ألحلقة ألسابعة و ألأربعون ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
هذيج الليله من رجعت لبيت ابوية
محمد بس يبوس بالجهال ويلاعب بيهم
وشكد بقى مخلي ملاك بحظنه...
وكلساع وكال //تشبهني...
عاينوا عيونها نفس عيوني ...
بس زركة علئ حمودي من جان صغير.
ما ادري ليش حسيت بهاي سوالفه
عودين يوصلي قصدة ويكلي لا تهتمين لحجي
الحياة... ومن شكل الجهال طلعوا يشبهونه
اكبر لطمة على حلوكهن...
أني اكول بروحي الحمد لله بس خلقتهم كامله
خليهم سود لو زركان من يكبرون يتغيرون
الف الحمد لله من الله عوضني بيهم بعد صبر هذيج السنين...وهو محمد فرحان بيهم أكثر من فرحتي.
بس بتول شبعت بجي تريد يوخر ملاك من حظنه
وهو يضحك عليها يكلها //روحي اكعدي بحظن ابوج فاضل.
تكله //لا انت بابا...
وهذاك ابوية فاضل يصير بابا مال ماما هديل
وبابا مالتك مو بابا مالتي... بس انت بابا
وخر هاي الوسخه من حظنك هسه تبول عليك.
هو كاللها //تعاي اخليها بحظنج
عاينها صغيرونه وحلوة.
كالتله //ويع مو حلوه جنها بشه سودة
وخرب بالحظ الخايس المجبي بنكره الجلاب السايبه
من هذاك اليوم مشت على ملاك لبوكًه البشه
كام محد يسميها ملاك كلهم يسموها بشه.
وعدت الايام وبشه بعدها نفس كبرها
شكد ارضعها واطيها ممه ما تكبر ولا تنشنش
كلش ناعمه...بس لونها يوم عن يوم يتغير
يعني شوي تفك وتصير سمره.
وسبحان من زرع محبتها بكلب فطم
هلكد تحبها تموت عليها مو تتملق ولا تمثل
بس من صدك تحبها.
وعدت الايام والاسابيع والاشهر
وبعدة الخلفه أيجر بروحه وماكمل بناء بيتنا
والله هو جذاب يسخت بالشغل
مو شغله يبني ست بيوت ويرتب البناء...
بس متختخ على كت الفلوس...
والاكل الزين...وونسه الولد...
وشغله اليوم يسويها بيومين.
أحنه بقينه محصورين حصرة الجلب بالجامع
نفس وضعنه بالبيت ونفس الهوسه
ونفس الركضه بين شغل البيت والجهال
وهوسه طبخ العمال...وخنكة البيت وصغر المكان.
وخلف الله على مسلسل النبي يوسف الصديق
تطلع ساعه بليل كلنه نصفن عليها
وره ما تخلص الحلقه نلف روسنه ونام
من التعب وركضة النهار.
وبالنهار نبقئ اني وكميلة والبنات نسولف بيها
والحلقات الأخيرة من زليخة تكول/أشم ريحة يوسف
اني أكلها //من فلك طر سوادينج...
اني المسودنه بحب المصروع ماسويت سوايتج
ولو اني جنت ابوك شيشه البروت الخضرة
من محمد بدون مايدري بيه...بس انتي خطيه
بقت بس ريحة يوسف بخشمج كلشي ماعندج
من يمه .
ونهلة تكول //ولجن ماالله يرزقني شويه من حب يوزرسيف وزليخة وعلاوي يرجع يحبني مثل كبل
كميله تكلها //بسلامة باجر عكبة يكضي بيتكم
وانتي وشطارتج بعد دبريلج حل ونامي بخوانيكة
ولا تخلي يطلع من جوة حظنج.
فطم كالتلها //عمه وانا شلون بيه
باقر حت ما يعاين بخلقتي...
وانوب يكلي بعد ما يصير تحبلين الصرع يكتل الفرخ كلت عودين اخلف بعد جم بطن بلكت يجيني ولد وأكسبه اليه.
كميلة كالتلها //بس حلي لسانج بحلاة الكلمة الطيبة انتي تكسبي...ولج يمه لا تراددين من يسولف وياج
بس كولي اي ولا تعارضين
هو راح يغير اسلوبه وياج.
والعصر من نفرغ وماعدنه شي
اخنك نهلة تكعد تحفلي...
نهله الله جابها رحمة النا تعرف تحف
شوكت ما عشعش الشعر بوجهي اخنكها واخليها تحفلي...وتكعد فطم يمنه تسوي شيرة
يصير واهس كلنه نحف ونشير سوية تعلمنه
اني مصيبتي شعري...بين مدة ومدة اصبغة
ابد ما اخلي يصير ابيض اصبغه دوم جوزي طوخ
لو اسود...بس هاي البداية يم كصتي اليطلع جديد
يطلع ابيض...دوم اخلي عصارة الصبغ احتياط
جوة ايدي بس يطلع الجديد اصبغة بفرشة الأسنان
فدوم شعري ابقى أسود.
ومن توظف محمد لليوم...
اني دوم اخلي نهله تحفلي وتشمرلي حواجبي وكحلة العرب ما تطيح من عيوني...
صح ما اخلي مكياج بس الف الحمد لله
وجهي صافي وكلش ابيض ولون الأسود يلوك عليه
يعني مرتبه روحي اكثر من كبل اخاف محمد يباوع على غيري.
احنه لبسنه بالبيت كله دشاديش ما نلبس غيرها
كميلة كل ما تنزل للولاية تجبلنا اني والبنات قطع قماش نوديها لام سهاد تخيط النا...وهاي بالسنوات الأخيرة سعاد تخيط...خطيه ما اجتها قسمة وبعدها كاعدة.
ومرات نور تفدكنه اني ونهله وفطم
وتجبلنة نفس القماش نخيطه سويه...
وانتصار لو طوعة هم مرات يفدكنه....
ومرات من الواجبات نجمع القطع...
فدوم نخيط دشاديش زينه ومرتبه...
والتعبانه نعوفها لشغل البيت ومن نخلص شغلنه
ونسبح نلبس الدشداشه الزينه.
اني ما اشيل هم للملابس الداخليه
محمد دوم يجيبهن اليه يعرف قياسي
وخوش يختارلي الوان لو نوعية القماش....
ومرات اكمرك من نور من اروحلها...
من كبل اني اكمرك من نور الشي اليعجبني ...
بس كميلة اكمرك منها اتكات هي تخيط اتكات كودري يفدني البسهن جوة الدشداشه بالصيف...
بس بالشتاء لا ما اهتم قماش القديفة ثخين ما يلالي.
