تكملة ألحلقة الأخيرة ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
وهنا تصيرلنه هوسه...
أني خايفه على كميلة وأبويه من ضيم الكرونه وضامتهم من الهوا والبشر...وتطلعلي سالفه بتول صفح
بتول صلوات على النبي موش صغيره عمرها ٢٠ سنه.
ومن العام اني شكيت بيها...
هي موش كملت دراسه...
صلوات خلصت سادس إعدادي....
محمد ما قصر وياها...وكف بوجه أخواني وخلاها تكمل
ودبرلها خط ... وتروح وترجع ويه البنات
دخلت معهد التقني بابل...قسم أداره مواد...
كاللها//حتى أدبرلج وظيفه ويايه....
منو أبو خطها من وكت المدرسه...وهسه بالمعهد
عدنان أبن عصامكو...سيارته صغيره حديثه
سجلت عنده هي واثنين بنات من طرف الديره
وتروح وترد وياه...محمد وألولد مأمنين عليها وياه.
بتول من خربتها عليه بطه الحقيره مرت حمودي
شلون ألابتعدت عني...الحقيره بطه فهمتها
اني موش امها...وكميلة هي أمها ألصدك
واني موش بتهم ...ولكوني بالشارع
وأبويه رباني ...
ومحمد ستر عليه وتزوجني...
ومسولفتلها حتى سالفه ألمرحومات ...
وشلون جنت عايشه عدهن...
وشكثر مسولفتلها عن ألسوالف الماضي.
هي جانت بعدها مراهقه عمرها ١٣ سنه
هستوها رايحه للمتوسطه...شلون الانصدمت
من عرفت كل هذن السوالف...تسودنت علينه...
وبقت بس تبجي...ومحمد كعد حجه وياها...
اني حجيت وياها ....
وهي تسودنت وبس تكول//أنقهرت عبن غشيتوني
انتم موش أهلي ألصدك...وبقت تخيط وتخربط بالحجي
هي من كبرت واجتها الحبابه كامت تستحي
تكعد لو تنام بحظن محمد...بس كلش تحترمه
وتغار عليه من باقي ألجهال...
من ظلت تبجي ومقهور وتخيط وتخربط بالحجي
محمد لكفها وحظنها وضمها بين ظلوعه
وهي هلكد نشغت وبجت بحظنه
تكله//ما أريد أفكر انت عمي موش أبوي
كاللها//ولا تفكرين أنا أبوج للموت أبقى أبوج
ومن يومها بتول أحسها تغيرت عليه
صح تحترمني....وتسمع كلامي
بس أحسها تشتت...
لا تكدر إداري كميلة وتشوفها هي أمها ألصدك
بحسابها هي عافتها من ألصغر...وتبرعت بيه اليه
لان جان ما يصير عندي جهال....
ولا تكدر بعد تشوفني اني امها ألصدك
واني بحسابها مرت عمها...واختها المربيها أهلها.
شلون شكيت بيها تغيرت وبلشت بسوالف الحب
كامت تلبس وتكشخ وتهتم بروحها
موش بس علمود ألدوام
لا تهتم بروحها لخاطر شخص ثاني ...
محمد ما يقبل تحف لو تعدل حواجبها لو تخلي مكياج
بقت تتوسل بيه علمود بس أحاجي يوافق تخلي كحله.
ومن ليل تبقى تحضر أكل وترتبه
وتعزل حصه لعدنان بحجة أبن عمها
وشلون يطلع بدون ريوك .
وهي وبنات علاوي وبنات باقر يكعدن يسولفن ويبشبشن...وتسمع أغاني حب وطكطكه .
أحنه كل النسوان البيت ما عنده تلفون ...
بس نرجس مرت سجاد عدها جهاز ...
وعود اذا نعتاز شي نخابر منها ...
لو شوف منو موجود من ألولد هو يخابرلنه....
بس من توظف حمودي...وصلوات ألصبح كلهم بالدوام
محمد اشترالي جهاز عادي هذا صغير
اسم الله خاف كميلة تتخربط...لو يصير شي
اخابر عليه لو على واحد من ألولد
وهذا التلفون تكلبوه يمنه يسرى تلكون بس رقم محمد
وأخواني ورقم حسيون غير رقم ماكو .
اني مالي شغله بالتلفون يحوس بيد ألجهال
محمد يعبي رصيد منا...ماكو يومين ثلاثه ونلكاه موشل...
وأني ألصدك ماأعرفله...كد اطلع الاسم
واخابر من الدكمه الخضره...واطفي من الدكمه الحمره.
محمد ما تفوته فايته...يبقى يكلب بالجهاز
وكل ما يعاينه يكلي الجهاز كله ممسوح وصافي
بس اكو بي شغله ما تنمسح هي مدة المكالمة
سألني مره وثنين وثالثه //ويه منو هلكد مخابره
واني على نيتي أكله //مثلا خابرت علاوي
لو خابرت حمودي...هو يطابق وكت ومدة المكالمة
يتسودن عبن ما يشابهن بتلفوني وتلفون ألولد.
هو أستغفر الله شك بحمودي كال//يمكن واكع على وجهه...وحاظيله بطيره...أطيح حظه اذا يجيبلي سالفه.
وبيوم بليل تقريبآ ساعه ب١١ اكثر دك عليه بس رقم
جاوبته محد رد عليه ...
هو محمد حجه وياه ما يرد بس صوت ألنفس
وأنوب كال بصوت غريب ما عرفه محمد
//أسف عمي غلطت بالرقم.
وعده الوكت واني موش فطيره ولا غشيمه
واليحب ويوكع بسوالف الحب الكفه لو يضم روحه بزاغور...عبن كل سوالف وضيم الحب طكن عليه .
وأراقب بتول تصفن...وتبتسم ويه روحها
وتندمج ويه الأغاني...أجيت وسألتها//يمه اذا عينج
وروحج مالن لزلمه خير كليلي حت اساعدج
لا تخافين مني .
جاوبتني//لا اسم الله ماعندي هذا الدرب.
وبيوم كاعده أعجن وتجيني نهله
نهله موش مرت أخوي،،،ولا صديقه عمري
نهلة أختي وأعز من هاي روحي...
أجتني مصكوكه وخايفه وتتلفت
نكتت أيدي من ألعجين وسحلتني لغرفتي
طبكت ألباب وخرطت وجهه وكالت//صخام وعزة
بتول راح تسويلنه سالفه ويذبحوها ألولد
أني سمعتها كالت هيج لو خرطت العافية
كتلها//شبيها شسوت...
