ألحلقة ألسابعة وألعشرون ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----///-------/////---------///
كبل ألناس من سم الحيايا تخاف
هسه ألناس تلدغ والحيايا اشراف
كبل ألحجي معدل كل دغش ما بيه
وهسه ألحجي مصفط من تفسره أصناف
كبل ألناس تمتاز بحجي ألطيبين
وهسه الطيب اليلبس أهدوم نضاف
كبل كعدة عمام ... ولمة محبين
هسه الكعدة غيبه ،، وغلطة ،، وأستنكاف
خليت القصيدة ناقصة شطرين
أدري ألناس حتى من القصيدة تخاف...!!!!
————//////———-//////————///———
أزهيران تسودنت بالزايد...وكامت تغلط وتحجي علية بصوت عالي...ماكسرت كلبي غير بس من كالتلي //
يا ك....أنا متاكدة هذا ألبطنج لو من علاوي لو من باقر
محمد سكط ما يخلف ...؟؟!!!
أني تسودنت وما سكتلها ... خليها تولي
صايرة شريفة براسي أزهيران ألوسخة
كتلها //شمدريج محمد سكط وما يخلف ،
لو ما ماشبع بيج تكردش بالمطبخ ...
وأني لكفتج لو نسيتي ... ؟!!
وأدري بيج تتمنين تنامين بحظن محمد ...
وأني متأكدة...محمد جرب بيج من رجع من سوريه
وهل نفخج وحبلج ... گبل لا أحبل أني.
أني بزيتها بهذا ألحجي...وهي كامت تعيط
وتقدمت عليه بسرعة...وتفلت بوجهي وكفختني ،
أني هم ما سكتلها هم كفختها...
وصار ألعياط ،،، وصريخ ألنسوان بفلس.
شايفين هاي ألهوسة مال نسوان...من أثنين يتعاركن
ومية وحدة مو يفازعن...لا يعيطن وكلهن يحجن سوية
شكو ،، وشبيجن ،، وأنتن صغار ،، وعيب عليجن
وماتنكسر عيونجن وأنتن صاحبات ألعزة وألمصاب.
وفد أثنين لو ثلاثة...يلتمن على وحدة من ألمتعاركات
ويسكطنها من ألكتل...هيج صارت ألعركة
أزهيران،،،وتغريد والله حتى سهى وياهن،
ومرت جاسم...خلني بالنص من هاي دفرة
ومن ذيج كفخة...بحجة أليفازعن بينة أني وأزهيران يضربني.
هن حقيرات وخبايث..
غريبهن غريب ... وحبيبهن حبيب !!
والله لو بس أعرف...ليش يكرهني جان أرتاحيت...
وأزهيران ثولتني...نامت بشعري كعدتني بالكاع ،
نور،،وكميلة،،وهبه مرت عصام،،وبسمة،،وندى
هذني يفزعلي ويفكني منهن .
هنا ألدنيا أفترت بية...من كثر ما شلعت بشعري أزهيران
صريخ وعايط ألنسوان...جاب ألرياجيل علينة
من طبوا ألولد علينة...عصام،،،وسلام،،،وباسم
ومحمد،،،وباقر....شافوا بعينهم شلون أني كاعدة بالكاع
وأزهيران تشلع بشعري.
عصام،،،وسلام تولوا أزهيران كفخات يلا عافتني.
محمد خايف علية كام يصيح//شكووو ليش تعاركتن؟؟
وباقر حار بية لأن ألجاهل صعد على كلبي من ألخوف
أنجطلت بالكاع...وكمت ألكف ألهوة بالكوه .
وكميلة تصيح// يبووو طرحن ألبنية
باسم طرد كل ألنسوان من ألغرفة...وكام يصيح عليهن
//أسكتن...وصوتجن ما أسمعه شهرتنه.