بس البنات نهله وفطم هن من يرحن لأهلهن يشترن جديد...بس ما اخمط منهن ولا هن يخمطن مني.
وهسه البنات الصغار هم علمناهن يلبسن اتك
جوة الدشداشه ويلبسن ربطة لو طلعن للشارع
واذا وحدة لكفها علاوي بدون ربطة يخبزها خبز.
الف الحمد لله من كبرت شوية كمت انتكل على نفسي...وارتب روحي ودوم مكحلة وشكلي مرتب
والحجي بيناته اخاف من محمد لا يباوع على وحدة من الموظفات الوياه ويعوفني...على كولتهم
الخوف يعدل الشوف.
وهيج يكضي يومنه...
كلش متراهمات اني ونهله...يعني علاقتنه علاقة خوات... بس فطم علاقتي بيها عاديه.
وهسه مخبوصين بتحضير وتريب أمور سجاد
بسلامة هم يخلص من الجيش ويصير ضابط
وهم سالفه عرسه.
والله يعرف بحالتي النفسيه شلون تعبانه
رحمني بهاي الشغلات التخص سجاد....
واني بعد أخت العريس وكل ما نزلت كميله للولاية
تاخذني وياها نحضر لشغلات الخطوبة والعرس
هو سجاد خولنه وكال//بكيفجن شنو تختارن
وشنو ترتبن.... عاف كلشي على ترتيب ادينه
والصدك كميلة ماتعرف بهذن السوالف
ناخذ نور ويانه من نروح للسوك نشتري ونجهز
نور تعرف بكلشي يخص غراض البيت
لو شغلات العرايس واختيارها حلو
وذوقها مرتب تختار الوان كلها متقاربه
وتعرف ترهم الألوان ماتجيب زرق ورق.
اني فد اكيف من كميلة تكلي//العصر ننزل للسوك
لو نمشي للولاية... لو حضري روحج نروح لبيت نرجس نتفق وياهم... هم اغير جو
وهم احصلي شي من هاي الطلعه
وهم اخلص من فروخي غيث وليث يم نهله
وبشه ما تنزل من حظن فطم.
كميلة كالت النور //ما تمشين باجر وياي لبيت
ابو علاء... حت اتفق وياهم على سياك نرجس
وانتي خميلي البت،،،سجاد سودني
يكلي//عقلها موش تام بيها خلل.
صدك وره الغدة اني وكميلة ونور رحنه عليهم
اخذنة باقر صلوات يعرف يسوق اخذنه بسيارة كمال
هم رحنالهم كبل بدون موعد جفتناهم
لكينه نرجس تغسل بالحوش...
وبنيه ثانية تنشف وراها...
وطلعت علينه العجوز جدتهم....
ابو علاء وعلاء طالعين.
انتبهت نرجس هي تغسل بالحوش بيتهم
لابسه ربطة... وتفاجأت بطبتنه عليهم
بس عادي اجت سلمت علينه وره ما باوست كميلة جدتها...أني ونور من بعيد سلمت علينه
بس كميلة باوستها...وعادي رحبت بينه
ودخلتنه جوة للصاله...
البنيه الثانية هي اتلكتنه بلسانها الحلو
طلعت اختها من ابوها...متزوجة وجاية عليهم خطار
يالله لسانها فد حلو وهذاك الملكة والكلمات الحلوة
هي ترفع وجدتها تكبس...حتى الواحد يستحي
يرد عليهن لسانهن ينكط عسل.
نرجس راحت بدلت دشداشتها وربطتها
واجت كعدت يمنه...بس مو هلكد تسولف
كد السؤال والجواب.
كميلة سألت علئ ام علاء وأم نرجس
طلعن رايحات بواجب ويه رجلهن.
كميلة انفردت بالعجوز واخت نرجس
وغمزت النور عودين تخملها نرجس وتشوفها
نور اسلوبها حلو...شكد بقت تحجي وياها
وسولفت بهواية سوالف...والله تجيب سالفه مناك
وترجع على سالفه هنا...وهي نرجس تشاركها
وعادي تسولف كلشي مابيها.
طلعت مخلصه ابتدائيه...
وتعرف حتى تقرأ الحروف مال الإنكليزي...
وعدها هوايه معلومات مال دراسة
وتعرف تخيط بس ما تخيط للعالم تخيط بس لأهلها
وهي تسولف ويانه مدنكة راسها بالكاع.
سمعت اذان العصر... كالت// من رخصتكم بس اصلي
عبادة رب الكون أهم من لهو الدنيا
اني استغربت هم نفسنه هم شيعه
شعجب ما تطبك صلاتها...
وراحت كبل مدت سجادتها وصلت بدون ما تتوضئ.
شاورت نور وكتلها//يمه شوفي شعرها خافنها كرعه
شعجب ما تنزع ربطتها بالبيت.
هي خلصت صلاتها... ورجعت كعدت يمنه
اني كتلها //شعجب ما تطبكين صلاتج
وعاينتج صليتي بدون وضوء.
كالتلي//لا انا دوم متوضية...دومي على طهور
و مااعرف اطبك الصلاة من انا صغيرة اصلي كل فرض بوكته...الحمد لله على نعمة الإسلام
من هدانه فرصة حلوه وكل يوم نوكف بين ايدين
رب كون خمس مرات ونجدد بالخير والبركه.
نور كالتلها//خاله اني اعرف بشغلات الصبغ والميش
والمكياج...تردين بالمشية اجي أنصبج وارتبج
لو تروحين للصالون.
كالتلها //اذا ما اكلف عليج تسوين عليه فضل
من هسه شايله هم لروحة الصالون
اخاف بروحي ورجعتي اكسب ذنب
اذا تجيني اكون شاكرة الج.
كالتلها نور //تدللين من هاي كبل هاي واشرت على عيونها... وانوب كالتلها //بس اشوف شعرج
حتى احسب حسابي للصبغ والميش.
هي كالت لجدتها //يمه بس من رخصتج خالتي
تريد تعاين شعري حت ترتبه اليه بالكعدة
الحمد لله نيتي صافيه خلف الله عليها
راح تجي ترتبني وما امشي للصالون.
جدتها كالت //اخذي راحتج خيه ام إبراهيم
انتي راعيه الدار واحنة خطارج.
وصدك نرجس أخذتنه لبيتهم جوة
واختها اجت ويانه...والا كعدنه بالغرفة يلا نزعت ربطتها... صلوات على النبي شعرها كلش ثخين
صح بي كسرة ناعمه ولونه جوزي فاتح
بس هلكد ثخين...ومو كلش طويل لنص ظهرها.
