حصاد المواسم

ح ١٥

#حصاد-ألمواسم
👇
#فراقد
👇
#ألحلقة((١٥))
÷÷÷÷÷÷÷÷÷÷÷÷÷÷÷÷÷

كمت غسلت وجهي على المغسلة .
ورحت على غرفة كميله ...شو مقفوله الباب
قربت راسي اصنط على الصوت ....هاي صوت كميله تبجي...

واسمع صوت السيد صاح عليه
من باب غرفة العجوز ... الي هو نفسه الهول//
تعاي هنا بويه لا توكفين بالباب

كتله // اريد نور أني خايفة ....شفت حلم مو حلو
وقلبي يرجف

هو كالي// تعاي هنا بويه وكولي بسم الله الرحمن الرحيم ....تروح منج الخوفة ،،

أني هم سمعت كلامة ... واني امشي رايحة للهول
اكول// بسم الله الرحمن الرحيم ،

كعدت على قريوله العجوز ... أجت براسي تخيلات 
شلون أحتركت العجوز  ....يعني بعدني شلون اشوف المنظر حقيقي كدامي .....طفرت من القريوله
وكعدت بالكاع

اباوع على السيد .... راح للمطبخ جاب كلاص جاي
ورجع للهول .... وكعد يشرب
شال عيونه عليه وكالي// أي بويه سولفيلي
شنو شفتي بمنامج ...؟؟

باوعت عليه شلون يشرب بالجاي ...
يشرب شويه .... شويه ....لان حار والدخان يطلع من حلك الكلاص

حجيتله الحلم ... وأني أحجي أرجف من الخوف

وهو صفن بوجهي ....
ونزل الكلاص وحظنه بثنين أيده
وكال // ربي عفوك ورضاك  ...

اللهم أجعلة منام خير .... يا ربي يا سيدي ومولاي
لا أسألك رد القضاء لكن أسالك اللطف فيه

اباوع علية شكلة خاف وقلق
مااعرف على كميله .... لو خاف مثلي من الحلم

بعدين باوع عليه وكالي // أدعي لخالتج تكوم بسلامة ،
وراح طلع من الهول ...
انوب سمعتة فتح باب الشارع .... يمكن طلع بره

كعد عون من النوم نحس ويبجي
بقيت الأعبة وأسكت بي .... وهو بس يتفل عليه
هذا سجاد .... وباقر علموا يتفل ...
بس يكلوله // أتفل على فلان ...يغسلة وجهه الواحد برشة سريعه.

سمعت صوت العجوز بالطرمة ....
وصوت سيد يحجي وياها
مشيت عون وطلعت بره ...
واشوف العجوز انطت شي ملفوف بقماش ابيض
بيد السيد ....وأثنينهم مكيفين ويضحكون .

اتقربت عليهم اباوع ... هذا جاهل صغير
والسيد كام يبوس بي ... وقره القران على راسه
وكال// يمه الزلمة الما يسمي أولاده على أسماء محمد ...وعلي .... يحتاجلة حرك
اني عندي علي وباقي أسماء ال البيت
وأسمي الجديد أحمد ....

ألعجوز كالت// يمة عسه كرفته خير عليك
وعلى خيوانه ...بالمبارك يمه ...
بالمبارك عليك شوفت الفرخ وأمه بخير

كتله // عمي انطينايه أشيله ..

كال // يبعد عمج ماتكدريله بعده ترف تخلعين جتافة
بس عايني عليه وهو بحظن جدته...