كالت//يالعوبه بنتج عاشكه عدنان وهو عاشكها...
وحتى للدوام ما تروح يبقى يفرفر بيها
والله وأعلم وين يرحون...ويرجعها بوكت الطلعه.
ولج حتى يلزم أيدها...وحاظنها...ومبوسها.
أني سمعت هذا حجيها أفترت ألدنيا بيه
عزززه وصخام شريد اسولف وشريد أحجي
كتلها//شلون عرفتي ...
جاوبتني//هي تسولف الرقيه ومستسره بيها
وأول أمس من مبوسها مسولفه ألها...
ورقيه بقت تحوس وهي صارت شويه اعكل منها
وهسه أجت سولفتلي تخاف عليها لا علاوي يذبحها.
أني أفترت ألدنيا بيه...شريد أسوي
وهي حتى ما تسولف وياي من يوم ما سألتها
وأحسها تخاف حتى توضحلي سالفتها .
أني أحجي ألصدك وبدون جذب هنا ما عرفت أصرف
أحس ألسالفة أكبر من عقلي...ما أعرف لان تخص بنتي
لبست عباتي وطرت على نور هي تنصحني شسوي.
من حجيتلها هي تسودنت كالت//أحنه بدون كلشي
وشيعتنه حمره...وابسط شي لو كالوا عليها
جرت رس من المرحومات...محد يكول بنيه جاهله
ومراهقه وما تعرف تصرف...ولكت إنسان يفهمها
وجذبها لسانه الطيب وصدكت بي .
صفنت وكالت//محد يفض هذا الموضوع غير رجلج
ألعصر أني أجى أحجي وياه...بتول تخصني
هم بنتي...وبنت أختي...وبت بتي.
وصدك أجتي نور ألعصر...
وكالت لمحمد//من رخصتك عندي سالفة وياك تخصني
ممكن نكعد وحدنه أريد اسولفها بس الك
وأخذ شورها منك.
وكعدت بالصاله بس هي ومحمد
وطلعت حاجيتله بالصدك...وباأسلوبها وصلت كل ألسالفة لمحمد...وكعدت تقنعه يتأكد ويحل ألسالفة
بدون هوسه ومشكله.
هو بقى الليل كله يفور...ولا حجه ولا سولف...
وثاني يوم بليل ويجي عصامكو وابنه عدنان علينه
بس عيونهم تسولف...لان محمد ما كام وسلم عليهم
وعصامكو تسودن يريد يعرف علش محمد زعلان عليه.
هو عصامكو كاله//هااا كو.... صرت مدير
وكبر راسك عليه.
محمد أطفر وأهمش بتول من شعرها وشمرها على عصامكو وكاله//موش أنا الاتكبر على أخوي
بس عيب على أبنك يمد أيده على عرضي .
هي خافت وكامت تبجي وترجف وختلت بظهر عصامكو...
عصامكو تسودن...هو ومحمد روح وحده بجسمين
كاله//عرضك عرضي...وشرفك شرفي
وهذا أبن ألكلب يستر عليها حت لو جانت موش بت...
محمد صاح بي//حدددك لو أطشر راسك
موش محمد الهلال بنته التطلع عن طريق
بس أبنك النذل خان الثقه...
هو عدنان كال//عمي أنا رايدها...وأحبنها من شبيت
وهي أصفى من شعة ألشمس ....
محمد عاط بي//جاااا اليحب يتختل بالحرام...
يالنذل اليحب كون يصير زلمه ويضم مريته
بجوف صدره...موش يقشمر عليها.
وليش ما هنا ويجي علاوي على الصياح
يابويه خاف محمد مسودن ومصروع
علاوي بعد طبكن سوادينه...لزم بتول جنزها
هو محمد أنقهر عليها ويريد بس يفكها من أيدها
هو وعصام وعدنان ما يكدروله.
وهي من شافت محمد وعلاوي راح يسكطوها
وإخواني أجمي على العياط...
وأبويه بس ساكت ما دافعلها...
ختلت بظهر عدنان .
وعصامكو يصيح ويكلهم//أنا رايدها منكم مراه لوليدي
انطوني عطوة نتفاهم.
هي من ختلت بظهر عدنان...محمد سكت عنها
وكال العصامكو//باجر تجيب عمامي وتجي تملجها
لوليدك النذل.
علاوي كاللها//دبريلج قوطيه وضمي روحج بيها
بس الكفج أنحرج وأنعل أبوج لأبو حت النذل وياج.
وراح لبيته يرجف من ألأعصاب.
كميلة بقت ادك وتلطم...
وبقت تلوم بمحمد شلون انطاها مجال...
وشلون خلاها تكمل دراستها...
هي خافت وبقت ترجف...وهنا ترجع اليه
وتلبد ورايه...وتريدني أحميها من محمد وألولد
ختلتها بغرفتي وقفلت عليها ألباب.
محمد وعصامكو بقوا كاعدين وياهم أخواني
وأبويه وياهم...اتفقوا على الخطوبه وعلى كلشي
بس هو عدنان كال//تكعد بالبيت مااخليها بعد أداوم
محمد كاله//من تصير بذمتك أنت وياها أنا ماادخل.
وصدك عصامكو جاب عمامنه وخوال عدنان
واجمي خطبوا بتول...حتى ما أجمي هوايه رياجيل
نخاف من ضيم كرونه...
وأني تسودنت خليت أبويه ومحمد وأخواني
كلهم يلبسون جفوف وكمامات...
وسجاد تسوكلي الصبح وجابلي كلاصات مي جاهزه
وعصاير...ومواعين وخواشيك جاهزه
وقطع كيك...حتى لا اغسل شي
ولا ارجع ماعون خاف تلكفنه الكرونه.
جانت بس قرايه فاتحه...ورجال غريب عقدلهم
يصير صديق جاسم...
هي بقت يومين مكسوره خاطر...وبس تبجي...
وحتى ما بدلت لبست بس دراعه بيضه
ونور رتبتها حتى ما حفت ولا عدلت حواجبها.
وبقن ألنسوان يسألن// شبيها ضايجه
طلعت حجه //عبن بطلها رجلها من ألدوام
وهم ردن يسألن ألنسوان//شبسرعه صارت الخطوبه
وعليش مستعجلين.
واجاوبهن بالحجي الاتفق عليه عصامكو ومحمد
//عصام عنده موعد التحاق
والعريس ملتزم بشغله ضروريه.
والحمد لله صارت قسمه بتول بساع بساع.
وأني مرتاحه ألقسمتها...
