بقلمي
الكاتبة غدير الحيدري
.......
هل ينكسر حافر الصمت بأهزوجة؟
هل تتساقط الأوراق من السماء إثر اللعنة؟
مقصدي منك كان حباً أم أرجوزة؟
من أنا في حياة من لا حياة لهُ!؟
هل قربي منك كافياً
بعدي عنك كافياً
سخط الحياة سخطاً واهياً
انا ابنة الدمعة السائلة
اتوه بين البينين
هل تنمحي أثار التعب إن أطلقت علي مسمى الجمال!؟
وتركت صاغة العجوزة..
......
تراجعت للخلف
عيونها علية..
تمنيت بلحظتها اموت
او اتلاشي..
اضيع..
ما يبقى الي أي اثر
حاشى ان يتبقى جزء مني
حاشى..
الدمعة انحصرت بعيوني
وانا افكر بعواقب هذا اللقاء
الخنكة عانقت رقبتي
وانا اكول شنو القادم؟
ما هو التالي؟
كسرت حاجز الصمت
وكالت ودموع الغضب معلقة بعيونها
ام ابان:انتي شعندج هنا؟؟
صفنت بوجههة
شكول!؟
بلعت ريك وكلت بأرتباك
هرم:ادخلي خ.خلي ا.افهمج
صاحت بصوت عالي
ام ابان:هذااااا بيتييي شنو ادخلي؟؟ تضيفيني حضرتج!؟
طبكت الباب بقوة
طلعت موبايلها من الجنطة
صارت تتصل وتصيح
خليت ايدي ع راسي
فصلت من العالم
انا شطلعني من الغجر!؟
انا شجابني لهنا؟
شبقاني كل هالفترة بهالبيت؟
شراح يصير هسة!؟
حسيت عليها اقتربت مني
جرتني من زندي بقوة
صاحت وعيونها راح تطلع من مكانها
ام ابان: انتي شمسوية الة ومبقيج هناا؟؟ انتي منو وين اهللللج؟؟؟
ما كدرت ارد
او خفت من الرد..
دموعي تنزل وهي تهز بية
اخر شي ضربتني راشدي
كانت هذي الصفعة كفيلة ان تصحيني
كنت احتاج صفعة بقوتها من زمان
حتى أصحى واعرف نفسي من اكون..
انهالت علية بالضرب
صرت مااشوف بس احس بأيدها
تضرب كل مكان..
سمعت صوت ابان صاح
واجة ركض بعدها عني
سحبت نفسي لركن المطبخ
وخرت شعري عن وجهي
مسحت دموعي
فزيت ع صرختها
ام ابان: صدييييقة باااان شتسووووي بهالبييييت؟؟؟ انت شداتصخم من ورااااي فهمنيييييي
صاح ابان
ابان:كاااافي اهدي اسكتييي اششش لا يسمعوج الجيرااان
دفعتة بقوة وصرخت
ام ابان: وانت هامك الجيران؟؟ هامك سمعتناااا مخليها هنا تفوت وتطلع عليهااا و........
صارت تفشر فشار قوي
خليت ايدي ع اذني
ما اريد اسمع
ابان باوعلي ورجع كال الها
ابان:امشيي للبيت نتفاهم
ام ابان: وخررررر عنيييي حقييير ساقططط تفووو عليك وع تربيتك وخرررر
صارت تدفع بي وتصرخ
وهو يحاول يهديها
كنت اباوع وابجي
ارتجف واحس بتأنيب الضمير
لو ما انا هنا
ما يصير هيج..
لو ما ابان يتورط بية
ما ينجبر ع هالوضع
ولا يسمع اتهامات امة..
تركتة وهجمت علية
جرتني من شعري وصارت تضرب بية
ام ابان: شناااطيتة فهميني شمسويتلة؟؟ انتيي شنو من بشر شلون عايشة وانتي بهالرخص هذا يا.......
بعدها عني بقوة
وصاح
ابان:كاااااااافيييييييي
دفعها لداخل البيت
سحبها للغرفة
ضربت وجهي بقوة
شسويت شسويت!؟
شجابني لحياتهم!!