ووجهه أبيض...بس بلعومها وبدايه صدرها
اكثر بياض...شكلها يختلف من نزعت الربطة
نور تكلب بشعرها...واني أحفظ بشكلها
كتلها// شعجب ما نزعتي ربطتج بالصاله
اختها كالت//بعدج ما تعرفين نرجس عدل
تخاف لا اكو زلمة لو ولد على سطح الجيران
ويلجحها بدون ما تدري...دومها منخبكة
ماكو زلمة شاف خلقتها غير ابوي واخوي
حت من تصير عدنه مناسبه تطلع بالنكاب
تسلم على عمامي وخوالي تخاف من ولدهم
لا واحد يلجحها.
ما سولفتلج امي من ابن عمي تسودن عليها
وهو ما لاجح شي منها بس تسودن على ديانتها وسترها...يتذكر شكلها بالصغير...بس من كبرت
ولبست الحجاب بعد ما لجحها.
حت احنة نضحك علية ونكلة// شتحب من هاي المعقدة ترى دومها معتكفه ما تختلط
و لو تصلي لو لازمة كتاب الله
واذا تكعد يمك تبقى تسبح.
سودة عليه جان يرد ويكول//كلجن تروحلها فدوة
تغارن منها...هي موش معقدة بس تعرف عبادة الله
احسن منجن وما تشيل غيبه...بذرتها نظيفه
وزرع حلال...
سودة علية نهى عليها حت لا تروح لغيرة
يكول //رويحة حلال ما احصل احسن منها
بس سبحان الله طلع بهذاك اليوم الاغبر
ولليوم ما رد النا.
هي نرجس كالت//رحم الله والديكم اقروله سورة الفاتحة انا متأكدة هو متوفي وشهيد مغدور
دوم يطوف عليه واشوفنه كاعد أبستان كله خضار
ويكلي العيشة هنا احسن من الدنيا...
وشالت ايدها وبدت تقرأ سورة الفاتحة
واحنه هم قرينه وياها.
شكد حجينه وشكد سولفنه...
كولن هم سألت عن سجاد...
هم استفسرت عليه أبد...
بس سألت على عايلتنه وعرفت احنه جم مراه بالبيت...وعدنه جهال...ولدنه يشتغلون لو لا
يعني اسأله عاديه.
بس داخت بيه من كتلها// امي نور
وكميلة هم امي...وابوية سيد فاضل
ورجلي محمد اخو أبوية .
نور ضحكت وكالتلها //لا دوخين راسج
هديل بنتي وكميله اختي ربتها من الصغر
وأخذتها الحماها سيد محمد.
هي سألت بخجل وكالت//خاله الشاب المتقدم الخطبتي يصلي لو لا...يعني ملتزم لو من شباب
هذا الوكت.
نور كالتلها //سيد سجاد شاب ملتزم بالدين والأخلاق
وخريج كلية هندسة...وجان مدرس بس ترك التدريس والتحق بالكليه العسكرية وبقوة الله
بعدله جم شهر يصير ضابط.
يالله اباوع عليها انكلبت حمره
وكلش مستحيه وكالت//خاله الله يزيدة من خيراته
بس اهم شي هو يصلي ويصوم ويعرف حق عبادة رب العالمين.
نور كالتلها //اطمئني اعرف بيج تردين وتتمنين شريك حياتج نفس طبعج...سيد سجاد وباقي إخوانه ولد سيد فاضل كلهم مستقيمين الف الحمد لله
من هم ولد صغار بالمدرسه الابتدائيه يصلون ويصومون وماعدهم زله ناقصه.
هي كالت//اي ابوي كالي سيد فاضل كيم
وكل الوادم تحلف باسمة...واخو وأولاده خوش زلم
و نسوانهم وحدتهن بيرغ شرف.
الف الحمد لله من ربي شملني بلطفه ورزقني
بهيج عايلة وهيج قسمه.
والله اخذتنه السوالف ونسينه باقر مشتول بره
الا قبل المغرب بشوية دك علينه الباب
وطلعت عليه العجوز وسلمت عليه
يلا حسينه على رواحنه...
من طلعنه نرجس بوست نور وكالتلها //خاله بدون ملاقه كلبي كلش ارتاحلج ... وان شاء الله
هم أصبح بنتج وبنفس مكانه أم بتول.
من طلعنه كميله بخاطرها بعد تبقى كاعدة يمهم
ولو عليها تبات...تكول// جدتها خوش مراه
بالطريق سألت نور وكالتلها //بردي كلبي وسولفيلي
البت شلونها.
كالتلها نور//كميلة بخت عواطف ومحمد
دزلج هيج بنيه...متدينه وخلوقه وكلش تستحي
ومخلصه ابتدائية بس مثقفة تعرف تسولف
وحسيتها طيبه وطينتها نظيفه.
باقر كاللها //ام إبراهيم ما تنطيني شويه من بخت
امج وابوج بلكت احضالي بمراه تريح الباقي من عمري.
كميلة كالتله//باقر لا تزن على خراب دارك
مريتك شناقصها حت تثني عليها.
هو جر نفس كلش طويل وطلع حسرة من لبة كلبه
وكال//يمه موش كل سوالف تنجحي
انا ما أنكر لليوم كلبي بي نبضة هذاك العشك
والحب لفطيمة... بس سوايتها لو تعرفيها شنهي
انتي بنفسج تكليلي طلكها،،،وتطرديها من البيت
يمه من هذاك اليوم الاكشر الكشفتها بي
روحي جزت منها...بس ساكت وملصوم
ومخليها بذمتي لخاطر بناتي...
يمه اللوعة البكلبي لو طلعتها تسيح من وراها دموم.
كميله كالتلة بخرعة//يااااع فطيم تعرف زلمة غيرك.
هو غم كصته وكال//انتن النسوان ما عدجن غير فكرة الشرف والطعن ومس سمعه الوادم...
يمه أنا كلت تعرف زلمة غيري...
جبت طاري لو لمحت لهيج سالفة....
وبعدين شمالني هلدرجة مكرن ومن أعرف بمرتي
تعرف زلمة غيري انلصم واسكت...غير اطك براسي
نخوة الهواشم وانحرها وانحرة..
ام عطا مرتي شريفه وما تشيل طرف عينها
على اي زلمة غيري...ريحي بالج من هاي الناحية
بس عندي مشاكل شخصية انا وياها متلاغين
مشاكل تخصنه وما أريد ادخل طرف ثالث بيها...
عبن اعرف نتيجتها بس الفضايح والطلايب.
كالتله //اكلك أنت حجيك مليوص...
غزل منه بحلب وغزل منه بشام...
لا تخرطهن سوالفك عليه خرط
كلي شعندك ويه فطيمة.