هنا أزهيران،،،وسهى،،،وأمهن أم جمال فرن ألسالفة عليه
وأم جمال خوش تمثل...وهي جبيرة ألحياية
شكت ثوبها...وكامت تبجي وتصيح على عصام وسلام
لأن ضربوا أزهيران//بعدة ساجت ما نشف ترابة
وأنتم أستكويتوا على خواتكم...
أبيت أبوهن...وبعزاة ومصابة تضربوهن...
الله يعرف من طول بعمرة...وخلاه يزوجهن حتى لا ينذلن جوة أيديكم عكب عينة .
وعاطت على محمد//أنت محمد من أهمدة بطن هندية ألنكلتك...وغم شارب هلال ألخلفك
بعزه عمك ومرتك تتهمك...وتطعن بشرف أختك وياك.
وكامت أدفع بناتها وتصيح//وأنتن أزهار وسهى
أمشن لبيوت أهاليجن
مالجن كعدة بعد بيت أبوجن ... !!
حجي أم جمال...وعياطها...وصوتها ألعالي
كلب عزة ومصاب رجلها ساجت
عزة ومصاب بيت أبوية فاضل ...!!!!
هي من كالت لمحمد هيج...وغلطت على أهلة
هو كايم ينفض من الأعصاب
صاح//أم عطأ أستري بنتج...وكوميها تمشي للبيت
لو هسة أحرك ال هاشم عن بكرة أبيهم
نور تريد تحاجي وتفهمة شنو ألسالفة
هي بس كالتله//أبو جاسم بس أحجي وياك..
هو كاللها //أم أبراهيم مو وكت ألحجي أعذريني
ألدخان صعد براسي بعد ما أعاين طريقي وين
كميلة...وندى ،،، يشلني منا ،، أوكع منا
كطعني من ألكتل حياية ال هاشم .
باقر كاله//أبو جاسم أخذ مرتك للمستشفى صدرها تنك
أم ناهض صاحت//تراها عيارة خوش تعرف تمثل
حتى تفلت من سالفتها ألغمة .
نور كالتلها //عمة خلي الله بين عيناج
متشوفيها شصار بحالها
خلتها أزهار...وتغريد بين رجليهن مردنها مرد.
كميلة صاحت//شنهي عمي ولية غمان
شمالجن هيج مردتنها مرد...ماخفتن الله بيها
ناس تدافعلي...وناس تحجي علية ويأزمون بسالفة ويألفون بالحجي.
محمد بعد وين تسودن من أزهيران ألحقيرة
وكفت كدامة...وكدام أخوانها وشمرت حجابها
يم رجليهم...وملشت شعرها ...
وتصيح //معير يخوية وأبن عمي
وما أشوفن شاربك عليك...أذا ما تأخذلي حكي من مرتك...ترضاها تكلي رجلي جرب بيج من رجع من سورية...ونفخج وحبلج قبل لا أحبل أني ...!!
أني أناديلك أبو جمال راعي بيتي...وأنت وياة أتفاهم
أني عكب عين أبوية ماعندي وآلي غيره... !!
محمد كلشي ما حجه...بس دنك وخلة أيدة على راسة
وكاللها//يجيج حكج يا بت عمي .
باوع علية عيونه تنفث شرار من ألأعصاب
كالي //كومي كدامي ألبيتج .
باالكوة كومتني نور وكميلة من ألكاع
هو أبد ولا حجة عليه...ولا رزلني كدامهن ،
بس لزمني من متني...بس شنو عصر أيدي عصرة شاطت روحي...وطلعني برة يمشي ويايه
يريد يرجعني للبيت .
باسم صاح وراه//أبو جاسم أتعوذ من ألشيطان
وكول يالله...ألسالفة يمي أنا ألمها ألك .
هو بالباب...أخذ ألسويج من كمال وصعدني بالسيارة
وكميلة تصيح ورانة //بس أتناني أجى وياك
محمد...خايب محمد أتناني أشوفن عباتي وين...
