ألحلقة ألثانية والثلاثون///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
أبحلك جرحي سوالف ضام أهواي ...
ألك يلما وفيت أوياي بلعشره ...
جنت أقره ألمحنه أبيوم ألاكيك ...
هسه ألفاتحه من ألكاك كمت أقره .
×××××××××××××××××××××××××××
وبيوم يجي علينة عصامكو...كعد هو ومحمد بالكاع
ما أدري ليش كلبي لعب من هاي كعدتهم....
صار بيه حكرص كلساع وأصيح على بتول لو على نسمه بت باقر...ادزهن يروحن يسمعن عليهم بحجة اوديلهم جاي لو مي...بلكت يلكفن كلمه،،،حجايه منهم ويجن يريحن كلبي
اول مره من دزيت بتول وبيدها دولكه ألمي...
أجت كالتلي//سمعت بابا يكول لعمي عصام لا تخليني أطيح حظك عوف هذا ألموضوع يولي
ومن دزيت نسمه مره ثانية بيدها كلاصين جاي
أجت كالتلي//عمي محمد وعمي عصام يمكن تزاعلوا
عمي عصام دفع عمي محمد من جتفه وطلع من كاعنه ضايج وحتى ماشرب ألجاي .
صدك أجى محمد للبيت مدخن من ألأعصاب
لحكته لغرفتنه لكيته وأكف باب الكنتور يطلع ملابس
سألته//محمد شبيك...ليش ضايج
شو عاط بيه //هديل أطلعي وعوفيني ترى ألدخان عمه عيوني .
تورطت رجعت سألته وكتله//شبيك...شصار بينك وبين عصامكو وهيج ضجت...؟؟؟
ركع باب ألكنتور فلشها وكام يعيط//هدددديل أطلعي عن وجهي لا أبتلي بعمرج .
يمه فد خفت من عندة...يفور من ألأعصاب
عفته وطلعت ...
سألتني كميلة جانت كاعدة جوة فئ ألتوثه
تنوم بحوري وقسور ...صبحت حوري مالها خلك...
عدها إسهال...وسنونها محبحبه بعدها ما شاكه .
كالتلي//شبي محمد تسودن.
كتلها//يمه والله ما أعرف شبي ...يمكن متلاغي هو وعصامكو .
وصدك بقى محمد بهذاك أليوم بس ينافخ
وألجگاره ما وكعت من أيده...وضايج وميقبل وأحد يساله شبيك ... لو شعندك .
حتى بليل لا تعشا ولا أكل شي...طلع شويه ما طول يمكن نص ساعه....ورجع للبيت لف راسة ونام من وكت.
ثاني يوم كعدت ألفجر...ونفس نظام حياتي أليومي
ريكت أبوية ومشى للمرقد .
وكميلة راحت للمراح تحلب ألحلال .
كلت بروحي أكوم أعجن...خطيه نهله كلش تتعب بفرة ألبيت أشيل شويه عنها...وهم فروخها صارلهم جم يوم مالهم خلك...حسبالك بس فروخ علاوي تطلعلهم سنون
هي نهله أمهم تتمرض وياهم...وعلاوي يتسودن لأن يصخنون...وأكلهم يقل...ويصير عدهم أسهال...
كل ألبيت يدخل إنذار من وراهم.
ساعه ب سته كعدت فاطمة تريد تسوي ريوك ألباقر...
بعد شويه ويجي من ألمستشفى...لأن جان بايت عنده خفاره.
كتلها //فاطمة سوي وياج ريوك للولد وراهم دوام .
كالتلي //أي هسه بس أكضي شغلي ...
شو راحت لغرفتها وبعد ما طلعت .
أباوع ألساعه صارت بسبعه ألا ثلث ...
عون كعد وجهه مكلوب من ألنوم...
أجى صبح عليه...
جنت كاعدة بالمطبخ أردن ألعجين...
هاي الحنطه صلوات كلش زينه تحب تنكيع وتمليج.
من رجع عون من الحمام ومغسل خلقته ....
كالي//هديل طاوه طماطة وبيض حبابه ...
صلوات عون صار رجال...وصار بصف ألسادس أدبي...
ولحيته ثخينه...وصوته خشن بي بحه من يسولف
بس كلش حباب وهادئ..يعني ألواحد من يشوفه
بسرعه يعرفه ولد فقير وحباب .
وحمودي حبيبي هم كعد وراه مدرسه...