هو شلون التورط وزل السانة وحجه
انوب شيخلصه من كميلة وحتى تعوفة بحاله
كاللها//ما ترتب حالها... وسكت
حسيته جذاب يريد ينهزم من لسان كميلة.
رجعت كالتله//انت باطل وموش خوش زلمة
مريتك معدلة ونظيفه مكان وثوب وجسد
بس انت غاراتك النسوان التعاين عليهن بدوامك
وتريدلك حجة حت تثني عليها.
واخيك العود عليوي مساندك
وهم متبركس بمزنه العرس الثاني...
وروح أخيك المحروم من لذة العرس...
ما تعرسون وتثنون على نسوانكم وخشمي يشم الهوا
هو كاللها //ام عطا بس اعصابج...نخاف عليج
انتي البركة،،،وأم الخبزة،،،والخيمة الجامعتنه.
يمه والعباس محد مثنى على مرته...
وعلاوي بس يحجي تراه بوخة يموت على نخله
ويفداها بروحه...وهو من يهوبز بس يخوفها
ويجر بوشها.
كالتله//يالعيار لا تأخذني بلسانك
موش عليوي مصادق بت بالدوام ومتسودن عليها.
هو كاللها//يمه ترى ماكو هيج حجي
انا وعلاوي واحد...اعرف شعندة ويعرف شعندي
اخذ فترة تعرف على بنيه بالدوام هي لطشت عليه
عاينتة ثكيل...وشخصية قوية هناك بدوامة
وكل الوادم يحترموا ويدورون خاطرة
لطشت عليه بحجة الشغل...
هو هم انجرف وياها بهاي الفترة...
بس البنية اجاها تهديد قوي...
ولكت بجنطتها ظرف بي طلقه ورساله تهديد
وأمر تنقل من دائرتها ....
وتغير خطها...وممنوع تنطي رقهما لأي بشر.
هي خافت بالبسكوت قدمت نقل
وحت شالت من بيتها...
يكولن البنات صديقاتها عساس طليقها هو الوره التهديد...ومن هذاك الوكت علاوي راكد
لا عرف وحده كبلها،،،ولا وحدة وراها.
يمه ترى علاوي مسودن على مريته خاف ماعندج علم...حت يم جماعته يمدح بيها
ولو سألتي الموظفات الوياه يحسدن نخله
هلكد ما يمدح بيها كدامهن...
كل كلامة هيج سوت ام قسور
هيج عملت ام قسور...
الحمد لله من الله رزقني باام قسور...
واذا واحد الله يحبه كون يرزقه بوحدة مثل ام قسور
يمه شتحجين غير حتى كدام ولد عمامنه ما يذكر
اسمها دوم يكول ام قسور وأم قسور ويمدح بيها.
يالله شنو اني من يمي اسمع بكلام باقر ونفشت روحي...واكول بكلبي//ربي كون صدك يطلع كلام باقر
وعلاوي ما يتزوج على نهله.
رجعنة للبيت واني كلش مستبشرة وفرحانه
هم الخاطر سجاد
وهم الخاطر نهله.
دورت على نهله لكيتها بالحمام تغسل ملابس بالطشت...لهسه ما بطلت من هذا تعويدها...
ما تستخدم الغساله ابد...
هي وكميلة دوم يغسلن الملابس بالطشت...
جريت التخته وكعدت كدامها وسولفتلها
شنو سمعت من باقر...وعلاوي شلون يمدح بيها والموظفات حاسداته عليها
هي خطيه فد كيفت وكلش فرحت بالسمعته.
أنوب سولفتلها عن نرجس...
وطيبت أهلها.
بس أبد ما جبت طاري فطم وباقر...
لان افتهمت باقر يقصد غير شي بكلامه
بقيت السالفه بكلبي احسن ما تصير مشاكل من ورايه
واحنه على أبواب خطوبه وفرح لسجاد....
جدة نرجس كايلة الكميلة//البت بتكم...
وهي عطية أبو علاء للسادة...راجين بهاي العطية كربكم ومحبتكم... شتسكمون الها
شتجيلون سياك الها كثر خيركم.
كميله تكول //أستحيت من كلامها
كتلها//ان شاء الله نرجس بنيتي وارجع واوكد كلامي
هي وردة وبقوة الله أشتلها بلبة كلبي حالها من حال باقي بناتي.
شدكولين ابوها وعمامها يرضون بمهر
الحاضر ٣ ملايين والغايب ٣ ملايين
هذا الماشي هسه بين العربان.
مجاوبتها //خية كتلج البت بتكم
وشنو تجيلولها خلف الله عليكم
أحنه حلت علينه خيرات الله بنسبكم
كميلة كايلتلها //جا بيها الخير...
على نزلت اوليدي نجيب عربنه ونجيكم
هم نكضي مشية الزلم...ونملجلهم بعقد السيد
ونيشنها باليرضئ الله ورسوله...
وبس نحول بيتنه الجديد بسلامة ناخذها
مكان ماعدنه كاعدين بيت اختي بين ما يكضي البناء
علاوي يضحك ويكول //يمه والله تراج مو هينه
خبنتي سالفه خبن معدلة...اكلج يمه ما تمشيلي روحي تدور مراه ثانيه .
كالتله كميله //اكلك عليوي ما تذكر اخير مره شوكت زلغت جلدك...لا عدالك صرت زلمة وما اكومن أخبزك
وازلغ جلدك سالفه العرس الثاني تناسه ما دامني عدله وخشمي يشم الهوا.
هو طفر من مكانه وكعدت يمها كاللها //يمه بروح ابوج شويه حكي جلدي اشتاقيت الكتلتج بوكت صباي...وهي كامت اطبط بي على جتافة
وتكله //هذا دواك ومن الله شفاك.
وقسور الحقير هد على كميلة
وكام يبجي ويناشق بحسابه تكتل بعلاوي من صدك
وهو علاوي مكيف على فزعه قسور
ويسوي بروحه يبجي وعودين كميلة توجعه بالكتل
والجاهل تفرفح.
ابوية كام على علاوي ضربه من صدك على علباه
كاله//سودنت الوليد ياابو عقلين وكفت كلبه...
وشال قسور يبوس بي
ابويه يحب الجهال حتى ما يقبل نكتلهم
لو نصيح عليهم.
وعدت جم يوم راحت نور وكميلة وحمودي
أخذهم محمد...بسيارة جاسم ابن عمي عزام
البغداد...كميلة ناذرة زيارة لابو طلبة فدوة غديت
لذكر اسمة على سلامة حمودي...
وهم اشترت نيشان النرجس وجابتلها وياها
جم شغله هديه...
