ألحلقة ألسابعة عشر ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----/////-----------/////-----
مرات السكوت شكد سوالف بيه
وعلى السكته صرت مجبور تلكاني
بس بداخلي كلمة احبك سيف
وخايف اعترفلك واكطع لساني
————//////———-//////————/////—
عدت الأيام...ورحنة للمحكمة كملنه ألعقد
والقاضي رجع عقدلنة عقد مؤمن ...
وكملنة ألمعاملة مال عقد ألمحكمة ...
يمه فد كيفت...هسة أحميد كلبي تسجل بأسمي وصار طابو...وسند...جبت الزنامة شايلتها بيدي كلش فرحانه بيها .
طبيت للبيت...وأشوف كميلة تشحط وعيونها ناطة
وأكفة على المغسلة...وتشمر على روحها مي
ركضت عليها //يمة أسم الله شبيج .
جاوبتني فاطمة جانت واكفة يمها//شربت كلاص حنه وشكهت بيها...متعاينيها شلون طلعت روحها
وشكتر كتلها لا تشربيها...وهي عاندت ألا تشربها
تريد تنزل ألحبابة جسمها مبوخ .
أني عرفت شنو قصدها من هاي ألسالفة...
أنقهرت عليها...وصفنت على حالها والله خطية
هي صدك مرأه جبيرة..مو مال تخلف هسة وتجيب ،
بس شنو ذنب ألجاهل تموته.
بقيت بهذاك أليوم بس صافنه...ما أعرف شلون أتصرف وأني أشوف كميلة...حارت شتسوي علمود تموت ألجاهل أبطنها .
هنا نزل باقر من دوامة...وكلنه مكيفين بجيته
وفاطمة كامت تتعاير...وأحنة كلنه مجموعين على ألغدة
بشرته هي حبلة...هو بس كال //ألحمد لله على نعمة
باوعت على نهلة تاكل وعينها بالماعون...
أبد ما شالات راسها...أدري بيها مقهورة لأن فاطمة حبلت مرة ثانية وهي بعدها.
وأني هم أنقهر وأغار من عدها ...
بس ما أريد أبين شي خاف محمد ينقهر.
هسة مو كاعد نتغدة...وفرحانين بلمتنه ألحلوة
ما الله يهدي لساني ويسكت...لا لأزم يحجي
سألت باقر...غير بعتبارة هو يدرس بالطب
كتله//باقر شنو يعني ألتهاب البروستات بالرجال ؟؟
أني ما عندي تفاصيل هواي عن سالفة.
شو محمد هنا شرگ باللكمة...وبسرعة كفخني على متني...كالي//ألزمي ألسانج وكومي ألغرفتج بسرعة
أني كلش أنقهرت...ليش هيج سوه ورزلني كدام بيت أهلي...عاندت وما كمت...لأن بس أكوم هسة أبجي كدامهم .
أباوع أبوية...وعلاوي...وباقر يباوعون على محمد
وأبوية سأله//رجعلك ألضيم...؟؟
هو ما حجه شي...بس باوعلي بخنزورة أنصكيت بمكاني
وحرك راسة يعني أي .
باقر كاله//أبو جاسم لا تتحرج ألمرض مابي عيب
وان شاء الله أشوفلك دكتور زين أختصاص بهاي سوالف .
أني ما الله هداني وسكتت ...
مو هسة أنكفخت وترزلت...غير أسكت...لا رجعت سألت
باقر كتله //ما جاوبتني شنو يعني ألكتلك علية
هو هز راسة وضحك ضحكة صغيرة مستهزء بية
كالي//ولج ألزمي ألسانج ...
حتى ألسيت ولف الأصلي ماسلم من ألسانج
كتلة //شنو هذا أنوب ؟؟قصدك سيت نوم مال عرايس
موديل جديد نازل بالسوك !!
يابوية أني كلت هيج...لو هم ألكاعدين أبوية وألولد
ماتوا من ألضحك .
بس محمد كام ينافخ...وكرصني من خاصرتي بقوة
وكالي//كومي ألغرفتج هواي أكلتي تبن.
زعلت وكمت من ألغدة ...
وباقر ألحقير يصيح وراية//هسة أبو جاسم يفهمج شنو ألسيت ولف ..
محمد لحكني لغرفتنة...وأدروش علية
هلكد رعد...وعيط...وصيح علية...بس ما ضربني
يكول//شهرتيني وفضحتيني
وأنا مطمأن بس عصام يدري بسالفتي...