صلوات صار بصف رابع إعدادي
وصار أطول مني...وهم رفيع جنة باقر
بس بعدني أشوفة صغير...أموت علية
بالأخص هو..وعون أحسهم جهالي..ربيتهم على أيدي .
خلصت عجيني ودثرته،،،
وكمت بلشت أسوي ريوك للولد .
أجت كميله خلت سطله ألحليب بالكاع
وكعدت تنتظر أكمل ألريوك...
أجت بتول مطفيه...أنجطلت وتمددت على رجلها
بين ما كملت ورتبت كلشي بالهول
ألكل كعد...وتريكوا بالعافيه
بس نهلة صبحت تسحل بروحها
وخلقتها مكلوبه...
من مشوا ألولد للدوام
عون ،، وحمودي راحوا للمدرسه...
وسجاد هم راح للدوام...تعرفون بي صار مدرس مال كمبيوتر ...
وعلاوي هم مشى لدوامه ...
وباقر أجى تريك وراح لغرفته ينام ....
ومحمد بس شرب كلاص جاي وراح لورشة ألنجارة
احنه ألنسوان وألبنات ألصغار...بقينه على كعدتنه نكمل ريوكنه...أشرت لكميلة تنتبه على نهله
لا أكلت،،،ولا شربت...ودمعتها بعينها
كميلة سألتها//يمه شمالج لا اكلتيلج لكمه ولا شربتي جاي.
نهله بس هزت رأسها يعني ماكو شي ...
وكامت شالت حوري...وراحت لغرفتها ...
وصوت شهكت ألبجي كلنا سمعناها.
أني كلبي ما أنطاني أعوفها بحالها
كمت ولحكتها لغرفتها...صدك من طبيت عليها لكيتها تبجي سألتها//نخله شبيج تبجين شكو يا ستار
هي ما صدكت أجيت وسألتها
طلعتلي متنها مزورك كله كدمات ....
وجرت دشداشتها من ألكنتور...وشمرتها عليها
باوعتها مشككه من جتفها وصدرها.
رجعت سألتها//نخله شكو...شبيج
شهكت بصوت عالي وكالت//علاوي كضه بيه ألتوبه بليل...عايني حتى شعري كطعه...وأشرت على ميز ألقريولة صدك عليه كوم شعر .
كتلها //شبي تسودن...!!
عاطت بقهر //أي تسودن...عبن صارله فوك ألاسبوع
ما حصل فراشه...يكلي أدوريلج حجج..
موش أنتي شاهده جانت عليه ألحبابة...
وأنوب ضيم فروخي صارلهم يومين مرضه...
وحايره بيهم ،، وحايره بالبيت...شصير أنا مكينه
خو ما مكينه...حتى ألنوم صار حسره عليه
هنا طبت علينه كميلة لأن صوت نهلة صار كلش عالي
وصدك محروكه دم....وتبجي بقهر...وهاي أول مره تشتكتي بهاي ألطريقه من علاوي صح تصير بيناتهم مشاكل بس أبد ما تنطي بي...تبقى بس تبجي
لو تكول ماكو شي .
كميلة سألتها//نهله شبيج...جاوبيني خل أفتهم منج
كالتلها//يمه عليج ألعباس هاي ترضين بيها
ورجعت طلعت متنها وشوفته ألها...وشوفتها ألدشداشه
وشوفتها كوم الشعر..
كالتلها كميلة//عليش هيج علاوي تسودن
كالتلها//يمه ألعباس شاهد عليه...ما صدكت فروخي ناموا...وحوري غفت...لفيت راسي ونمت
بقى ينده بيه يريده فراشه...
تورطت كتله//تراني كلش تعبانه...والفروخ هلكوا حيلي
حوري سودنتي من وره سنونها.
شو هو كام يعت بيه...ويكلي //بطلي هاي حجج
وكومي أريد حقي.
كتله//علاوي وداعت جهالي تعبانه باجر أعوضك
شو هو أتسودن عليه...وكام يجرجر بيه
ويريد أنطي بالكوة...يمه وألعباس مابيه حيل
جسمي كله يوجعني من ألتعب...وقلة ألنوم
من ما رضيت أستلمني كفخات...وشكك دشداشتي عليه
عايني حتى شعري كطعه...وملخ متوني...
وأخذ راحته غصبن علية...
يمه ألمزق كلبي من تفل عليه،،،من كام مني
ويكلي أنتي مو مال أحترام .
