زياد :يعنى انتى لو حبيتى واحد هتقوليله
الاء :اه
زياد :عادى كده هتقوليله
الاء :بص هو يمكن مش هقولهاله واضحة صريحة بس على الاقل مش هدارى حبى او يعنى مش هبينله العكس اللى هو ابقى بفكر فيه دايما وهموت واتكلم معاه واما اشوفه اتجنبه كأنه عنده جرب ايه اللى يخلى حد عنده بتلاتة جنيه عقل يعمل كده
زياد :فى خلق اسمه الحياء عند البنات بيمنعها تبين مشاعرها فبتخبيها
الاء :ده على اساس انى محمدين يعنى ما انا بنت يا ابنى حيائى يمنعنى اقوله ماشى انما اعامله باحتقار ليه وفى الاخر اتفاجئ لما الاقيه حب وخطب غيرى لانه يا عينى مفكرنى بكرهه وده بسبب المعاملة الزفت اللى بعامله بيها
بص هو كل واحد وليه طريقته بس انا عموما مشاعرى بتبان عليا سواء مشاعر حلوة او وحشة وشى مراية قلبى يعنى اللى بتشوفه على وشى هو اللى جوا قلبى
بس ثانية واحدة انت بتسألنى ليه زيزو انت فى واحدة بتعاملك وحش وانت مفكرها بتحبك وعلشان كده بتسألنى
زياد :مش بالظبط هو..
الاء :طب والله شكل واحدة كارفاك وانت فسرت ده بانها يا عينى دايبة فى دباديبك دبدوب دبدوب صح
زياد :الله ما يمكن تكون كده فعلا
الاء وهى بتضحك :وممكن برضه تكون بتكرهك ومش طيقاك عادى
زياد :وتكرهنى ليه وهى متعرفنيش
الاء :وتحبك ليه وهى متعرفكش
زياد :هو انتى لو مقفلتيهاش فى وشى يجرالك حاجة هتتخنى يعنى مش هتنجحى السنة دى طيب
الاء :هو انت عينك منها
زياد :لا
الاء :اومال شاغل مخك بيها ليه وعامل الفيلم ده كله اه غرورك كراجل نقح عليك صح ازاى بنت تكون مش طيقاك المفروض تمشى فى الشارع المعجبات يترمو تحت رجليك يا رشدى اباظة عصرك واوانك انت
زياد :انتى هتحبى سيد قشطة مش راجل بكرهك ده للرجالة
الاء :مش كره بس انت كده خفيف خليك تقيل يا زيزو متشغلش عقلك غير بالحاجات المهمة بس
يعنى هى لو طلعت فعلا بتحبك وبتدارى حبها بمعاملتها دى ليك وانت مش بتحبها وهى مش فارقالك هتتبسط يعنى لما تكسر قلبها
زياد :لا بس تكون مش طيقانى بجد ليه وانا مش فاكر انى عملتلها حاجة
الاء :يمكن عملت وناسي ويمكن تكون معملتش والمشكلة فيها معقدة من الرجالة او ليها تجربة وحشة مع واحد شكلك وانت بتفكرها بيه الاسباب ممكن تكون كتير متشغلش بالك ونفض
زياد :ماشى هنفض
الاء :ذياد انت عارف انى عارفة حدودى كويس ومش هحب واروح اقوله والكلام ده
زياد :عارف يا لولو متقلقيش
الاء :انا مش سايبة فرصة لنفسي احب مبسمحش لحد يقرب منى اصلا لما يجى اللى يطلبنى من اهلى وقتها ابقى احب واعبر بقى ويبقي حقى
زياد وهو بيضربها على راسها من ورا :لاحظى انك بتكلمى اخوكى الكبير يا حلوفة انتى
الاء وهى بتضحك :يا عم ما هيبقى جوزى بقى وكمان مكانوش سنة وتسع شهور فرق بنا ذاللنى بيهم
بعد اسبوعين
زياد :لا البت دى مجنونة او واقعة على دماغها وهى صغيرة
الاء :طيب داخل عليا اوضتى قولى اذيك يا لولو وحشتينى يا لولو انما ايه الداخلة اللى داخلها عليا دى مش فاهمة