وجم شغله وياها للبيت.
ومحمد مشتريلي كلادة بيها إسم الله
كالي//حلاوة كلشي حلو اجاني منج
يمه فد فرحت بيها طرت من الفرحة
ابوس بي،،، وابوس بالكلادة..
لبستها وبقيت نافشه ريشاتي
وبس عوزي أكول للناس اليمرون بالشارع
احميد كلبي جابلي كلادة حلوة.
كميلة فكدت البنات وجابتلهن دشاديش حاضره
يخبل شغلهن والوانهن كلش حلوه
وياهن مشامر ((شالات)) وشحاطات
كالتلهن //اكشخهن بيهن بخطوبة اخوجن.
نور غمزتلي واشرتلي بحواحبها على محمد
بس ما افتهمت عليها...بقيت ساكته.
من طلعت الباب الشارع وطلعت وراها
كالت //محمد جابلج فستان يخبل
وحذاء...خلاهن يمي
بيوم الخطوبه تعاي يمي اعدلج
انتي اخت العريس لازم تكونين مميزة.
وصدك بس نزل سجاد صادف يوم خميس
اجانه تقريبا بوكت الضحى... ويبقي الجمعه
والسبت الظهر يرجع يلتحق....
ابوية بلغ ابو علاء باجر الجمعة نروح عليهم مشية.
كميلة شوفت ذهب نرجس لسجاد
خوش ذهب جايبتلها
كلادة ومحبس وتراجي وحلقه...
وكلهن اثكال عرفته اختيار نور.
كاللها //ما اعرف بهذن السوالف بس حلوات
هي كميلة ضحكت وكالت//هذا اختيار نويرة
سالها //يمه هم مشيتي لبيت البنيه ورايه
عاينتيها... والعباس كلبي لايب من وره هاي القسمة
اني جبت الهم جاي واجيت كعدت يمهم
و جاوبته //والعباس كلشي مابيها
اصلا تعرف تقرأ انكليزي...وخياطة
و متدينه...وشلون حلو تسولف
بس هي شويه تستحي وخجوله
حتى امي نور كلش حبتها.
طبك حواجبه وكالي//متدينه وتعرف حك الله
لو معقدة ومخنوكة بمعرفة الدين بصورة غلط.
كتله// كلشي مابيها وحبابة
واني متأكدة راح تناسبك
حتى سويتلك سحر مال محبة وخليته الك بالجاي
حت أتحبها...عاين وشلت شويه شكر وذريته بكلاصه
هو ضحك من خاطرة وكال//اكلج ما تسويلي
سحر لنقيب يتأمر علينه وشايف نفسه شوفه
بلكت أبخت سحرج يجر عدل ويانه
والعباس متحلف بي بس اكضي الدوره
الا اطكة بجيلتين واسكطة اخلي يزحف زخوف
وانعل ابوه لابو اليطلع وراه.
أبوية كاله //بوية بدون مشاكل اذا ماذيكم
سلمه بيد الله طكاته أقوى من طكات بني آدم.
هو طلع ظهره سودة عليه
الجلد مكشط...وايده مخرمشه
ومن يم جتفه مجروح جرح جبير
كاله//بويه بس سألته سؤال بالمحاضرة
وهو ما عرف يجاوبني...عاقبني عقوبة المجرم
وسكط اعظامي إبن الكلب يغططني بالمي الحار ويرجع يشمرني بالمي البارد
ابن الكلب مجرم مال تعذب تكول جاين عندة
من السجون لو الشوارع.
الناقص كسر فج منتسب ويايه بالفصيل
خريج علوم بايلوجي...ويعرف خمس لغات
عربي وانكليزي وفارسي وكردي وتركماني
شاب خلوق وهادى كل الضباط والمنتسبين يحبونه
هلكد ما خلوق ومرتب وملتزم...
إبن الكلب عاقبة شلون ما مزين لحيتك
وهو الولد عندة إذن طبي مايكدر يزين
وجهه ملتهب وبشرته منعول سلفه سلفاها
اذا يجر لحيته بالموس يزلغ وجهه ويظل يكت دم
كلش متاذي...وهو خله كوره بكوره
سألة بالتعداد الصباحي //ليش ما جارد لحيتك
كاله//سيدي بشرتي متاذيه وعندي امر طبي
يسمحلي هذا الأسبوع ما احلق...
ما نحس الا الولد مضرب دفره ومشمور هناك
وكسر فجة من قوة ضربة البسطال.
و بالتقرير يذكر سبب العقاب هو التجاوز
وعدم الأحترام.
ابوية كاله//بوية اتحمل بعدلك شهرين
اتحملهن شلون ما جان...ولو أنا ما راضي على هذا المجال بس انت عاجبك...ادعيلك بالقوة والخير.
كميله كامت تبوس بي...وتمسح على ظهرة
وتقره عليه قرآن...هو تمدد على وجهه
وكاللها //يمه عليج بروح امج اخذيلج كشه ومرغيلي اعظامي كلهن يوجعني...
وهي كميله ما قصرت عجنته عجن...
مرغته من جتفه لحد جعوب رجليه...
سودة عليه غفه جوة ايدها...
كامت بتول جابتله مخدة وغطة
وبقي على نومته ابد ما كعدانه.
لليل أنخبصنه ابوية عزم عمي عزام والولد
وعزم اولاد عمي ساجت...
وعزم حسيون...
وعزم سيد مهدي وبعد اثنين كيام وياه بالمرقد
بس كللهم //مجان ماعندي تعذروني
عشاكم يصير بيت عمي عزام بيوم السبت
حريمي ما يلحكن باجر يمشن لبيت العروس
ونرد متأخرين يطبخن العشا...عشاكم السبت
بيت عمي عزام.
وصدك سجاد يمكن كعد ب ٩ بليل
كعد مختمر وجهه من النوم
انوب كعد مزاجة برتقالي
صاح//هديل عشا وجاي
وراح للحمام هناك وصاح// بتول جيبي هدومي
محمد كاعد يلاعب بالجهال...
وعلاوي وباقر كل واحد ماخذله ركن ومتمدد.
وعون يكلب بالكتب شوكت ما صحله وكت يكعد يقرا
وحمودي يكلب بتلفونه...
ابوية كاعد على صفحة هو والمدهربه يخططون.
والبنات كاعدات يلعبن بيت ابو بيوت بالغرفه
علاوي عاط بيهن صكهن من الخوف.
واني ونهله وفطم نباوع على التلفزيون
كمت من وره خشمي سويت عشا لسجاد
وخدرت جاي جديد للكل.
رجعت كعدت بمكاني...
وأخذت بشه من حظن فطم وكعدت ارضعها.