بس كالت يمه...وسكت،،،وضمت وجهه بيدها وكامت تشهك وتبجي بصوت عالي
كميلة ما حجت شي...خلت وطلعت من غرفتهم
أني أنقهرت عليها...والله حسيت بشعورها
وبهذا ألقهر من رجع محمد متزوج من سوريه
وما أقبل يوصلني...جان يأخذ فراشه من عندي بالكوة جنت بوكتها فد أنقهر...وأستحقر روحي .
رحت أخذت جهالها...وكتلها//دروحي أسبحي
وأني أداري فروخج.
هي كالت //بعد ما أظل هنا...حاجيلي عمي محمد يأخذني لأهلي.
كتلها//هسه دكومي أسبحي وارتاحي
ويصير خير.
أخذت جهالها...وغسلت ألهم وبدلتلهم
وكميلة حارت بيهم...
بين ما سبحت ألبنات كلهن
بتول ورقيه ونسمه ومسك وبدلت ألهن ومشطلتهن
وفاطمة فرت ألبيت...ونظفت كلشي يجي كدامها
نهله بقت عازلة روحها بغرفتها وبس تبجي .
صحت على فاطمة كتلها//خل نخبز فاح ألعجين .
كأمت تأفف وكالت//بعد ورايه غسل هدوم
فدوة أغديلج أنتي خبزي...وأنا أشيل عنج بغير مره.
ما كلت باطل...كمت شنكت ألعجين وخبزت
أجى محمد وأني أخبز وكف يمي...
أخذ خبزة حارة من ألطبك وبقى يأكل بيها...
سولفتله عن مشكلة علاوي ونهله .
كالي//علاوي صارله فتره مستهتر وسايك على ألبنية
أنا منتبه عليه هاملها...وما يحشم كدرها...
أنا أحل ألسالفة وألا ألوي أذانه .
صدك بس أجى أبوية من ألمرقد بعد صلاة ألظهر
وتلكته أذاعة مونتكارلو...وألعياره كامت تبجي
عودين نهلة تخصها وبت أختها ...
وهي ألصدك نهله زينه ويه ألكل ...وصدك هي خوش نخله...وكميله سوت علاوي مكطعها تكطع .
أبوية يتسودن من رجال يمد أيدة على مرته ويضربها
كال ألكميلة//أنتي بس أطلعي من ألموضوع وأنا أحلها
أنوب صاح على نخلة...وكعد يحجي وياها
ويطيب خاطرها...وهي لطشت بكولت//بويه أريدن أروحن لأهلي .
باطلة حاجتني من جنه نصب ألغدا سويه
وبشهادة بتها نسمه وبتول...يساعدن بشيل ألاكل ويانه ترى هن كبار ويفتهمن ألحجي ...
كالت //شدعواكم هيج مخبوصين علمود نهلة
قابل هي أول مراه يطكها راعيها .
كتلها//ترى نهلة حبابة ،، وخوش نهله
عيب على علاوي هيج يعاملها
شنو ما عدها أهل وهيج يجور عليها
أصلا أني أليوم حسيت نفسي كرهته
والله عيب عليه يضربها ...
لو ما هو يحبها جان شسوه بيها .
هزت أيدها وكالت//بالعافية عليها خوش عدها محامين
أحنه بطبعنه وره ما نتغدا نغفى شويه ...
وين يلا يجون ألولد من ألدوام أن جان علاوي لو باقر..
سجاد،،،وعون،،،وحمودي لا يلحكون علينه .
أني الفضول راح يموتني...أريد أعرف ألمدهربة شراح تسوي من يجي علاوي...
بس خلصت غدايه تمددت بالهول...
حتى محمد كالي //هااا شو انجطلتي هنا
كتله//تعبت ،، وروحي مسحونه من ألنساوة
وأني جذب أريد أعرف شراح يصير...
بس أنجطل بغرفتي ما أعرف شراح يصير بره ....
حتى ما غفيت زين...نومتي تعلعلت .
أجى علاوي سلم وراح ألغرفة...
شويه وطلع مبدل ملابسه...راح غسل وأجى كعد بالهول...نفس كل يوميه ينتظر نهله تجيبله ألغدة
بقى كاعد...ونهلة ما طلعت من غرفتها
شويه وطكت حوصلته...كام ألغرفته
شو طلع يسحول بيها...ويكلها//غصبن عليج تكومين تخدميني .
هي ما كالت باطل عاطت//والله ما أخدمك وخر عني
هو كام يدفع بيها ويكلها//صوتج من خرب شيب أبوج
ودمغها على راسها
هي عاطت //خاااااااله لحكيلللللي.
