حصاد المواسم

ح ١٠

#حصاد-ألمواسم
👇
#فراقد
👇
#ألحلقة(١٠)
÷÷÷÷÷÷÷÷÷÷÷÷÷÷÷÷

السيد طلع بسرعة من الغرفة ....
وكميله مشت وراه وتكله //عليك بروح أبوك
لا تأذوها تراها يتيمة هلة الهلة بيها

طلع السيد ... ومحمد ... وعطا ... وعلاوي
وسمعت صوت شخطة السيارة

وكميلة رجعت وكعدت يم العجوز
وحياة هي اصلا بقت يم العجوز
والولد ثلاثتهم طبوا ويه أمهم

أني طبيت وراه كميله وكعدت بطرف الغرفة

احس نفسي راح أتخربط من الجوع
كتلها // عمة عدكم خبز جوعانه

العجوز كالت// خايبة حياة خطية هاي الفرخة
كومي سويلها لفيفة ...الله واعلم شوكت اكلت
كميله البيها هسه مكفيها

كامت حياة ورجعت وره شوية
جايبه بيدها ماعون فافون ...وبي شويه بتيته
وطماطه حمس ...وخبزه وخلتهن كدامي ،
اخذت الخبزه وبديت اكل

تذكرت نور خطية ماادري اكلت ماادري لا

العجوز كالت// ها يخايبه شو صفنتي شبيج

كتلها // بيبي خطيه نور يمكن اكلت ...
ما أدري بعدها جوعانه
انتصار من خلت الاكل مااكلت ... ومحيسن طردنه
يمكن هسه بعدها جوعانه

كميله كامت تبجي بصوت عالي
وصاحت //بووويه محمد شك اللحد واطلع عاين حال بناتك ....العربان كامت تعطف عليهن

العجوز كالتلها// كولي يالله شبيج
مو زين على الفرخ تهضمين بروحج

اني اكلت وخلصت وكتلها// اريد اغسل ايدي
شكرا للرب شبعت ،

كامت ويايه حياة
اخذتني الهذا الحمام بالطرف
طلع هو حمام وهو تواليت
وبي بوري ناصي كالتلي// غسلي ايدج هنا
المغسلة البره هسه مابيها مي

غسلت ... ورجعت اني وحياة ....
وكعدت يمهم بالغرفة
بقيت احك براسي شعري موتني ...وهذا الحجاب خنكني

حياة كالت// شبيج تهرشين بس لا بيج گمل

كتلها// والرب نور يوميه تمشطلي ويوميه أسبح ،
بس هذا الحجاب خنكني اشمره

كالت // شمري ليش لابسته

نزعته الحجاب وشمرته بالكاع
ومن دخل الهوه الشعري كمت احركة وأحكة بثنين أديه
أحس روحي هسه يلا أتنفست

اباوع هذني صافنات عليه
كتلهن // والرب مابيه گمل
بس اختنكت وهسه يمكن تنفس شعري

كميلة كالت// لله في خلقة شون
اول مره بحياتي أشوف برشه بالصدك

حياة كالتلها// كميله عليج الله هاي لون شعرها صدك
لو مصبوغ

جاوبتها كميله // لا لون شعرها الصدك لان برشه
متشوفين حواجبها ورموشها ،
حتى شوفيها شلون بيضه