زياد :بنى ادمة مستفزة لاقصى درجة
الاء :هببت ايه بس البنية
زياد :كانت فى الاسانسير وجيت انا واتنين ستات وراجل تخيلى نزلت منه لمجرد انى ركبته انتى متخيلة
الاء :ما يمكن علشان كنتو كتير فى الاسانسير كانت بتخف الحمل او نسيت حاجة رجعت تجيبها
زياد :لا بسببى نزلت انا متأكد
الاء :كلامك عنها بقى كتير واخد بالك
زياد :حارقة دمى يا الاء
الاء :بعد الشر على دمك من الحرقة يا حبيبى بس متكبرش الموضوع انت بجد ممكن تكون فاهمها غلط
زياد :معتقدش
بعد شهر
الاء :ايه الجنان ده
زياد :جنان ليه
الاء :بتقولى خدت رقم والدها وهتروح تتقدملها وبتقولى جنان ليه ده انت متعرفش اسمها يا زياد
زياد :لا عرفته النهاردة اسمها هدير
الاء :لا مدام عرفت اسمها يبقى حقك تخطبها طبعا
زياد :انتى بتهزرى
الاء :انت اللى بتهزر زياد دخول بيوت الناس مش بالساهل الحاجات دى مش لعب
زياد :انتى تعرفى كده عن اخوكى برضه
الاء :طيب ايه اللى حصل خلاك تعمل كده
زياد :كانت خارجة من مكتبها شافتنى واقف فى الطرقة اللى بين المكاتب مع واحد صاحبى رجعت تانى قعدت على مكتبها ومخرجتش
الاء :وانت طبعا مستحملتش روحت رايح ضاربها قلمين على شلوتين كومتها وبعدين حسيت انك افورت فقولت تاخد رقم ابوها علشان تصلح غلطتك
زياد :بس يا تافهة
الاء :خلاص هخرس كمل طيب
زياد :معرفش لقتنى روحت عند مكتبها وطلبت منها رقم والدها
الاء :وهى ادتهولك
زياد :سكتت كده وشكلها مكنتش هتديهولى بس واحدة كبيرة شغالة معاها فى المكتب قالتلها تديهولى خدته منها وجيت اخرج افتكرت انى لسه معرفش اسمها ورجعت سألتها عليه
الاء :تخيل تتصل بابوها تطلب منه ايد بنته اللى انت مش عارف اسمها شكلك هيبقى مسخرة
زياد :وادينى عرفته هدير هدير وزياد تصدقى لايقين على بعض
الاء :المهم احنا هنروح معاك انا عايزة اشوفها
زياد :لا اول مرة هروح لوحدى بس بعدها لما نيجى نتفق بقى هتيجى معايا انتى وبابا وماما
الاء :ما هى ممكن ترفض يا ناصح اشوفها ازاى انا وقتها
زياد :ترفض...تفتكرى هترفض
الاء :مش عارفة انت ادرى
زياد :مش عارف برضه ربنا يستر
الاء :هو انت هتضايق لو هى رفضت
زياد :هضايق اه
الاء :هتضايق علشان فكرة الرفض نفسها اللى هو لو اى واحدة غيرها رفضتك كنت برضه هتضايق ولا هتضايق علشان هى بالذات رفضتك
زياد :مش عارف بس كل اللى اعرفه انى هضايق لو هى رفضتنى
الاء :لو خير لبعض ان شاء الله ربنا يجمعكم يا حبيبى
بعد يومين
الاء :ها احكيلى بقى حصل ايه
زياد :عادى
الاء :عادى يعنى ايه
زياد :كانت بتتعامل عادى واحدة متقدملها عريس بتتكلم بعقل وهدوء بتسال فى حاجات مهمة لابسة فستان حلو
عادى محصلش حاجة مختلفة
الاء :طيب ومسألتهاش عن تصرفاتها الغريبة بتاعت قبل كده
زياد :معرفتش اسلوب تعاملها مدانيش فرصة واكيد كانت هتقولى بيتهيألك
الاء :ما يمكن بيتهيألك يا زياد فعلا
زياد :لا انا متأكد دول مش موقف ولا اتنين دى مواقف كتير يا الاء مستحيل تكون كلها تهيؤات يعنى