بتهم رقيه خطية خافت جانت مجطولة بالهول
كامت وكفت على طولها وتكله //بابا حباب لا تضرب أمي...وكامت تبجي
أني كمت ورحت عليهم...طبيت ألغرفتهم
هو بعد أسودن كام يكفخ بنهله
وكفت أحجزها عنها...وهو كام يصيح//هدددديل وخررري وألعباس أسكطج وأسكطها هسه .
أجاه باقر وكام يحجي عليه ما رضاله
لان شاف نهله تبجي...وتلم بشعرها تخربط من ألدمغات
هو بعد وين يشوف لو يسمع...أجته حاله ألصرع
مال سوادين...كام يهمش بنهله من ورايه
ويكلها //غصبن عليج تروحين تسويلي غده .
وهي تكله//عسه ما يكون هذا أخر غده بعمرك ما أسوي الك.
هو هجم عليها...مال واحد متحمل على وأحد
فزعنالها أني وباقر...وهو أدروش عليها
يسلكها راشدي هنا ... ويكفخها هناك
وباقر واكف بصدره وما يكدرله بعد شاش وتسودن
عيني هنا ويجي سجاد...أخذ بحيل صدر ودفعه طلعه بره غرفته...ويكله//ترى عيب عليك تضرب أم جهالك
بس هو تسودن بعد وين يسمع .
أجى أبوية...وطلعت كميله من غرفتها
كاموا يحجون عليه...و رزلوه لعبوا بي طوبه.
وكفوا ويه نهله .
وهو بس يصيح ويعيط فاير من ألأعصاب
ما يسمع من واحد بس يهدد بنهله
ويتوعد يذبحها ،، ويصلخها ،، وينعل وألديها
طلع محمد من غرفتنه مبدل ولابس دشداشته ألزينه
صاح هو واكف باب غرفتنه//نهله لمي هدوم وغراض فروخج وأطلعي جدامي أزتج لبيت أبوج .
علاوي صاح//شنووووو تأخذها لبيت أبوها هي بكيفك
جاوبه محمد بكل هدوء//أي بكيفي ونص
أسمع صوتك أدفنك بمكانك...عافه وطلع
نهله كامت تخمط بملابسها...وملابس جهالها
وتخليهن بالجنطه...وكميله كامت تساعدها وتلم بغراض ومميات وحليب الجهال...وتصيح//أني بيدي أزتها لبيت أهلها...تهدى علاوي أفندي لا تفزك بنعمتك
هو علاوي تسودن وكام يدبج...ويدك رجل هنا ورجل هناك...ويصيح// بس توصل ألباب ألشارع أطلكها
أبوية كاله//ألطلاك يرادله زلمة حوك
موش زلمه فاشوشي...يتقاوة بعضلاته على مراه
ضعيفه حال وبدن .
علاوي هنا من سمع كلام أبويه شلون ألواحد وكفخه على وجهه...سكت وكام يرجف من كثر أعصابة
لأن شاف ألكل وأكف ويه نهلة .
شويه وأجى محمد باب ألهول وصاح //يلا أم قسور وينج بويه أمشينه ورايه شغله ثانيه...
وأنتي مريتي هم أمشي ويانه .
أني ركضت ولبست ربطتي وعباتي...وشلت قسور
ورحت وكفت يم محمد...طلعت كميلة شايله حوري
ونهله تمشي وراها تسحول بجنطتها...وبيدها ثانيه
كايده رقيه
أبويه صاح عليها...وخله بيدها فلوس
كاللها//لا تطولين بالكعده بيت أبوج...ترانه ما نحمل فراكج وفراك ألفروخ
أنتي بنتي...موش مرت ألجاحد بنعمتة ....
هي بس تبجي...كلشي ما حجت .
رقيه راحت باست أبوها
كاعد بطرف ألهول ولام رجليه لصدره...
طلعنه واشوف سياره كمال بالباب
وعصامكو موجود هو يسوقها...
صعد محمد يمه بالصدر...وأني ونهله والجهال كعدنه ليوره .
كميلة بالبسكوت توصي بنهله وتكلها//لا تنطين براعيج جدام أهلج مصيرج تردين لحظنه...
ولا تطولين كعدتج هناك...من أجيج عودين ردي وياي والاحسن لا تكليلهم زعلانه...كليلهم ضايج خلكي وأجيت أرتاح يمكم جم يوم.
ألطريق كله نهلة بس تبجي ...
وأنوب رقيه تبجي وياها على الواهس.
