بقلمي
الكاتبة غدير الحيدري
.......
كانت الطرق مفترقة
وكنا جالسين على قارعتها نرتجي اللقاء
نحنُ مهمشين في الأرجاء
لطالما صرخنا في الفناء
لا أحد يسمع أصواتنا
اقدارنا نكراء..
.......
وكفت امامة
عيوني بعيونة
خزرني وصاح
ساهر:جاييي احاجيييج جاوبي؟؟ ارتاحيتي من خليتي البنية بهاي الحالة؟
ركضت الي امي
صارت تهز بية وتبجي
شيماء:ولج يغبرررة شسووويييتييي احجييي
باوعت الها بكل ثقة
همست والدموع بعيوني
وسماء:ما سويت شي
ساهر:شتسوين بعد وانتي ضاربة راس البنية بالجامة ومتطشر الكزاز براسها شتسوين؟
ضربتني امي راشدي
وصرخت
شيماء:عزاااااا العزاني تسووودنتيي انتييي
وكعت دموعي
ركضت الي خنساء
سحبتني الها وكالت بخوف
خنساء:كوليلي ليش هيج سويتي ها؟
شيماء:احجييييييي
كلت وصوتي يرتجف
واحس اكو خنكة بصدري
وسماء:لمت البنات وصارت تكول الهم وسماء بنت السكير المسجون وامها خبازة وتخدم بالبيوت وصاروا يضحكون علية تقبليها!!
خنساء وكعت دموعها
وباوعت ع ساهر
وهو كال
ساهر:واذا كالت هيج تفوتين راسها بالشباك؟
صحت
وسماء:وافوت راسكككك وياها اذا دافعت عنهااااا
صاح بية
ساهر:ولللللللج جسررررررة
وكمز علية ياسر صار يضرب بية
وانا ادفع بي وامي تصرخ وتلطم
اخذتني خنساء لحضنها وصرخت
خنساء:كاااافي كااافي عوفهاااا
امي راحت تركض ع ساهر
وتبجي وتكول
شيماء: فهمني البنية خو ما تموت؟!!
ساهر:بيج حيل تدفعين فصول بسبب مراهقة؟
صرخت ووسماء ضربتني ع حلكي
واخذتني سحل للغرفة وانا ادفع بيها
وسماء:مااااا شفتييي نظراتهمممم الييي ما سمعتيهم وهمة يضحكون ع جروووحي خنساااء يغلطون ع اميي يكولون الي بنت الخدامة
قفلت باب الغرفة
وضربت خدها وصرخت
خنساء:ولللج كاااااافيييي كافيييي مصاييييب كااافي احنة ماعدنة قدرة طاقة ماكووو اهل وسند ماااكو مافكرتي بأمج منين تجيبلهم فلوس اذا طلبوا فصل؟؟؟؟
نصيت راسي
خنساء:امي خدامة صح كلامهم بس انتي ما فكرتي هالخدامة شلون كادرة تسد احتياجاتججج واحتياجات مرج وام الطموح دُرر
كالت بصوت مبحوح
ايدها ع صدرها ودموعها مالية عينها
خنساء: ما فكرتي بخنساء اللي ظهرها مكسور بالشغل؟ ليش تجيبين ع راسنة المصايب؟؟
كعدت بركن الغرفة
حضنت رجلي وصرت ابجي
انا ردت اخذ حقي منهم
انا مو غايتي اذية امي
انا ادافع عنها
احبها...
طلعت وعافتني
هدأ البيت
لليل انا كاعدة بمكاني محد يحاجيني
صرت اسمع كلامهم برا
اسمع امي تبجي وتحجي لخواتي
شيماء: رحت للمستشفى مثل الذليلة اتوسل بيهم واكول الهم بنتي طايشة رحت هناك اذل روحي انا مو كد حمل مصايب بس ابو البنية خوش رجال اخذها من وجهي وكلي مشكلة عادية
خليت ايدي ع حلكي
ودموعي تجري وانا اسمع شهكات امي
شيماء:هي مو مشكلة عادية بس هو شاف حالتي التعبانة شاف وجهي التايهة ملامحي عباتي القديمة فقري وذلتيييي
صارت خنساء تواسيها
وانا بالغرفة ابجي
سمعتها كالت
شيماء:هالبنية الله نطاها الي عقاب حتى يعاقبني بحياتييي لووو الله ما مشوفني وجهج روحي يا وسماء الله يشلع كلبج مثل ما شالعة كلبي وانا مو كد حملللل
خليت ايدي ع شعري
دموعي تحرك خدي
تسحبت لفراشي
غطيت نفسي وغمضت عيوني
صرت احاول اتجاهل صراعات روحي
والله اللي شفتة بطفولتي مو قليل..
