ألحلقة ألثامنه و ألأربعون ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
من كفت الهوسه بليل وكلمن راح لبيته
بس طوعه وانتصار راحن لبيت نور
والكل تعشا وتعبنه أتمددنه بمكانه
محمد اشرلي على حلكة
عرفته اشتعل من المغرب...
كمت للمطبخ بحجة اسوي ممية لبشه
هو لحكني بسرعة خمط بوسة
مو بس سجاد اليوم معرس...محمد لازم هم يعرس
بس مكان ماكوا المكرود بقى يتحرمس.
سمعنه طبكت باب الهول بقوة...
وابوية يصيح //والعباس انحرك هي لعب اجعاب
وسجاد صاح //والعباس باجر اطلك والتحق للظيم
وكميلة عاطت //لاااا فاضل....
طفرنه اني ومحمد بركضة للهول...
واشوف ابوية خانك سجاد من بلعومة ولاطشه بالحايط...وكميلة تعتت باأبوية توخره عنه.
منا محمد راح على ابوية وخره عن سجاد
ومن الحوش اجي علاوي وسحل سجاد بره
وبقي صام حلكة بيدة ما يخلي يحجي.
كميله كلش تخاف على أبوية...
أبوية شكد حنين وخوش رجال
بس من تجي ساعه السوادين وطباكات الهواشم
يدروش يغدي نار وشرار من الأعصاب
يحرك الأخضر واليابس بهذيج الساعه
اضرب من محمد لو ادروش...
والعباس محمد بي مجال من يدروش...
لان هو دوم عصبي وعاكد حواجبه...
بس أبوية دوم زين بس من تجي الاطباكات
يحوسنه حوس يكوم ما يشوف الكدامة
خيرنه ما يوكف بوجهه.
أبوية ادروش بهذاك الليل على سجاد
هو هم سودنه بالزايد بالحوش ويصيح//والعباس
الا اطلكها واخرب شيب أمها وابوها...
بليتوني بوحدة مسودنه ما أريدها هي كوه.
ابوبة طلع عليه وكام يكفخ بي
وين متجي إيده يسطرة بكفخه
هو ما يدافع عنه نفسه،،،لو يصد ضربة أبوية
بس يصيح// مسودنه ما أريدها...
وابوية تواه توي بالكفخات...
ومحمد والولد يردون بس يوخرن ابوية عنه مايكدرون... حتى قميصه شككه عليه.
باقر وعلاوي شالوا سجاد شيل وحبسوه بالحمام
ومحمد وعون وكميلة واني وياهم اخذنه أبوية
ادفع وطببانه بالهول.
أبوية شنو يغلي على يا ساعه يضرب واحد بينه ويسكطه...
وعاط بكميلة //هاي تالي دلالج
ابنج العاق اليوم يملج بنت الاجاويد
وناوي باجر يمشي يطلكها..
شنهي بوية السالفه لعبة عندك
شفهمت منها ابن الكلب تبغج صارلك شهر
مريضه...وعكلها موش تمام...وبيها حاله نفسيه
واليوم طلعت بسالفه جديدة والله مسودنه
شمالها مسودنه شو البت متدينه ومستوره
وبعدك ما تعرفها انطي الروحك عطوة
واكعد وياها وتعرف عليها....
هسه صار الدين والحيا والحشمة عيب وسوادين والمرأه الملتزمة تسموها معقدة.
محمد كاله//بس اكعد راح تنجلط
ما يطلك أخذها مني ما يطلك
بس هو ضايج خلكة...ومخنوك
و البنيه الله يسترها فشلت ابوها
وحرجت سجاد وياها بسالفه العقد .
ابوية عاط //لا فشلت واحد ولا حرجت بشر
انا ومهدي وكل سيد لو شيخ يملج للعرسان
نعرف صيغه العقد...
ان ما ردت البت من اول مره...نعيد ثلاث مرات
ان ما ردت...ننشد ولي أمرها خافنا مغصوبة على العرس.....اذا أكيد واليها القبول
نكمل لل ١٢ مره بعدد اليمه المعصومين
ان ما ردت...نكمل لل ١٤...
هنا اذا ما سمعنه القبول نترك العقد ونعرف البت مغصوبة...واكو بيهن يردن خامس مره
واكو ثامن مره حسب اعتقادها واعتقاد أهلها.
سجاد اجي عايط من بره وكال //بوية موش سالفه
صيغة العقد...بوية البنية معقدة بالدين وفاهمته غلط
بوية والعباس ما رفعت راسها عليه
ولا عاينت خلقتها زين...
بوية تعرف شنهو يعني ما طخت ايدها بيدي
لازمة الحلقه بطرف اصابعها وترجف
ودكات كلبها وصلت للمحاويل
وبس خلت الحلقه بطرف اصبعي انهزمت
وخالتي لبستها اليه...بوية صوتها ما سمعته
بوية البنيه متعقدة بفكرة الدين وفاهمته غلط
حت انت من اجيت تسلم عليها تسودنت
وتريد تغطي وجهه منك.
والعباس أنا وياها مانتوالم
اظلمها.... واظلم روحي
بويه انا اعرف الله واعرف حق عبادته
بس تجي مرتي وتلبس نكاب كدامك وكدام اخواني
غير اشعلها بعود شخاط...
شنهي احنه عايلة قذره وهيج تخاف من يمنه.
بويه فدوة اغديلك افهمني...
البنيه بيها حاله نفسيه من حبست البيت
وقله اختلاطها بالوادم...
ومتعقدة بفكره الدين الغلط
بويه اذا هي عمها وخالها تسلم عليهم وهي لابسه نكاب...
بس كلي باجر عكبه شلون اتراهم وياها
بويه لو صار اليه جهال منها تطلع واحدهم تكفيري
وعقله مجيم...بوية الام هي مدرسه جهالها
وانا من البدايه اعرف هاي المدرسه ما ترهملي
عليش امورط روحي وجهالي وياها.
أبوية كاله//لا تحكم على البشر من اول درجة
وخالتك نويره خير دليل جدامك..... وسكت
ما كمل كلامة.
سجاد كاله//العندي كلته وخطيتي بركبتك ليوم الدين
هاي ثاني مره تظلمني...
ابوية كاله//الوكت يبينلك صحة كلامي.
