حصاد المواسم

ح ١٣

#حصاد-ألمواسم
👇
#فراقد
👇
#ألحلقة((١٣))
÷÷÷÷÷÷÷÷÷÷÷÷÷÷÷÷÷÷÷

كعدت من الصبح ....
هم كعدوني ... كلهم يسولفون ضوجني صوتهم
باوعت الكل كاعد ... حتى نور وكاعد يتريكون .

كمت غسلت ... وأجيت كعدت بصف نور
بس مااكلت ... خليت راسي على رجلها وتمددت ... وهي كرصتني من جتفي خفيف ...وفاتحة عيونها عليه

كتلها // ااااخ ليش كرصتيني...

كالتلي// أتادبي وكعدي على حيلج الناس كاعده

كعدت على حيلي وأنافخ .....
السيد كالي // بويه أرجعي نامي ليش كعدتي ،

كتله // لا بعدت كعدت فد شويه انام بالفئ

من كملوا ريوكهم .....السيد راح للمرقد

محمد بدل ملابسه...
ولبس بنطرون عتيك مبين مال شغل
وفانيله نص اردان سوده ....
وصاح // يلا علاوي باقر الحكوني .

حياة صاحت وراه // عود دير بالك من علاوي
لا يسويلك سالفة ويتحارش ببنيه ....
نفس ماتحارش بهديل

هو يريد يطلع واكف باب الشارع
التفت عليها وكال // شلووون منو هديل هاي ؟؟؟
وشوكت علاوي متحارش بيها ...؟؟

هي حياة واكفه يم التنور ...تريد تجيب السعفة
تكنس الطرمة .....تقربت عليه وشاورته .

وهو أنصرع صاح // علاووووي اليوم الله كتبها عليك

اني نايمة بالفئ من يمي خفت ...

علاوي اجاه يركض من جوه من غرفة السيد
كاله // أجيت عمي أجيت .

هو المصروع بقى يتلفت داير مداير روحه
وشاف يم التنور ....نهايه مال سعفة تصير عريضة
يعني هاي التطلع من النخلة (( كربه))
اخذها من الكاع ... ولزم علاوي كطعة تكطع بيها

اني من يمي خفت ... كمت وكفت على طولي
وبقيت ارجف من كثر الخوف .

صوت علاوي يكسر قلب العدو ...
محمد المصروع أدروش عليه ....
كضاه كضيان بهاي السعفة .

كميلة اجت تركض عليه وتكله // محمد خويه
كضيته ... راح تموته ... فدوة أغديلك عوفة .

وحياة تجر بعلاوي من جوة ايده .... وماتكدر عليه

وهو يضرب بي ويصيح // علاوي أفندي أبيتي
وتمد أيدك على البنيه ... وتتحرش بيها
بس أنطيك مجال باجر ألكاك راكبها... وتجيبلي العار
يبن فاضل بس تعيدها ... وحك نخوة العباس ...
أكسر ظهرك وادفنك وأنت عايش .

نور بقت واكفة باب غرفة العجوز وتبجي
كلشي ما حجت ... ولا اجتي تفازع لعلاوي

محمد دفعة على كميله ...وطلع
وطبك الباب وراه بقوة.

وحياة كالتلي // هسة ارتاحتي أنتي ونويره
من لفيتن علينه أنهجمت حياتنه

نور من سمعتها كالت هيج تخبلت...
سحبت ملابسي من الحبل ...
واخذتني طببتني الغرفة السيد وتبدلي وتبجي ،