والله اللي عشتة مو سهل
انا مو عقاب
انا ادافع عن امي واحبها
انا اريد احافظ ع كرامتها
ليش تسميني عقاب!؟
بجيت هواي
وما حسيت ع نفسي شوكت غفيت
ومر الليل
وفزيت الصبح وحدي
دون ما احد يكعدني او يهتم الي
موعد الدوام رايح
الغرفة فارغة
كمت من مكاني حتى اطلع برا
سمعت صوت رجال
توقفت وصرت احاول اميز
هذا ساهر!؟
شعندة جاي؟؟
وكفت اسمع كان يحجي وي امي
ساهر:ام ياسر الله يخليج شنو مابيها شي؟ اكلج مريضة نفسياً عدها اسلوب عدائي
خليت ايدي ع حلكي
يقصدني اناا!!!
شيماء: هي منفعلة واكو هواي مواقف بالطفولة باقية براسها ولا تنسى هي مراهقة
ساهر:ميخالف بس هذا ما يمنع ان نعرضها ع دكتور نفسي
فتحت عيوني مصدومة
ما تحملت وجودي
طلعت..
وسماء:شنو شنو؟
اول ما شافني كام
كال
ساهر:يلا ام ياسر اترخص
وسماء:منو اللي توديها لدكتور نفسي!؟
شيماء:وسماء اسكتي
صحت
وسماء: انتتتت جاي حتى تحرض امي علية؟ انت شنو هدفك؟
التفت الي خزرني
دفعتني امي لداخل الغرفة
شيماء:كااافي عاد فوووتي جوة
طلع ساهر
ودموعي توكع
اجت خنساء ونترت
خنساء:شلووون يعني تبقين بهاي تصرفاتج؟
وسماء:يريدون يودوني لدكتور نفسي
التفتت وباوعت ع امي
شيماء:شبيج هيج تباوعيلي اختج تصرفاتها مو طبيعية
خنساء:يمة انتي صاحية ع اللي تكولي؟
صحت
وسماء:والله لو تموتووون مااروح لدكتور نفسي وهذا ساهر بعد لا يفوت لهنا انا ما بيييية شييي
خنساء: كافي سدو الموضوع
كل واحد راح بجهة
وانا بقيت كاعدة بمكاني وايدي ع خدي
شكد يكرهني ساهر!؟
لدرجة يريد يسويني مخبلة وانا مابية شي..
.......
خنساء
مشاكل هواي
احسها تحتاج قلب جبير حتى يوسعها
قلبي ما عاد يحتمل اكثر
من بين كل هالكون
مااحس اكو مكان امن حتى ارتاح بي
من صغري
ولا ليلة كدرت انامها بهدوء
ولا ليلة كدرت ارتاح
ما اختفى القلق من ذاكرتي ابدا
بالعكس تماما كان يشعشع ويزداد
خلصنا من مشكلة وسماء
دخلنة لمشكلة الدكتور النفسي
وسماء مو مريضة نفسيا
وسماء انفعالية
تجولها الطويل مع امي بطفولتها زرع بداخلها عقد
وبقت هواي احداث بذاكرتها
غير قابلة للنسيان
وهالاحداث دافع للانفعال
شلت سلة الملابس وصعدت للسطح
كعدت فوك وايدي ع راسي
اريد اخذ استراحة من العالم
لكن هيهات..
