﺏ 5 ﺳﻨﻴﻦ .. ﻭﻋﻨﺪﻩ ... ﺑﺨﻮﺕ ﺑﻨﺎﺕ ﺭﻣﻀﺎﻥ ﻣﺎﺭﻳﺖ ﻛﻴﻔﻪ ..
ﻋﺰﻳﺰﺓ : ﻳﻌﻄﻲ ﺍﻟﺤﻼﻭﺓ ﺍﻟﻠﻲ ﻣﺎﻋﻨﺪﺍﺵ ﺳﻨﻮﻥ ﻛﻴﻒ ﻣﺎﻳﻘﻮﻟﻮﺍ
" ﺍﻟﻤﺜﻞ ﻫﺪﺍ ﻣﺎﻳﺠﻮﺯﺵ ﻳﻨﻘﺎﻝ ﻓﻴﻪ ﺍﻋﺘﺮﺍﺽ ﻉ ﺍﻗﺴﺎﻡ ﺍﻟﻠﻪ .. ﻭﻃﺒﻌﺎ ﺍﻣﺘﺎﻝ ﺳﻌﻴﺪﻩ ﻭﺧﻮﺍﺗﻬﺎ ﻣﻦ ﻭﻳﻦ ﺑﻴﻌﺮﻓﻮﺍ ﺭﺑﻲ ."!
ﺧﻠﻴﻔﻪ ﺍﻧﺼﺪﻡ ﺑﻘﻮﺓ ﻭﻗﻠﺒﻪ ﻭﺟﻌﻪ ﻟﻴﻦ ﺧﻼﺹ ﻣﺶ ﻣﺼﺪﻕ ﺍﻟﻠﻲ ﺳﻤﻌﻪ ...
ﻃﻮﻝ ﻫﺎﻟﺴﻨﻴﻦ ﻭﺣﺐ ﺣﻤﻴﺪﻩ ﻣﺎﻧﻘﺺ ﻓﻘﻠﺒﻪ ﻏﺮﺍﻡ ﻭﺍﺣﺪ .. ﺑﺲ ﺍﻟﻠﻲ ﺩﺍﺭﻩ ﺣﺴﻦ ﺧﻮﻩ ﺧﻼﻩ ﺭﻏﻢ ﻋﻨﻪ ﻳﻘﻠﺐ ﺻﻔﺤﺘﻬﺎ ﻭﻳﺎﺧﺪ ﻏﻴﺮﻫﺎ ﺑﺶ ﻳﻨﺴﺎﻫﺎ ﺑﺲ ﻣﻊ ﺍﻷﺳﻒ ﻣﺎﻗﺪﺭﺵ ﻳﻨﺴﻰ 🍃💔
🍁🍁🍁🍁🍁🍁
ﺗﺒﻜﻲ ﺑﺎﻟﻌﺒﺮﺓ ﻭﺣﺪﺍﻫﺎ ﺻﺎﺣﺒﺘﻬﺎ ...
ﻧﻬﻰ : ﺑﺎﻫﻲ ﺍﻧﺘﻲ ﺣﺎﻭﻟﻲ ﺗﻔﻬﻤﻴﻪ ﻛﻞ ﺷﻲ .
ﺭﺍﻧﻴﺎ ﺑﺒﻜﻲ : ﺷﻦ ﺑﻨﻔﻬﻤﻪ .. ﺭﺍﻫﻮ ﺣﺘﻰ ﻟﻮ ﺑﻴﻔﻬﻤﻨﻲ ﻟﻘﻄﻪ ﺍﻧﻲ ﻧﻜﻠﻢ ﻭﺍﺣﺪ ﻓﻲ ﺍﻟﺘﻠﻴﻔﻮﻥ ﻫﺎﺩﻱ ﺑﺮﻭﺣﻬﺎ ﺗﺨﻠﻴﻪ ﻳﺴﻴﺒﻨﻲ ﻣﺮﺓ ﻭﺣﺪﻩ ..
ﻧﻬﻰ ﺗﻨﻬﺪﺕ : ﻭﺍﻋﺮ ﻫﻠﺒﻪ ﺭﻣﺰﻱ ﻫﺪﺍ ..
ﺭﺍﻧﻴﺎ : ﻭﺍﻋﺮ ﻭﺳﻜﺘﻲ .. ﺭﺷﻔﺖ .. ﻭﻣﺴﺤﺖ ﺩﻣﻮﻋﻬﺎ ﻭﺑﺪﺕ ﺗﻜﺘﺒﻠﻪ ﻓﺮﺳﺎﻟﻪ ﻭﺻﺎﺣﺒﺘﻬﺎ ﺗﺸﻮﻓﻠﻬﺎ ...
ﺭﺍﻧﻴﺎ : ﻭﻭﺍﺍﺍﻙ ﻳﺎﺭﺑﻲ ﻣﺶ ﻗﺎﺩﺭﺓ ﻧﻜﺘﺐ ..
ﺣﻄﺖ ﺗﻠﻴﻔﻮﻧﻬﺎ ﺟﻨﺒﻬﺎ ...
ﺧﺪﺕ ﺻﺎﺣﺒﺘﻬﺎ ﺍﻟﺘﻠﻴﻔﻮﻥ : ﻗﻮﻟﻲ ﺷﻦ ﺗﺒﻲ ﺗﺒﻌﺘﻲ ﻭﺍﻧﻲ ﻧﻜﺘﺐ ..
ﺭﺍﻧﻴﺎ ﺷﺒﺤﺘﻠﻬﺎ ﻭﻣﺴﺤﺖ ﺩﻣﻮﻋﻬﺎ ﻭﻗﺎﻟﺖ : ﺑﺎﻫﻲ ..
ﻭﺑﺪﺕ ﺗﺘﻜﻠﻢ ﻭﺻﺎﺣﺒﺘﻬﺎ ﺗﻜﺘﺐ .. ﻭﺑﻌﺪ ﻛﻤﻠﺖ ﺑﻌﺘﺘﻬﺎ ...
ﺭﺍﻧﻴﺎ : ﺷﻮﻳﻪ ﻧﻬﻰ ﻣﺎﺷﻴﻪ ﻧﺠﻴﺐ ﺍﻣﻴﻪ ﻭﻧﺠﻲ ..
ﻧﻬﻰ : ﻗﻌﻤﺰﻱ ﺍﻧﻲ ﻧﺠﻴﺒﻠﻚ ..
ﺭﺍﻧﻴﺎ : ﻻﻻ ﺍﻧﻲ ﻧﺠﻴﺒﻬﺎ .. ﺍﺻﻼ ﻧﺒﻲ ﻧﺘﺤﺮﻙ ...
ﻧﻬﻰ : ﺑﺎﻫﻲ ...
ﻣﺸﺖ ﺭﺍﻧﻴﺎ ....
ﻭﻧﻬﻰ ﺷﺒﺤﺖ ﻟﻠﺘﻠﻴﻔﻮﻥ ﻃﻠﻌﺖ ﻣﻦ ﺍﻟﺮﺳﺎﺋﻞ ... ﻭﻷﻧﻬﺎ ﻭﺣﺪﻩ ﻓﻀﻮﻟﻴﻪ ﺧﺸﺖ ﻉ ﺍﻟﺼﻮﺭ ....
ﻭﻗﻌﺪﺕ ﺗﺒﺤﺒﺶ ﻓﻴﻬﻢ ... ﻭﺗﺸﻮﻑ ﺻﻮﺭﺓ ﺭﻣﺰﻱ ﻃﺒﻌﺎ ﻫﻲ ﻣﺎﺭﺗﺎﺵ ﻗﺒﻞ ...
ﻭﺳﺎﻣﻌﻪ ﺑﻤﻮﺍﺻﻔﺎﺗﻪ ﻣﻦ ﺭﺍﻧﻴﺎ ﻭﻳﻦ ﺭﺕ ﺍﻟﺼﻮﺭﺓ ﺯﺑﻄﺘﺎﻩ ﻫﻮ ﺍﻟﻤﻼﻣﺢ ﺗﻨﻄﺒﻖ ﻋﻠﻴﻪ ﻫﻮ ....