انا وين وهم وين؟؟
كمت من مكاني
عصرت ايدي وانا ارتجف
صرت اسمعة يحجي ويتنفس بقوة
حسيتة راح يموت
لحظة وسمعت صرخة امة
وهي تكول
ام ابان: غجرررريييية؟؟؟ بيتي يلفي غجررر تلوث سمعتنا بهالمسخ بهالقذارات؟؟؟ تالي عمري اتفشل كدام الله والعالم بسبب.......
صارت تفشر انواع الفشار
وتكول انواع المسميات البذيئة
خليت راسي ع الباب
غمضت عيوني وانا استمع لحقيقتي امام الناس
بوقتها تمنيت لو احمل صفاتهم فعلا
يمكن ما انقهر هيج
تمنيت لو انا فعلا هذا وضعي
اكيد ما راح يجرحني هالكم الهائل من الكلام..
لو انا فعلا مو زينة
راح اتقبل كل الكلمات الجارحة
لكن الكلام اللي اسمعة
ما موجود بية
وهنا تكمن الكارثة..
صار صياح هواي
كلام هواي
الدنيا ضاقت بوقتها
والعالم اصبح مظلم
كعدت بالكاع
سندت نفسي بالحايط
انا شنو ذنبي!؟
ليش تركتني امي!؟
بهالوقت بالذات
حسيت قلبي مو عضو
حسيتة جذوة مشتعلة من نار جهنم
وروحي غدت اعصار
الاحقاد ملت عيني لدرجة..
تمنيت لو امي كدامي
واكلها بسنوني...
كنت احس بكل الاحاسيس
ما عدا احساسي بكوني بشر
كنت محرومة منة
محرومة من شعور الانسانية
شعور النبذ قاتل
النظرات الحقيرة موجعة
كأن احد ينظر الك بأستحقار
تشعر كأنك زبالة
شيء وضيع فاقد القيمة
هرم كانت تحس هيج..
بعد صياح ونقاش طويل
طلع ابان
باوعلي بحيرة
ملامحة ما تتفسر
دموعي صارت توكع
كمت من مكاني وكلت
هرم:اسفة... اس.فة لان ك.كل اللي ص.صار بسببييي
مسحت دموعي
هرم:انا رايحة ر.راح ار.ووح والله ب.بس لا تصير مش.اكل انت موو مو ذنبكك
كنت احجي واشهك
غمض عيونة وكال
ابان:شششش خليج بمكانج ولا تحجين شي
دخل للمطبخ
صب كلاص ماي
اخذة للداخل
شوي وسمعت صوت الكلاص انكسر
وامة كالت
ام ابان: وخرررر عن وجهيييي
خليت ايدي ع وجهي
اي مصيبة افتعلتها بهالعائلة!؟
اي ذنب اقترفتة بحق ابان!؟
فزيت ع صوت صياح ابان
وهو يكول
ابان:هرررررم جيبيييي مااااي
اخذت بطل الماي
ركضت للداخل لكيت امة واكعة بالكاع
صار يحاول يصحيها
اباوع لأيدة ترتجف
تحول الى طفل!؟
صار يبجي ويحجي وياها
يحاول يصحيها
لكن هي فقدت وعيها!!
وكفت ع جهة اباوع
كأنما الكون انكلب
راح تموت امة بسببي!
اتصالات هواي
وهو مخبوص بيها
اندفعت الباب ودخل رجال ثاني
ووراه بنية شابة
ووياهم بان صارت تصرخ وتضرب ع وجهها
شالوها من الارض وطلعوا بسرعة
كلهم راحوا!
بقيت كاعدة وحدي
ما اعرف شنو اللي لازم اسوي!؟
كل اللي اعرفة
وجودي دمر حياتهم..
لميت رجلي لصدري
وكعدت ابجي
عمر ويمر
بالحلو والمر..