حتى بوسط صفنتي
تزورني هواي افكار
اولها حسن
يلا خنساء
ليش ضايجة من حياتج
مو بس انتي تعانين
حسن من عائلة غركانة بالفلوس
بس هو وضعة اسوء من وضعج
بهاي الحياة انواع
ناس تعيش محرومة مال
ناس تعيش محرومة حنان وعاطفة
ناس مهمشة تنحرم من الاثنين معاً
طلعت التلفون من المخبئ مالتي
فتحتة لان كان مقفول
شفت رسالة من حسن
كاتب
حسن:ليش تختفين وينقفل رقمج؟
تنهدت بتعب
انت هم يضاف فوق همومي
ضميت الجهاز فوك بالبيتونة
ونشرت الملابس و نزلت
صبيت الغدة وتغدينة
وكل واحد راح لمكانة
بيتنة اصبح هادئ نوعا ما
خاصة بعد ما انسجن ابوية
كنت كاعدة اخيط بالعباية
سمعت موبايل يرن
كلت
خنساء:يمة موبايلج يدك شوفي يمكن دُرر
طلعت امي من الغرفة
وبأيدها الموبايل
كالت
شيماء:ماكو يمة محد يدك
صفنت
وفتحت عيوني مصدومة
عزا العزاني نسيت الموبايل ماقفلتة!!
كمت بسرعة طلعت برا
ورجعت وانا اكول بأرتباك
خنساء:ها هاي بيت جيرانة عبالك واحد منهم وو. واكف ببابنة وموبايلة يدك
شيماء:مدري الصوت عبالك فوك
بلعت ريك
خنساء:لالا شسالفة انا سمعت من برا فوتي نامي يمة لانج تعبانة
راحت امي للغرفة
خليت ايدي ع كلبي
وصعدت اركض لفوك
طلعت الموبايل
قبل مااقفلة دك
فتحت وخليتة ع اذني وانا اتنفس بقوة
اجاني صوتة وهو يكول
حسن:كل مرة اتصل والفون مغلق شعجب هالمرة مفتوح؟
كلت بتعب
خنساء:شتريد؟
حسن:شبيج تتنفسين بسرعة صاير شي؟
سكتت
حسن:لا يكون اهلج ما يدرون تحاجيني؟ انا اسف سويتلج مشكلة مو
همست
خنساء:ما صارت مشكلة بس بعد لا تتصل
حسن:خوخة اسمعيني
صفنت ع كلامة
واحس دكات كلبي تخربطت
بحياتي كلها ماكو بشر دلعني بأسم غير اسمي
خوخة!
حسن:شبيج سكتي
خنساء:شنو
حسن:اكيد اهلج ما يدرون انتي تحاجيني واساسا اي اهل ما يقبلون لهذا تقفلين الموبايل صح؟
غمضت عيوني بقوة
يربي شسويت بروحي
حسن:انا اسف لان لحيت عليج بس انا ماعندي احد اسولف وياه لهذا هيج اتصرف
بلعت ريك
المشكلة انا اعرفك
واعرف ان الكلام اللي تكولة صح
لكن شسوي؟
همست
خنساء:وشنو المطلوب مني؟
حسن:من تحسين نفسج فارغة حاجيني
خنساء:وليش؟ شنو السبب؟
حسن:الانسان يحتاج ناس يساندوه او ع الاقل يسمعون الة
خنساء:انت ما تعرفني شلون تسمح لنفسك تتكلم مع انسانة ما تعرفها؟
سكت
بعدها كال
حسن:بس انتي تعرفيني وتعرفين عائلتي والا شلون اتصلتي؟
خنساء: صح
حسن: وبرأيج اكو واحد يعرف عائلة سلوان ما يعرف حالتي؟ ههههه انا مفضوح ع فكرة
سكتت
حسن:اذا ما تريدين تتصلين بية براحتج واعتذر مرة ثانية اخذي راحتج خوخة
وانغلق الخط
قفلت الموبايل وخليت ايدي ع راسي
شجاي يصير؟
شنو اللي اسوي بروحي؟!
اذا استمريت ويا بالكلام
شنو النهاية!؟
لا انا الكايلة الة ع المعمل
ولا هو اللي منسحب عني
لازم انطي الموبايل لهاجر
لازم..