وهو ولا يسمع منها...شخط ألسيارة ورجعنه للبيت
ألطريق كله يدكن على ألسترين ويصيح//يالله ألصبر
بس نزلنة وطبينة للبيت صاح بصوت عالي
//شكووو...وشصار...وشنو هذا ألتلوص مالتج
كعدت بالهول أبجي...والله ميتة من ألوجع
وحجيتلة كلشي...وهو يمكن شرب ثلاث جكاير وحدة ورة ألثانية...بس من كتلة//ما سكتلها خليها تولي
صايرة شريفة براسي أزهيران ألوسخة،
مو جانت تتختل وياك بالمطبخ لو نسيت ... ؟؟
صاح //بدون لغوة زايدة شكتيلها ؟؟؟
كتلها//أني متأكدة محمد جرب بيج من رجع من سوريه
و نفخج وحبلج...گبل لا أحبل أني🤦🏼♀️
يمة هو يروح ويرجع بالهول...حرث ألكاع من كثر أعصابة...ويشمر كطف ألجكارة بالكاع...ويورث ألثانية
تقدم علية بسرعة...وسلكني براشدي فر راسي...
صاح //بنت ألكلب من دأنعل أبوج لأبو عشيرتج
أنتي وياها أكلتن خ... بثنين أيديجن...طبجن مرض
تجين تلوصين بالخ.... وتخليني بالنص شكلتي ألربج
ولج هاي سالفتج عليها حگ وحكوك ...
وكعدت عشاير وفصول .
ما الله هداني وسكتت...
وأني أشوفة نار وتنفث شرار ...
كتله//يعني أنت ما ضجت من كالتلي محمد سكط
وما يخلف...وألبطنج من باقر لو علاوي
وطلعتني مو زينة...ضجت عليها لأن حجيت حقيقتها ولكفتها قبل جانت تتخل وياك بالمطبخ 🤦🏼♀️
هو هنا فقد من الأعصاب...ودفرني على خاصرتي
والله من قوة ألضربة حسيت ألهوه أنكطع بريتي
وجلب بشعري وينفض بيه ويصيح //بنت ألكلب سالفة مضى عليها دهر ..
تنبشين بيها عليش...؟؟
ولج بوكتها من شفتينه وسكتي...سويتي علية فضل.
وكلت عليج عاقله .
ولج ألمفروض من أصبحت رجلج...هاي سالفة تنسيها
وبعد ما تفكين حلكج بيها...لو تذكريها حتى لو جنتي شايفتني راكبها...يالساقطة هسة أنتي شهرتي بية
موش بيها...ألمفروض تحسبين حساب ألشخصي وألهيبتي بين عمامي كبل لا تفكين حلكج.
ولج جانت لحظة زلة شيطان
وهي ألاجت علية...وجانت زعطوطة
جنت أمولي للمطبخ أشربلي كلاص زقنبوت
وهي ألاعترفتلي بحبها...وأنا صديتها ووخرتها عني
ولج عصام أخوية...قبل لا يكون أخوها ...
وموش أنا ألنذل ألامس شرفي وعرضي...
ولج أنا شرف وعرض ألغريب أخافن علية موش
عاد شرف أختي .
وبساعتها بلغت أمج ... وأبوج بالسالفة
خفت لا تكبريها وتسويلج قصة
وأبوج كالي //أنا أحجي وياها ،
ومن عدها وأنسد ألموضوع .
يا بنت سير ألحذاء أختاريتج وفضلتج عليها
لأنج بيضة أخلاق وشرف ...
وهسة أنتي بيش جازتيني...؟؟طمستي وجهي بالصخام بين أخوتي وعمامي .
ولج شكالتلج روحج...من كتيلها رجلي يجرب بيج
كو.... أنا وأجرب با أختي .
ولج جان ألحك ألج...وبهاي سالفتج ألجايفة
راح كل حكج...وأنا راح أكل تبن وأنلصم من وراج
وأنا ألممنون.
هنا أني شاغت روحي من قوة دفرتة...
وهو جلب بشعري وينفض بية...
