ألحلقة ألسادسة و ألثلاثون ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
ثوب اﻻبيض لبسوني،،،وأنته هم ثوب أبيض لبسوك
بس الفرق أنا دفنوني ،، وأنته بهلهوله زفوك
ألك شماتي لهوسو....
وأنا عليه أهلي ألبجو....
بس أرد أوصيك أبوصيه ﻻتبيع أليشتروك .
××××××××××××××××××××××××××××
كل ألموجودين أنصكوا...وظلت عينهم شابحه على ألتلفزيون...مركزين على ساجده شلون تركص .
وأني شبعت بجي أتذكرت ألمرحومة أبتهال
هسه ساجده مو كبرانه صايره تنطبها شبه.
وهم ألولد كلهم من علاوي لحد حمودي...
ما يعرفون ولا يتذكرون شكل ألمرحومات أقبال وأبتهال
بس ألمرحوم عطأ هن جانن يعرفنه...
أبويه بس أتزوج كميلة كطعها عن شوفه خواتها...
لأن بوكتها أقبال ساجتنه.
باطلة فرت راسي بكلامها...ليش تكول ألنهلة//عجلي بسالفه أختج لا يطير النسيب من أيديكم ........
ومحمد عاط بيها /فااااطمة
هي كامت وأخذت بناتها وكالت//قابل مجذبه
ألخبر أليوم بفلوس باجر بلاش...وراحت دخلت ألغرفتها .
كميلة كامت تنعي وتبجي...
حقها خطية طاك كلبها على ظليمه خواتها...
وهم ما عدها خالات ولا خوال بيهم حظ وخير...
باسمه من شبابها طالعه عن الطريق...
وبتها ساجده ضاعت وياها...وهي خطية حتى أبو ما عدها.
فد يوم وره زواجي بفتره،،جبناها سوالف أني ونور سولفتلي عن خالتها باسمة وبتها ساجده.
باسمه جانت تحب وأحد موظف يشتغل بمعمل
مال نسيج ،، وهو هم ساكن بنفس منطقتهم...
ومقشمر عليها،،،بوكتها جانت بنيه،،،وحبلانه منه...
وألحقير ناكرها ،، وشايل من منطقتهم وعايفها...
لان بوكتها أخواها العار (( خال كميلة )) هذا الشراب وأبو النسوان...هو الجان يجبر باسمه تطلع أدورلها شغل
علمود تجيبله فلوس يشرب بيها سم وزقنبوت .
ومن تقشمرت باسمة بسم ألحب ألجذوبي ...
صار أخوها ألعار رجال،،،وكام يهد على الحقير
حتى يستر عليها...ويوميه مسويله مشكله وهوسه
والناس يعرفون هذا ألحقير وباسمه بينهم علاقه حب...
بس هو ألناقص نكرها..وشايل من ألمنطقه .
وهذا خال كميلة العار...ما نعرف وين صفى بي ألوكت
من أني صغيرة وجنت عايشه هناك بغداد هو ماكو.
وعدها خال ثاني...من عهد العصملي هو أخو مريته
مأخذ مرته وجهاله وعايش بمنطقه الاهواز يم بيت نسابته.
وعدها بعد خاله...متزوجه بمنطقه قلعة سكر
ويمكن هسه هي ميته...هاي من توفى أمها وأبوها (اجداد كميله )كطعت رجلها من ألجية على أخوها العار...واختها باسمه .
YOU ARE READING
حصاد المواسم
ChickLitلكل زرع موسم لحصاده .. وعادة ما يحصد الزراع نتاج ما يزرعون .. ومواسم الحصاد هي مواسم اُنس وفرح وغبطة , إنها لحظات جني الثمار .. بعد جهد وتعب , وبعد عناء سواء طال الموسم أو قصر ..