الاء :عموما يا زيزو يا خبر دلوقتى بفلوس بكرة ان شاء الله توافق ويبقى ببلاش
بعد تلت ايام
الاء وهى بتضحك :لا مش مصدقة وافقت بجد
زياد :وافقت طبعا هى تطول اصلا انتى مستقلية باخوكى ولا ايه
الاء :يا زيزو يا جااااامد
وروحنا انا وبابا وماما وابيه نادر اخويا الكبير مع زياد انا عندى اخين ابيه نادر وده متجوز ومخلف وبعدين زياد وبعدين انا
المهم روحنا واتفقنا على كل حاجة وحددنا ميعاد ننزل نجيب الشبكة ويوم تانى للخطوبة
هدير بنت جميلة وعادية تصرفاتها عادية بتتعامل معانا بأدب وزوق شكلها مكسوف شوية عروسة بقى بس محستهاش مضايقة او مش طيقانا او مش طايقة زياد
يمكن زى ما قولت لزياد هو كان بيتهيأله
بعد خطوبتهم بيومين كنت بتكلم مع زياد كالعادة
الاء :يا مفترى تانى يوم خطوبتكم تسألها عن تصرفاتها قبل كده معاك ده وقته يعنى
زياد :ما هى قالتلى كده برضه
الاء :قالتلك ايه بالظبط
زياد :قالتلى مش هتقدر تجاوب سؤالى ده دلوقتى مش وقته بس بعدين نتكلم عنه وتجاوبنى
الاء باستغراب :ايه ده يعنى انت مكنش بيتهيألك فى اجابة وهتقولهالك بس بعدين
زياد :قولتلك متأكد ان فيها حاجة وانى مش بيتهيألى
الاء :اخو خطيبتك حط علينا النهاردة فى السيكشن طرد نص الدفعة وغيبهم الدنيا فيها تمنية مليار نسمة واكتر وانت دونا عنهم كلهم روحت خطبت اخت المعيد بتاعى الدنيا دى ضيقة اوى يا جدع
زياد :وانتى اتطردتى
الاء :لا طبعا
زياد :علشان اختى
الاء :لا علشان حضرت السكشن فى ميعادى وكنت عاملة الشيت كمان عيب عليك اختك مش بتاعت وسايط واخو خطيبة اخويا وبتاع مش اخلاقى يا زيزو
زياد :عاش يا لولو ربنا يكملك بعقلك يا حبيبتى
بعد اسبوع
اميرة :مفرجتينيش على صور خطوبة اخوكى صحيح
الاء :نسيت خودى يا ستى اتفرجى
اميرة وهى بتاخد منها الموبايل :الله فستانك حلو اوى..وخطيبة اخوكى زى القمر..ثانية واحدة دكتور مازن بيعمل ايه فى الصورة
الاء :طلع اخو هدير خطيبة زياد اخويا
اميرة :ومالك بتتكلمى كده كأنها حاجة عادية ومقولتليش ليه قبل كده
الاء :علشان هى حاجة عادية كمان اميرة مش عايزة حد يعرف الموضوع مش مستاهل الله يباركلك متسيحيش مش عايزة كلام فاضى من البنات
اميرة :ماشي يا ستى بس خلاص محدش قدك بقالك ضهر فى الكلية
الاء وهى بتضحك :وهو دكتور مازن بتاع الكلام ده برضه طيب هى ديتها اتكلم بس فى سيكشن وهو هيطردنى وهيحرمنى من حضور السكاشن بقية السنة
اميرة وهى بتضحك :قادر ويعملها الصراحة برضه مش هتيجى معايا
الاء :برضه انتى اللى مصرة تروحى اميرة علشان خاطرى متعمليش كده
اميرة :وانا هعمل ايه ابن عمتى وبنحب بعض من اكتر من سنة وهخرج معاه لاول مرة وبقولك تعالى معايا وانتى اللى مش راضية
الاء :هيغير ايه وجودى هيخلى الغلط صح هو بيمهدلك بيغيرك واحدة واحدة فى الاول كان كلامكم ماسينجر بس وبعدين الماسينجر مبقاش كفاية ومحتاج يسمع صوتك فبقيتو تتكلمو فى الموبايل ودلوقتى هتخرجو وانا معاكى وبكرة تخرجو من غيرى وبعده الله اعلم هيطلب منك ايه هيخليكى تتنازلى فى ايه تانى