من طلكت أنعام وذبيت ألصوج بيه ...
أول شي علمودج ...
وأصلا أنا جزت روحي منها...
ومالكيت غير هاي ألسالفة حتى أنهي كلشي بيها...
وصرت علج بحلوك ألوادم...
بس من حبلتي وطرحتي كلهم ألحجوا بطاري
أكلوا خ... وأنجبوا ....وهسة خوش شهرتيني...
ولج بعد أستحي أطلع لباب ألشارع .
هسة غير الله يهديني وأسكت ...
مو كاعد أشوفة عصبي ويرعد...لا ما أعرف أنجب
كتله//والله مو قصدي شي...عودين سألت باقر لان يدرس بالطب...بلكت يشوفلك علاج
صاح بيه//لا تسمعيني حسج لو هسة أجرم بأحوالج
كتلة //محمد لا تصيح علية...والله مو قصدي شي
وبعدين لا تطلع حركة حنتوشك ألنايم...ألما بي خير ويومية متمرض،،، بيه ...!!!!
يمة أني كلت هيج...وهو تسودن...نار وذبوا عليها بانزين
عاط بعلوا حسه//تعيرررررررررريني هديل خاتون
بالعباس ما تظلين بالبيت...
وألعباس هسة أطكج بجيلة وأعدمج...وأنعل شيب أبو ألخلفوج.
تقرب علية بسرعة...وخمطني من زيجي
ولوه ألقماش بيده...صاك على أسنونه والله خنكني ،،
سحبني بقوة...وفتح باب ألغرفة وشمرني بره بالهول
أنجبحت من قوة ألدفعة .
كام يصيح //ما تظلين بالبيت والله
خلف الله عليه أنا أللفيتج ولميتج من ألشارع
هيج تشهريني...وتفضحيني ...تعيريني هديل خاتون
أبوية...وألولد...وكفوا بوجه وهو تسودن علية
كبت بعد سوادينة...وطلعت شراره عصبيته
فقد كام ما يشوف ألكدامة...حار شيكول وحار شيحجي
عليه...أنقهرت لأن سواني أني وألبنلت ألموزينات سوية
أنوب من ألهوسة والعركة...وكلها أنشلشت
وأني من ألخوف من عندة...لزمتني ألرجفة
وكلبي كام يدك سريع...وبالكوة وكفت على حيلي
بس أبجي...وأباوع بالوجوة.
هو هنا دفع أبوية...وباقر وأجى علية بسرعة
جرني من شعري...ودفعني بقوة يم باب ألهول
ويصيح//وحگ علي ما تظل بالبيت
وأذا بقت لو أكتلها...لو أكتل روحي.
أني من دفعني...رجعت أنجبحت وكعت بالكاع
ما أعرف شصار بيه ... خفت خوفة أنصكيت
بس عطت بصوت عالي //بووووووية
علاوي ركض علية هو ...وسجاد
يصيحون بوجهي//لا تخافين أحنة يمج
كولي بسم الله ألرحمن ألرحيم
أني أنصكيت...وبس أبجي...وأباوع بوجوهم .
أبوية دفع محمد...وأجى علية...من شافني أرجف
صاح//كميلة جيبلي ألقرأن بسرعة لا تنصاب مره ثانية
نهلة...ركضت وجابت مي...وعلاوي طشه على وجهي
لزم أيدية يكلي//بس كولي بسم الله ألرحمن ألرحيم
لا تنصابين مره لاخ...ولج أحجي شبيج أنصكيتي
شو أحجي وياي ليش ترجفين .
بس كتله///أخااااف...بالكوة نطقت هاي ألكلمه
وأبوية تسودن...طبك ألقرأن بوجهي أكثر من مره
كام يوذن بذاني أليمنه ،
قرة اية ألكرسي على راسي بصوت عالي .
وهو محمد...طب للغرفة وبعد ما طلع
نهلة...وكميلة ودني بغرفة أبوية
وألولد يصيحون علية//سمي باأسم آلله.
لساني أنربط من ألخوف...ما أكدر أحركة
بس كمت أسمي بكلبي...وأقرة سورة ألتوحيد.
أنجطلت على قريولة كميلة وتغطيت...
بس شنو ألرجفة موتتني ...
شكد محمد يصير عصبي ويرعد...بس مثل هلمرة أبد ولا شايفته هيج...تحول وحش .