صح هي غلطت وماعرفت تصرف...
وعدنان خان ثقت محمد...
بس تبقى أمه هبه خوش مرأه...
وابو عصامكو خوش رجال .
وبلشنه بتحضير وتجهيز بتول...
بس شنو لا محمد ولا علاوي ولا ألولد يحجون وياها
بس أبويه وكميلة عادي يحاجوها.
وعلاوي كال العدنان//مالك مراه عندي ...
ولا ألك طبه الهذا البيت...ليوم الزفه تأخذها وتطلع.
واني مخبوصه وحايره ويه بتول ..
بين روحه السوك...وتجهيز غرفتها
عون أكل راسي يريدني أمشي ويه نبأ
تريد تراجع للدكتوره هستوها حبلت مره ثانيه
بس وضعها مخربط ينزل عليها دم صارلها يومين...
بتهم أيلاف شايله روحها تدهرب بمشيها تمشي وتوكع.
مشيت وياها للدكتوره ألعصر...
وتعرفن سوالف ألنسوان بعد يبقن يسألن
ويردن يعرفن النغل منو أبوه...
سألني ألبنيه شصير منج (يقصدن نبأ شتكربلي))
جاوبتهن بالصدك هي تصير أختي... ورجلها يصير أخوي
وحدتهن تسودنت...وصارن مؤمنات براسي
وهاي تكول استغفر الله
وهاي تكول خيه انتي متوكده من كلامج
وهذيج تباوعلي بطرف عينها ودير راسها
وأني احلفلهن واكلهن//هاي البنيه تصير اختي بت أمي
وهذاك رجلها الكاعد بره يصير اخوي أبن امي وابوي
وحتى هي نبأ تكلهن عليه//وألعباس ام غيث تصير أختي...ورجلي يصير أخوها...
وأصلا هو رجلي يصير أبن خالتي.
وهن ألنسوان داخن أنسطرن...
من دخلنه للدكتوره سألتني//شصيرين منها حتى تدخلين وياها...
جاوبتها//أصيرن أختها...وهي تصير مرت أخوي .
يابويه صفنت ألدكتوره بوجهي صفنه هذاك الرصاصي من يحرن بشمس تموز وبظهريه هذاك الكيض اليسلخ الجلد من الحر .
هي ملغطت وجهه بيدها...وضحكت كالت//استغفر الله
اختي انتي واعيه على روحج شنو جاي تسولفين.
كتلها//سالفتي طويله لا دوخين بيها
أمي تصير أمها....من أني صغيره أنطتني لأختها
أمي الثانيه الربتني...ورجلها هو أخوي بالربا...
هي ضحكت من خاطرها وكالت//أستغفر الله
عقلي شطح على الترابي...وبقت تضحك.
يا بويه من رجعنه للبيت وسولفتلهم ألصار
طكوا من الضحك...محمد يضحك
ويكلي//شوكت الله يهديج وتسولفين عدل .
استغفر الله العظيم ألوادم صار بحسابهم غير حساب.
كتله //ألحمد لله...أني الله هاديني بس العالم صار تفكيرهم وسخ.
وكمت بكل عصريه اخذ غراض وشغلات بتول
وامشي لبيت عمي ساجت أبو جمال الله يرحمه
صلوات على ألنبي بنوه وعمروه وصار جديد
وتقسيمه صار كلش مرتب ...
قسموا نصين ... وكل نص بنوه طابقين .
يعني بيت عمي ساجت صار ٤ بيوت
كل بيت معزول عن الثاني...
النص الاول صار الجوة السلامكو وعايلته
والطابق الثاني الكمالكو وعايلته...
بس كل بيت بابه وحده .
والنص الثاني الجوة لأم جمال بعدها عايشه ليومنه هذا
وبعدها شايله روحها....وبناتها يمرن عليها
والطابق الثاني صار بس ل هبة وأبنها عدنان
يعني هي حصة عصامكو صارت ألهم
وهم بابهم وحدهم...
وبتها دعاء زوجتها من أول عام ...
بس خطية لهسه ماعدها خلفه...
الصوج برجلها خطيه عنده مشاكل طبيه .
وحصة ألمرحوم جمال...أخذتها مرته
واشترت بيت وكعدت بصف أهلها
ليومنه هذا ما تزوجت وره المرحوم
بقت كاعده وساكته....وربت جهالها
واحدهم صار زلمه هلعرض أجتافته...
وبناتها عرايس...
وعمامهم دوم يوصلوهم ابد ما عافوهم.
هبه كلش فرحانه بقسمه أبنها عدنان وبتول
تكول//بعد هي تربات أم عطأ...وصديقتي ألبرشه
الحمد لله أجت على النيه مابيها سم ألحيايه
وبيوم أجت زفت بتول...تعالوا وعاينوا محمد
هلي يأمن ضيعوني...شابكها ويبجي
حتى أبويه وكميلة ما سووا سوايته .
وبنات باقر وعلاوي شبعن بجي عليها
وهي طكت من ألبجي...
لا بقى مكياج ولا بقت عيون ما نمردت من ألبجي.
أخواني كلهم تراضوا وياها من أمس بيوم حنتها
وباركولها...وهذا الانطاها فلوس
وهذا ألبسها قطعه ذهب ....
الا علاوي لا اجى ولا وصل ولا سلم عليها.
وهي لساعه طلعتها وزفتها تتوسل بنهله
تناديلها علاوي تريد بس تسلم عليه حتى تطلع
وهو رأسه والف سيف...ما يريد شوفت وجهه.
أبوية ودعها أمانه الله ورسوله بيد عصامكو
كاله//أبنك أمس عض أيدي...مالي عتب وياه
بنيتي وداعة الله عندك...
رايد عيشتها وراحتها من الله ومنك...
انا عادك بغلاوة ابو غيث وازود...
لا تكسر خاطري بيوم بهلت دموعها.
هوسه وزفه وسيارات وعالم ماكو
بس ال هاشم متواجدين...
وصغار كبار منكبين بالكمامات...
نخاف من فلك الكرونه لا يلكفنه ويسكطنه
أني ما خليت لا كميلة ولا جهالي يرحون للزفه
وأبويه وصيته يغسل ايديه بالديتول عبن سلم على الرياجيل...وممنوع يأكل شي بين ماارد ...
حتى ألعشا صار جاهز...كل واحد شايل علاكته بيده
بيها ألعشا واللبن والبارد...استغفر الله احس البركة طارت...
وأني صميت حلكي لا أكلت ولا شربت...
وأمشي وأوصي بالبنات جناينه يلزمن جهالهن
وما ينزعن الكمامه لو الجفوف...