اميرة:انا متنازلتش
الاء :متنازلتيش يا اميرة كل ده ومتنازلتيش ده انتى من يوم ما حبتيه وانتى بتتنازلى بس اخرة التنازل ندم خصوصا لو كان تنازل للشخص الغلط وكريم ابن عمتك ده انسان مش كويس مش هتنتهى حكايتكم بالجواز ولو حصل واتجوزتم هيعايرك ده ضرب اخته علقة علشان كانت بتكلم جارهم ولا نسيتى
اميرة :علشان بتكلمه من وراهم كمان هو مش ضامن اخلاقه
الاء :وانتى يعنى اللى بتكلميه بعلم اهلك ما انتى بتكلميه من وراهم برضه كمان مش ضامن اخلاق جارهم بس ضامن نفسه صح على اساس انه ملاك بجناحات
اميرة بالله عليكى ابعدى عنه حكايتك معاه دى اخرتها معروفة كلها وجع وذل واهانة ليكى والدك ميستاهلش منك كده ميستاهلش تخدعيه بالشكل ده انتى نفسك متستاهليش تبقي كده يا اميرة انتى غالية اوى اغلى من ان واحد زى كريم يخليكى تنزلى من نظر اهلك ومن نظر نفسك
اميرة :خلاص مش هخرج معاه
الاء :ابعدى عنه انفدى بجلدك
اميرة :قالى هيتقدم اول ما اتخرج
الاء :ميلقش بيكى صدقينى جواه وحش اوى وانتى تستاهلى واحد احسن منه
اميرة :مانا غلطت زيى زيه
الاء :لا انتى مش زيه كريم ده واضح انه خبرة وعارف هو بيعمل ايه كويس انما انتى نقية وعلى فطرتك وهو مخلصوش تفضلى كده وحاول يلوثك ويخليكى زيه وفى الاخر يقولولك مفيش واحدة محترمة وهما لما بيلاقو واحدة محترمة مبيعتقوهاش الا لما يخلوها زيهم
انا عارفة ان بعدك عنه مش هيبقى سهل بس صدقينى ده الصح هو ميستاهلكيش هو ميستاهلش غير واحدة زيه وباذن الله هيقع فى شر اعماله ويلبس فى واحدة زيه بالمللى
الدنيا دوارة وربك يمهل ولا يهمل
اميرة :طيب وهقوله ايه
الاء :متقوليلوش حاجة اعمليله بلوك من كل حاجة حطى رقمه بلاك ليست ولو استوطى معاكى وقالك هقول للعيلة على اللى كان بنا قوليله هنكر وكلمتى قصاد كلمتك وهما هيصدقوكى طبعا لانه هو معروف انه بتاع بنات يعنى
اتكلمى بثقة بس كده وبينيله انك مش خايفة علشان هو يفهم انه مش هيعرف يغير رايك فهيسيبك فى حالك ويدور على ضحية جديدة
اميرة :خلاص حاضر مش عارفة من غيرك كنت هعمل ايه
الاء :ولا حاجة كنتى هتقضى الساعة الفاضية بين المحاضرات النهاردة لوحدك قومى نلحق المحاضرة قبل ما تبدء
بعد اسبوع اهلى عزمو هدير واهلها على الغدا
كنت بعمل حاجة سخنة نشربها بعد الغدا مازن كان جاله تليفون وراح يرد فى البلكونة وماما قالتلى اروح اسأله يشرب ايه طبعا انا كان ممكن اسأل هدير او حتى اعمل عصير وخلاص بس ماما زى اى ام مصرية اصيلة بتحاول توفق راسى وراسه فى الحلال تقليدية اوى مامتى صح
المهم روحت اسأله
الاء :تشرب ايه شاى ولا نسكافية ولا عصير
مازن :نسكافية
الاء :كام معلقة سكر
مازن :مظبوط..غريبة
الاء :هى ايه دى اللى غريبة
مازن :مبتقوليلش يا دكتور ولا حضرتك زى ما بتقوليلى فى الكلية
الاء :فى الكلية انت المعيد بتاعى وطبيعى اتعامل معاك بالاسلوب ده انما هنا انت اخو خطيبة اخويا هقولك يا دكتور وحضرتك ليه لكل مقام مقال