يادوب غفيت...
وفزيت صدري متنگ...أريد ألهوى ماكو...
هوه الله على ألكاع خلص..كمت ألكف ألهوى بالكوة
كميلة حارت بية...ركضت سوتلي كلاص معسل
مي دافي وخاشوكة عسل...شربته بالكوه
ما أكدر مخنوكة...وما فاد بيه
عاد راحت كعدت باقر...جان غافي بغرفتة
هو من درس بالطب...سواله صيدلية صغيره مال خشب
وعلكها بغرفته...وبعد عنده هواية شغلات يضمهن بالثلاجة...أجى علية وجابلي شراب شربت من عندة
وضربني أبرة...بين ما كميلة سوتلي جدر مي حار
علمود البخار يفتح صدري
ومن هذاك أليوم...ومحمد قاطعني
هجرني هجرة بنت جلب...لا يقبل أسويله أكل
لا يقبل اغسل ملابسة...لا يقبل أفوت للغرفة
حتى كام ما يباوع بوجهي...حتى كمت أفرش وأنام بالهول يم ألولد...
متت من ألقهر أنسليت...
وكمت على أقل أغنية أسمعها أكوم أبجي
وأبد لا أحاجي...ولا يحاجيني .
مر على زعلنه هنا شهر...شنو غديت تراب
بس أبجي ومقهورة...والله كمت أحسد كل بنيه
عدها بيت أهل ومن تتزاعل ويه رجلها تروحلهم
أني بهاي كطيعتي وين أروح...وين أنطي وجهي
حتى لبيت نور منعني أروح...كايل لكميلة//ألباب ألشارع ما توصل .
أنوب كام يلبس ويكشخ ويتعطر...ويطلع ألعصر
ما يجي لليل...ألف فكرة كامت تجي براسي
وكمت أفكر خاف راح يتزوج علية
والله متت من ألقهر.
أنوب ملامة نور ورزاليها أليه...كل ما تجي علينه
فتت روحي فتت...لان ما أعرف أتصرف ،
وما أعرف ألزم ألساني...
وما أعرف أتعلم شوية حياله ومكارة مثل فاطمة وغيرها...وهاي فطاريتي هي ألعمت علية
هنا يلا أفتهمت ألسالفة عيب...وميصير ينحجي بيها
وبالذات ما يصير المرأة تسولف بيها
لأن تعتبر تعير رجلها وتستصغرة
ويصغير عودين بعيون ألناس
والله أني ما أدري ألناس شلون يفكرون
يعني عودين ألجقة...هي مقياس للرجولة
والله حشى من أكول أبوجهه...تف على هيج تفكير خايس أي والله...ولا يحسبون احساب للصدگ والشهامة،والفزعة،والنخوة،والكلمة الزينة،والموقف الحلوه...لا بس ألجقة عدهم أساس المراجل
من كون عثة تاكل عقولهم ألخايسة.
هنا كميلة بطنها كبرت...وكامت تبين
ومو مال بعد تضمها...وهي أصلا متروسه...أحبنية
من يوم ألشفتها...فبينت بطنها بالزايد
وعلى أحسابها هي دخلت بشهر ألسابع...
لأن من راحت للتحليل...ألحبابة جانت غابتها خمس أشهر...وأبد ما حجت ولا كالت وكامت تلبس دشاديش عريضة...وما تطلع من ألبيت تستحي
ومن يسألن عليها النسوان تكلهن//مريضة ضاربتني ألشمس .
بس أبوية يدري...هي كايلتله
وهو كايللها//لا تسولفين ما تخلصين من أللسان ألهتلية
جنه مجمعين كلنة بليل نباوع على ألتلفزيون
طالعة مسلسل عراقي جديدة...والله كلش حلوة
أسمها ((مناوي باشا))...وحجيهم شكد حلو
يحجون بصراوي .
وهاي سعاد خاتون...تستخف
كلساع وكالت//أنا سعاد خاتون خاتونة ألخاتونات
حلكها حلك ألزوري محددته بقلم ألحمرة .
وألله أحسن واحد بالمسلسل...هو جوهر بيگ
كلش أحبة...فد رجال حباب.
وأموت على شخصية شفيق...شفوقي أبن بهجت أفندي
من حب حورية بت زكية ألداكوكة...وتزوجها غصبن عن أهلة...وأجت أمها زكية...تهز وتركص كدام بهجت أفندي...وتغني//أخذوا بنتي حورية وناسبنة ألافندية
تمشي وتهز...ترعش من فوگ ليجوة .
وأنقهر على قسمة أم نص ألسان...
زامل ألمطي لأعب بيها فلك ...
كون يمي...أاااخ ألا أهد عليه حمودي يمرعدة من ألعض.
هنا نهلة...كامت سوتلنه نجانة شامية
وأجت كعدت...وكامت توزع بالمنگاسات للولد
صلوات كلهم كاعدين...وزعتلهم...وخلت نجانة كدامنا ناكل ونباوع على ألمسلسل.
شو كميلة خلصت منكاستها...ورجعت على منكاسة عون
وانوب أكلت منگاسة حمودي .
ما الله هداني وسكتت...
شافين ألواحد من يزل لسانه...ويفضح ألشخص ألثاني
بدون ما يدري بروحة...كتلها//يمة كافي تاكلين شامية
لا تنفخج...وألجاهل يصعد على كلبج...وتكومين تتنفسين بالكوة...أدري بيج تتنسين على ألملوحة.
هنا ألهدوء صار يخوف...لو تنشمر ألابرة ينسمع صوتها
كلهم سكتوا ويباوعون على كميلة...
هي غمزتلي وكالت//من دهر فر ألسانج خوب كولي أنتي تتنسين على ألملوحة .
محمد بسرعة كال //أم عطأ شنو هديل حبله
حتى ما باوع بوجهي...يحجي بس وياها
أني أنقهرت من عندة...
كتلة//لا مو أني حبلة...ومنين أحبل من ألهوى
أمي كميلة حبلة...وألها سبع أشهر من حبلت
هي كالت//كون حباية تصيبج براس ألسانج...وبعد ما تكدرين تسولفين .
ألولد لعبوا بيها فلك...مزقوا عليها لحد ما ملوا
حاروا شسوا بيها...هي من فشلتها شمرت شيلتها
على وجهه .
علاوي كال//أبو عطأ عيني باردة عليك...
أثاريك بعدگ صاعود نخل تغبش .
وباقر يكله//بس كلي شلون صعدت ألنخلة
وماتخاف من عون وحمودي نايمين يمك
لا يفزون وتوكع عليهم .
أبوية بس يضحك...كامت تهتز أجتافة من ألضحك
غدة وجهه أحمر دم .
بس سجاد تسودن يكلها//يمه بربج صدك تحجين
بهذا عمرج...وتخلفين وية ألجناين
وين أنطي وجهي من جماعتي...باجر يعيروني
ويكلولي أمك تغار...تحبل وتجيب ويه ألجناين
أبوية كاله//أنجب شنو يعيروك أبن ألجلب شو ما تعرف تسولف... هذا رزق الله...ورزق حلال قابل أبن حرام
ويعيروك بي .
هو كام يصيح//يمة صدك يعني أنتي حبلة
يا الله يا فشلة ألفشلة من الوادم...مو هذا حمودي
أبو اذان...صار بطولج بعد شلج بالخلفة
هي من فشلتها...هفتة بممة نسمة بصفها
وكالتله//أبن ألزفرة رزق وأجى شلون أرده
وشكثر ردت أطيحة...بس لزگ ما رضى يطيح
محمد كاللها//لا والله أبو عطأ فلاح أبن فلاح
وخوش يلقح ألنخل.
باقر يكله// أي عيوني باردة علية
وخوش يعرف يلقح...وأللقاح عندة أصلي
علاوي كال//بوية جا شمالني ما طلعت عليك...
صاعود نخل أغبش...وألقح أعثوگ ألتمر زين.
محمد كاله//أبو حسين أنا...وياگ غمان
موش خوش فلح...بس أبو عطأ بالساحة عممممي
وكام يطگ أصبعتين ويغني//
لمن أشوف هواي يخدر شعوري ...
خدرت بالفانوس عدالي قوري ...
علاوي...سحب ألنجانة من كدام نهلة وكام يدگ عليها
وباقر هم كام يطگ أصبعتين...وجاوب محمد
ألدهر صاير چاي وألدنيا قوري ...
ليش أليحب يا هواي ينضرب بوري ...
علاوي هم شاركهم بالغنه...ويدك بالنجانة
يكفي حبيب الروح يكفي بواري...
أسست نص بغداد مي ومجاري...