هو سجاد طلع للشارع وعيونه مغوركة دموع
محمد لحكة هو وعلاوي...
ومرت هذيج الليلة هم بقهر وضيجة خلك....
سجاد جان من ينزل مجاز...ويرد يلتحق
يروح الضحى حتى انلحك نسويله لكمة
انلم جنطته...انحضر غراضه...يسبح ويبدل براحته...
بهذا اليوم طالع ويه اذان الفجر حتى محد حاس عليه من طالع.
كميله شبعت بجي من محمد قرأ ورقه
سجاد كاتب بيها ((لا يظل بالكم ما انزل مجاز لوكت التخرج ادعولي بالصبر)) ومخليها فوك التلفزيون
ومطفي تلفونه وعايفه فوكاها.
صبحنه كلنه ضايجين ومكدرين...
ولا تكولون البارحة جنه فرحانين....
وتعبانين من الدك والركص.
ساعة بالعشرة تقريبا أجتنه طوعه وانتصار وياهن نور جابهن حسيون...
واكيد نبأ الخايسة وفرقة نور الضاله ماكو واحد بيهم جاي وياها،،،صاروا كبار كامت تعوفهم بالبيت من تطلع.
كميلة شادة راسها بعلك من زمان عدنه جبناه
من بيت سيد شاطي....
والصبحيه كلها تنخه بخته لراحة عقل وكلب سجاد وترجع ليوره...
اجتها شوفة خواتها باب فرج الها...
وهذاك البجي والنعي اليفلش الحياطين
وسولفتلهن عن العركة وهوسة سجاد
طوعة صاحت على فطم //شو انهضي جيبيلي
كهوة وفنجان اعاين للوليد شماله متسودن
اني سمعت كهوه وفنجان عفت شغلي وفروخي وكابلت طوعه وكعدت...
طوعه ما تقرأ فنجان بس من يكطع بعقلها...
لو الواحد يتوسل بيها من الصبح لليل
لو ياخذها يزورها لبيت الله ما تقراله...
الا هي من يطكن براسها أطباكات السادة يلا تقرأ للواحد.
كمت سحلت نهله كارصه بالحمام ومثوله بالملابس
تغسل بيهن...كتلها//لحكي طوعة حضروا جنونها
وراح تقرأ فنجان علمود سجاد تعاي نامي بخوانيكها
خل تقرالج علمود علاوي.
والله كابلنه طوعة وكعدنه...
وهي كامت تشمر علينه...ونفشت ريشتها بروسنه...
اول ما فتحت الفنجان السجاد
وجان تأشر بالهوا وتغمة وتكله //تف على شكولك
موش وجهه نعمه...كميلة اخذيها مني هاي البت
بذرة صالحة عايني عليها محاوطتها أشعة نور
وراح تسعدة بحياته عايني النخله وعثوكها
شلون محمله بفنجانه.
اني لكفت الفنجان الثاني النظيف
وكتلها //عليج بروح جدتي هنديه اقريلي اني ومحمد
هي كالت //لخاطر احميد اقرالج يلا اكلبي فنحانج
وصدك فريت الفنجان وكلبته...
هي بدت تقرأ كالت//لا تخافين محمد لمامته اسم الله على شبابه ما يثني عليج...عبنج ماخذة روحة وكلبه
عدكم بعد بزرة...
ويستلم كرسي ويجر خط...
عندة سفر بره بس ماعرف على شنو...
وعنده لغوة ويه غريب،، وكريب.
وانتي ادفعي صدقة راح أطيحين بنكره وطلعين منها.
نهله كالتلها //عمه بروح اعزاز كلبج اقريلي العلاوي.
كالتلها //بدون ما تحلفيني يلا سويلج فنجان
وانتن الكاعدات يلا حضرن فناجينجن بدون توسل
اقرالجن ... اليوم الله هاديني عليجن.
قرت النهله وكالتلها //ولج انتي حبله
شو عندج توم صبيان بدايه فنجانج
نهله كالتلها //لا موش انا هاي اختي سعدة
بيها توم صبيان.
هي غمت نهله وكالتلها // هذا موش فنجانج
شجاب اختج سعلوه بالنص...
انتي عندج بعد بزرة وبيهم توم صبيان...
فنجانج حلو...ونيتج صافيه الراحة كابلة عليج...
وحياتج مستقره ابخت اهلج لو ابخت روحج
راعيج باقي بحظنج ومايروح لغيرج
ابد ما يثني عليج بس يلغي وياكل خ.... لا تخافين
شالت فنجان فطم...يالله شكد صفنت بي
خطية فجأه تفلت عليها وكالتلها //من عسنج بالصرع
واخس وانكس....طلعتي على عماتج نكسه.
وسدت فنجانها....
هي خطيه انجرحت وكامت تبجي
وطفرت من يمنه وراحت كعدت بالغرفة.
كميلة ما رضت كالتلها //ام صادق عليش فشلتيها
جدامنة حرام عليج....كلنا نعرف بيها السانها أطول منها.
كالتلها //حرام عليه من ارضى بألسعى لخراب بيوت الاوادم... حرام عليه لو ما هبت عظمة الله
وخفت من ظلمة الكبر وضكت اللحد.
جان تصيح بصوت عالي على فطم //خلي بحسابج
راعيج ياخذ عليج إثنين نسوان
وانتي ووحده منهن يركنجن ركن النعال
لو ما خايف الله بيجن يمكن يدفنجن بالحياة
تف وبرة من هيج نفوس خر......
انوب شالت الفنجان من كدام كميلة وهي غدت
أعصاب وتنافخ...واحنه الكاعدات بقينه وحدة
تباوع بوجة الثانية.
كالت الكميلة //بالعافية عليج عندج حج وتمشين لبيت الله...بس تصيبج وجعه تبقى التالي عمرج
وياج...اولادج على كلبج لا تخافين عليهم
ماظاهر شي بكتابج يخوف.
باوعت لنور وكالت//اكلج انتي عليش كل ما تكبرين
تشبهين المرحومة امج...حت صوتج ينطي شبه
الصوتها...الفرق امج جانت عربيه وانتي حضرية
هي ضحكت وكالتلها //جا غير هي امي...
بس نبا تنطي روعه للمرحومة إقبال
نفس ما بتول تنطي روعه الج.