مازن :تصدقى ريحتينى الصراحة مكنتش عارف اتعامل معاكى ازاى اللى هو مش عايز اتعامل عادى هنا تتعاملى معايا بنفس الاسلوب فى الكلية وفى نفس الوقت مش عايزك تعاملينى بره الكلية على اساس انى المعيد بتاعك
الاء :كلها كام شهر ومبقاش طالبة اصلا واتخرج ومتبقاش المعيد بتاعى وتبقى اخو خطيبة اخويا وبس
مازن :ما يمكن نبقى زملا مش انتى بترتبى على الدفعة
الاء :هروح طيب القم واصب الشاى واجى
بعد خمس دقايق
الاء :لسه واقف فى البلكونة
مازن :المنظر منها حلو بصراحة
مكملتيش كلامك
الاء :كلام ايه اه قصدك كلامك عن انى ابقى معيدة لا انا الخامسة على الدفعة واصلا مش عايزة ابقى معيدة
مازن :ليه
الاء :مبعرفش اشرح وبحب الشغل العملى اكتر الحياة الاكاديمية مش طموحى بعد اذنك
مازن :اتفضلى
خرجت من البلكونة وروحت قعدت معاهم وماما بصتلى بغيظ تقريبا كان المفروض ابات فى البلكونة
حاجة من ضم حاجات مستحيل اعملها بأذن الله فى حياتى هى حكاية انى اوقع عريس دى والله لو مين حتى يا يجى بمزاجه وبكامل ارادته يا عنه ما جه
بعدها باسبوعين اهل هدير عزمونا ومامتها قالت ان هدير ومازن ياخدونا نتمشى حوالين بيتهم واضح ان مش امى بس اللى بتحاول توفق راسين فى الحلال كنت عايزة ارفض الصراحة بس الواد زياد اخويا عجبته الفكرة كان عايز يتكلم مع هدير فمرفضتش مرضتش اقطع عليه
ونزلنا وكنا ماشين جمب بعض يعتبر بس هدير وزياد سابقين عنا بخطوتين
مازن :هو انتى مقولتيش لحد انى اخو خطيبة اخوكى صح
الاء :مقولتش غير لاميرة اعز اصحابى علشان شافتك فى صور الخطوبة لولا كده مكنتش قولتلها
مازن :ومقولتيش ليه
الاء :واقول ليه واسبب لنفسي واسببلك حرج على الفاضى كمان قولتلك قبل كده فى الكلية انت المعيد بتاعى وبس الكلية حاجة وكون انك اخو هدير حاجة تانية
مازن :بس انتى برضه مبتقوليش اسمى مبتقوليش دكتور بس برضه مبتقوليش اسمى
الاء :الصراحة صعبة عليا شوية واهى الضماير بتفى بالغرض يعنى مش نرجع بقى
مازن :زهقتى من الكلام معايا
الاء :لا بقالنا كتير بنتمشى بس ..زياد يلا نرجع بقى
الاء :لا متقولش اخيرا قالتلك سر معاملتها القديمة ليك
زياد :اه اخيرا
الاء :طلع ايه السبب
زياد :بصى يا ستى من سنة هى كانت شنطتها خطفها منها حرامى وانا جريت وراه وخدتها منه ورجعتهالها
الاء :راجل وسيد الرجالة يا زيزو
زياد :المهم هى بقى من بعد الموقف ده ركزت معايا لحد ما لقت نفسها بتحبنى
الاء :مش معقول طلع عندك حق كانت بتعمل كده علشان متعرفش انك بتحبها
زياد :لا ما هى لما فضلت شهور تحبنى مع نفسها وانا مش حاسس قررت انها هتكرهنى لانى محبتهاش وعلشان كده كانت بتتجنبنى تماما بالشكل ده
الاء وهى بتضحك :يعنى حبتك مع نفسها وكرهتك مع نفسها وانت عايم فى مية البطيخ ولا دريان بحاجة
زياد وهو بيضحك :بالظبط كده
الاء :بس اشمعنى حكتلك النهاردة
زياد :هو اصلى قولتلها انى..يعنى..