من اجي سجاد نهله كامت جابتله العشا.
كتله//اكلك باجر شلون بيك يمكن تخلس البنيه
اكرع،،،ولحية ماكو،،،وشواربة ثخينه جوزيه
وراسه من فوك ابيض من نص كصته وفوك
كد لبسة البيرية،،،ووجهه وبلعومة اسود
جنه تمر برحي نص مستوي ونص خلال
كالي//هديل اسكتي ترى روحي طالعه
لو ما ابوج يتفشل باجر فلا اروح واوصل.
كميلة كالتله //شمالك يمه شو وجهك مكلوب .
هو واكف على طوله لابس بس بجامة
وفانيلة تعلاكة بيضه...والخاولي على جتفه
كال بشهكه وبجه وغطة وجهه بالخاولي //يمه
حمامتي زعلانه عليه...وطلعت شكهات البجي
من بلعومه سودنت الكل عليه
محمد عاف الجهال وكام وكف بصفه
وحظن بتك ايدة وكاله//هااا ردينه لنفس السالفه
موش كلنه المرحومة تبقى معزتها بالكلب
وما نخدش العدنه.
كاله//محمد موش بيدي كلبي عاصرني عليها
تحس بيه من احجيلك...
كاله//اي احس بيك انت عندك مرحومة
وانا عندي مرحومة...
اثنينه ملجومة اكلوبنه...
فوض امرك لله وهو يبرى جرحك ويعوضك بكل خير
هو صاح// بتول جيبي تشيرتي الجوزي
اجته بتول تركض بيدها ملابسه
خطيه تخاف من الولد لو عاطوا عليها
هي تحسبهم عمامها لو خوالها
متحسبهم اخوانها....
تعرف محمد ابوها،،،واني امها
وجهالي اخوانها.
سجاد لبس ملابسه وطلع للشارع
محمد كال العون والحمودي //كوموا اكعدوا يمه
تراه مخنوك لا ينجلط.
لنص الليل وسجاد كاعد بالشارع
وابوية وجهه انكلب بس واحد يكله شبيك يبجي.
محمد كال العلاوي //كوم سولف وياه
محمد ما يتحاجة هو وباقر...
علمود سالفة فطم من هذاك اليوم محمد من فزعلها
وضرب باقر علمودها...
ابوية لكاها حجة كام يرعد ويصيح عليهم
انوب صارتلنه هوسه بليل...
وحتى سجاد والولد اجمي من الشارع
على صياح ابوية يريد باقر ومحمد يتصالحون
محمد اعند من باقر... هو يكول// باقر ما يحشم
وباقر يكول// ما يحترمني
ابوية من كل عقلة كام جابلهم العكال
وكاللهم //هسه اكضي بيكم توبه
لا عدالكم كبرتوا عليه...انهضوا جدامي تصالحوا.
علاوي سحل باقر وشمره بحظن محمد
عاد واحد باوس الثاني...
والحمد لله فكت سالفة زعلهم.
ابوية صاح بكميلة وكاللها //اليزعل بهذا البيت
بعد لا تنطي خبزة.
اني ضحكت شفت ابوية يحاسبهم محاسبه الصغار
كتلها// يمه لا تنطيهم خبزة سويلهم كيكة
ابوية فاير من الأعصاب علمودهم
ولأن ضحكت اجي عليه ضربني بالعكال على متني
وكالي //انتي بطلي من هاي فطاريتج
من الضحك ما حسيت بالضربه
وكمت اضحك بالزايد...ابويه اول مره يضربني
بقيت احك بمكان الضربه واضحك
محمد كال//هااا فاضل شو رديت على مرتي
ماكفاك تدروش على ولدك
رديت عليها.
كاله//بنتي وبكيفي ارد عليها...افطسها
انت مالك غرض ...انوب عليه النسيب
يحاسبني على تربيه بنتي.
محمد ضحك وكاله//فاضل منهو النسيب
تراني اخوك موش نسيبك.
ابوية سكت...وكعد بمكانه
وكميلة ساكته كعدت بصفه
عدت هذيج الليله بين ضيجة الخلك
والمصالحة...وكل واحد شايل هم بكلبه من شكل
بس طر الصبح محمد اخذني لبيت نور
ماعدنه شي بالبيت بس غدنه
والبنات يحضرن نفسهن
باجر التعب والهوسه وعشا الناس
اليوم بس نروح للمشيه.
من وصلنه لبيت نور...يالله نور شكد ذواقه
والله مو تتملق لو تتعاير...
بس تحب تسوي شي مميز...
محضرة طبلة خشب هاي الجبيرة
ومغلفتها ومرتبتها بتور أبيض وداير مديرها
مرتبه شريط ازرك وملزكة عليه شذر ابيض
وجايبه كيكة جبيرة جاهزة...
وقواطي ببسي...
وكلاصات شفاف مزروقتهن..
وحتى السجينه مزروقه ايدها...
ومواعين شفاف ملزكة الشذر عليهن داير مداير
ومرتبة سبع كاسات ومزروقتهن
ومجهزه سلة جكليت...
ومزهرية ورد كلش حلوة...
مرتبه بيها ورد طبيعي من حديقتهم...
وصينيه صغيرة مغلفتها تخلي بيها ذهب العروس.
بقيت صافنه على الترتيب اني والبنات ابد ماعنده
هيج سوالف.
حتى محمد عجبته سالفه
وكاللها //عاشت ايدج ام إبراهيم
هاي سالفتج راح تنذكر وتسولف بين العربان.
كالتله//صارلي اسبوع أجهز بميز حفلة سجودي
وعلى كيفها سفطت الغراص بسيارة حسيون
وأخذت جنطة ملابسي وملابسها وملابس نبأ
ورحنه لبيت نرجس.
ما أخذت ولدها وياها بس البنات نبأ وفرفوره
واني اخذت فروخي وبتول ويايه...
من وصلنه حسيون بس سلم على ابو علاء
من الباب ونزل الغراض بالحوش ورجع
صلوات على النبي هلكد يمهم نسوان وبنات
ونور كامت تتبختر كدامهن...
ونصبت الطبله...وعدلت الغراض العليها
ورتبت الشغلات شنو غير اني والنسوان
ظلينه مبهورات على جمال وتريب الميز
وأم نرجس الفرحة طشت على وجهه
وتركض ركض كدام نور وتجيبلها
الشكر والتمن والملح والروبه والهيل
وهي نور جايبه حلقوم ابيض وبيض الحمام أبيض
وترست الكاسات
وماقبلت تخلي كراسي...