هي كالت //ياااع...شو تعاي ليه خايبه بتيله
خل اعاين عليج صدك تنطيني روعة
ولو انا ماخذه شبه من ابوي الله يرحمه.
وشالت فنجان نور وهم قرتلها...
وصلوات فنجان نور وانتصار
كله خيرات وبركات ودنيا حلوة وحياة سعيدة
الهن والعايلتهن.
من خلصنه نور كالت //يااا أخذنه الوكت
شوكت انلحك نكمل طبخ العزيمه
كومن هم يلا نلحك احنه ووذان المغرب لو نخلص
لو لا.
وصدك اني وانتصار بلشنه بالعجين..
ونهله رجعت غسلت الملابس مال كل عايلتنه.
وطوعة كالت// انا اطبخ انتن بس عينني
اريدن تعبي ثواب على روح اهلي.
وبلشت هي ونور بالطبخ.
وكميلة شمرنه عليها تنظيف الخضرة...
وتثرم الطرشي وتغسل الفواكه
والبنات الصغار كتلهن// كومن خمن البيت
كشايه ما اريد بالكاع...
احنه ماعدنه نميز وحدة عن الثانيه
كلهن نسخرهن سويه من بتول وهي نازلة
كلهن يكومن وكل وحدة تسويلها شغله...
ويسخرن للكل...
وماعدنه هذن بنات علاوي مايصير تسخرهن فطم...
لو بالعكس بنات باقر ما يصير تسخرهن نهله
ماعدنه هاي السالفه...ولو ادروشت عليهن
كلهن ينكتلن من بتول لحد بشه ماكو تفرقه
وما نزعل احنا الأمهات...الأم التحظه بالغلطانه
تخبزها وتادبها.
والعمال محمد هو تكفل بيهم...
جابلهم اكل من المطعم كلناله// ما نلحك
حتى هو والولد ما اجمي الظهر للبيت
لان مخبوصات وهوسه ومكان ماكو
بقوا بالبيت يم العمال.
وركض الوكت ركض...خبزت اني وفطم
همزين من نزلنه بهذا البيت الولد اشترولنه
تنور مال غاز...بس الخبز بي مو طيب نفس تنور الطين...وبسرعه أيبس...وخبزته ما تطلع ترفه
نفس ما نخبز بتنور الطين...حتى ريحته تختلف
شغله بي حلوة بس السرعه...
اني اخبز اباوع على طوعه شلون تطبخ
صدك طبخها مال عرب...
تخلي مواد الطبخ شي فوك شي...
نور جنها ما راضيه بس ساكته تحترمها...
بس شنو من استوى الاكل
طلع طعمة يخبل...وريحته كلش طيبه.
ويه صفار الشمس حتى الزلاطة كملناها
حتى الحنيني (تمر بالدهن)...والكاستر
والطرشي جاهز...والفواكه مغسوله
حتى المواعين حضرناها كلشي مابقه ناقص عدنه.
اجمي الولد ويه الغروب ... خطيه واحدهم
سبح بسرعه يادوب ينكع روحه ويطلع يركض
حتى الوراه يلحك يسبح ويبدل.
اجانه عصامكو بسيارة جاسم اخذ جدورة الأكل
سواهن دربين..فدوة لعيونه الناطة حميد منصور
رتبهن ترتيب ام بيت معدله.....
احنه حسبنه حساب ننكلهن ابيكم حمل
بس هو خوش سفطهن...ووصلهن لبيت عمي عزام بسلامة.
اني وفروخي بقينه بالبيت محمد كالي//ما تروحين
وفطم هم ما راحت...خطيه بقت مغثوثه وضايجة
من وره رزاله أمها.
باقي أهلي كلهم راحوا لبيت عمي عزام.
حتي بتول وبنات باقر راحن وياهم.
عفت بشه بحظن فطم...
وكمت كشيت البيت ونظفته...
لنص الليل يلا رجعوا أهلنا...وهمزين المواعين
مغسوله ونظيفه...كلت الصبح اعزلهن وارجع
كلشي بمكانه.
ومشت ايامنه بين حياتنه العاديه
وبين هوسه العمال وتحضير اكلهم
وبين دوخة البناء...وخنكة هذا ألبيت.
وسوده عليه صدك تعده الشهر وأكثر...
وسجاد ما نزل مجاز
محمد أخذ جاسم ابو رعيدة وراح عليه يشوفه
جاسم عنده معارف بكد رحمة الله...
بكل مكان عنده عرف...
محمد رجع ضايج كال //ماموجود بالقاعدة
نازل مجاز بيت واحد من جماعته.
أنوب اكلنه القهر والتفكير...
والف فكره وفكره أجت على بالنه...
وانوب كميله تسودنت فكره تأخذها وفكره تجيبها
رجع وره يومين ما أدري ثلاثه
علاوي ومحمد وجاسم لنفس مكان دوام سجاد
حتى يتأكدون هو موجود لو لا ويطمئنون عليه
الحمد لله رجعوا مستبشرين...لكو موجود...
بس علاوي يسولف عنه والدمعه مغوركة عيونه يكول// صاير هيكل باقي بس جلد وعظم
مريض ويداوم...حتي مسويله تقرير طبي
ويكدر ينزل مجاز للبيت بس هو ما يقبل.
ومرتين يوكع ويفقد الوعي بالتدريب
و ينقلونه للمستشفى...بس يعاند ما يقبل يجي للبيت.
كايل لمحمد //اليحبني خل يدعيلي بالموت
كميله تسودنت عليه ودك ولطم...
وانوب شاشت تريد تروح اتحاجي أهل نرجس
وتكلهم// أبوية الجابر سجاد على هذا الزواج
وهو مجبور مايكدر يرفض كلمة أبوية
و هج من البيت وهسه طايح مريض فرد نوب
نريد نفصخ العقد وكلمن يكعد بمكانه.
ابوية كاللها //اذا بس يوصل خبر للوادم بهاي سوالفج
دبريلج بيت اسكني بي مالج بعد كعده يمي.
أبوية عنده كلشي ولا نتفاشل ويه العالم
عنده سجاد يموت...ومستعد يطلك كميلة
أهون من ما يكولون الناس أبو عطأ اجت من يمه
سالفه مو زينه.
وبقينه بهذا الحال...وبهاي ضيجة الخلك
واحدنه تعبان من ركضت الدنيا
وكثر الهم والقهر الشايلة بكلبه.