وحتى السلام من بعيد بدون مباوس وتحظن
حسبالك وحدتهن راده من بيت الله.
زفينه العرسان...فوك غرفتهم بيت هبه
وكل هوسه العالم جوة بيت عمي ساجت الله يرحمه
وراها هذا الرد البيته ...
وهاي المخبوصه التلم بهوسة جهالها
وهاي التصيح على جهالها حتى ترد البيتها
وبعدهم ألعرب هوسه بهوسه...
ومااسمع غير صوت رمي الجيلات بالحوش
يمه وكع كلبي...هذا المسودن علس بنتي
أنوب صفنت هذا المفلوك منين نزل...
هبه قفلت باب بيتهم عليهم وهاي كاعده يم نسوان تتعشى....
طفرت للحوش...وألجح عصامكو شايل سلاحه بيدة
كتله//ياهو الرمه...شنهي نزل عدنان
رفعلي حواجبة وكالي //تؤ ما يحتاج ينزل
أني أنسطرت...رجعت جوة وسحلت هبه
كتلها //كومي فتحيلي ألباب أريدن اشوفن بنيتي
شو رجلج وأبنج سوها رطينه عليه .
هي كامت تصفك وتهلهل
وهوست //أم العريس منشنشه
وأم العروس مهورشه....وطكتنه بهلهوله.
صعدنه بس أني وياها فوك
عصامكو عاط بالنسوان الرادن يصعدن فشلهن
وخلاهن كلهن يردن جوة .....
صعدنه دكينه ألباب على العرسان فلشناها
محد بيهم جاوبنه....
اني بقيت أكل بروحي خايفه على بنتي .
هبه مرتاحه ولا يمها سالفه...اخذتلها كشه
وكامت تنظف بيتها...
وره شكد يلا فتح الباب عدنان وطلع علينه وجهه مايكصه الموس...
دخلنه اني وهبه على بتول ..شو تشهك وتبجي
كتلها//هاااا كتلج هذا ألمسودن
حركت رأسها يعني لا ....
هو رجع وكال//أم غيث عليش هيج مخوفاتها
ما تبطلن أنتن ألنسوان من هذا التعلوم الأكشر
كعدت يمها وبقيت أباوع عليها...
هو طلع ضايج...صاح //يمه ما تسويلي عشا
لحكته هبه تمشي وتهلهل....
سألتها//هااا كضت شغلتكم
كالتلي//لا...بس خفت من عنده وضربته خطيه تأذه
وعمي من خابره كاله//كلشي كمل
وهو عمي الرمى موش عدنان ..
كتلها//أكضي سالفتكم اليوم ولا تأخيرها
كلام نهلة وفطم جذب...
ونبأ العوبة هي فاهيه....
وكل بنيه تعرس ليله دخلتها تختلف عن الثانيه
ولج اني أمج واعلمج أخذي الحجي مني
أنتي موش تحبين رجلج ألمسودن
ولج بس لا تخافين من يمه ولبدي بحظنه
بالعباس تندعيلي وتكولين أفيششش يايمه لو معرستلي
من كبل...يالعوبه أني اتزوجت أبوج محمد عن حب
لليوم أهجس نبضه كلبه مربوطه بكلبي....
ولج بس لا تخافين ومن طرت الفجر تمشين وتسولفين ويه روحج وتكولين أفيشش نارك ولا جنة هلي .
رجعت هبه وكالت//ما تكومن تتعشن
ماطول الاكل حار...عدنان منتظرجن.
أني كتلها//تعرفيني خوافه اروح أتعشى بيتي
وانتي بتول يلا كومي تعشي ويه رجلج
دنكت عليها وبوستها....
ولزمت هبه من أيدها ومشيت بيها
كتلها//اقفلي عليهم باب ألشارع وحبسيهم
هذوله واحد أعيير من ألثاني...
دعيت لبنيتي من نص كلبي...كون الله يسعدها ويوفقها...ورديت لبيتي.
لكيت نرجس واصله كبلنه ومعشيه أمي وأبويه
وبنات باقر وبنات علاوي كاشات ألبيت ومنظفات.
محمد ضايج وكالب خلقته...حتى ما متعشي
ولا قبل يشرب جاي...حتى تلفونه غالقه...
جهالي كلهم ينامون بالهول...
أجيت وتمددت بحظنه...ولا يهتم ولا يتحرك
بوسته...عضيته...حظنته...ماكو ولا يتحرك
ضايج فرد نوب...أني هم عفته براحته ونمت.
حسيت عليه يمسح على متني...
كالي بصوت ناصي//سنين عاشكتني...
وداكه هذا أسمي على جلدج...ومن ملجت غيرج
وشبت بيج نار ألغيره وصلتي ألموت وما فد يوم بيتني
لو أستخفيتي...الله آكبر شكد بذرتج نظيفه
وزرع مؤمن....
شمالهن بنات هل وكت لعبن فلك...وغطن روس أهاليهن بالطين...الله آكبر لا يخافن ولا يردعن....
جاوبته وكتله//موش صوجهن صوج الدش والتلفون
والانترنت فسدهن وطلع عينهن...الله يستر بناتنه
وبنات العالم.
ويمكن أني حبيتك وعشكتك من أول مره لجحتك بيها بس ابد ما حجيت جنت أخاف من نور .
هو عض أسمه الداكته أعلى متني...
وكال بضحكه//لا عشكتيني من اول شخه....
دفعته عني ضايجه من كلامه
صار سنين مرت على زواجنه...
وفوك ال ٣٠ سنه مرت على سالفة الشخه وهو ما ينساها...كتله//شوكت تنسى هاي سالفه ألغمه
كلش تغثني وتلعب روحي .
لمني بحظنه...وباسني بركبتي
وهمس بذاني كال//أنتي تضوجين منها...بس أنا أحبها
واعشك هذاك المنام السودنج عليه...
ألف الحمد لله...والشكر لله على عطيته ورزقه أليه...
والف الحمد لله والشكر على نعمته علينه...
وبالأخص أني لو أحمد الله واشكره ليل نهار
أكون مقصره بحق عبادته وكرمه عليه.
سمعت كميلة تسأل فروخي عليه...
كمت من فراشي...حتى ما غفيت ولا نمت...
طلعت للهول...لكيت كميلة مجطوله على القنفه
كتلها//هلا يمه نشدتي عني ...
كالت//أكلج ما تجيكين ضغطي سكري
شو راسي ثايل...ومسطوره.