الاء بابتسامة :قولتلها انك بتحبها
زياد :اه
الاء :وانت حاسس انك بتحبها
زياد :اه برضه هى تتحب بصراحة طيبة كده ولطيفة وحنينة كمان
الاء :سيدى يا سيدى زيزو قلبه دق ومقالش للحب لأ
بركاتك يا ست هدير ربنا يتمملكم على خير يا حبيبى
زياد :اللهم امين عقبالك يا حبيبتى
بعد اسبوع لقيت مازن باعتلى طلب صداقة رفضته انا مبضيفش شباب على صفحتى معنديش غير ابيه نادر وزياد بس حتى ولاد اعمامى واخوالى مضفتهمش
فاكرة مرة واحدة صاحبتى قالتلى عادى يبقو على الصفحة ومش لازم نتكلم ماسينجر بس حسيت ان ده هبل يعنى بص يا كابتن انا هقبل طلب الصداقة اه انما نتكلم ماسينجر لا انت فاكرنى ايه
طيب ما من الاول مقبلش طلب الصداقة بحيث ميكونش فى فرصة يبعت ماسينجر من اصله ولا هو احنا لازم نفرهد نفسنا يعنى
كان عندى سكشن لمازن بعدها بتلت ايام ويا للغرابة بعد السكشن مازن وقفنى
الاء :ايوه يا دكتور
مازن :انا بعتلك طلب صداقة انتى رفضتيه ليه
الاء :انا عندى محاضرة مهمة بعد اذن حضرتك يا دكتور
بعدها بتلت اسابيع ماما عزمت هدير واهلها عندنا ومازن تانى جاله تليفون وخرج يرد فى البلكونة وماما تانى بعتتنى اسأله يشرب ايه مرضتش احرجها واقولها انى ممكن اعمله نسكافية وخلاص دى مهما كان امى الوحيدة برضه ومش عارفة هتبطل الحركات المفقوسة دى امتى بس يعنى احطله سم فى النسكافية واخلص
الاء :تشرب نسكافية
مازن :شكرا
الاء :هو واضح انك قافش هو انا مكنش قصدى اتجاهل سؤالك والله بس انا قولتلك فى الكلية انت معيدى وبس وانا مفيش معيد بقف اتكلم معاه فى رفضت ليه طلب الصداقة بتاعه مش احنا متفقين ان لكل مقام مقال
مازن :وادينا فى البيت رفضتيه ليه بقى
الاء :علشان انا مبضيفش شباب مفيش على صفحتى غير اخواتى وزى ما رفضت طلب الصداقة بتاعك رفضت قبله طلبات قرايبى الموضوع مش شخصى معاك يعنى
مازن :كان ممكن تسيبيه متعلق اهى اهون من انك ترفضيه
الاء :مش اسلوبى انا مبحبش الحلول الوسط يا بقبل يا برفض المهم تشرب نسكافية
مازن :اشرب نسكافية
وخلصت السنة واتخرجت وزياد وهدير اتجوزو وبعد جوازهم بتلت شهور مازن اتقدملى والله بطئ ده امه وامى كانو عملو كمية مواقف علشان يخلونا نتكلم مع بعض تخلينا نعيش قصة حب اسطورية اوفر شبه بتاعت الهنود
يلا اهو كله بأوانه
جالنا لوحده لانى طلبت اتكلم معاه الاول علشان اقدر اخد قرار
مازن :اخبارك ايه
الاء :الحمد لله
مازن :ها حبا تسألينى فى ايه
الاء :ايه ده انا اللى هبدء
مازن :انتى وبس اللى هتسألى انا معنديش اسئلة وواخد قرارى خلاص
الاء :طيب اول سؤال انت متقدملى ليه
مازن :يعنى ايه متقدملك ليه علشان عايز اتجوزك
الاء :تمام عايز تتجوزنى ليه
مازن :بصى انا بؤمن بالقدر جدا وان مفيش حاجة بتحصل كده وخلاص دايما بيكون فى سبب انها تحصل
يعنى زياد يخطب هدير وتطلعى اخته فابدء اتعامل معاكى واركز فى شخصيتك وتصرفاتك واحس انك الانسانة المناسبة ليا
الاء :مناسبة من وجهة نظرك انت ولا من وجهة نظر طنط فايزة وعمى محمد