لو باقية بالغجر وعايشة حياتهم
ومعتبرة روحي وحدة منهم
ومخلصة سنواتي بهدوء صاخب
مو احسن من هذا الدمار؟
صرت الوم نفسي
ابان شنو ذنبة بكل اللي يصير!؟
فوك ما لمني ببيتة وتحمل مسؤليتي ع طول السنة الفاتت
اجازيه بالدمار ؟؟
شنو حيكون الوضع
اذا صار ي بأمة!!
وللصبح انا كاعدة
اكل بروحي مثل النار
لا بية ابقى هنا
ولا اكدر اطلع..
احتقرت نفسي هواي
رغم مالي ذنب بدمار حياتي
بس احسني سبب بدمار حياة ابان..
ومر هاليوم
وماكو اي خبر
كنت اكل نفسي من القلق
داخلي مشتعل بسبب القهر
انفتحت الباب ليلا
باوعت بقلق
شفت ابان دخل
كان يمشي وهو تعبان!!
دخل للمطبخ
انا كاعدة بالأرض كدامة
شافني وتنهد بتعب
تمشة وكعد ع الكرسي
خلة راسة ع الميز
غمض عيونة
يمكن نام!!
بقيت مترددة
احجي!؟
اسكت...؟
كمت من مكاني
اقتربت الة
كلت بخوف
هرم:انا راح اطل...
مالحكت اكمل كلامي
كام بسرعة ولزمني من زندي
دفعني للحايط بقوة
وصار يرج بية ويصيح
ابان:مااااكوووو اطلللع طلعةةة ماكوووو تراجع ماكوووو
فتحت عيوني مصدومة
اختنكت ومااعرف شسوي
دفعتة عني ووكفت بالركن
رفع ايدة بتحذير
ابان:الجنووون اللي براسي لا تطلعيها فاااهمة
كلت بخوف
والدموع معلقة بعيوني
هرم:ب.بس انا سبب مشاكلك انا ج.جاي أذييك
اقترب الي
تراجعت للخلف
جرني من شعري وكال
ابان:من صعدتي بسيارتي شكنتي متوقعة!؟ شنو الحياة اللي ممكن تعيشيها!؟ اسكتيي واحمدي ربج بعدج بخير لو تاركج كان نهشتج كلاب الشوارع
دفعني ومشة
رجع كعد ع الكرسي ولزم راسة
كال
ابان:قبل شوي يلا تحسنت حالة امي ورجعناها للبيت وانا بحالة تعبانة لا تستفزيني اكثر
هرم:ليش محمل نفسك مسؤليتي!؟ انت ما قصرت كل هالفترة وياي وخلاص انا مااكدر اكون سبب بدمار حياتك
باوع الي وخزرني
ابان:هسة اذا طلعتي وين تروحين؟ عندج مكان؟؟
نصيت راسي
كال
ابان:شلون تقبلها غيرتي اتركج دون ما اوصلج لأهلج هه هاي اذا وصلتيلهم
كام من مكانة
وكف بباب المطبخ
كال
ابان:خليج هادية واركدي ترا البية كافيني
طلع وسد الباب
خليت ايدي ع راسي
صرت ابجي
ماكو بأيدي شي غير البجي
احس بالفشل
هذا مو مكاني ولا هذا عالمي
انا بالمكان الغلط
وبسببي حياتهم تخرب
ومرت ساعات الليل
كنت مثل النار
مرة اشب مرة انطفي
الفجر بديت اتعب
سندت راسي ع الكرسي
وما اعرف شوكت غفيت..
