حصاد المواسم

ح ١٤

#حصاد-ألمواسم
👇
#فراقد
👇
#ألحلقة((١٤))
÷÷÷÷÷÷÷÷÷÷÷÷÷÷÷÷÷÷

من صدك بجيت بقهره ،يعني لو ما نور تلكاني
الله واعلم وين جان رحت ... وين صار دربي

كميله اجت عليه وكالت// ياااا خايبه شمالج تبجين
... ولج والله نخاف على نور
بس تبرد سالفة وجم يوم ونرجعها هنا ،
هاي خالة السيد مراه جبيره ...
كاعده وحدها ... وياها أبن ابنها بكران علاوي
وولدها كاعدين كل واحد بيته ... بس كلهم بصفها
هي طلعتهم متحب الهوسه .

كتلها // لا عمة ما ادري شبيه ... ضايجة ومخنوكة

هي ضحكت و كالت// شدكولين لو تكوليلي يمه
واخذج ويايه للخياطة ام سعد
وترحين تلعبين ويه بناتها ....بتهم سهاد بكرانج ؟؟

كتلها // شنو يعني بكرانج ؟؟!

كالت // يعني بعمرج ،
بكبرج ،
نفس كصتج ....

كتلها // خاف متقبل تلعب ويايه لان اني مريضه ومسلوله ... شوفي جسمي وشعري أبيض

هي باوعت عليه وكالت // يخايبه ليش هيج تكولين
بالعكس والله انتي حليوه ... وشعرج لونه يخبل
وباجر من تشبين تصيرين بنيه حلوه ... الشباب كلهم يكومن يركضون وراج ....حتى يطلبوج للزواج

كتلها // لا عمه اني محد يركض ورايه
ومحد يحبني ... اني مريضة ومسلوله
ومن اني وصغيره ... بيبي عشتار ... وعمة راغوث
يصيحلي هيج ..

هي واكفه سحبتني من ايدي وكفتني على طولي
وحظنتي ... وحجت بصوت ناصي وبي حنيه
كالت // بس اني ... ونور نحبج
ومن اليوم أنتي صرتي بنتي مو بت نور

والرب شهكت شهكه قهر وبجيت من خاطري

السيد صاح// كميله الجاي احترك

كالت // عايني من وراج احترك جاي السيد
امشي كدامي وتريكي
حتى نمشي بسرعة لبيت ام سعد ...تاخذ قياسج للدشداشه ... علمود ارجع أخبز

تمشيت كدامها وغسلت على المغسلة
وهي صاحت عليه من المطبخ // يلا هدوله وينج
تعاي طكيتلج بيضه ... تعاي اتريكي

من خلصت ريوكي ... وغسلت ايديه
كميلة لبست عبايتها ....وكالت للسيد // رايحة لبيت ام سعد اخيط دشداشه للبت

كاللها السيد // براحتج

طلعنه للشارع .... ماكو بيتين ولفنه ...وخلص شارعهم
واندارينه على الشارع الثاني ... شوارعهم صغيره
ومابيها تبليط بس تراب .

ثالث بيت دكت الباب عليهم كميله
طلعنه ولد صغير وكاللها //شلونج خاله ..وفتح الباب

كمليه ردت عليه // الف هلا بيك يبعد خالتك

ودخلنه لبيتهم ...
طرمتهم مربعة واول غرفة على اليمنى دخلنه بيها ،
كاعده مريه يم مكينه الخياط أكبر من كميله ....
ويمها نسوان ،