وزاد علينه القهر بيوم اجتنه نور طاكة من البجي
ولحكها حسيون وصارتلهم عركة بيتنه...
وحسيون شكد حباب ويحترم نور ويموت عليها
بس صار إعصار مال غلط ومسبه عليها
لان كالتله//ما اريد اتقرب من أهلك
هاي القسمة ما تناسبني...
ابن اخوك همجي يأذي بنتي.
أبوية ما قبل حسيون يغلط ويشتم أبو سعدي
ابو سعدي بخيت وشارته تكتل.
نور كامت تبجي وكالت//ابو عطأ خوية افتهمني
بنتي بعدها صغيرة...وابن عمها متحمل عليها
زواجه منها لغرض الاذيه...
هي طفله وماتعرف تسولف ومعيرته علمود الشهادة وهو كايللها// الا اخذج واكسر خشمج...
ابو عطأ بنتي جسمها مشوه من الحرك الصابها بالصغر...واني متأكدة الولد راح تكش روحه
منها... زواجة منها كد يكسرها ويرجعها عليه.
خطيه غطت عيونها بطرف ربطتها...
وكامت تشهك وتبجي بصوت عالي.
وحسيون يكول//ما بيدي شي اسوي
أخوي والولد نهوا عليها...اليوم باجر
ياخذوها من حضني غصبن عليه...
واذا سويتلي لغوه وياهم أخسر كل أهلي ناسي
يبو عطأ انا من بداية عرسي أهلي كاشين وجهم مني
وانتم بعد تعرفون السبب...أجي آليوم وأكلهم
ماانطيكم بنيتي حت عصاتي يكسروها من العشيرة.
أبوية بقى ساكت شريد يحجي وشيريد يكول
وعلى كولتهم العضة بلبة الكلب...
صدك من بداية عرس نور أهل حسيون عرفوا ماضي المرحومات...كله من وره الحيايه نبشن عليها.
المصيبه وين طاحت على رأس عون
كاعد وساكت وصافن بالوجوة
والوجة غدة ليمونه من القهر والسكته
مايكدر يسولف ويحجي.
سودة عليه حتى من طلعوا وراحوا نور وحسيون
لا قرأ امتحانه ولا فتح كتاب
وهو يلطم من كد صعوبة القراية
يكول//هذا صف الثالث مال الكليه مقبرة الأحياء
الواحد شكد ما يقرأ ما يكدرله هلكد ما صعب.
محد يعرف بضيم عون شنو...
بس اني ونور وهي نبأ الخايسة...
الوكعت بهذيج الظهرية وتخربطت من العناد والقهر وحسيون متخربط فوكاها.
وره ما طكت مفخخه نور وحسيون وعركتهم بيتنه
وذبحوا عون بخبر نهوه وليد على نبأ الخايسة
يمكن أقل الأسبوع أجتنه سعدة هي وكرشها
جابها عصامكو علينه المغرب بلكوة تمشي
كرشها واصل الخشمها صلوات بيها توم ولد
كالت//سودة عليه خالتي نوره اليوم انوخذ حيلها
نبأ متخربطة واكعه عليهم
وحسيون من معاينها منتهيه ومشموره بيدة
واكع فوكاها....وجعيفر ومحمد
مفزعين الجيران خايفين على ابوهم
سودة عليه عصام مر عليهم كبل شويه
يكول ابو زيد والبنية اثنينهم مجطولين ونايمين بالهول...ونوره وجهه غادي بكدار الشخاطة
عليهم من القهر.
سألتها //اسم الله شبيها امي واختي
كالت //والله عصام يكول البنيه بيها مصران اعور
يعني بس شاكين بيها الدكاتره وما مدخليها للعمليه.
اني فرفحت روحي عليهم...
طفرت على حمودي كاعد بالحوش يشوي دجاجة
على الجمرية...حمودي يموت على الدجاج الشوي
كتله//جيب تلفونك وخابرلي على امي
نبا موش زينه مدخليها للمستشفى.
هو اتصل على حسيون وانطاني الجهاز
ورجع يشوي بالدجاجة...
سودة عليه اباوع على هاي ايدة المنتوله
مو طبيعيه...ويحرك الجف بصعوبة
هو من وكت ما إنتل ولليوم يشكي منها
ويكول //اصابعي منملات وعظم الساعد يصل عليه
جاوبني حسيون...بسرعة سلمت عليه
وكتله //اريد امي
جاوبتني نور...حرام كلشي ما افتهمت منها
ولا كالت شي جديد فوك كلام سعدة
بس كالت //على مجالج مرلي اختج تريدج.
لليل كميلة كالت لعلاوي //ما دكلي على خالتك
اعاين بنيتها شلون صارت...
عون مجطول على صفحة...ومودة بت باقر
نايمة على ايدة...بقي يفر براسة
يستحي يسأل...
وكميلة تهبط الميت...تسولف بالتلفون بصوت عالي
وتكول بصوت يخوف....ااااي
ياااا سودة عليه...يمههههه عواطف
وتااالي...يااا الزهرة ام الحسن تحضرها
اااااي.... عمت عيني باجر امرلج سودة عليه ما تستاهل...ومن سدت الخط خرطت نفس حجي سعدة
الكلنا نعرفة ماكو شي جديد...بس هي ماتوب من هذا طبعها.
عون عوزة بس يكمز على كميلة وهو يحاجي نوره
ولو ما عيب يمكن بهذا الليل يروح عليهم.
وعدت الايام وعون تمرض نام بالفراش
من يسالوة //شبيك
يكلهم// صكعتني الشمس
وهو جذاب مريض من وره سالفه نهوة وليد الاغم
على نبأ الخايسة.
ومن هو جاهل يصوم ويصلي...
والله كلش حباب وخوش ولد...
مو هلكد يسمع اغاني لو يركز بيها
لطش بغنية عارف محسن (على المحبوب ودوني
على المحبوب يا ناس) لعبت ارواحنه من وراها
هلكد ما يعيد ويصقل بيها وسمعها.
باقر بهذاك اليوم...انتبه عليه جنه كلنه كاعدين نتعشا...وهو سودة عليه ما ياكل ماله خلك
كاله //عون شنهي سالفتك...عليش مكلوبه أحوالك
اعراضك موش سالفه ضربت شمس
هو بقى ساكت شوية... وبعدين كاله//تعبان
من الشغل.