محمد هو ألرد على علاوي و يضحك...ويطگ أصبعتين ويغني//وين البخت يفلان وتكلي مبخوت .. ..
صرت اشتغل دفان محد رضى يموت ...
باقر كوم عون ... وحمودي يركصون
وهو...ومحمد...وعلاوي...يغنون ويطكون أصبع
وعلاوي يدكلهم على ألنجانة
وأحنة البنات كمنه نصفك ..
باقر رد على محمد صوته يخبل...أحلى من صوت محمد
زين ألبخت وياك واصل لهل حد ...
احفر كبر للمات كالو عدل رد ...
علاوي جابوهم...وهو يدك على ألنجانة بس صوته مو هلكد حلو...كَالوا بعد سنتين ونوزع بيوت ...
تاليها حتى المات ما عنده تابوت ...
هنا محمد أستلم ورجع يغني
فيتر صرت يا ناس والعيشه كشره...
وين اليضب الروح بسبانه عشرة....
باقر رد علية//دورلي فيتر زين من روحي مليت
لا بدي لا رنكات بس شاصي ظليت
محمد رجع يغني وكام يأشر بيدة على ألولد ويضحك
شوفو زماني شلون من يأذيني ......
خلاني شجرة موز بين الشواذي ....
ويأشر بيده على ألولد
علاوي جاوبة//من كثر ما مشتاك يمكن انجنيت ...
أكل بصل مثروم حسبالي جكليت .
هنا باقر جاوب//من كثر ما مشتاك خبلت نفسي...
أشرب نفط بكلاص عدالي ببسي
هنا محمد كام يغني...ويباوع علية
كون ألجمال ألبيك يندار بيه ...
كلما أحن ... وأشتاك أصفن عليه .
باقر ضحگ بصوت عالي...وجر موال بصوت فرح
طلقات أسوي ألروح و لفراكك أحزن ..
و كلما تمر عالبال أرميلي مخزن
علاوي غمز لمحمد...وكام يدك بقوة على ألنجانة
اليكولك أني انساك كله انت اعمه ...
و انزله دك كلات وكسرله خشمه
هنا سجاد الله هداه...وعودين شارك وياهم وكام يغني
بطل وربع جريت كل قصدي انساك ...
تاليهه بأخر بيك...وبالمزه ألكاك.
أبوية هنا هفة بمنكاسة ألشامية سواها طشار علية
كاله //كووووم لا بارك الله بيك...ولا بصحبانك
يابوية ألكل ماتوا من ألضحك ...
محمد طفر...وكعد كدام أبوية وكام يغني
وين ألصلاة والصوم وين العبادة ...
لحكتني للبستان بتكم يسادة .
باقر رد علية وصاح بصوت عالي//أبو عطأاااااااا
اريد احفر التبليط و ازرع بتيتة ...
ليش اليحب حلوين ينهجم بيته .
محمد ضحگ بصوت عالي...وكاله//أبو نسمة
شغلتك داجة...عوفها تولي ما عوزك ضيم جديد
هذيج ألليله فد حلوة...وكلهم يضحكون وناصبين
على كميلة...وأنوب باقر يكلها//ماما شلون ألطفل بي حركة
وعلاوي يكلها//كونج تخلفين توم
واحد ناخذة ألنه....واحد لبيت محمد
بعتبارج أرنب وتخلفين هواي...وما تهتمين للواحد
لو للتوم .
وسجاد يكلها//عودين من يجي هم ميزي وفرقي عنه
ويمة رحمة للنبي أشربي حب مانع ...
ياالله عيب من ألوادم...ألنسوان ألبكدج زارن بيت الله مرتين .
وعون يكلها//أذا جبتي أني أشيله ولعبه وية حمودي.
هي طكت روحها...وماتت من ألفشلة
كامت جابت نعالها...ودكتني بي
وأني تخربطت بالكاع من ألضحك...
وهي تصيح//صوجي أنا أخذتج وياي وكلت بنيتي وتخفظ سري .
كتلها//قابل مراح تجيبين ويعرفون أنتي جنتي حبلة
ياالله عدت الأيام وهي تتختل وتستحي من ألولد
دكولها طبل...وشهروها ،
ونسوان ال هاشم ألحياية...وما يحبن يتعايرن
ويلومن بيها...ويكللها//شكد عيب...وعليش حبلتي.