سألت عصامكو عن هبه كتله //شلونها صديقتي
شو ما تجيبها علينه..؟؟
كالي //خررب شيب أبوها...موش مراه جانيلي عثه
أخذت ألمقسوم وولت لبيت أبوها زعلانه من عساها لا ردت .
محمد كاله//ليش ما تسكت وتخليني محترمك
تراك انت ألموخوش آدمي.
اني هم كتله//عصامكو ترى حرام عليك يوميه كاتلها
متكلي شبيك مسودن عليها ..
كالي //أم بتول واليرحم أهلج أنتي ما تعرفين شي
خليها تولي لا دافعيلها
محمد كاله//والله أنت العايل...وتدور على الزلة من جوة ألكاع...وألبالك بعيد لا تبقى تنبش عليه
جاوبه//وحك علي أبو الحسن الا أسوي ألبالي وعينك تشوف.
محمد عاط بي//عصام أنلصم يخوي ولا تخليني أشيش عليك هسه...وأكلب ألطريق كربله على راسك .
وصدك لحد ما وصلنه لبيت أهل نهله بعد محد حجه
بس قبل لا نوصل بشويه محمد كاللها//عايني عليه عمي...أقل ألاسبوع وأجي أردج للبيت
لا تكولين لأهلج متلاغيه ويه راعيج
أنا أخذلج حكج منه وروح هنديه تشهد عليه .
صدك نزلنه وياها...وأهلها رحبوا بينه
وعادي سلام ،،، وكعده وجاي...
حسبالك خطار مسيرين عليهم ...
واخوها طالب فد أنسان خلوق ودين
وأخوانها ألباقين فد حبابين...
وأنتصار تكولون وكعنه عليها من ألسمه
تحير شتخلي كدامنه...ولسانها ينكط عسل
وأكلتنه بملاكها ألحلو.
ألعجوز جدتهم...يمكن ضميرها يكرص بيها من هذيج ألسنين...بيوم طردتنه أني ونور من بيتهم
من أجينه عليهم...
بقت تسأل بيه ما صار عندي حمل جديد...
ومن كتلها//ألحمد لله صارلي ثلاث شهر من حبله...
هلكد دعتلي...وبالكوة كامت من مكانها
وراحت ألغير غرفه...شويه ورجعت بيدها
قطعه قماش ،،، ومكحله عرب
كالت//هذن بشارتج وأريدنج تبريني ألذمه بس أنتي عبنج يتيمه...وهاي نهيله تذكرج بالخير وتكول عليج تنكطين شرف وعفه...
أخذت ألقماش وألمكحله من أيدها
وكتلها//جدة من كون الله يرزقج بريحة ألجنه عبنج ذكرتيني.
هي كالت //خايبة تدني أحبنج...وصدك تقربت عليها وبوستها...
كالت//هذا القماش جابوا أليه من بيت الله صوغه
وما نطيته ألعزيز كلبني...عبن مستعزة بي
وهاي ألكحله تلوك لعويناتج...أنا بيدي سويتها
سعده كالتلها بالشقة والضحك//جدة موش توسلت بيج على ألمكحله...عليش ما أنطتيها إليه...لو هديل تفرق عبنها من طرف ألنسيب...
كالتلها//من عاب هذا ألبوز وبلا...هاي صوغه أخيتج
لا تنفسيها ،، وتحطين عينج عليها
هي سعدة ضحكت وكالت//عوووع أنفسها على أللون النيلي...لو كحلة ألعرب
شو عصامكو رد عليها وكاللها//هو أكو أحلى من كحلة ألعرب من تتوسد جفون ألريم ....
محمد دغه بخاصرته وكاله //أن شاء الله انت هم نفست صوغه مريتي...وكام يضحك
شويه وطلعنه من يمهم...
وأني بالباب شاورت أنتصار وكتلها//عودين نهله متلاغيه ويه علاوي...وأبوية ،، وأمي ،، ومحمد
وحتى باقر ،، لعبوا بي فلك...أنتي لا تبطيها يمج
بس أنطينه مجال أنجر أذانه ألهل تيس ألشامي .
هي خلت شيلتها على حلكها وضحكت كالت//جا بنتي معزة شاميه...وفروخها كشاتير عبن وأحدهم بعده هرفي ... بوستها وطلعت .