طفر غيث هو يعرف يجيك ضغطها وسكرها
بهذني الاجهزة الطبيه الصغيره باقر جابهن ألنا
ومخليهن يمنه دوم نستخدمهن.
مشيت للمطبخ...وبلشت احضر بسوالف عجين الكليجه
وناديت على بكوشه حتى تنخل
وتعجن وراها بشه...ما عدنه خبز للعشا...
اني من أخبز اوكفهن يمي واعلمهن شلون يطركن ألعجين...وشلون يطلعن الخبزة شويه شويه اعلمهن على الخبز ...صلوات كلشي يعرفن يشتغلن
على كلشي علمتهن .
وبعد تعب عجن الكليجه ودثرتها...
وبعد شرب جاي العصر ...
وبعد ما عجنت بشه واختمر عجينها...
وكمت خبزت...
وهن بناتي بكوشه كعدت تفلس التمر
وبشه بلشت تكشر بتيته وبيتنجان حتى نجهز عشانه ونتعشى من وكت...ومن نكضي بالعافيه
أنبلشت نصنع الكليجه .
وره ألعشا وبلشوا أخواني يهلون علينه هم ونسوانهم وفروخهم صلوات على النبي ألهول يفرح بلمتهم.
#####################
حياة علاوي وعايلته اليوم ....
صلوات على النبي علاوي صار مدير عام....
اول شي استحقاقه صارله هواي من متوظف
وهم فادته هاي الشغلات مال الشهداء والسجناء السياسيين...
وصلوات على ألنبي عنده سياره الدوله هاي العاليه والحديثه بيها سايق يأخذه ويرجعه للدوام...
وعن حياته الشخصيه...
صلوات على ألنبي هو ونهله تكولون عرسان
دومهم كاشخين وطالعين بسيارتهم الخاصة...صلوات أشتروا سياره حديثه.
والف الحمد لله حياتهم مستقره...
هو يموت على نهله...
وهي أستغفر الله لو ما تستحي من ألله
يمكن تسوي سجادة وتصلي عليه هلكد ما عاشكته وميته عليه...أبد ما تزوج عليها
لو شخبط وره هذيج سالفته القديمه ...
والحمد لله من صارلهم بيت وحدهم استقرت حياتهم
الزوجيه.
وجهالهم على كلبهم صلوات على النبي عدهم
رقيه....
وحواء...
وقسور....
ورحمه....
ورضا...
و زهراء...
و مجتبى ...
ألبنات رقيه وحوري صلوات على النبي بنات حديثات
وخلصن متوسطه وكعدن بالبيت...
بس ألهسه ما أجتهن قسمه...ندعليهن كون الله يرزقهن
بالنصيب الزين .
علاوي من هو شاب يموت على سوالف النجارة
ورشه النجارة صارت بس الة...
صلوات نقلها للولاية واشتراله مكان جبير ...
وصارت صلوات ورشه جبيره يشتغلون بيها صناع
والصناع هم موش غربه ولد ولد اعمامنه عزام وساجت.
وشغله يخبل بتصنيع غرف النوم ...
لو تخم القنفات...
لو قريولات الجهال....
لو اي ديكور بي خشب ...
هو يحل من دوامه يرتاح ساعه ساعتين ويمشي للورشه ومشغل قسور وياه....
هم يدرس بالمدرسه...وهم يعلمه على صنعه النجارة
أحسن ما يديح ويرافك أولاد السوء.
علاوي أقرب واحد اليه من أخواني
أمانه الله اخواني الباقين ما مقصرين وياي
بس هو كلش حنين عليه وعلى كميلة
دوم يفكدنه...ودوم ياخذنه وياه للزيارات
لو من يمشي ويسير خطار...ودوم ينشد ويسأل
ما يطلع ألصبح لدوامه لو ما يمر علينه
ومن يرجع اذا متسوك يحسب احسابنه وياه...
الزايدة والناقصة يفكدنه بيها...
ادعيله بكل مغربيه كون الله يرزقه خير الدنيا والآخرة
وكون يظله بغيمه بارده بيوم المحشر
وان شاء الله يكون من أهل الجنة...
عبن ما بيوم حسسني اني غريبه وموش أخته ألصدك.
الله شاهد أحسه يحبني اكثر من بتول .
وحتى جهالي ينادوله خالي...
ونهلة بعد هي أختي ما يحتاج امدح بيها
لا بعدتنه الحياطين...ولا سدت البوب
وسري وسرها واحد...لا أضم عليها ولا تضم عليه.
الف الحمد لله من الله رزقني بهيج أخت.
#########################
حياة باقر وعايلته أليوم...
باقر صلوات على ألنبي دكتور صيدلاني
يداوم لحد يومنه هذا بالمستشفى...
وصلوات كلش شاطر بسوالف الطب
كلشي يعرف يسوي...يعني موش بس ينطي علاج
لا كلشي يعرف...فتحله صيدلية خاصه
وبعدين وسع مكان شغله وصار هو الطبيب
وهو الصيدلاني...ألناس يجون عليه هو يشخص حالتهم ويصرفلهم علاج...وفتح بصفه مختبر يشتغل بي
أثنين ولد وبنيه...وصلوات على النبي ألناس تمدح
بشغله...عبن أيده بيها العافيه نظيف ويخاف الله
وينصح وياهم لوجه ألله.
حياته الخاصة...
هو وفطم لليوم عايشين سويه...
بس هو بارد وياها...أحس كلبه جلد عليها...
عكسها هي تموت عليه...وتحير شسوي حتى ترضي.
صح يحترمها ويقدرها...ومايضربها
ومن تنشمر بالصرع يسودن عليها
وما مقصر بعيشتها لو عيشه بناته كلشي موفرلهن
وشتريد يمشي على لسانها...
بس ما يسألها شعندج...شتردين...شمحتاجه...
شناقصج...ينطيها فلوس وهي تمشي حالها...
وماعنده وياها كعده وسوالف وناقش...
لا من يكعد بيته يبقى يقرأ...
وما يوصل يمها...بس يوصلها مره كل أربعه أشهر
ما أعرف أكثر حتى لا تحرم عليه...
يعني كد يكسر ألحد الشرعي حتى لا تحرم عليه.
هي تشكي من بروده وتشوفه قليل إهتمام بيها
مع العلم هو كلشي موفرلها...وما ناقصها لو ناقص بناتها
لو ناقص بيتها شي...
بس هي تكول//ناقصني حظن دافي يلمني بتوالي الليل ناقصتني الحجاية الدافيه ألطيب ألخاطر...