ويصيح فاقد من ألأعصاب...سمعت كميلة من باب ألشارع تصيح//محمد شسويت بالبت...؟؟
عودين كمت أريد أختل وراها من عندة
أني كمت بحيلي من ألكاع...وركضت
وهو بعده مجلب بشعري...
بيش عثرت بطرف ثوبي من كدام...رجلي داست
على ثوبي...وأنجبحت على وجهي أنلزكت بالكاع
عطت//اااااااخ يمة
والله من قوة وكعتي...ولزكتي بالكاع
وصارت وكعتي على وجهي..أحس ألجاهل أنمرد أبطني.
وخصلة من شعري ظلت بيد محمد
دخلت كميلة...وباقر...وكمال
وهي كميلة شافتني هيج وعاطت//يمههههه عطأ.
محمد أنصك من ألخوف...وبقى بس ينكت شعري من أيدة...وحجه بخوف//هديل حاجيني !!
دنك علية قصدة يعدلني .
كمال...وباقر بحسابهم هو ألكتلني وهيج دفعني
كاموا يدفعون بمحمد...ويصيحون شبيك ووخر عنها
وهو يكلهم//ولكم وخروا بس أعاين شبيها
هو مخبوص...وهم مخبوصين ومحد يفتهم ألثاني وصارت هوسة...طلعوة يدفعون بي للحوش
أني بالبداية من ألخوف والهبطة ما أحس بيه شي يوجعني...بس راسي أحسة راد ينفجر
لأن نشلع ألشعر بيد محمد ...
وصدري قبط...كمت ما أكدر أتنفس.
كميلة كومتني...وهي ألخايفة أكثر مني
بس تكول//يمة أسم الله عليج
يالزهرة أم ألحسن حضري بنيتي
ولج يمة عينيني أعدلج
أخافن على ألفرخ خاف أنمرد
بالكوة كعدت على حيلي ألدنيا تفتر بيه
//يمة هوه ماكو صدري أختنك....
كالتلي//كولي يالله ولا تخافين هسة باقر يزتج للمستشفى .
كمت بالكوة وكفت على حيلي
شو ظهري أريد أعدلة ما أكدر ... !!
مكان ألدفره بخاصرتي شلني شل ...
كميلة كامت تسحل بية...وأخذتني للحمام غسلت
محمد كاعد يم ألتنور...وألولد وأكفين فوك راسة.
رجعتني كميلة للهول...لبستني ربطتي وعباتي
صاحت//كمال بعد أخيتك زتها للمستشفى
ما أعرف شجرالها.
أجى علينه باقر كال //يلا أمشن أني أوصلجن .
كميلة كالتلة //ما أصعد وياك سياقتك طايشة
خل كمال يزتنه.
طلعت أسحل بروحي...ما أكدر أتحرك
صرت دوشك مال كتل...ياهو ألجاي كاتلني.
باقر...وكمال...وياهم كميلة أخذوني للمستشفى
ومحمد ظل كاعد بمكانة بالحوش...ويشفط جكاير
بالطريق حسيت صار عندي مغص ونزل عليه شي
لزمت أيد كميلة...وكتلها //يمة بطني توجعني
كالت //أن شاء الله ماكو شي...لا تخافين كولي يالله
وبقت تقره قران على بطني ألحد ما وصلنه للمستشفى
بغاوش ألطورى...وهو شلون غاوش يلعب ألنفس
دخلت للحمام لكيت نازل عليه دم...
حولوني على ألردهه ألنسائية ،
شافتني ألدكتوره وسوتلي سونار كالت//وضع ألطفل عادي ماكو شي يخوف...
كتلها// وهذا ألدم ألنزل عندي ؟
كالت//عادي من ألوكعة .... !!
أنطتني بس حب مال تقلصات وكالت//روحي للبيت حالتج طبيعية...!!
أخذني باقر لغرفة ألتضميد علمود ألبخاخ وألاوكسجين
شوية أرتاح صدري .
رجعنة للبيت محمد ماكو....