فزيت الصبح ع دگة الباب بقوة
كمت وانا مخترعة وخايفة
منو اجة النوب!؟
طلعت بسرعة
ابلع ريكي بخوف
وكفت خلف الباب وكلت
هرم:منوو!؟
اجاني صوت بان
بان:افتحي اني بان
فتحت الباب
وتراجعت للخلف
باوعتلي بان ورجعت باوعت ع شخص كاعد بالسيارة
نفسة اللي اجة بارحة
كالت الة
بان:انتظر
جرتني من ايدي ودخلتني جوة
كالت بتعب
بان:لمي اغراضج
دمعت عيوني
هرم:وين ماخذتني!؟ بان انا اسفة انا اعتذر لان خربت حياتكم
تنهدت بتعب
لزمت ايدي
بان:الغلط مو غلطج اذا الحياة عكست وياج مو معناها انتي مذنبة الغلط من اخوية كان لازم من البداية ما يضم موضوعج ويوصل السالفة لهالوضع
كلت بأرتباك
هرم:بس ابان هم مو ذنبة هو تورط بية
بان:لا تفكرين لمي اغراضج
مشيت
بعدها تراجعت
هرم:وين ماخذتني؟
كالت بنفاذ صبر
بان:هرررم سهلي امر دون استفسارات زايدة يلا لان اخوية حسام داينتظر بالباب
هزيت راسي بمعنى اي
لميت الملابس اللي جابها الي ابان
وكم شغلة بسيطة
صارت عيوني ع الاجراس
شلتها بأيدي
احس نار بعيوني مصدرها قلبي
انا شسويتلج حتى تتركيني!؟
شنو الذنب اللي اقترفتة حتى تتركيني اواجه مصيري وحدي!؟
ليش تركتيني اعيش وحشية الحياة
من نعومة اظافيري..
وكعت دمعة من عيوني
دخلت بان للغرفة
ضميت الاجراس وكلت بخنكة
هرم:كملت
بان:يلا تعالي
سحبتني من ايدي
باوعت للمكان وتذكرت الايام اللي عشتها هنا
كانت ايام غريبة
مااكدر اكول عنها حلوة
وبنفس الوقت ما كانت سيئة
كانت استراحة طويلة من تعب
هدنة ما بين فترتين
فترة ماضية عشتها بدمار
وحاليا فترة مقبلة عليها بكل انكسار
ما اعرف شنو اللي راح اشوفة
بهاي الايام القادمة..
سدت باب البيت
فتحتلي باب السيارة وكالت
بان:اصعدي
صعدت بكل خوف وارتباك
اللي كاعد بالسيارة باوعلي
لمحت بعيونة نظرات عطف
نصيت راسي
بان صعدت يمة
وبدت السيارة تمشي
وعيوني معلقة ع الشارع
بكل مكان اترك نظرة
مسافة قليلة
توقفت السيارة قرب بيت كبير
عقدت حاجبي وانا استرجع ذاكرتي
هذا نفسة بيت اهل ابان!
انا شسوي هنا؟؟
حسيت ع باب السيارة انفتحت
وبان اخذت مني الاغراض
وكالت
بان:انزلي
نزلت وكلبي يدك بقوة
وين جايبيني!؟
انفتحت الباب
دخلت بان ومدتلي ايدها
بان:تعالي
كنت اباوع للمكان بخوف
خطيت اول خطواتي داخل البيت
وبداخلي الف سؤال
يا ترى ليش اجيت لهنا!؟
وشنو اللي راح يصير...
.........
الانبار
دُرر
ايام قليلة
وتبدأ امتحانات اخر السنة
وتنتهي حكايتي بالانبار
ابدي بحياة جديدة
في مكان اخر
مكان مناسب الي
كعدت الصبح
شفت رسالة من امي