باقر كاله//كول حمامتك طارت حالها من حال
حمامة سجاد.
هو سودة عليه صم اعيونه بصابعه
وكاله//بعد ما اجت للكليه
وصديقاتها يكولن أهلها شالوا لغير محافظة
وحت رقمها مغلق كلشي ماعرف عنها.
كميلة كالت//هذا هم حظي....بعدني بدولاب سجاد
أجاني دولابك سودة بوجه أمك كون
من عمت عيني عليك ما مشيت بهذيج الايام
وكضيتها الك.
هو كام من الاكل وطلع بره...
محمد كال //ورطه اليوكع بالحب ودولابة
ما يعرف الواحد وين يزته بنهاية فرته...
لو ينطي حلاوة الحبيب ويعيش بنعيم الله...
لو يزته بجحيم النصيب و يوكله تبن.
أبوية كاله//كول الإيمان بقسمة الله انعدمت
انا موش جدامك اعشكت ثلاث سنين تسودنت عليها
وتاليها أصبحت نصيب أبن عمها...
وبعدها تزوجت ام غايب الله يرحمها وماصرلي منها بزره...والله عوض روحي وكلبي بهل المدهربه .
بوية موش كلشي نتمناه بهل آلدنيآ لزوم نحصل عليه
اختيار الله النا افضل واحسن...بس ألبشر عنود
وأكد ربك حسن أختيارة ألنا بالقرآن الكريم
بسورة البقرة((وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ)) صح هنا الآية تخص الجهاد
بس لو تعاين الها من باب حياتك
وتكون عايلة صحيحه
والحفاظ على ولدك بيها من الغلط وتقيم سلوكهم
هو أكبر جهاد.
وأزيدنكم بعد إيه من رحمة لله شاهد على كلامنه
بسورة النساء ((فَإِن كَرِهْتُمُوهُنَّ فَعَسَىٰ أَن تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا ))
اكو ازلام هم باطلين ويكرهون نسوانهم....
بس هاي مرته اليكرها تولدله صبي يطلع عالم بالدين لو عالم بمجال الحياة ويصبح قدوة للمجتمع
ويطرح الخير بكل مجان يكعد بي...
منين اجاه هذا الخير...من مريته الكارهه.
يابوية موش كلشي بالدنيا نريدة لزوم نحصل عليه
صفي نيتك مع ربك ومع ذاتك
ووكل أمرك لرحمته وخل هو يختارلك الأحسن.
تعال فهمهم لا بيهم واحد يسمع ولا بيهم واحد يشوف... وعدت الايام ومشت الأسابيع
واحنه واحدنه ضايج من حاله...
سبحان الله احنه استلمه التعويض
لو انفتحت علينه بوب جهنم من كثر الحسد
والنفس والعيون الحاروكة.
وبيوم العصر يطب علينه سجاد
لابس زي عسكري فد نظيف وأنيق
وشايل نجمة على جتفه...
يالله تفاجئنه بجيته...
محد حاسب حساب اليوم هو يتخرج ...
ماادري الولد كلمن ملتهي بشغله وناسين يوم تخرجة
ماادري صدك ماعدهم علم هو اليوم يتخرج
وهو الله يسلمه عنودي من هذيج زعلته
التحق وبعد ما نزل وكلشي ما نعرف عنه.
كميله تكولون طير وطاح بحظنها...
مافرحت بشيلة النجمة بكد ما فرحت بشوفته
حتى من بلعومة باسته...حارت منين تبوسه
وشلون تلمه الحظنها وشلون تشبكة
كعدت هي وياه بالكاع وهذاك البجي والمناشغ
أثنينهم يبجون بصوت عالي.
اني هم شبكته وبوسته...
نهله خوش سوت صكت البيت صك بهذيج الهلاهل الحلوه...
وفاطمة مادري منين جابت جكليت
يمكن هي ضامه عدها لان شويه وطشتهن على راسه
وهم كامت تهلهل.
وقسور الحقير هلكد ما مشتاقله
تشلبه عليه مثل القرد وشبكة من ركبته
ويبوسه من عيونه ومن خشمه ومن حلكه
يمكن خلص وجهه من كد ما بوسه.
البنات الصغار كلهن سلمن عليه....
هو هم فرحان بشوفتهن وبوسهن
بس الهتلي حرك كلبي ما بأس بشه
بس باوع عليها شايلتها فطم
أكله //عليك العباس بوسها وفرح كلبي
يكلي//والعباس التحلفين بي بس ابوسها هسه ازوع
بخلقتها...ولج زتيها بسطله الزباله ولا تنطيها حليب
كميلة كالتله //ما مريت على ابوك
على خوانك بالبيت.
كاللها //تؤ أجيت كبل عليج محتاج شوفة وجهج
وكمشت ايدج...لزم ايدها باسها وخلاها على راسه
وهي كميله هم رجعت تبجي وتبوس بي
حلفته ما يبدل ويروح يمشي وياها على ابوية للمرقد
كاللها //شنهي انا لعبه وتردين تفريني بالشارع
وتفرحين الوادم والله ابني سجاد صار ضابط
استجني يالمدهربه وخليني كاعد كدامج
وعلواه هذيج المرأه تسويلي جاي
بدال هذا الشربت المغص معدتي.
خطيه طفرت نهله وكامت تسويله جاي
اني صفنت عليه...احسه تعبان
وعيونه ذبلانه...ومو فرحان بهاي ملابسه الجديده
وحتى ما فرحان وشايف نفسه عودين هو صار ضابط
شرب اكلاص الجاي...وكام بدل ملابسه
وكال //راح اناملي ساعه الاسمع صوتها
هي لو واحد من فروخها...اعاقبها
واخليها ادك عشر اشناوات
وراح نام بالغرفة وطبك عليه الباب.
كميله تحوس شلون تبشر ابوية والولد
مابيهم واحد موجود بالبيت
ابوية بالمرقد...والولد بالبيت
حمودي طلع من الفجر ولهسه ما رجع للبيت
حت تغدا ويه العمال هناك.
لبست عبايتها وطارت للشارع...
كلت للبنات// كومن حضرن شربت
ودزن الجهال يجبون النه جكليت من الدكان
راح يجون ابوية والولد يفرحون بسجاد
امي بعد ما تكدر تصبر.