أنجطلت بالهول ،
كميلة كالت//راح أرجع للفاتحة عيب من ألوادم
وأفتهم شصار ما صار...وأزتلج نور تجي يمج .
أني من ألتعب وألهوسة ردت بس أغفى ...
وبطني بيها...ومايزيد ألمغص
وكل هذا وغفيت...
ما أعرف شكد نمت ... لو شكد غفيت .
حسيت محمد ينده بيه//هديل شو حاجيني
شبيج هيج صايرة صفره ؟؟
فتحت عيوني ثگيلة...وراسي صاير دمام من ألتكفخ
كعدت ألدنيا تفتر بية...وعندي لويات تروح وترجع ،
ماحاجيت محمد...كمت بالكوة وكفت على طولي
وألدم جفت علية كام ينزل على رجلية غركت
محمد كلش خاف صاح//هاي ليش عندج نزف ؟؟!!
كميلة كالت مابيها شي وألفرخة زينة؟؟
كتله //ما أدري وين أمي نور أريدها ؟؟
كالي //هسة أجيبها ألج
وطلع مستعجل من ألهول .
هنا علاوي طلع من غرفتة...يمكن جان يبدل لأن لابس غير دشداشة كال //هاي شنو شبيج ...؟؟
كتله //علاوي جيبلي أمي يمكن راح أجيب
شو هذا من يمه خاف وكال //يمعودة كولي غيرها ،
يالله ... لا تخافين ... ياالله ،،
ولج كليلي شسوي شو أني خفت...!!
كتله //روح جيبلي أمي
مشيت للحمام وألدم يخر وراية...ويخط بالكاع .
تورطت كعدت بالحمام...ودم كام يفعر من عندي
كمت أرجف...ما أدري بردت
ما أدري من ألخوف .
هنا ونور كسرت علية باب ألحمام
تصيح //هديل وينج حاجيني شبيج
ماصارلها كميلة ربع ساعة من رجعت للعزة
بس صبيت جاي للنسوان وأجيتج
لأكاني محمد بالطريق يكلي عندج نزف.
فتحتلها ألباب...وهي شافت ألدم كامت تلطم على صدرها وتصيح//الله لا ينطيك محمد راح تموت بنتي من وره سوادينك.
محمد صاح//شبيها ؟؟
كالتله //الله لا ينطك،،،ولا يعافيك تعال شوفها دمها خلص
هو صاح //علاوي وين أمك راحت وعافتها
وحدها ...؟؟
علاوي جاوبة//أني أدري بيها وين
مو رجعت وياك نبدل هدومنة .
أنوب كال //أم أبراهيم وليرحم أهلج بدليللها خليني أزتها للمستشفى .
نور هلكد خافت علية...أنخبصت بيه خبص.
أني لزمتني ألرجفة من كد ألخوف
بين ما غسلت وبدلت...محمد راح جاب سيارة باسم وأجة...وأجت وياة كميلة...وعلاوي هم بقى رحنة للمستشفى.
وحظي ألفكر الأمريكان كاطعين ألشارع
ومصنكرين مثل ألمطاية...ما يخلون لا وأحد يروح
ولا وأحد يجي...وكله يصيحون نو و نو
ألافتهمناة ألمجاهدين ضاربين ألرتل مالتهم .
كملية كالت لمحمد//أرجع بية على بيت ألجدة أم صكبان خليها تعاينها بلكت تولدها يمها.
رجعنة محمد رجوع على درب ألقريه
ورحنة ألبيت ألجدة أم صكبان
من شافتني ألمراة كالت//والله ما أتحمل المسؤولية
على هذا ألنزف أنا متأكدة ألجارة مفصوله عن ألفرخ
أخذوها للمستشقى .
شكد حجت وياها كميلة...ونور حتى تجيبني
ماقبلت كالت// أخافن...والله ألبت تموت بيدي
وما أخلص روحي لا من ألحكومة...ولا من ألعشاير.
