ألحلقة ألأربعون ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
لقد علمتنا الصحراء أن نصبر طويلاً حتى ينبت الخير، وعلينا أن نصبر ونواصل مسيرة البناء حتى نحقق الخير للجميع....
××××××××××××××××××××××××××××
وهل علينه العيد واحنا دايخين بسالفه أزهيران من صفحه...وسالفه مرض باطلة من صفحه ثانيه.
والواحد لأزم يحجي ألصدك لان وراه لحظة موت مره
باطلة صدك مريضه مو جذابه...ساعة الساعه
تصخن وتنشمر...وتصك سنونها وتكلب عيونها.
وأنوب استغفر الله كرهت بتها الجديده
هو أحنه نعرف ما يصير ترضعها لان مصخنه...
بس أبد لا تشيلها ،،، ولا تخليها بحظنها...
نهله تكفلت بيها ودراتها ويه بتها رحمة.
كميلة غيرت أسم البنيه من يارا وسمتها ((مودة))...
كالت//بت علاوي رحمة وهاي اخيتها ((مودة))...
بس بالجنسيه بقى أسمها يارا.
وظلت مودة بين حظن نهله...وبين حظن كميلة...
واني كمت أرضعها ويه ليث...ونهله هم ترضعها ويه رحمه.
باطلة حالتها تبجي اليهودي...على ساعه توكع من طولها وتنشمر بالكاع...وتبقى ترجف وتكلب عيونها.
أبويه من شافها هيج وكعت وانشمرت
كال //هاي ممسوسه...عبن راعيها الاغم طكها وهي نفسه.
ومن هذا اليوم كاموا يركضون باطله للساده وللشيوخ
ومن يكشفون ألها يطلع بيها مس...وعليها سحر
وكامت تركض بيها كميله...وأبويه...وأمها طوعه
أجت كعدت يمنه علمودها.
آخذها محمد لبيت كاكا حمه...بلكت يعرفلها
لكاهم شايلين من كبل هواي سنين...
هذا هم حظها ألمجبي بخيسه الجلاب السايبه خطية.
باقر ما يقتنع بهذن سوالف المس...والسحر
يكول//هاي أعراضها مال حاله نفسيه...
واتوقع عدها مرض جسدي كبل لا يكون نفسي.
بس محد سمع من عنده...بحسابهم ما يريد يراجع بيها
وأبد ما اخذوها للطبيب...يركضون بيها بس للساده وللشيوخ.
وعدت بينه ألايام...والله فكدنه بيها طعم الراحه
من كثر المشاكل،،،والعرك،،،والهوسه،،،والعياط.
منا سجاد شاد علينه تعالوا فلشوا وأبنوا ألبيت...
يكول//واحدنه صار عريس ونايمين واحد فوك الثاني...
وأنوب ويانه الجهال نصير لحم بليل لو ردنه نتمدد...
هو ألصدك حكه لو حجه وضاج...
بيتنه صغير ومكان ما عدنه...
بس التفليش والبناء ما يرادلهن فلوس...
صح أبويه والولد عدهم رواتب...
بس والله العظيم ما تلحك على ألعيشه...
صلوات احنه عشيره ((أنفار )) بالبيت...
والحمد لله كلنه نأكل بجدر وأحد،،،وصينيه وحدة...
يعني رادلنه بليوم نص كونيه طحين لو خبزنه...
ونطبخ الوجبة الوحده بجدر ألحسين...
أبسط شي لو طبخت باجه لأزم أخلي اربعه لو خمسه
روس غنم يلا تسد غدانه...وأنتن بعد أحسبن احساب المصاريف الباقيه...علمود الملابس...والواجب...
وكراوي السيارات...وفلوس الرصيد...وغيرها وغيرها
والمصاريف التطلعنه من جوة الكاع الما حاسبين احسابها.
أنت تقرأ
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