صدك بين ما كشينه هوسه البيت
وفطم ركضت تطرك شربت هذا ابو الجياس الصغار
اموت عليه وبالاخص اذا جان ابو البطيخ.
ونهله دزت بتول ركضت جابت النا جكليت والله قليلات من الدكان الموجود قريب علينه
ماكو يمنه دكان جبير.
اجي ابوية مزرعد من باب الشارع
كال النهله//وين سجيد
كالتله//بويه نام بالغرفه
ابوية طار عليه...
اني ركضت وراه كلت خاف يضربه لو يسويله هوسه
هو وكف فوك راسه وندهه بجف رجله
سجاد نايم جفى على وجهه ولابس بس بجامة
سودة عليه ظهرة مشخط تشخط من الكتل
فز شال راسه وكال //هلا بويه
وعيونه معمصهن بالكوه يباوع.
أبويه عاط بي //انهضضض شعندك نايم
هو خطيه بالكوه شال روحه وكعد..مبين صدك تعبان خطيه حط ايده بالكاع يلا كام وكف على طوله..
ابوية مد جف أبدية كدامه...معناه بوس أيدي
هو ولا باوع بوجه أبوية...لزم ايدية يريد يبوسها
وابوية بسرعه حظنه وظمه بنص صدرة
وحكنه على ظهره وكاله//فراكك اخذ مني الحيل
بعد لا تعيدها.... وسجاد ولا تكولون زلمة وصار ضابط
كام يناشغ ويبجي.
والف الحمد لله والشكر لله
بهذيج الليه شكد فرحنه بشوفة سجاد
ابوية والولد كلش فرحوا وتفاخروا بي.
والف الحمد لله شوية روح كميلة وابوية استقرت
شايفين من ام البيت لو ابو البيت من يلوبون
على واحد...تحسون كل اهل البيت يلوبون وياهم
ومن يستقرون الهدوء يعم على كل الموجودين.
وعدت الايام والاسابيع والاشهر...
والخلفه والعمال طلعوا النايمين بالنجف من كبورهم
يعني هلت علينه سنه ٢٠١٠...........
واحنه بعدنه محصورين بهذا البيت
والبناء بعده ما كامل .
سجاد يداوم اسبوع وينزل للبيت مجاز أسبوع
وأبداً ما وصل بعد لبيت ابو علاء من يوم المهر
شكد كميلة تحجي عليه...شكد اني اتوسل بي
يروح يشوف نرجس ويكعد وياها...
وهو أبد راسة يابس مايقبل يروح عليهم.
كميلة شسوي تلملم الشر...وتقلل من المشاكل
بين مده ومده تاخذ حاجة هديه لنرجس
وتروح تشوفها وتنطيها مصرف
وكايله لأبو علاء //أحنه ماعدنه طبع الولد يزور
خطيبته ويكعد وياها...وانت تعرف هاي دنيا
وكلشي يصير بيها...نحسب حساب لسمعة البت
راعيها من يعقد عليها بعد ما يلجحها الا بيوم العرس
بعد بينه طبع أهلنا....
الزلمة ما يعرف مريته الا بيوم العرس..
أنا حبيت اوصلك طبعنه حت لا يصير بالكم سجاد عليش ما يمر عليكم.
وعون ضاج من الدنيا كلها...
وحتى مو هلكد يقرأ...
بس ابوية ومحمد واخواني كلهم عرفوا
عودين البنيه اليحبها عافته لان أهلها شالوا بغير محافظة...يحجون عليه يكمل دراسته
ويطلع معدل زين...ومايوكع بسبب البنيه الي هي
مو من قسمته.
نبأ ما عرفنه سالفتها شنو...
بين مدة ومدة ونسمع بيها تتخربط وتوكع
وحسيون ياخذها للطبيب...
وبيت عمها هم سكتوا عنها...
وليد الحقير بس نهى عليها وعافها معلكة
لاهي للسمه ولاهي للكاع...
لا هو المتقدم رسمي لخطبتها
ولا هو فاك عنها النهوه وبلكت نكدر نسوي شي
ونخطبها لعون.
واني أحلى أسبوع أجاني بي فرج الله....
وفرحت بي من كل خاطري....
ومن فرحتي جنت مستعده اغدي واعشي اهل بابل كلهم وما اتعب...من شلنه غراضنه من هذا كن الدجاج
ورجعنه البيتنه الجديد...الف الحمد لله خلص البناء.
بعد شلعان الكلب وطلعان الروح.
بيتنه الجديد شلون صار....
البيت الجوة بقى نفسه البناء القديم بس شويه بي تغير علمود تترتب خريطة بنائه...
هسه اوصفه الكم...
باب الشارع طلاكتين كلش جبيرة...
من تفوتون الحوش صار كلش جبير
بعد ماكو بره لا مطبخ ولا تنور الطين...
بس صحيات وره الباب وكلش مرتبه ونظيفه.
والحلو التوثه بقت موجودة لهذا يومنه
وفروخها طالعين بصفها يخبل شكلهن
محوطينها الولد داير مديرها بطابوك ومرتبين مكانها
تخيلوها حديقه صغيرة مدوره بنص الحوش
اليطب للبيت تصير بوجهه....
والقطعه الاشتريناها من بيت بشاره
هي الكبرت الحوش يعني ويه اتجاه التوثه كبل
بقت المسافه حوش ممدوده لنهايه حد بيتنه...
على ايدكم أليمنه أول ما تفوتون للبيت كلدور
كلش جبير وعلى عرض البيت وبي مغاسل...
بي بابين وحدة تدخلون على الصاله...قبل جانت غرفه كميلة...والباب الثانيه تدخلون على الهول
هو بقى نفسه القديم((يعني الهول متوسط الغرف
بصف الصاله (غرفه كميلة قبل)
جانت غرفه باقر هسه صارت الكميله...
و كدامها غرفه علاوي قبل...هسه صارت مطبخ
وغرفتي بقت بمكانها...يعني نفس البناء القديم
بس غرفه كميلة صارت صاله....
بس ضايفين الولد بغرفتي وغرفه كميله حمام صغير
يمكن عرضه متر كد فتحت الباب
بس طويل كد نص الغرفه وكلش مرتب.
بالكلدور مو اكو باب تفوت للصاله...