ما رايدة لا بيت ولا مال...رايدته بس اله
رايده شخصه وبس...وتبقى تشكي وتبجي .
وبيوم أكتشفت هو مزوج عليها...
وصلت ألموت ودخلوها مستشفى...
خطيه انجلطت...
اسم الله يكولون جلطه خفيفه...
وهي أسم الله يا خفيفه...أنشلت شلل نصفي
حلكها انعوج...أيدها ورجلها اليمني أنشلن ولا تتحرك
خطيه بناتها حارن بيها...بقت فوك الثلاث أشهر
هي نايمه بالفراش.
شلون أكتشفت باقر الواوي متزوج عليها
من توفت أمها طوعة الله يرحمها...
اخواها صادق طلب أوراقها الثبوتيه...
حتى يمشون بسالفه القسام الشرعي والورث
يريد ينطي حكها وحك أختها خديجه...
أختها خديجه صلوات اتزوجت وعدها اثنين بنات
خوش بنيه حبابه الله يوفقها...
والحمد لله مرتاحه بحياتها...رجلها خوش رجال
ما مقصر عليها بشي..الله يسعدها ويوفقها...
ويستر على راعيها وفروخها من شر التايهات.
هي فطم خطيه ما تعرف تقرأ وتكتب
جابت جنطة أوراقهم الخاصة بيهم
وأجت انطتها لاخوها صادق يكلب بيهن
جان كاعد يمنه بالصاله...
شو الرجال هو يكلب بالأوراق لزم ورقه وبقى صافن عليها...وكاللها//عليش ما كلتي رجلج متزوج عليج
شو لاسمعنه ولا صار عدنه علم .
هي صفنت حالها من حالي وحال كميلة وبناتها
وحال بنته بطه مرت حمودي هم جانت كاعده يمنه
كالتله//منهو المتزوج...شو سطرتني بسؤالك.
جاوبها//رجلج باقر متزوج عليج
وهذا عقد الشيخ مصدقه بالمحكمه صارله فوك الثلاث
سنين...
هي خطيه أنصكت...وبقت صافنه بالوجوه..
ما أعرف شبيها...لا بجت ،، لا كالت كلمه
كلشي ما سوت...عافتنه على كعدتنه وصدمتنه
وراحت البيتها...
صادق كال البنته بطه//كومي وره عمتج
عاينيها وين مشت .
لحكتها بطه...شويه وعاطت
خلت طفارنه للستار...ركضنه لبيت باقر
ونلكاها خطيه واكعه بالكاع وافقدة
شلناها ويه صادق وراحت وياها بتها نسمه وبطه
للمستشفى...
ويجينه محمد عايف دوامه ومسودن...
ويتحلف بعون بس يلزمه يسكطه...
نسأله //شكو
هو بس يرعد ويتحلف بعون...
يبووو تعالوا أسمعوا وتفرجوا بساعه أجى عون للبيت
وحل من دوامه...محمد أدروش عليه
يسطره كل راشدي ولا ألثاني
يكفخه بكل سطره ولا غيرها...
ولا بحساب محمد هو متزوج ومريته حبله.
كميلة انهضمت...وكامت تحجي وتبجي
كميلة تميز عون عن باقي اخواني
عدها عون يعني عطأ...
يعني اثنين ولدها بجسم وأحد .
يبووو لليل وأحنه عركتنه عالكه...
حتى سجاد جان بدوامه خابرته مرته نرجس
واجى يفتهم شنو ألسالفة...
أخواني كلهم موجودين ...
وعون كاعد بالصاله مصكوك ويصفن...
ومن سمع فطم انجلطت
كام يصيح //وين أروح من خطيتها وحوبتها.
باقر أجى للبيت جان بالمستشفى ويه فطم
أبويه خابره وكاله //لو روحك طالعه واصله للسمه
تردها وتجي تفهمني وترد تولي للموت .
وبعد ألهوسة والعركه والصياح والعياط
تبين باقر وعون الهتليه متفقين بيناتهم
تذكرون سالفه خطوبه نبأ وشلون قنعوني الهتليه أشربها
الحبايه حتى نخرب كعدتها...
باقر متفق ويه عون هو يساعده يخرب كعدت نبأ
حتى تصير من نصيبه...
وهو عون يساعده حتى يخطب ويزوج بنيه ممرضه وياه بالمستشفى ويتزوجها بالسر...
يعني هو باقر خرب كعدت نبأ لان يعرف بسوالف الطب
وعون يساعده يتزوج ألبنيه ويكمل عقدهم بالمحكمه.
ألبنيه مرت باقر الثانيه ممرضه تشتغل وياه بالمستشفى
يكول//صارلي فوك سبع السنين من أعرفها
بنيه شريفه وخلوقه وبنت أوادم
وكلش عاجبتني...من محاجيها بالزواج
هي ما قابله بس بعقد ألسيد...رايده عقد محكمة
وموافقه على شرط باقر يعقدون محكمه
ويسويلها بيت وعرس وزفه حالها حال كل بنيه...
بس بشرط لا فطم ولا احنه كل اهله نعرف...
يعني أهلها وناسها عادي يعرفون...
بس أحنه كل ال هاشم محد يعرف بزواجه ألثاني
بس عون...وهي موافقة على زواجهم السري.
عون الهتلي هو رايح وياه بالخطوبه...
وشاهد بعقد ألسيد
ومصدق الهم العقد بالمحكمة...
حلف مية يمين وكال//هو باقر كالي فطم راضيه على زواجي...وهي دوم تكلي روح اتزوج التناسبك
انا مرأه اميه لا أعرف اقره ولا أكتب وأنت دكتور
وهو الكالي بس كمل إجراءات المحكمة
وانا بنفسي أبلغ فطم وأبلغ كل أهلنا....
ومشيت وياه وساعدته...شمدريني شام كفى أيدي
هي ما تدري...ومن جنت دوم اعاينها ضايجه وتبجي
بحسابي عدها علم .
علاوي هنا عاط بي وكاله//عليش ما حجيت
عليش ما فكيت حلكك...لك لا تغشم روحك
وتستلوت براسي...ما سألت نفسك أحنه ندري لو لا
ما بيوم سألت واحد بينه شلونها مرت باقر
لك انت وياه تروحون فدوة للكلاب
خليتونه وراكم...والمرأه تكومت وهذيج هيه نايمه بحلك ألموت.
محمد مسودن على فطم ...
