قرار العُهر

بارت 1

"قرار العُهر"
رواية
2022/8/19
لــ غدير الحيدري
........

يداعبُ النومُ عيني
وسط أجواءٌ من الصخب
لا البيتُ بيتي
و لا الحياة حياتي
إنما دنياي أرتني العجب
نعم العجب...
....

شتاء عام 2012
في اللا أعلم..!!!

تسحبت من المكان بهدوء
خليت ايدي ع الحايط
احتكت أظافري بالمنطقة المتهرية
وتناثر فتات بسيط

غمضت عيوني بقوة
مااريد احد يسمع صوت
او أي دبيب مني

تراجعت للخلف ع كيفي
عيوني مفتوحة بوسعها
واباوع للمكان بحذر
اتبلعم واسمع صوت دقات قلبي

خوف وضيق ورهبة!
اخ من شعور الرهبة
كلفني هواي..

استمريت اتسحب للخارج
لحد ما طخت اقدامي حديدة الباب
ورنت اجراسي

عصرت ايدي وغمضت عيوني
لا لا راح ينكشف أمري!!
بقيت ع هذي الحالة
الى ان حسيت الوضع لا يزال هادئ

فتحت عيوني
ما لكيت احد
معناها ما حسوّا!!

تجدد شعور القوة بداخلي
فتحت الباب شوي
وطلعت..

عيوني صارت تتنقل بكل مكان
من اي طريق اروح؟؟

رفعت راسي للسما
عيوني مدمعة
قلبي يرتجف
وصوت بداخلي يكول..

ما فد يوم تقربت الك بصلاة او دعاء
بس انقذني هالمرة..

تنهدت
وباوعت لجهة اليمين
اظن اذا استمريت بالمشي
راح الكة شارع

اللي اجونة اليوم
اجو من هذا الطريق
انا شفتهم من نزلوا..

مشيت ع كيفي
متعبة واتنفس بقوة
والجو بارد
وغائم..

وقت فجرية وهدوء
والكل نايم
الا أنتي
تبحثين عن سبيل للنجاة

اجراسي ترن
لزمتها بقوة
كافييي كاافيي ترنين
انتي نذير شؤوم
ما فد يوم رنيتي ع الخير
لكن مستمرة اخليج بخصري
لانج املي الوحيد..!

شلتها بأيدي
وقبضت عليها
واستمريت بالمشي
او الهرولة

مسافة طويلة قطعتها
بديت اشوف شيء يشبه الشارع
او يمكن شارع

التفتت خلفي
انا ابتعد عن هالمدينة المشؤومة
لكن لوين؟

شفت سيارة صفرة
صفنت عليها
هاي نفسها مو! ؟

اقتربت الها
وصرت اتفحصها
اي اي
هاي السيارة نفسهاا اللي اجو بيها ذول الجماعة

هم مو منا
واضح عليهم
راح يكونون سبب بخلاصي

باوعت ع جنطة السيارة
حاولت افتحها
ماكدرت
شلون؟

لازم اروح وياهم
ولازم مااخليهم يدرون بوجودي
وبنفس الوقت مااريد احد من اهلي يدري