وباب تفوت للهول...
أكو بعد درج يصعد فوك للطابق الثاني
هذا الطابق صار الحمودي...
ونفس البناء الجوة موجود فوك
أحنه أخذنه بس الغرفة الفوك غرفتي
يعني اول ما اصعد الدرج تصير بالوجة
أسويها مخزن لغراضنه الزايدة.
القطعة الاشتريناها من بشاره
الولد بنوا بيها اربع بيوت
يعني أثنين بيوت جوة واحد بصف الثاني
وأثنين بيوت فوك...درجهن بره بالحديقة
يعني كل بيت مفصول عن الثاني.
البيت الجوة المفتوح علينه بابه بالمطبخ
هذا بيت علاوي... وفوكاهم بيت سجاد
والبيت الجوة الثاني المفتوح علينه من الكلور
هذا بيت باقر...وفوكاهم بيت عون
الف الحمد لله يعني الولد كل واحد صار عنده بيت يسكن بي وحده هو ومرته وجهاله.
بس اني بقيت ساكنه ويه امي وابوية
الحمد لله لا اني بعدت عنهم...
ولا ابوية ومحمد اتباعدوا.
وحمودي وعون وسجاد أحتلوا الصاله ينامون بيها.
بس هوستهم بعدها ويه كميله...
الحمد لله بلشنه نرتب ونعدل ونشتري غراض جديده
الصاله اشترينالها تخم قنفات جديد...
وزوالي ومدات وبردات وطبلات كلشي جديد صار بيها.
الهول علاوي خله عقله ويه تخم القنفات
مالتنه القديم واشتغله وعدله بورشه النجاره
والصدك طلعه احلى وارتب من شغل السوك
وهم اشتغل المعرض وعدله وصبغه
وضاف عليه شغلات...ولغه من عنده خانات
كلش تغير شكله الواحد يشوفه ولا يعرفه
هو نفسه المعرض القديم.
وسوالنه ثلاث طبلات خشب كلش مرتبات
علاوي يموت على سوالف النجاره
من صدك يخلي عقله بالشي اليسويه.
واشترينه بردات جديده...
بس الزوالي والمدات هن نظيفات وجديدات
جنه نفرشهن بس بالعيد لو بالمناسبات
صار الهول نظيف وجديد.
غرفه الأخشاب مال كميلة بس صبغها علاوي
وغيرت يدات البوب مال البوفيه والكنتور
ورتبناها بمكانها...بس اشتريته بردات جديدة
وقماش جديد انغطي بي نضدة الفراش
من صدك طلعت غرفة كميله جديده.
المطبخ محمد اشتره كاونتر جديد
وطباخ جديدة...ومجمد وثلاجة جديدات
وميز طعام...صار يخبل كلشي بي جديد.
بس الغراض القديمة ما ذبيناهن
محمد اتبرع بيهن العصامكو
وهو بعد هم شاطر ماكال لا
كاله //اجني رحمة اني ارتب الناقص بيهن
واعدل بيهن بيتي.
وغرفتي محمد بس صبغها...
هي اصلا نظيفه وجديدة كلش محافظة عليها
بس اشتريت بردات جدد...
ومحمد اشترالنه مكيف جديد ومبردة....
الف الحمد لله بيتنه كلشي بي صار جديد
من الحياطين للغراض للفراش
لكلشي موجود بالبيوت العراقيه...
كميلة انطت لعلاوي وباقر فلوس
وكالتلهم //جهزوا بيوتكم
و رواتبكم منا وهيج تبقى عدكم
بس ما اريد اسمع بيوم من الايام مداينين من بشر
لموا ايدكم وحسنوا حالكم.
باقر جهز بيته كله جديد...
جهز من باب الشارع لغرفة بناته
حتى غرفته مال نوم شمرها
جهز على كولتهم من الإبرة والخيط للمراه والجهال.
علاوي كال الحمودي //أخذا الغرفه وصعدها
عندك بالسكن واني اكلبلك خلقتها
حت باقر بنفسه ما يعرفها من أكملها الك
خشبها صاج الأولى نظيف وتكمة.
علاوي شاطر...ونهله اشطر منه أخذت تعلوم
ايد كميلة وتعرف أدبر وتقتصد وتلملم ايدها
تقريبا فلوسهم صرفوا نصها...وجهزوا بيتهم
لان علاوي هو سوه تخم قنفات الهم
وسوالهم كاونتر مال خشب يخبل فصله على كد مساحة مطبخهم...وفصل غرفه نوم لجهالهم
وعدل غرفتهم مال الأخشاب من جديد...
وسواله معرض يخبل كلش حلو...
وسواله بوفيه احلى من بوفيه كميله...
وحت صيدليه مال علاج صغيرة سوه...
وكل المري الموجودة بيتهم هو يسوي ديكوراتها.
وصلوات على النبي ماكو شهرين من كعدنه بيتنه
وهو اشتره سيارة صغيرة يسموها برنس فراشه
أخذها بالاقساط من صديق سجاد...
وسوة سلفه بنص راتبه حتى يسدد بيها حك السياره.
سجاد بس يريد ينهزم من العرس
كال//خلي علاوي على مجاله يشتغلي بيتي
ويفصلي نفس الشغلات السواهن بيته
فلوسي اريد اشتري بيهن سياره.
محمد يعرف علته شنو...
ادروش هو وباسم وعلاوي على بيت سجاد
وسوله تخم قنفات...ومعرض
وكاونتر...وغرفة نوم...
ماكو أقل شهر ونص كملوا كلشي
وكميله حشمت نور...ويوميه ينزلن للسوك
يعني بشهرين بيت سجاد صار جاهز من الباب المحراب...
وهو صلوات اشتره سياره حديثه وعاليه
اسمها سوسوكي...لونها رصاصي فاتح.
بس كميله ساعدته بفلوسها...
كميله كامت ما تاخذ رواتب علاوي وباقر
عافتها الهم بعد هم يدبرون أنفسهم.
بقها عدها راتب أبويه،،ومحمد
وراتب المرحوم عطأ سوت بي سلفه
واستلمتها ثالث اسم...عودين تعرس بيها السجاد
بس انطتها اله علمود سيارة
تكول //ما اريدن بعد خاطرة ينجرح
وهم تجمع الوارد البين فتره وفتره يجينه من باسم من ورشه النجارة...ووارد الكاع محمد ضمنها بيد فلاح من اول ما توظف...والحمد لله هي خوش تصرصر وتضم...عدها خير من الله.