هو خالها...وهي وصيه ألمرحومه أختهم طوعة يمهم
وهي من صار الهم بيت وحدهم صارت زينه
بس هي مشكلتها ألسانها عام عليها
بس احسن من كبل...كبرت وعقلت
وما تندك بواحد...بس اليعيل بيها تلعب بي فلك
وصدك خطيه هيج يستغفلها باقر ....
وأنوب حالتها مو زينه وفاقدة بالمستشفى .
محمد بعد أتسودن جر عون من ياخته وطرده بره
ودفع باقر وهم طرده بره
وصاح بيهم //اليوصل بيت هلال اكص رجله
انتم موش شكول نعمه...حرامات اسرحكم
بثنين أنعاج.
أنوب كام يصيح على باقي أخواني
ويكلهم//وحك طبرة الهامه الاسمعه لاعب بذيله...
ومصادق على مريته...لو داك بيها دكه ناقصه
نفس دكه باقر أفندي...اكطع ذيله...
واكطع عرجه من الهواشم....واطلك مريته منه...
وافن واحد بيكم يطلع عن شوري وحك حرمة كربلة اوسدة بكبور النجف.
وبقت فطم حالتها تكسر الخاطر
طلعت من المستشفى وبقت بيتها بناتها ايدارنها...
احنه هم ما عفناها كلنا وكفنه وياها
وابوية طرد باقر من البيت علمودها...
فتره وكميلة بقت ادك وتلطم على شوفة باقر
راح علاوي وسجاد رجعوا للبيت ...
بس لا أبوية يحاجي ولا محمد .
أنوب قبل جان باقر ما يبات يم هذيج مرته ألبومه
بس من الكل عرف...صار عدنه عادي
يبات يمها يومين وثلاثه.
وبيوم جاب هذيج مرته الثانيه عودين يعرفها علينه
واني أحجي ألصدك كميله طردتها من ألباب
وكالتلها//لو انتي صدك بنت اجاويد ما ترضين بزواج السر...واذا بيوم حبلتي وشلتي فريخ
اعتبري نغل كل أحنه ما نعترف بي .
باقر لليوم ما عنده جاهل من مرته ألبومه
ولاهي تجي علينه...ولا أحنه النروح عليها.
ومحمد نبش بساسها نبش..
واحد يحجي حك الله...هي وأهلها سمعتهم طيبه وماعدهم شي موش زين...بس أحنه ما نريدها
وما نكبلها ويانه....عبن رضت بقسمتها بشرط عوج
ورضت تزوج بالسر...وبنت سعادتها على هجمان بيت فطم.
فطم بقت لليوم كاعده بيتها هي وبناتها
نسمه...
ومسك ....
ومودة...
وبعد ما تهتم ألباقر ان راح لو أجى
هي تكول كلبي جز منه...
بس اني أشوفها جذابه
شكثر تبجي وتنقهر من يبقى يومين ثلاثه يم هذيج ألبومه...
وصلوات بناتها حديثات...وكلش نظيفات وشاطرات
ونسمه حاجي بيها رعد ابن جاسم...
هو ألولد عسكري وشايل روحه
بس بعد أبويه ومحمد وأخواني ما موافقين.
لان رعد طلك مرته...وماعنده جاهل منها
ما بقت يمه أقل سنه وشردت
من وره امه ألبرعه السانها عشر مترات...
بس أريد أسأل والله ما متقصدة بسؤالي هذا
أقلل لو استصغر لو أسوي طائفيه يعني هيج بس أستفسر يعني هن كل النسوان الكرديات الفيليات
هيج برعات ووكحات نفس طبع مرت جاسم
والله نسره موش مراه....
والله جاسم شلون رجال خير...
الواحد يخلي على الجرح يطيب ....
صلوات هلكد ما زين وطيب هسه هو شخص
مسؤؤل ومعروف بالحشد...الله يكفي الشر..
وباقر قدم على هذا البرنامج مال الرواديد
بس خطية ما فاز صلوات اكو أصوات احلى من صوته
بس بمحرم يطلع يقرأ لطميات بالمجالس الحسينية
هو يطلع بس ويه شيخ طالب اخو نهلة
من يخلص المحاضره الشيخ...هو يقرأ القصائد وراه.
هذا البرنامج الاشتراك بي باقر 👇👇
باقر اخوي،،،وصبي عيني،،،وصديق طفولتي
لليوم ما كشف شنو مشكلته ويه مرته فطم
وعليش هيج جزت روحه منها...
بس أني وحتى نور وكميلة حسينه ألسالفة تخصني
ونشك استغفر الله فطم ألها ايد بسالفه السحر
الهجمتني هذيج ألسنه...
بيوم عاتبته وكتله//عليش هيج خربت حياتك
وتزوجت على مريتك...اذا على خلفه ألولد حكك
بس موش تزوج بالسر...وكل أهلنا ضاجوا من فعلتك هاي...
هو جر نفس كلش طويل وكال//سالفتي موش
سالفة أريدن خلفه ألولد...بس فطم طلعت من روحي
جزت نفسي منها...بعد ما أكدر اتقبلها...
عايفها بذمتي لخاطر بناتي...كام وباسني على رأسي
وكال//رحمة الله لطفت بحالج...أدعيلي خويه
براحة البال.
واني دوم أدعيله بالصحه والعافيه
وكون ربي يبرد كلبه...ويهدي عكله للصالح
############################
حياة سجاد وعايلته أليوم
صلوات على النبي...بسم الله وبقوة الله
سجاد أليوم هو ضابط برتبة رائد ركن
صلوات مكان شغله كلش زين ومرتاح بي
يلتحق أسبوع للدوام...وينزل أسبوع مجاز للبيت
حياته الخاصة
تذكرن سجادكو أبو خشم اليابس
شكثر عنطز وما رضى بقسمته من نرجس
هسه حياتهم صلوات على النبي دهن ودبس.
هي نرجس تموت عليه...من يلتحق تبقى تخابره وتحجي وياه...وهو مرات يعوف الدوام ويجي طافر ألعصر علمودها...ويرجع ألفجر الدوامه...
عدهم ٣ ولد...
علي...
حسنين..
زين العابدين.
نرجس تتمنى خلفة ألبنيه...بس بعد الله ما رازقهم.
هذوله الاثنين هتليه...سكوتين
كلشي ما نعرف عنهم ...
لاهي نرجس تسولف بشي خاص بيهم
ولا هو اليحجي...
وأنوب حتى فروخهم من نسالهم على شي
يكولون//ما نعرف...ما سمعنه...ما ندري .
صلوات على النبي حياتهم مستقره
لا نسمعلهم عركه...ولا نشوفلهم هوسه.