ﺍﻧﺼﻤﺘﺖ ﻓﻴﻪ ﻭﻓﻲ ﻭﺳﺎﻣﺘﻪ ... ﻭﻣﺶ ﻣﺼﺪﻗﻪ ﺍﻟﻠﻲ ﺗﺸﻮﻑ ﻓﻴﻪ ..
ﻧﻬﻰ : ﺍﺣﻼ ﻣﻨﻬﺎ ﺑﻤﻠﻴﻮﻥ ﻣﺮﺓ ... ﺭﻓﻌﺖ ﺣﺎﺟﺒﻬﺎ ﻭﻗﺎﻟﺖ .. ﺣﺮﺍﻡ ﻓﻴﻬﺎ ...
ﺷﺒﺤﺖ ﺟﻴﻬﺔ ﺍﻟﻜﺎﻓﺘﻴﺮﻳﺎ ﻟﻘﺘﻬﺎ ﻃﺎﻟﻌﻪ ..
ﻃﻠﻌﺖ ﻣﻦ ﺍﻟﺼﻮﺭ ﻭﺣﻄﺖ ﺍﻟﺘﻠﻴﻔﻮﻥ ﻉ ﺗﺮﻛﻴﻨﻪ ...
ﻭﺻﻠﺖ ﻓﻴﻬﺎ ﺭﺍﻧﻴﺎ : ﻣﺎﺍﺗﺼﻠﺶ ..
ﻧﻬﻰ : ﻻﻻ ...
ﻗﻌﻤﺰﺕ ﺭﺍﻧﻴﺎ ﻭﺑﺪﺕ ﺗﺸﺮﺏ ﻓﻲ ﺍﻟﻤﻴﻪ ﻭﻫﻲ ﻣﻀﺎﻳﻘﻪ ..
ﻭﻧﻬﻰ ﺗﺸﺒﺤﻠﻬﺎ ﺑﻄﺮﻑ ﻋﻴﻨﻬﺎ ....
🍁🍁🍁🍁🍁
ﺍﻟﺴﺎﻋﻪ 5:00 ﻋﺼﺮﺍ ...
ﺗﻮ ﻳﻘﻮﻟﻮﺍ ﻋﻤﻪ ﻣﻴﺖ ﻭﻃﺎﻟﻊ ﻳﺪﻫﻮﺭ .
ﻋﻤﺎﺭ ﻭﻫﻮ ﺣﺎﺿﻨﻬﺎ ﻣﻦ ﺍﻟﺨﻠﻒ : ﻋﻤﻲ ﻣﺎﺕ ﺍﻟﻠﻪ ﻳﺮﺣﻤﻪ .. ﺷﻦ ﻛﺎﻥ ﻣﺎﺕ ﻧﻤﻮﺕ ﻣﻌﺎﻩ ..
ﺩﻻﻝ ﺑﻀﺤﻜﻪ : ﺑﻌﻴﺪ ﺍﻟﺴﻮ ﻟﻜﻦ ﻣﺎﻳﺠﻴﺶ ﻋﻴﺐ ..
ﺑﺎﺳﻬﺎ ﻣﻦ ﺧﺪﻫﺎ ﻭﻗﺎﻝ : ﻛﻠﻤﺔ ﻋﻴﺐ ﺍﻟﻠﻲ ﻣﺎﺗﺒﻲ ﺗﻄﻠﻘﻴﻬﺎ ﻫﺪﻱ ...
ﺩﻻﻝ : ﻫﻬﻬﻬﻬﻬﻬﻪ .. ﻣﺎﻫﻮ ﺣﻖ ﻋﻴﺐ ..
ﺷﺪ ﺫﻗﻨﻬﺎ ﺑﻴﺪﻩ ﻭﻟﻒ ﻭﺟﻬﻬﺎ ﻟﻴﻪ ﻭﺑﺎﺳﻬﺎ : ﺍﻟﻌﻴﺐ ﻉ ﺍﻟﻠﻲ ﻳﺪﻳﺮ ﺍﻟﻌﻴﺐ ﻳﺎﺳﻤﺤﻪ ... ﻭﻫﻲ ﺍﻟﺒﺴﻲ ﻣﺤﺮﻣﺘﻚ ﺧﻞ ﻧﻄﻠﻌﻮﺍ ..
ﺑﻌﺪ ﻋﻨﻬﺎ ﻭﻫﻲ ﺗﻀﺤﻚ ﻗﺎﻟﺖ : ﻭﺷﺎﺡ ﻣﺶ ﻣﺤﺮﻣﻪ .. ﻭﺣﺘﻲ ﺍﻟﻤﺤﺮﻣﻪ ﻗﻮﻟﻠﻬﺎ ﺷﺎﺭﺑﻪ ...
ﻗﺮﺻﻬﺎ ﻣﻦ ﺧﺪﻫﺎ : ﻻﺷﺎﺭﺑﻪ ﻻﻭﺍﻛﻠﻪ ﺍﻟﺒﺴﻲ ﻣﺤﺮﻣﺘﻚ ﻓﻴﺴﻊ ﺑﻼﻓﻠﺴﻔﻪ ..
ﻃﻠﻘﻬﺎ ﻭﻃﻠﻊ .. ﻭﺩﻻﻝ ﺗﺤﺴﺴﺖ ﺧﺪﻫﺎ ﻭﻫﻲ ﺗﻀﺤﻚ ...
🍁🍁🍁🍁🍁
ﻓﻲ ﺣﻮﺵ ﻋﺒﺪﺍﻟﻘﺎﺩﺭ ...
ﻫﻨﺪﺍ : ﺭﻳﺘﻲ ﻣﻦ ﻟﻤﺎ ﺭﻭﺡ ﻫﻮ ﻭﻳﺎﻫﺎ ﻣﻦ ﺍﻣﺲ ﻟﻠﻴﻮﻡ ﻻﺟﻮ ﻭﻻﺍﺗﺼﻠﻮﺍ ..
ﺳﻤﺮ : ﻣﺎﺗﻨﺴﻴﺶ ﺭﺍﻫﻢ ﻋﺮﺳﺎﻥ ..
ﻫﻨﺪﺍ ﺷﺒﺤﺘﻠﻬﺎ ﺑﺤﺪﻩ ﻉ ﺟﻨﺐ ..
ﺳﻤﺮ : ﻧﻘﻮﻟﻬﺎﻟﻚ ﻫﻨﺪﺍ ﺭﺍﻫﻮ ﻭﺍﻟﻠﻪ ﻣﺎﻙ ﻛﺎﺳﺒﻪ ﺣﺎﺟﻪ ﺑﺘﺼﺮﻓﺎﺗﻚ ﻫﺪﻱ ... ﻭﻣﻤﻜﻦ ﺗﻮﺩﺭﻱ ﺭﻭﺣﻚ ﻓﺴﺘﻴﻦ ﺩﺍﻫﻴﻪ ...
ﻫﻨﺪﺍ ﺷﺒﺤﺖ ﺍﻟﻘﺪﺍﻡ : ﻋﻤﺎﺭ ﻳﺎﺳﻤﺮ ﻣﺶ ﺣﻴﻜﻮﻥ ﻏﻴﺮ ﻟﻴﺎ ﻭﺣﻨﺪﻳﺮ ﺍﻟﻤﺴﺘﺤﻴﻞ ﺑﺶ ﻧﻜﺴﺒﻪ ﻭﻳﻜﻮﻥ ﻣﻌﺎﻱ ﻭﻟﻴﺎ ﺍﻧﻲ ﺑﺲ ..
ﺳﻤﺮ : ﺑﺎﻫﻲ ﺣﻘﻚ ﺭﺍﺟﻠﻚ ﻭﺗﺤﺒﻴﻪ .. ﻟﻜﻦ ﺑﺎﻟﻌﻘﻞ ﻳﺎﻫﻨﺪﺍ ﺑﺎﻟﻌﻘﻞ ...
ﻫﻨﺪﺍ ﺷﺒﺤﺘﻠﻬﺎ ﻭﺍﺑﺘﺴﻤﺖ ﺑﺮﻓﻌﺔ ﺣﺎﺟﺐ : ﺍﻛﻴﺪ ﺑﺎﻟﻌﻘﻞ ﻭﺍﻧﺘﻲ ﺗﻌﺮﻓﻴﻨﻲ ﻛﻮﻳﺲ ...
ﺳﻤﺮ ﺷﺒﺤﺖ ﺍﻟﻘﺪﺍﻡ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
: ﺳﻤﺮﺑﻮ ﺑﻜﺮ ﻳﺒﻴﻚ ..
ﺳﻤﺮ : ﺑﺎﻫﻲ ... ﻧﺎﺿﺖ .. ﻭﻣﺸﺖ ..
ﻭﻫﻨﺪﺍ ﺗﺠﺮﺏ ﺗﺘﺼﻞ ﺑﻌﻤﺎﺭ ﻭﻣﺎﻳﺮﺩﺵ ...
🍁🍁🍁🍁🍁🍁
ﻓﻲ ﺍﻟﺴﻴﺎﺭﺓ
ﺍﻟﻠﻲ ﻛﺎﻧﺖ ﻣﻈﻠﻤﻪ ...
ﻳﺪﻫﻮﺭ ﻫﻮ ﻭﻳﺎﻫﺎ .. ﻭﻣﺤﻤﺪ ﺣﺴﻦ ﺑﺄﻟﺤﺎﻧﻪ ﻭﺻﻮﺗﻪ ﻣﻌﺎﻫﻢ ...
ﻭﻫﻮ ﻳﺸﺎﺭﻙ ﻓﻴﻪ ﺍﻟﻐﻨﻲ ﻭﻳﺤﺮﻙ ﻓﻲ ﺍﻳﺪﻳﻪ ﻭﻣﺮﺓ ﻣﺮﺓ ﻳﺸﻮﻑ ﻟﺪﻻﻝ ... ﺍﻟﻠﻲ ﻛﺎﻥ ﻣﻴﺘﻪ ﺑﺎﻟﻀﺤﻚ ..
ﻋﻤﺎﺭ :
ﺳﻤﺤﻪ ﻭﺍﻟﺨﺎﻃﺮ ﻏﺎﻭﻳﻬﺎ ﻋﺎﺷﻖ ﻓﻴﻬﺎ ..
ﺩﻳﻤﺎ ﺩﻳﻤﺎ ﻭﺍﻟﻊ ﺑﻴﻬﺎ ...
ﺳﻤﺤﻪ ...
ﺳﻤﺤﻪ ﻭﺍﻟﺨﺎﻃﺮ ﻏﺎﻭﻳﻬﺎ ﻋﺎﺷﻖ ﻓﻴﻬﺎ
ﺩﻳﻤﺎ ﺩﻳﻤﺎ ﻭﺍﻟﻊ ﻓﻴﻬﺎ ..
ﺳﻤﺤﻪ ..
ﺧﺪﻱ ﻳﺪﻫﺎ ﻭﺑﺎﺳﻬﺎ ﻭﺑﻌﺪﻳﻦ ﻗﻌﺪ ﺷﺎﺩﻫﺎ ...
ﻭﺩﻻﻝ ﺗﺘﺄﻣﻞ ﻓﻴﻪ ...💓💓💓
ﻋﻤﺎﺭ :
ﺳﻤﺤﻪ ﻭﺍﻟﺨﺎﻃﺮ ﻭﻻﺗﻪ ﻃﻮﻝ ﺣﻴﺎﺗﻪ ﻃﻴﺮﻭﻫﻲ ﻋﺸﻪ ﻭﻣﺒﺎﺗﻪ
ﻫﻲ ﺳﺮ ﺍﺣﺰﺍﻧﻪ ﻭﺯﻫﺎﺗﻪ ﺭﻭﺣﻪ ﻓﻴﻬﺎ ﻭﻳﻦ ﻳﻐﻴﺐ ﺍﻳﺤﻦ ﻳﺠﻴﻬﺎ ..
ﻭﺭﺟﻊ ﺑﺎﺱ ﻳﺪﻫﺎ ..
ﻭﺩﻻﻝ ﺫﺍﻳﺒﻪ ﻓﻴﻪ 💓💓💓💓
ﻗﺼﺪﻱ ﻳﻌﻨﻲ ﻭﺍﻟﻠﻪ ﻣﻌﺬﻭﺭﺓ ﻣﺎﺗﻨﻼﻡ ﺍﻟﻠﻲ ﻃﺒﺖ ﻓﻐﺮﺍﻣﻪ ﺑﺴﺮﻋﻪ ﻫﻜﻲ ...
ﻉ ﻗﻮﻟﺖ ﺍﻟﺨﻠﻴﺞ ...
ﺍﻟﻠﻪ ﻳﻠﻮﻡ ﺍﻟﻠﻲ ﻳﻠﻮﻣﻬﺎ ...💓😭😥
🍁🍁🍁🍁🍁🍁
ﺭﺍﻧﻴﺎ ﺭﺍﻧﻴﺎ ﻧﻮﺿﻲ ﺑﺎﻟﻠﻪ ﻋﻠﻴﻚ ..
ﺭﺍﻧﻴﺎ ﻣﻦ ﺗﺤﺖ ﺍﻟﻐﻄﺎ : ﺧﻴﺮﻙ ..
ﺭﺑﺎﺏ : ﺑﻌﺘﻠﻲ ﺗﻮﺍ ﻃﺎﺭﻕ ﺭﺳﺎﻟﻪ ﻗﺎﻟﻲ ﺑﻴﺠﻴﺐ ﺍﻫﻠﻪ ﺍﻷﺭﺑﻌﺎ ﺍﻟﺠﺎﻳﻪ ﺷﻦ ﻧﺪﻳﺮ ..
ﺭﺍﻧﻴﺎ ﺑﺮﻏﻢ ﺍﻟﻠﻲ ﻫﻲ ﻓﻴﻪ ﻓﺮﺣﺖ ﻷﺧﺘﻬﺎ .. ﻧﺎﺿﺖ ﻗﻌﻤﺰﺕ : ﺍﻟﻠﻪ !!
ﺭﺑﺎﺏ ﺍﻧﺼﺪﻣﺖ ﻓﺸﻜﻞ ﺍﺧﺘﻬﺎ ﻛﻴﻒ ﻋﻴﻮﻧﻬﺎ ﻣﻨﻔﻮﺧﺎﺕ : ﺧﻴﺮﻙ ..
ﺭﺍﻧﻴﺎ : ﺷﻲ ﻏﻴﺮ ﺍﻟﻴﻮﻡ ﻣﺎﺟﺎﻭﺑﺘﺶ ﻛﻮﻳﺲ ..
ﺭﺑﺎﺏ : ﻣﻌﻠﻴﺸﻲ ﻳﺎﺑﻨﺘﻲ ﻗﺎﻋﺪﻩ ﻓﻲ ﺑﺪﺍﻳﺔ ﺍﻟﺴﻤﺴﺘﺮ ... ﺗﻌﻮﺿﻴﻬﺎ ..
ﺭﺍﻧﻴﺎ ﺍﺑﺘﺴﻤﺖ ﻣﺠﺎﻣﻠﻪ : ﺍﻳﻪ ﺻﺢ .. ﺍﻟﻤﻬﻢ ﺗﻮﺍ .. ﺷﻔﺘﻲ ﻛﻴﻒ ﻃﻠﻊ ﻣﻌﺎﻙ ﺻﺎﺩﻕ ﻭﺭﺍﺟﻞ ﺣﻖ ...
ﺭﺑﺎﺏ ﺍﺑﺘﺴﻤﺖ ﺑﻔﺮﺡ : ﺗﻮﺍ ﺗﻮﺍ ﺑﻨﻜﻠﻤﻪ ﻭﻧﺘﺎﻛﺪ ﻣﻨﻪ ﻭﻧﻤﺸﻲ ﻷﻣﻲ ﻃﻮﻝ ﻧﻘﻮﻟﻠﻬﺎ ...
ﺭﺍﻧﻴﺎ ﺑﻀﺤﻜﻪ : ﺑﺮﻱ ﺑﺴﺮﻋﻪ ﻛﻠﻤﻴﻪ ﺷﻦ ﺗﺮﺍﺟﻲ
ﺭﺑﺎﺏ ﻭﻗﻔﺖ ﻭﻫﻲ ﺗﻀﺤﻚ ﺑﺤﻤﺎﺱ .. ﻣﺸﺖ ﺻﻜﺮﺕ ﺑﺎﺏ ﺍﻟﺪﺍﺭ ﻭﻗﻌﻤﺰﺕ ﻓﺘﺮﻛﻴﻨﻪ ﻭﺍﺗﺼﻠﺖ ﺑﻄﺎﺭﻕ ..
ﺍﻣﺎ ﺭﺍﻧﻴﺎ ...
ﻭﻟﺖ ﺭﻗﺪﺕ ﻭﺗﻐﻄﺖ ﺑﺎﻟﺒﻄﺎﻧﻴﻪ ﻭﺭﺟﻌﺖ ﺗﺒﻜﻲ ...
🍁🍁🍁🍁
ﺷﻦ ﺭﻭﺡ ﺑﻴﻪ ..
ﻋﻤﺮ : ﻭﺍﻟﻠﻪ ﻣﺎﻧﻌﻠﻢ ﻋﻠﻴﻪ ... ﻛﻠﻤﻨﻲ ﻣﻊ 2 ﻗﺎﻟﻲ ﺭﺍﻧﻲ ﺭﻭﺣﺖ ﻣﻨﻲ ﻏﺎﺩﻱ ..
ﻋﻤﺎﺩ : ﺗﻮ ﻧﻜﻠﻤﻪ ﻭﻧﺸﻮﻓﻪ ...
ﻫﺎﻧﻴﺒﺎﻝ : ﻫﻲ ﻋﻤﺮ ﻣﻌﺎﺵ ﻓﻲ ﻭﻗﺖ ...
ﻋﻤﺮ : ﺍﻧﺰﻝ ﻭﺍﻧﻲ ﻻﺣﻘﻚ ..
ﻫﺎﻧﻴﺒﺎﻝ : ﻣﺎﺗﺒﻄﺎﺵ .. ﻛﻔﺎﺍﺍﻳﻪ ﺑﺎﻟﺴﻼﺍﺍﻣﻪ ..
ﻛﻔﺎﻳﻪ ﺟﺎﻳﻪ ﺗﺠﺮﻱ : ﺧﻮﺩ ﻫﺎﻙ ﻟﻠﺒﻨﺎﺕ ..
ﺧﺪﻱ ﻣﻨﻬﺎ ﺍﻟﻜﻴﺴﻪ ﻭﻫﻮ ﻳﻀﺤﻚ : ﺑﺎﻫﻲ ... ﻫﻲ ﺑﺎﻟﺴﻼﻣﻪ ..
ﻛﻔﺎﻳﻪ : ﻓﻲ ﺃﻣﺎﻥ ﺍﻟﻠﻪ ..
ﻃﻠﻊ ﻫﺎﻧﻴﺒﺎﻝ ...
ﻋﻤﺮ : ﺍﻟﻤﻬﻢ ﻛﺎﻥ ﻟﻘﻴﺖ ﺟﻬﺎﺯ ﺯﻳﻪ ﺣﺘﻰ ﻣﺴﺘﻌﻤﻞ ﻗﻮﻟﻲ ..
ﻋﻤﺎﺩ ﺑﻀﺤﻜﻪ : ﺗﻢ ..
ﻛﻔﺎﻳﻪ : ﺗﻠﻴﻔﻮﻥ ﺟﺪﻳﺪ ..
ﻋﻤﺮ ﺑﻀﺤﻜﻪ ﻭﻗﺎﻝ ﺑﺈﺳﺘﻌﺠﺎﻝ : ﺍﻳﻪ .. ﻫﻲ ﺑﺎﻟﺴﻼﻣﻪ .. ﻭﻃﻠﻊ ﻳﺠﺮﻱ ..
ﻭﻛﻔﺎﻳﻪ ﺻﻜﺮﺕ ﺍﻟﺒﺎﺏ ﻭﻫﻲ ﺗﻀﺤﻚ ...
ﻛﻤﻞ ﺑﺮﺍ ....
ﻛﻴﻒ ﻭﺻﻞ ﺑﺮﺍ ﺍﻟﺤﻮﺵ ...
ﻓﺎﺗﺖ ﺳﻴﺎﺭﺓ ﻗﺪﺍﻣﻪ ﻓﻴﻬﺎ ﻭﺣﺪﻩ ﺣﺲ ﺭﻭﺣﻪ ﻳﻌﺮﻓﻬﺎ ﻗﻌﺪ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﺩﺭﺳﺖ ﻗﺪﺍﻡ ﺍﻟﺤﻮﺵ ﺍﻟﻠﻲ ﺟﻨﺒﻬﻢ .. ﻭﻧﺰﻟﺖ ﺍﻟﻠﻲ ﻓﻴﻬﺎ ...
ﻗﻌﺪ ﻣﺮﻛﺰ ﻋﻠﻴﻬﺎ ... ﻭﻫﻲ ﺟﺎﻳﻪ ﺑﺘﺨﺶ ﺑﺎﻥ ﻋﻠﻴﻪ ﻭﺟﻬﻬﺎ ...
ﻛﻠﻜﺲ ﻫﺎﻧﻴﺒﺎﻝ ..
ﻫﻲ ﺍﻟﺘﻔﺘﺖ ﻟﻠﺴﻴﺎﺭﺓ ...
ﻋﻤﺮ ﺍﻧﺼﺪﻡ ...
ﻫﻲ ﺷﺒﺤﺘﻠﻪ ... ﺑﻌﺪﻳﻦ ﺷﺒﺤﺖ ﻟﻠﺒﺎﺏ ﻭﻓﺘﺤﺎﺗﻪ ﻭﺧﺸﺖ ..
ﻫﺎﻧﻴﺒﺎﻝ : ﻋﻤﻤﻤﻤﻤﺮ ...
ﻋﻤﺮﺑﺼﺪﻣﻪ : ﻫﻴﺎ ﻫﻲ ...
ﻣﺸﻲ ﻟﻠﺴﻴﺎﺭﺓ ﻓﺘﺤﻬﺎ ﻭﺭﻛﺐ ..
ﻫﺎﻧﻴﺒﺎﻝ : ﺑﻄﻞ ﺻﻨﻌﺘﻚ ﻫﺪﻱ ..
ﻋﻤﺮﻗﻌﺪ ﻳﺸﻮﻓﻠﻪ ﻭﻗﺎﻝ : ﻗﺼﺪﻙ ﺷﻔﺖ ﻟﻤﻦ ﻛﻨﺖ ﻧﺸﺒﺢ ..
ﻫﺎﻧﻴﺒﺎﻝ : ﻭﺍﻧﺖ ﺷﻨﻲ ﻳﻮﻗﻔﻚ ﻏﻴﺮ ﺍﻟﺒﻨﺎﺕ ..
ﻋﻤﺮ ﻫﺰ ﺭﺍﺳﻪ ﺑﺈﻳﺠﺎﺏ ...
ﻫﺎﻧﻴﺒﺎﻝ ﺣﺮﻙ ﺭﺍﺳﻪ ﺍﻳﻤﻴﻦ ﻭﻳﺴﺎﺭ : ﺭﺑﻲ ﻳﻬﺪﻳﻚ ... ﺷﻐﻞ ﺍﻟﺴﻴﺎﺭﺓ ﻭﺗﺤﺮﻙ ﻭﻋﻤﺮ ﻣﺎﺯﺍﻝ ﻣﺼﺪﻭﻡ ...
" ﻃﺒﻌﺎ ﻫﻮ ﻣﺶ ﺣﻴﻨﺴﻰ ﺷﻜﻞ ﻋﺮﻭﺑﻪ ﻣﺎﺗﻐﻴﺮﺵ ﻫﻠﺒﻪ .. ﻋﻜﺴﻪ ﻫﻮ ﺍﻟﻠﻲ ﻛﺒﺮ ﻭﺷﻜﻠﻪ ﺗﻐﻴﺮ ﻃﺒﻴﻌﻲ ﻣﺶ ﺣﺘﻌﺮﻓﻪ .."
🍁🍁🍁🍁🍁
ﺍﻟﺴﺎﻋﻪ 7:30 ﻣﺴﺎﺀﺍ ..
ﻓﻲ ﻏﺮﻓﻪ ﻓﻲ ﺍﺣﺪ ﻓﻨﺎﺩﻕ ﻣﺪﻳﻨﺔ ﻣﺼﺮﺍﺗﻪ ...
ﺍﻧﺖ ﻣﺠﻨﻮﻥ ﺭﺳﻤﻲ ..
ﻋﻤﺎﺭ ﻭﻫﻮ ﺣﺎﺿﻨﻬﺎ : ﻭﻣﻦ ﺟﻨﻨﻲ ﻏﻴﺮﻙ ..
ﺩﻻﻝ ﺿﺤﻜﺖ : ﺑﺎﻫﻲ ﻗﻠﺘﻠﻬﻢ ...
ﻋﻤﺎﺭ : ﺗﻲ ﺧﻴﺮﻙ ﺗﻔﻜﺮﻱ ﻓﻴﻬﻢ ﺍﻛﺜﺮ ﻣﺎﺗﻔﻜﺮﻱ ﻓﻴﺎ ﻣﺘﺰﻭﺟﺘﻴﻨﻲ ﺍﻧﻲ ﻭﻻﻫﻤﺎ ..
ﺩﻻﻝ ﺑﻌﺪﺕ ﻭﻫﻲ ﺗﺸﻮﻓﻠﻪ ﻭﺗﻀﺤﻚ : ﺗﻲ ﻣﺎﻫﻮ ﻋﻴﺐ ﻭﻣﺎﻳﺠﻴﺶ ..
ﻋﻤﺎﺭ : ﺍﻟﻌﻴﺐ ﺍﻟﻠﻲ ﻗﺎﺗﻠﻚ ﻫﺪﻯ ... ﻫﺎﺗﻲ ﺑﻮﺳﻪ ﻳﺎﺩﻋﻮﻩ ..
ﺩﻻﻝ ﺿﺤﻜﺖ ﺑﺨﺠﻞ ﻭﻗﺮﺑﺖ ﺑﺎﺳﺎﺗﻪ ...
ﻋﻤﺎﺭ : ﺍﺍﺍﺍﺍﺍﺍﺍﺍﺍﻩ ... ﻋﺴﺴﻞ ﻳﻨﺰﻝ ﻉ ﻗﻠﺒﻲ 💓💓💓...
ﺩﻻﻝ ﺗﺤﺸﻤﺖ ﻭﺣﻄﺖ ﻭﺟﻬﻬﺎ ﻓﺤﻀﻨﻪ ﻭﻋﻤﺎﺭ ﻳﻀﺤﻚ ﻋﻠﻴﻬﺎ .. ﻟﻒ ﺍﻳﺪﻳﻪ ﻋﻠﻴﻬﺎ ﻭﻫﻮ ﻳﻀﺤﻚ ﻭﻳﻘﻮﻝ : ﺗﺘﺤﺸﻢ ﺍﻟﻘﻄﻮﺳﻪ ﻣﺎﺯﺍﻟﺖ ﺍﻫﺎ ... ﺗﺘﺤﺸﻤﻲ ﻣﺎﺯﻟﺘﻲ ...
ﺩﻻﻝ ﺑﻀﺤﻜﻪ : ﺧﻨﻘﺘﻨﻲ ..
ﻋﻤﺎﺭ ﺯﺍﺩ ﺣﻀﻨﻬﺎ ﺑﻘﻮﺓ : ﻫﺎﺍﺍﺍﺍﺍﻩ ..
ﺩﻻﻝ ﻣﻴﺘﻪ ﺑﺎﻟﻀﺤﻚ ..
" ﺭﻭﻣﺎﻧﺴﻴﻪ ﻋﺴﻜﺮﻳﻪ "😂
ﺑﻌﺪ ﻋﻨﻬﺎ ﻭﻫﻮ ﻳﻀﺤﻚ ﻭﻗﺎﻝ : ﺟﻌﺎﻧﻪ ...
ﺩﻻﻝ : ﺍﻣﻤﻢ ... ﻫﻠﺒﻪ ..
ﻋﻤﺎﺭ : ﺧﻴﺮﻙ ﻣﺎﻗﻠﺘﻲ ...!! ﻫﻲ ﺻﺒﻲ ﺑﻌﺪ ﺍﺩﻭﺷﻲ ﺍﻟﺒﺴﻲ ﻭﻧﻨﺰﻟﻮﺍ ﻧﺎﻛﻠﻮﺍ ﻟﻮﻃﺎ .. ﻭﻻﺧﺎﻃﺮﻙ ﻧﻄﻠﻌﻮﺍ ..
ﺩﻻﻝ : ﻋﺎﺩﻱ ﺳﻮﺍ ﺳﻮﺍ ...
ﻋﻤﺎﺭ : ﻻﻳﺎﻗﻠﺒﻲ ﻣﺶ ﺳﻮﺍ ﺳﻮﺍ .. ﺍﻟﻠﻲ ﺧﺎﻃﺮﻙ ﻓﻴﻪ ﻧﺪﻳﺮﻩ ..
ﺩﻻﻝ ﺑﻌﺪﺕ ﻭﺷﺒﺤﺘﻠﻪ : ﺍﻣﻤﻢ ﺑﺎﻫﻲ ﻧﻄﻠﻌﻮﺍ ..
ﻋﻤﺎﺭ ﺍﺑﺘﺴﻢ : ﻧﻄﻠﻌﻮﺍ 💕...
ﻗﺮﺑﻬﺎ ﻟﻴﻪ ﻭﺑﺎﺳﻬﺎ ﻭﻃﻮﻝ ... ﺑﻌﺪﻳﻦ ﺑﻌﺪﻫﺎ ﻭﻗﺎﻝ : ﻫﻲ ﺻﺒﻲ ﻳﺎﻋﻤﺮﻱ 💓...
ﺩﻻﻝ ﺑﺎﻫﻲ ...
ﺧﺪﺕ ﺑﺎﻟﻄﻮﻫﺎ ﻣﻦ ﻉ ﺍﻟﻜﺎﻣﺪﻳﻨﻮ ﻟﺒﺴﺎﺗﻪ ﻭﻧﺎﺿﺖ ﻟﻠﺤﻤﺎﻡ ..
ﻭﻋﻤﺎﺭ ﻣﻌﺎﻫﺎ ﺑﻌﻴﻮﻧﻪ ﺍﻟﻤﺘﻴﻤﻪ 💓...
ﻗﺮﺑﻬﺎ ﻣﻨﻪ ﺧﻼﻩ ﻳﺰﻳﺪ ﻳﻌﺸﻘﻬﺎ ﺍﺿﻌﺎﻑ ﻣﻀﺎﻋﻔﻪ 💓💓💓...
ﺭﻥ ﺗﻠﻴﻔﻮﻧﻬﺎ ...
ﺧﺪﺍﻩ ﻣﻦ ﻉ ﺍﻟﻜﺎﻣﺪﻳﻨﻮ ﻟﻘﻲ ﺭﺍﻧﻴﺎ ﺍﻟﻤﺘﺼﻠﻪ .. ﺍﺑﺘﺴﻢ ﻭﺭﺩﻩ ﻟﻤﻜﺎﻧﻪ ..
🍁🍁🍁🍁🍁🍁
ﺭﺍﻧﻴﺎ ﺭﺷﻔﺖ ﻭﻗﺎﻟﺖ : ﻗﺪﺍﺵ ﻣﺤﺘﺎﺟﺘﻚ ﻳﺎﺩﻟﻮﻟﻪ ..
" ﺭﺍﻧﻴﺎﺍﺍ "
ﻣﺴﺤﺖ ﺩﻣﻮﻋﻬﺎ ﻭﻧﺎﺿﺖ .. ﻭﻃﻠﻌﺖ ﻣﻦ ﺍﻟﺪﺍﺭ .. ﻟﻘﺖ ﺍﻣﻬﺎ ﻭﺍﺧﺘﻬﺎ ﻓﻲ ﺍﻟﺼﺎﻟﻪ ... ﻭﻳﺒﺎﻧﻮﺍ ﻓﺮﺣﺎﻧﺎﺕ ..
ﺭﺍﻧﻴﺎ : ﺷﻨﻮ ..
ﺭﺑﺎﺏ ﺑﻔﺮﺣﻪ ﻭﺣﻤﺎﺱ : ﺧﺎﻟﺘﻲ ﺣﻤﻴﺪﻩ ﻓﺎﺗﺤﺘﻬﺎ ﻧﻬﺎﺭ 2|25
ﺭﺍﻧﻴﺎ ﺍﺑﺘﺴﻤﺖ ﺑﻔﺮﺡ : ﺍﻟﻠﻪ !!
ﺯﻳﻨﺐ ﺑﻀﺤﻜﻪ : ﻭﺑﺪﻳﺮ ﺑﻴﺎﻥ ﻧﻬﺎﺭ ﺍﻟﻔﺎﺗﺤﻪ ..
ﺭﺍﻧﻴﺎ ﺑﺪﻫﺸﻪ : ﻳﺎﺍﺍﺍﻩ .. ﺑﻨﻜﻠﻤﻬﺎ ...
🍁🍁🍁🍁
ﻫﺎﻟﻨﻬﺎﺭ ﺗﻤﻴﻨﺘﻪ ... ﻃﻠﺒﺖ ﺍﻟﻌﺎﻟﻲ ﻭﻟﻘﻴﺘﻪ ..
ﻋﻤﺎﺩ : ﻣﺒﺮﻭﻭﻭﻭﻙ ﻳﺎﻣﻴﻴﻴﻴﺪﺍ ...
ﺣﻤﻴﺪﺓ ﺑﻀﺤﻜﻪ : ﻋﻄﻴﻬﻠﻲ ﻳﺎﻛﻔﺎﻳﻪ ..
ﻛﻔﺎﻳﻪ ﺑﻀﺤﻜﻪ : ﻫﺎﻙ ..
ﺧﺪﻱ ﺍﻟﺘﻠﻴﻔﻮﻥ ﻣﻦ ﺍﻣﻪ ...
ﻋﻤﺎﺩ : ﺍﺍﺍﻫﺎﺍ ﻣﻴﺪﺍﺍﺍﺍ ... ﻛﺒﺮﺗﻲ ﻭﺑﻨﺰﻭﺟﻮﻙ ﻳﺎﺑﻨﻴﻪ
ﺣﻤﻴﺪﻩ ﺑﻀﺤﻜﻪ : ﻧﺒﻲ ﻫﺪﻳﻪ ﻣﺎﺩﺧﻠﻴﺶ ﺑﻴﻚ ..
ﻋﻤﺎﺩ : ﻭﺍﺍﺍﺍﺍﻙ .. ﻳﺎﻣﺼﺎﻟﺢ ﺍﻧﺘﻲ ﺗﻮ ﻧﺸﺪ ﺍﻟﻌﺮﻳﺲ ﻧﻬﺎﺭ ﺍﻟﻔﺎﺗﺤﻪ ﻭﻧﺼﺎﺭﺣﻪ ﺑﺤﻘﻴﻘﺘﻚ ﻗﺒﻞ ﻳﺤﺼﻞ ﻣﺴﻜﻴﻦ
ﺣﻤﻴﺪﻩ ﺑﻀﺤﻜﻪ ﻣﻊ ﺭﻓﻌﺔ ﺣﺎﺟﺐ : ﺍﻟﻠﻲ ﻳﺒﻴﻨﻲ ﻳﺮﺿﻰ ﺑﻴﺎ ﻛﻴﻒ ﻣﺎﺃﻧﻲ ﻭﻻ ﺑﻼﺵ ﻣﻨﻪ ..
ﻋﻤﺎﺩ : ﻫﻬﻬﻬﻬﻬﻬﻬﻬﻬﻪ ﺍﻗﻮﻯ ﻋﻠﻴﻬﻢ ﻳﺎﺻﻘﻊ ﺍﻧﺖ ...
🍁🍁🍁🍁🍁
ﻃﻠﻌﺖ ﺩﻻﻝ ﻣﻦ ﺍﻟﺪﻭﺵ ﻭﻫﻲ ﻻﺑﺴﻪ ﺩﺷﻤﺒﺮ ..
ﻋﻤﺎﺭ : ﻧﻌﻴﻤﺎ ﻳﺎﻋﻤﺮﻱ 💓
ﺩﻻﻝ ﺑﺄﺑﺘﺴﺎﻣﻪ : ﺍﻟﻠﻪ ﻳﻨﻌﻢ ﻋﻠﻴﻚ 💓
ﻋﻤﺎﺭ : ﻧﻌﺪﻱ ﻧﺨﺶ ﺑﺴﺮﻋﻪ ﻗﺒﻞ ﻳﺼﻴﺮ ﻓﻴﻬﺎ ﻛﻼﻡ ﺗﺎﻧﻲ ..
ﺿﺤﻜﺖ ﺩﻻﻝ ...
ﻭ ﻫﻮ ﻓﺎﻳﺖ ﻣﻦ ﺣﺪﺍﻫﺎ ﻗﺮﺹ ﺧﺪﻫﺎ ﻭﺿﺤﻚ ﻭﻗﺎﻝ : ﺍﻳﻪ ﺳﻤﺤﻪ ﺑﻨﺖ ﺧﺎﻟﺘﻚ ﺍﺗﺼﻠﺖ ﺑﻴﻚ ..
ﺩﻻﻝ : ﺭﺍﻧﻴﺎ ...
ﻋﻤﺎﺭ : ﺍﻳﻪ .... ﻭﺧﺶ ﻟﻠﺤﻤﺎﻡ ..
ﻟﺒﺴﺖ ﺩﻻﻝ .... ﻭﺑﻌﺪﻳﻦ ﺻﻠﺖ ﺍﻟﻠﻲ ﻓﺎﺗﻬﺎ ...
ﻭﺑﻌﺪ ﻛﻤﻠﺖ ﻧﺎﺿﺖ ﺧﺪﺕ ﺗﻠﻴﻔﻮﻧﻬﺎ ﻣﻊ ﻛﺎﻣﺪﻳﻨﻮ ﻭﺍﺗﺼﻠﺖ ﺑﺮﺍﻧﻴﺎ
🍁🍁🍁🍁🍁🍁
ﺍﻟﺴﺎﻋﻪ 8:00 ...
ﻓﻲ ﺻﺎﻟﺔ ﻣﻦ ﺍﻛﺒﺮ ﺻﺎﻻﺕ ﺍﻻﻓﺮﺍﺡ ﻓﻲ ﺍﻟﻌﺎﺻﻤﻪ ..
ﺣﻔﻠﺔ ﺍﺳﻤﺎ ﺯﺑﻮﻧﺔ ﻋﺮﻭﺑﻪ ...
ﻛﺎﻧﺖ ﻋﺮﻭﺑﻪ ﺗﺼﻮﺭ ﻓﻲ ﺯﻓﺔ ﺍﺳﻤﺎ ﺍﻟﻠﻲ ﻣﺪﺧﻠﻬﺎ ﻭﺍﺣﺪ ﻣﻦ ﺧﻮﺗﻬﺎ ...
ﻛﺎﻧﻮﺍ ﻳﻤﺸﻮﺍ ﻗﺪﺍﻣﻬﺎ ...
ﻭﻫﻲ ﺗﺼﻮﺭ ﻓﻴﺪﻳﻮ ﻭﺗﻤﺸﻲ ﻟﻠﺨﻠﻒ ...
ﻭﻫﻜﻲ ﻟﻌﻨﺪ ﻭﺻﻠﺖ ﺍﻟﻌﺮﻭﺳﻪ ﻟﻠﻜﻮﺷﻪ ...
ﻭﺟﻲ ﺩﻭﺭ ﺳﻤﻴﺮﺓ ﺍﻟﻠﻲ ﺑﺪﺕ ﺗﺼﻮﺭ ﺗﺎﺑﺖ ...
ﻭﻗﻔﺖ ﻋﺮﻭﺑﻪ ﻉ ﺗﺮﻛﻴﻨﻪ ... ﺟﺘﻬﺎ ﻭﺣﺪﻩ ..
" ﻣﻌﻠﻴﺸﻲ .."
ﺍﻟﺘﻔﺘﺖ ﻋﺮﻭﺑﻪ : ﺗﻔﻀﻠﻲ ..
ﻣﺠﺪﻭﻟﻴﻦ ﺑﺈﺑﺘﺴﺎﻣﻪ : ﻣﺴﺎﺀ ﺍﻟﺨﻴﺮ ..
ﻋﺮﻭﺑﻪ : ﻣﺴﺎﺀ ﺍﻟﻨﻮﺭ ..
ﻣﺠﺪﻭﻟﻴﻦ : ﺑﺼﺮﺍﺣﻪ ﺻﺎﺣﺒﺘﻲ ﺷﻜﺮﺕ ﻓﻴﻚ ﻭﻓﺸﻐﻠﻜﻢ ﻫﻠﺒﻪ .. ﻭﺑﺎﻟﺬﺍﺕ ﺍﻧﺘﻲ ...
ﻋﺮﻭﺑﻪ ﺑﻀﺤﻜﻪ : ﻟﺴﺎ ﻟﻬﻸ ﻣﺎﺷﺎﻓﺖ ﻧﺘﻴﺠﻪ ﺷﻐﻠﻨﺎ ﻋﻠﻴﻬﺎ ..
ﻣﺠﺪﻭﻟﻴﻦ : ﺍﻟﻠﻲ ﺳﻤﻌﺘﻪ ﺍﻧﻚ ﻛﻨﺘﻲ ﺗﺼﻮﺭﻱ ﻗﺒﻞ ..
ﻋﺮﻭﺑﻪ ﺿﺤﻜﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﺠﺪﻭﻟﻴﻦ : ﺍﻣﻤﻢ .. ﺑﺼﺮﺍﺣﻪ ﻋﺮﺱ ﻋﻤﺘﻲ ﺍﺧﺮ ..2 ﻭﻫﻲ ﺗﺒﻲ ﻭﺣﺪﻩ ﺯﻳﻚ ﻫﻜﻲ ﺗﺒﺪﻉ ﻓﺨﺪﻣﺘﻬﺎ ﻣﺶ ﻣﺠﺮﺩ ﻣﺼﻮﺭﺓ ﻭﺍﻟﺴﻼﻡ .. ﺍﻧﻲ ﻗﻠﺘﻠﻬﺎ ﺧﻠﻴﻬﺎ ﻋﻠﻴﺎ ﻭﻣﻦ ﻟﻤﺎ ﺣﻜﺘﻠﻲ ﻋﻨﻚ ﺍﺳﻤﺎ ﻭﺍﻧﻲ ﺣﻄﻴﺘﻚ ﻓﺒﺎﻟﻲ ..
ﻋﺮﻭﺑﻪ : ﺍﻣﻢ ... ﻣﺎﻋﻨﺪﻧﺎ ﻣﻮﺍﻋﻴﺪ ﻟﻬﻸ ﻣﻊ ﺯﺑﺎﻳﻦ ﺑﺸﻬﺮ ..2 ﺗﻤﺎﻡ ﻃﻠﻌﺖ ﻣﻦ ﺟﻴﺒﻬﺎ ﻛﺮﺕ ﺍﻟﻤﺤﻞ ﻭﻋﻄﺘﻬﻮﻟﻬﺎ ... ﺗﻔﻀﻠﻲ ..
ﻣﺠﺪﻭﻟﻴﻦ ﺧﺪﺍﺗﻪ ﻭﻫﻲ ﻣﺒﺘﺴﻤﻪ : ﺧﻼﺹ ﺑﻴﻨﺎﺗﻨﺎ ﺗﻠﻴﻔﻮﻥ ...
ﻋﺮﻭﺑﻪ ﺑﺈﺑﺘﺴﺎﻣﻪ ...OK:
ﻣﺠﺪﻭﻟﻴﻦ ﺍﺑﺘﺴﻤﺖ ﻭﻣﺸﺖ ..
ﻭﻋﺮﻭﺑﻪ ﺭﺟﻌﺖ ﺗﺸﻮﻑ ﻟﺰﻣﻴﻠﺘﻬﺎ ﻭﻫﻲ ﺗﺼﻮﺭ ...
🍁🍁🍁🍁🍁
ﺧﻼﺹ ﻳﺎﻋﻤﺮﻱ ﺧﻼﺹ ﺍﻧﻲ ﺗﻮﻧﺘﺼﺮﻑ ...
ﺭﺍﻧﻴﺎ ﺑﺒﻜﻲ : ﺑﺎﻟﻠﻪ ﻋﻠﻴﻚ ﺑﺴﺮﻋﻪ ﺩﻟﻮﻟﻪ ..
ﺩﻻﻝ ﺑﻀﻴﻖ : ﺗﻤﺎﻡ ﺣﺒﻴﺒﺘﻲ ﺻﻜﺮﻱ ﺗﻮﺍ ...
ﺻﻜﺮﺕ ... ﻭﺩﻻﻝ ﻃﻮﻝ ﺍﺗﺼﻠﺖ ﺑﺮﻣﺰﻱ ...
ﻧﺎﺩﻯ ﻣﺮﺓ ﻭﻧﺺ .. ﺍﻧﻔﺘﺢ ﺍﻟﺨﻂ ...
ﺩﻻﻝ : ﺍﻳﻮﻩ ﺭﻣﺰﻱ ... ﻭﻃﻠﻌﺖ ﻟﺼﺎﻟﺔ ﺍﻟﻐﺮﻓﻪ ...
ﻉ ﻃﻠﻌﺔ ﻋﻤﺎﺭ ﺍﻟﻠﻲ ﺳﻤﻌﻬﺎ ﻗﺎﻟﺖ ﺍﺳﻢ ﺭﻣﺰﻱ ...
ﻋﺎﺭﻓﻬﺎ ﺗﻜﻠﻢ ﻓﻲ ﻭﻟﺪ ﺧﺎﻟﻬﺎ ... ﻟﻜﻦ ﻫﻮ ﺍﻟﺤﺎﺟﺎﺕ ﻫﺎﺩﻱ ﺿﺪﻫﺎ ﻭﺑﻘﻮﺓ ..
ﻋﺼﺐ ﻉ ﺍﻷﺧﺮ ﻭﺑﺪﻱ ﻳﻐﻠﻲ ﻏﻠﻲ ...
ﻟﺒﺲ ﺣﻮﺍﻳﺠﻪ ﻭﻳﺤﺎﻭﻝ ﻳﺘﻤﺎﻟﻚ ﻧﻔﺴﻪ ﻭﻳﺘﺼﺮﻑ ﺑﺤﻜﻤﻪ ﺑﺪﻭﻥ ﻣﺎﻳﺰﻋﻠﻬﺎ ...
....
ﺭﻣﺰﻱ : ﺩﻻﻝ ﺍﻧﻲ ﺗﻮﺍ ﻓﻲ ﺍﻟﻌﻤﻞ ﻣﺶ ﻓﺎﺿﻲ ..
ﺩﻻﻝ ﺑﻌﺼﺒﻴﻪ : ﺑﺎﻫﻲ ﺑﺮﺍﺣﺘﻚ ﻳﺎﺭﻣﺰﻱ ﻟﻜﻦ ﻧﻘﻮﻟﻚ ﺍﻧﺖ ﻫﻜﻲ ﺣﺘﺨﺴﺮ ﺭﺍﻧﻴﺎ .. ﻭﺻﻜﺮﺕ ﻋﻠﻴﻪ ﻭﻫﻲ ﻣﻌﺼﺒﻪ ...
ﻭﻟﺖ ﻟﻠﺪﺍﺭ ﻟﻘﺖ ﻋﻤﺎﺭ ﻣﻘﻌﻤﺰ ﻉ ﺍﻟﻜﺮﺳﻲ ﻭﺣﺎﻁ ﺭﺟﻞ ﻉ ﺭﺟﻞ ﻭﻳﺸﻮﻑ ﻓﺘﻠﻴﻔﻮﻧﻪ ﺑﻌﺪ ﺧﺸﺖ ﺷﺒﺤﻠﻬﺎ ﺑﺤﺪﻩ ﻭﻗﺎﻝ : ﻓﻤﻦ ﻛﻨﺘﻲ ﺗﻜﻠﻤﻲ ..
ﺩﻻﻝ ﻻﺣﻈﺖ ﺍﻥ ﻭﺟﻬﻪ ﺑﺎﻳﻨﻪ ﻓﻴﻪ ﻣﻼﻣﺢ ﺍﻟﻐﻀﺐ : ﻭﻟﺪ ﺧﺎﻟﻲ ﺭﻣﺰﻱ ..