كالت //نخلي قنفه للعرسان اكشخ واحلى
وانوب كعدت بالغرفة الجوة
شافت ملابس نرجس البنيه ما قبلت تلبس فستان
هي مشترية دراعه بيضه وبيها شغل ذهبي
ومرتبه عليها هاشمي ابيض
وهي مرتبته ومعدلته بالخياط صاير شلون العبايه
مفتوح من كدام وضايفتله سفيفه ذهبيه
كلش لبسها مرتب...وماقبلت تنزع الحجاب
هم مشترية مشمر أبيض...
نور بس عدلت حواجبها وحفت شواربها....
ومكيجتها مكياج خفيف وبسيط.
باقي البنات خواتها استلمتهن نور شسوار
ومكياج...شكد حبن نور وارتاحلها
وطلعن ملابسهن نور تنسق الألوان الهن
حسبالهن نور ام صالون ومن أهل بغداد
حتى أني ونبا هم ارتاحن النا....
وبقن يسولفن ويانه.
تغدينه يمهم والله ونسه وضحك وفرحة
أبد ما تقيدنه.
نور لزمت جهالي وكالتلي //كومي غسلي وبدلي
اني طفرت غسلت وبدلت وبس اني ونور ونبأ
بقينه بالغرفة البنات طلعن...
نور جايبتلي ملابس داخليه جديدة
وياهن مشد سحبت بي كرشي
ولبست الفستان لونه سماكي بلمعه
وياه فانيله بلونه (بدي)...
وجايبه كل ذهبي وياها لبسته
كميلة ضامه ذهبي وذهب البنات يمها...
وانوب فيرت شعري وعافته محلول
ومكيجتني ورشتلي عطر كلش قوي
ولبست الحذاء شويه بي علوا
طلعت غير وحدة... شاورتني//اليوم محمد يشبط عليج...كتلها//اليوم احرمصه تحرمص.
نور ما قبلت نبا لا تمكيج ولا تخلي كحله
هي طنكرت بقت شايله بشه واكفه على صفحة
عاد هي بدلت لبست جبه رسميه وربطة
وخلت بس كحله.
أنوب حارت بنرجس...كعدتها بمكانها
رتبت حجابها...رجعت طوخت حمرتها
ورشتلها عطر من جديد...
نرجس لبسها كلش مستور
شكد ما بسيط شكد ما نازك ومرتب.
البنات صاحن عليه//أم بتول أبنج لاص حاله بالحمام البره...خليت ربطة على راسي وطلعت عليه
اني مطمئنه الرياجيل اقربائهم بالصاله
ومطبوكة الباب عليهم...
غسلت لغيث وطلعته... ويه طلعتي
صار بوجهي جليل(جعيوي)
يابوية صفن صفنه بوجهي تيه اهله وناسه بيها
انوب الرجال اتخردل وإني انثولت
كالي//شلونج أم غيث...
وعصر طرف عيونه بصابعه...
كتله//زينه اني زينه خويه...ومشيت بسرعه من يمه.
يمه كلبي تخربط وكام يدك سريع
يالله نفس هذيج نظراته من جان يشوفني
راجعه من بيت سهاد من جنت صغيرة.
حصرت جهالي يمي وكلت البتول// عينج على خوانج لو اكول لابوج شلعت كلبي وماساعدتني عليهم.
والله ويه العصر وصاحوا اجمي السادة
وصلوات على النبي ال هاشم زلم ونسوان
هم وحدهم عشيرة...ترسوا بيت نرجس
نور شاورتني //كومي تخطي وتعايري كدام الحيايه .
اني ما قصرت كمت على نرجس
عودين مهتمه بيها...وكلساع انفض شعري
حتى كميله والبنات تعجبن بيه....
من صدك نور رتبتني وطلعتني غير شكل.
نور اليوم فجرت مفخختين كدام الحيايه
هم ترتيت نرجس وميز الحفلة مالتها
وهم كشختني وضلت تتباه بيه بين النسوان
وكلساع وصاحت //يمه هدوله شو تعاي شويه احاجيج...اروح يمها جذب كلشي ما تكلي
بس تحرك حلكها عودين تشاورني.
أنوب هي كامت تمشي بكل ثكل ورزانه
وراحت على كميلة وأخذت منها ذهب نرجس
وسفطة بالصينيه المزروقه...
وجابت من جنطتها ساعه ذهبيه وياها محبس ذهب خلتهن بالصينيه ...
وكدام الحياية كالت //ام نرجس خية هاي هديتي
لنرجس أعذريني عن التقصير.
وكميلة شو هم غارت ما ادري صدك هي ناويه
هم شالت محبس وخلته ويه الذهب
وكالت//يرخص الذهب لمريت الغالي.
الحياية كامن يتنادسن...
واكلجن شي،،،أهل نرجس هم بيهن حياية
وبينت هذيج هي الفرحانه
وهذيج هي الطكت من كثر سمها.
أحنه هنا مخبوصات يم النسوان
ونسمع الرياجيل عاطوا اللهم صل على محمد وآل محمد...واجي رجال من الباب صاح //يا نسوان
سمعنه هلهوله ناسبنه الساده.
ونهله صكت النسوان بهلوله رجت الهول
وطوعه كامت تنثر جكليت وتهوس
وكميلة تهلهل وتصفك...
اني مو هلكد اعرف اهلهل بس المهم أشارك
بفرحة أخويه...كمت اهلهل بس شويه وسكتت
حسيت روحي ديج منشول ويعوعي.
علاء بالباب صاح//يمه استري اليمج
السادة راح يدشون يملجون.
إني طفرت بس يشوفني محمد بهذا شكلي
يخبزني...لبست عباتي وكفت وره البنات.
نرجس كامت ترجف...وتكول لأمها//جيبيلي الوشاح
ركضت أمها وجابت قماش أبيض ستن مخيطات
عليه تور أبيض وكلش مرتباته بالخياط...
وغطتها بي نزل من راسها لحد حظنها...
الحياية كامن يحجن //شدعوة هيج تغطت مو لابسة حجاب...وهاي تكول وهذيج تحجي.
النسوان كلهن مستورات...
دخل ابو علاء...واخوة...وعلاء
وعمي عزام...وابوية...وسيد مهدي
ومحمد...وسجاد يمشون سوية.
هنا نور هي استملت الترتيب...
تقدمت على سجاد وباوسته...
هو دنك بأس راسها...
كعدتة بصف نرجس...وهو الخجلان اكثر منها
سيد مهدي كال//بويه انطني كرسي
ام نرجس خطيه هي التطفر لخاطر بتها...
بسرعه جابت الكرسي.
