حصاد المواسم

ح ٢٦ (( ألجزء ألثاني ))

ألحلقة ألسادسة وألعشرون///من أحداث قصتي///

بعنوان /////حصاد ألمواسم

خطت بقلم ///فراقد حسن علي ///
————//////———-//////————///———

أرد أمشي للعباس وأخذ شكو علوك
بلكن ينطيني وليد ويسد ألحلوك 🥺
————//////———-//////————///———

رجعني محمد للبيت أسحل بروحي من ألحر .

هو محمد كال ألكميلة //تمشين وياية نمر على عمي ساجت ،، جان بالمستشفى...ماخذينة ألولد متخربط وهسة هو بالبيت...تمشين وياي نمشي نشوفة ،

هي كميله ما كالت باطل...لبست عبايتها وراحت وية محمد .

أباوع قسور ميت من ألبجي
ونهلة...حايرة تركض على ألبيت...وعلى حوري
وعلى ألبنات ألباقيات...وأيد بالغدة،،،وأيد على ألبيت والجهال...

رحت شلت قسور...وأخذتة للحمام سبحتة
وبدلت هدومة...لبستة دشداشة كودري باردة
وحفاظة جاهزة...يجبلهم علاوي جياسة حفاظات
من ألولاية...وياهن حليب قواطي...ومميات أحتياط ،
والله يصرف عليهم...ما مقصر وياهم.
بس هو هلكثر ناعم...ولا جنة عمرة ثلاث أشهر .

هسة ألجاهل...من يسبح ،،ويرضع ممه ويشبع...غير ينام
لا هو بقى على فد بجية...ويبجي بجية وأحد متوجع
بقيت شايلتة وأفتر بي...بلكت يسكت وينام.

هنا ويجيني صوت كميلة يلعلع...رجعت من بيت عمهم ساجت//نهله شمالة ألفرخ يصرخ ؟؟
طبت للهول فحطانه من ألحر

كتلها //يمة نهلة راحت تشر ألملابس بالمراح
خطية شتصير...تشلخت أيد هنا...ورجل هناك
وهذا ألجريذي ما يسكت ،
سبحتة...ورضعتة...وهو يلكع من ألبجي .

كالت //شو جيبية ألعندي خافنه ممتون
أنطيتة قسور وهي مفرشه بالكاع ...
لزمتة مرغت جتوفة ... ونعنعتة
كالت //ما ممتون شماله هيج متصركع ...!!

أنوب كالت لبتول//كومي ناديلي أبوج محمد بالكاع
كليله تعال بساع أمي كميلة تناديك .

طلعت بتول تركض ... تصيح لمحمد
أجى مستعجل ...كال //هاا شكو شبيجن ؟؟

كالتله كميله//أكلك يمة محمد ما تأخذني نزت ألفرخ للمضمد صمد...خله يعاينه...شو متصركع ما أعرف شبي

كاللها //كومي يلا ماعندي شي .

هديل كومي جيبلي محفظتي ..

وسأل //وين أمه ؟؟

جاوبتة// نهلة بالمراح تشر ألملابس .

كميلة كامت لغرفتها تلبس عبايتها ألزينة...

وأني بسرعة كمطت قسور...
حتى تشيلة كميلة ... وتسيطر علية .

حشمت نسمه بت باقر//نسومه كومي جيبيلي محفظة عمج تلكيها على ألكومدي .