كاتبتها وسماء اكيد
"انتبهي لنفسج هانت ما بقى شي وترجعين ديربالج ع نفسج ولا تأمنين الهم"
خليت ايدي ع وجهي
احس عقلي راح ينفجر من التفكير
امي بكل رسالة ترسلها الي
ترسل وياها طاقة تحذير ومخاوف
ماانكر المجتمع هنا مختلف
لكن مو بالسوء اللي يكولون عنة
ناس طبيعيين عايشين حياتهم
هل هم طبيعين؟
ام اني اللي تغيرت نظرتي؟
بدلت وطلعت للجامعة
ببالي الف فكرة
ومن ضمن الالف كان صگر
حام حولي هواي
وهسة انسحب
انسحب بعد ما عرفني بمشاعرة
خلاني بوضع صعب
ما بين استسلم لنداء قلبي
وبين اسمع لعقلي
امي تعبت علية
حرام اجازيها بخيبة
وبنفس الوقت يمكن زواجي يخفف عنهم
امي متحملة مسؤلية كبيرة
لكن منو يكول صگر راح يكون كفو؟
منو يكول هاي الخطوة راح تكون صحيحة!؟
عشت لخبطة روحية
مااعرف شنو نهايتها
حضرت المحاضرات
رماح يباوعلي من بعيد
كأنما بداخلة كلام
بعد ما انتهت المحاضرات اجيت اطلع
اعترض طريقي وكال
رماح:عندي سؤال
كلت بعصبية
درر:ماعندي جواب
اجيت امشي
وكف امامي مرة ثانية
كال
رماح:تعرفين حقيقة صگر؟
عقدت حاجبي
درر:اي حقيقة تحجي عنها؟
رماح:سابقا كنتي تكولين انا شدخلني بس هسة تتسائلين معناها حبيتي صگر ووكعتي بشباكة صح؟
ضيقت عيوني
درر:انت بشنو يهمك هذا الكلام؟ انت ليش قالق نفسك؟
رماح:انا خليت عيني عليج قبلو وانا استحقج اكثر منو هو ما يستاهلج خليها ببالج
درر:انت منين تجيب هالكلام؟
ضحك بأستهزاء
رماح:ابقي ضمي مشاعرج وابقي كذبي كلامي بس صدكيني انتي الخسرانة من راح تعرفين حقيقة صگر راح تكرهين نفسج هواي وراح تتندمين بس بوقتها الاوان فايت
مشة وتركني
توقفت بمكاني وتمنيت لو يوقف الزمان
احتاج عزلة روحية
احتاج افهم نفسي وشعوري
انا بشنو وكعت؟
وشنو اللي جاي يصير!؟
رجعت امشي
من بعيد شفت صگر اقترب الي
اضطربت دكات كلبي وخفت
وتذكرت امي
وكعت بحيرة ما بين نفسي واهلي
وصل يمي وكال بلهفة
صگر:شلونج درر؟
كلت بتعب
درر:بخير
صگر:بعد اسبوع امتحاناتج متحضرة؟
درر:ماادري ليش تسأل؟
ابتسم
صگر:اكيد صارلج فترة ما شايفة اهلج مو؟
هزيت راسي بمعنى اي
درر:صار اكثر من شهرين
صگر:شلون متحملة!؟
درر:اتحمل شنو بالضبط؟
صگر:اقصد وضعكم المادي ما يسمح تبقين كل هالفترة هنا انتي محتاجة شي؟
عقدت حاجبي
كلت بأستغراب
درر:انت شعرفك بوضعي المادي؟
صگر:مو هذا موضوعنا
نترت
درر:صگر انت شتريييد؟
صفن بوجهي
لمعت عيونة
صگر:اسمي بلسانج حلو
درر:انت وابن عمك شتريدون مني؟
صگر:ابن قندرتي لا تجيبين طاريو كدامي؟
درر:هاي اخلاق؟!