مازن :لا متقلقيش من وجهة نظرى انا لو على بابا وماما يبقى كان زمانا متجوزين مع زياد وهدير اصلا
الاء :طيب انت شايفنى مناسبة من ناحية ايه
مازن :حاجات كتير اخلاقك الحمد لله زى الفل اجتماعيا احنا متقاربين فرق السن بنا مناسب
طبعا انا معرفش عنك كل حاجة بس الحاجات اللى شوفتها فى شخصيتك متوافقة معايا انا مرتاحلك بقالى شهور بفكر وكل مادا راحتى بتزيد
الاء :مرتاح بس
مازن :اه مرتاح جدا
الاء بصوت واطى :هو ده يا رب اللى يقع فيا اول ما يشوفنى وعشقى يحتل قلبه اللى اكدت عليه فى الدعا
مازن :بتقولى ايه مش سامعك
الاء :لا متاخدش فى بالك دى حاجة كده بينى وبين ربنا
المهم انت قولت انك مرتاحلى
مازن :اه جدا
الاء :ربنا يديم الراحة طيب شغلى انا مش هسيبه
مازن :انا متقدملك وعارف انك بتشتغلى لو عايز واحدة مبتشتغلش كنت روحت لواحدة قاعدة فى البيت انما اروح لواحدة بتشتغل واقعدها فى البيت ليه على ايه الفرهدة دى
الاء :وجهة نظر تحترم جدا على فكرة انت صح
مازن :عندك اسئلة تانية
الاء :لا انا كده تمام انت برضه مش عايز تسألنى عن حاجة
مازن :انا مبسألش انا بسيب المواقف تعرفنى على اللى قدامى واللى يهمنى اعرفه عنك انا خلاص عرفته والباقى هعرفه بالمواقف الوقت هيعرفهولى
الاء بابتسامة :انت كل وجهات نظرك تحترم كده عموما ماشى انا هفكر واستخير وفى اقرب وقت بابا هيبلغك بردى بعد اذنك
مازن :اتفضلى
فكرت فى كلامه وفى اللى اعرفه عنه واستخرت كمان وقررت اوافق هو انا اينعم كان نفسي يجيلى حد بيحبنى دعيت كتير بكده وطلعت صدقة بنية ان ربنا يستجيب الدعوة دى بس مين قال ان مازن مش هيحبنى بعدين احساسه بالراحة ده مهم جدا وكمان هو اللى مختارنى يعنى مش هيبقي صعب احساسه بالراحة يتحول لحب
كمان محدش يعرف الخير ليه فين ايش ضمنى ان اللى بيحبنى ده هو الخير ليا ما يمكن يجى وافرح بيه فى الاول وبعدين يشربنى العذاب كاسات بعدين
قررت الاخد بالاسباب وادى مازن فرصة وادى نفسي كمان فرصة يمكن احبه هو كمان انسان كويس فيه مميزات كتير واهله عارفاهم
الحب حاجة حلوة ومهمة بس مش الحاجة المهمة الوحيدة التفاهم والاحترام مهمين برضه انه يكون انسان ابن اصول حاجة مهمة جدا
الحب ملوش كتالوج يعنى ممكن ناس تحب فى الخطوبة ناس تحب بعد الجواز ناس تكون بتحب قبل الجواز والحب يختفى بعد الجواز ناس تحب والحب يحول حياتهم جحيم
الحياة نفسها ملهاش كتالوج يعنى مفيش حاجة واحدة بس صح لازم كلنا نعملها فى طرق كتير نعيش بيها الحياة وكلهم صح
المهم يكونو برضا ربنا المهم نكون بناخد بالاسباب وبنحاول نرضيه المهم نكون عارفين ان ميعرفش الخير لينا ايه غير ربنا وقتها مش هنضيع بجهلنا حاجات حلوة لمجرد اننا مفكرينها مش مناسبة او انها جات بطريقة غير اللى احنا كنا مستنينها
الحياة ملهاش كتالوج ده حقيقى بس اى طريق هنمشيه علشان نرضى ربنا اى طريق هيكون ربنا فيه هو ملاذنا اكيد هيكون الطريق الصح💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا