حصاد المواسم

ح ٣٩ (( ألجزء ألثاني ))

ألحلقة ألتاسعه و ألثلاثون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

إن ّ الإنسان يمكنه أن يعيش بلا أب أو أم،،،
ولكن لا يمكنه ألعيش بدون رحمه ألله ...
×××××××××××××××××××××××××××

ما أريد ازهك بنعمة ألله وأكول تسودنت من وره فروخي...غيث ينام،،،يكعد ليث .
هذا اوكله...اركض على هذاك أرضعه
هذا يبجي...هذاك يسكت...
شفت نفسي أني وحال نهله هذيج ألسنه من جابت توم سويه.

وأستغربت طبع ليث،،،مو نفس طبع غيث من جان جاهل نفاس هادي وفقير تكولون خنفسانه
جنت أرضعه وابدل ملابسه واكمطه وينام...
حتى هو هلكد يلج...
وهسه ليث شوفني النجوم بعز الظهر...
بليل يبقى يبجي ومو هلكد ينام
ومو هلكد يرضع...وبس يبقى يلج .
باقر يشوفه يكول//هذا ممغوص وجابله قطرات
والله ولا فادت وياه...

كميلة تكول//هذا منفوس،،وبي ريح من التابعه الصابتج
اخذته لبيت سيد مهدي رقاه السيد ونشر عليه
كاللها//هذا محسود وعينكم عليه شاهكين بي.

وهو ألصدك جيابتي صارت بساع بساع
وأجاني ولد...صح هو سبيعي بس صلوات صحته زينه
وال هاشم تسودنوا من الفرحه لخاطر محمد...
ياهو ألجاي علينه من الغريب والكريب يبارك على ولادته...كميلة تخلي بحظنه تكول//أحسن خلهم يلجحوا ولا تبقى عينهم عليه وهو مو هلكد حلو محد يحسده.

بس هم كلهم من فرحتهم يكولون لمحمد//بعد شتريد الله عوضك بثنين ولد...راح تصير بزرتك نفس أخوك فاضل يصير عندك بس ولد.

وما أعرف استغفر الله من وره الحسد والعيون
الولد أنحمس...ما اعرف لان سبيعي وصدك يصير طبعه عصبي...لو على كولت باقر هذا ينمغص ويبقى يلج.

سودني ليث من وره ألبجي واللجه العنده
ما خليت لا سيد ما قرأ عليه...
ولا حرز ما علكته بملابسه...
ولا تبديلت حظاينه كبلتهن اله مالات الليل والصبح...
لا حزام ألبرنو كالوا فوتي من خلاله وهو يتخورس...
ولا تعليكت دشداشته بكرن الطلي...
من ألاخير كفرني بعيشتي...أني الجان الي خلك للجاهل وأموت على سوالف ألجهال...هسه تسودنت
وصوتي صار يوصل لمرقد أولاد مسلم .

أمانة الله كميلة وألبنات نهله وباطلة
وحتى ألبنات ألصغار يساعدني عليه
بس هو يبزع المطي من كثر ألبجي واللجه العنده.

فد يوم ألعصر...ألجو يسمط من ألحر
وروحي مسحونه من ألتعب
وكاتلني ألوسخ البارحه واليوم ما سابحه
وليث مطلع روحي من ألبجي...الليل كله ما نمت من وراه...وحتى محمد ما راح للدوام بقى محتار بغيث
عودين يساعدني عليهم...