صگر:انتي شبيج؟ ليش ما تنطين مجال الواحد يفهمج؟
درر:انت شتعرف عني وليش؟
كال بأرتباك
صگر:مجرد سؤال يعني لان مخلي ببالي اتقدملج
انصدمت من كلامة
درر:تتقدملي الي!؟
صگر:انتي منو ضاحك عليج وكايلج انا العب؟؟ انا رايدج ع سنة الله ورسولو
درر:شتعرف عني؟
صگر:عرفت هواي وسألت واللي عرفتو زيد حبي الج
كلت بنفاذ صبر
درر:ترا هي اشهر بسيطة اي شخص اسولف الة عن اللي يصير مراح يصدك وين اكو هيج شي!؟
صگر:انا هيج من احب اتجنن المهم
درت وجهي احس روحي اختنكت
احس نفسي راح ادخل بمتاهات الها اول
ما الها اخر
صگر:حجيتلج وي الاساتذة اذا تردين تنزلين لأهلج هالفترة ماكو مشكلة وتجين وي الامتحانات
رجعت باوعت الة
احس ماكو كلام
درر:انت شخص مستفز وتتصرف بكيفك
صگر: انا حبيت واللي يحب ما علية ذنب
درر:شكرا ع اللي تسويه بس ما محتاجة منك شي
مشيت وعفتة
كال
صگر: امج مسكينة كاسرة ظهرها علمودج المفروض تخففين عنها ما تثقلين
التفتت بصدمة
كلت
درر:انت شعرفك بأمي؟
صگر:مع السلامة
مشة وتركني
دمعت عيوني
خليت ايدي ع ركبتي
هذا شنو من بشر
طلعت بسرعة للسكن
اول ما وصلت دزيت رسالة لأمي
كتبت بيها
درر:اريد ارجع تعبانة
وكفت امام المراية
تلمست وجهي
انا حلوة صح
بس انا مو عملة نادرة
ولا انسانة مميزة لهذي الدرجة
اللي يسويه صگر طبيعي
لو اكو شي خلف هذي المحاولات! ؟
رن فوني
المتصل امي
فتحت وخليتة ع اذني
اجاني صوتها القلقان
شيماء:يمة درر خو ما بيج شي؟؟
كلت بهدوء
درر:لالا امي مابية شي بس امتحاناتي بعد اسبوع وخلصت اكل واحس نفسي مشتاقة الكم تكدرين تدزيلي السايق؟
كالت بسرعة
شيماء:اي اي يمة ولا يهمج حضري نفسج باجر يجيج رايحة اخابر ساهر
انغلق الخط
كعدت ع سريري ولميت نفسي
خليت ايدي ع وجهي
لا شعوريا وكعت دموعي
احس بتأنيب ضمير
احس نفسي اثقلت امي هواي
بس كلشي جاي يسير عكس اللي اريدة
كنت اريد الطب من اول سنة
حصلت صيدلة بعد 3 سنوات
كنت احلم براحة واستقرار
خلصت السنة قلق ودموع
اريد عالم مليء بالدراسة والطموح
اصطدمت بعالم اجتماعي كلشي بيه يسحبني للعاطفة
شكد حظي عاثر!؟
لميت اغراضي
حاولت اشغل تفكيري بعيدا عن صگر
وفعلا ثاني يوم رجعت للبصرة
تعبت هواي بالطريق
والتعب الحقيقي ما كان تعب سفر
بكد ما هو تعب نفسي
مجرد ما افكر ان صگر واصل لأهلي
وعارف كلشي عنهم
ترجف اوصالي واختض..
وقفت السيارة امام بابنة
انفتحت الباب وطلعت امي
ملامح التعب تغزو ملامحها
فتحت ايدها ولمتني لحضنها
بجيت
بجيت حزن وشوق
بجيت تأنيب ضمير رغم مااحس نفسي غلطانة
بجيت واستفرغت كل لخبطة المشاعر اللي عشتها
وانا بعيدة عنهم..
اخذتني خنساء لحضنها
بعدها وسماء
الا مرج!!
كانت واكفة ع جهة
تباوع الي بكل برود
ما لمحت بوجهها اي لهفة
ما اصدرت اي تعبير
تقربت الها
حضنتها لكن تفاجأة
حضنها كان بارد..
خالي من مشاعر الاخوة
سحبتني وسماء من ايدي
ودخلتني جوة بكل لهفة
الكل كان فرحان بجيتي
الا انا عيوني تركض خلف مرج
مرج اللي متغيرة
حتى ملامحها مو نفسها..
هوسة وكعدات واكل
وسوالف طويلة
وهي كانت مبتعدة عنة
اجيت احجي وياها
مشت وتركتني!!
لزمتني خنساء من ايدي
واخذتني ع جهة
كلت والدموع مالية عيوني
درر:خنساء مرج شبيها!؟ ليش احسها زعلانة مني؟؟
خنساء:مرج هالفترة شوي نفسيتها مو تمام عوفيها ترتاح
درر:صاير شي!؟
خنساء: لا تشغلين بالج ماكو شي
فرشوا بالغرفة حتى ننام
وانصدمت بمرج عزلت فراشها
ونامت وحدها
اباوع لامي غاضبة
وحزينة بنفس الوقت
حسيت اكو هواي اشياء صارت بغيابي
وهواي احداث فاتتني
ماكدرت انام الليل
رغم احساسي بالامان بوسط عائلتي
لكن احس روحي غادرها السلام من فترة طويلة
ومن الصباح الباكر
امي طلعت تخبز برا
ومرج كامت للمغاسل
لحكتها..