نزلت جوة
كلهم نايمين
بقيت صافنة وافكر
اباوع للوقت
بعد ساعة اروح ع هاجر
انطيها الموبايل من الباب وارجع
ما ناقصني مشاكل
كملت العباية وبالي مشغول بحسن
وهو يكول خوخة
ليش افكر بي؟
يمكن لان ما لكيت احد يحجي وياية بهالطريقة
كمت خليت العباية ع راسي
كلت لأمي
خنساء: يمة راح اروح ع هاجر اتطمن ع حالها لان هالايام مختفية
شيماء:اكعديي بيتهم بي ولد ماتفوتين الة
تنهدت بتعب
خنساء:يمة من الباب بس اسلم عليها واتطمن مااتأخر والله
شيماء:5 دقايق وتجين اذا اسمع بيج فايتة جوة اكسر رجلج
خنساء: تمام
طلعت لبيت هاجر
دكيت الباب هواي محد طلع
بالاخير طلعلي اخوها
اول ما شافني كال
:خيير؟
خنساء: ممكن تصيحلي هاجر؟
كال بعصبية
:هاجر مو هنا طالعة الله وياج
دخل جوة
وسد الباب بوجهي
غمضت عيوني وعصرت الموبايل
شلون وي هالبلوة يا ربي؟
رجعت للبيت
وعيني ع بيت سلوان
فجأة انفتحت الباب وطلع حسن
فزيت ودخلت ركض لبيتنة
وسديت الباب
عزا ما ناقصني مصايب..!!
دخلت جوة وضميت الموبايل
وامي ومرج كاعدين يشربون جاي بالصالة
كعدت يمهم
شيماء: شلونها هاجر
خنساء:ما شفتها اصلا اخوها الحيوان طلع يكلي ماكو وسد الباب بوجهي
شيماء: يااا مو كتلج لا تروحيلهم
مرج:اوي الله يعين هاجر ع هالحياة
اباوع وسماء واكفة بباب الغرفة
شكلها تسمع كلامنا
خنساء: وسمة تعالي اكعدي يمنة وبطلي حالة التجسس هاي مو حلوة
اجت تمشي ع كيف
وكعدت يمي دون ما تكول شي
كالت امي
شيماء: لكيت شغل ببيت والاجور زينة كلش زينة يعني تسد احتياجات اختكم درر
خنساء: يا الله وين هالشغل هذا؟
شيماء:والله جارتنة ام محمود عرفتني ع مرة وهالمرة تشتغل ببيت واحد بالدولة وتكول محتاجين عاملة وحسب ماكالت الي الراتب زين
خنساء:بس يمة انتي كبرتي ومابيج حيل للشغل وهذا ما دام بالدولة اكيد بيتة جبير ومتعب
كالت وسماء بسرعة
وسماء:انا اشتغل مكانج من ارجع من الدوام كبل اروح
خنساء:لا انتي صغيرة مو مال هيج شغل اروح انا
شيماء:خنساء انتي شغل البيت عليج والعبي شغلج حلو بيها ومضبوط لهذا ما تكدرين تشتغلين يم ذول
خنساء: مو كنت اشتغل يم ست ماجدة؟
شيماء: بس كنت انا اقوم بأعمال البيت وخواتج يساعدوني هية محد يبقى بالبيت كلهم بدواماتهم وانا هم تجيني اشغال برا
خرجت مرج عن صمتها وكالت
مرج:خلاص انا اشتغل اعرف انا المرشحة
شيماء: مو بوحدج راح اساعدج يوم انتي يوم انا
خنساء: يمة بس مرج عدها جامعة
شيماء: من تجي من الدوام يمة ترا ماكو حل غير هذا
مرج:احنة نسوي كل هذا وست دُرر مرتاحة يم الانباريين
صاحت امي
شيماء: ولج ادبسزززز لا تحجين هيج ع اختج
مرج:احجييي ونصص انتي ما فكرتي بية او بوسماء كبل كلتي لكيت شغل يأمن مصروف دُرر انتي حتى ما فكرتي بمصروف البيت والايجار
امي سكتت
خنساء: مرج كافي صياح انا محتاجة شغل وراح اشتغل بدالكم كلكم كافي
مرج:لا انا اشتغل اساسا انا تعبانة واريد اطلع من هالخنكة ومراح يأثر علية الشغل
كامت للغرفة
اباوع لأمي نصت راسها مقهورة
خنساء:يمة مرج ووسماء هم حقهم عليج ما يصير تفضلين بس درر
شيماء: ذول كدام عيني بس درر اذا احتاجت شي منو يمها يمة؟مااريد انقص عليها شي حتى لا تحتاج بشر
تنهدت بتعب
مسؤليات الحياة جبيرة
حيل جبيرة
واحنة بنات هواي
والبنية كلشي تحتاج
معقولة تهمشنا الحياة بعد؟
.......
مرج
دخلت للغرفة وانا مقهورة
درر اختي واحبها
بس درر انانية
ما فد يوم فكرت بينا
دومها تفكر بس بنفسها
واحنة ندفع الثمن
لكن رغم هذا امي واكعة بيها
وانا لازم اساعد امي
ما اكدر اعوفها تتعب بوحدها
واساسا انا احتاج اطلع
مااحب البيت
كملت دراسة
سديت الملازم ونمت
ثاني يوم رحت للجامعة
كملت محاضراتي والتقيت بوليم
كعدنة نسولف
مرج:شلون صارت عمة؟
وليم:بعدها تعبانة
مرج:جاي تاخذ علاج؟
وليم:اي والله بس تعرفين هي كبيرة بالعمر
مرج:الله يشفيها اهتم الها
وليم:ان شاء الله
ميل راسة
وليم:احسج ضايجة؟
مرج:لا مبية شي
وليم:اعرفج من عيونج
مرج:شوي ضايجة من وضع اهلي
وليم:شبيهم
مرج:تعرف اختي درر بالانبار وابوية انسجن وانا جامعة ووسماء مدرسة يعني مصاريف زادت وامي بوحدها ما تكدر
وليم:اي حبيبي هي الحياة صعبة
تنهدت
مرج:لهذا راح اساعد امي بالشغل
وليم:شلون يعني؟
مرج:يعني راح اشتغل ببيت مدري تكول بيت مال واحد بالدولة
كال بأنزعاج
وليم:تشتغلين خدااامة!!!
باوعتلة بانزعاج
وليم:مرج شبيج؟ انتي صاحية؟ بهالعمر هذا تشتغلين خدامة؟ لا وبيت منو ببيت واحد مسؤل بالدولة انتي تعرفين اخلاقهم ذول؟
تنهدت بتعب
مرج:شنو اللي اسوي؟
وليم:لا تشتغلين ما مجبورة
مرج:ومنو يكمل مصاريفنا منو يساعد امي؟
وليم:ما تشتغلين ببيوت العالم افهميي
نترت
مرج:لا تحكمنييي وانت ما تعرف ظروفي ما تريد اخدم ببيوت العالم تعال اخطبني وطلعني من هذا الضيم انت فاهممم؟؟؟
نصة راسة وسكت
شلت الملازم وكمت
مرج:لا تهيني وتكول خدامة عند العالم انا فقيرة والفقر مو عيب والشغل هم مو عيب لا تشوف نفسك هسة انت كاشخ لا تنكر حقيقتك انت هم عامل وتشتغل ببيوت العالم فد يوم عيرتك وكتلك انت عامل؟؟؟
وكف كدامي
كال
وليم:اهدي انا ما اقصد شي..
مشيت وتركتة
لحكني
وليم:مرج اسمعي
توقفت ونترت
مرج:ولييييم كافي لا تلحكني ولا تحجي شييي واعتبر اللي بينة منتهي مستحيل اكمل وي انسان ما يقدر ظروفي
طلعت بسرعة
عيوني متروسة دموع
صرت ابجي وامسح بدموعي
طلعت برا
اخذت تكسي ورجعت للبيت
ع طول الطريق ابجي
انا اشتغل ببيوت العالم صح
بس هذا ما يعني ما عندي كرامة
هالكلام هذا من يبدر من انسان غريب صح يجرح
بس القريب من يكولة يقتل
الغرباء يجرحون
لكن الاقرباء يعلمون موضع الألم
ويستهدفونه..
دك موبايلي
هو يتصل
قفلتة وضميتة
كافي مااريد اسمع شي بعد
انا اعصابي منهارة وتعبانة
وصلت للبيت
نزلت بسرعة
كبل رحت للغرفة بملابسي نمت
كنت احتاج استراحة
او قيلولة تنسيني حقيقتي
تنسي مرج ان هي مرج...
........
الانبار
درر
تركتهم يتسالمون ع بعض
وسحبت نفسي بعيد
رماح ابن عم هذا!!
ذول شيردون مني
ع شنو ناوين؟
معقولة نيتهم غدر
ويطلع كلام امي صحيح!!
خلي انسحب وابتعد افضل الي..
مشيت مسافة
سمعت صوتة خلفي
صگر:درر بس لحظة
التفتت وصار امامي
كال
صگر:اوصلج؟
عقدت حاجبي
ذول ما يفيد وياهم الخوف
كلت
درر:انت شتريد مني؟
ضيق عيونة مستغرب
درر:شعندك ملاحكني؟؟
صگر: انا اعتذر بس مو قصدي شي
درر:جا قصدك شنو من هالحركات
ابتسم
صگر:حلوة الجا منج
درر:ساعدتني وشكرا للمساعدة وبعد لا تعيدها
مشيت ومشة وياية
وهو يكول
صگر:ليش تكرهين الانبار؟
ما رديت
صگر:شيعية يولو وتخافين منة
توقفت بخوف
تذكرت كلام امي وهي تحذرني من الطوائف
رفع حاجبة بتعجب وابتسم
صگر:كلامي صح معناتو انتي شيعية
درر:انت شتريد؟
صگر:شكد عمرج مبين صغيرة اوو ليش اسأل شفت مواليدج 19../5/3
عقدت حاجبي
درر:انت شعرفك بمواليدي؟
صگر:ما جاي للبصرة تحديدا ال... غير مرة وحدة
ذكر اسم منطقتي
دخل الخوف بقلبي
مشيت بسرعة
لحكني وهو يكول
صگر:لا تخافين شفتها بالهوية
بقيت ساكتة
صگر:عندي سؤال
كلت بأنزعاج
درر:انت شتريد ليش ملاحكنيي؟؟
صگر:وعصبية هم هههه
ضيق عيونة وكال
صگر:بما ان الانبار انبارنا عندي سؤال ما تتزحزحين من هين ان ما تجاوبين
دخل الخوف لقلبي من طريقة كلامة
كلت بأرتباك
درر:اسأل وخليني اروح لان ماكو هيج ملحة
صگر:انا الادري البصراويات سمرات شعجب انتي هيج بيضة؟
كال هالكلام و ع وجهة مرسومة ابتسامة
ونظرة اعجاب
حسيت الوضع خطر!!
مشيت بسرعة
وسمعتة يضحك
ما صدكت شوكت اوصل لخارج الجامعة!!
تلفتت وراية ما لكيتة
ساعة السودة يوم الوكفت بذاك المكان
ساعة السودة يوم الوكعت هويتي
ساعة السودة يوم الاجيت للانبار
شراح اسوي؟!
ودب الخوفُ في قلبي..
.......
بغداد
الساعة ال11 ليلا
ابان
وقفت السيارة
خليت راسي ع المقود
احس روحي تعبانة
وين وليتي يا غضب!؟
من الظهر ادور عليج
تارك الدوام والامة والعالمين
وابحث عن حلم ضايع..
شصار هسة بيج؟
شمدريني بأيد منو وكعتي
يمكن رحتي للعصابة مالتج
والله انتي مالج امان
يمكن بسببج ابان يروح بخبر كان
انا بخيالي اشك
بس انتي خليتيني احتار
وكعت ما بين الشك واليقين..