ﻋﻤﺎﺭ ﻧﺰﻝ ﻋﻴﻮﻧﻪ ﻟﺘﻠﻴﻔﻮﻧﻪ ﺭﻛﺰ ﻉ ﻛﻢ ﺳﻮﺭﻳﺘﻪ ﻣﻔﺘﻮﺡ ... ﻧﺎﺽ ﻭﻗﻒ ﻗﺪﻣﻠﻬﺎ ..
ﻭﻫﻮ ﻳﺒﻄﻢ ﻓﻲ ﻛﻢ ﺳﻮﺭﻳﺘﻪ ﻗﺎﻟﻠﻬﺎ : ﺍﺳﻤﻌﻲ ... ﻭﻻﺩ ﺧﻮﺍﻟﻚ ﺧﺎﻻﺗﻚ ﻭﻻﺩﻋﻤﺎﻣﻚ ﻋﻤﺎﺗﻚ .. ﻧﺰﻝ ﺍﻳﺪﻳﻪ ﻭﺣﻄﻬﻢ ﻓﺠﻴﻮﺑﻪ .. ﻋﻼﻗﺘﻚ ﺑﻴﻬﻢ ﺗﻨﻘﻄﻊ .... ﻻﻧﺒﻴﻚ ﺗﻜﻠﻤﻴﻬﻢ ﻭﻻﺗﺴﻠﻤﻲ ﻋﻠﻴﻬﻢ .... ﺍﻧﻲ ﺍﻟﺠﻮ ﻫﺪﻯ ﻣﺎﻧﺤﺒﻪ ﻭﻻ ﻋﻨﺪﻱ ﻓﻴﻪ ﻳﺎﺑﻨﺖ ﺍﻟﻨﺎﺱ .
ﺩﻻﻝ ﻭﻫﻮ ﻳﺘﻜﻠﻢ ﻛﺎﻧﺖ ﺗﺴﻤﻌﻠﻪ ﺑﺄﻧﺘﺒﺎﻩ ﻭﻣﺮﻛﺰﺓ ﻉ ﻣﻼﻣﺢ ﻭﺟﻬﻪ ﺑﻌﺪ ﻛﻤﻞ ﻛﻼﻣﻪ ...
ﺍﺑﺘﺴﻤﺖ ﻭﻗﺎﻟﺖ : ﺣﺎﺿﺮ ...❤
ﻫﻮ ﻫﺪﻱ ﺑﻌﺾ ﺍﻟﺸﻲ .. ﺑﺲ ﻗﺎﻋﺪﻩ ﺍﻟﺤﻜﺎﻳﻪ ﺣﺎﺭﻗﺎﺗﻪ ﻗﺎﻝ : ﻫﻲ ﺍﻃﻠﻌﻲ ﻓﺎﺕ ﻣﻦ ﺣﺪﺍﻫﺎ .. ﻫﻲ ﺷﺪﺕ ﻳﺪﻩ ..
ﺣﻀﺖ ﺫﺭﺍﻋﻪ ﻭﺣﻄﺖ ﺭﺍﺳﻪ ﻉ ﻛﺘﻔﻪ ﻭﻗﺎﻟﺖ : ﺍﺳﻔﻪ ﻋﻤﺎﺭﻱ 💓
ﺍﺑﺘﺴﻢ ﻭﻫﻮ ﺭﺍﻓﻊ ﺣﺎﺟﺒﻪ : ﻣﺎﻧﻘﺪﺭﺵ ﻧﻘﺎﻭﻡ ﺟﻮ ﺍﻟﻘﻄﺎﻃﻴﺲ ﺍﻟﻠﻲ ﺩﻳﺮﻱ ﻓﻴﻪ ..
ﺿﺤﻜﺖ ﻭﻗﺎﻟﺖ : ﻣﻌﺎﺵ ﺯﻋﻼﻥ ..
ﻗﻠﺪﻫﺎ ﻭﻗﺎﻝ : ﻣﻌﺎﺵ ﺯﻋﻼﻥ ..
ﺿﺤﻜﺖ ﺩﻻﻝ .. ﻭﻗﺮﺑﺖ ﺑﺎﺳﺎﺗﻪ ..💓 ﻭﺑﻌﺪﺕ
ﻋﻤﺎﺭ ﻭﻫﻮ ﻳﺘﻜﻠﻢ ﺑﻴﺪﻩ : ﺗﻮ ﺍﻧﺘﻲ ﺗﺒﻲ ﻧﻨﺰﻟﻮﺍ ﻭﻻ ﻧﻘﻌﺪﻭﺍ ﻭﻻﻛﻴﻒ ﻣﺎﻓﻬﻤﺘﺶ ﺍﻟﻘﺼﺔ ...
ﺩﻻﻝ : ﻫﻬﻬﻬﻬﻬﻬﻪ ... ﻻﺍﻻ ﻧﻄﻠﻌﻮﺍ ﻧﻄﻠﻌﻮﺍ .. ﻫﻴﺎ ..
ﺿﺤﻚ ﻭﺷﺪ ﻳﺪﻫﺎ ﻭﻃﻠﻌﻮﺍ ﻭﻣﺎﺯﺍﻟﻮﺍ ﻳﻬﺪﺭﺯﻭﺍ ﻭﻳﻨﺎﺷﺒﻮﺍ ﻓﻲ ﺑﻌﺾ 💓💓
ﻭﻫﻨﺪﺍ ﻣﺎﺯﺍﻝ ﺗﺘﺼﻞ ﻭﺗﻌﺎﻭﺩ ...
ﻫﻨﺪﺍ ﺑﻌﺼﺒﻴﻪ ﺗﺘﻮﻋﺪ : ﺑﺎﻫﻲ ﻳﺎﻋﻤﺎﺭ ﺑﺎﺍﺍﺍﻫﻴﻴﻲ ....
🍁🍁🍁🍁🍁
ﻃﺮﺍﺑﻠﺲ ..
ﻓﻲ ﺍﺣﺪ ﺍﻟﻤﻘﺎﻫﻲ ...
ﺷﺎﻭﺭﻣﺎ ﺯﻳﺎﺩﻩ ﻫﺮﻳﺴﻪ؟
: ﺍﻳﻪ ...
: ﺗﻔﻀﻞ ﺧﻮﻱ ...
ﺧﺪﻱ ﻣﻨﻪ ﺍﻟﻜﻴﺴﻪ ﻭﻣﺸﻲ ...
ﺭﻥ ﺗﻠﻴﻔﻮﻧﻪ ﻭﻫﻮ ﻳﻤﺸﻲ ﻭﻗﻒ ﻭﻃﻠﻌﻪ ﻣﻦ ﺟﻴﺐ ﻛﺒﻮﻃﻪ ﻭﺭﺩ ﻃﻮﻝ ..
: ﺍﻳﻮﻩ ..
: ﻫﺎﻳﻞ ... ﺑﻨﻘﻮﻟﻚ .. ﻃﻠﻌﺖ ﻣﺮﻭﺣﻪ ﻟﻴﻬﺎﺷﻬﺮﻳﻦ ﺗﻼﺗﻪ ﻭﻫﻲ ﻭﺍﻣﻬﺎ ﻭﺍﺧﺘﻬﺎ ﺳﻜﻨﻮﺍ ﻓﻲ ﺣﻲ ﺍﻷﻧﺪﻟﺲ ... ﻭﻋﻨﺪﻫﺎ ﻣﺼﻮﺭ ﺗﺨﺪﻡ ﻓﻴﻪ ﺳﻤﺎﻩ ﺷﺠﺮ ﺍﻟﺪﺭ ﻓﻲ ﻧﻔﺲ ﺍﻟﻤﻨﻄﻘﻪ ..
ﺍﺑﺘﺴﻢ ﻫﺎﻳﻞ ﻉ ﺟﻨﺐ ﻭﻗﺎﻝ : ﺗﻢ ﺗﻢ .... ﺗﺸﺎﻭ .. ﻭﺻﻜﺮ ﻋﻠﻴﻪ ..
ﻭﻛﻤﻞ ﻃﺮﻳﻘﻪ ﻭﻫﻮ ﻳﻘﻮﻝ : ﺷﺠﺮﺓ ﺍﻟﺪﺭ ....
.... ﻳﺘﺒﻊ ....
