حصاد المواسم

ح ٤١ ((الجزء الثاني ))

ألحلقة الوأحدة و ألأربعون ///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///

----//////----//////----//////-------/////---------

إذا كان لديك الكثير ... فاعط من أموالك ....
وإذا كان لديك قليلاً ... فاعط من قلبك مشاعر.
××××××××××××××××××××××××××××××

ألجو حلو...وبوكت العصر..جنت فارشه حصيره جبيرة
وكاعده بصف ألتنور...أموت على خضار وريحه ألتوثه
كاعدين جواها على صفحه أني وبتول وبسمه ومسك
ورقيه...مخليتهن يمي وأقري بيهن عدهن واجبات

وعلى جهه كاعده كميلة تلضم فلفل حار بالخيط
تسوي كلايد حتى نيبسه.

وباطلة وأكفه تخبز...أليوم عليها نوبه الخبز

ونهله كاعده تثرم حواشي ألخبز الاعروك
صحت عليها وكتلها //كثريلي ليه أريد الخبزه تجقجق من الدهن...كونها تكوطر عليه لو عضيتها.

وفروخي يمي...غيث مكعدته بصفي بيده خبزه يعلس بيها...وليث محوطتله بصندوك طماطه ومكعدته
بيده راس بصل أخضر يعضعض بي ويعيط
يساكي لسنونه الفوك هستوهن محبحبات.

وفروخ علاوي يحوسون يمنه حوري وقسور
بس رحمه نايمه بمهدها...ورقيه كدامي اردلها إملاء.

وفروخ باقر نسمه ومسك كاعدات كدامي يكتبن
وموده قريبه على كميلة نايمه بمهدها .

أجى حمودي من بره جان دايح...كال الباطله //
وياج أشويلي دجاجه شو تأكل بروحي من ألظهر وألهسة.

كميلة كالتله //ألبنات عدهن شغل ما فارغاتلك
باجر بسلامه نشوي على الغده.

أمشي ألزم كتبك وأقرأ لا تظل متخم ويروح ألوكت عليك.

هو دنك باسها من علباها وكاللها//يمه بس أدعيلي وأني انجح.

هي كميلة فزت وعاطت //يمه عطأ...ولك ألمسودن
جم مره منتعك لا تحبني من علباي يكش جلدي
أبن ألزفرة.

هو حرك أيده بمعنى يريد منها فلوس//كاللها بروح عطأ
دبكي أيدي خل أنفه عن روحي.

هي كالتله//أكومن أمسح هذا الفلفل بعيونك واعميهن
بطل هذا الدرب لو أخلي محمد وعلاوي يشكون حلكك.

هو ضحك وكاللها//هو محمد ينطيني جكاير
يكلي//دخن جدامي ولا دخن وراي...
وحتى علاوي يعرف بيه أدخن...
ومن أخلص باكيتي أبوكن من عون.

صدك هم كلهم أخواني يدخنون...بس أبويه وباقر وسجاد ما يدخنون.

كميله كلش ضعيفه كدام سوالف حمودي يبقى يبوس
ويحظن بيها...وحتى مرات من يتوضى ويجي يصلي
يدنك يمسح وجهه بجفوف رجلها يكلها//أخذ منج بركه حتى الله يضاعف ثواب صلاتي...