لكيتها تغسل وجهها
اقتربت الها وكلت
درر:مرج
باوعت الي مبتسمة
والدموع مالية عيونها
كالت
مرج:ها محتاجة شي؟ انطيج مكاني حتى تغسلين؟
دمعت عيوني
همست بخنكة
درر:صاير شي؟
ابتسمت
ووكعت دموعها
مرج:شيصير يعني ههه لالا مصاير شي بس انا اشتغل خدامة واعيش انواع الدمار النفسي علمود توكفين تبيعين دوة للعالم
فتحت عيوني مصدومة
وحسيت بوجع قوي بكلبي
كلامها كان سهام
لزمت ايدها ودفعت ايدي
مسحت دموعها وكالت
مرج:لا تمثلين دور الاخت الحنينة انتي انانية فكرتي بطموحج ومستقبلج وتركتينا هنا نواجه اسوء مصير
درر:بس انا..
قاطعتني
مرج:انتي مو ذنبج مرات اكول عنج مسكينة الذنب ذنب امي اللي مو كادرة تلمح الموت بعيوني
شهكت وكالت بخنكة
مرج:انااا ببيت ذول الناس كل يوم امووت الف موتة بس منو يحس!؟؟
دخلت خنساء للمغاسل
كالت بقلق
خنساء: شبيكم!؟
مرج مسحت دموعها وطلعت
خنساء اقتربت الي
خنساء: كالتلج شي يضوجح!؟
درر:خنسة ليش مخلين درر تشتغل خدامة!؟ امي شلون مأمنة عليها وهي بعدها بنية وبعمر صغير؟
ابتسمت بحزن
خنساء:لو تبقى ع امج تضمنا بگلبها بس ملايين ابوج منو يسددها!؟ الايجار منو يدفعة؟ الاكل الناكلة منو يسددة؟؟ دراستج ودراسة مرج ووسماء منو يدفع تكاليفها؟ مرج تكعد ما تشتغل وانا ما اشتغل وامي تكعد وبعدين؟ شلون نعيش؟؟
كلت بخنكة
درر:اترك الجامعة
خنساء:ششش السنة خلصت مابقة شي عود انقلي هنا واشتغلي حالج حالنة ماكو غير حل
نصيت راسي
درر:شنو قصدج بملايين ابوية؟
خنساء: ابوية قتل الرجال واهل الرجال اخذوا تعويض من ساهر وامي جاي تجمع لساهر بالنهاية الرجال مو كفيل بينة
درر:بس هو يعرف وضعنا
ابتسمت بحزن
خنساء:هو يعرف وضعنا لكن لا تنسين مو حلو تعيشين حياتج وانتي مديونة لأي بشر كان وهالدين لازم يتسدد لساهر حتى لو اضطرت امي تضحي ب...
سكتت
عقدت حاجبي وكلت بأستغراب
درر:تضحي بمنو!؟
باوعتلي خنساء بأرتباك
وكالت
خنساء:م. محد ه.هيج مجرد كللام
لزمت ايدها بقوة
وكلت بشك
درر:خنساء امي تضحي بمنو!؟
بهالاثناء دخلت وسماء
وبأيدها اجراس صغار
رفعتها امامنة وكالت
وسماء:ممكن اعرف منو صاحبة هالاجراس!؟
اباوع لخنساء لونها تغير!
رمشت ببطئ
شجاي يصير هنا!؟
منو صاحبة الأجراس!؟
وشنو قصتها!؟
........
مساء الخير❤
اليوم البارت من وقت لان امس ما نشرت كان استراحة
رأيكم!؟
انتظروووونا
ولتنسووون التصويييت