وهي تكلهن//والله من راس حمودي وأنا وفاضل
متفقين نسوي خارجي...وهل صارلنه عشر أسنين
بس حظي بعد...وشكثر ردت أطيحة بس لطش
وما طاح .
أني بقت ألكلمة براسي...وماعرفت شنو معناها
بقيت أفكر بيها...وما الله هداني وسألت كميلة
شنو يعني...ولا سألت نور عن ألكلمة .
ومشت ألايام...ومحمد بعدة هاجرني
وعدت الأسابيع وألاشهر ،
وصار هنا شهرين محمد ما يباوع بوجهي.
بس شنو أنطحنت من ألقهر...غديت تتن
بس يورثوني...أكب وأشتعل وأحرك روحي .
نهلة خطية بقت دومها ضايجة ومقهورها...
كتلها//روحي راجعي للدكتوره...عليش تبقين كاعدة وتحمسين بروحج.
كالتلي//علاوي ما عنده...ويستحي يطلب من خالتي
واعدني بس يسلم ألشغل للوادم ويستلم فلوسة ياخذني للولاية أعاين حالي .
كتلها//مالج شغلة...ألعصر أخلي نور تاخذج
أني عندي فلوس صارتهن بقوطية ألنيدو .
صدك دزيت عون على نور وكتلة//خليها تجينه ألظهر
ولازم تجي ضروري...وتجيب جهالها تخليهم يمي ،
صدك نور أجت وية عون...ما بقت لوكت ألظهر
سولفتلها على سالفة نهلة...
كالت//ميخالف أني أخذها...وراح أكول لعلاوي أخذها ويايه...ما أكلة اوديها حتى لا يعاند خاف ينحرج
وما يخليها تروح .
صدك مشت خطتنة...علساس هي رايحة ويه نور
وهي هم أبد ما كالت ألعلاوي...خاف يطكنر وما يخليها تروح...خطية تحمس بروحها تريد جاهل
أخذتها نور وراحت للولاية...
شايفتها ألدكتوره...طالع عدها قرحة وكاويتها
وعدها ألتهابات...ما أدري فطريات
وميطتها كوووم علاج مال ألتهابات ...
وكايلتلها//ألبسي ملابس قطنية أبد ما بيها نايلون.
هي صارت شاطرة...وكالت ألعلاوي//علساس عليها ألحبابة...حتى لا يتقربلها...وكامت تلبس كله شورتات كودري علمود ألعلاج .
كميلة هنا دخلت بداية شهرها...وكامت تتلوى
تكول//من ألثگل ألفرخ نازل
وتبقى بس مجطولة .
هنا وعمتهم فليحة الحقيرة...أجت عزمتنه على عرس بتها تگ أنعال...أني ما رحت ... ولا نهلة راحت
بس كميلة...وفاطمة...ونور راحن...
وحيايه ال هاشم كلهن رايحات .
عدت يمكن أسبوع على عرس تگ أنعال
ومحمد ألعصر...كشخ هذيج ألكشخة
ولبس دشداشتة ألزبدة ألبيضة...وتعطر
وهو من ألصبح زين...وعدل روحة
ولبس ساعتة...ولبس محبسة ألجوزي الفضة
وسبحتة ألجوزية لفها على أيدة وطلع
لليل يلا رجع ..
بس شنو رجع مسلطن...وفرحان ويغني//
كلي يحلو منين الله جابگ...خزن جرح كلبي من عذابك
تلكيتة باب ألهول...لأن من طب من باب ألحوش يغني
باوعت علية...هو شلون ألانصدم بية ...
باوعت أثر عضة شكبرها بلعومة ...
بسرعة دفعني بكفئ أيدة ... وراح ألغرفتنة
أني هنا شنو...غير تنر وشمروه علية...وحركوني بي ويمكن قليل هذا ألشعور ألمريت بي
دموعي كامت تساكط بسرعة على وجهي
أنوب ماكو أحد كاعد كلهم نايمين.
لحكتة ألغرفتنة طبيت علية...أريد أفتهم من عندة وين جان...من طبيت لكيتة نازع ملابسة..باقي بس بالشورت
أباوع ركبته...وبصدرة...ومتنة كله عضات
ياالله أحتركت...متت من ألقهر...بس أبجي أختنكت
أريد أحجي ما أكدر ألصدمة خنكتني.
هو راح طلع ملابس...واخذهن راح للحمام يسبح
أني كعدت بالكاع ملخت روحي ...