طلعت فوني
اتصلت بأختي بان
فتحت الي
كلت
ابان:من الظهر ادور عليها ومالكيتها ارتاحيتي؟
كالت بأرتباك
بان:ها يعني وين راحت؟
ابان:ماادري فص ملح وذاب كتلج البنية مشردة كتلج دادور ع اهلها اي ضرر يصيبها انتي السبب لان تصرفتي بحقارة
سديت الخط
رجعت راسي لورة
انا ساعدتج هواي
طلعت الامور عن سيطرتي
شسويلج بعد!؟
شنو اللي لازم اقدمة وماقدمتة؟
الله الحافظ
اول او تالي راح تواجهين مصيرج
شغلت السيارة
وتوجهت للبيت
وانا اقنع روحي ان هاهية
بس بداخلي نار
داخلي ما مقتنع ولا مستوعب
اكو نزاع وصوت يكول هالبنية مسكينة
لكن شسوي!؟
وصلت للبيت ونزلت
قبل ماادخل اتصل بية لؤي
رفضتة مااحس عندي قدرة للكلام
رجع اتصل من جديد
خفت لا يكول صاير الة شي
فتحت
ابان:الوو ها لؤي
لؤي:انت وين؟
ابان:يم بيتنا شكو
لؤي:راح ادزلك عنوان تعال علية بسرعة
ابان:شبيك صاير شي
لؤي:تعال ومعليك
انغلق الخط!
رجعت للسيارة وشغلتها
دزلي رسالة بيها العنوان
مشيت لهذا المكان وبالي مشغول
شصاير؟
وصلت لهناك
منطقة شبه فارغة
ولؤي كاعد بسيارتة
نزلت علية وهو نزل من السيارة
ابان:شبيك لؤي شجابك لهذا المكان
كال
لؤي:باوع ع ذيج الجهة يا غبي
باوعت ع المكان اللي اشر علية
شفت بنية لامة نفسها بقوة وكاعدة
عقدت حاجبي وكلت
ابان:هُرم!؟
احس الامل رجع الي من جديد
اجيت اروح الها جرني من ايدي
لؤي:اوكف البنية تحركاتها غريبة
عقدت حاجبي
ابان:شسوت؟
لؤي:كنت مار من بيتكم القديم وشفتها طلعت هي مهزومة مو؟
هزيت راسي بمعنى اي
والقلق ياكلني اكل
لؤي:خلصت الطريق كلة بجي وانا تبعتها تمشي من مكان لمكان دون وجهة الظاهر ما تندل وهواي اشخاص عرضوا عليها المساعدة لكن هي رفضت بأيديها اجراس وتسأل الناس عن صاحبتها والناس عبالهم مجنونة ابان هالبنية مو صاحية؟
بلعت ريك
ابان: ما التقت بأحد او راحت ع مكان مشبوه؟
لؤي:لا ابد
ربتت ع كتفة ورحت عليها بسرعة
وهو تبعني
وصلت الها وكلت
ابان:هُرررم
رفعت راسها بخوف
اول ما شافتني ابتعدت لورة
كان الجو بارد هواي
وملابسها خفيفة وشكلها مستبردة
ابان:شجابج هنا؟ شطلعج من البيت كووومي
اقتربت منها وهي ابتعدت
دموعها توكع وشفافها زرك
ابان:لااا تعاندين
صاحت
هرم:وخرررر روح ما اجي وياك لأي مكان
صرت اباوع منا ومنا
اخاف اكو ناس يشوفونة
دنكت عليها وجريتها بقوة ومشيت
وهي تدفع بية وتبجي
كانت عبارة عن قطعة ثلج!
ابان:كااافيييي اشششش اسكتييي
بقت تصارع بأيدي الى ان وكعت
لميتها بحضني وصفنت ع ملامحها
همست
ابان:هرم تسمعيني!
بهاللحظة حسيت كلبي دك دكة مختلفة
وفجأة حسيتها شيء يخصني!
هرم منو المريض
انا او انتي!؟
.......
مساء الخير
حبايب قلبي هالرواية مختلفة
بكل احداثها وشخوصها وواقعها
لهذا تقبلوا الاختلاف
ولا تركزون ع خلوها من العاطفة
لان بعدنا مجرد بدايات❤
انتظرووونا
ولتنسون التصويت