حتى محمد توسل بيها وكاللها//وألعباس ألج الأمان
وما أنسى فضلج علينة...بس دبريلي حالها.
كالتله//تعذرني ألصحة تسحب الإجازة مني
أخذ مرتك للمستشفى...لأزم يولدونها عملية .
شكد حجت كميلة وتوسلت بيها...
وكالتلها //الأمريكان كاطعين ألطريق ...
وأنتي تعاينين حالتها تعبانة...فدوه أغديلج جيبها .
كالتلها// أم عطأ تعذريني ما أكدرلها .
نور كالت//خل ألحك على بنتي...
أخذونه للجدة أم سعدون...أيدها عافية
وجنتها متدربة جوة أيدها .
والله محمد شخط ألسيارة...وأخذنه لبيت أم سعدون
يا الله أم سعدون صايرة مرة جبيرة
ولا هي ذيج ألمراة ألشافتني من يوم ما وكعت على هرش ألبانيا ...!!!
من شافتني كالت//نفس ألحجي ألحجته أم صكبان
كالت//على هذا ألنزف أكيد الجارة مفصولة عن ألفرخ.
جنتها من شافت حالتي...وشافت خوف كميلة ونور
كالت//أم عطأ ألخاطركم...ولان ألطريق مكطوع
راح أجيبها...بس أريد أربعة أوراق على تعبي وياها...!!!
كميلة كالتلها//أشمرهن حدر أنعالج...وفدوة ألج
بس جيبها أخذها ألنزف .
والله من أباوع عليها...أشوف شكلها وحدة خبيثة وحقيرة...شدتلي كانونة وخلتلي ربع بطل مغذي وضربت بي أبرة...يمكن ربع ساعة بين ما كميلة رجعت للبيت جابت فلوس وملابس للجاهلة من ملابس حوري ورجعتلي...أني لزمتني ألطلوكة كمت أفوج بالكاع
ولزمتني المراة العجوز أم سعدون
وجنتها أسمها أم أصيل
ونور ،،وكميلة ويعلمني شلون أطلك
وهي أم أصيل...كلساع كافختني على رجلية
وتكلي//شبيج فاهية ،، أدفعي ألفرخ راح يموت
أني ما أعرف...ونور وكميلة يعلمني شلون أطلك
هنا أم أصيل وعاطت// يا عمة ألفرخ خيال ... !!
خرررب حظي تورطت ... !!!!
كميلة عاطت //من عزة ألعزة ألخلفوني.
نور كالت //شنو خيال وحدة منجن تفهمني... ؟؟!
أم سعدون كالتلها//خالة ألفرخ نزل على رجلية
مو على راسة...هذا يتملخ ويملخ أمة وياة
أني من قبل بساع شابعة كتل ...
وصدري متنك ...
ومحمد دافرني بخاصرتي توجعني ...
وألنزف أخذني ...
ووجع الطلوكة ...
تعبت وجمدت ... كمت لا أخذ ولا أنطي
صكيت ... أحس جسمي كله خدر
وكمت بس أسمع...يمكن خلص دمي.
هي أم أصيل شكد ضربتني على رجلية
وتصيح// ولج شبيج بردتي؟؟
ولج أدفعي راح يموت ألفرخ
ولج أخذج ألنزف ساعديني...؟؟
أني عيوني كامت تغوش...وجسمي كلة برد
وشلون ألشي ألبارد...شي فد حلوة حسيتة
ثكل جسمي كلة...وصعد من طرف أصابع رجلية
وكام يصعد ليفوك على جسمي ...
بحيث من وصلت ألبرودة بصدري حسيت شلون ألصخرة ألثكيلة وتشمروها بالمي...هيج حسيت ألثكل صار بصدري...كمت ألكف ألنفس كوة ،
هنا تأكدت هاي لحظاتي الأخيرة بالدنيا
أشهد أن لا إله إلا الله...وأشهد أن محمداً رسول الله ....
عن جزء صغير من حقارة ألنساء أتحدث .......
حشى ألطيبات.....
يتبع ........