شنو ملخت شعري ....
شنو كفخت وجهي ...
أنوب ما أكدر أحجي...لو أعيط بصوت عالي كلهم نايمين...متت من ألقهر...والله لو ميتة بهذيج ألساعة
ولا شايفته رايح يم غيري
سحلت روحي بالحيل ألباقي بيه...ورجعت لفراشي
غطيت راسي...وبقيت أشهك وأبجي
أذن ألفجر وأني لا غفيت...ولا لجلجت للنوم عيني.
ثاني يوم من ألصبح...هو هم كشخ وبدل وطلع .
أني شنو صبحت مريضة...أريد أتحرك ما أكدر
ما أدري شبية من ألصدمة وألهبطة وألقهرة أنحمست
ليش ما للظهر...وكميلة صارت عدها ولادة
وبقت تلوب بغرفتها...تستحي تطلع كدام ألولد
ما قبلت تروح لبيت ألجدة ...
ولا قبلت أدز واحد من ألولد على نور...
عاد علاوي أخذ نهله وراحوا جابوا ألجدة وأجمى...
أبوية أجى من ألمرقد متسودن عليها.
علاوي من راحوا جابوا ألجدة مار علية وكايلة.
وهي ما قبلت لا فاطمة...ولا نهلة يكعدن يمها
بس أني فتت يمها بغرفتها وية ألجدة وقفلت ألباب.
أني منا الله مطيح حظي...وكاتلني ألقهر على سالفة محمد...ألبارحه ما أعرف بي وين جان...وين راح ،
وكلبي ما أنطاني أسولف لأبوية ألصبح...
والله أجذب عليجن...ألصدك وبدون جذب ...
خفت أحجي لا تصير هوسة ومشكلة من ورايه...
أنجبيت وسكتت.
ومنا شفت ضيم ولادة كميلة...
وأني ما أعرف...ولا شايفة قبل وحدة تجيب
أحس روحي أنسحنت...وألكاع كامت أدور بيه
بقيت بس أسمي...أخاف أتخربط وأفقد ...
ويجلب بية المايسمى...لأن خفت .
كميلة جابت بنية ... فد صغيرة وناعمة
عوووع حشه خلقة الله تلعب ألنفس
كلها دمايه...وسخ...وقذاره...لعبت روحي
ركضت وزوعت وره باب ألغرفة...فرغت مصاريني كلها
هي كميلة سودة علية كلبها يمي...
كالت للجدة//فدوة أغديلج أم صبري كصي مسر ألفرخة على رجلها...حتى تفك جبستها وتصير عدها بزرة.
ألجدة صاحت علية.. رحت يمها...بعد ما أخذتلي
صفنه وسندت راسي على ألحايط...دخت ما أدري شصار بيه...كصت مسر ألبنية فوك رجلي أليمنه.
وأنوب مسحت ألبنية...ونظفتها...ولبستها ملابسها
وكمطتها...وخلتها بحظني.
كميلة كالت//هاي أبنيتج...مالي دخل بيها
من هل ساعة هي صارت بنتج ومسؤوليتج
بس أنتي بنيتي...وهاي ألفرخة هي أبنيتج ،
ألجدة ضحكت وكالتلها// كولي يالله أم عطأ
عمرج طولي...شنو تخافين من المثل أليكول//فروخ ألشيبة يتامة .
كالتلها//لا يم صبري...بس أنا كبرت بعد على مدرات ألبزره ودوختهم...وهي هم أختها وتصبح أمها.
أباوع على ألبنية...شكثر ناعمة وصغيرة
والله على سمن كميلة ونفختها...
كلت راح تجيب هايشة...تاليتها جابت گرادة
شايفين هاي الگرداة ألصغيرة التلزگ بذيل الهايشة
هيج كبر ألبنية...بالنسبه لحجم كميلة.
أخذت ألبنية وديتها لأبوية...فد فرح بيها
سمه عليها بسم الله ... و وذن باأذانها
وسماها بتول ...
وصدك من هذا أليوم بتول صارت بنتي
أني أغسل وابدل ...واحظن وأكمط..
كميلة حتى ما رضعتها...ولا خلتها بحظنها
كمت أشربها ممية...وية نسمة بت باقر
هي أكبر منها بسنتين نسمه مواليد ٩٨ جتي للدنيا بنهاية ألسنه .
ومن هذا اليوم أني صرت أم بتول ...
يتبع .......