بس سكن عون...وحمودي بعده فارغ
بسلامة من نريد نعرسلهم نجهزة ألهم.
وصلوات الواجبات الاجتنه خوش فادتنه
ياهو اليسمع بينه كعدنه بيتنه يجبلنه حاجة
والله اكو ناس حتى مواد غذائية جابولنه
يعني كونه شكر...لو كونيه تمن...لو تنكة دهن
والله كلشي يفيد ماكو شي ينشمر.
والشي العدنه زايد...مثلا المواعين
لو الدولكات الكزاز وكلاصاتهن
لو باقي الشغلات اليجبوهن الناس واجب النا
كميله تنطي منهن لبيت علاوي لو لبيت باقر
لو لبيت سجاد.
وحمودي يعيط//يمة ما تضميلي حصه
عليش تنطين بس الولدج.
هي تكله //بس اسكت انت الك حصة الأسد.
وصلوات على النبي بيت ابوية كبر وصار واسع
وحت عايلتنه احسها كبرت وتوسعت...
ما ادري شلون جنه كاعدين بيتنه القديم
لو بهذاك كن الدجاج.
البنات نهله وفطم من وره العصر يسرسحن علينه
صلوات بيوتهن تنكط ورد...
وحتي احسهن ارتاحن...
وحدتهن دوم كاشخة ومعطره والكحله ما تطيح من عيونهن..
وجهالهن بين بيت ابوية وبين بيوتهن...
اذا انصب غدة لو عشه وهم موجودين
عادي يبقون ياكلون...
ومرات علاوي لو باقر يتعشون ويانه
وبوكت الغده هن يدزلي طعمة
واني دوم كميلة تكلي//زتي صينيه الغدة لبيت اخوتج...شنو مركبة غدة هل الله قاسمة
اودي صينيه لبيت باقر وصينية لبيت علاوي.
علاوي كل جمعة يسوك لبيته...
ويجبلنه مسواك وياه...وهو يعرف دوم محمد يسوكلنه...بس هو يكول //ما يخرب يفيدكم.
باقر لا بين يومين وثالث...بين يوم يوم
شنو يسوك فواكة لو حلويات لبيته يفكدنه وياه.
والحمد لله لا كميلة انقهرت وحست اخوتي بعدوا عنها...ولاهم باقر وعلاوي ولا نسوانهم لو جهالهم
انكطعوا من يمنه...بقينه عادي بيت واحد
بس الفرق كلمن انتكل على روحه...
وشال حمل عايلته ومسؤولية الدنيا.
بس علاوي المسكين تسودن...
سيارته تبقى بالشارع...
وياهو اليعجبة يطلع دز واحد من الجهال على السويج واخذها وطلع...صلوات كلهم يعرفون
يسوقون...حتى محمد يطلع بيها.
مرات علاوي ما موجود يدزون على نهله
عادي تنطيهم السويج.
هو تسودن يكول //اتخيل سيارتي ساقطة
وكلساع طالعه ويه واحد...ولكم اريد اركبها واشبع
روحي من الطلعه بيها.
سجاد يخاف على سيارته يخليها بالحوش
لو يموت الواحد ما ينطي السويج
وفد يخاف عليها...لو بودة يشلها ويعبرها
من جيحة الطين...ودومة يغسل بيها
لو ينطي للبنات بتول ونسمه فلوس
يغسلنها اله.
اني رتبت بيتنه على أيدي
كميله ما دخلت بشي...
على كولتها //هو الج انتي دوخي بي
انا اليه الصافي...
هم نفس حياتنه كبل...اكعد من الفجر
اريك ابوية وامشي للمرقد...
انوب إريك محمد والولد كلمن يمشي على دوامة
وانوب ابلش بالتنظيف...وتساعدني بتول
بوكت الماعدها مدرسه...مخليه بالي وياها
وعلى كلشي كاعده اعلمها...
الفرق عندي بس الخبز بعد ماكو تنور طين
تنور الغاز خلوة الولد بالحديقة ورة بيتنه
يعني من جهه بيتوت الولد...اخبز يوميه العصر
كميله عليها بس تشوف الحلال
وتحلبلي الهوايش...
ومرات الله يهديها تنظفلي المراح.
وما بطلت من سالفتها لازم تسمع أعلوم
تكول //اروحن انشد على فلانه وتطلع وهي الطلعه
تنسه نفسها...بس من تجي خوش جايبه وياها
باكه مال اعلوم واسمع منها كل اخبار الديرة.
ابوية حار بالحديقة...مخلي روحه بيها
كلب الكاع...ويعدل بيها...
وزرعها ثيل...ويشتل بهل أقلام مال الأشجار
ويرجع ليورة...مكضي كل وكته بيها.
واجي اليوم الي ابوية كال لسجاد// لهنا حدك
هو سجاد جان نازل مجاز
عودين شالته الغيرة وكام يشتغل بالحديقة ويه أبوية
ويساعدة...من الظهر شد الا ايحدد الحديقه
ويسوي بالكاع سياج من الكاشي
مو بقى عدنه كاشي زايد من البناء
كل وحدة يسويها أثنين بس يطرها على شكل ٨
ويثبتها بالكاع...صار السياج شلون الجبال
من جنة نرسمة بالورق من جنة صغار ٨٨٨٨٨٨٨٨٨٨٨
والله طلع كلش حلو.
كال السجاد //احسب حسابك بنزلتك الجاية
انت معرس...صارلك قرن من ملجت بنت الاجاويد بيتك وجاهز...وسيارتك عندك...ودوامك مرتب
بعد ماعندك حجة.
هو سجاد يريد بس ينهزم من سالفه العرس
كاله //بوية أنطيني عطوة اريد أعقد محكمة
كاله //من باجر امشي بالعقد واكضي شغلك
نزلتك الجاية بقوة الله احسب نفسك انت معرس
سجاد تسودن اجي يردم على رأس كميلة
يريدها تحاجي ابوية... يعني بعد اسبوعين يعرس
وصدك مشي كلام ابوية وصار عرس سجاد
الصارلنه بي عرس 🤦♀️.....
يتبع......