My Drummer Boy [AVAILABLE IN ALL BOOKSTORES NATIONWIDE!]

Chapter 64

Chapter 64

Luna

“JUSTIN!” Tumayo ako sa sofa at niyakap siya sa likod.

     Pilit ko siyang hinihila palayo kay Jessie. “Ano’ng nangyayari dito?!” sigaw ni Steff.

     “Jessie!” sigaw ni Kat at tumakbo silang tatlo nina Kevin papunta sa amin.

     Pumagitna si Kevin kina Jessie at Justin. “Mga pare, ano ba?! Bakit ba nag-aaway kayo?” Pero walang kumibo sa kanila. Bumitaw ako sa pagkakayakap ko kay Justin. Nangingilid na din ‘yung luha ko. Ayokong nakikita silang nag-aaway. Para kasing nasasaktan din ako.

      “Oh my God, Jessie!” Lumuhod si Kat sa tabi ni Jessie at hinawakan ‘yung mukha niya. Nagkaroon ng crack ‘yung lower lip niya dahil sa pagkakasuntok ni Justin.

     “Mabuti pa kung umalis ka nalang, pare,” sabi ni Justin habang mabigat ‘yung paghinga.

     Tumayo naman si Jessie at nakipagtitigan kay Justin. Nakita ko ‘yung pagsusukatan nila ng lakas. Halata ko din na parang nagpipigil lang din si Jessie.

     Pinunasan ni Jessie ‘yung dugo sa labi niya at lumakad paalis. “Jessie! Wait!” Hinabol naman siya ni Kat. Naiwan kaming apat na nakatingin sa bukas na pintuan kung saan lumabas silang dalawa.

     “Ano ba kasing nangyari?” Tiningnan kami ni Steff.

     “Justin.” Mangiyak-ngiyak na ako. Hinawakan ko siya sa braso pero inalis niya agad ‘yon. Tumalikod siya at umakyat sa kwarto ni Kevin. Nasaktan ako sa ginawa niya. Pero sa totoo lang, kasalanan ko din naman kasing lahat ‘to.

     Hindi ko masisisi si Justin kung nagagalit man siya ngayon. Naiintindihan ko ‘yung sakit na nararamdaman niya. Kung ako man ‘yon ay ganito din ‘yung magiging reaction ko. Naramdaman ko na kasi ‘yung sakit na makita ‘yung mahal mong may kahalikang iba.

     Tulad noong nakita ko si Jessie at Sarah na magkahalikan doon sa room. Parang unti-unting dinudurog ‘yung puso ko noon. Gusto kong pumikit pero pilit ibinubukas noong utak ko ‘yung mga mata ko. Alam kong nasasaktan ako noon pero hindi ko magawang iiwas ‘yung tingin ko.

      “K-Kebs, pwede bang... Pwede bang mahiram ‘yung susi mo sa kwarto?” mahina kong sabi.

     “Ano ba kasing nangyari?”

     “Babe.” Hinawakan ni Steff si Kevin sa balikat. “Huwag muna tayong magtanong. Let them talk first.”

     Huminga si Kevin. “Sige. Basta ayusin niyo ‘yan, ha?”

     Pinilit kong ngumiti at tumango. Dinukot ni Kevin ‘yung susi sa bulsa niya. Kinuha ko ‘yon at nagpasalamat. Tumakbo na ko agad papunta sa kwarto ni Kevin. Alam kong naka-lock ‘yung pinto pero sinubukan ko pa rin.