رجعنه للبيت...مرت يومين
وعلاوي عازل روحه عن ألكل...حتى لا يأكل ولا يشرب ويانه...أنوب زعلان عليه وعلى كميلة
ما يقبل نغسل هدومه ينطيهن الفاطمة تغسلهن
بوكت الضحى هستوني كليت بتنجان وحمست طماطة
وثرمت طماطه ناعمه ورشيت عليها عنبه
وفاطمة كاعده تخبز للغدا أخذت منها كرصتين حارات
وكعدت أكل أني وألبنات .
أجاني ابراهيم أبو راس ألثور
باب ألهول وعاط //هددديل أمي تكول تعاي أنتي وخالتي...بطنها توجعها...ورجع يركض للبيت.
أنوب كميله ما موجودة...طلعت توجب على جيرانه
مطهرين جهالهم .
أخذت بتول ،، وبلغت فاطمة...
ورحت لبيت أمي نوره ...
ساعه يلا وصلت لبيتهم...مابيه حيل أمشي أسحل بروحي...من وصلت لكيتها تفوج بالكاع...
وجهالها يمها...سألت على حسيون ...
كالت//طالع كروه للطهمازيه.
أنخبصت شريد أسوي...عاد دزيت أبراهيم على محمد
بورشه النجارة...كتله //روح شاوره كله أمي عدها ولاده تعال لبيتنه هديل يمنه
كمت طلعت جنطت ملابس نور وألجاهل هي محضرتها
ولملمت بيتها بسرعة...والله ماكو شي وسخ
كل بيتها نظيف .
أجاني محمد وعصامكو...
عصامكو كال //راح أزت الجهال لبيت ابو عطأ
وأقفل بيتهم...وأنت محمد أطلع بيهم للمستشفى
لا تمشون للدايه ما بينه حيل .
وصدك عصامكو قفل ألبيت وأخذ ألجهال لبيت أبوية
ومحمد أجرنله تكسي وطلع بينه للمستشفى
صلوات على ألنبي...نور وصلت مفوله
يمكن ما طولت ساعه وجابت بنيه ..
ما شاء الله خشنه وبيها شوفه
بين ما حولها لردهه ألنسوان ترتاح
الحمد لله أوضاعها زينه...أجانه حسيون
يالله أباوع عليه يريد يبجي ...خايف على نور
وهلكد تشكر من محمد...ويدعيلنه بالخير
ألبنيه سمتها نور (( فردوس )) تكول//كلش أحب هذا الإسم.
للعصر ورخصونه من المستشفى...ورجعنه لبيت نور .
محمد طلع طلعه حلوه راح جاب اثنين ديوجه
وذبحهن جريان دم على سلامه نور وألجاهله
يبووو حسيون تكولون محمد فزعله بكعدت عشاير
مو واجب وسواه وياه .
لليل وتجي كميلة...وفاطمة...وأبوية...وألبنات
وخوش جايبات وياهن عشا...
يالله حسيون يريد يبجي...كلساع وكال//والله ما أعرف شلون أجازيكم.
بقيت ثلاث ايام بيت أمي نور ...
الحمد لله هلمرة أني داريتها بخير وعافية .
وألجاهله (( فردوس )) مكابلتها نبأ الخايسة...وبتول
بس كالت وععع يتعاركن عليها يردن يشلنها .
رابع يوم وتجي أنتصار...باتت يم نور
وعجنت ألها وخبزت...وعدلت نضده فراشها
وطبختلها خوش غده دسم سوتلها فراسم وغدتها
وأنوب سوتلها خبطه ألجفت...
وكالتلها// أسبحي حتى أرصرصج...
وصدك للعصر وتجي كميله...وصارت لمه خوات
وهذيج ألسوالف الحلوه...والكعده الترد ألروح .
أباوع للجاهلة فردوس شو دخلت كلبي
من كمطتها...نكتت ملابسها وشاورتها بذانها
كتلها//يالرضيعه أنخاج بجاهج عد ربج
أريدن أشوفن نفس هذا أليوم...وكون هم أشيلن حمل بطني بيدي وأفرح بشوفته .
ألحمد لله عدا أسبوع على ولادة نور
وأني مرتين رحت ورجعت عليها...كميلة تناوبني.
وألا هي نور كالت بلسانها//وألعباس أني زينه ومابيه شي...أمشي ألبيتج وعينج على رجلج...
يلا رجعت لبيت أبوية...محمد ما يرهم من دوني .
من رجعت شو علاوي وجهه ثكيل عليه وما يرد سلامي
وكالي//حرامات ما غزر بيج ملح ألخوه
هيج كلبج ينطيج ادعين عليه...وتشيشين مريتي عليه........
يتبع .......