سيد مهدي كعد كدام العرسان بقى يباوع على الميز
ضحك وكال//والله الواحد يعجبة على هذن السوالف
الحلوة يعرس من جديد شدكول ابو عطأ .
أبوية ضحك وكال//أنا أخافن أم عطأ تكتلني
انت جدد.
عمي عزام كال//افاااا فاضل هيج صاكرتك بنت اخوي.
أبوية رد بضحك//الما يخاف من مريته موش رجال
شدكولين أم عطأ...وباوع للمدهربة واكفه هي نور
بصف سجاد.
هنا كميلة نفشت ريشاتها وكالت//يبعد نظر عيوني
تفداك عايلة أبو سعدي وناسه...
سيد مهدي كال//الله يرحم ابو سعدي
رفيق الصبا وصديق الشباب.
على بركة الله وبركة الصلاة على محمد وآل محمد
نملج المزيونه بذمة سيدنا سجاد الله يحفظ شبابه
وطلعه ورقه من جيبة... بين ما الموجودين
كلهم صلوا على النبي.
سيد مهدي كال صيغه العقد اول مره
ما ردت عليه نرجس...
رجع كملها ثلاث مرات وهم ما ردت عليه نرجس
هو بقى ساكت ويباوع على ابوها
والنسوان كامن يبشبشن...
كال//شنهي خوية غاصب البت على العرس
ابوها كال//لا والعباس
وتقرب عليها هي شاورت أبوها
هنا سجاد كام يفور ويعصر بيدة من كثر أعصابة
كاعد على بريمز جواة نار ويفور.
ابوها كال//سيدنا كمل صيغه القعد
بالمرة ال ١٤ تنطيك موافقتها.
سيد مهدي صلى على النبي وكمل
وظل يعيد ويصقل بصيغه القعد...نشف ريكة
كاتب كلام العقد بورقه ويقرأ.
صدك بالمره ال ١٤ نرجس كالت//نعم قبلت الزواج
وانت وكيلي.
هو صلى على النبي وضحك وكاللها //بويه نشفتي
ريكي مطلوبين عشا خاص على هاي سالفه
بالخير بويه...
نور كالتله //يجيك أطيب عشا...واطيب كيك وشربت
هو كللها //الف رحمة ونور على روح ابو سعدي.
انوب كمل العقد ويه سجاد...
سجاد هلكد ما ضايج وصاير عصبي
كال بزمجرة //موافق
هو السيد ضحك وصلى على النبي وكمل العقد
والنسوان كامن يهلهلن...
هو كال السجاد//بالخير بويه حسبالي راح تكتلني
وكام بوسه...سجاد كاله//العفو بويه البال مشغول
هو ضحك وكاله//حكك بعد أنحكمت وضحك بصوت عالي.
الزلم كلهم بوسوا سجاد...والنسوان فشخنهم
بالجكليت وطرشنهم بالهلاهل.
عاد كلهم طلعوا...حتي سجاد راح وياهم
وهنا انفك حصار نرجس وشالوا البركع منها
والنسوان بوسنها...
وانوب عماتها كامن يلومن بيها لان فشلت أبوها
عاد خالتها كالت//ترى موش صوجها
امها حارت تجهز بالبارد للزلم
ونست تبلغ هي تريد صيغه العقد ١٤ مره
على عدد المعصومين...الحمد لله
كلشي تم بفرح وسلامه لا تخربن فرحتها.
هاي خالتها حقها لو حجت...شكد كامن يلغن النسوان
شوية ونور دزت على سجاد
يجي يلبس نرجس ذهبها...
ورجع علاء صاح//استرن اجى السيد
ودخل هو وسجاد علينه....
علاء بس بارك لاخته وطلع.
لا سجاد يباوع على نرجس...
ولاهي رفعت راسها وباوعت عليه كلش تستحي
كامت روجة عرك تأخذها...وروجة عرك ترجعها.
اجيت يمه وبوسته...هو بالبدايه أستحي
بعدين ضحك وكال//ولج حسبالي مراه غريبه
عرفتج من الصوت...
كميله وطوعه وفطم ونهله ذبن فلك كولات وهلاهل
واني ونور لملمنه خجل العرسان
وساعدناهم بلبس الذهب...
وهاي سوالف اكل الكيك وشرب الشربت
بس هو كاعد نار حتى من لبس نرجس الذهب
ايدة ترجف وكلش مستعجل يريد بس يخلص ويطلع
نرجس هي الثانيه لا حس ولا نفس
اصفرت ما ادري اخضرت من كثر الخجل والمستحة.
طب ابويه وابوها...اجمي باركوها
وهي من كل عقلها تريد تتغطى من ابوية
ابوية باسها على رأسها...وخله بحطنها فلوس
كاللها//شايفه كل الخير بويه هذا بياضج
وعذرينه عن التقصير.
من طلعوا طلع سجاد وياهم...
شوية وصاحوا يلا نسوان ال هاشم امشن...
ورانه رجعه أظلمت الدنيا.
عاد والله سلمنه على النسوان...
ولملنه غراضنه...وتسترنه وطلعنه.
رجعت اني وفروخي ويه حسيون ونور
محمد خابر حسيون يسأل علينه
كاله //هي والجهال ويايه اوصلهم لبيتكم.
رجعنه للبيت لا بدلت ولا ابد...
لعبت فلك شبعت دك وركص اني والبنات
وكميله وطوعه يهوسن ويانه .
ولكينه انتصار بالبيت
خطيه جايه متأخرة لحكت على هوستنه بالرجعه.
سجاد مطنكر...وعلاوي يفتر وياه
وباقر يلاحكة من مكان المكان
هو خله وطلع من البيت ماعرفنه شبي.
محمد مخبوص ويه الولد واكفين بالشارع
اجي شايل غيث طاك من البجي
شافني اركص بنص الهول
وهو صفن وظل يباوع عليه
وطوعة شمرتله كلمة فشار اكبر من الهول
هو استحي من النسوان نزل غيث بالكاع وطلع.
من كفت الهوسه بليل وكلمن راح لبيته
بس طوعه وانتصار راحن لبيت نور
والكل تعشا وتعبنه أتمددنه بمكانه
محمد اشرلي على حلكة
عرفته اشتعل من المغرب...
كمت للمطبخ بحجة اسوي ممية لبشه
هو لحكني بسرعة خمط بوسة
مو بس سجاد اليوم معرس...محمد لازم هم يعرس
بس مكان ماكوا المكرود بقى يتحرمس.
سمعنه طبكت باب الهول بقوة...
وابوية يصيح //والعباس انحرك هي لعب اجعاب
وسجاد صاح //والعباس باجر اطلك والتحق للظيم
وكميلة عاطت //لاااا فاضل....
يتبع.....