حتى ما نعرف شعدهم ماعدهم
يجي يمنه سجاد يكعد شويه وره ألعشا
تجي نرجس هي وحجابها وعبايتها الاسلاميه وجواريبها تكعد بصفه تلزك بي...
وكله تكله//بلي أبو علي...تدلل ابو علي
من عيوني ابو علي .
وحتى جهالهم يختلفون عن جهالنه...
بس نرجس تكولهم //هااا اخابر أبوكم...اذا جان بالدوام
أحسبن واحدهم صار قمله وكعد بمكانه...
واذا هو سجاد موجود شحده اليتحرك من مكانه...
وكلش خدومين...وأحدهم ينكط نظافه...
ويسخرون للكل ما يتعاجزون.
سجادكو لليوم يشكي من معدته...
ما خله طبيب يذكروه آله يفتهم بسوالف البطن والمعده
ما راحله...يصير زين فتره...ويرجع يتمرض
الطبيب يكول// عنده قرحه بالمعده .
وهم شكثر راجع للساده يرقوه وينطوه حروزه
وماكو فايدة يكوله//انت مسكي بس محد يعرف يداوي
تعلم على أكل مرته...تسوي اله بدون حروره لو بهارات
لا يأكل بره...ولا يأكل بغير بيت...يخاف من الأكل يأذي.
أدعيله كون ربي يكفي شر ألدنيا وشر بني أدم
وكون يلبسه ثوب الصحة والعافية
ويوفقه بالدنيا والآخرة.
#########################
حياة عون وعايلته أليوم
الف الحمد لله عون الله وفقه وكاعد يدرس
يعني يكمل دراسه وان شاء الله من يخلص
يصير قاضي...
حياته الخاصة...
صلوات على النبي صدك عاشك...
هو ونبأ عين الرحمن تباريهم وتحفظهم من كل عين حاسدة وحاقدة...واحد يموت على الثاني
صار عدهم ٢ بنات...
أيلاف
مريم
وهسه نبأ كاعده تراجع للدكتوره تريد تسويلها جدول
مال حبالة ألولد...
وهم تريد تسوي هذا ألجاهل الثالث علمود عون
عودين من شروط تعيين القاضي
لازم يكون متزوج
وعمره فوك الثلاثيين
وعنده عايلة وأقل شي بيها ٣ جهال.
ما عده الشروط التخص شغله مال دراسه والتعيين
وهو الحمد لله كلش شاطر...تقريبآ كلشي مكمل
هو ناوي يسفر نبأ للخارج علمود يسويلها عملية تجميل
بس سبحان الله ما تجي وياهم الفرصه عدله
ووكت ما عدهم...
هي صلوات بسرعه حبلت با أيلاف
وحبالتها تلعب ألنفس...ظهرها رخي ما يحمل ثكل
وسوتلها دكتوره عملية ربط...
ولحد ما جابت هي نايمة على ظهرها.
وراها أجت أيلاف عدها أصابع زايدة بيدها ورجلها
وبقوا يراجعون بيها...سولها عمليتين وكصوهن
هسه الف الحمد لله أيدها ورجليها كلشي مابيهن
بنيه طبيعيه حالها حال كل جاهل.
وراها هو بقى يروكض علمود سالفه يصير قاضي
ونبأ ردت حبلت وجابت مريم ...
بس بهاي بطنها ماسوت ربط...بس بقت نايمه ومتركدة
ومنا طلعتلهم سالفة الكرونه...والحضر
ومنع السفر ...
عون أحسه أبني موش أخوي ربيته على أيدي من هو عمره سنتين...أحبه هو ومرته وجهاله
الهم معزة خاصه بروحي...
صح مرته نبأ أختي بت أمي نور ...
بس أحب عون اكثر منها...
حتى من ادعيلهم اميزهم بدعائي...
ربي يحفظهم أليه ويفرحني بيهم .
###########################
حياة حمودي وعايلته أليوم.
هذا أحميد أبني وأخوي مثل ما معلك بكلب كميلة
معلك بكلبي...أموت عليه وعلى سوالفه.
الهتلي عجوزي خلص بس إعداديه
وتوظف ويه محمد...ما يقبل يكمل دراسه
أنطي بس أكل ودياحه ونوم...
يكول//عليش تعبان وأقرأ واشيل هم الامتحانات
الحمد لله توظفت وعندي راتب يكفيني
شلي بدوخه الرأس.
حياته الخاصة
هو وبطه حياتهم عاديه حالهم حال كل اثنين عراقيين متزوجين يوم يتعاركون ويوم يتراضون...
بطه صلفه والسانها طويل...بس هو كارصها كرص
ما ينطيها مجال تستفحل...
والواحد يحجي حك الله...هي من فتره وجاي
صايره زينه...يمكن كبرت وشويه عقلت
ويمكن هم تغار تريد تحسن وضعها هي ورجلها
وبطلت من المشاكل...عبن تشوف وتقارن حياتهم
ويه بيت سجاد وعون...
وبعد صارت ام ل ٣ جهال ...صار عدهم
كوثر
عبد الله
يقين .
جهالهم دوم بيت باقر...يموتن عليهم بنات باقر .
وهو حمودي حاير بوكت فراغه ينشر سوالف تضحك
على هذا البرنامج الجديد ((تك تك))
وحاير يرد على هاي المتابعه،،،وعلى هذيج المعجبه
وجان عنده برنامج((نسته))هم صارتله من وراه
عركه وهوسه هو وبطه...صادق بنيه وتعرف عليها
ومحمد خوش رزله لعب بي فلك...
وغصبن عليه حذف البرنامج.
وايدة سافر للهند علمودها...
أخذه باقر بوكتها وسافر وياه...
هناك مسويله عملية...وراها بقى على ألعلاج الطبيعي
والحمد لله هسه ايده أحسن من كبل تتحرك
بس هو عجوزي ما يستمر بالتمارين .
وبعده لليوم يحب يعدل بروحه...
ويحب سوالف المودة ودهن الشعر
وهاي اللحيه يوصلها لعيونه يصبغها يم الحلاق
بصبغ أسود مال قنادر يجي يلعب ألنفس...
يترزل من أبويه ومحمد
ويبقى يغسل بيها ويرجع ليوره يوكع وجهه من الغسل .
ألف الحمد لله من الله رزقني بااخ نفس حمودي
أموت عليه ويموت عليه...الله يحفظة اليه .
######################
انتظروني بمفاجأة جديده 😇😇
حبايب ممكن بدربكم اتابعون قصتي الجديدة
(( رواحل و افتداء ))